Ka Leo o ka Lahui, Volume I, Number 14, 5 September 1889 — He Moolelo Nanea –NO– LATE MURANA. Ka Olali o na-Moana. Ebuehu—Ka Ouli o na I po Ekolu—Ka Nani Huna o Aruima—Ka Ui hoomahie o Serina, –A ME– Ka Nohea luli ole o Ratiela. He MAKANA I KA NUPEPA PUKA LA "KA LEO O KA LAHUI." [ARTICLE]

He Moolelo Nanea –NO– LATE MURANA.

Ka Olali o na Moana. Ehuehu—Ka Ouli o na Ipo Ekolu—Ka Nani Huna o Aruima—Ka Ui hoomahie o Serina, –A ME– Ka Nohea luli ole o Ratiela.

He MAKANA I KA NUPEPA PUKA LA "KA LEO O KA LAHUI."

Pane aku la ua Moneta Turo la: Makemake au ia oukou a pau ekolu e hana oukou i kekahi hana, a e uku aku no au i kela a me keia pakahi o oukou i 50 paona gula, e hana malu nae oukou, aole hoi e lohe ia e ke kekahi mea okoa. Pane like aku la kona mau kauwa: E ko makou haku; ua makaukau mau makou i na wa a pau au e kauoha mai ai, aole hoi makou e kamailio, ina paha ia he mea no makou e make ai. Ia wa i hookuu mai ai ua haku Moneta Turo la i kona leo i ka nahenahe a pane mai la oia me na huaolelo malie loa penei: E o'u mau kauwa maikai, ke makemake nei au ia oukou a pau e lawe aku oukou i ke keiki a kuu wahine me kana kane mua a maloko o ka muliwai o Sharuis e hoolei aku oukou iaia a e make no auanei oia ia oukou. Ina e hooko pololei ana oukou i keia kauoha a'u, alaila, e uku no au ia oukou i keia mau dala me ka oluolu loa, aohe hoi i kahe ka hou o ko oukou mau lae. Pane aku la kona poe kauwa, o kau mau olelo a pau, o ka makou no ia e hana ai, koe wale no o kou hai mai i ka wa kupono a makou e hana ai i keia hana. I na wa a pau a oukou e makemake ai, oia auanei ka manawa, wahi a ka Moneta Turo puuwai eleele i pane aku ai. Ina pela, i keia po no makou e hana ai, ina nae he mea pono ia i kou manao e ko makou haku. Ua hiki kela, ua like no ia me ko'u manao, wahi a ka Moneta. Ia wa, huli like ae la ua poe kauwa la a hoi aku la. Aia iwaena o keia poe kauwa ekolu he hookahi o lakou i komo hia ia e ke aloha no. Late Murana, oia no ke kahu lio. Ia lakou nae ma ka lakou apana hana, aohe a lakou mea noonoo nui e ae, aole no ka hana a lakou e hana ana, aka, aia ka paulele o ko lakou noonoo a pau maluna o ka hana manaonao a lakou e hana aku ana ia po iho. Mamua ae o ka uhi ana mai o ka noenoe poeleele, ua hui aku la o Late me ke kahu lio mahope o kekahi kumu paina kahiko, a ma ia hui ana o laua, ua pane aku la ke kahu lio: E Late kuu haku opio. He mea nui a kaumaha ka'u e hai aku ana ia oe, a he mea pono no hoi ia oe e hoolohe mai ina he makemake oe e lohe. E hoike mai ia'u ia mea, wahi a Late i pane aku ai. la wa, me ka leo malie i emi iho i ko ka makani kakahiaka, ua pane aku la oia: Ua hai ia mai ia makou ke kauoha i keia po, e lawe aku ana makou ia oe a hoolei aku iloko o ka muliwai o Sharuis, a e make no oe. Pane aku la o Late, he oiaio anei

ua hoike mai ua kanaka ino la ia oukou pela? Ae, ua hoike mai oia ia makou i keia la iho nei. Ae, ina pela ua pono no ko oukou manao maoli no anei ia, o ka pepehi mai ia'u e like me ke kauoha a ko oukou Haku? No'u iho, aole au e hana pela ia oe e kuu haku opio maikai luaole, wahi a ke kahulio, oiai, ua aloha au no kou makuakane i hala e aku i ka make, a ua aloha no hoi au nou e like me ka nui o kau mau hana maikai ana mai ia'u. Pehea la ke kuke a me ke kuene; e hooko ana paha laua e like me ke kauoha a ka haku o laua? Aole au i maopopo no laua, wahi a ke kahu lio. Ae, ina pela ua pono; e hana no oukou e like me ke kauoha, aia mai ia oukou mai ko'u pakele a me ke ola, wahi a Late Murana me na waimaka e haloiloi mai ana mai kona mau lihilihi mai. Ia wa, pane aku la ke kahu lio, o hele a e pau keia kamailio ana a kaua a e hele au no ka'u hana; a keia po hui hou kaua ma ke ano he pio oe na makou. Ae, wahi a Late Murana, a hookuu ae la laua i ka laua kukai olelo ana. Ua lilo keia nuhou kaumaha a Late i lohe ai i hana nui loa no loko o kona naau ia po, aole oia i moe iki, a i kela a me keia wa ana e noonoo ae ai no kona makuahine hana aloha ole, e hiolo makawalu mai ana kona mau waimaka. Oiai nae oia e naeiki ana no kona pilikia, a i ke kokoke ana mai i n hora liilii loa o ke kulu aumoe, aia hoi, lohe aku la no oia i ka nehe ana mai o kekahi mau kapuai wawae a wehe mai la i ka puka o ko ia nei lumi. Ia wa, hoomanao koke ae la no oia o kona hopena keia, o ka hooko ia ana keia o na olelo a ke kahu lio i hoike mua mai ai iaia i ke ahiahi. Ia manawa pu hoi, he mea e ka lele o kona houpo, holo ino ae la ke koko o kona mau aa koko, haakokohi mai la na waimaka mai kona mau maka poniponi mai, a malule iho la kona kino me he kanaka a make la. He mea kanalua ole no kaua e ka mea heluhelu ka noonoo ana, a no keia mau mea, oiai he make ua maopopo ka hopena, aole mea nana e wehe ae mailoko ae o neia poino nui, koe wale no ka molia ana aku i kona ola opiopio e lumai la iloko o ka muliwai puamauu a na lima o ke aloha ole. I ka lohe ana aku o ua Late ala i keia mau kapuai wawae a me ka nakeke o ka laka o ka puka; emoole no hoi, komo mai la he mau kanaka ekolu me na aahu koa a ehulali ana hoi ka lakou mau pahikaua ma ko lakou mau aoao. Ku like iho la lakou eko|u ma ka aoao o ka moe o Late a pane a la kekahi i kekahi, e hapai i anei kakou iaia me kona moe no, a i ole e hoala anei kakou iaia? E hoala kakou iaia e pono ai kahi a kekahi i pane ae ai oia no ke kahu lio. Ina e ala ana oia, alaila e hoopunipuni aku kakou iaia e hele kakou i ka holoholo a pela a anei kakou e pono ai, a e hooko pu ia ai hoi ko kakou mau iini. Ae like ae la lakou a pau a hala aku la iaia a ala ae la no hoi o Late Murana, e ala ana no oia a e i moe, a ua lohe maopopo no hoi ia i na olelo a pau i kamailio ia e lakou. I ko Late ala ana ae, ua ninau koke ae la oia. Heaha keia? (Aole i pau.)