Ka Lahui Hawaii, Volume III, Number 42, 18 October 1877 — Page 3
OLELO HOOLAHA.
E halawai ana ka Ahahui o na Ekalesia o ka Mokupuni o Kauai, ma ka luakini o Lihue, ke hiki aku i ka la 24 o Okatoba, hora 10 A. M., 1877. Ua makemake ia na lala a pau e hele makaukau ae.
41 2ts J. H. MAHOE, Lunahoomalu.
OLELO HOOLAHA.
E halawai ana ka Ahahui Lunakahiko o na Mokupuni o Maui ma Wailuku, maloko o ka Halepule Kaahumanu, ke hiki aku i ka la 16 o Novemaba. Nolaila, ke paipai ia'ku nei na lala a pau e makaala a e hele nui ae i ka halawai o ka Aha. Ke paipai pu ia'ku nei no hoi na lala a me na Ekalesia, e hoomakaukau mua i na haawina i haawi mua ia. MA KE KAUOHA. 41 6ts
NA ANOAI.
Ma keia kakahiaka i ku mai ai ka mokuahi Kulanakauhale o Kikane, mai Kapalakiko mai.
He halawai ke malamaia ana e ka Ahahui Opiopio Kristiano o na haole ma ka Halepule Lyceum ma Peleula, ma ke ahiahi o ka la apopo.
E puhi ohe olioli po mahina ana ka Bana i keia ahiahi, hora 7 1/2, ma ka Emma Kuea. O ko kakou mau no o ka hoopiha ae i ke KUea e hoolohe i na mele leo lea.
IKE ALII.—Ma ka Poaha o ka pule i hala, ua hele aku na lii o ka moku kaua Farani Limier e ike i ka Moi ma Iolani, a ua hoolauna ia aku lakou e like me ke ano mau.
E weheia ana ke kuai kudala o na pono hoonani hale, maloko o ka hale kuai hou o Makinikaea, (McIntyre) ma alanui Papu, ke hiki aku i ka Poakahi la 22 o keia mahina. E hele ae no ka lehulehu malaila e ikemaka no lakou iho.
Ma ka auina la o nehinei, ua holo aku ka Moi maluna o ka manuwa Farani Limier, a ua hoohala Oia i kekahi manawa ma kona oneki, a i kona huli hoi ana mai iuka nei, ua haawi mai la ko ka moku i na kipu ana he 21, e like me ka rula mau.
E malamaia ana he anaina halawai haipule, maloko o ka hale lole makai o Ainahou i ka hora 7 1/2 o ke ahiahi Sabati e hiki mai ana, malalo o ka hooponopono ana a ka Ahahui Opiopio Kristiano o na haole. E hele ae no malaila ka poe e makemake ana.
Ma ka leta hope i loaa mai, e hoike mai ana, ua hiki aku la o Rev. J. F. Pogue ma kona onehanau, ma Wileminitona, mokuaina o Delaware, Amerika. Aia no oia i keia manawa ke launa aloha ala me kona ohana, me ka oluolu maikai o ke ola kino.
Ma ka Poalua iho nei, ua malama ia he ahaaina nui ma Waikiki-kai, no ka hoomanao ana i ka la hanau o Ka Mea Kiekie, Victoria Kawekiu, Kaiulani. Ua hiki kino aku ka Moi malaila, na lii o na manuwa Jamestown a me Limier, a me kekahi poe maka hanohano e ae.
Ua kiei aku makou ma ka hale paikii o Mr. Dickson ma Alanui Papu, a ua ike i ke kii nani o ke Keiki Alii Leleiohoku i make. He kii ia i penaia me ka noeau, a i ka nana aku, me he mea la, o kona kino ola okoa no, aole wahi e hoohewahewa ai ke ike aku, a e ike ia no e ka lehulehu ke hele ae malaila.
Ma ke kakahiaka Poakolu iho nei i lawe mai ai o Mrs. Malie Kalaau i kekahi i-a he Malolo i loaa iaia mauka ae o ka uwapo o Hooliliamanu i ko makou nei halepai. Ua loaa aku ua i-a la e lana ana, aohe nae i make, a ua hopu ia e keia wahine, a laweia mai imua o makou e hoikeike ai. He mea hou no keia, ka pii ana o keia i-a mai ka moana kai lipolipo a i ka honua.
PAU PU HELU PAPALUA.—Ma keia hoi ana mai nei a ke kuna Manuokawai mai Kauai mai, ma ona la i loaa mai ai ka lohe no ka ili ana o ke kuna Kinau ma ke awa o Wailua, kahi ana i kii aku nei e hoopakele mai i ke kuna Luka i ili mua malaila. O ke Kapena Ahuihala kekahi i hoi mai, a ma ka ninau pono ana iaia, ua hooia mai oia i ka oiaio oia poino.
HE PEPEHI KANAKA.—Ua hiki mai ka lohe no ka make ana o Kapena Hayes o ka moku kuna Lotus i haalele mai ai i keia awa no ka pae aina o Samoa ma ka la 9 o Okatoba, o ka makahiki i hala aku nei. Ua pepehiia oia ma ka malama aku nei o Maraki, e kekahi kanaka Holani, i kepaia ma Samoa ma ke ano he kuke, me ka lawelawe pu ana no hoi i ka oihana no ka moku.
