Ka Lahui Hawaii, Volume III, Number 44, 1 November 1877 — Page 2

KA NUPEPA KA LAHUI HAWAII.
HONOLULU, NOVEMABA 1, 1877.

E HOOLOHE!

          Ma ka pule mua o Novemaba, e hoomaka aku ana o S. W. Pogue, ka hope no Rev. J. F. Pogue, i kona hele kaapuni ana aku ma ka mokupuni o Hawaii, no ka ohi ana mai i na koena aie no ka nupepa, o ka makahiki i hala a me keia Makahiki.
Nolaila, ke kau leo la aku nei oukou e na Luna a pau, e ohi e mai i na aie nupepa o na makamaka ma ia mokupuni, i makaukau e ai oukou i ka hookaa ana mai mamua ae o kona hiki ana aku.
E hoolohe e na Luna o ka LAHUI HAWAII i keia!  se 39 tf

          Ma ka holo kaapuni ana aku nei a ka mokuahi Likelike no Kauai i ka pule i hala, ua kau aku ka Moi maluna ona no ia mokupuni. He huakai awiwi no Kana, oiai ma ka huli hoi ana mai no o ka mokuahi, ua hoi mai no Oia. He oia mau no nae ka maikai o Kona ola kino.

          MA ka Poaono o ka pule i hala ae nei, ua kipakuia o G. B. Kalaaukane mailoko aku o ka Papa Loio o keia Pae Aina. O ke kumu o kona hoopau ia ana, oia kona hana paewaewa ma na mea e pili ana i ka oihana loio. O ka oihana ana i lawelawe ai i hanohano nona iho, a i manaoia no hoi e hoohanohano ia aku ana e ia ma ka lawelawe ana me ka noeau, a me ka hana pono me ka pololei, ua hana ino oia i kela oihana, a ua hoohilahila iaia iho, ina he ano hilahila koe iloko ona.
          Aole makou i manao ua oi aku ko Kalaaukane hewa imua o na mea e ae a pau. He nui no na mea e ae, maloko o kela a me keia oihana, e hana apiki ana. Aka, o ka hana ino ana o kekahi poe me ka ike ole ia o ko lakou kolohe, aole ia he kumu e hoopai ole ia ai ka poe i ike ia ua ku ka hewa ia lakou. Aole no hoi makou i manao he malu ko ua poe kolohe nei, ina ma ka oihana loio, a kahunapule, a kumuao paha a me na oihana e ae. E ukali ana ka hilahila a me ka inoa ino mahope o ka poe hana lapuwale. He loihi io no paha ka pahu hopu, a he loa io no paha ke aho o ka mea e holo ana mamuli o na hana hoopunipuni, aka, e loaa aku ana no ia i ka uku o kana hana mahope. O ka pomaikai ana i manao ai e loaa ana ma ke kolohe, e poha ana ia mea ma kona lima e like me ke poha wale ana o ka huahuakai ; a i kona wa e nana iho ai, ua neo. He hanohano kelakela i hiki ole ke kuai ia me ke gula a me ka momi, ko ka mea lima maemae ma ka oihana.
          Ma ka haule ino ana o Kalaaukane, a me D. B. Mahoe mamua aku nei, a me kekahi poe e ae no hoi a makou i ike ai, ua ao ia na mea a pau e akehele, a e hana ma ka pono a me ka pololei i na wa a pau a imua o na mea a pau.

NA OLEPE I AO IA.

