Ka Lahui Hawaii, Volume III, Number 46, 15 November 1877 — Page 4

KA NUPEPA KA LAHUI HAWAII.
HONOLULU, NOVEMABA 15,

KOMI TE HOOPONOPONO NO KEIA AOAO.

LAIKI MAKUA,  MRS. KELA A. GILIMANA,
M RS. ELENA MAKALE,  MRS. J. M. KUKE.

No Emma.

          Ua makemake au e hai aku ia oukou no ko maua keiki aloha, o Emma kona inoa.
          He kaikamahine piha i ka olioli o Ema mai ke ao a po ka la. Mau no kona paani a me ke mele, ua like kona leo me ka manu o ka lewa.
          Pela i keia la hope o kona noho ana me maua. I ke ahiahi, loaa iaia ka mai, a kokoke i ke kakahiaka make iho la. Ano e ka make hikiwawe.
          Ua mau ka pule pu ana o Emma me kona makuahine i na kakahiaka a pau.
          E hana ana au ma ka pa, hele mai Emma a lalau i kuu lima, me ka olelo mai, "e papa, e pii kaua maluna a pule me mama." Haalele au i kuu hana, a nana i alakai ia'u maluna, ma kahi i noho ai kona mama me ka Baibala. Akahi no au a lohe i ka laua pule ana. I ka hoomaka ana o ka makuahine e heluhelu i ka Baibala, olelo o Emma ia ia, "alia, e mama, e kii ana au ia papa e pii mai e pule me kaua."
          Ua hala he mau mahina, mau no ko maua pule ana i na kakahiaka a pau. Aka, i ko maua pule pu ana i keia manawa, kahe pinepine ka waimaka, no ka mea, ua hele ka mea i noho ma kela noho liilii, a lohe ole maua i kela leo manu olioli ma ko maua hale.

KA NALO MELI.

          Ua ike anei oukou i keia kii ? Heaha ke ano oia? No ke aha i puka ai keia wahine a me kana mau keiki mawaho o ka hale? A no ke aha ko lakou mea nana iluna o ke ea ? He ano makau ko na keiki a me ka pihoihoi. Auwe ! O kela mau nalo meli paha ka mea a lakou e nana nei. E nana ! Aia na hale o na nalo meli malalo, he elua mau hale. He nalo meli aliiwahine hou, a ua hele oia e imi i home hou ma kekahi wahi. Ina elua aliiwahine iloko o ka hale nalo meli hookahi, e pepehi ia kekahi o laua, ke ole lele aku ma kahi e. Nui na nalo meli opiopio i hahai iaia, a ku ia.
          E kiai ana kela wahine i ko lakou wahi e hele ai, a ina he mea hiki iaia, hookomo ia lakou iloko o kekahi hale i home hou no lakou. E hoao ana oia e walaau, i ole lohe lakou i ka nalo meli aliiwahine.
          I kekahi manawa, kiola kekahi poe i ka wai iwaena o lakou, i manao lakou e ua ana, a imi koke i home. Lana kuu manao aole lakou hele ma kahi mamao loa aku a nalowale. No ke aha kona makemake e loaa lakou ? Heaha ko lakou pono? Ua ike anei oe i kekahi o ko lakou hana ? Heaha ka haawina a na nalo meli i ao mai ai ia kakou ? Aole anei he mala maikai kela ? Hanai anei kela wahine i kona mau nalo meli ? No hea mai mai ko lakou ai ? Heaha ko lakou hana ina manao lakou e hoeha mai ana kekahi ia lakou? Nolaila anei ka makau o na kamalii ?

KA PUNAWAI O IAKOBA.

