Ka Lahui Hawaii, Volume III, Number 51, 20 December 1877 — Page 1

KA LAHUI HAWAII.
"Ua mau ke Ea o ka Aina i ka Pono."
BUKE III.}  HONOLULU, POAHA, DEKEMABA 20 , 1877.  {HELU 51.

KA NUPEPA KA LAHUI HAWAII.

Paiia ma kela Poaha me keia Poaha.
H. H. PALEKA,  Luna Hooponopono.
He pepa i hoopukaia i kela me keia hebedoma no na Ohana a me na Ekalesia o Hawaii; he mea kokua i ka noho pono ana o na ohana, ka maluhia o kanaka, a me na pomaikai kino a uhane o ka Lahui Hawaii. "Aole paonioni; aole haanui; aole hikiwawe ka huhu; aole noonoo ino."
O na Kumumanao a pau, na Nu Hou o kela me keia ano, na Mare, Hanau, Make, e kakau mai i ka Luna Hooponopono, a e paiia no ke kupono.
Aole e aeia ka pilikino, ke kuamuamu, ka hoino, a me ka huhu, a ua makemakeia ka hoohoihoi, hoolana manao, hoonaauao, a me ka hoopono.
He $1.75 ka auhau o keia pepa no ka makahiki, a he $1.00 no ka hapa makahiki.
E hookaa mua ia ka auhau o ka pepa mamua o ka loaa ana i kekahi mea makemake e lawe.

NO NA OLELO HOOLAHA.

E lawe ana keia pepa i na Olelo Hoolaha a na makamaka, e like me ke kupono, a e lawa pono ai hoi me ka hoohaiki ole i ka huina o na kolamu kukulu manao, no ka uku haahaa.
O kela a me keia makamaka e makemake ana e hoolaha, e hele mai ma ke keena a e hui pu me ka Luna Hooponopono.
Aole e paiia kekahi Olelo Hoolaha ke ole e hookaa mua ia ka auhau.
Eia kekahi, ke noiia aku nei na makamaka e hoouna mau mai i na mea hou; mai hooloihi loa i na palapala; e hai pololei mai i na manao me ke kuawili ole, a e kakau mai me na hua moakaka.
E hoouna mai na Leta i ka LAHUI HAWAII.

E. O. HALL & SON
[E. O. HOLO MA.]

NA MEA KUAI I NA MEA MAHIAI
NA LOLE, PENA, AILA,
—A ME—
NA ANO LAKO E AE A PAU.
Kihi o Alanui Papu me Moi.  1-1y

S. B. DOLE.

LOIO a he Alakai ma na mea pili Kanawai. Ua makaukau oia e pale i na hihia imua o na Aha Hookolokolo a pau o keia Aupuni, me ke kakau ana i na Palapala Pili Kanawai, ma ka olelo Hawaii a ma ka olelo Beritania.  1 1y

WAi Hui o ka Hau!

E IKE IA ka Hale ma ka inoa o "BONANZA" Ke haawi ia aku nei ka poloai i na makamaka keonimana a me na lede o ke kaona Alii, e kipa ae ma ka hale hookipa inu wai momona o ko oukou makamaka nona ka inoa malalo iho, a e loaa no ka hau i hoomomonaia (ICE CREAM) na wai momona o na ano a pau! hoohuihui ia e ka hau iniki o Nuuanu. O keia hale, he hale i hoomakaukauia no na keonimana a he keena nani i hoomakaukau ia no na lede. E kipa mai, a o ka makepono me ka oluolu ke haawi ia'ku, oiai, he makamaka, a he kamaaina no Hawaii nei o  JOHN W. CROWELL.
2-1 y  (Keoni Koloela.)
Ma ka Hale "BONANZA" ma alanui Moi, mawaena o ka hale kahi umiumi a me ka halekuai o Dillingham ma.

WIL DER & Co.,
(WAILA MA.)

AIA MA KE KIHI O
ALANUI PAPU me MOIWAHINE.
Ua hoolako mau ia me ke kuai ana aku i na
Papa me na Lako Kukulu Hale
O NA A PAU.
NA PANI PUKA!
PUKA ANIANI.
OLEPELEPE,
LAKA,
AMI LIILII,
AMI LOLOA.
PENA o na ano a pau,
AILA PENA,
VANIKI, &c.
Ma Balaki Pena me Puna,
Na Pepa Hale me na Lipine Pepa.
Aniani, Paakai, &c.
O na mea a pau maluna'e, e kuai makepono loa ia'ku no ke Dala Kuike.  [3—1y.]

