Ka Lahui Hawaii, Volume III, Number 47, 22 November 1877 — Page 2
KA NUPEPA KA LAHUI HAWAII.
HONOLULU NOVEMABA 15, 1877.
Ma ke kakahiaka Poalua iho nei, ua haalele mai la ka Hooilina Moi Liliuonamoku i ke kaona nei no Kana huakai kaapuni ia Oahu nei, e like me ka makou i hoike aku ai mamua.
KE KAUA MA KA HIKINA.
I ka manawa i huli ae nei ke au o ka lanakila nui ma ko Rusia aoao, ua hoopuka ae la na nupepa o Beritania i na manao no ke kukakuka ana, ina e ae mai ana ka Emepera o Rusia, e haalele i kona mau manao kaua, i mea hoi e hooluolu aku ai i ka Aha Kuhina o Beritania, ka mea nona na hooikaika nui ana ma kona mau hooponopono Aupuni; iloko o na makahiki he 30 i hala, e kokua ana i na hana ino i lawelaweia e ke Aupuni o ke Suletana.
Ke nonoi oolea aku nei ko Rusia e kipaku loa ia'ku ko Tureke mai ka ili honua aku o Europa, aole hoi he mau kumu e ae e manao aku ai no ka hoopau ia o keia kaua.
Ke koi mai nei ke kahua o ke Kuikahi a me ka holomua o ka naauao, no ia mea. A he mea maopopo, aole loa e maliu mai ana ka Emepera no ka hana ana i ke Kuikahi, ke ole e loaa iaia he mau pomaikai nui ma ia mea. He mea hilahila loa iloko o keia au, ka waiho hou ana'ku ia Bulugaria malalo o ka mana o Tureke, mahope iho o ka na Tureke mau hana hoomainoino ana ia poe.
Ua poino na Rusia he 60,000, i pakui pu ia mai hoi ke kaumaha ma kona aie lahui, aka, o kela mau poino o Rusia i hoaiai ia'e la, he mea ole loa ia ke hoohalike ia'ku me ko Tureke mau poino, ka mea nona ke kulana ma ke kae o ka banekorupa i keia wa, a ua hiki ole hoi ka hoopiha hou ana'ku i na mahele o kona mau pualikaua i hele a kawalawala.
O kona aie i keia mauawa, he $930,000,000, o ka ukupanee i ka makahik, he $75,000,000, o kona mau loaa aupuni hoi, ua emi loa iho la malalo o $100,000,000 i keia wa, a o na lilo hoi no ke kaua o ka makahiki i hala, ua oi aku mamua o ka $200,000,000. He mea maopopo, aole loa e mau ka hele ana o na hana imua, ina peneia iho la ke ano.
KA LA HANAU O KA MOI MA Honolulu nei.
Ma ka Poalima o ka pule i hala aku nei, Novemaba 16, oia no ka la hanau o ke Alii ka Moi Kauliluaikenuwaialeale, o ka piha pono ana no hoi ia o na makakahiki he 41 o Kona ola ana, a i ka 4 hoi o na makahiki o Kona noho ana ma ke Kalaunu o Hawaii.
Ua malamaia keia la ma ke kulana i oi ae i ko na wa i hala, e na lahui ili like ole o ke kulanakauhale alii nei, me na helehelena piha i ka hauoli o kela a me keia.
KA PO MAMUA IHO.
I ka hiki pono ana'e i ka alikealike o ka po mamua iho o ka la hanau, ua hoomaka ae la no kekahi poe i ka hoomoali ana'ku i na hauoli mai ia manawa aku, no ka hoohalawai ana me na hauoli nui o ke ao ae.
NA OULI O KA LA.
I ka wehe ana mai o kaiao, a i ka manawa hoi a na kukuna malamalama o ka la i anehe mai ai e kiei ma ke kua o na mauna, e hoolei pau mai hoi i kona nani nui, ua puana leo nui mai la na pu mai ka puu mai o Puowaina, e hoike mai ana, o ka la iho la ia i puka mai he Alii mailoko mai o Haloa, a he Lani hoi nau e Hawaii. Ua puka mai ka la me kona nani nui, a hoauhee aku la i na kikohukohu ao ma ka lewalani, a hohola mai la i na hiohiona o ka molale o kona nani, a ua ike ia'ku la hoi na ouli o ka hauoli maluna o na helehelena a pau. E kaukoe ana hoi kela a me keia ma kahi o na mea kuai me na kiionohi i piha i ka hoihoi, o kekahi poe hoi, me na hoahaaina ana ma ko lakou mau wahi ponoi, he mau makana hoi ka kekahi poe e ahai la a pahola aku imua o ka Lani nona ka la.