          "A hiki aku la i kekahi kulanakauhale o Samaria, o Sukara ka inoa."
          "Ilaila ka punawai o Iakoba. No ka maluhiluhi o Iesu i ka hele ana, noho iho la ia ma ua punawai la." Ioane 4:5, 6.
          O keia olelo hoakaka no keia wahi kaulana, mai ka olelo i kakau ia e Dr. Norman Macleod. Aole loa i kanalua ka poe kaahele manaoio ole no ka oiaio o keia, no ka punawai o Iakoba. Aia ilaila ka mauna.
          Ke hoomana nei na kanaka o Samaria i keia wa ma keia mauna, a malaila wale no. O Sekemu kekahi kulanakauhale kokoke ilaila. He mau hoike lakou a pau no kona oiaio, a me na olelo a na kamaaina mai ka wa kahiko mai.
          Aole ka mea i maopopo ia kakou ma kela inoa. Aole he wai puna e puapuai ana mai loko mai o ka honua, aole no hoi he lua i eli ia. He mea i wawahi ia iloko o ka pohaku paakiki, 9 paha kapuai ka laula, a i keia wa, 70 kapuai ka hohonu. Nui ka opala i haule iloko oia lua, o ka hohonu i kinohi, palua paha ka hohonu o keia wa. Ua manao ia, he lua wai aole he mea e loaa ai i ka wai puna. O ka pa pohaku i hoopuni i keia wa, i kekahi wa, ua kukulu ia he halepule maluna oia wahi ua haule keia, a ua lilo ka opala i mau aoao no ka lua wai, e hamama ana ka waha me he kanuku la.
          Hiki ia kakou ke iho ma keia kanuku, a komo ma kekahi ana, ua hana ia e na koena o kekahi oioi i kau maluna o ka halepule. I ka iho ana i kekahi mau kapuai, ike kakou iloko o ka papahele he puka, ua uhi ia kau wahi e kekahi pohaku palahalaha, a e waiho ana kau wahi uuku, ma ia puka, hiki ia kakou e nana ilalo iloko o ka pouli. I ka hoohaule ana i kekahi mea ilalo, lohe kakou i ke ku ana i ka wai, me he mea la, he nui ka wai. O ke kumu a Iakoba i hana ai i kona punawai maanei, aole ma ke awawa o Sekemu kahi i piha i na punawai, aole hiki ia kakou ke hai. Malia paha, i ole keakea ia mai, malia paha e malama i kona ohana, a me ka poe noho pu me ia, i kaawale loa lakou mai na kanaka hewa o Sekemu.
          Ua olelo ia i keia wa, ua kuai ka ekalesia o Helena i keia wahi no na dala he nui. He wahi hoano no keia punawai.

PALAPALA A LAIKI MAKUA.
HELU 4.