PAPA, PAPA.
AIA MA KAHI O
LEWE RS & DICKSON
(O LUI MA.)

KE KAHUA KAHIKO MA
Alanui Papu a me Alanui Moi
E LOAA AI NA
PAPA NOUAIKI o kela a me keia ano.
NA PAPA NANI
A PAA NO KE KUKULU ANA I NA HALE.
Na Pani Puka,
Na Puka Aniani,
Na Olepelepe,
Na Pou, na O-a,
Na Papa hele,
Na Papa Ku,
Na Papa Moe.
Na Pili o na ano a pau!
NA PEPA HOONANI,
Na PENA o na wai a pau
Na Kui mai ka nui a ka makalii,
Na Ami-puka,
Na Ami-puka Aniani,
Na Ami o na ano a pau,
NA AILA PENA,
NA AILA HOOMALOO,
NA AILA o na ano a pau.
NA VANIKI
Na mea HOOHINUHINU o na ano a pau.
Na Balaki o kela a me keia ano.
A KE HAI IA AKU NEI KA LONO i na makamaka a pau, ua makaukau keia mau hoa o oukou e hoolawa aku ma na mea a pau e pili ana ma ka laua oihana
—NO KA—
UKU HAAHAA LOA!
like me ka mea e holo ana mawaena o LAUA a me ka MEA KUAI.
E hele mai! E na makamaka!
A e lawa no hoi ko oukou makemake me ka oluolu
1  a me ka maikai.

Leo, Hail Columbia.
Golden Wreath, p 154.

1
E Hawaii, aina lai,
Aina aloha, makamae,
||:Ka aina kuokoa nei.:||
Ka aina paio, paio mau
I piha i ka naauao.
E mau ke kuokoa ou,
Me ka maluhia pu.
Mau no hoi ka hoomaikai
I ke Lii e malu ai.
Cho. ||:Hui pu a kupaa mau,
Paa ka hae, e kau, e kau
Ma na mauna, ma na kai.
Ola, e Hawaii lai, :||
2
E Hawaii, aina lai,
Aina aloha, akamai,
||:Ka aina puni i na kai:||
Ua piha i na kula ao,
Nolaila mai ka naauao.
E mau na kula maikai ou,
Me na pono hoi a pau.
Mau e mau ka hoomaikai
I ke Lii e malu ai.
Cho. Hui pu a kupaa mau, &c.
3
La hoike kula nei,
Oli, e Hawaii e,
||:Hauoli, e na kamalii:||
Huro no ko kakou Moi,
E ola oe, a malu e,
E mau ke aupuni maikai ou,
Me ka maluhia pu.
Mau no hoi ka hoomaikai
I ke Lii e malu ai.
Cho. Hui pu a kupaa mau, &c.
HAWAII.

KA NANEA EEHIA!
O NA LA
I AU WALE KA MANAWA
A O KA
HIHIO ILIHIA A KA UI
LEON ROSE!
NO NA
KOA KAVALIA OPIO:
NA
SEPANIA EKOLU!
He Nanea Walohia o ka Weli Eehia.
MOKUNA X—HELU 31.