NA HANA O KA LA.
Mamua ae o ka weheia ana o na hana o ka la, ua piha-kui mua ae la na uapo, na moku a me na waapa maloko o ke awa nei, a palale wale aku i kai o Ainahou, i na kanaka o na waihooluu like ole, me na manao i hele a piha i ka nakui.
Mahope iho o ka hora 10, ua hoomaka ia ka wehe ana o na hana, oia hoi na heihei waapa, a eia malalo iho nei:
1 Heihei Waapa Pea. —Hoomaka mai ka uwapo ma Alanui Papu, holo pololei iwaho ma ke awa malalo o ka mouo laau a me ka mouo pele, a malalo o ka waapa i heleumaia mawaho ae o Waikiki, hoopuni ia waapa, alaila malalo o ka waapa ma ka aoao malalo o ke awa, alaila hoopuni ka mouo, alaila huli hoi a i kahi i hoomaka ai, e ku ka mouo laau ma ka akau a holo pololei ma ke awa. Manawa e holo ai, he hapalua minute no ke kuna. Makana mua $75; makana elua $30; uku komo $5.
Na waapa i komo ma keia heiehi: No J. Fisher, o Iulia; no W. F. Williams, o Anoano Ipu-pu; no W. L. Wilcox, o Paulino a no Kimo Pelekane opio o Henerietta. Ia Paulino ke eo ana o ka makana mua, he 3 hora a me 12 minute kona manawa i holo ai; a ia Anoano Ipu-pu ka makana elua.
I ka aneane ana ae nae e kani ka hora 11, a i na waapa hoi i puka aku ai iwaho o ke awa, a e hoopiipii ana hoi iluna, ua loohia iho la o Henerietta i ka poino, mamuli o ka haki pu ana o kona kia mua a waiho ana ilalo, a o ke kia hope hoi, hina wale iho la no. O keia haki ana, no ka hookela loa ia ana o na pea, oiai, e pa ikaika ana ka makani, aka, ua ike ia'ku nae na helehelena o ka lanakila ma kona aoao, ke ole i loohia ia e kela poino. Ua koloia mai oia iloko nei e kahi mokuahi Robbie, aole nae he ola i poino.
2 Heihei Waapa Kiki 6 Hoe.—(Na ka poe aole i maa i ka hoe waapa.) Mai ka mouo maloko nei o ke awa, holo pololei iwaho malalo o ka mouo laau, a huli hoi maluna a komo hou mai ma ke awa a hiki i kahi i hoomaka ai. Makana mua $50; makana elua $20; uku komo $2.50.
O ka nui o na waapa i komo ma keia heihei, o Liliu, Pa, Minnie Burns, Aliiolani, Waialeale a me Piolani. Ia Piolani ka eo ana o ka makana mua, no ka Moi ia waapa, he 21 minute a me 45 sekona kona manawa holo; a ia Waialeale ka eo ana o ka manaka elua.
3 Heihei Waa.—(No na waa aole oia aku mamua o ke 30 kapuai ka loa.) Mai ka mouo maloko nei o ke awa, a holo a hoopuni i ka mouo mua ma ka aoao ma Waikiki o ke awa, a hiki i kahi i hoomaka mua ai. Makana mua $20; makana elua $10; makana ekolu $5.
Ekolu ka nui o na waa iloko o keia heiehi, o Kaalalo, Puakauahi, Kakaako. Ua eo ka makana mua ia Kaalalo, he 9 minute a me 55 sekona kaona manawa i holo ai, ia Puakauahi ka makana elua.
4 Heihei Waapa Kiki 6 Hoe.—E like no me ko ka heihei elua. Makana mua $50; makana elua $20; uku komo $2.50.
O na waapa i komo iloko o keia heiehi, o Rainbow, Piolani, Liliu, Aliiolani a me Minnie Burns. Ia Piolani ka oe ana o ka makana mua, he 20 minute a me 33 sekona ka manawa holo.
5 Heihei Waapa 2 Hoe.—(Na ka poe aole maa i ka hoe waapa.) E like no me ko ka heihei waa, e holo malalo o ka poe a hoopuni. Makana mua $20; makana elua $10; uku komo $1.50.
O Honolulu a me Eureka na waapa i komo ma keia heihei. Eo ka makana mua ie Eureka, he 11 minute ka manawa holo.