          O ct. 1, ua ike ko'u mau makamaka a pau i na kii hoike no ka alanui hao ; aka aia a ike oe i ka mahu e hele mai ana i ou la, e oioi ana, a e puka ana ka mahu, a e kauo ana i na kaa he umi a umikumamalua paha mahope ona, me he mea la he mana kona, aole hiki i kekahi mea ke hoopaa, weliweli oe i na mea nui i hiki i na kanaka ke hooponopono a hana, a makemake loa oe i ka poe i loaa ia lakou keia mau haawina waiwai o ka naau a me ka noonoo, e haawi i ko lakou luhi i ka mea waiwai ia lakou. Pela kuu noonoo ana me na manao e ae kekahi, i ka wa holo mai ka huakai kaa, nana e lawe ia'u mai na makamaka aloha aku, e hele i na mile 200 me ka poe malihlni. Aka aole hiki ke kali, ua hoopuka koke ia na olelo aloha hope loa, a hoihoi koke ke kanaka lawe ukana, me na puolo a me na hinai, i ka mea e holo ana, iloko o na kaa.
          O ke kaa he keena loloa ololi maluna o na huila, me na noho no na kanaka he iwakaluakumamaha, elua o keia mau noho, huli ke alo, kekahi i kekahi, a puni na kaa, a ua kapa ia he mahele. I ka po ua hana ia keia mau noho elua i moe, me kekahi hou aku maluna aku, he ano like me na wahi moe ma ka mokuahi, ua hookawale ia, kekahi mai kekahi me ka paku ano koikai, a haawi ka paku aniani ma kela noho keia noho i ka ea maikai ia oe. Ua olioli loa au, no ka mea, aia iloko o kuu mahele kekahi wahine, oia no kekahi o ka ohana.
          E kaahele ana oia me kona keiki liilii, hele ana e ike i kona makuahine, a no ka mea e hele ana au e ike i kuu kaikamahine, ua launa koke maua me ka oluolu. He hinai me ka ai ko maua pakahi, a i ka wa i hele mai ai he kanaka lawe ukana, a kukulu he pakaukau uuku iwaena o ko maua mau noho, a ai mau me ka oluolu, me ka puka ole iwaho o na kaa. A ku malie na kaa, hiki ia makou ke hoouna iwaho a loaa ke ki, a ke kope paha, a o na mea a pau a makou e makemeka ai. O keia wahine, e like me ka nui o ka ohana, ua ike no i ka hoopai ia ana, no ka mea, ua kaheaia oia e hoihoi i kana kaikamahine hookahi i aloha nui ia, mahope o ka noho oluolu pu ana me ia no na makahiki he uuku, He mau kamailio oluolu ka maua no ko "Makou Makua," a me Kona Aupuni. He poe e no hoi kekahi iloko o ke kaa no keia ohana nui hookahi, a hiki ia makou ke kamailio pu me lakou.
          O kekahi wahine, kokoke kona mahele me ko maua, hele pinepine mai e ike ia maua. Opiopio no oia, aka, ua hoike mai kona helehelena maikai i ka eha a me ka mai, a hoike mai no hoi i ka malu o ke Akua. Ua hoihoi hou no hoi oia i kona kaikamahine hookahi. Ka mea e olioli ai kona keena mai, no ka mea, ua noho oia me ka mai no na makahiki he umi, a i keia wa e kaahele ana i loaa ke ola. I ke kamailio ana no kona mau pilikia, olelo oia, aole pono iki kuu manao i ka wa i loaa mau ia'u i ka pilikia; aka i keia wa hiki ia'u ke olelo me ka oiaio. "E hana ia ka makemake o ka Haku." Me na makamaka o keia ano, ua hoopoina ia ka noho malihini ana, a hala na po a me na la eha, lawe au i alanui hou, a haalele i na makamaka a pau, kaumaha loa au. Kokoke no hoi i ke ahiahi o ka Poaono, aka a ku malie na kaa ma kahi a'u e haalele ana, o kekahi o na mea mua i komo iloko o ke kaa, oia kuu keiki, a ma kela hope aku, ma na wahi a pau, ua oluolu au, no ka mea, he mea malama ia'u.
          A hala kekahi mau hora uuku, lawe na kaa ia makou i ke kulanakauhale, kahi a makou i noho ai a hala ka la Sabati hoohui hou ia me na mea i aloha ia, ua hookaawale ia makou mai a lakou aku no na makahiki. He mau la uuku i koe a hiki ma ka home me ka maluhia.
          Iloko o na pono a pau o ke kaahele ana, hoi hope kuu naau i ka halawai haipule hope loa, me kuu mau kaikuahine Hawaii aloha, ma Kawaiahao, a ike wau ua ko ia ko lakou mau pule no'u.
LAIKI MAKUA.

NA KULA NUI O AMERIKA.

