Ka Lahui Hawaii, Volume III, Number 43, 25 October 1877 — Page 2

KA NUPEPA KA LAHUI HAWAII.
HONOLULU, OKATOBA 25, 1877.

E HOOLOHE!

          Ma ka pule mua o Novemaba, e hoomaka aku ana o S. W. Pogue, ka hope no Rev. J. F. Pogue, i kona hele kaapuni ana aku ma ka mokupuni o Hawaii, no ka ohi ana mai i na koena aie no ka nupepa, o ka makahiki i hala a me keia Makahiki.
Nolaila, ke kau leo la aku nei oukou e na Luna a pau, e ohi e mai i na aie nupepa o na makamaka ma ia mokupuni, i makaukau e ai oukou i ka hookaa ana mai mamua ae o kona hiki ana aku.
E hoolohe e na Luna o ka LAHUI HAWAII i keia!  se 39 tf

E haule poho wale anei hoi na PUALIKOA O RUSIA?

          Ua kukakuka nuiia e na Luna Aupuni Kiekie o ka aina ma ke alo alii o Rusia no ka pono o na pualikaua Rukini—Ua like ka manao o kona mau Luna aupuni me ko na Aha Kuhina o Amerika Huipuia a me Beritania. O ke Kuhina Kaua Rukini wale no mamuli o ka lakou mau hoonohonoho kaua ana o keia manawa. O kekahi poe ina aole lakou e paupauaho ma ka makaikai pono ana'ku i na hana, alaila, e loaa auanei ia lakou na pomaikai ma na kumu e hana kokeia'i o ke kuikahi.
          Ua hoike mai kekahi Kuhina o Tureke i kona manao no ko Rusia hoohaahaa loa ia, a he mea pono hoi e loaa kekahi mau lanakila ma kona aoao, mamua'e o ka ae ana'ku i kona manao no ka hana ana i kekahi kuikahi ma na kumu oluolu. Ua hoomau mai no na pualikaua o Rusia i ka nee ana imua no na mahina 6 i hala'e, aka, aohe mau lanakila i loaa iaia.
          Ua loaa like no hoi ia haawina i ko Amerika mau pualikaua aupuni iloko o na malama mua 6, mai ka hoomaka ana mai o kona kaua kuloko i hala aku nei. Aia hoi ma ka hema ua koa ikaika, a me na Alihikaua akamai. Ma ka aoao aupuni hoi, aohe mahuahua o na koa kupono, na lako kaua a me na Kenela, aka, ua hoonaauao ia nae lakou ma Paina Komohana, i Nu Ioka. Ua oi aku mamua o ka makahiki hookahi ka holopapa ana o na hana weliweli a ke kaua, me ka ili ana mai o na haawina o ka poino a me ke ano paupauaho maluna o na puali kaua o ka akau.
          Aia hoi he mau anaina nui a hooweliweli o na kanaka i hui ae la ma na kulanakauhale nunui a nonoi mai la e hana kokeia ke kuikahi no ka maluhia ma na kumu a pau. Aka, ua mau mai no ke kulana o na hana, a hiki wale i ke komo ana mai i ka makahiki elua o ke kaua ana. Ia manawa i ike ia'i ka pii ana mai o ka makaukau o na pualikaua aupuni o ka akau, a me ka lawelawe ana a kona mau alakai, a ua loaa mai na lanakila a oi aku mamua o ka mea i hoomaopopo ia. Aka, aia no hoi kekahi mau pilikia nui e hopohopo ia'ku ai, mamuli o ke alakai hewa ia ana o ka noonoo o ka lahui e kekahi poe manaoino ma ka akau, a mai na hana hookuee mai hoi a ka Aha Kuhina ma Wasinetona.
          Aia nae me Rusia he mau pualikaua nui i kukuluia, a he manawa loihi kona hoomakaukau ana no keia kaua me Tureke.
          O Amerika Huipuia, aole loa i oi aku mamua o akahi ona wahi pualikaua kumau, aole loa hoi kekahi wahi hoomamakaukau ana no ke kaua, a o na hana a pau i ka wa i ala mai ai ke kaua, he hoomaka hou wale no. Ua oleloia, o keia poino nui o Rusia, ma o ka loaa ole o ka makaukau, oi ae o ka oihana kaua i kona mau alakai, no ka mea, mailoko wale mai no o ka poe o na kulana kiekie i hookohu ia'ku ai na alakai, a oia hoi ka hopena o na hooko ana a ka mana aupuni, oiai, ma ke aupuni o Tureke, o ke kanaka o ke kulana haahaa loa, a ina ua loaa iaia ka haawina piha o ka naauao, e ku ana oia ma ke kulana iluna loa.
          Aole i akenui o Rusia i na kanaka, aole hoi i na lako kaua oe ae o ke auholomua. Iloko hoi o na mahina 6 i hala'e nei o na hooili kaua ana, aole i loaa iaia he wahi moali o ka lanakila. Aia hoi kekahi poino ma na hoaoia ana e hookahuli ae i ka manao lahui, ma ke aupuni makua a me ko waho aku. Ua hakaka aku na Rukini maluna ponoi o ka lepo o na Tureke, he honua i kamaaina mua ia lakou la, a he mea pono hoi i na Rukini e hookamaaina ma ia mau wahi e like me na Tureke.
          Ua maopopo no hoi, he hana nui a kaumaha ke hana ia'na mamua'e o ka lawelaweia ana o ka hana kukakuka no ke kuikahi. Aole hoi no ko na Rukini nele ana i na haawina lanakila o na mahina 6 i hala'e, he kumu ia e loaa ole ai ia lakou ka lanakila ma keia hope aku.
          He ano ulolohi no na lahui ma ka akau ma ka loaa ana mai o na pomaikai nui. E paa mau ana na kuahiwi i ka hau hanee aole i kanamai. A i ka manawa hoi a na ululaau uliuli loloa o ka akau e luli kue aku ai i na laau pama o ka hema, he mea maopopo, o ka laau pama ke lele ana i kuahu. I keia manawa hoi, ke lohe mahui mai nei hoi kakou, aia na Rukini ke makemake la e hanaia ke kuikahi ma Konatinopela. Hookahi wale no mea maopopo, he mau pomaikai mahuahua oi loa aku ko Rusia no ka manawa loihi, a he mea kanalua ole no hoi ma ka hoopanee ana'ku i ke kaua, e loaa ana he lanakila maopopo, ma ka pii ana mai o ke akamai o na koa, a me ka loaa ana hoi o na alakai makaukau kiekie ma ka oihana kaua.
          Ke bakaka nei ke koa Rusia me ka ikaika. Aka, heaha la kona kulana mahope aku ke kapae ia'e na Kenela hawawa a pau e alakai nei iaia iloko o ka poino, i hiki ai hoi ke hoopihaia oia me na manao aa a uwila hoi iloko ona, ke waiho ia'ku oia malalo o ke alakai ana a na Alihikaua i piha i ka naauao a me ka wiwo ole ?