          Ke paio lua nei na makani, e hooluli ana i na laau Elema loloa,
          Oiai hoi ka uwila me ka hekili, e hoohanini mai ana,
          O na ao hakumakuma hoi, e hoohiolo mai ana i na paka ua mao ole.
          AUHEA oe e Raolo, ua kumakaia ia kaua, me ka manaoia e haule aku iloko o na poho lima o ka poe puuwai eleele, wahi a'u me ka leo nahenahe. Na kekahi mea manao ino, i hana i keia, a me he mea la, eia kaua ko hoohaluaia mai nei. He oiaio, o ko kaua mau ola ponoi hoi, ka alana no kau hana hoohemahema wale ana.
          Lele aku la wau iwaho o ke kaa, a holo pololei aku la imua o ke kahukaa, a oniu ae la i ka'u pahikaua maluna o kona poo, "E ke kanaka kipi a me ka powa," wahi a'u i pane aku ai, he oiaio o oe pu kekahi i hui iloko o keia hana. E hoike mai oe i ka oiaio! a nawai hoi oe i hoouna mai e lawelawe i keia hana, a i ole oe e hoike pololei mai, alaila, e ike auanei oe i ka haalele o ko poo i kona hoapili o ka a-i, a na na kapuai wawae no o ka poe miula e hehihehi ko puniu a palupalu liilii.
          Haule koke iho la oia ma kona mau kuli, a nonoi mai la ia'u, e aloha aku iaia, no ka mea, he ohana nui kona, wahi ana, a ina o ka manawa iho la ia e lilo aku ai kona ola, nawai la auanei e hooikaika no ia ohana popilikia, ma na mea o keia ola ana.
          Pane koke aku la wau, a penei iho la anei oe e hoolako ai i kou ohaha, ma ka powa a me ka pepehi kanaka ana, i loaa ai ia lakou ke ola ma keia noho ana ? E ke kanaka ino ! mai hookaulua i ka hoike mai, no na mea a pau e pili ana i keia hana hohe wale, a ina aole, alaila, e holeholeia aku ou mau iwi i keia hora.
          A no kuu piha loa hoi i ka inaina, ua hele mai la a papale maluna, nolaila, ua lalau lima koke aku la wau iaia, a unuia iho la e a'u a kani ana ke u ilalo o ka lepo.
          Ua lana loa mai la no ko'u manao, e lawe koke i kona ola, aka, oiai hoi aia oia ma kona mau kuli, me na waimaka e hiolo mai ana, me ka nonoi ikaika ana mai me ka leo paumako, nolaila, ua hoonaue ia mai la kuu puuwai, a hoomaka ae la na ao panopano o ka inaina e auhee mailoko aku o kuu lunaikehala a ano akakuu mai la wau.
          Ia manawa, hai mai la oia. Ma ke awakea oia la, ua hiki ae la maloko o ka halekipa ana i noho ai ma Kalatavara, he elua mau kanaka ; o kekahi o laua he keonimana, a ha ano kauwa hoi kekahi.
          Aia nae ia hale hookipa ma kekahi aoao o ke kulanakauhale o Kalatarava. A ua hoolimalimaia mai la oia e ua mau kanaka nei, no kekahi huakaihele a hiki i Toledo, a haawi aku la laua i ke kauoha iaia, e holo aku oia no kekahi mau legue ma kahi e, e hoolalau hele aku ai, a huli hope mai ma ke ala o Toledo, a hele pu hoi kekahi o laua me ia, a noho iho ma ka hale hookipa a'u i noho ai.
(Aloe i pau.)

Moolelo o ka Ahahui Lunakahiko o Maui.

