Ka Lahui Hawaii, Volume III, Number 52, 27 December 1877 — Page 1

Page PDF (1.23 MB)

KA LAHUI HAWAII.
HOLY BIBLE
"Ua mau ke Ea o ka Aina i ka Pono."
BUKE III.}  HONOLULU, POAHA, DEKEMABA 27, 1877.  {HELU 52.

KA NUPEPA KA LAHUI HAWAII.
Paiia ma kela Poaha me keia Poaha.

          Ua koho ia o Rev. J. F. Pogue i lunahooponopono no na mea pili dala o ka Lahui Hawaii; oia wale no ka mea nana e ohi i na dala o keia pepa, a me ka mea a mau mea paha ana e koho ai i hope nona. Ma keia hope aku e hooili mal i na dala a me na olelo hoolaha me ke dala pu ma kona inoa. Eia kekahi, e noho ana o Mr. Pogue a i ole o kona hope ma ko makou keena i na Poaha a pau no ka malama ana i keia hana.
          He $1.75 ka auhau o kela pepa no ka makahiki, a he $1.00 no ka hapa makahiki.
          E hookaa mua ia ka auhau o ka pepa mamua o ka loaa ana i kekahi mea makemake e lawe.

NO NA OLELO HOOLAHA.

          E lawe ana keia pepa i na Olelo Hoolaha a na makamaka, e like me ke kupono, a e lawa pono a hoi me ka hoohaiki ole i ka huina o na kolamu kukulu manao, no ka uku haahaa.
          O kela a me keia makamaka e makemake ana e hoolaha, e hele mai ma ke keena a e hui pu me ka Luna Hooponopono.
          Aole e paiia kekahi Olelo Hoolaha ke ole e hookaa mua ia ka auhau.
          Eia kekahi, ke noiia aku nei na makamaka e hoouna mau mai i na mea hou; mai hooloihi loa i na palapala; e hai pololei mai i na manao me ke kuawili ole, a e kakau mai me na hua moakaka.
          E hoouna mai na Leta i ka LAHUI HAWAII.

S. B. DOLE.

LOIO a he Alakai ma na mea pili Kanawai- Ua makaukau oia e pale i na hihia imua o na aha Hoakolokolo a pau o keia Aupuni, me ke kakau ana i na Palapala Pili Kanawai, ma ka olelo Hawaii a ma ka olelo Beritania.  1 1y

Wai Hui o ka Hau!

E IKE IA ka Hale ma ka inoa o "BONANZA." Ke haawiia aku nei ka poloai i na makamaka keonimana a me na lede o ke kaona Alii, e kipa ae ma ka hale hookipa inu wai momona o ko oukou makamaka nona ka inoa malalo iho, a e loaa no ka hau! hoomomonaia (ICE CREAM) na wai momona o na ano a pau! hoohuihui ia e ka hau iniki o Nuuanu. O kela hale, he hale i hoomakaukauia no na keonimana, a he keena nani i hoomakaukau ia no na lede. E kipa mai, a o ka makepono me ka oluolu ke haawi ia'ku, oiai, he makamaka, a he kamaaina no Hawaii nei o  JOHN W. CROWELL.
2-1 y  (Keoni Koloela.)
Ma ka Hale "BONANZA" ma alanui Moi, mawaena o ka hale kahi umiumi a me ka halekuai o Dillingham ma.

E. O. HALL & SON
[E. O. HOLO MA.]

NA MEA KUAI I NA MEA MAHIAI
NA LOLE, PENA, AILA,
—A ME—
NA ANO LAKO E AE A PAU.
Kihi o Alanui Papu me Moi.  1-1y

WIL DER & CO.,
(WAILA MA.)

AIA MA KE KIHI O
ALANUI PAP me MOIWAHINE.
Ua hoolako mau ia me ke kuai ana aku i na
Papa me na Lako Kukulu Hale
O NA A PAU.
NA PANI PUKA!
PUKA ANIANI,
OLEPELEPE,
LAKA,
AMI LIILII,
AMI LOLOA.
PENA o na ano a pau,
AILA PENA,
VANIKI, &c.
Na Balaki Pena me Puna,
Na Pepa Hale me na Lipine Pepa.
Aniani, Paakai, &c.
O na mea a pau maluna'e, e kuai makepono loa ia'ku no ke Dala Kuike.  [3—1y.]

