Ka Leo o ka Lahui, Volume I, Number 6, 26 August 1889 — Hao la e Hapuku. [ARTICLE]

Hao la e Hapuku.

Ua maalo iki aku makou ma na huina o kekahi mau alanui o ke kulanakauhale nei i kahi la i hala iho la, a ua hui pu a kuka pu me kekahi mau makamaka. Ua nui no na lono i lohe ia ma ka makou kaahele ana, a ua moni maila ko makou mau pahukani a malama no ke kamailio a hoikeike aku imua o na makamaka i kela a me keia manawa a makou e ike ai he kupono. A mawaena o ua mau lono la i loaa mai, eia iho kekahi. Eia ke pai ia nei ka buke o na papa inoa o ka poe kupono i ke koho balota o kela me keia apana a puni na mokupuni, malalo o na kauoha a ke aupuni, O ka hana o @ @ @ a me ka wae ana ina he kupono a kupono ole e koho alii, a i ole o ke kapae loa no paha i ka inoa me ka hoonele i ka mana koho i kekahi kanaka aia no ia iloko o ka lima o kekahi o na Alopeka maalea nui wale o ka poai hoohinuhinu. Ua maalo ae keia mau mea imua o ka ike o ka makamaka nana makou i hoaui mai, a ua loaa iaia he wahi manawa e kuekaa Iki ai a nowelo wale aku ai no, a ua loaa iaia na hoomaopopo ana i ke ano "hao la e hao, hao ka inuwai malo ka lau laau," a ano nele loa ka hapanui o na Hawaii i ka mana koho alii, a he lehulehu hoi ka poe i kau ia na inoa iluna o ke kui omau o ka hiamoe mau loa. Ma kana hoomaopopo ana, wahi a ua makamaka nei, me he 'la, ma kekahi mau wahi lehulehu i noho nui ia e na Hawaii, he pomaikai ka ke loaa he wahi inoa hookahi i kau ia ua kupono i ke koho balota alii, aka, ina he haole a he mau haole kekahi, e ike ia ana ua kupono aku la ia mea a mau mea. A ma kana olelo mai no hoi, i kona manao me he la ua hoonele ia kekahi poe lehulehu i loaa ka mana koho alii mamua, a e loaa ole ana ia mana i keia kau ae, a ua kaha a kapae loa ia no paha ka inoa o kahi poe. O kekahi keia o na hana apuka a limanui eleele i pelapela loa i hana ia, ina pela io, aka, aole makou i kanalua no ka aa ole a noonoo keleawe ole o ua puulu 'la e lawelawe i kekahi hana ino e like la me keia, no ka mea, ua ike lakou i ko lakou nawaliwali ma ka pahu balota, ua hoomaopopo lakou ke aneane nei e ulu ka hulu o na eheu o ka mana hookele aupuni a lakou e ahaiku nei a lele aku mai ko lakou mau poli, nolaila, hookahi mea nui i ko

lakou noonoo a ma ka lakou mau ano hana a pau—e paa ia mana me ka nana ole i ke kumukuai a me na hopena. O ka haule o ka heluna koho o na kanaka Hawaii a me ka poe a pau a lakou i ike ai aia ma ka aoao kue i ka lakou mau ano hookele aupuni, oia ka mea nui a me he la o kela ae la kahi o ka hana. Nui a manuunuu ke umiapuaa ia, a eu no hoi ka ilo i kau a mea o ke ino o ua hoomaemae hoohinuhinu nei. He leo keia, he kauoha a he hoopaa ana i na Hawaii a me na makamaka, e noho makaala a e kupaa me ka lokahi no ka hoopau a kipaku haalele loa ana i ka poe kolohe a hana ekaeka mai ka noho'na lihi mana ana maluna o ka lahui a me ke aupuni.