          Ua hoike mai o Mr. Hamilitona, o ke Kiowai Hooulu o na mea kanu, ma ke kulanakauhale o Nu Ioka, i kekahi mea hou kupanaha i loaa mai, no na hana aloha ana maluna o na holoholona o na papa haahaa loa. Aia ma kekahi wahi pahu hao uuku kahi i malama ia'i o kekahi mau olepe, ma ka hoonoho like ana ia lakou, ma na lalani elima. Ua noho hookuli wale no lakou, a i na la a pau, e hoolei mau aku ana no o Hamilitona i ka ia i pakuikui ia a wali, a me kekahi mau hunahuna mea ai e ae, a me he mea la, ua hiki ke hoomaopopo ia'ku ko lakou hauoli no ia mau mea.
          No kekahi mau pule, aole lakou i hoike lea mai i ko lakou olioli, aka i kekahi la a Hamilitona e kaapuni hele ana ma ka pahu hao wai, aole i kanamai ka nui o kona kahaha i ka ike ana'ku i na olepe e hoohamama mai ana i ko lakou mau iwi iaia i kokoke aku ai, oiai, ua manao paha lakou e loaa ana ka ai ia lakou.
          Hookomo aku la oia i ka ai maloko o ka waha hamama o kekahi o keia mau holoholona, a upoi koke iho la kela. Ua hoomauia ka hanai ana pela, a laka loa ua poe olepo nei, ua hiki ia Hamilitona ke hookomo i kona manamanalima iloko o ko lakou mau waha. Ua manao kekahi kanaka i ike maka i keia mea, aole paha e ike ka olepe i kekahi kanaka e, ke hookomo aku oia i kona manamanalima.
          Ua hoao aku la oia e hookomo i kona manamanalima ma ka waha o kekahi olepe, ia manawa no i upoi koke ae ai kona mau iwi me ka ikaika, a ua lilo ia hoao ana i mea hoeha mai iaia. Aka, i ka manawa no a Hamilitona i hoopa aku ai me kona lima i ua olepe nei, me he mea la ua ike mai la no ka olepe o kona kahu keia, a ia manawa no i hamama ae ai a hemo mai la ka manamanalima i upikiia. Ua hooikaika mau no ua poe olepe nei e ukali i ko lakou makamaka, ma ke kaualupe hele ana ia lakou iho e nee hele ai iloko o ka pahu wai, me ka hoohamama, a upoi hikiwawe ana iho i ko lakou waha.

Ka Wi ma Maderasa.
Ke kulana manaonao o na kamaaina iloko o ka make a ka ai.
Na ka mana i ike oleia e aloha mai i na Hinedu a pau.