PAPA, PAPA.
AIA MA KAHI O
LEWE RS & DICKSON
(O LUI MA.)

KE KAHUA KAHIKO MA
Alanui Papu a me Alanui Moi
E LOAA AI NA
PAPA NOUAIKI o kela a me keia ano.
NA PAA NANI
A PAA NO KE KUKULU ANA I NA HALE.
Na Pani Puka,
Na Puka Aniani,
Na Olepelepe,
Na Pou, na O-a,
Na Papa hele,
Na Papa Ku,
Na Papa Moe.
Na Pili o na ano a pau!
NA PEPA HOONANI,
Na PENA o na wai a pau
Na Kui mai ke nui a ka makalii,
Na Ami-puka,
Na Ami-puka Aniani,
Na Ami o na ano a pau
NA AILA PENA,
NA AILA HOOMALOO,
NA AILA o na ano a pau
NA VANIKI
Na mea HOHINUHINU o na ano a pau.
Na Balaki o kela a me keia ano.
A KE HAI IA AKU NEI KA LONO i na makamaka a pau, ua makaukau keia mau hoa o oukou e hoolawa aku ma na mea a pau e pili ana ma ka laua oihana
—NO KA—
UKU HAAHAA LOA!
e like me ka mea e holo ana mawaena o
LAUA a me ka MEA KUAI
E hele mai! E na makamaka
A e lawa no hoi ko oukou makemake me ka oluolu a me ka maikai.

Aloha ka Nupepa Lahui Hawaii.

1
Ke aloha nei no makou la
Ia oe ka Nupepa e,
Nupepa Lahui Hawaii—
Pokole kou ola maikai.
No ke aha kou make ana'e la?
Ua piha mau i na nu hou,
Ua nui ka poe heluhelu.
No ke aha kou make ano?
2
No ka hapa anei o kou ola?
No ka nui o kou enemi,
A nui na hoohalahala.
O ka poe ma o a maanei?
E kalaia'e la lakou la,
Ke mihi nei no lakou nei,
Ke hai nei no a mahalo
Ia oe, ka Nupepa e,
3
Nupepa Lahui Hawaii,
Kou inoa ke nalo ae nei;
Kou mana no nae, e mau ana,
Kou ikaika ke komo ana'e
Ma ka Nupepa maa Kuokoa,
Kilohana, Pookela, aulii,
Aloha no kaua, aloha,
E ka Lahui Hawaii maikai.
HAWAII.

HE MELE AHA?

Heaha hoi ka Leo?
1
Heaha ka'u e mele ai?
I mele aha? e hai mai.
I mele kamalii anei
No ka h-a ha, a h-e he?
Kupono ia i na pokii,
Ka poe i ao i ka A, E, I,
A i ka Helu Kamalii,
A i ka hua A, B, C.
2
Hoolohe nae i kuu ninau;
He Kumunuia anei kau?
He Helu Kamalii anei?
A i ole, e wiki e kuai?
A lako i ke Kumumua,
A i ka Helu olua lua,
Malama pono i maemae,
I ole e lepo a nahae.
3
E hele mau i ke kula e,
Mai hele kiko a kike.
A hiki i ka hale kula,
Hoolohe pono i na rula,
Mai kolohe, mai hookuli,
Pane pono, mai mumule.
Hoopaa oe a paa pono
Na hua pa lua, a pa ono.
Kuawili, mai poina,
H-i hi n-a na, hina.
Ao ikaika i heluhelu;
Mai kulou a pelupelu.
4
Eia keia ninau hou;
He ipu baka anei kou?
Puhi baka anei oe?
Hoi aku, hiamoe.
Paakiki ka olo ou,
Paakiki no hoi kou poo.
Makehewa, loaa ole,
He ohana kou pololi.
Minamina anei oe?
Ole make e hiamoe!
Ole make e naaupo!
A ake no e naauao!
Lawe i kou ipu baka,
Ulupa a okaoka,
Hooko koke, ano no,
U'oki loa mai hoi hou.
5
Eia keia ninau hou,
Ninau nui a noonoo;
He haumana oe anei
No ke Kula Sabati?
Kula ma na la e ae,
Ma na la Sabati nae,
Mahea oe? e hai mai,
I uka anei? a i kai?
Hana lea, a auwana,
Pili ana ia Satana,
Ina pela, makehewa,
Pii no oe i ka lewa.
Ole oe e naauao,
Naaupo a mau, a mau.
Ina ake oe e ike,
Hana pono, hana like,
Kula ma na la e ae,
Kula ma na Sabati,
Ke kula oi a maikai,
Ola ke Kula Sabati,
Ka naauao o keia ao,
He mea ole, mea pau,
Ke loaa ole ka makau
Ia Iehova ke 'Lii mau.
HAWAII.