KA WI NUI MA INIA.

          He ku i ka hoehaeha puuwai na mea e pili ana no ka wi ma Inia. Eia ke ola mauleule nei he 30,000,000 oia lahui iloko o ka make a ka ai, a me he mea la, e pau aku ana i ka make he 3,000,000 o lakou.
          Ma Irelani, mailoko aku o 8,000,000 o kona lahui, ua aneane no e piha ka 2,000,000 o kona lahui i pau i ka make no ka pololi, a me ka luku ana a ka mai ahulau, iloko o na makahiki 1846 a me 1848, oiai hoi o Beritania Nui me kona mau pomaikai a pau, e noho koke mai ana no, a o Europa hoi me kona lahui nui a ikaika, aia no oia ma ka mamao kupono i hiki ke puana leo ia aku.
          Ina hoi pela iho la ka nui o ka poino i loohia mai maluna o Irelani, a me kona wahi lahui palanaiki, a me na kulana oluolu maikai o kona ea, ma o ka hoemi hope ia o ke ola maikai o na kanaka, alaila, heaha la ko kakou manao no ka lahui nawaliwali a i hoonele ia hoi i ka ikaika e noho la ma ka aoao hema o Inia.
          Ua lawelawe no ke Aupuni o Beritania, a ke lawelawe nei no hoi me ka ikaika i keia wa, e hoopau aku ia pilikia nui, aka, ua aneane hiki pono ole no ka hoolako piha ana aku i ka ai, a me na lapaau kupono ana no kela heluna nui o na kino kanaka e nonoi ikaika mai la no na kokua ia aku.
          He oiaio, ua komohia mau no o Inia e ka wi a me ka mai luku, aka, aole loa i lawelawe iki kona mau luna hoomalu i na hana o ke aloha kanaka i na wa i hala, e like me na alakai ana o na Mana Beritania i keia wa.
          Anoai paha ua loaa kekahi mau lalau iloko o na hooponopono aupuni ana a ko Beritania ma Inia, aka, me na ano hookiekie a pau, ua loohia mai no na pomaikai.
          Ua kuouoono na kamaaina oia aina akea malalo oia mau hoomalu ana ; a o ka pahola ana mai o keia wi maluna o ka aina, he kumu paha auanoi ia, e hookahuli ia ae ko lakou mana hoomalu aina.