          Ma kekahi o na pepa hope, he kii o kekahi kula kaikamahine ma Kaliponi. O kela kula oia hookahi wale no o na kula he mau haneri oia ano ma Amerika ; no ka mea, o Amerika oia ka aina o na halepule a me na kula.
          Aole o keia mau kula kaikamahine wale no ; aka he mau kula nui ae no na keikikane, a me na kanaka opiopio. O ke kula i oi ke kaulana paha o keia mau kula no na keikikane, oia ke kula i kapa ia o Harvard University. [Kulanui.] Aia no ia kula ma ke kulanakauhale o Cambridge, elua a ekolu paha mile mai Bosetona aku. Nui ka aina o keia kula nui, a maluna o keia aina na hale o ke kula. O kekahi mau hale he mau hale keena moe no na keiki; o kekahi hale nui kahi i malamaia na buke, a manao au ma keia ohana buke, elua haneri kausani buke a oi aku, a o kekahi hale he keena aina. Ua kapaia keia o Memorial Hale [Hale Hoomanao,] no ka mea, ua kukuluia i mea hoomanao no kela poe haumana, i noho i ke kula a puka pono, i make iloko o ke puali koa i ka wa kaua ma Amerika. Ma na aoao o kekahi keena nui iloko o keia hale, ua hoonoho ia na apana mabala, a maluna o kela mau apana mabala pakahi, ua paa ia ka inoa, ka nui o na makahiki, ka papa, a me ka wa i make, o kekahi o keia mau haumana kula. Ma ke keena aina, he mau wahi uuku maluna, kahi a ka poe makaikai e hele ai e ike i na haumana e ai ana. Elua ko'u hele ana ilaila. Eono haneri mau kanaka opiopio e ai ana malaila i ka wa hookahi. Ike kela mea keia mea i kona wahi, a i ko lakou komo ana iloko kekahi mahope o kekahi, hele malie lakou i ko lakou wahi e like me na keonimana.
          He umikumamalua haneri mau haumana ka helu pau loa. O kekahi kula nui i like me keia oia o Yale ; malaila hookahi kausani a oi ka nui o na haumana. Mahope o ka puka ana o na keiki a kanaka opiopio o keia mau kula nui, alaila hiki ia lakou ma kela kula nui a ma keia kula nui, e ao ia no ka oihana loio, a kahuna lapaau paha, a e hoolilo i kahunapule paha. O Mr. Harris a me Hartwell, he mau haumana a puka pono laua ma ke kula nui o Harvard. O Mr. Baldwin, Mr. Bingham, Mr. McCully Alapaki Judd. Mr. Frear, J. P. Cooke a me Prof. W. D. Alexander, a me kekahi mau keiki e ae a na Misionari, ua puka pono lakou ma ke kula nui o Yale.
          Aole o keia mau kula nui elua wale no ; aka he nui na kula e ae, aole pau ia'u ke hai ia maanei.
          Aia no kekahi kula hiki no i na keiki e hookaa i ka uku no ke ao ia ana ma ke kula, ma ka hana. Ua kapaia o Cornell University. [Ke kula nui o Cornell] aia ma ka mokuaina o Nu Ioka ia Kula. O na dala i haawiia no ka hookumu ana i keia kula, ua haawiia e kekahi kanaka waiwai, o Cornell kona inoa.

NA OLELO NAAUAO A KA POE LIILII.

          Eha makahiki o Bessie, a ke manao nei makou o kekahi o kana mau olelo, he mau olelo naauao loa no ka keiki uuku e like me ia. Hele oia e ike i kona kupunawahine i noho ma kahi kuaaina, a i kekahi la hele oia i ka inu ki me kekahi wahine, a hoomakaukau ia wahine i kekahi mau palaoa ono maikai me kekahi mau hua, he mea ono loa keia i keia kaikamahine liilii.