KA NANEA EEHIA!
—O NA LA—
I AU WALE KA MANAWA
—A O KA—
HIHIO ILIHIA A KA UI
LEON ROSE!
—NO NA—
KOAKA VALIA OPIO:
—NA—
SEPANIA EKOLU!
He Nanea Walohia o ka Weli Eehia.
MOKUNA X—HELU 32.

          Ke paio lua nei na makani, e hooluli ana i na laau Elema loloa, Oiai hoi ka uwila me ka hekili, e hoohanini mai ana, O na ao hakumakuma hoi, e hoohiolo mai ana i na paka ua mao ole.
          AIA hoi, i ka manawa i makaukau ai o ko maua ukana i kahi kauwa Raolo i hoopiha ai i na pu panapana a maua, ua lawe koke ia mai ka lio ia manawa, i kumu nona e puka ai iwaho; a he oiaio, i ka wa no o Raolo i puka ai iwaho e kii i ka lio, ia wa no i komo mai ai ke kanaka kauwa o ua mau kanaka la, a hoomaka iho la e ninini i na piha o na pu panapana iwaho me ka hoike mai hoi i ua kahukaa la, ua loaa mai ke kauoha ia laua mai ka Moi mai, e hopu ia'u ma ke alanui, a mamua ae hoi o ko makou wa e haalele iho ai i ke kulanakauhale, e holo e ana laua mamua o makou, a ia makou e hiki ai ma ka laua wahi e hoohalua ana me ko makou noho nanea wale, alaila, e hookunu iho oia, a e hookani ae hoi i kana huipa i ko laua wa e oili mai ai. A pela oia i hoike mai ai, a hiki i ka pau ana o ka moolelo i hoolala ia no ka hookahe ana i ko maua mau koko.
          A o keia iho la e Ka Mea Kiekie, na mea i maopopo ia'u, a ina hoi o ka'u mau huaolelo hope loa e pane nei iloko o keia ao, a haalele iho i ka pumehana o ka la. A e ahewa mai no hoi na kanaka hemolele ia'u, ina he mau mea huna aku koe iloko o kuu puuwai, i pili no keia hana. Hooki koke aku la wau i kana uwe kumakena nui, a kauoha aku la wau iaia e ku ae iluna.
          Pane aku la wau iaia, "Aole loa oe e kala ia aku, ina he apuhi keia mau olelo au e hoopahee mai nei, aka, e hoopakele no au i kou ola, ke hoolohe nae oe ma ka'u mau kauoha i na wa a pau. Pehea la na helehelena o ke kanaka au i hoike mai nei, o ke keonimana ia?"
          "He kanaka ano helehelena hoomakue, me he lunakanawai la. Ma kuu manao nae, no loko paha oia o ka poai hemolele."
          "He kanaka kino loihi anei oia, me na kue maka kiekie?"
          A ma kona ae ana mai, ua maopopo iho la ia'u, o Dona Padilla no ia. Ninau hou aku la wau i ke ano o ke kauwa.
          Pane mai la oia, he ano hooweliweli aku kona mau ouli, ma ka nana ana, me na maka hookokoe, a ua ano hoomakaukau maoli no hoi au i kuu nana aku iaia.
          I ua wahi kahu kaa nei e kakahele mai nei i ke kamailio no na mea e pili ana i ua mau kanaka la, ua hoomaopopo iho la au o Iakuisa no ia. Ala mai la iloko o'u na manao hopohopo no Ferenado, i keia manawa a'u e hoolohe nei no keia mau hana ano powa, anoai aole paha e nele ana ko lakou halawai pu ma na wahi mehameha kanaka ole o ke alanui, kahi hoi a keia poe puuwai aloha ole, e hiki ai ke hooko aku i ka lakou mau hana hookahe koko, maluna o ka mea hala ole, ina no iloko o ka manawa malamalama o ka la. Aohe a'u manawa e hoopau wale ai ma ka noonoo ana, oiai o ka wa pono wale no keia.