Halawai ka ahahui Lunakahiko o na mokupuni o Maui, ma ka luakini Kaahumanu, ma Wailuku ma ka la 16 o Nov. 1877, hora 10 a. m.
Koho ka Aha ia P. Keaupuni i Luna Hoomalu, a o A. Pali Kakauolelo kokua.
Kihapai.  Kahu.  Lunakahiko.
Haiku  S. Kamakahiki.  Paele.
Huelo  ———  P. Kealakai.
Keanae  ———  ———
Hana  ———  ———
Kipahulu & Kaupo  D. Puhi  Pamaiaulu.
Honuaula  ———  Napela.
Waikapu  ———  Keliiolelo
Wailuku  W. P. Kahale  W. B. Keanu
Waihee  O. Nawahine  D. Kapoi
Honokohau  J. M. Kealoha  J. Kaimana
Kaanapali  J. Hanaloa  J. Hualii
Lahaina  A. Pali  Kamoahakau
Lahainaluna  J. B. Hanaike  ———
Lanai  ———  ———
Olowalu  P. Keaupuni  S. Kaalawa
Kaluaaha, M.  ———  ———
Halawa, M  ———  ———
Wailau & Pelekunu  ———  ———
Siloama  ———  ———
Na hoa mau, Rev. W. P. Alexander no Wailuku, Rev. J. Alexander no Haiku, S. K. Kauwe, haiolelo no Honuaula.
Koho ka Aha i komite imi hana, J. B. Hanaike, O. Nawahine, D. Puhi, komite imi haawina, W. P. Alexander, S. Kamakahiki, J. Hanaloa.
Hoike hapa a ke komite imi hana. 1 Hapalua hora haipule. 2 Hoike Kihapai. 3 Heluhelu haawina. 4 Na ekalesia, Keokea, Makawao, Siloama. 5 Na Palapala Hoopii. 6 Ke ola o na kahu.
Aponoia ka hoike hapa a ke komite.
Malama ia ka haipule, pau ia. Hapai ia ka hoike kihapai.
Heluhelu mai o S. Kamakahiki i ka hoike o ka ekalesia o Haiku.
Heluhelu mai o S. Kamakahiki i ka hoike o ka ekalesia o Keanae.
Heluhelu mai o D. Puhi i ka hoike o ka ekalesia o Kipahulu & Kaupo.
Heluhelu mai o A. Pali i ka hoike o ka ekalesai o Lahaina.
Heluhelu mai o P. Keaupuni i ka hoike o ka ekalesia o Olowalu.
Heluhelu mai ke Kakauolelo i ka hoike o ka ekalesia o Kaluaaha M.
Heluhelu mai ke Kakauolelo i ka hoike o ka ekalesia o Halawa M.
Heluhelu haawina. Heluhelu mai o S. Kamakahiki i kona haawina na mea luli ole elua i oleloia ma Heb. 6:18.
Kumuhana 4. Na ekalesia, Keokea, Makawao, Siloama, Noonoo ka aha no ka ekalesia o Siloama. Heluhelu ke kakauolelo i ka Palapala kahea kahu a ka ekalesia o Siloama, a waiho ia ma ka lima o kekahi komite, O. Nawahine, W. B. Keanu, P. Kealakai. Hooholoia.
Waiho mai ka makua W P Alexander, e hui pu ia na mea a ka Papa Hawaii i palapala mai ai iaia, ma ka lima o kela komite, aponoia.
Noi ia mai e hoomaha ka Aha 1 hora me ka hapa. Pule o Moo.
Hoi mai ka Aha i ka pau ana o ka hoomaha hora 2 p m, pule o J. Hanaloa.
Hapai ka Aha i ka noonoo aua no ka ekalesia o Keokea. Noi ia mai e waiho ia ia hana ma ka lima o kekahi komite, W. P. Kahale a me A. Pali, na laua e kukakuka pu me ia ekalesia.
Kuka hou ka aha no ka ekalesia o Makawao. Noi ia mai e waiho ia ia hana ma ka lima o kekahi komite, J. Alexander a me S. Kamakahiki, na laua e kuka pu me ia ekalesia.
Kumuhana 5. Na Palapala Hoopii. Kuka ka aha no ka Palapala Hoopii mai Olowalu mai, pau e ka manawa.
Hoolohe ka Aha i ka haiolelo a ka Lunahoomalu mua, J. M. Kealoha; ma ka hora 3 a me ka poe i akoakoa mai, ma Luka 12:32 hapa mua, noi ia mai e hoopanee keia aha a halawai hou i ka la apopo hora 10 a.m, pule o S. Kama kahiki.
Poaono la hana 2, Nov. 17, 1877, halawai hou ka aha ma ka hora 10 e like me ka hoopanee ana. Malamaia ka hapa hora haipule. Heluhelu ia ka moolelo a aponoia.
Hapai ia ke koena o na hoike kihapai.