          Aole i kanamai ka nui o ka poe make a ka ai iwaena o na ohana, oiai iloko no o na wa maikai, ua hoomahuahua hou ia'ku na auamo kaumaha maluna o na ohana. I ka hele ana'ku ma ke alanui o ka hapa ano kuonoono o ke kulanakauhale, aole e hala ana ka ike a ka maka i ka heluna o ka poe ilihune i hoakoakoa ia'e, me ke kakali ana no ka haawina ai o kela la a me keia la, a ma keia ano, ua lawelawe maluhia no na anaina o na kamaaina o Maderasa a me na kulanakauhale e ae, no ke kokua ana'ku i ko lakou mau hoahanau hune iloko o na hakoko ana no ke ola kino. Aka, mai na mea mai a pau a'u i lohe ai, ke aneane la ka pilikia e komo aku i ka poe o na kulana maluna ae. He nui hoi na pilikia o ka loaa ana mai o ka ai ma na hale malama ola kumau, a he lehulehu wale ka poe e make mau ana no ka pololi, mamua'e o ke kukonukonu loa ana iho, a ma ia mea, ua konoia mai lakou e kapae ae i ko lakou hanohano a me na anaina hiehie, a hui pu aku la me ka poe o lalo ma na hale papaa o ke aupuni.
          Ma na mea e pili ana i ke kulanakauhale o Maderasa, ke hoomaka nei na komite, e niele pono i ikeia ka heluna o ka poe o na kulana kiekie ae e makemake ana no na kokua, a o keia kokua, e lawelawe ia ma ke ano i kulike me na iini a me na hana, o ka poe o na kulana like ole, no lakou na kokua i manaoia. He oiaio, ua nui ka make a ka ai. Ma kahi kokoke loa i ko'u hale kekahi kauhale o na kamaaina i nohoia e na kauwa a ka poe Europa, he poe malama hale oihana liilii, a me kekahi poe e ae, a no kekahi manawa i hala aku nei, ua hanai aku ka'u wahine i kekahi poe kamalii pololi o keia kauhale, me ka berena a me ka waiu. Aole lakou he poe malihini, aka, o lakou no na kamalii a ko makou poe hune mau, a mailoko o umikumamalua o lakou i hele mau i na kakahiaka a pau, he elua a ekolu paha e make ana, a ina hoi e hanai ana makou i ka poe a pau o keia kauhale, me he mea la, e loaa ana he mau haneri ma ka papainoa.
          Ia'u e kakau nei, hiki mai nei imua o'u kekahi wahine, me na keiki elua, a ua aneane no ka wahine e poino i ka ka mea o ka pololi, e hii ana oia hookahi keiki ma kona poli, ua kohu wahi elemakule i hele a nanakea, a ua keke na iwi, a o kekahi keiki hoi, he kaikamahine elima makahiki, ua hele a nawaliwali loa. He elua hoi mau kaikamahine opiopio i hele pu mai me keia ohana, i hele a puainawele, a make maoli no i ka pololi, a ua kokoke pau loa ka ikaika.
          He nawaliwali loa ko lakou mau leo i ke kamailio ana, me he mea la aia i kahi mamao ke koliuliu, e like la me ka poe i loaa ai i ka mai kolera hope loa iho nei. Ma ka haawi ana'ku i na kamalii i supa pumehana, ka barena a me ka waiu, ua loaa hou mai ia lakou ka ikaika kamahao. Mahope iho o ka hoomaha ana, ua loaa hou aku la ia lakou ka paina raiki i hoohuiia me ke kai, a ua hoounaia 'ku lakou ma ke kaa, ma kahi malama ola. Ia'e u ku ana ma ke alo o ko'u hale, iloko o ka hapalua hora, ua helu aku au he mau haneri o keia poe poino, ua nele i ka ikaika ole, e hiki ai ke kaualako i na lala o lakou i hele a mauha. O keia ka poe auwana nele i ka hale a me na home ole, mai na kauhale mamao mai, a no lakou ka ke aupuni e ohi mai nei i na lako no ka malama ola ; aka, aole loa i noho malie na kanaka me ka malama ana no ko lakou ikaika kino. Kailewa hale lakou me ka lakou mau kamalii, e auwana hele mai kekahi wahi a kekahi, a hiki i ko lakou wa e hina iho ai ilalo a make.
          Ke mau mai nei ka make ma na alanui. I kekahi la, ua ike au i kekahi puulu kanaka ma kahi kokoke i ka Hale Aupuni. Ua ku poai ae la lakou a puni kekahi ohana pololi ; o kekahi wahi kaikamahine nona na makahiki 7, e aneane ana e lele ka hanu i ka make a ka ai. Ua hoao ka poe e ku ana e hanai aku iaia me ka waiu i huiia me ka raiki, aka, aole i hiki iaia ke moni aku.
          Ua lohe au ke make mau nei i na la a pau ma na alanui o ke kulanakauhale o Banegalore mai ka 15 a i ka 20 kanaka, a ua hai mai na luna aupuni o Maderasa, ke maumaua nei no ka make. Ua loaa mai ka lono, e hele mai ana ke Aliikui mai Simola mai a hiki i Bomabere a me Maderasa, e kukakuka pu me na mana kumau, no na hooponopono a me na alakai ana, i mea e hoopale ia'ku ai keia poino. Aole paha e hiki koke mai ana o Haku Letona. O ka hoolako ana'ku i na kanaka o Maderasa a me Musore i ka ai, a me na wahi e ae o Bomabe i komo iloko o keia pilikia, he kumuhana nui ia no na pono Imeperiela Kiekie, a he pono hoi ke kuka ia maloko ponoi o ka aina popilikia, aole hoi maloko o Capua i uhi mau ia e ke ao, ma na mauna o Himalaia.

He kaua weliweli ma Alika maluna o ka moku Alepani.