6 Heihei Au.—He $10 makana mua; he $5 makana elua.
Ua eo ka ka makana mua ia Hoinoino; a ia Hokae ka makana elua.
7 Heihei Waapa 1 Hoe Une.—Mai ka hale kukui a hiki i ka mouo maloko o ke awa. Makana mua $10; makana elua $5; uku komo $1.
Eha waapa maloko o keia heihei, o Eureka, Reindeer, Aeto Amerika a me Tuscarora. Ka makana mua eo ia Aete Amerika, he 13 minute ka manawa holo; a ia Eureka ka makana elua.
8 Heihei Waapa 4 Hoe.—E like me ka heihei 6 hoe. Makana mua $25; makana elua $15; uku komo $2.
O Honolulu, Liliu, Aliiolani, Minnie Burns a me Rainbow na waapa iloko o keia heihei. Ka makana mua eo ia Honolulu; ka makana elua ia Minnie Burns.
9 Heihei Kapu.—Mai ke alapii makai o ka uwapo mokuahi a hiki a hoopa i ka mouo maloko o ke awa. Makana mua $5; makana elua $2.
Ua eo ka makana mua ia L. A. Thurston; ka-lua ia Kaloio, ke kolu o ke kapu, he pokakaa wale iho no, a o ka ha hoi, huli ka waha ilalo.
10 Heihei Waapa 2 Hoe.—E like me ka heihei 5. Makana mua $20; makana elua $10; uku komo $1.50.
Ma keia heihei, 2 wale no waapa. Eo ka makana mua ia Honolulu; ia Aeto Amerika ka makana elua.
11 Heihei Waapa Huelopoki.—E like me ka heihei 4. Makana mua $50; makana elua $20; uku komo $2.50.
He 5 waapa ma keia heihei. Ka makana mua eo ia Uliuli Oiaio; o ka lua ia Helemua.
12 Heihei Waapa Nunui.—E like me ka heihei waapa 6 hoe. Makana mua $50; makana elua $25.
O Kauaheahe a me Keliialoha wale no na waapa i komo iloko o keia heihei. O Kauaheahe no ka Moi, o Keliialoha no ka Hui Waapa. Makana mua eo ia Kauaheahe; makana elua ia Keliialoha.
O ka hope loa iho la ia, a hoopauia na hana heihei makai o Ainahou iloko o ka uiha ole o na kanaka, aka, maluna o kela a me keia helehelena, ua kahakaha ia na waihooluu o ka hauoli piha. Ma ka po ana iho, ua weheia he anaina hoonanea ma ka Hotele Hawaii, a oia ka panina loa o na hana no ka la o ka Mea Nona ke kuakoko.
Kekahi mahele o ke Akeakamai.
BUKE III.
(Kakauia e James Hanuwela.)
MAHELE 2.
Na wehewehe ano nui e pili ana i ka enegini mahu.—Ua hoike ia maanei na lala nui o ka enegini mahu. O ka mua, o ka ipuhao nui kahi e hoowela ai i ka wai, a holo aku ka mahu iloko o ka pahu mahu ma kekahi ohe i hookupono ia. O ka lua, o ka pahu mahu i hana naauao ia e hiki ai i kona haku ke hooke iluna, ilalo, a i ole ia, i o a ia nei. O ke kolu, o na ohe nui manamana e hiki ai ka mahu ke komo i ka pahu mahu, a puka hoi, me na ki i hookuponoia. Eha no manamana nui o keia mau ohe, elua manamana (a i ole ia, lala) o ka ohe nui mai ka ipuhao a i ka pahu mahu, pela no hoi ka ohe mai ka pahu mahu a i ka pahu hoomaalili, ma keia mau ki eha e wehe ana a e pani ana i ko lakou wa i hookuponoia.
O ke ha, o ka pahu hoomaalili kahi e hoomaalili ia ai ka mahu me ke kau wahi wai huihui, me ia ano e hoemi mau ia ai ka pahu mua o ka pahu mahu i wahi no ka mahu hou e komo mai ai. O ka lima, o ka pauma e huki ai i keia waihona wai o ka pahu hoomaalili. O ke ono, o ka une a me ka mea kaumaha e hooke ana maluna o kekahi pani maluna o ka ipuhao. Ina wehe loa ka mahu a nui loa ka ikaika e aneane poha ai ka ipuhao, alaila, na ka ikaika o ka mahu e wehe ae i keia pani i kaomi ia, a puka ae la kekahi mahu a pau ae la ia pilikia. He nui na mahele e pili ana i keia, aka, aole hiki ke wehewehe pau loa maloko nei, no ka mea, me ke kii wale no e hiki ai ke hoike pau loa. Elua no mau ikaika nui a ka mahu i ka hooke ana i ka haku iluna, ilalo, a i ole ia, i o a ia nei paha. (a) O ka ikaika mohala o ka mahu, no loko mai o ka ipuhao. (e) O ka ikaika omo ma kela hakahaka ma kekahi aoao o ka haku i ka hoopio ana o ka mahu ma ka pahu hoomaalili.
