Ka Leo o ka Lahui, Volume I, Number 14, 5 September 1889 — Ua Lohe ia Mai. [ARTICLE]

Ua Lohe ia Mai.

He wahi palu ka Kahu Hyde ma i ka poe a lakou i kapa aku ai, he poe Genetile, a he ino lapuwale loa. Aka, ua komo aku nei keia wahi palu i na Kumu Moremona e huli mai e na [hoahanau] lapuwale, a e kui lima ae kakou no ke koho balota e hiki mai ana, oiai, wahi a ke Kuko, he mau wahi kui nao wale iho no koe, paapono iho ke pani o ka pahu e kanu ia aku ai ka lahui Hawaii, ka Moi Hawaii a me na pono Hawaii o lakou a pau, a ala hou mai, ma keia kanu [bapetizo] ana, he lahui hou, he Moi hou a he ekalesia hou, a o Hyde ka pohaku kihi oia akalesia, a he Peresidena hoi ka Moi hou. Hoole ia mai, keia keiki

a ka nahesa ka mea nana i hoopunipuni ka makuahine o ka lahui kanaka o ke ao nei. Aole makou i hele mai no na hana o ke aupuni o keia ao, aka, no ke aupuni o Karisto mai ana. Ua mimino aku keia pohaku o ka Anekarista e like me ke poo o ka honu, a ua pau kona lohe hou ia ana ma ia ano. Pololei no hoi o Makua Dwinelle i olelo ai i na haipule hookamani a na hoomana hoole pope, ua punihei oukou i keia aupuni Hawaii, a ua poino oukou i ke aupuni o Karisto, nolaila, aole he kupono oukou e olelo he poe Karistiano oukou. Haina ka oiaio, i hoike no ka "OIAIO."