          A ai nui o Bessie i keia mea, olelo oia, E kuu kupunawahine, manao au he wahine maikai loa o Mrs. E., ke manao nei au pono ia oe e hele pinepine e ike iaia. Aole liuliu makemake oia e hele hou e ike i ka wahine maikai. Ua hala ka wa o kela mau hua, nolaila, aole ike ia na palaoa ono me na hua maluna o ka pakaukau. Akahi no aole ono ka ai ia Bessie, a i ka hoi ana ma ka home, hoi oia me ka malie. O ke kupunawahine, i manao ua ike oia i ke kumu, ninau ina ua maikai kona launa ana malaila. Olelo ke kaikamahine liilii, manao au aole au hele hou e ike ia Mrs. E.
          Ninau ke kupunawahine, No ke aha ? Kuhi au ua makemake loa oe iaia.
Pane mai oia, Pela kuu manao ; aka, manao au o ka palaoa ono me na hua ka'u mea i makemake ai.
          Ua aoia keia kaikamahine liilii e hele i ka pule, a e haawi i kekahi mea iloko o ka waihona o ka Haku, mailoko mai o kona mau kala uuku ponoi. I kekahi kakahiaka Sabati, e hoomakaukau ana oia no ke kokua, makemake oia e lawe i apana nui maikai, pela kana olelo, kekahi mea i oi aku mamua o na wahi kenikeni uuku a kona makuahine i koho ai.
          Ninau ka makuahine, No ke aha makemake oe e haawi nui pela ? me ka olelo ana iaia, e pau koke ana kona mau wahi kala, ina haawi nui oia pela i ka wa hookahi.
          Pane paa mai ke kaikamahine liilii, Ka ! ina haawi nui aku au, alaila, loaa nui mai au, me he mea la e haawi ana i kekahi ano hou no kela poolelo, Ua loaa wale ia mai ia oukou, e haawi wale aku oukou ; ua hoopaanaau iho nei oia i keia.
          He kaikaina uuku ko Bes sie, elua mau makahiki, a me na mahina keu he uuku. I kekahi wa e kokua ana ka makuahine i keia kaikaina liilii i ka hai ana i ka pule a ka Haku, hiki ka mama ma kela wahi, E kala mai i ko makou lawehala, olelo o Mamie liilii, a e kala i ka poe i lawehala i ka makou no hoi ; a aole hiki i kekahi olelo ao, e hoohuli i keia ano hou o ka pule ahiahi o ko makou bebe. Ono loa oia i na mea ono, a makemake oia e ai nui a oi aku mamua o ka mea a kona makuahine i manao ai he kupono ; nolaila ua waihoia ka mea ai maluna, ma kahi loaa ole i ka bebe. Me ka pai ana o kona mau lima liilii, a me ka akaaka ana, kahea o Mamie, Maikai, maikai, maikai; aka aole loaa oe ia'u.
          O keia kaikamahine liilii, he punahele a mea paani no kekahi makuahine aloha, a i ka wa i make ai keia makuahine, nui loa kona kaumaha. I kekahi wa nalowale keia kaikamahine liilii, a loaa ka makuahine iaia e noho hookahi ana ma kekahi puka aniani o ka hale maluna loa, e nana ana iwaho.
          Ninau ka makuahine, e aha ana kuu bebe maluna nei.
          Pane aku oia, manao au ua hiki o auntie, (oia kela makuahine i make,) i ka lani. Aole nae au ike iki iaia, a me ka manao ae aku, hele oia i kona paani.
          Keiki i aloha ia; mahope ua hele aku oia e hui me kela makuahine i make.
E. C. C.