O ka wili ana i na ki e komo a e puka ai ka mahu ma ka ka pahu mahu, a waiho ia, pela no hoi ke ano o ka hooponopono ana i na mea a pau e pili ana i ka enegini, ua hoike mua ia ke kumu. Ma ka hapa nui o na enegini mahu, aohe pahu hoomaalili, ma ka ikaika mohala wale no o ka mahu e hana ai, aole ma ka ikaika omo, nolaila, ua oi ka pai ana o ka mahu a me ka ikaika nui o kona wela no ke kokua ole ia mai i ke omo ana o ka pahu hoomaalili.
Elua no ano nui o na enegini mahu, o ka Low Pressure," a me ka "High Pressure." Ma ka Low Pressure, aole kiki ka mahu mawaho, ako, ua kiki hunaiki iloko o ka pahu hoomaalili, e like me ko ka mokuahi "Kilauea." Ma ka High Pressure, ua kiki wale ka mahu iwaho, e like me ko ka "Pioneer Mill" ma Lahaina, a me kekahi mau hale wiliko e ae o kakou, ma Wailuku kekahi a'u i ike ai mamua, A. D. 1874.
No ka hoopiha ana i ka ipuhao. Aia ma na enegini a pau kekahi pauma liilii nana e hookiki pinepine i ka wai iloko o ka ipuhao. Ina palaka ka wiliki, a emi ka wai o ka ipuhao malalo o ka hapa piha, he mea pilikia ia. Aia no, ma na aoao o ka ipuhao na "valve" hoao e ike ia ai ke emi o ka wai. Ua anaia ka enegini ma ka ikaika lio, o ka ikaika lio hookahi, oia ka ikaika e lawa ai ka hapai ana, ma ke 32,000lbs. avadupoi ma ke kapuai kiekie hookahi i ka minute hookahi. Ekolu mea like ole i loaa ma keia, penei :
Ma ko Boulton a me Watt 32000lbs.
" Desaguliers 27500 "
" Smeaton 22916 "
Aka, o ke 3200lbs. ka mea maa mau ma na papa kuhikuhi, aole no hoi e hiki ke hooiaio loa ia. Aka, ua lawa no kakou e hoomaopopo ai i ko ka mahu ikaika ma ke kapuai kiekie i ka minute hookahi.
Niele.—Heaha ka ikaika lio o kekahi enegini mahu, ke anawaena o kona dylinder" 42in., a o ke "stroke" he 5 kapuai? Haina 66 lio.
Wehewehe.—42/44000 x 2554/44000 x 10/44000 x 210/14000 = 66.12. Aole e manao nui ia na hakina, aka, e poho nae e malama ia keia rula, ina .06 ua oi kela mamua o ka 1/2 o .10, nolaila, ua lilo i hookahi. Ina hoi .16, .28, .29, 96, &c., ua lilo lakou a pau i hookahi, e like no me ko na "Buke Huhuihelu" o ke anaaina ma ka imi area ana, nolaila, ina 66.16, ua manao ia kela he 67 mea okoa, &c. O na enegini maikai ma ka hoohana ana, ua hiki aku kona cylinder ma ka "Effective Pressure" i ka 8lbs. o ka iniha huinahalike me ka ili o ke pikona (piston,) aka, o ka mea maa mau i hoao mau ia, ua pii aku i ka 10lbs. Eia ka papa kuhikuhi e hoike ana i ka loa o ke stroke, a i ole ia, o ke cylinder paha.
Loa o ke stroke. Heluna o ke stroke. Kapuai i ka minute.
2kap. 43 172.
3 " 32 192.
4 " 25 200.
5 " 21 210.
6 " 19 228.
7 " 17 238.
8 " 15 240.
9 " 14 250.
Nolaila, eia ka loina o ka niele maluna a me ka wehewehe ana.