HAUNAELE WELIWELI.—Ma ke awakea o ka Poakahi iho nei, malalo o Lepekaholo, ua ulu ae kekahi haunaele no ka ona, mawaena o na haole sela o ka moku kuna Joseph Woolley, a ua manaonao ke nana aku i na alina o ka eha maluna o kekahi mau haole elua, a i ka manawa i hoihoi ia aku ai a hiki ma ka moku, oiai e holo ana ma ia la, ua hoao hou ae la no kekahi poe sela e hoohaunaele hou, ua hoopau koke ia e na makai a me ka lehulehu.
NA INOA HOOHANOHANO O KA EMEPERA O RUSIA.
O kona inoa ponoi he C zar, a ua pakui houia aku keia mau inoa malalo nei: o Alekanedero elua ka Emepera Autokerata o na Rukini a pau ma Moseko, Kiew, Viadimira, a me Novogoroda; Tesara o Kesana a me Aseterakana ; Isera o Siberia ; Isara Kehetova ; Haku o Pesokofi ; Keiki Alii o Samobasaka, Litihuanio, Volonunia, Podolia, a me Finelana: Keiki Alii o Esetonia, Livonia, Kohorelani, Biasetoka; Perema, Viataka, Bulegaria, a me kekahi mau mokuaina lehulehu e aku; he Haku a a he Keiki Alii hoi no Nijini—Novogoroad, Terinegofa, Kiazana, Polotesaka, Rosotowa, Iarosali, Vitepasaka; Mea Hoomalu o na aina ma ka Akau; Haku o Aremania; Haku o Alasaka; Haku a Moi hoi o Terekesesa o na mauna Aliiwahine; Hooil na o ke aupuni o Norewai; Duke o Selaewiga—Holesetina; Duke o Oledenabuga.
HOOLAA LUAKINI MA WAIANAE.
Ua lawelawe ia iho nei keia hana eehia, ma ka apana o Waianae, i keia la 10 Oct. E na kahunapule Karisiano o keia Mokupuni Oahu ka poe hoi nana e paa nei ka mana Akua oiaio; i kapa ia, Iehova ka Hoola, no ko makou Luakini hou, i kapa ia makia o ke aupuni. ua ku maoli no i ka hanohano, a ua kohu maoli hoi i ka oiaio a eehia ka hana a na keiki Hawaii, a me kekahi mau makua haole oia hoi o Binamu opio, a me S. E. Bihopa. Ma ka hora 10 o ke kakahiaka Poakolu ka hoomaka ia'na o ka hana; me ka piha o ka Luakini i na kamaaina a me na malihini i hiki ia mau la. Akahi no a hoolaa ia keia Luakini mai ka hoomaka ana i ke kukulu ia'i i ka M. H. 1865 A, me he'la aia ke Akua ma keia haawi ana i keia hale ma ka ike ana'ku i ke anoano, a meha, aole hawanawana aole hoi na keke a holoholo aka, ua piha i ka eehia ma ka lawelawe ia ana o na hana, a penei ka hoomaka ana, i ka papa himeni, ka himeni hoonani ia Rev. S. Paaluhi ka himeni mua; a ia Rev. J. N. Paikuli ka olelo heluhelu pili hoolaa; a ia Rev. J. Kekiokalani ka himeni elua; a ia Rev. S. Waiwaiole ka haiolelo; a ia Rev. S. E. Bihopa ka pule hoolaa a ia Rev. M. Kuaea na olelo ao i ka Ekalesia; a ia Rev. J. Kekahuna ka himeni hookuuu; a ia Rev. S. Kalana ka pule hookuu. I ka pau ana o keia mau hana, ua haiamu ka lehulehu, a olioli lakou i ka loaa ana o ka hale maikai, a me kahi hoi e launa pu ai me ke Akua. A mahope iho, ua lawelawe ia ka lulu ana i na wahi okeni a na kamaaina a me na malihini: a ua loaa mai $177,50. A noloko o keia mau dala, he $56.75 mai na malihini mai; a o ke koena aie he 100.00 a oi aku, a hookahi wale no puuwai o keia mau wahi koa uuku, o ka hooikaika a lanakila, i kohu pono ai ka inoa makia o ke aupuni, nolaila, ke waiho aku nei makou i ka hoomaikai ana i ka Makua Manaloa, no kona hoopomaikai ana ia makou i keia puka o ke ola. A. K. HINAWALE.
Waianae, Poka-i, Oct. 11, 1877.
KAAHELE ANA I NA EKALESIA O MAUI.
Aug. 27, 1877, haalele ia Honolulu po Maui, ku ma Lahaina ma ke kakahiaka la 28, a noho ma ka home Leialoha, ka home a ke aloha i hooipo ai.
Sept. 1 haalele i ka home Leialoha no Honokohau, a me Kahakuloa. O Rev. J. M. Kealoha ka anela oia ekalegia.