No Ch ristopher Columbus.
HELU 27.

          Ua hoonoho ka Adimarala ia Don Diego kona kaikaina i kiaaina o ka mokupuni i kona wa hele ma kahi e, a me na kanaka e lima e kuka pu me ia.
          Ua hooponopono ia na mea a pau, a hoomaka ia kona holo ma ka moku. Ua koho oia i ekolu o na moku uuku loa no keia holo ana. Holo lakou i ka la 24 o Aperila.
          O ka manao o Columbus e holo e nana i ka aoao hema o Cuba. Ua ike oukou o ka mokupuni kahi i ku ai o La Navidad, o kahi i kukulu ia ke kulanakauhale o Isabella, ua kapa ia ka inoa o Hispaniolo e Columbus, i keia wa ua kapa ia o Hati, i kekahi wa ua kapa ia o St. Domingo. Aia na mauna o Cibao ma keia mokupuni. Holo lakou ma ka aoao hikina a hiki i ka aoao komohana o ka mokupuni okoa. O na mauna kiekie loa 7000 kapuai paha ke kiekie.
          O ka panalaau i hoonoho ia e Columbus, ua oleloia oia ka panalaau mua ma keia hapa hou o ka honua nei. Ua noho ia keia mokupuni e kekahi lahui kanaka Ilikini i kapa ia he poe Carib a ua manao ia i ka wa i loaa mua ai keia mokupuni i ka poe Paniolo, he 1,000,000 paha ka nui o na kanaka.
          Holo ua hukai imi aina nei ma ka palena akau o Hati, ku ae la ko lakou moku ma La Navidad, makemake o Columbus e ike ia Gnacanagui, aka aole i ike aku ; nolaila holo aku oia i Cuba, hookuu ka heleuma malaila ma kekahi awa nui. Pae lakou iuka, loaa i na hale a me na ahi, aka aole kanaka. Loaa lakou i na ia he nui wale, a me kekahi mau moo nui, ua moa i ke ahi, a lawe lakou i ka ia, aka, aole i na moo, wahi a lakou. I ka hele ana i o a ianei ike lakou i na kanaka kamaaina he nui maluna o na pohaku kiekie, a i ko lakou haawina ana i na hoailona o ka maluhia ia lakou, iho lakou ilalo mai na pohaku mai. Kauoha o Columbus e uku ia lakou no ka ia.
          Olioli na kamaaina, no ka mea aole i ai ia na moo, no ka mea, oia ka mea ono loa ia lakou.
          Hookahi kapuai ka loa o keia mau moo, a he momona loa. He poe lokomaikai, oluolu, a hookipa na kamaaina. Ninau na Paniolo no ke gula. Kuhikuhi mau na Ilikini i ka hema, oia kahi e loaa'i ke gula. No keia kumu, manao o Columbus e holo i ka hema. Aole lakou i holo loihi ike aku lakou i ka mokupuni nani o Iamaica. I ka holo ana mai o na moku, hele nui na kamaaina i kahakai, a holo mai na waa he kanahiku i piha i na kanaka ua kahiko ia i na lole nani, he mau ihe ko lakou, hookokoke i ka moku o ka Adimrala. He ano kaua ko lakou, a hoopuka lakou i na leo uwa huhu.
          Aka, ike o Columbus i ke ano kupono e hana aku ia lakou. Hana aku oia me he mea la he poe makamaka lakou a haawi ia lakou i na makana. Lawe lakou i na lei a me na bele, a holo aku ia ma kona ala. Ia la ae, hoolei ka Adimarala i ka heleuma ma kekahi wahi i kapaia i keia wa ke awa o St. Anns. Liu kekahi moku, a makemake lakou e hoopaa i ka liu. Hooikaika na Ilikini, i ole e pae lakou iuka. Hoonou lakou i ko lakou mau ihe i na moku, hoohaunaele, e uwa ana me na leo nui. Hooikaika ka Adimarala e pae iuka, no ka mea, makemake oia e loaa ka wai, a e hana hou i ka moku i liu. Kauoha oia i na kanaka i kahikoia i na mea kaua e hoe pololei i na waapa iuka, a ua pale lakou i ka poe enemi, ma ke ki ana i ka pu ia lakou.
          Ua eha kekahi o na kamaaina, a ua puiwa lakou a pau, a holo me ka haunaele.
          Ua hookuuia kekahi ilio nui, a ua puiwa loa lakou i ka ilio. I kekahi la ae, hoi mai na kamaaina a kuai me ka poe paniolo.
          Ua penaia na kamaaina, a he hulu manu ma ko lakou mau poo. O kekahi o ko lakou mau waa, he nui loa. Ua ana ia kekahi o lakou, a he 96 kapuai ka loa, a 8 ka laula, ua kalai ia noloko o ke kumulaau nui hookahi. No ka loaa ole ana o ke gula, aole no hoi i lohe ia he gula ma ka mokupuni o Iamaica, manao o Columbus, ua pono e hoi hou i Cuba. Makemake oia e ike pono i kela mokupuni, he apana paha ia o ka aina nui aole paha.
(Aole i pau.)