Loina.—E hoonui i ka area o ke cylinder me 10lbs., a oia hua loaa ke kaumaha hapai o ka enegini, e hoonui i keia kaumaha me ka heluna o na kapuai ma ka papa kuhikuhi, o ka hua loaa, oia ka momenetu o ka enegini ma ke kapuai kiekie i ka minute hookahi, e puunaue i keia hualoaa me ka ikaika lio 44000lbs., loaa mai ka ikaika ponoi o ka enegini.
Penei i loaa ai kela 44000lbs. Ma ka hoao mau ia ana o ka mea kaumaha 200lbs. e huki ma kekahi wahi he 2 1/2 mile i ka hora, a i ole ia, 220kap. o ka minute, alaila, 200 x 220 = 44000, oia hoi, 44000lbs. ma ke kapuai hookahi i ka minute, a i ole ia, hookahi paona ma 44000kap. i ka minute, aka, o ka mea maa mau, he 32000lbs. Oia na loli pinepine a me na noonoo lalau o ka haole i ka lakou imi ana ma keia wahi.
Wehewehe o ka niele. 42in. ke anawaena, o kona kuea 1764, hoonui me .7854 = 1385.4456 ka area o ke cylinder, me 101lbs. = 13854.4560lbs. kaumaha o ka enegini, a i ole ia, momenetu, hoonui me 210kap. = 2909435.7600 ÷ 44000 = 66.—oia ka hai loaa o ka niele.
Niele 2.—Heaha ka area o ke cylinder, he 60 lio ka ikaika o ka enegini, a 6kap. o ke stroke? Haina, 1158iniha.
Wehewehe.—44000lb s. = 1 lio x 60 = 264000. E nana i ka papa kuhikuhi ma ka 6kap. o ke stroke, he 228 x 10 = 2280; alaila, 264000 ÷ 2280 = 1158in. ka area o ke cylinder.
Loina.—E puunaue ia ka heluna ikaika lio ma na paona, e ka hua loaa o ke stroke i hoonui ia e 10lbs.
(Aole i pau.)
Huakai Makaikai ia Hawaii Akau.
No ke Alanui Aupuni.—Ua malama maikai ole ka Luna alanui i keia alanui, oiai, o keia wale no ke alanui mai Kohala a Waimea a me Hamakua, eia nae, nui na aa e alai ana i ke alanui, a hakalia ka hele ana, oiai, he loihi ka hele ana no keia mau wahi, he pii ku ka hele ana, e like me ka pii ana ma Waialua mai, a he kokoke ia, a he loihi kela, he maikai ia, he nahele laau kela, a he mau hale no hoi iloko o keia nahele a'u ike aku la, oia hele ke ino o ke alanui a kupono i ka puu o Pili, alaila, hala ke ino mahope, a hele aku i ka maikai, ke hooiho aku la ia hele ana, e like me ka iho'na mai mai Kipapa a hele i Honolulu, ilaila, halawai hou aku la ko'u mau maka me na puu hou he lehulehu.
I ko makou hiki ana i kekahi kahawai nui he wahi maikai no, a he mau hale haole a me kanaka, hoomaha iki malaila, hora 3 1/2 ia, ke hele aku la i ke ahiahi, ninau aku la au i ke kamaaina, ehia hora i koe a hiki aku kakou, he laki kakou ke hiki i ka hora 7, wahi a kamaaina, eia aku ka auanei i ka hora 9 makou e hiki ai i kauhale kamaaina.
Paina awakea.—Komo aku la makou i ka hale inu ki, a malaila i paina inu ki ai, a maona, o ka naue aku la no ia a pii ana i kanahele o Kawaihae, e luhe ana ka lau o ka laau ma o a maanei o ke alanui, e ula mai ana na pua Ihuku malalo o na lau. Ma keia hele ana, nani ka nui o na puu mamua mai, me ka manao a hala mai keia puu, alaila, ike aku ia Kohala, eia ka, aole. Uluhua o Mio ia'u i ka ninau.
Luakini Pope.—Ke ku nei keia luakini Pope i ke alanui, aole nae na hale o kanaka, ke nana ala au ma o a maanei, elua paha wahi hale i loaa aku i ko'u maka, aole nae paha kanaka la, ku wale no ka luhi o ka hoopau dala ana, a i nana hou aku au, e ku mai ana hoi ua luakini nei i ke kualapa, a ninau aku la au, a nowai hoi kela luakini, no kakou, oia kekahi luakini o Aiwohi, aole no he uka a koe, maanei au i ike ai i ka ikaika o na kahu, i ka hele i kela pali a iho i na awawa, i o a ia nei. Aole nui o na hale, ku no na luakini nunui a maikai, a puka loa aku iwaho, e ku mai ana no ua luakini nei, no ko Luhiau apana ia, a he mau wahi hale ke ku mai ana.