E KA LAHUI HAWAII; Aloha oe:—
          He malihini au imua o kou alo, akahi nae a launa pu me oe, no ka loaa ana ia'u o kekahi mea ano nui o ke kaua maluna o ka moku Alepani, oiai, ma ko'u ano iho, he kanaka Hawaii au, a he kela hoi maluna o ua moku nei, a ke hai aku nei au imua ou, a nau ia e waiho ae ma ke akea o keia mau paemoku, mai Hawaii a Niihau, i ike mai ai na hoa'loha a me na makamaka e heluhelu ana i kou kino.
          O keia moolelo malalo nei, oia no ka moolelo piha oiaio loa, mamua o na moolelo e ae. Penei: ma ka hora 4 o ka auina la o ka la 4 o Iulai, 1877, ua pili mai kekahi waa, a hoi aku ia ; ma ia hope mai, pili mai hookahi waa hou, me na kanaka he 30 a oi maluna, me na wahine elua. I ko lakou pili ana mai i ka moku, ua pii mai elua alii, me na kanaka pu, a noho no na wahine iluna o ka waa.
          O keia poe, he Nakulu. I na 'lii i pii mai ai a me na kanaka, e kuai niho ana o Kapena Kele me ka poe Nakulu me ka oluolu, ia wa iho la no hana ia ka hewa e ke 'lii Nakulu, a puepue ia ka pahu rama, a paa ia ka pu a-i o ke Kapena me ka weliweli e ua alii Nakulu nei, me ke ano okalakala e mea ana e hopu iho i ka pu ua Nakulu nei, a pela no hoi ka malamamoku ; ia wa, ke ku la au iluna o ka hale o hope, a nana aku la au, aneane pilikia ke Kapena a me ka malamamoku, aka, i ka'u hoomaopopo ana aku, o ka malamamoku ke pilikia e ana. Ia wa, e hopu iho ana au i kekahi pauku laau nui, a paa i kuu lima akau, alia mai la ke 'lii, aka, ua haalele aku au i ka laau ma ka a-i o ke kaikaina alii a haule make aku la iluna o ka oneki, no ka mea, ua hemo e ka laau mai kuu lima ae, a ua ike aku au e pilikia ana ke Kapena, oiai e nao ana ua 'lii Nakulu nei i kana pu panapana iloko o ke kapa hulu o lakou, e waiho ae ana au i ka'u mea make, me kuu lohe aku i ka leo o ke Kapena i ka i mai, alia oe e pepehi. Ma ia hope iho, imi iho la na Nakulu i mea make na lakou, aohe loaa, a pela no hoi i na kanaka maoli.
          Ia wa, maluna o ka oneki, ke hi-o lua nei na kanaka, a me na Nakulu, ia wa, pa hou iho la ia'u ekolu Nakulu, aole nae i make, holo aku la mamua o ka laau ihu e pee ai, ia wa, e ku nanea ana o Honuailealea, oia holo no o nei Nakulu a hou ia aku la i ka pahi ma ka iwi hoehoe malalo iho, a puka pu ma kahi e pili ana i ka puuwai, a haule iho la ko makou hoa o ke kai ilalo i ka papahele, me ka leo o ke aloha i puka ae ma kona waha, e ! make au, a o ua poe nei, holo aku la mamua e pee ai, a me ka mea nana i hou i ka pahi ia Honuailealea a make ai.
          Holo aku la na 'lii o ka moku, a ki aku la i ka pu, pouli i ka uahi, aole nae he ike ia aku, ia wa, hoolo ia i ka polohuku, hukia mai iwaho, pau lakou a pau i ke ki ia me ka pu panapana, a kiola ia iloko o ke kai, a o ka hapanui hoi, lele no iloko o ke kai ma o a maanei o ka moku, a kiei aku la au, aohe kanaka, oia lele no a pau lakou a pau i ke poholo iloko o ka hohonu o ka moana, me ka ike ole ia ae o ko lakou mau kino, no ka mea, he poe ike ole lakou i ka au.
          O kekahi mau kela o makou, o Paia no Manoa, a me Kahele no Kepahoni, ua mahuka, a ua holo aku la e pee malalo o ka laau ihu mamua loa, o laua na kanaka Hawaii i kue i neia pilikia i ili mai maluna o makou ia manawa.
          Mahope iho o ko makou kaua ana, ua lanakila na kanaka Hawaii, a ina aole maua e hooikaika me Kamohai ma keia kaua ana, a ina makou e pio, a luku ia e ka poe Nakulu, he poho ia i oi aku ke lilo ka moku ia lakou, a ke pau makou i ka make, aneane hiki aku ke poho, ke pio makou, i ke $36,000, aka, mamuli o ko makou hooikaika ana i keia pilikia, ua palekana makou i keia poino weliweli ma ke kai anu o Alika, elua mile ka mamao mai ka aina mai, a o keia mau alii no hoi, he mau alii ino laua, he hoohaunaele pinepine laua iluna o na moku a pau i kalewa ae mawaho o ko lakou aina. He ano koa no iluna o ko laua mau ouli a pau, a he piena na helehelena ke nana aku, me he mea la, he mau alii powa laua. O ke alii hoi, ua paa ia aku ka pu a-i e ke Kapena, a haawi ia aku i ka poka ma ka ihu a hoolei ia i ke kai. Ua pau me ko aloha. Owau no, kekahi o na kela o ka moku Alepani.
MR. J. POLAPOLA.
Honolulu, Oahu, Okatoba, 29, 1877.

KA HOOUKA KAUA O LOVATEZA.
He weliweli na hana a ka make.