HAAWINA KULA SABATI.
HELU 8.—SABATI, NOV. 25.
KUMU HANA—Paulo iloko o ka ino.
PAUKU BAI BALA—Oih. 27:14—26.

14 Aole i emo, pa mai la kekahi makani ino, he Eueokelu do ka inoa.
15 Punia iho la ka moku, aole hiki ke hooku i ka makani, hooeuu ae la makou a holo.
16 A holo ae la makou malalo o kekahi aina, ua kapaia o Kelaude, hiki apuepue ia makou ke paa iho i waapa.
17 A hukiia ia iluna, hana iho la lakou i mea e kokua ai, hawele iho la lakou malalo o ka moku, a makau iho la o haule lakou ma ko Sureti, no ia mea, kuu iho la lakou i ka pea, a hooholoia pela.
18 Kahulihuli loa makou i ka ino, nolaila, ia la ae, hoomama iho la lakou i ka moku.
19 A i ke kolu o ka la, na ko makou lima no i hoolei aku i ka ukana oili i ka moku.
20 A hala ae la na la he nui, aole hoi i ikea mai ka la a me na hoku, aole hoi okana mai o ka ino i kau ia maluna o makou, alaila pau aku la ka manaolana e hoolaia'i makou.
21 A loihi ka ai ole ana, alaila ku mai la o Paulo iwaena o lakou, i mai la, E na kanaka, ina oukou i hoolohe mai i ka'u, aole hoi i hemo mai, mai Kerete mai, ina ua pono, alaila aole kakou i loaa i keia ino, a me keia poho.
22 Ano hoi, ke nonoi aku nei au ia oukou, e olioli oukou; no ka mea, aole e lilo ana kekahi ola o oukou,o ka moku wale no.
23 No ka mea, i ka po nei, ku mai la kekahi anela o ke Akua, nona no wau, a oia hoi kau e mala nei.
24 I mai la ia, Mai makau oe, e Paulo; e pono ia oe ke ku aku imua i ke alo o Kaisara; aia hoi, ua haawi mai la ke Akua i ka poe a pau e holo pu ana me oe nau.
25 Nolaila, e kanaka e, e olioli oukou; no ka mea, ke manaoio aku nei au i ke Akua, e hanaia mai, e like me ka mea i oleloia mai ai ia'u.
26 Aka hoi, e ili ana kakou ma kekahi mokupuni.
Pauku Gula. "I ko'u manawa e makau ai, e hilinai aku au ia oe." Hal. 56:3.
Na mahele 1. Ka ino me ka pilikia i loaa ia Paulo ma ke kai p. 14—2o.
Na mahele 2. Ka Paulo ao ana, a me ka hoolana manao ana i na hoa holo ona, p. 21—26.
Mele.—Him. 294, 7. Leo. Opiopio.
1
Ie su i aloha mau;
Holo au iloko ou.
O i kau na ano ao,
A kaa mai na nalu po,
Huna ia'u, e Iesu e
A hala'e na ino nei—
Kaikai i ke awa mau,
A hookipa maikai ia'u.
Pule e hoomalu mai Iesu, &c.
Na ninau a na Kumu.
A pau ka Paulo haiolelo ana nona iho, ua hoihoiia oia i kona wahi paa. A kuka pu Ageripa ma, a ma ko lakou manao, aole o Paulo i hana i kekahi mea i ku i ka make a me ka paa. Hiki hoi ke hookuu ia oia, ina aole oia i hoopii e ia Kaisara.
Ka hoomakaukau no ia o na lunaaupuni e holo i Italia o Paulo ma, o na paahao. Ilaila o Roma kahi noho o Kaisara, oia hoi o Nero. Ua haawi aku i na paaho no i
kekahi lunahaneri o Iulio kona inoa no ka papa koa o Auguseto o Luka kekahi hoa holo o Paulo me Arisetaseko. I ka loaa ana o ka moku, ee lakou maluna a hoomaka e holo mai Kaisareia aku. Holo i ka akau a pae mua i Sidona. A ae oluolu Iulio e hele Paulo i uka a launa pu me na makamaka ona malaila. Mailaila aku a malalo o Kupero no ka pakuikui ana mai o ka makani. Holo no lakou a hala ke kai o Kilikia me Pamepulia a hiki i Mura ma Lukia; ma ke komohana akau ia. Maanei lakou i haalele i ka moku mua, a ee ma ka moku hou no Alekanederia. Holo lohi no lakou, no ka mea ua kue ka makani. Hiki nae i Kenido e kokoke ana i Mileto. Malaila mai ma ke komohana hema a malalo ae o Kerete me Salemone, a i Na awa maikai e wili ana ia Saraia ma Kerete. Nui ka pilikia. Ua hala ka wa pono no ka holo ana. Aia lakou ma Na awa maikai ma ka hikina ia o Kerete. Ko Paulo manao, a me kana ao ana, e noho lakou ma ia awa, a pau ka wa ino. Aole nae pela ka manao o ka nui. Ka hemo no ia, e holo i Poinike ma ke komohana hema o Kerete. Maikai ka makani mamua, a manao lakou e hiki ana i Poinike. Aka, he kuhihewa ia. 26:30—32. 27:1—13.