No na Puu.—He mau puu kaulana keia i mele ia e ka poe kahiko, o Pili o Kalahikiola, o na Puu haele. Aia keia mau puu ma ka hikina o ke alanui a makou e hele nei, a ke alai pono mai la kekahi puu imua o makou, oia ka puu o na makani paio a ma ke komohana ae o ke alanui, he puu no, o Kehena. I ka hele ana aku a hiki makou i ka puu o na makani paio, a hala ia i hope, haalele mai la ka la ia makou, a koe makou e hele ana i ka loihi o kahi i kahi aku i koe, a hiki i ka hale o J. P. Kuia, a walaau ana makou mawaho, a lohe ia mai la ka leo o ke alakai, a paipai mai la ke kamaaina, oiai, ma na la o ka Ahahui ma Waipio, oia nei ka elele o ka ekalesia o Kohala.
Kamaaina.—Nui ka eleu a me ka pioo o ke kamaaina no na malihini ma ia po, oiai, o ka hora 9 ia a makou i hiki aku la, o ko ke kamaaina nalo iho la no ia, a liu wale, hoi mai ana me na kauna malolo maloo, he lawaia ia no ka hoi ka malolo i ka po, a hei ana ua maloo, a na makou ka holoai, eleu iho la o Mio ma ke kui ana a wali, ku ana i ko makou alo, o ko'u hoomanao ae la no ia, a pau, komo no ko'u lima i ka umeke, oiai, ua hemo wale iho la ka'u wahi eke,. a ua emi mai ka ikaika o na aa, ua emi mai no hoi ka ikaika o ka upa makani, a pau ia, nanea wale iho lo no hoi, a hiamoe. Ma ke ala ana ae i kakahiaka, e kalua ia mai ana he puaa nui.
Hoomaha.—Hoomaha iki makou ma keia la, a ma ka Poalama ae, hoeu mai no ia o ko maua alakai no ka makaikai ia Kohala loko, oiai, aia ka hale o ko makou makamaka i Puehuehu, o Kohola waho ia.
O ko makou makaukau iho la no ia, a kau ma na lio, huli i ka hikina-hema ka hele ana, ua puni o waho o ko makou hale i ke ko, a pela no keia a makou e hele nei, he ko mauka a makai o ke alanui, a me na laau haole, i kanuia mauka a makai o ke alanui. Nui kou mahalo i keia aina no ka ulu maikai o ke ko me ka wai ole, o kahi wai, ua malama ia no na wili.
No ke Kula Kaikamahine.—Hookele loa aku la no ke kamaaina ia makou e ike i ke kula kaikamahine, a hiki makou ilaila, malaila ka makua Rev. E. Bona, a hele aku la makou e lulu lima me ia, a pau ia, alakai akula ua makua nei ia makou a ma ka puka o ka hale kula, kikeke aku la oia, a iho mai la ke kumu, oiai, aia i ka hale iluna ke keena kula.
Kumu.—I ka hiki ana mai o ke kumu a ku i mua o makou, a kamailio ae la o E. Bona, a haawi mai la ke kumu i kona lima no ke aloha ia makou, a kuhikuhi ae la ia makou e pii i luna e nana ai i ke kula, o ko makou pii aku la noia, a ike mai la na kaikamahine ia makou aloha mai la, (Aole i pau.)
IKE PONO I KE ANU O KE KUAhiwi kaulana o Haleakala.
E KA LAHUI HAWAII; Aloha oe:—
E oluolu mai kou ahonui, e haliu mai hoi kou lokomaikai, e lawe aku imua o kou mau tausani poe heluhelu, mai ka la puka i Kumukahi a ka welona a ka la i ka ili kai o Lehua, i kekahi mau hunahuna o ka huakai maeele i ke anu o ke kuahiwi kaulana o Maui.
Ma ka hora 12 o ka po Poakahi, la 29 o Oct. oiai ka mahina e pahola ana i kona nani ma ka ili o ka honua. Ua nee aku la ka huakai makaikai mai kahi aku o Bila ma Paholei, Makawao, e hooipo me ke anu o ka ua ukiuki. E hulei ana hoi ka holo a na lio, e ko ana ka welelau makaui huihui o ke aumoe, e li ana hoi ka io i ke anu o Makawao, e pukukui ana hoi na kihei Sekotia, e hao ana na kepa ka hau o Lihue, aohe wahi mea a mehana iho.