Sabati Sept. 2, akoakoa mai la ko laila poe ma ko lakou hale Akua, a malama ia ka hoomana pule e ka mea kaahele. O ka huina pau o ka poe i laka mai maloko o ka hale Akua ia Sabati, mai ka makua a keiki, he 50 a oi.
Pau ka hoomana pule ana, noho mai no ka ekalesia e kuka me ka mea kaahele, no ko lakou koena hanai kumu. He $24 ko lakou koena hanai kumu, a ua koho mua ia no hoi ke komite e paipai ai no ia mau dala. Kaheaia ke komite no ko lakou makaukau e lawe mai i na mea i loaa ia. Hoole mai na komite, aole mea i loaa no ka mea, aole no makou i hana.
Mahope o ke kuka ana, ua hooholoia ka manao mawaena o ka ekalesia, a me ka mea kaahele; o ke Sabati la 23 o Sept. ka wa e lulu ai no ia koena hanai kahu a pau loa, me ka noho pu mai no hoi o ka mea kaahele.
Ka pupu manu i loaa mai i ka mea kaahele mai ko Honokohau mai, he $3.
Ma ia awakea no, haalele ia Honokohau no Kahakuloa, kekahi apana oia ekalesia. O ke ala mai Honokohau aku a i Kahakuloa, he keu no hoi o ka anapuu a me ka anakee; i ke kilohi ana ae a ka maka i ko laila mau kualono, aohe wahi hoihoi iki. Ia maua e haele ana me ka anela o ua ekalesia la, o ka hana mau a ko'u noonoo, o ka noonoo ana i ke ano o na haawina like ole o na mea i hanaia. A oiai ka manao kanaka e hoahu ana no ke ano oia aoao o ka aina, hoomanao ae la no kekahi mapuna mele i pili ilaila, a oia iho keia.
"Ua pau ka lihi hoihoi ia Kahakuloa,
He loa Puukoae papa i ka makani,
Makani lu ina lehua o Kaukani, &c."
Mahope o ke awakea, hiki aku la i Kahakuloa ponoi, a apo aloha mai la ko laila mau kamaaina.
Mahope o ke kuka ana, ua hooholoia ka manao mawaena o ka ekalesia, a me ka mea kaahele ; o ke Sabati la 23 o Sept. ka wa e lulu ai no ia koena hanai kahu a pau loa, me ka noho pu mai no hoi o ka mea kaahele.
Ka pupu mauu i loaa mai i ka mea kaahele mai ko Honokohau mai, he $3.
Ma ia awakea no, haalele ia Honokohau no Kahakuloa, kekahi apana oia ekalesia. O ke ala mai Honokohau aku a i Kahakuloa, he keu no hoi o ka anapuu a me ka anakee ; i ke kilohi ana ae a ka maka i ko laila mau kualono, aohe wahi hoihoi iki. Ia maua e haele ana me ka anela o ua ekalesia la, o ka hana mau a ko'u noonoo, o ka noonoo ana i ke ano o na haawina like ole o na mea i hanaia. A oiai ka manao kanaka e hoahu ana no ke ano oia aoao o ka aina, hoomanao ae la no kekahi mapuna mele i pili ilaila, a ola iho keia.
"Ua pau ka lihi hoihoi ia Kahakuloa,
He loa Puukoae nana i ka makani,
Makani lu ina lehua o Kaukani, &c.,"
Mahope o ke awakea, hiki aku la i Kahakuloa ponoi, a apo aloha mai la ko laila mau kamaaina.
Mahope iki iho o ka hoomaha ana, ua kani ka pu, a akoakoa koke mai la ko laila poe maloko o ko laila hale Akua. O ka huina pau o ka poe i laka mai, he 70 a oi. He mau hoahanau no ka ekalesia Katolika Roma kekahi i hui pu mai. Ua hai ia aku ka olelo o ke ola ia lakou ; o ka lakou hoi i haawi mai ai na ka mea hai i ka olelo maikai no Iesu, he $5.
I ka pau ana o na hana, huli hoi aku la ka anela o ua ekalesia la o Honokohau no Wailuku, no ka mea, ilaila no kona ohana e opu ana me na pilikia he nui, o keia ao poluluhi a o ka mea kaahele hoi, hoi hope mai la a hoomoe ke poo ma Honokohau.
Sept. 3, i ka wanaao oia la, huli hoi mai la, a hiki i ka home Leialoha ma Lahaina. O ke kulana o ka ekalesia ma Honokohau, he nee liilii na hana pono, aole he ikaika loa ; ua nele hoi ia ekalesia i ka hale ponoi ole e noho ai ke kahu, aia malaio o kekahi luna ka noho ana, a huhu mai ia luna, okala na hulu i ka pepeiao, a oluolu mai hoi, lana malie ka wai, a pela wale iho la no.
O ka hale i oleloia, na ka ekalesia e kukulu, aole no i hanaia. Olelo mai nae kekahi mau hoahanau, no ka noho pono ole mai o ke kahu me lakou ka mea i paa ole ai. Pela paha, aole. O ka Haku kai ike pono.