HE MOOLELO NO KA LAWEMALU IA ANA.

          Ka inu hauoli ana o kekahi kanaka kalepa waiwai o Ottowa me ke kanaka kahukaa ma Monoteriala, a a a aku kona hiamoe ma "Kulanakauhale Lae i Aferika, mahope o ka hala ana'e o na malama he umi.
          Ua loaa mai kekahi teregarama i na nupepa o Toronoto mai Ottawa mai, e waiho mai ana i ka hoike a A. D. Farasera, kekahi kanaka kalepa oia kulanakauhale i nalowale loihi, e hahai ana no na ulia i loohia mai maluna ona, iloko o kona kaawale ana aku no ka makahiki hookahi, a penei kana hoike ana :
          E like me ka hiki ia'u ke hoomanao, me he mea la ua haalele iho wau i ke kulanakauhale ma ka malama o Mei, o ka M. H. 1876—o ka la mua no ia o Iune, pela mai kuu kakauolelo ia'u—a hele aku la wau no Monoteriala, no ka hooponopono ana i na hana. Aia me a'u he $800 (dala) maoli, me kekahi paiki ili lole no'u.
          Ia'u i hiki aku ai ma Monoteriala, ninau mai la kekahi kanaka ia'u no ko'u hotele e noho ai. Pane aku la wau iaia, ma ka "Hale Monoteriala," a lawe aku la kela i kuu ukana. Halawai koke aku la no hoi au me Mr. Ululaauhikina, (Eastwood,) a hai mai la oia ia'u e hele ana oia ma ka "Hotele Ottawa." Haalele aku la wau i ua keonimana la, a naue pololei aku la ma ka ala e hiki aku ai i Monoteriala Hale, ia manawa ike aku la wau i ke kanaka nana i lawe mai i kuu ukana e holo ana maluna o ke kaa.
          A no kuu ano kanalua no, anoai aole paha oia no Monoteriala Hale, holo koke aku la wau mahope ona, a mahope o ka uhai hele ana iaia ma kekahi mau alanui, loaa aku la oia ia'u, a ninau aku la wau i kana wahi e hele ana.
          Pane mai la kela, kainoa hoi i Monoteriala Hale, a i ka hala ana ae o kekahi mau minute hou, ku ana maua mamua o kekahi hale, a ia'u i komo aku ai iloko, ike iho la wau he hale hotele keia. Kauoha aku la wau iaia e lawe i kuu ukana ma Monoteriala Hale, aka pane mai la kela. "O Monoteriala Hale hoi keia." Aka, aia no nae iloko o'u ka noonoo, me he mea la, he wahi ano kolohe kona, a nonoi aku la wau iaia e pa kiaha maua.
          Ia manawa inu ae la kela, a inu no hoi au, a me he mea la ma kuu hoomaopopo ana, ua awili ia kela mea inu me kekahi laau hoano e noonoo, oiai o kuu ike wale ana no i kuu manawa i noho iho ai maluna o kekahi noho, a hiki i kuu ala ana ae, aia wau e waiho ana ma ke keena, maloko o kekahi hale mai ma Kulanakauhale o ka Lae, (Cape Town,) a ike iho la wau aohe a'u wahi dala iki i koe, a o kuu uwati a me ke kaula uwati ua nalowale. O kuu hiki ana ma Kulanakauhale o ka Lae, he mea kupanaha loa ia ia'u, ua makemake ka ke kapena o ka moku mua nana wau i lawe malu mai, a hiki ma ka Pae Aina o Madeira, e hoolele ia'u ilaila, aka, aole i ae mai na mana aupuni oia wahi e hoopae aku ia'u, oiai ua ano hihiu ka wau, a no ka nele hoi i na malama kupono.
          Nonoi mai la hoi kekahi kapena moku e ae nana wau e malama, a lawe loa ia'ku la wau a hiki ma Kulanakauhale o ka Lae.
          Ma kuu hoikeia ana mai, ua hiki aku wau ilaila ma ka malama o Dekemana, o ka M. H. 1876, aole nae i loaa mai ia'u na noonoo ao kanaka a hiki i ka la 10 o Feberuari o keia makahiki 1877, oia ka manawa i hoi hou mai ai ko'u mau noonoo maikai, a me he mea la, akahi no wau a ala ae mailoko mai o ka hiamoe ana no ka wa loihi, me kuu ninau pu ae no hoi, eia la wau i hea? Aole loa wau i manaoio iki aku i ko lakou wa i olelo mai ai eia wau i Kulanakauhale o ka Lae, a ua manao iho la lakou, aole la i hoi hou mai ko'u mau ike a pau iloko o'u.