          Ladana, Sep. 7.—Ua hoike mai kekahi mea kakau nupepa mai Lovateza mai no na mea e pili ana no keia hoouka kaua, a penei: a hiki i ka hora 8 o ke kakahiaka, o na puali pukaa ke komo kukonukonu loa i ka enaena o ke kaua, a ia manawa, i nee mai ai ka eheu akau o ka pualikaua imua, a hoomaka mai la ka hahana o ka anai ana a na elele o ka make. Hoolele mai la hoi na Tureke i na mea make maluna o na Rukini, mai ko lakou mau palekaua mai.
          Ma ka hora 8 a me 45 minute, ua haawi ia ae la ke kauoha, i 2 mau regimana koa wawae o na Rukini, e nee aku imua e kokua i na puali kihakahaka o Kenela Doboravoseki, a i keia manawa hoi i hoomaka mai ai ka oi aku o ka hahana o ke kaua. Ua hoike mai kekahi aliikoa i puka mailoko mai o ka laina o na regimana 2 e nee mai la, ua haule iho a make ma ke alanui na koa 100, no ka nui loa o ka wela. Ma ka hora 9, aole i kana mai ka weliweli o na kipu kau poohiwi, a wehe aku la hoi na pu nunui, i na kipoka ana, i mea e kokua ia aku ai i na pualikaua helewawae, i ko lakou nee ana imua. Ma ka hora 9 a me 30 minute, wili ae la ko Kenela Novineseki regimana, a hele aku la mawaena o kekahi wahi ala ololi mahope iki iho o ka palekaua o na Tureke, a nee ae la hoi ka regimana i kapa ia ka Emepera Geremania, ma kekahi aoao.
          Ma ka hora 10 hoi, hiki mai la ka nu hou maikai, mai ke kihi akau mai, o na kulana a pau ma ke alo o na Tureke, aia malalo o ka mana o na Rukini.
          He mea pono no hoi e lilo pu mai ia lakou o Mauna Robusa, he kiekiena ia e nana iho ana maluna o Lovateza, a oia no hoi ke ki komohana ma ia kulana, a ke lilo mai keia wahi malalo o ko na Rukini mana, alaila, no lakou holookoa o Lovateza, a koe wale aku no hookahi wahi palekaua i na Tureke, a oia hoi ke ki komohana. Ma ka hora 10 a me 20 minute, ua pau iho la ke kipu ana ma ke kihi akau, ua auhee aku la hoi na Tureke ma ke awawa, a waiho molaelae ia mai la o Kenela Deborovoseki, aohe mea nana oia e alai mal. Ua hala aku la hoi o Kenela Sekobelefa ma ke kihi hema ma na bataliona koa he umi, a hiki ma Mauna Robusa.
          Ma ka hora 10 a me 30 minute, na ke kawewe o na pu i hoike mai, eiae o Kenela Sekobelefa ke nee mai nei imua. Ma ka hora 10 a ame 40 minute, ike ia aku la kona mau kolamu e nee mai ana ilalo ma ka hoopiina aku o ke ahua, a hele aku la ma ke awaawa e moe ana mawaena o ke kiekiena a me Mauna Robusa. Wehe mai la na puali pukaa o na Rukini i na kipoka ana maluna o Mauna Robusa, ma kahi e huli mai ana i o Sekobelefa la, a ke ike ia aku la hoi ke auhee nui  ana o na Tureke mai ko lakou mau auwaha malumalu aku, ma ka hoopiina a mai luna aku hoi o ke ahua. Aia hoi malalo a me na wahi kokoke i ke alanui, ua kupaa iho la na Tureke malaila, me ka hoolei mai i na mea make maluna o ka makamaka o ko Kenela Sekobelefa puali, aole i kana mai ka hahana o ka wela, a he aneane hiki pono ole no na koa ke hakaka. Ma keia manawa, nee aku la kekahi regimana kuikawa o na Rukini ilalo ma kekahi wahi haiki, ma ka akau o na wahi hoomoana o na Tureke, a oki pu mai la i kahi e hiki ai na Tureke ke auhee aku.
          Ma ka hora 12 a me 25 minute, komo mai la kekahi batari pukaa, e kokua mai i ka nee ana o kela regimana, a lawe ae la i ke kulana ma ke alanui, e moe la ma ka hikina o Mauna Robusa. He umi minute mahope iho, lele aku la ko Kenela Sekobelefa kolamu maluna o ke alahele a lawe ae la i na kiekiena o Mauna Robusa, a uhi pu iho la ia wahi me kona puali kaua helewawae. Emi hope aku la hoi na Tureke maloko o na batari ma ka aoao hema o na Rukini, me ka haalele ana i ko lakou mau pakaua me ka lawe pu aku no hoi i na pu a lakou. Ma ka hora 1, ua lilo mai la i na Rukini ko na Tureke mau kulana, a koe wale no ka pakaua ma ke alahele o Pelevena—o ka pakaua ikaika loa no hoi ia, no ka mea, oia kahi e hoomalu la i kahi awawa uuku maloko o ka puu. Ua pau iho la ka manawa hoouka kaua mua, a ua haawi ia mai la na kauoha, e nee aku imua o ko makou mau batari maluna o Mauna Robusa.
          Hele aku la ka eheu akau me ke akahele loa imua, ma ke kumu o ka puu, i makaukau ai no ka lele kaua aku maluna o ka pakaua Tureke. Ua unuhi aku la ke Kenela Tureke e noho hoomalu ana ma keia kulana i kana mau pu, ma na puu mahope aku o ka pakaua, me he mea la, ua manao no oia, ke lilo keia pakaua, oia iho la ka hopena, nolaila, oia i lawe e ai i kona mau pu, i ole ai e lawe pio ia. He ninau nui ia, ua alakai anei ka Alihikaua Tureke me ke akamai a ua poino paha oia ma ke komo ana aku o kona mau puali e hoopale no ke kulana hope loa, mahope iho o ka lawe ia ana o ka lakou mau pu.