Sept. 7, haalele i ka home Leialoha no Wailuku. Moe ma Olowalu. O Rev. P. Keaupuni ka anela oia ekalesia.
Aia no laua e noho ana maloko o kekahi hale pili, o ua hale la no ka ekalesia. He nahaha, a he koekoe ke hoi mai ka ua a me ka makani.
Loihi a pinepine hoi ka paipai ia ana oia ekalesia, e hoopaa pono i na hale la, aole no nae he hana ia. Ua like no me ke kipaku aku i ke kahu ko Olowalu poe hoahanau.
Sept. 8, ma ka wanaao, haalele au ia laua, me ka naau aloha, a paipai aku no hoi ia laua, e hoomanawanui a e paulele aku i ka Haku. Hiki ma Wailuku ma ka hora 9 am a hookipaia e Mrs. H. Haole ma kona home Hiilei.
He home nani, oluolu, lako, a kuonoono hoi: O ka'u keia e kaena ae nei, no ka oluolu, a me ka lokomaikai nui o ka haku oia home, i ka malama ana ia'u, me he malamaia ana la no ke lii. Ua noho au ma ia home olu nani, ua moe maluna o kahi maikai, a ua ai maluna o ka papaaina maikai me na mea ai ono, a maikai hoi, a o ka poi maluna oia papaaina e ai ia ai i na wa a pau; ua kalana wale ia no.
Sabati Sept. 9, Malamaia ka hoomana pule maloko o ka luakini Kaahumanu. O ka nui o ke ahaina i akoakoa mai, he 80 a oi. O Rev. W. P. Kahale ka anela oia ekalesia.
He nawaliwali kona, he eha ma ke poo, a no ia eha, aole oia i lawelawe i kana hana, no kekahi mau manawa loihi. Ke mau nei no ke ano mokuahana o kekahi poe oia ekalesia.
Sept. 13, Haalele ia home Hiilei no Haiku. O Rev. S. Kamakahiki ka anela oia ekalesia. Na S. T. Alexander a me kekahi mau haole iho, ka hapa nui o ke ola o keia anela. He $120 ka S. T. Alexander hanai e haawi ai i ke kahu no ka makahiki, a he $60 ka Kimo Alexander, a malalo mai ka kekahi mau haole. O ka na hoahanau hoi he uuku no. Ua hooko pono na haole i ka lakou haawi no ke kahu.
Sabati Sept. 16, Akoakoa mai ko laila poe maloko o ko lakou hale pule. O ka nui o ka poe i hele mai, he 50 a oi. Ua hai ia aku ka olelo ia lakou. O ka lakou hanai mai no ka mea hai i ka olelo he $5.45.
He hale kahu ko keia ekalesia, kahi e noho ai, a he lua wai hoi e inu ai. Ua lako keia ekalesia ma ia mau mea. Ua hele nui ke kahu i na hana lima a ka haole. Nui na kanaka hana ma ko laila mahiko, ua hai ia mai, he 300 a oi. Aole nae hele lakou i ka pule.
Mahope o ka pau ana o ka pule ahiahi ma Haiku, haalele au ia laila no Makawao, me ka manao e hoaumoe ma ko Wiliama Kupa Home. I ka hiki ana aku nae, aohe ua kamaaina la i hilinai ia aku ai, ua hala kela i Koolau, ahu iho la ka hoka i kapa kai ia'u. A ma ka lokomaikai hoi o kekahi haipule olaila, o Kalawe kona inoa, ua hookipa ia au e moe ma kona home ia po.
Ia'u ilaila, hoomanao ae la au no Pota Gerina, ka mea nona ka inoa kapakapa kaulana maikai, i hoopiliia i ko laila ua kaulana; ka ua Ukiu o Makawao a piha ko'u naau i ke aloha nona; no kona ulia ia mai e kekahi pilikia, nana i hoemi iho iaia, mai kona hiolani pu ana me kona mau hoa o ka Papa Loio o ke kulanakauhale alii.
E ka Lunahooponopone, e ae mai oe ia'u, e kamailio aku au no kekahi mea pili ana i ke kula Kaikamahine o Makawao, oiai, ua hiki aku au ilaila e ike ia kula nui o na kaikamahine ma ia mokupuni.
Sept. 17, Aneane i ka hora 9 o ke kakahiaka, kipa aku au e ike 'i ke Kula nui kaikamahine o Maunaolu, a o ka mua loa no hoi ia o ko'u hiki ana ilaila.
O Miss. Carpenter ke kumu nui oia kula, ua hoihoi kona ano, a he ano makemake hoi me ka hoihoi, e hookipa'ku i na malihini. O Mrs. Smith ke kumu alua oia kula, aohe ona ano hoihoi mai i ka malihini, he molohai kona nanaina.
O Mrs. Binamu kekahi e noho ana ilaila, a nana hoi i hookamaaina loa 'ku ia'u, oiai hoi, ua maalea oia ma ka olelo hiki ia'u ke olelo pu me ia.