          Hoike mai la lakou ia'u no kuu kamailio olalau loa mamua aka ina he oiaio ia, aole loa no o'u wahi ike iki no ia mea. Aole no hoi o'u wahi noonoo iki no ka manawa a hiki wale i kuu wa i ike ai i kekahi pepa i kakauia ma ka M. H. 1877 nei, a i kuu ninau ana aku ia lakou i ke ano oia mea, manao hou mai la lakou, aole no la i maopopo ia'u ka mea a'u e kamailio ana.
          He oiaio, ua ilihune loa iho la wau i keia manawa, i kahi dala ole, a o ka poe hoi nana e malama nei ia'u, he poe oluolu loa lakou, aole hoi lakou i manao nui mai no ko'u uku ana aku ia lakou. I ka loaa hou ana mai ia'u o ka maikai o ke ola kino, ua loaa koke ia'u ka hana, he malama buke, maloko o na hale waiwai o ke aupuni, a ma keia ano, ua loaa mai la na pomaikai nana e lawe aku ia'u a hiki ma Ladana. He mea kupanaha loa ke hoike ae, i ka wa i hoi hou mai ai ko'u mau noonoo, ia'u e noho ana ma Kulanakauhale o ka Lae, ike iho la wau, eia no ka me a'u kuu eke dala, a oia mau waiho maikai no hoi o kuu mau lole a pau a o ka lole hoi a'u e aahu ana ua loaa mai ia ma ka lokomaikai o kekahi mau malihini. Aole loa i maopopo ia'u na mea e pili ana no na moku nana wau i lawe malu mai ; me he mea la, o keia huakai hele a'u, he hiamoe kulipolipo ia no kekahi manawa loihi i hala ae la, ma kuu hoomaopopo ana iho.
          Ua loaa iho la ia'u ke dala o ko'u ukumoku a hiki i Enelani, a haalele aku la wau ia wahi, ma ka la 27 o Iulai i hala'ku nei, me ka haawi pu aku i ke aloha a me ka'u mau hoomaikai hope loa maluna o ka poe a pau nana i malama ia'u me ka pau aho ole. He oiaio he nui wale ka poe i manao, he kanaka hoopunipuni au, a ina hoi i waihoia wau malalo o ko lakou mau malama oluolu ana, he ninau nui ia. E laki hou ana anei au i ka home i keia manawa? Hiki aku la wau i Enelani ma ka la 24 o Augate, mahope iho o ka hala ana ae o ka huakai holo moana ano kohu mai, a loaa iho la ia'u na kokua malaila i pahola ia mai e kuu poe hoa loha i hele mai e ike ia u ma ia wahi, haalele iho la wau ilaila, a holo aku la no Livapula ma ka la 30 o Augate aku nei, a ma ka Poaono, ku mai la ma Kuebeka.
          He mea nui keia, anoai ua mahuahua paha ka'u mau mea i ike ai, mai kuu haalele ana iho i ka aina no ka makahiki hookahi a oi aku i hala ae nei, aka, aole i loaa ia'u ka laki o ka halawai ana mai me na pomaikai ma ka'u mau kaahele ana, oiai ua pouliuli wale no imua o'u na huakai mamao a'u i hele aku nei, a ma kuu huli hoi ana mai no ka home, ua loohia wau i ke omaimai mau. Aole i maopopo ia'u heaha la na hana e ike ia ai a hopu ia hoi kela mea nana i hoohainu ia'u i ka laau hoopupule ma Monoteriala.

          Ma ke aumoe o ka po Poaha o kela pule aku nei, ua pakale mai pau i ke ahi, ka hale o Mr. Wood ma ka alanui Nuuanu, e nohoia nei e Dilinahama ma. Ua hoopuiwaia koloko o ka hale, e ka malamalama o ke ahi, oiai e hiamoe ana, a ma ka eleu o ke kinaiia ana, ua pio koke ke ahi, a ma ka hakilo hele ana aku, ua loaa, aku la kekahi mau eke, ua hoopihaia me ke oka laau, a nolaila mai ke ahi. A mamuli o ka hoohuoi, ua hopuia ka pake kuke, e lawelawe ana maloko oia wahi.