Heluhelu mai o Napela i ka hoike no ka Ekalesia o Honuaula.
Heluhelu mai ke Kakauolelo i ka hoike no ka ekalesia o Waikapu.
Heluhelu mai o J. M. Kealoha i ka hoike no ka ekalesia o Honokohou.
Heluhelu mai o W. P. Kahale i ka hoike no ka ekalesia o Wailuku.
Heluhelu mai o J. B. Hanaike i ka hoike no ka ekalesia o Lahainaluna.
Heluhelu mai o J. Hanaloa i ka hoike no ka ekalesia o Kaanapali.
Heluhelu mai o N. Pali i ka hoike no ka ekalesia o Pelekunu & Wailau.
Kuka ka Aha no ka palapala a N. Pali. Noi ia mai e waho ia ma ka lima o kekahi Komite. W. P. Alexander e imi i olelo hooholo e apo mai ai i na hoa o keia Aha i ole ai e haunaele. Heluhelu mai ke Kakauolelo i ka hoike a ke Komite kaahele i na ekalesia o keia Aha. Noi ia mai e hookuu aku keia Aha i ke Komite kaahele, no ka lawa ole o kona ola e haawi aku keia Aha i ke aloha a me ka mahalo i ke Komite kaahele, ma o ka luna hoomalu la, a me ke kakauolelo aponoia.
Heluhelu mai o O. Nawahine i ka hoike o ka ekalesia o Waihee.
Heluhelu mai o P. Kealakai i ka hoike o ka ekalesia o Huelo.
Noi ia mai e hoomaha ka Aha i hookahi hora, pule o J. B. Hanaike.
Hoi hou mai ka Aha i ka pau ana o ka koomaha hora 1 1/2 p m, pule o J. M. Kealoha.
Heluhelu mai o O. Nawahine, i ka hoike a ke Komite no ka palapala kahea kahu o ko Siloama poe. 1 o G. H. E. Keauiole. He haumana ia no ke kula kahuna pule ma Wailuku i ka wa o Alexander ke kumu, a ua ike ia he kanaka malie haahaa a me ke akahai.
2. Ua noho keia kanaka i waena o ka lehulehu ma Siloama iloko o na makahiki e 5 a e 6 paha, a ua kamaaina oia ia lakou, ua kupono noia hana.
3 O na inoa lehulehu i ike ia ma keia palapala kahea, ua kakau kela me keia mea me ko lakou mau lima ponoi no, 149 a o kekahi poe uuku loa, ua kaha pea ia ko lakou mau inoa.
4. Ua kakau ia keia palapala kahea e like me ka rula o kakou, o S. Paulo, ka hoike, oia ka lunahoomalu oia Aha no ka hooia ana.
Noi ia e lawe ka Aha i ka hoike a ke Komite a noonoo, aponoia.
Noi hou ia mai e hoihoi hou ia kela palapala kahea i ka ekalesia o Siloama a e hana hou ia me ko moakaka loa aponoia. Waiho ia keia palapala kahea ma ka lima o ke Komite O. Nawahine, nana e hele e halawai pu me ka ekalesia o Siloama.
Heluhelu mai ke kakauolelo i ka hoike a ke komite, no ka hoonoho ana ia P. Keaupuni i kahu no Olowalu, aponoia.
Noi ia mai e hoomaha i keia halawai, a halawai hou ma ka poakahi hora 10 pule o J. Hanaloa.
Poakahi la hana ekolu, Nov. 19, 1877.
Halawai hou ka Aha ma ka hora 10, am. e like me ka hoopanee ana.
Malama ia ka hapa hora halpule, Heluhelu ia ka moolelo a apono la me ka hooponopono.
Heluhelu mai o P. Keaupuni i kana Haawina. Na mea a na haole e kokua nei i na pono o ko Iesu aupuni i waena o keia lahui.
Heluhelu mai o J. Hanaloa i kana Haawina. Ua pololei anei ka manao ana o ka kahunapule aole pono ke mare i ka wahine.