Mahope iki iho o ko'u hookipaia ana aku, ua ninau mai la ua Miss Carpenter nei ia'u mao Mrs. Binamu la, i ko'u makemake e ike i ke kula, ua ae aku au.
I ka hala ana ae o kekahi mau minute, kono ia mai la au e hele pu aku me ke kumu i ka rumi kula, kahi i akoakoa ai na haumana.
I ka hiki ana, ua hoomakaia ka oihana pule, ma ke mele ana, a pela aku. Mahope olala, ua noi ia mai au, ina he wahi manao ko'u e hoike aku i na haumana.
Ma ka naau aloha, ua hai pokole aku au i kekahi mau manao, a ua hoopauia hoi ma ka haawiia ana mai na'u e pule.
O ka nui o na haumana ia wa, he 38; he poe liili ka hapa nui o na haumana, a he uuku na mea nunui.
Ma na paia o ko lakou rumi kula, ua nui na huaolelo i kakauia, a penei kekahi oia mau hua, God bless our school. E ke Akua, e hoomaikai mai i ko makou kula.
Mahope iho, ua alakai ia au e hoomakaikai i ka hale kula, e Miss Carpenter, e hoomaka ana mai ka hale kuke aku a me kekahi mau rumi e ae. A na Miss Lilly Sniffen hoi i kuupau maiei ka hoikeike ana ia'u i na rumi a pau o ua hale kula Maunaolu la, mamuli o ke kauoha ana mai a ke kumu nui iaia.
Ua hookaawaleia no ka rumi o na kaikamahine liilii, ma ia rumi he 20 moe e ku ana me ka makaukau. Ma kekahi rumi aku hoi, 6 moe e ku ana me ko lakou mau pono, no na kaikamahine nunui ae ia rumi. Ma kekahi rumi hou aku he 11 moe me na lako piha, no na kaikamahine nunui ia.
I ka pau ana o ko'u hoikeike ia ana i ka hale kula, haawi aku la au i ke aloha i ke kumu a me na haumana, a huli hoi mai la, o Wailuku ka ihu.
NO MISS CARPENTER.
E ka Lunahooponopono, e ae mai oe ia'u e haawi aku he wahi hoakaka uuku la, oia hoi o Miss Carpenter.
Ma ka lokomaikai o Mrs. Binamu, ua hoike mai oia ia'u no ke kula nui, kahi o Miss Carpenter i ao ia ai. He haumana oia no kekahi kula nui kaikamahine ma Maketukeka i Amerika, o Mount Holyoke Female Seminary ka inoa.
Ua kaulana ia kula nui kaikamahine a puni ka honua nei, no ka mea, o kekahi wahine ilihune, ua aloha oia i na kaikamahine ilihune a me na keiki makua ole, a ua nui kona makemake e loaa ia lakou ka hoonaauaoia. Ua paipai oia a ua hele i o ianei e nonoi aku i na kokua ana mai o ka poe lokomaikai, i mea e kukulu ai i kula no na keiki ilihune.
Ua loaa no he mau kokua ia mai, aole ka he nui loa. Ua hoomaka ia ua kula nei e kukulu, aole nae he makaukau kupono loa. Pela ka hoomau ia ana, a hala kekahi mau makahiki, ua lilo ia he kula nui. A mahope loa mai, ua kaulana loa ia kula, a mailoko aku oia kula, ua nui na haumana i hele a hoohaumana aku ma na wahi he nui o ka honua nei.
Mai laila mai o Miss Carpenter, ke kumu o ke kula nui Kaikamahine o Maunaolu ma Makawao i Maui. Ua aoo kona nanaina, a he nanaina kohu no nae i ka hookele naauao. Ua kaulana oia ma ka ikaika a me ke akamai i ke ao ana i na haumana.
I ko'u ninau ana i kekahi poe o laila, (Makawao), no ke ano o ua kula nui e ku la i Makawao, oia hoi ke kula o ua keikikane o Haleakala a me Maunaolu. Ua hai ia mai ia'u, he nawaliwali ka ke ao ana a ke kumu o ke kula o Haleakala a o ke kumu o ke kula Kaikamahine ka mea ikaika.
Mahalo aku ko'u naau i ke kumu a me ka hale kula, a me kona kulana, a me kona inoa, a aloha aku hoi ko'u uhane i na kaikamahine liilii, i ka hoi ana ilaila e inu i ka wai o ka naauao. Inu no a kena, moni no a piha pono i ka wai o ka ike. Welina wale.
Mahope o ka aina awakea o ka la 17 o Sept. hiki i Wailuku, a noho ma ka home Hiilei.
Sept. 19 Haalele ia Wailuku no Lahaina, no ka manao ana aia ilaila ko'u ohana ua hiki mai.
Sept. 22, Haalele ia Lahaina no Honokohau, no ka hooko i ka olelo hooholo o ka la 2 o Sept. Halawai aku la me Samuela Kamohakau ilaila, a hui ae la na makau a ka lawaia i kahi hookahi.