Nu Hou o na Aina E.
Ke Kaua maloko o Bulugaria!
Ka hakaka ma Biela a hoauheeia na Tureke.
AUHEE O MEHEMETA ALI ME KA POINO NUI.
Na Hoouka Kaua Lehulehu e ae.

          Ma ke ku ana mai a ka mokuahi Kulanakauhale o Kikane mai Kalaponi mai i loaa mai ai ia makou na mea hou o ke kaua, a e hai pau aku no makou no ka pomaikai o ko makou mau tausani heluhelu.
          Konatinopela, Sept. 23,—I keia la, ua telegarapa mai la o Mehemeta Ali i na mana o Tureke penei : Ma ka manawa o ka hoouka kaua nui ana ma Biela, ua hele aku makou imua ma na wahi malumalu o ka enemi. A na ka uhi ana mai hoi o ka malu po i hooki mai i ka hakaka ana. Ua oi palua nae ka make o ka enemi imua o makou.
          Bukareseta. Sept. 23.—Ma ka manao ana o ka poe i hoi mai, mai na kahua hoomoana mai o Kenela Karoviteka ma Delema Monsetina, aole paha e hoomaka mai ana na Tureke e kaua mai ma ka Poalima, aka, o ko lakou manao ka hoomoali aku i alahele a hiki i Tiranova.
          Ladana, Sept. 24.—Ua hoike mai kekahi mea kakau nupepa i ikemaka i ka hoouka kaua o ka Poalima : He 5 a 6 na lele kaua ana'ku o na Tureke i keia la maluna o na Rukini, a mai ka 1 hoi a i ka 3 na bataliona o kela a me keia hoouka ana, a ua poho wale ko lakou mau hooikaika ana. Aole i kanamai ka poino o na Tureke. E ikeia no ka heluna nui o na kino make a me ka poe i hoehaia o na Tureke e waiho mokaki mai ana ma o a maanei o ke kahua, kahi a na aoao mokomoko i nee ai. Ua ku na Rukini ma ko lakou mau kulana ma kekahi auwaha malumalu nui me ka neeu ole. Ua lele kaua aku no hoi kekahi mahele o ka pualikaua o Ahemeta Aiuba maluna o na Rukini ma Kudikalei, a he 2 hoi mau bataliona malalo o Mehemeta Ali i hoouka kaua aku i na Rukini ma Verabataka, aka, ua hoopuehu ia'ku na Tureke ma keia mau wahi.
          Hoololi hou ae la na Tureke i ka hoouka ana ma ko makou waena a ma ka aoao, aka, ua halawai hou aku lakou me na hooauheeia. Ua pau ka la okoa ma keia hakaka ana.
          V iena, Sept. 23.—Ua hiki mai na lono hou, ua hiki ae la ma ko O semana Pasha wahi kekahi puali he 20,000 ka nui, malalo o Kefeketa Pasha, a ma o lakou la i hiki ae na lako hou no na Tureke ma ia wahi.
          Ua hoikeia mai ka poino o na Rukini ma ka hoouka kaua o Shipka Pasha ma ka la 17 o Sept., oia hoi, he 31 na alii a me 1,000 wale no na koa i make a hoehaia.
E zerouma, Sept. 27.—He 20,000 na Rukini i hiki ae ma o aku o ka waenakonu o ko Mukeatra Pasha pualikaua, a ua hooukaia kekahi kaua hahana.
          Eia malalo iho ke telegarapa i loaa mai no ka hoike o ke kaua nui imua o Kars penei :
          Konatinopela, O ct. 2.—Ua telegarapa aku la o Muketara Pasha ma ka Poakahi, ua lele kaua mai la he 8 mau bataliona koa o na Rukini, me ka pualikaua lio i kokuaia e kekahi puali pukaa, mahope mai o kona pualikaua ma Nikikonina. A mahope iho o ka hakaka ana no na hora 5, ua emi hope aku la na Rukini me ka make ana o na koa he 400. Ia manawa hookahi no hoi, hoao hou mai la he 4 mau bataliona koa hele wawae o na Rukini a me 3 Regimana o na pualikaua lio e lele hou mai maluna o na Tureke, me ka hoololi ana i ke kulana ma ka aoao akau mai, aka, ua hoeha hou ia'ku no.