Heluhelu mai o W. P. Alexander. He olelo Hooholo e pili ana ia N. Pali. He hookuu ia hoi ia i waena o ke kahu Ekalesia a me ka Ekalesia, aole hiki i ke kahu ke waiho wale ia oihana mamuli o kona manao iho, aia a lohe keia Aha, a hoapono ia waiho ana a no ka noho kahu ana o N. Pali, ma ka Ekalesia o Wailau a me Pelekunu, ke manao nei keia Aha he pono ke hookuu maikai aku iaia, no kona nawliwali, me ka manao, ua lawelawe iho nei oia me he koa maikai la no Iesu, a ma keia hope aku e lawelawe no ia ma na mea e hiki ai iaia ke hana, a kii mai ka Haku iaia, aponoia. Kuka hou ka Aha no ka palapala hoopii mai Olowalu mai penei ka manao o ka Aha, aia loaa i ke kahu kekahi leo kahea kupoho mai na Ekalesia e mai alaila, e hookuu ia ke mai ia Ekalesia aku. Noi ia mai e lilo O. Nawahine, a me A. Pali, i Komite paipai i ka Ekalesia o Olowalu e hana koke a paa ka hale o ke kahu aponoia. Noi hou ia mai e lilo o O. Nawahine, a me A. Pali i Komite e launa pu me ka Ekalesia o Olowalu, a noi aku i kokua i ko Papa Hawali, no ka pilikia loa o ke ola kahu, o ha ekalesia la, aponoia. Heluhelu mai o O. Nawahine, ke Komite, e pili ana i na Palapala mai Kalawao mai, e kokua aku na ekalesia i mau dala i mea kukulu luakini hou no lakou, aponoia. Ua nana ko oukou Komite i keia mau palapala, me ka noonoo nui ana, ua maopopo no he mau palapala walohia keia, e u ai ko ke Akua poe kanaka, a he palapala hoi e hoolana ia ai ka manao o na haipule oiaio o ke Akua oiai hoi, he mau palapala mai kekahi hapa mai o ko kakou lahui, o ka pupuhookahi, i hookaawale ia no na manaolana poho, a e nalo ana i ka make, aloha ino aka, o ka olelo hoolana e uwe pu me ka poe e uwe ana, aka i keia la, ua hoihoi hou ia mai ka hanu mai a Iehova mai e ha iho maluna o na pokeiwi maloo e ahu mokaki la ma ke kahua kaniuhu o Siloama, me na leo moakaka lea, e kokua, e kokua mai ia makou, ma ke kukulu hou ana i luakini hou no makou, e hoomana ai i ke Akua no ka pomaikai o ka ko makou mau uhane, nolaila, eia ka manao o ko oukou Komite, e pono i na ekalesia a pau malalo iho o keia Aha, ke hooko aku i keia leo uwalo mai ka lua mai, e kokua aku i mau dala i ku hou ko lakou luakini ma Kalaupapa, me ka mahalo. O. Nawahine, W. B. Keanu, Komite.
Hapaiia ke kumuhana 6, ke ola o na kahu.
Kuka Aha no keia kumuhana, a hiki i ka wa i noi ia mai ai ka hoomaha.
Noi ia mai e hoomaha keia Aha i 1 hora. Pule o D. Puhi.
Hoi mai ka Aha i ka pau ana o ka hoomaha, hora 1 1/2 p m. Pule o Paele.
Noi ia mai e lilo kekahi mau minute i manawa haipule no keia kumuhana i hoopaneeia. Haipule kekahi mau mea. Noi ia mai e waiho ia keia kumuhana ma ka lima o kekahi komite. O Nawahine, J M Kealoha, S Kamakahiki, na lakou e noonoo, aponoia. Hoike mai ke komite imi Haawina penei:
1 Pehea la na makua e alakai ai ka lakou mau keiki, me ka hoopono, a me ka hoonaauao a ka Haku ? J Hanaloa.
2 Heaha la ka kakou e hana ai i hele mai na kumakahiki i na halawai hoomana ma na la Sabati ? S Kamakahiki.
3 Ka pono nui o keia lahuikanaka i ka inu i ka awa, Heaha la na mea e kinai ai ia mea ino ? P Keaupuni.
4 E hoomauia na kumumanao i heluhelu ole ia.
Hapaiia ke kumuhana 7, ka hoohui Ekalesia.
Noi ia mai aia a noi mai na Ekalesia, e hoohui ia lakou, alaila noonoo keia Aha, aponoia.
Hapai ia ke kumuhana 12, ka nupepa ka Lahui Hawaii.
Noi ia mai e waiho ia keia hana ma ka lima o kekahi komite. W P Alexander, S Kamakahiki, aponoia.
Hapaiia ke kumuhana 8, ke Kula Sabati.
Kuka ka Aha no keia kumuhana, aole he mea i aponoia.