NA MEA MAKAMUA.

I ka makahiki 1839, i hana muaia ai ka wahi leta.
I ka makahiki 1830, i hanaia ai ka penikila kakau mua loa.
Ua hanaia ka pauma ea mua loa, ma ka makahiki 1650.
Ua ike muaia ka laau hoohiamoe ma ka makahiki 1844.
Ma ka makahiki 1829, hana muaia ai ka lepopele aa.
Ua kapiliia ka makuahi hao mua loa, ma ka makahiki 1830.
I ka makahiki 1783, i hoolele muaia ai ka baluna ma ka lewa.
Ua hana muaia na kaalio ma Enelani i ka makahiki 1569.
I ka makahiki 1826—7, i hanaia ai ke alahao mua loa.
Ua holo ka mokuahi mua loa ma ka muliwai o Husedona ma ka makahiki 1807.
Ua ike muaia ke gula o Kale foni, i ka makahiki 1848.
Ua hoomaka muaia na kaa nunui lawe ohua ma Nu Ioka i ka makahiki 1830.
Ua hana muaia na wati ma Nuremabuga i ka makahiki 1477.
I ka makahiki 1829, ua hanaia ke kaahi mua loa iloko o Amerika.
Ma ka makahiki 1829, ua hoohana muaia ka aila honua, i mea hoomalamalama.
Ua hoolilo muaia ke kene ta melemele i dala ma Nu Havena, i ka makahiki 1677.
Ua hoopukaia ka nupepa makamua loa i ka makahiki 1652.
Ua ike muaia ka ohenana hoku ma Enelani i ka makahiki 1608.
I ka makahiki 1819, i lawe muaia ai iloko o Amerika ke kuahao o ka mea hana pahiolo.
Ua paiia ka alemanaka mua loa e Keoki Von Purbach ma ka makahiki 1460.
Ua hookomo muaia i Amerika ka pai palapala ma ka makahiki 1629.
Ma ka makahiki 1368, i laweia ai na puka uwahi mua, mai Roma mai, a iloko o Padua.
Ma ka makahiki 1753, i lawe ia ai ka enegini mahu mua loa iloko o Amerika, mai Enelani mai.
I ke Keneturia ewalu i hana muaia ai na puka aniani ma Enelani.
A ma ka makahiki 1846 hoi, i hanaia ai ka mikini humuhumu mua loa, na Elia Howe Jr.  Nupepa Kaleponi.

Huakai Makaikai ia Hawaii Akau.