          Wehe ae la au i ko'u mau aahu nani ponoi, a komo iho la i na aahu o ke kanaka kahu kaa, a haawi aku la hoi i ua mau aahu nani nei o'u no ke kahu kaa a kauoha pu aku la hoi au iaia e kau ae oia maluna o ke kaa, a e lawe hoi au i kona wahi, a nonoi pu aku la hoi au iaia mai noho oia a hoao iki e kumakaia ia maua, o loohia auanei ka hoopai mainoino maluna ona mai ia'u aku, ke hana oia pela.
          A pau ae la keia mau haawi ana aku a'u i na olelo kauoha iaia, ia manawa no au i e-e ae ai maluna o kekahi o na miula, e like me ke ano o ke kahu miula, a o kuu pahikaua hoi, huna ae la au maloko o kuu aahu, a hawanawana malu aku la au ia Raolo kuu kauwa, mai hoomamao i kona holo ana mai ia'u aku, a no ka manawa no e lele hakakaia mai ai, alaila ua makaukau mau no hoi me na pahikaua no ka hoouka aku.
          A pau keia mau hoolala ana, nee aku la makou imua me ka luaiele mau ia ana o kuu puuwai no na manao he mau tausani, a hoomanao ae la hoi au, no kela ulia i halawai mai ai me a'u, maloko o ka luakini o Kalatavara, a hooiaio maoli iho la no hoi au, o kela malihini i halawai ai me a'u maloko olaila, o Iaku i sa no ia, anoai ua ukali hele mail oia ia'u a hiki ilaila; i loaa ai iaia ka manawa e apuhi mai ai ia'u, a poholo aku au iloko o kana mau hana pahele. O kela mau kulu koko i haule mai ai maluna o kuu lima, he hoike ana mai ia no ka poino e ilihia mai ana maluna o'u, ke ole nae au e makaala no'u iho a me kuu wahi kauwa hoi.
          Ua uluku hou maila ko'u manao no Ferenado, a ke hoomanao ae hoi no na ulia poino o na wa i aui hope aku, he kanalua oe ke olelo ae, ma ka apua wale no ke ola ana. Ke hoomau la no hoi makou i ka holo imua aole no hoi i upuupu iho, hiki aku la makou ma kekahi poopoo ano hanahanai o ke alanui, a ma kela a ma keia aoao, e kuninihi ana na kaiaulu pali, ua hele a po i ka ululaau, a he wahi hoi a ka manao e hoohewahewa ole ai ke kohao iho, aole e nele ana ka hookahuaia e na powa, no ka lakou mau hana lokoino.
          Aole hoi he mea nana e hoike mai ia makou, eia ka enemi ua kokoke mai, aka ke lia wale la no oloko no ia mea. Hookina iho la wau i ka holo o na miula, me ka amaamau ana i ka hili mao a maanei, a kuupau aku la ua mau holoholona nei i ka holo, hele kela a poniu ka ike a na maka, me ka manao ole ae i ka pouli a me ke ano kipopou o ke alanui, a me he mea la, aia makou a pau maluna o na eheu e lele ana.
          Aole mau leo walaau e ae nana e hoouluaoa i ka meha oia po, aka o ka halulu wale no o na kapuai o ko makou mau holoholona, a me ke kawewe o na huila o ke kaa. Ia makou nae e aneane aku ana e haalele hope ae i ua wahi ano pouli nei, a lana ae la ka manao ua hala la kahi o ka pilikia, no ka mea o ka hoea aku no hoi koe i kahi malaelae iki, ia manawa no i uina mai ai ke kani o na pu panapana, i kiia mai i ke kaa, mailoko mai o ka nahelehele.