          Konatinopela, Oct. 4.—Ua telegarapa mai o Muketara Pa sha no ka hoouka kaua o ka Poakolu, aole i kukonukonu loa. Ke olelo mai nei oia, ua emi hope aku kona puali kiai mai ke Kamelava Nui mai, a oia hoi ke kulana i lawe pio ia'i e Kenela Melikofa, i hoike ia mai Karakala mai inehinei. Ua lele kaua aku hoi na Rukini maluna o Kamelava uuku a me Kikilatepe, aka, aole lakou i lanakila.
          Ua hooweliweli mai hoi na Rukini me 6 mau bataliona koa ma ka aoao akau o na Tureke. A mahope o ka hakaka ana no na hora 5, ua alualu aku lakou i na Rukini a hiki i Arepekohi. A ua hooki ia ke kaua ana e ka poeleele, ua hoopaa no na aoao a elua i na kulana. Ua hoike mai o Muketara Pasha o ka poino o na Rukini he 500, aole hoi i maopopo ko na Tureke poino, aka, ua hoehaia o Taselle Pasha.
          Aole he mau kaua i hooukaia ma ka Poaha, koe wale no ma kahi kokoke ma Karakala. O ka lono i lauahea waleia ae ai no ka make ana o 2 mau Kenela o Rukini, aole i maopopo.
          Ua hoouna aku ka mana Tureke i ka lono i kona mau elele ma na wahi a pau e hoike aku ana ua loaa ia Muketara Pasha he lanakila nui.
          Ladana, O ct. 5.—Ua hiki hou mai na lono no ke kaua imua o Kars no ka lele kaua ana'ku o na Rukini ma na kulana o na Tureke, aka, ua hoemi hope ia'ku me ka poino. Ua hooukaia hoi kekahi kaua nui ma ka Poalua, oiai hoi ka laina o na pualikaua o na Tureke e moe ana mai ka Iagui Nui a me Iagui uuku, ma na puu hoi elua i hoopuniia me na papu ma ke kula o Kunisekada a hiki loa'ku i Ani ma ka muliwai Apaketala, me ka nee mua ana'ku o waenakonu a hiki ma ka muliwai, a noho iho la ma Kikilatepe. A no ka hoopuipni hou ia ana mai hoi o na Rukini e na pualikoa hou a me na puali i hoouna mua ia mai ai no ka hoopio ana i ka poe Kokasiana hoohaunaele, nolaila, ua hoomaka hou mai la lakou i ka lele kaua ana ma ke kakahiaka o ka Poalua maluna o Iagui Nui, a ua hoopuiwa ia na Tureke.
          Hookahi bataliona o na koa Tureke i oki liilii ia e na Rukini, a lawe pio pu ia hoi me ke kulana, oiai na Tureke e noho hoomalu ana ma ia wahi, a ke hoomakaukau nei hoi ke Kenela o Tureke no ke kaua hou.
          Ua loaa mai kekahi hoike pili aupuni mai na Tureke mai penei : Ua hoouka hou ia kekahi kaua no na hora he 13. He elua na manawa a na Rukini i lele mai ai, aka, ua hoemi ia'ku me ka poino.
          E olelo ana kekahi Buletina o Rusia mai kahi hoomoana mai o ke Duke Nui Mikaela ma Karakala i ka papu o Iagui Nui. Ia manawa no hoi, ua hooikaika loa mai kekahi pualikaua Rukini, oiai e nee ana ma Kars, e hoohuli aku i ko na Tureke akau, a e komo aku mawaena o Kars a me Muketara Pasha. O keia nee ana ka ka mea kakau nupepa i hoike mai ai, a ua hoike pu mai no hoi oia, ua hookahuaia na manaolana no ka hiki ke oki pu ia o Muketara Pasha mai Kars aku.
          Ua hoike ae hoi ka buletina o Tureke penei : Mahope iho o ka hala ana'e o na hora 5 o ke kaua ana, ua hoemi hope ia'ku la he 6 mau bataliona o na Rukini a me 2 Regimana o na koalio me ka uhai pu ia'ku mahope a hiki ma na kapa o Arepatai.
          Ladana, O ct. 9—Ua hoike ae na Rukini, o ka nui o ka Muketara Pasha poino ma ka la 2 a me 3 he 6,000.
          Oiai hoi na Rukini e hakaka ana me ko Muketara Pasha puali, aia hoi ka poe hoohaunaele Musulemana o Dagehetana ke haawi mai la i na poino mahope mai o lakou, e like me ka hoike a ke telegarama malalo nei :