I ka lelepauti ana o na lio ma ke alanui pii mauna, he ipo aloha ke anu me ka maeele, he kamaaina heahea ole mai e komo maloko, eia ka waiwai la o ka leo. I ko makou hiki ana ma ka aoao hikina hema o ka puu o Puunianiau, wehe mai la ka pawa o ke ao, ulili mai la hoi ke leo o na Kahuli kani kua mauna, na kamaaina hoi oia uka anu maeele, puana mai la hoi na lede o ka huakai i keia mele.
Kili opu mai nei e ke anu,
Kilikilihune i kuu poli,
Konini kalaihi ka opua,
I ke kuai ia e ke kiowao.
Huikau ae la keia mau leo nahenahe iloko o ka lewa, a na ka ea lahilahi o ke kuahiwi i kaomi malie iho, wai olu wale kela. A o ko makou kamaaina hele pu ke ho-a mai nei i ke ahi, a pu-a ae la ka uahi o kapuahi, e hoike ana, eia makou la ua maeele i ke anu.
Nee aku la ka huakai a hiki ma ke Ana Alaea, wehe loa mai la kai o ke ao, ike pono loa ia aku la na kue maka pali o Haleakala. He wahi ana kuonoono no o ke ana Alaea, he wahi no e hiamoe ai na huakai pii kuahiwi. A mamua ae paha o ke kani ana o ka hora 8, hiki aku la ka huakai ma ke ana hoomoe haole, lu iho la ka ukana a ka lio i lalo, a kiei like aku la makou ia lalo o ka lua pele o Haleakala.
He uliuli ano pahoehoe pele i ka nana aku, me na puu kinikini i hiki ke helu pono ia, he 16, he kamahao na mea a pau o lalo o ka lua, aole hoi he mau kakai pali ma ka aoao e huliu ana i kai o Keanae, me he waha la ia e hamama ana e ale i ka makani. Kahkaha iho la au i kuu inoa ma na papa pohaku o ua kuahiwi kaulana la, a o na hoa hoi, auwana hele aku la e puhi i na puu ahi lehulehu wale. A o ka 2 ia o ka pu-a ana o ka uahi o ke kapuahi.
Nana aku la hoi na maka ma ka ili laumania o ke kai o Alenuihaha, e kuku like ana na ao opua me he mau moku okohola'la ma ke kai anu o Alika i kuea pono ia na I-a, me he mau palahu kane la hoi e hoohaha ana na eheu, ka hele a palahalii i ka ili o ke ka. He nani okoa no hoi ia ke nana aku.
Haliu hou ae la au, a ike aku la i ka waiho kahela mai o kuu aina haaheo (Kohala) a hoomanao iho la.
O Kohala nui, o Kohala iki,
O Kohala ua apaapaa,
O Pili o Kalahikiola,
O na puu haelelua,
O kuu aina hanau ia.
Mai ka Lae o Kaelehuluhulu ma Kona Akau a hiki i ka Lae o Kaholalele ma Hamakua, ua hiki ke ike pono ia aku mai luna aku o ka kuahiwi kaulana o Haleakala i Maui. E hamama mai ana no ke awawa o Waipio, e lele maopu ma ana no ka wai o na pali, o Honokane papale ooma o Makaukiu i ka ehu a ke kai, e pu-a mai ana no ka uahi o na hale wili ko o Kohala, e waiho kahela mai ana no ke awa ku moku o Mahukona a me ke kaikuono o Kawaihae. Aloha wale kuu aina hanau.
Mahepo iho o keia minute walohia, haule aku la na hoa me Niolopua ma ka inoa o ka malama kaulana a Welehu, no ka mea, ua maluhiluhi makou i ka haohia e ke anu, a i ka pa ana iho o na kukuna wela o ka la, o ka lilo no ia i ke kumukuai make pono he hiamoe. Pela hoi ko makou Hua-a i puana mai mai ai.
I pupue iho au e mehana,
Me vabine lau liili,
Puiwa wau a hikilele,
Ka owe a ka waipiula.
I huli mai ka hie a hoolono iho, e kiei ae ana ka la i ka lolo, e kaa ana hoi ka honua ma kona Iho, o ke kau a e la no ia iluna o na lio, a puana aku la i ka leo hope loa. Aloha oe e ke kuahiwi o Haleakala.