Sabati Sept. 23, Akoakoa nui mai la ko laila poe maloko o ka hale pule. O ka huina pau o na uhane maikai i komo ae he 70 a oi.
Mahope o ka pau ana o na hana hoomana, hoomakaukau ka lulu dala no kona hanai kahu. Na ka mea kaahele i kahea aku i ka poe i makaukau e lawe mai, i kokua pu ia mai hoi e Samuela Kamoahakau. Ua kaa loa mai ia la ko lakou aie i ke kahu o na malama i hala.
Ma ka pule ahiahi, ia S. K. ke alakai o na hana hoomana. Pau ka pule, kuka na hoahanau no ke kahua hale pule o lakou. Eia na manao i hooholoia. 1 Ma ka inoa o ke kahu ekalesia a me kona mau nope ma ka oihana, e hoolilo ia mai ai ke kahua hale pule no ua ekalesia. 2 Na S. Kamonakau e hana i ka palapala hoolilo. 3 O Halemano ke ana aina. 4 O na lilo a pau, na ka ekalesia e lawe.
O ke kumukuai nae o ua kahua halepule nei i haawi ia mai ai e ka mea nona ia wahi, he $4. Ma kona ano he hoahanau no ia ekalesia no i oluolu ai.
Sept. 24, haalele ia Honokohau no Lahaina, a noho me ka ohana ilaila no kekahi mau la.
Sept. 28, haalele ia Lahaina no Wailuku, a hoonoho i ka ohana ilaila me kamaaina o ka Home Hiilei.
Sept. 30, ma ka hora 1 o ka wanaao, haalele ia Wailuku no Honuaula, a mamua o ka puka ana ae o ka la mai ke kai ae, hiki aku la ilaila. O Mr. S. K. Kauwe ka haiolelo o kela ekalesia. He paona a kuanea ka noho'na oia aina, e like no me ke ano mau o ka noho kaha ana.
O ka hale kahi e noho ai ke Kahu Akua, he wahi hale pili uuku, nahaha, aole no hoi i kupono loa, aka, he wahi kupono uuku.
Ma ke awakea, malama ia ka pule, o ka nui o ka poe i hiki ae iloko o ka halepule, he 24 no ke hui na makua me na keiki. Pau ka pule, kuka pu makou no ke koena aie o na hoahanau i ko lakou haiolelo, no ka mea, o ke ola makahiki a ka ekalesia i hooholo ai nona, he $100, he $53 i loaa iaia, a he $47 i koe ke pau pono keia makahiki. Mamuli hoi o ka hai ana mai a kekahi, ua hooholo lakou, aia i ka la 25 o Dekemaba e lulu ai lakou, oia ka la e hookaa pau ai, no ia mea, pau ka'u hana ilaila.
O keia ekalesia, he nawaliwali no na hana, uuku na mea makaala, ua palaka ka hapanui o na hoahanau.
Oct. 1, ma ka hora 2 o ka wanaao, haalele ia Honuaula no Wailuku, a ma ka la 2 ae, hoi no uka o Iao.
Oct. 3, haalele ia Wailuku no Lahaina, a ma ka po Poaono la 6, haalele ia Lahaina no Honolulu nei, no ke kono ae a ke aloha o na keiki, me ka manao no e hoi aku no e hoolawa i ka'u hana nui. Oia ke kaahele ana i na ekalesia o Maui. He hana nui a me ka luhi o ka luhi hoi o ke kino, ka hana a ka Aha i hooili mai ai na'u. Aole oia wale, aka, o kekahi hemahema hoi, he uuku ke ola i loaa mai, ka mea e pono ai ke kaahele ana, no ka mea, ua hooholo ka Aha, na na ekalesia a'u i komo aku ai a hai aku i ka olelo, na lakou au e kokua mai, ina manao lakou e kokua mai, oia iho la no, ina aole, aia no ia lakou ia mea, aole o'u hoohalahala aku ia lakou.
Aia a pau pono ka'u kaahele ana i na ekalesia o Maui, alaila, e hoike aku au i ke kulana o na Ekalesia, a me na Kahu ma ke ano pokole.
O ka moolelo ae la keia o ka'u kaahele ana, mahope iho o ka halawai nui o ka Ahahui Euanelio ma Honolulu i ka malama o Iune i hala ae nei, a no ka'u kaahele ana mamua ae, aole au i waiho aku ia oe e ka Lunahooponopono i ka moolelo no ia mea. Owau no me ka mahalo. E. K. W.
Honolulu, Oct. 16, 1877.
MAUU KUAI!
MAHOPE AKU O KA LA MUA O OKATOba e loaa no ka Mauu i ka poe makemake kuai, ma ka pa o ka Halekula Kahunapule. 39 4ts
CECIL BROWN,
Loio a he Kokua ma ke Kanawai.
A HE AGENA NO KA HOOIAIO ANA I NA Palapala no ka mokupuni o Oahu.
Helu 3 Alanui Kaahumanu, Honolulu, H. P. A.
315 1y 867
HENEIKI KA AKA I KA OLU.
OLU O KE AHA?