          Ladana, O ct. 12.—Ua hoike pili aupuni ia mai Sana Peteroboro mai ka hana a na pualikaua o Rukini maloko o Asia, no ke ala ana'e o kekahi haunaele kipi ma na apana aina waena o Dagehetana ma ka la 12 o Sept., a ua komo pau loa mai hoi o Waena a me na apana aina ma ka hema, a hiki loa'ku i na apana e pili la ma na kapakai. Ma na la 23 a me 24, ua lele kaua ia mai la na Rukini e ke kino holookoa o ka puali hoohaunaele kipi, he 6,000 koa ikaika, aka, ua hoauhee ia'ku lakou a kauliilii. Ke manao ia'ku nei aole paha e hoehu kaua hou mai ana na poe hoohaunaele nei.
          Parisa, Sept. 28.—Ua hoike ae ka Elele Hoomanao, e hoouna aku ana ke Suletana i ke Keiki Alii Hasana ma ka la hope o Oct., no ka lawe ana'ku e waiho imua o ke aupuni Beritania, no na kumu e hiki ai iaia ke ae aku i ke kuikahi.
          Ladana, O ct.1.—Ua hoike mai kekahi mea kakau nupepa e noho pu la me na pualikaua Tureke ma Pelevena, aole no i nui loa ko Osemana poino, aka, ma ka la ana i hoao ai a lawe pio hou mai i ka palekaua ma ke alahele o Lofekaka, ua poino aku la he 3,000 o kona mau koa, a ke waiho nei hoi ma Pelevena he 1,900 poe i hoehaia.
          Ke manao nei na pualikaua o Roumania e uwai aku i ko lakou mau auwaha malumalu a hiki ma kahi he 30 iwilei mai ka palekaua elua mai o Gerivica, mamua o ka hoehu kaua ana'ku. Ua hoouna mai la kekahi mea kakau nupepa, ua paa ka manao o na Roumania, e hiki ana no ia lakou ke lawe pio mai i ka palekaua, a ke olelo nei lakou, ina e hikiwawe ana ko na Rukini nee ana mai ma ko lakou aoao, he mea maopopo, e haule pio ana o Pelevena iloko o na pule wale no elua.
          Ke nee mao ole mai nei no hoi na pualikoa o Rusia ma Sereta a me Walakaia.
          Kikako, Oct. 2.—Ke olelo nei ka nupepa manawa o Ladana penei : O ka hoouna ana'ku a ka mana Tureke i ka poe Basi-Buzuka iloko o Tesale, he hoala ana mai ia i na manao uluku o ka inaina, a he oiaio, e komo koke mai no ke aupuni Helene iloko o ke kaua. O ko Serevia ku ana iwaena, he ninau nui no ia no ka manawa. O na manao uluku iloko o Hunageri, he mea ia nana e kauo mai ai i ke aupuni o Auseturo Hunageri a owili pu ia iloko o keia kaua me Rusia. Ua piha hoi o Geremania i ka inaina no na hana ino a Tureke, a ke manao ia'ku nei, ina aole e hiki ana i ka aha uwao ke hoopau i ke kaua iloko o keia haulelau, ua maopopo, e komo holookoa ana o Europa iloko o ke kaua. Ua maopopo nae ua nele ka aha uwao i ka mana ole a e komo ana o Enelani i loko okeia uluaoa.
          Ragu sa, Oct. 3.—Ua hiki ae la ma Mosetara ma ka okana aina Herezigovina, he 2,000 na Basi-Bazuka a me na kaualio he 2,000, kahi hoi a kekahi pualikaua he 10,000 e hooikaika ana e hoi hou mai ka aina i lilo i ka poe Monetenegariana.
          La dana, Oct. 4.—He hoike kuikawa mai Rusetaka mai e olelo ana: Ua nui ka poino i ili mai maluna o ke kulanakauhale o Rusetaka mai na ki poka pahu hou ia ana mai e na palekaua Rukini. Ua pau loa ka hapanui o na hale i ka lukuia ilalo, a he kakaikahi loa na hale i koe e ku ana.
          La dana, Oct. 1.—He wahi hoike ano maopopo ole mai Sopia mai e olelo ana: Ua hoauhee aku o Osemana Pasha i na pualikaua Ruso-Roumania i lele kaua mai ma kona alo a me ka aoao hema, me kona haawi aku i ka poino nui ia lakou. Ua lele kaua hou aku hoi oia i na Rukini ma ke alahele o Lovateza, a lawe hou mai i na kulana i lilo mua i ka enemi.