          Nonoi aku la ko maua alakai iaia e hele pu me makou, ae mai la kela, a o ko makou naue aku la no ia a ku ana ma ka welau o ke alanui malalo o Koaekea, oia ke alanui a Umi i hele mai ai me na aikane ana, me Piimaiwaa ma, a makai ae o laila ke kahuahale o Milu, oia o Paoo, a he wahi poopoo pohaku no maluna ae, oia kahi e waihoi'i ke ake o Milu, i laweia e Kaalaeanuiahina a huna ia malaila.
          A maluna ae no o ia wahi kahi i haki ai ke kileo o Kihapu, no ka haule ana mai ka waha aku o Puapualenalena, ka ilio nana i kii i ua pu la, a kani ae la, oia ka wa i lohe ai na'ku kiai, iluna aku o Hokuwelowelo.
          E kamailio iki ae au ma ia wahi, he mala awa na Liloa aia i uka o ka Moomuku, ua haohao ia ka mea i pau ai, a i ka makai mau ia ana, ike ia he ilio ka mea nana i aihue, a i ka hoi ana o ka ilio me ka awa, mahope aku no ke kanaka, a hiki i kahi i noho ai o ke kahu o ua ilio nei, a hoi mai la ke kanaka a hiki imua o Liloa, a olelo aku la oia, ua loaa aku nei ka mea nana e aihue nei ko mala awa, he ilio a me kona kahu, a a i ka mauna e huli la i Waimea oia no ka manawa a Liloa i kena ae ai i na kanaka e kii a lawe mai i na aihue awa, me ke kauoha aku nae o ke'lii Liloa, e kii a lawe maikai mai, a ua hookoia ke kauoha a ke 'lii, a hiki aku la na kanaka imua o ua kanaka la me kana ilio e noho mai ana, haiia'ku la ka olelo a ke 'lii e hele, ae koke mai la no ke kahu ilio, a hele aku la a hiki ana imua o Liloa. Ninau aku la o Liloa, e hiki ana no anei i ko ilio ke kii i ka pu. (Kihapu,) no ka mea, oia ko'u enemi nui e noho nei, a i loaa ia i ko ilio, alaila ola oe a me ko ilio, o ka manao nae iloko o ua kahu ilio nei, ma ka olelo a Liloa, o ka make o laua, aole e lanakila ana o Liloa a me kona mau kanaka maluna o kana ilio Puapualenalena.
          Aka, ua ae aku la no ua kahu ilio nei, a kena aku la ke kahu ilio i kana ilio, a oia ke kii ana a ua o Puapualenalena, a hoi mai la me Kihapu, a i ku-ia i kae pali kekahi aoao o ka pu, oia ka mea i haule ai a kani ai ua pu la, haki ke kileo, a lohe ke akua, i miki mai ka hana, ua lilo, hoka ana ke akua. Ina e manao ana oukou e ike ia Kihapu e hele ae i Aliiolani Hale, a e ike ia ma ke keena o na mea hoonani.
          A malalo pono iho o ke alanui o Koaekea, na loko ia a Liloa, oia o Lokoula a me Laakea, o Lokoula nae, ua paa loa i ke one, a maluna aku o ua mau loko la ke kahua hale o Liloa.
          Ma ia kahua hale no i pepehiia ai o Hakau e na kanaka o Umi.
          No Pakaalana.—Oia kahi e kau ai ka aha kapu a Lilo oia o Ahuula, na keia aha no e ike i na lii nui mai ka po mai, alaila, moe ka aha ilalo, a ina aole he alii ka mea i hele aku imua o ua aha nei, aole no e haule ilalo.
          Kii Pohaku.—He pohaku loihi keia e ku la ma ke kihi o ka pa, a mawaena aku oia ke kii pohaku o Liloa, a ua pakuiia e Kapiolani a haki iho o luna o ua pohaku la, a malaila aku e moe ana i uka ka paepae kapu o Liloa, ua hana ia me he anuu alapii la, elua anuu o ko Liloa maluna, o kahi a ka la e puka mai ai, a o ko ke kahu anuu iho malalo, i hana ia pela, i ole e pii ke aka o ke kahu maluna o ko ke alii.
          Kahua Hale.—O keia ke kahua hale a Liloa a me na lii e konane ai, a o keia kahua hale kahi i loaa aku ai o Liloa ia Umi e konane ana, oia o Kauleialoa.