OLU O KE KUMUKUAI O NA LOLE HOU
o ka Halekuai o
GOO KIM!
MALUNA mai nei o ka mokuahi Hawaii "Likelike," a me ka mokuahi "Kulanakauhale o Nu Ioka."
E hoomaka ana ke kuai manuahi ma keia Poaono, a pela mau aku ma na Poaono a pau. Nolaila, e hele nui mai oukou e o'u mau hoa maikai ma keia la, e wae a ka mea a ka iini e lia ai, kiola iho "i ka a-la a mau a-la paha o Kaualeau," a e loaa no na holoku poni uliuli a halila, a me na kalakoa hou loa i ike oleia mamua ma Hawaii nei, na palu huluhulu a me na iliwai o kela a me keia ano, na kihei huluhulu nani loa akahi a ikeia, na makalena au liilii, kakau loloa ulaula, hinahina, uliuli a me ka poni, na mamalu liilii, na Lakeke keiki, a me na koloka hoopumehana o na kaikamahine liilii, a me na mea nani e ae he lehulehu wale. E hele mai i ike i ka nani o Aipo.
GOO KIM.
Alanui Nuuanu, ma ka aoao ma Ewa mai o ka hale polapola. 35 6ms*
NO KA MULIWAI O PUULOA!
A ME KA NANI O EWA!
E HOLO MAU ANA KA MOKUMAHU
ROBBIE!
E kipa mau ana i kela a me keia la i Waiau, Waikele a me Ewa ma. E haalele ana ia Honolulu i ka hora 9 o ke kakahiaka, a e hiki hou mai ma ka huakai huli hoi i ka hora 5 a 6 o ke ahiahi.
E lawe no oia i na Ohua Eepakeke, a me na ukana o kela a me keia ano, no ka Uku Haahaa Kupono.
No na ukana a me ka uku kino, e ninau maluna o ka mokuahi. 41 1m
Piha i ka Hauoli!
Hauoli i ke aha?
I KA EMI O KE KUMUKUAI O NA
Lole Ano Hou ma ka Halekuai o
AHUNA!
MA KA hiki ana mai o ka mokuahi Likelike a me na moku waiwai e ae mai na aina e mai, ua loaa mai, a eia ma ko'u mau Halekuai na waiwai nani ano hou loa, a e hiki mau mai ana no na keia hope aku, a hewa i ka wai na mea he nani.
E kuai aku no au me ka oluolu loa ia oukou e na hoa o na aina kupolua nei i ka lai, a me na makamaka e ae hoi a pau e naue mai ana, a e ike auanei oukou i ke kuai hoopaki aku o ke keiki o ka aina pua i ua mau waiwai nei: oia hoi na Kalakoa holoku o kela a me keia ano e ku ai ka hoohehelo ana, he 101 a hookahi dala o ke Kalakoa ano lauai-lilii, a he 8 i-a hookahi dala o ke Kalakoa laula nunui, na lole Iliwai o kela a me keia ano, na polu maikai loa, na kihei weluwelu, aole i kanamai ka nani i ike oleia mamua, na makalena o na ano like ole, na koloka e kipu ai o ke wa anu, a me na mea makamae e ae he nui wale, e molowa'i oe i ka helu aku e
Nolaila, e kipa mai no e na makamaka, aole ke kikaha loa'e ma ke alanui. Ina no aole ke kuai, o kekahi mea nui no ka halawai ana o na maka, a na'u no e pahola aku ia oukou i na lima hookipa a ke aloha. Owau no ko oukou makamaka. AHUNA.
Waialua, Oct. 3, 1877. 40 3ms.
E. STREHZ,
[AILUENE]
MALAILA E LOAA AI NA ANO LAAU A pau; a me na wai hoomaemae o kela a me keia ano. E hamama mau ana ka ipuka ma na po Poaono a pau. Ma ke kihi o Alanui Papu a me Hotele, ma Monikahaae. 1 1y
WILLIAM R. CASTLE.
(Kakela Opio.)
Loio a me Luna Hooiaio.
MA NA ANO HANA PILI KANAWAI A pau, a lawelawe koke ia me ka hikiwawe. Na Palapala Sila a me na Palapala pili aina o na ano a pau, e hoomakaukau ia no, a he Notari Hooiaio Palapala no ka lehulehu.
Keena hana, ma ke kiho o Alanui Kaahumanu a me Kalepa, Honolulu. (786 1y 827) [51]
AINA HOOLIMALIMA.
AIA kekahi aina e waiho la ma Kalihi, elua paha eka, he aina loi kalo, ua makemakeia e hoolimalima aku ka mea e makemake ana. He aina waiwai nui keia no ka poe e makemake ana e mahi. E loaa ana ka wai i na manawa a pau. E ninau i keia hale pai. 21 tf
E IKE auanei na kanaka a pau, owau o ka mea nona ka inoa malalo, ke papa loa ia'ku nei, oiai, ua lilo mai ia'u ka ILI AINA o PA-U ma ka hoolimalima, a nolaila, ua kapu loa na holoholona, oia hoi ka bipi, lio, hoki, miula, puaa, manu, i ka hele wale ana ma ua Aina la, ina e loaa kekahi o keia mau holoholona, e hooukuia no ka helehewa, a o ko'u luna o MOKULEHUA. JAMES AULD.