Huakai Makaikai ia Hawaii Akau.

          A mahope o na hana i koe ua hoomaha ka aha he hapa hora, a hoomaka hou a i ka hora 4 ka hookuu ana.
          O ka pau loa no ia o ka ka Ahahui mau hana, elua no la hookuuia, maikai ke ola o na kahu a me na elele, o Rev. Laiana wale koe no kona palupalu ma ke kino.
          Ma keia hora eha no i noho mai ai ka Ahahui kula Sabati, ia W. A. Mio no ka noho hoamalu, a koho ka Aha, i ka mea mahalo ia Waiau i kakauolelo, a noho na hoa kuka aku la no au.
          O keia halawai nae ko'u mea i kauoha ia mai ai, e holo aku no ka hapai ana a noonoo ana i na mea e holo ai na kula Sabati, o lakou a i mea e hoihoi ai na kumu, a pela io no, ke akoakoa nui ana keia.
          Ua heluhelu, a hoike waha ia na kumu manao o lakou a hiki i ka pau ana, a ninaninau ia, na haumana o kela kula, keia kula Sabati aole nui ka poe hele mai i kekahi Sabati a mahuahua i kekahi wa.
          Ku mai nae o H. S. Mahuka, a paipai mai me ka ikaika loa i na kumu kula aupuni e hoouna i na keiki i na kula Sadati. Ao ke kumu e lawe ole ana i kana mau haumana i ke kula Sabati e hoopau ia kela kumu a nui aku kona mau manao paipai me ka ikaika a makai.
          Hooholoia—Eia ka mea nui aia ka Ahahui i hooholo ai, i ekolu wahi e hoike hui ai na kula Sabati mai Kohola Akau a me Kohala Komohana, i Kohala Akau ma ka la 1 o Ianuari 1878. Mai Kawaihae a Waimea, i Waimea ma ka la 28 Dekemaba 1877. Mai Hamakua a Waipio, i Waipio i ka la 28 Novemaba 1877.
          I ko'u nana ana'ku ia lakou, piha loa lakou i ka olioli, no ka mea he hana hou keia, aole mamua aku.
          Hookahi wale no mea i kuemi ai ka lakou mau oihana kula Sabati, o ko la-hilinai, ma na haawina ma na Nupepa, he lohi loa ka hiki ana aku o na Nupepa, a o kekahi, aole i lawe nui ia na Nupepa wahi a kekahi poe.
          A ina e hoololi ana lakou ma ka Baibala ke alakai ana, alaila holo i mua lakou, aka, o ko'u manao nae ia e paipai aku nei, i na kula i hemahema i na Nupepa e alakai aku ma ka Baibala na kula Sabati i holo i mua na hana ma ka hora 6, ua hookuuia ka Aha me ka pule.
          Ma ke kakahiaka o ka Poalima ae, ua hoi nui aku na hoa oia mau Aha, i na home o lakou me ka pumehana o ke aloha, a haawi nui maila lakou i ke aloha i na malihini o Oahu, a hoi aku la, he la malie loa ia.
          A ma ka hora 2 oia la, kii mai la, o Kaumelelau ia maua e hele pu me ia e makaikai i na wahi kaulana o Waipio, ae koke aku la maua, a maluna o na lio ka hele ana, a hiki aku la makou ma ka hale a maua i kipa mua ai, ka hale o na hoahanau mamona, loaa ia makou, kekahi kanaka kamaaina i makaukau loa ma ka ike ana i na wahi pana.  Aole i pau.

          NA MARE.—Ma Opihikao, Puna Hawaii, ua hoohuiia o M. K. Kawaihau (k) me Lilia Kauuku Kekino na Rev. D. Makuakane i mare.
          —Ma Makawao, ua hoohuiia o William H. Cummings me Clarisa Jackson, na Rev. J. S. Green i mare.

          NA HANAU.—Aug. 24, ma Kalulu, Lanai, hanau o Maihilau (w) na Kulamanuole me Nakihei.
          —O ct. 11, ma Maunalei, Lanai, hanau o Piikula w na Hoohuli 2, he keiki kamehai.
          O ct. 19, ma Kapauhi, ua hanau mai la he keikikane, na Iuko (k) a me Kealoha (w.)