          Ua lele launa ole ka hauli i kela manawa, aka no ka ike oleia aku o kekahi kino kanaka, nolaila ua hooholo iho la ko'u manao, aole e manao aku ia mea. Haawi iho la wau i na mapuna uwepa kiani o Hilo ma ka aoao o na miula, hele kela a mo'a puehuehu launa ole. I keia manawa me he mea la, ua komo aku la ka manao hoonaukiuki iloko o ka ene m i no ke kanaka kahukaa, no ka hooko ole aku i na mea i kukaia mawaena o lakou, nolalia ua kiia maila ia'u kekahi pu panapana, me ka manao kuhihewa paha, owau no ke kanaka kahukaa, aka ua kapae ae la ka poka mai ia'u aku, a ku pololei ae la i kekahi o na miula, a oki koke iho la ko makou holo ana imua, a ke kunewanewa ae la hoi imua a ihope ka hoki i ku iho la i ka poka. Aole no hoi i emo a kiia maila kekahi pu kapoohiwi iloko o ke kaa, a na ka uwe leo nui ana o ke kanaka iloko o ke kaa, ka mea nana i hoike mai, ua holopono ia kipu ana, a ua ai aku la hoi ka poka iloko o ka io, o ke kanaka kahukaa.
          Ua hiki loa ia'u ke hoomaopopo aku, ma ka heluna o na kipu ana mai a ka enemi, ua ano pau ka lakou mau piha mua; kahea koke aku la wau i kuu kauwa e ukali mai mahope o'u, me ka maua mau pahikaua e oaka ana i na lima. Lalama koke aku la maua maluna o ka pali, kahi a ke enemi i kipu mai ai, a he manawa ole hoi, a komo aku la maua iloko o ka ulunahele, me ka halawai ole mai me kekahi ulia poino, no na kipu panapana ia ana mai, no na manawa ekolu.
          Hiki aku la maua ma ke kae o ke kaiaulu, me kekahi mea ole nana e akeakea mai; aole no hoi i hiki ia maua ke ikemaka aku i ka enemi, iloko o ka pouli aaki; a me he mea la na lakou i alakai i na manao koa, no ke ku ana mai e paio he alo a he alo. Mahope iho o ko maua hakilo ana, me ka noii ana ma kela a me keia poopoo, anoai ua pee ae lakou ma kekahi wahi pouliuli, ua hoomaka aku la maua e hili i ka maua mau pahikaua ma kela a me keia wahi, me ka houhou hele ana hoi maloko o na opu weuweu a pau e ku mai ana imua o maua, a ua hoomau aku maua pela imua no na keehina wawae he kanalima.
         A no ka ike ana iho, he mea waiwai ole ko maua naku hele wale ana no, ua hoopau ae la maua ia manao, a hoi hou aku la i ke alanui; ia maua nae i hoea aku ai i ke alanui, aole ke kaa a me na mea a pau, ma kahi a maua i haalele'ku ai. Iwaena o keia wahi neoneo, iloko hoi o ka pouli pilipili kanaka ole, ua loaa iho la ia maua ke kulana, e hookupilikii ia mai ai o ka manao.
          Aia no kuu mau palapala a me o'u mau paiki lole iluna aku la o ke kaa, aka aole nae he mau leta mai ia Ferenado mai, e ike ia ai la hoi ka maua mau olelo hana e Dona Padila. O ka mea nae i maopopo loa, ua holo puiwa pu aku na miula a pau, i ka manawa a ka miula i eha e lauwili ana, a ua hala aku hoi me ke kanaka kahu kaa. Hoomoali aku la no nae maua i ka naue ana imua iloko o ka pouli, a ua laki loa nae maua no ka mea, ua loaa koke aku la no ka lio o Raolo ia maua e ku ana, ma kahi kaawale he haneri iwilei ka mamao, mai kahi aku i hoomakaia ai ko makou powaia ana.
          Ee ae la maua a elua iluna o ua lio nei, a holo aku la me ke akehele wale no, oiai o Raolo e hauoli ana no ko maua eleu a koa hoi, i ka hoao ana e hele aku imua, ma kahi a ka enemi e hoouka mai ana, me ka ikemaka ole ia aku. Me ia kauaheahe wale no ko maua hele ana aku imua, aole nae i halawai mai me maua kekahi meheu no ke kaa. I keia wa ke wehe mai la ke alaula, a ke pualena mai la hoi kaiao, a i ka wa i pahola loa mai ai ka malamalama, a ahuwale hoi ka ili o kanaka, hiki ana maua ma kekahi wahi hale o ke kanaka mahiai, e ku ana ma ke kae o ke alanui.