Hoike mai ke komite no ka nupepa Lahui Hawaii. E hooholo kakou, e hoi na lala o keia Aha, a e paipai nui aku lakou i na kanaka ma ko lakou mau wahi e lawe nui i keia nupepa, no ka mea, he kokua nui ia i ke kukulu ana i ke aupuni o ka Haku, a he mea hoi e naauao ai na kanaka. W P Alexander S Kamakahiki.
Hapai ia ka noonoo ana i ke kumuhana 9, na Lunakahiko o keia Aha.
Noi ia mai e waiho i ka noonoo ana no keia kumuhana, aponoia.
Hapaiia ko kumuhana 10, Kula Kahunapule.
Noi ia mai e kapae loa i ka noonoo ana no keia kumuhana, aponoia.
Hapaiia ke kumuhana 11, na Ekalesia kahu ole.
Noi ia mai e lilo o Rev. P W Kaawa i komite malama i ka Ekalesia o Siloama, aponoia. S Paulo ke komite malama i ka Ekalesia o Kaluaaha, Pelekunu a me Wailau, ma Molokai. Na W P Kahele e malama i ka Ekalesia o Honuaula. Na S Kamakahiki e malama i na Ekalesia o Huelo a me Keanae. Na D Puhi e malama i ka Ekalesia o Hana. Na N Pali e malama i ka Ekalesia o Lanai.
Noiia mai e malama na Ekalesia i keia Aha i ka hebedoma mua o Ianuari, a me ka Poaha hope o Feberuari, i manawa haipule.
Noiia mai na ka Lunahoomalu a me ke Kakauolelo o keia wa e hoouna aku i palapala hookuu no kekahi hoa o keia Aha i kaawale ma kahi e, oia hoi o Rev. A O Forbes, aponoia.
Ma ke noi ia mai, aia a hoopanee ia keia Aha, e halawai hou ma Wailuku nei, ma ka Poalima elua o Mei, o ka m h 1878.
Noiia mai e lawe keia Aha i ka olelo hooholo a S E Bishop i hoomakaukau ai, a haawi aku i ka wahine a C B Andrews i make. Waihoia ma ka lima o kekahi komite. O Nawahine, A Pali.
Hoike mai ke komite no ka palapala hoopii mai Honokohau mai.
Hoike a ke komite o ka palapala noi a J M Kealoha e hookuu aku iaia mai ka noho kahu ana no ka Ekalesia o Honokohau a me Kahakuloa. Ua noonoo ko oukou komite i keia palapala noi, a ua ike ia he palapala nui keia, oiai hoi, ine e hooko ana ka Aha i keia, alaila, he mea kanalua ia ma ko kakou ano Kristiano, no na uhane he lehulehu wale ma ia mau kahawai, aka, he mea kaumaha nae ka ike ana i ko kakou hoa kauwa, a me kona ohana, aia iloko o ka pilikia. Hooholoia. 1 ke hookuu aku nei ke komite iaia, e like me ke kumu 1 ma kona palapala noi, no kona pilikia, a me kona ohana i ka nele a me ka ilihune i ke kokua oleia e ka Ekalesia. Hooholoia. 2 Ua haiia mai he mau hoike imua o ke komite, ua hooholo ka Ekalesia e hookuu aku i ko lakou kahu.
Hooholoia. 3 Eia ma ka lima o ko oukou komite kekahi palapala mai ka Ekalesia mai, ma ka lima o ko lakou Lunakahiko, e hooia mai ana, e hookuu ia ko lakou kahu. Komite, O Nawahine, W P Kahale.
Noiia mai e hoouna aku ke Kakauolelo i ka moolelo o keia Aha i ka nupepa ka Lahui Hawaii.
Waiho mai o S Kaalawa he olelo hooholo. Hooholoia. Ke haawi aku nei keia Aha i ka mahalo piha a me ke aloha nui i na Ekalesia o na Waieha i ko lakou hoolako a hoomakaukau ana i na mea e oluolu ai na lala a pau o ka Aha, ma o ko lakou komite la.
Na J Hanaloa e malama i ka Ekalesia o Honokohau a me Kahakuloa.
Noiia mai e lilo o O Nawahine i Kakauolelo mau no keia Aha ma keia hope aku.
Heluheluia ka moolelo a aponoia me na hooponopono.
Noiia mai e malama keia Aha i hapa hora haipule mamua o ka puehu a kauliilii ana o na hoa, aponoia. Malamaia ka hapa hora haipule, pau ka haipule ana, hookuu loa ia ka halawai.
A PALI.  Kakauolelo.