Pawaa, Sept. 27, 1877. 39 3ts.
EIA KA POMAIKAI E NA MAKAMAKA.
E NAUE! E KIPA!
KUAI MAKEPONO LOA MAANEI!
HE KUAI MANUAHi!
KE KAHEA aku nei au i kuu mau makamaka a pau o ka olu o Makawao, e hoopulu mau ia'na e ka Ua Ukiukiu, mai ka apana o Hamakua a hiki aku i ka apana o Huelo.
Ua wehe ae nei au he elua mau Halekuai Lole nani, hookahi ma Haiku a hookahi ma Makawao ponoi, a e kuai aku ana me ka makepono loa ia oukou e ko'u mau makamaka, ma ke kumukuai haahaa loa i ike oleia mamua.
OIA KO'U ALOHA IA KAKOU IHO.
O na lole nani loa e kupono ana i ka linohau ana o na Keonimana, a me na kahiko kupono no ka hoohiehie ana o na lede maka palupalu o ua aina ua kaulana nei, e hoopakika aku ana au i ke kuai ana ma ko'u mau Halekuai. E kipa nui mai oukou me ke aloha, e ike pono i ko keia.
C. H. DICKEY, (Kale Kika,)
a me kona mau Halekuai manuahi. He ole ka lohe pepeiao, o ka ike maka ka pono. Owau no me ke aloha.
36 3ms. C. H. DICKEY, (Kale Kika.)
E NAUE MAI E NA MAKAMAKA!
E IKE NO OUKOU IHO!
Ma ka Halekuai
o
WALAKAHAUKI!
OIAI, ua hiki hou mai nei na waiwai o kela a me keia ano ma na moku kalepa mai Europa mai, a e hiki mau mai ana no hoi i na manawa a pau; oia hoi na
NOHO LIO PELEKANE o na ano a pau,
PENA HALE o na ano a pau,
IPU- TI, IPU-HAO, LU-MANU.
PAULA, PUNA keokeo hamo hale,
PA PALAI, PA MEA-AI,
PAIPU Wai Hao,
KIAHA ANIANI o na ano a pau.
NA LOLE AILA, PU KAUPOOHIWI.
a me na Waiwai e ae aole i kanamai. E helu a manaka no ka nui loa.
Eia hoi kekahi, ua oluolu loa ia no oukou e na makamaka, ke komo mai maloko nei, e nana, a wae i ko makou mau mea kuai, a e hookuku paha i na lole o kela a me keia ano, aole loa makou e uiha, a kunukunu no ia mea, oiai ua makaala mau makou maanei e hooko aku i ko oukou mau iini a pau. Ina no ke kuai, oia iho la, ina no aole, oia iho la no, aole loa makou e hoolualua ana no ia mea, he olu wale no koonei. Nolaila, e komo maloko! mai hopohopo a kuihe ka manao!! A e ike no oukou i ka oiaio.
Alanui Moiwahine, Oct. 3, 1877. 40 1m
HE PAPA KUHIKUHI MANAWA HOLO
O KA
MOKUAHI HAWAII
LIKELIKE!
KAPENA SHEPHERD.
Poaha Oct. 25, 5:30 . . . . . Kaapuni ia Kauai.
Poalua Oct. 30, 5:30 . . . . . No Hilo.
Poalua Nov. 6, 5:30 . . . . . No Punaluu.
Poalua Nov. 13, 5:30 . . . . . No Hilo.
Poalima Nov. 23, 5:30 . . . . . No Nawiliwili.
Poakahi Nov. 26, 5:30 . . . . . Kaapuni ia Hawaii.
Uku Eemoku mai Honolulu aku.
A hiki i Lahaina a pela maluna mai . . . . . $6.00
" Maalaea, " " . . . . . 7.00
" Makana, " " . . . . . 8.00
" Mahukona, " " . . . . . 10.00
" Kawaihae, " " . . . . . 10.00
" Kailua, " " . . . . . 10.00
" Kaawaloa, " " . . . . . 10.00
" Hilo, " " . . . . . 12.50
" Kau, " " . . . . . 15.00
Uku kaapuni ia Hawaii . . . . . 22.00
A hiki i na awa o Kauai . . . . . 8.00
Uku kaapuni ia Kauai . . . . . 12.00
Uku ohua Hawaii oneki . . . . . 2.00
Aole aie no na uku ohua.
Ma a Hale Oihana e loaa'i na palapala.
Aole koena o hope e lilo, aia wale no a kaa mua mai ka uku moku. Aole e ili ua hewa no na paiki, ukana a puolo paha, ke ole e kakauia ka loaa ana mai.
E hookaaia ka uku ukana i ka wa e noiia aku ai.
SAMUEL G. WILDER (Waila,)
Keena ma ka Hale Kuai Papa o Waila ma, kihi o Alanui Papu a me Moiwahine.
42 2ms