          Lele iho la maua ilalo, me ka lana no o ka manao, e loaa mai ana ia maua kekahi mau kokua ma keia hale, ina nae hoi aia ilaila ka puuwai a ke aloha kahi i noho ai. I loa no nae ia maua a ku ma ka puka o ka pa, oili koke mai la no ka haku mea hale a ku ana imua o maua; a me ke ano akeukeu, ua ninau koke mai la no oia, ina paha o maua na kanaka i powaia ai ma ke alanui i ua po ala.
          Ua kahaha loa wau, no kana ninau ana mai no ia mea, aka ua hooia koke aku la no au iaia no ko maua hoaoia ana mai e powa.
          Ia manawa hoike maila ua kanaka mahiai nei, he elua wale no hora i hala ae, mamua o ko maua hiki ana aku la ilaila, ua kikeke ikaika maila kekahi kanaka ma ka ipuka o kona pa, a oia no hoi kona manawa e ala'e ai no ka hele ana i kana hana, oiai o ko lakou maa mau ia ia ma ia wahi, a iaia i hele aku ai a ku ma ka ipuka o ka hale, me ka ipukukui helepo ma kona lima, ia manawa no i hele uluulu mai ai he elua mau kanaka, a hopu mai la iaia, me ke kauoha mai e hahai aku oia mahope o laua, a ke ole oia e hooko i ka laua mau olelo, alaila e pau koke ana kona ole ia minute no. I ka wa i puka maila kela mau leo weliweli, aohe ana mea e kue aku ai ia laua, aka o ka hoolohe wale aku no.
          Ia lakou hoi i hoea aku ai i ke alanui, aia hoi ke kaa e ku mai ana, a ua ike aku hoi oia i kekahi mea kino kanaka e noho mai ana iluna; ia manawa no hoi i huli mai ai kekahi o ua mau kanaka la, a pane mai la iaia nei, Ea, e lawe oe i keia mau ope palapala a me keia mau paiki ili, a ina e hoea mai mahope kekahi poe kaahele, alaila e haawi aku oe i keia mau mea ia lakou.
          Hakukoi mai la loko o ka manao, no ka maopopo ole o ka mea pono e hana aku ai, me ka hopohopo no o manaoia mai auanei, owau pu kekahi i lawelawe iloko o keia hana powa me ka pakaha wale. He kahaha nui hoi ko'u, no ko laua manao ana e haalele mai i keia mau mea, ke ole laua i lawe mua i na waiwai makamae a pau o loko.
          Nolaila e na keonimana, wahi a ua kanaka mahiai nei, aole i kae mai kuu makau, i ka laua ala noke mai i ka hooweliweli e lawe i kuu ola, a mahope o kuu hoahu ana i na mea a pau i kahi hookahi, hopu iho la au i kekahi pahu ili a auamo ae la e hoihoi iloko o ka hale, a ia'u i hoi aku ai iwaho, no ka lawe ana mal i na ukana i koe, aia hoi aole ua mau koa Kavalia nei elua a me ke kanaka iloko o ke kaa, a me ke kaa pu hoi, ua hala aku la.
          O kekahi mau puolo hoi elua, a ua mau kanaka nei i lawe mai ai mailoko mai o ke kaa, ua kikohuia me na aweawea koko, a holo ae la ka maeele o kuu puuwai, anoai paha ua powa ia kekahi kanaka e keia mau powa lokoino; a no kuu ike ana aku nei ia oe, ua lana ae nei kuu manao, aole o kou haku kai powaia, a ke hooia aku n ei no hoi au ia oe, mamuli wale no o kuu hookikina ia ana mai e kela mau kanaka, ke kumu o kuu ae ana aku e lawe mai i keia mau waiwai.