P 14—20. Na pilikia i loaa mai ia lakou. 1 Pa mai he makani ino, owai ka inoa? 2 Kue ka makani, a holo ino ka moku malalo ae o ka aina hea? Kelaudo, he mokupuni uuku, ma ke komohana hema o Kerete. 3 Ane hiki ole ke malama i ka waapa, i ole e nahaha. Hukiia ka waapa i hea? A heaha ka lakou hana i ka moku me na kaula? No keaha? Heaha ko lakou makau? Na Sureti he mau puu one ia ma ke kahakai o Aferika. Makau lakou o komo lakou iloko o ia mau puu one a nohaha loa ka moku. Nolaila, heaha ka lakou hana? kuu i na pea, oki paha i na kia, hoomama i ka moku, hoolei i ka ukana, ka huita, iloko o ke kai. Nui ka ino, pouli loa ka lani, nalo ka la me na hoku, pau ka manaolana e aha?
P 21—26. Ka Paulo mau olelo ao, a me ka hoolana manao ana. Owai ka i makau ole iloko o  keia pilikia nui? A loihi ka ai ole ana ku Paulo iwaena o lakou a olelo ao pehea? Heaha kana mau olelo hoolana manao? Nawai i hai mai ia Paulo, aole e lilo ana ke ola o kekahi o lakou? E aha ana nae ka moku? E ili ana ia mahea? Manaoio anei Paulo? Ua hai e mai anei ke Akua ia Paulo ma ka hihio, e hiki ana oia i Roma? He paahao Paulo ma ka moku, aka, me he la, oia ka mea nui malaila. Hai mai.  Hal. 107:25—46:1—3.
Mele—Him. 35, 8. Leo.
1
Ke Akua nona e ola'i,
A lele mai ka ino e,
Oia ke ku kokoke mai
Me kana mau haipule nei.
2
E naue ka honua nei,
Haalulu hoi na mauna a pau,
A hooleiia'ku i ke kai,
Aole o kakou makau.
Na ninau a na Kahu.
Na makua. Ua ae no ke kiaaina me ke lii i ko Paulo hoopii ana ia Kaisara. Ua hoomakaukau ia no ka holo ana i Italia. Aia mahea Italia? Ke kulanakauhale aha malaila? Owai ke lii ia wa? Mai hea ka holo ana'e? Nohea ka moku mua? Owai ka lunahaneri nana i malama i Paulo ma? Owai na hoahele o Paulo? E holo ana Paulo ihea? no keaha? Heaha ka lokomaikai o ka lunahaneri ia Paulo ma Sidona? Mahea i haalele ai i ka moku mua, a loaa ka moku hea? Nohea ia moku? hai mai i na pilikia i loaa ia Paulo mahope o ka haalele ana o ka moku i ke awa mua o Kerete, oia hoi o Na awa maikai. Owai ka i ao, aole make e haalele ia awa a pau ka hooilo o loaa na pilikia he nui wale? Hoolohe anei ka malamamoku ma i ka Paulo? Heaha ka hope o ka hookuli? Heaha ka lakou hana i ili ole ka moku a nahaha?
Na keiki. Iloko o keia pilikia nui makau anei Paulo? No keaha kona makau ole? Pehea ka la a me na hoku no kekahi mau la a mau po? Pilikia loa ea, aohe la, aohe hoku, aohe panana. Hopohopo loa, pihoihoi ai ole i ka ai, moe ole. Pehea na haumana a Iesu i ka wa i pilikia ai lakou ma ka moku? Mat. 8:24—26. Heluhelu. He moku i pilikia i ka ino nui no ka noho ana o kekahi kaula mahuka maluna ona, owai ia kaula? Ua hoolana Paulo i ka manao o ka poe maluna o ka moku, hai mai i kana mau olelo hoolana, p. 21—25. Ia wai oukou e paulele ai ke loaa ka pilikia?
Ke kula a pau. Ma ka makahiki ehia i holo ai Paulo i Roma? He kanaka pono ia, pilikia nae ma ka moana, no keaha ia pilikia? E holo ana na haumana me Iesu pu no ma ka moku, loaa nae ka ino nui ma ka moanawai, no keaha? He kaula maluna o kekahi moku, loaa nae ka ino nui loa i ka moku, no keaha? Pilikia pinepine na moku i keia wa, he poe haipule paha kekahi maluna iho, pilikia nae, kahuli, ili, nahaha, no keaha? Nui ka hewa maluna o kekahi mau moku, hehi Sabati, lawe i ka ukana, hoolei i ka ukana ma ka la Sabati, no keaha ka poholo ole a ili a nahaha?
Nui loa ka hewa ma ka honua nei, no keaha ka pau koke ole o ka honua i ke ahi?
Hai mai i ka pauku gula, me I Pet. 3:10.
Mele—Him. 571, 8—7—4. Leo.
Aia i ka la mahope, &c.
Pauku 1, 4, 5.
Pule no ka poe pilikia ma ka moana, &c.
Haawina no Dek. 2. Oih. 27:33—44.