Ka Leo o ka Lahui, Volume I, Number 14, 5 September 1889 — He Moolelo Nani -NOLIVA DIA. Ke koa Kavalia opio, -A I OLE,- O KA LIONA O HORINEDA. -A MEKA UI ROSINA O NOREWAR [ARTICLE]

He Moolelo Nani -NOLIVA DIA.

Ke koa Kavalia opio, -A I OLE,O KA LIONA O HORINEDA. -A MEKA UI ROSINA O NOREWAI

"O ka hakoko ana me na mea kaua, O ko'u manawa iho la ia e lealea'i, Nani ke puanuanu o ko'u wahi moe, E waiho 'la ma na kula palahalaha, Kahi a na kulukehau o kakahiaka, I hooma-u ai me na kulu anuanu." "A Knights Song." MOKUNA 1. I ka oili ana mai o ka malamalama o ka la e alohi nei, i panee manawalea ia mai e kona mau kukuna hikimua, ma kekahi o na kakahiaka molale maikai kalae malie o ke Kupulau, i kela mau la i hala lilo loa aku nei—aohe e kala kahiko, no lakou paha na wahi hoomanao moowini i koe, aia hoi, ike ia aku la he elua mau wahi waapa liilii ma na kapakai komohana o Norewai, i ka pakika pahee ana'e i ka pu'eone, e niau kolonahe ana me he pua pana ala no kekahi mau mokupuni pohaku papapa liilii e anee kikokikoi mai ana mamua pono ma kahi he mile hookahi me hapa ka mamao mai ka aina aku. A oiai, e opiopio ana no ke kakahiaka ia manawa, ua hoike pau mai a ka la e alohi nei i kona nani, me kona hookahuli pu ana ae i na ao honua o ka lewa i na hoolu'u paha'o-

ha'o panio like ole mai ka uliuli panopano a ke alohilohi me he dala ala, a pela hoi mai ke a'iali keokeo a ka lelo me he gula ala. Ke holo mama nei ua mau wahi waapa ala me ka puahi nui a ka launa ole, e eku ana hoi ko laua mau ihu no na moku papapa, a ke kapeku hala ole nei hoi na mapuna hoe palamimo a ko laua mau ko-lu i ka wai paakai mai kona ipuwai ae. A o ka haukawewe a ko lakou mau mapuna hoe lawe nihi, oia wale no na wahi hamumu e lohe ia aku ana iloko o ia manawa la'i-ku o ka hamau a me ka meha; no ka mea, iloko o ia mau hora hikimua o ka ehu kakahiakanui, e halii paa ana ke koloka o ka meha me ke ano anoano ma na aoao a pau a he ku hoi i ka eehia na hiohiona i ike ia ma ia kakahiaka. A iloko o na minute pokole wale no, ike ia aku la na hoe a ua poe ko-lu nei i ka pii like ana ae iluna mai ka ilikai ae, a ua kokoke loa hoi ua mau wahi halelana ala ia manawa, i kekahi o na moku papapa, a i ka nana aku, me he la, e makaukau ana ua mau waapa ala ia manawa e lele iloko o ka lewa. Puehu kau-liilii ae la kekahi au-

na manu aukai mai ko lakou ma @ like ole aku iloko o ka lewa me ke kani ana, oia hoi ka wa a ua mau waapa nei elua i haukawewe aku ai iluna o ke ako'ako'a o kekahi o ua mau moku papapa la, a ia manawa no hoi i ike ia aku ai ua poe hoe waapa nei i ka lele like ana aku maii ka waapa aku. O keia poe ko-lu lae ula a kaua i ike ae nei, he poe lakou i poniia malalo o ka oihana naita, a eia na mea i ike ia no lakou ia manawa. Ua lako pono wale no lakou me na pono kaua mai ke poo mai a na wawae; no ka mea, o ka ike ia mau mea oia ka mole o ka hanohano, ka waiwai a me ka noho lanakila ana, pela na mea i ike ia ma Norewai iloko o ia mau la pouliuli o ka hookahe koko. O ka hapanui o keia poe, e aahu ana lakou i na aahu kaua maoli o ke ano paa, oia hoi na kapa kila unahi i'a, i ulana ia me ka noeau iloko o ia mau la naaupo, me na papale kila nunui e kau ana maluna o ko lakou mau poo, a he kakaikahi loa o lakou e aahu ana i na kapa ili manoanoa o ka poe hahai holoholona, e uhi ana maluna o ko lakou mau poohiwi kihikihi a peleleu. Mai ka poe nae me na kapa kila a na kapa ili holoholona, e lawe ana lakou he pahikaua, koi kaua a me ka laau ihe, a he poe pukonakona wale no lakou a pau loa ma ka nana aku a ka maka; aka, o ka mea hilu loa, aole he wahi huaolelo i puka ae mai kekahi ae o keia poe, aka, o ka maluhia a me ka meha oia na mea i ike ia. E hoomanao e ka mea heluhelu, i ka manawa o keia mau waapa elua i hiki aku ai i kahi moku papapa, aole laua i hekau like aku ma kahi hookahi. Aole i pau.