          Iloko o kona manawa a pau e kamailio ana, aole au i kahamaha iki i kana olelo ana, aka, he hoolono malie ka'u hana. A i ka pau ana o kana kamailio ana, pane aku la au, Ke manaoio aku nei au i kau mau olelo, e kuu makamaka hoopono. Ia manawa no hoi au i wehe ae ai i ke kapa kahu kaa a'u e aahu ana, a pane hou aku la au; E ke hoa, ua kuhihewa paha oe ia'u he kahu kaa io au, ma o keia mau lole la, a'u e aahu nei oia ano oihana. He kulana kiekie ko'u, aka ua hoaoia mai nei au e powa ia ma ke alanui, a ma na mea a pau au i hoakaka mai nei, ua hiki loa ia'u ke koho pololei aku, no'u wale no ia mau waiwai; ina hoi pela alaila aole e nele ana ke kau o keia inoa o "Denia." Ua hiki anei ia oe ke hoakaka pono mai i na hiona o ua mau kanaka la?
          Pane mai la ua kanaka mahiai nei, aole au i ike pono aku i ko laua mau helehelena, no ka pouli loa; ua hoopihaia nae laua e na manao inaina, e hoopuka ana i na olelo pelapela, me ka hailiili ana no ka huhewa ana o ko laua mau manao. Lohe aku la nae au i kekahi o laua e olelo ae ana, he mea pono ia laua ke holo loa, a o kekahi kanaka hoi, namunamu wale ae la no, aole nae he maopopo pono o na huaolelo.
          Ua hauoli loa iho la au no keia mau olelo hoike pololei a ua kanaka nei, a ke hoomanao ae nei au, o Toromesa kona inoa, he kanaka oluolu loa oia; a he hookipa hoi, a ua hookipa ia aku la maua iloko o ka hale, a waihoia mai la imua o ko maua alo na mea ai i hiki ke hoopale ae i ka makaponiuniu, mahope iho o ka aui ana aku o na mea o ka po i hala.
          Aole loa o'u manao kanalua, mamuli o na aweawea koko e palahea ana ma na ope, ua pepehiia ke kanaka kahu kaa e laua; Iloko o keia mau ulia poino a pau, ua lilo no ia i mea nana e hookupilikii i na noonoo, aka, ua hoolanaia mai ka manao, no ke kokoke ana aku i ka home, a me he mea la eia imua o kuu mau kii onohi na kula uliuli aloha o ka aina o Gerenada, e hoopua mai ana i kona nani. Ua hoohiaaiia ka nana ana a na maka, maluna o ka nani o na mea ulu like ole, i kahikoia me na waihooluu o kela a me keia ano.
          O ka manawa makalii no ia, nolaila ua lilo i mea e waiolu ai ka manao, no ka pala memele maikai mai o na hua ai.
          Ua wehe akea mai la ka mana lani i na hale papaa o ka honua, no kana mau kamalii, a hookahi wale no mea i makemake ia, o ka mea puuwai aloha a me ka manao haahaa, e pahola ae i ka hauoli maluna o na mea a pau.
          Mahope iho o kekahi mau ho ra o ka hooluolu ana, hoouna aku la au ia Raolo, e holo loa i Toledo, a e lawe mai i kaa. Iaia i hala aku ai, ua hoohala iho la au i ko'u manawa me na lia ana, e hoohauoli ai i ka manao, i hoomahuahua ia mai hoi ka olioli e na hiona nan aina molale oia aina. Ia'u hoi e noho ana me ka auwana ana o na noonoo maluna o keia mau ouli, uiuiki mai la iloko o kuu lunaikehala, ke kahoaka o Vireginia, a me na mauna kiekie hoi, nana i hookaawale ia maua, me he la he moana kai okoa no ia e hooki ana i ko maua halawai hou ana aku.