          Puuolea.—He wahi keia e hele ai na lii malihini a hoomaha, a manao lakou e hele e ike ia Liloa malaila, e hookuu aku ai i ka puaa, ina e holo ka puaa a moe imua o ke kahuna a Liloa, alaila, kahea ia mai ia alii, e hele aku e ike ia Liloa, a ina e holo ka puaa a hoi hou mai, aole e ae ia mai ia alii e hele aku e ike ia Liloa, ua maopopo mai la, he hele powa ka ia alii ia Liloa, kipaku koke ia mai la no ia, hoolohilohi iho no o ka make no ia.
          Papakonane.—Ua paa loa i ke one, oia ka papa konane a Liloa, aia ma na kumu niu malalo iho, ina aole i paa loa i ke one, ina ua hooikaika maua e eli me na kamaaina.
          Honuaula.—He heiau keia e kiei pono aku ana i ke kai, ilaila e pepehi ia ai ke kanaka i mea e hai aku ai i na akua lapuwale o ua o Liloa, a o Mokuula ka onohi o ua heiau la, he pohaku ia aia i ke kai kahi i ku ai.
          Ua ike aku la maua i ka pali a Hainakolo i pii ai i ka ai hua ulei, nui loa na ulei ma kela pali, i ka nana aku la, he pali hiki ole ke pii ke kanaka, ma ka welu paha o ka ulei ka hiki ana, wahi a'u e pane nei. Koe kahi o Leimakani i loaa'i ia Kaholoholouka a me Kaholoholokai, no ka inoino o ke kai. Ua ike iho la maua i ko Luukia kahua hale i noho ai, oia ka wahine nana i paki ia Lono iluna o ka pohaku. Ke pili nei keia kuhikuhi ana ma ka aoao akau o Waipio a hele i uka i ke komohana.
          Moaula.—He heiau keia, oia no kekahi wahi e noho ai o Liloa a kapu heiau, a he wahi no e noho ai na alii a lealea. A malaila kahi i noho ai na lii a pau me na kanaka i ka wa a Umi i kii mai ai e pepehi ia Hakau.
          Ke alakai a kahuna.—Maluna pono aku ia o ka heiau o Moaula, oia kahi e kaulana nei kahuna i ke ala iki, no ka mea, lapaau iho la ua mau kahuna nei i ka mai o ke lii Liloa a make, hui ae la na makaainana, ko laua la puka aku la no ia, he wahi puka ma ke kua o ka hale, a pii aku i luna o ka pali, mai laila mai keia olelo kaulana, he alaiki ko kahuna, he wahi alanui keia aole e uluia e ka Ulei a hiki i keia la, o ke pili  ka mauu e ulu la, a ma na aoao o ke alanui ka Ualei.
          Neneue.—He kio wai keia, he mano  nae, o kona inoa ia o Neneue, a o kahi ia e noho ai o ua mano la, aia ike oia ina kane, a me na wahine, na keiki e hele ana i ka heenalu, alaila, olelo maila kela, mai hele oukou, aole i paina ke kakahiaka o ka mano, aia, hiki na kane, a me na wahine i kai, oi ala mai no mahope, a wehe ke kapa, o ka luu aku la noia, a holo a mano aku la a loaa aku la no ke kanaka, o ke nahu ae la noia o ua mano la. A pea ae la no kela hoi ana, a pela mau noia e hana'i, a no Kau mai ke kanaka nana i ike, a nana no i kii e nahu i ka waiu o ua o Neneue a hilahila, a hele loa, aia i Hamakua kahi i noho ai ke kino pohaku ona.
          Waiomao.—He kio wai no keia oia ka wai a Leimakani i hookelekele ai i kana keiki ia Lonokaiolohia, oi ai, ua pepehi ia e Luukia kana wahine, a paki liilii i luna o ka pohaku a ma keia kio wai i hookelekele ia ai a hiki i ke ola hou ana wahi a Lalau ma, e noho ae la i Waipo a me Kauluela.
          No Kaholoholouka, me Kaholoholokai.—O laua nei na kanaka i loaa ai o Leimakani i ka hapuna kai, i ko laua wa i hele ai i ka lawaia, holoholo ana ma na kaheka, a na laua no i hanai a nui, he mau awawa keia e moe la, a eleu mai lalo a luna.
          Wailele o Hiilawe.—Eia keia wai ma ke kua ponoi o ko Mio hale, nani ke nana'ku i ka lele maopu mai a ka wai, ka'u keiki kai pii hookahi a auau ilaila, a o wau i nana wale aku no i ka hale, me ka ike pono ia no nae o ka lele ana a ka wai.  (Aole i pau.)