Holo kainepu aku la na lio i ka ihona, ko mai la ke ahe makani o ke kuahiwi.
A i ka hiki ana o ka huakai ma ke ana Alaea, auwana aku la na hoa i mau papahi lei hua iliahi, a i ka hoea ana mai, ua hiki ke puana ia.
Ohuohu Halemano i ka lau lehua,
Kanu no i na pua i kukaniloko.
A ma kahi awawa i kapa ia ka inoa o Kaholua, ua hoailona ia iho la na hoa me ka wainohia o ka mauu laili, a hapala ae la ke kea na kaele ka ai.
A mahope o ka haalele ana o ka la i ka lolo, hiki aku la ka huakai ma kahi o W. T. Cooper, a na B. W. Kilihauanu i hoolauna aku i na lede o ka huame ka haku wahine o ia mau hale, ua lawa ka launa ana me na lima lulu aloha, a manuahi ia mai la hoi na kiaha wai huihui, e hiki ai hoi ke puana ia.
Kamau kiaha i olu,
I pahee ko puu ke moni.
Lelepau ti hou ae la ka ihu o na lio, a i ka hiki ana i Kahuluilio, poholua iho la na pea a mahele ia iho la ka huakai i na apana elua, hoaumoe aku kekahi poe ma kahi o M. Kapihe, a lohoaumoe hoi kekahi poe ma kahi o T. Hoomaha i Paholei.
A mahope o ke awakea Poakolu, Oct. 31—Huikau hou ae la na makau a ka lawaia, a halawai hou ae la na hoa o ka huakal ma ke ano hulali o Kahului, a hulei aku la ka holo a na lio no Wailuku, e hoohaunaele ana hoi ka wawae o na lio i ka lepo o ke alanui, a ke alawa iho oe mahope, me he la e puana mai ana, pu-a hou no ka uahi o ka kapuahi. I ka hiki ana aku, kuu ka luhi a pau ka hana.
Ma ka Poaha ae mahope o ke awakea Nov. 1—Ua malama ia he wahi paina na ua huakai mokomoko la me ka hui anu maeele o ke kuahiwi o Haleakala ma ka home o R. W. Stone, ua hoolako ia na kohi kelekele a ka puukolu, me na wehiwehi o ka wao lipolipo, me na papahi lei hoohialaai o na hoa.
Kamau mai hoi na omole soda water, poina hoi ke candy. Puana mai hoi na hoa good bye Haleakala. Malaila pu ae hoi na lede, Mrs. Rogers a me Mrs. W. H. Halstead. Mahope o ka noe liu la o ke ahiahi, good bye ae la na hoa. A ma ka pili ana o ke ao, Nov. 2, e kani ana ka moa ekolu o ka wanaao, haalele mai la ekolu mau lede no ka malu ulu o Lele, elua hoi no ka ua-ukiu, o B. W. Kilihauanu no ka ua apuakea o Hana, Elua hoi maua i noho iho i ka malu a ke ao.
Anoai wale. O keia iho la ka hopena o ka huakai pue i ke anu o ke kuahiwi kaulana o Haleakala.
Me ka aloha i ka Luna Hooponopono a me na keiki ulele hua kepau.
J. N. MALUIKEAO.
Papohaku, Wailuku, Nov. 2, 1877.
Ma ka hora 4 o ke ahiahi Poakahi iho nei, ua loohia iho la o Kamaka k, kekahi o na paahao e noho nei maka Halewai, i ka poino ulia wale, ma ke ku ana o kona lima hema i ka poka o ka pu panapana, ia laua me kekahi makai haole e hopuhopu ana i kekahi mau ilio elua. I ka paa ana o na ilio, ua kauoha aku la ka makai haole ia Kamaka, e paa i na ilio i hiki ai i ua haole nei ke ki pu aku, ua hooko koke mai la o Kamaka i ke kauoha. Ua ki pu koke ia'ku la kekahi ilio a make, a no ka puiwa o ka ilio i koe no ke kani o ka pu, ua pakaawili ae la i o ia nei, a i ua Kamaka nei no e paa la i ke kaula o keia ilio, ua kani koke aku la ka lua o ka pu, a ku aku la ma ka lima i hoikeia ae nei. Ua laweia oia i ke kauka, a ua haawiia mai na lapaau ana, a e ola ana no ia eha, aka, pomaikai nae i ke ku ole ana ma kahi e poino koke ai.