Ka Leo o ka Lahui, Volume I, Number 14, 5 September 1889 — [Ilegible] Ina Pela [Ilegible] [ARTICLE]

Ino! Ina Pela Io!!

I nehinei iho la, ua Mele mai kekahi mea imua o makou, a hoike mai la; ua hai ia aku ka lohe iaia no kekahi mea i manao ia e ka aoao o ke Aupuni e hana i ka wa e hookolokolo ia ai ka poe i pau iho nei i ka hopu ia no ka manao ia he poe kipi a ohumu me R. W. Wilikoki. A o kana i lohe ai, oia no keia: I ka wa e hiki mai ai ka manawa hookolokolo; e lawe mua ia mai ana kela haole Belegiuma o——— kona inoa, i hopu ia ai no ke kipi, a e hookolokolo ia ana oia imua o ke kiure haole; a mahope aku na hihia kiure Hawaii. O ke kumu kumu alakai i na kiure Hawaii ma ka lakou olelo hooholo, no ka mea, ina e ahewa ia ua haole Belegiuma nei, alaila, aole e hiki i na kiure Hawaii ke hoaui a kaalo ae i ka lakou olelo hooholo mai ko kela aku la, a o ka moekahi aku no ia a hoea ika hopena. O keia ka mea i upu ia e ka aoao o ke aupuni, a me he la ua hawanawana wale ia ae mawaho, a lohe ai ka mea nana i hoopua mai ia makou. He mea kaumaha no makou ka noonoo ana ae i keia mea, a he makemake ole makou e manaoio iho, aka, oiai ke hana ia nei kekahi mau mea ekaeka, a ke'ike ia nei na hoao ma na ano a pau a kekahi poe leo mana e kamoe ia na hauna o ko lakou inaina, ua hiki ole ia makou ke pale ae i ka manao ano hilinai i ka oiaio o keia lono. A oia ka makou i puana ae la— "Ino! Ina pela io!!" Aka, e kau aku na hilinai maluna o ka Aha no ka "hana ia o ka pono ina no e haule mai na lani."