Ka Lahui Hawaii, Volume III, Number 42, 18 October 1877 — Page 2

KA NUPEPA KA LAHUI HAWAII.
HONOLULU, OKATOBA 18, 1877.

E HOOLOHE !

          Ma ka pule mua o Novemaba, e hoomaka aku ana o S. W. Pogue, ka hope no Rev. J. F. Pogue, i kona hele kaapuni ana aku ma ka mokupuni o Hawaii, no ka ohi ana mai i na koena aie no ka nupepa, o ka makahiki i hala a me keia Makahiki.
Nolaila, ke kau leo ia aku nei oukou e na Luna a pau, e ohi e mai i na aie nupepa o na makamaka ma ia mokupuni, i makaukau e ai oukou i ka hookaa ana mai mamua ae o kona hiki ana aku.
          E hoolohe e na Luna o ka LAHUI HAWAII i keia!  se 39 tf

Ke Kuhina Kaua o Tureke.

          O ke alii Kiaaina o Bagedada, oia ke alii nui maluna o kekahi apana aina nui a kaulana maloko o Tureke. Ke noho mana nei oia maluna o kekahi puali kaua nui i hoonohoia ma Bagedada, a me kekahi mau kulanakauhale e ae maloko o kona mau palena, oiai, ke moe ae la o Peresia a me ke kaikuono ma kona hikina a me ka hema. He hookahi a oi aku na kanaka kaulana e paa ana i keia kulana, i mamao loa mai ke aupuni makua 'ku, e manao ia'ku no, me he mea la, o ko lakou akenui ka hoolilo ana'e ia lakou ma ke ano he mau alii kuokoa no lakou iho—he mea i hanaia a hookoia e Mahometa Ali ke alii Kiaaina o Aigupita ma ka M H 1830.
          Ma ka manawa o kuu hele makaikai ana'ku ma Bagedada, o ke Kuhina Kaua oia o Redifa Pasha i keia wa, oia ke Kiaaina i kela manawa, he Kenela lanakila, a he kanaka hoi i oi aku o kona eleu a me ka hoihoi. I kekahi manawa ia'u maloko o Bagedada, ua loaa iho la iaia ka manawa pono e hoike mai ai ia'u no kona mana ma ke ano he Alii a ua hoike pu mai no hoi oia i kona eleu a me ka makaukau, i ku i ka mahalo ia'ku ma na ano a pau.
          Oiai hoi i kekahi manawa, ua naha mai la na kapa o ka muliwai o Tigeria, ma kekahi wahi he umi mile mauka'ku o ke kulanakauhale, a kahe mai la ka wai me ka uhi ikaika ana, e hoopoino ana i na mea kanu, a iloko o ka la hookahi wale no, ua lilo ae la kekahi kula nui akea, mahope aku o ke kulanakauhale, i lokowai nui. Ua hoopale wale ia'ku no ke komo ana mai o ka wai iloko o ke kulanakauhale e kekahi wahi pale mawaho aku o na pa, a he lehulehu wale hoi na wahi i hoopaa pono ole ia. He nui ka hopohopoia no keia wai hoee, e like me ko ka M H 1831—ka makahiki i poino nui ai—a haule iho ai na hale he ehiku tausani iloko o ka la hookahi. Hoolaaha akea ae la ka Pasha i ka olelo kuahaua, e pani ia na hale hana a pau, a iloko o na la eha, ua hooikaika aku la oia i na kane a pau koe na lahui e ae e hana ma ka hoopaa ana i ka pale wai.
          Hoouna ia'ku la he hookahi hapalua o ka puali koa mauka o ka muliwai e hana ai, a o ke koena hoi, ua hoohana ia'ku la ma ka hoopaa ana i ka pale a puni ke kulanakauhale. I kekahi kakahiaka, holo aku la au malaila, a makaikai aku la i ka nanaina hoihoi a eleu ma ia wahi.
          E hana ana he mau tausani o na kanaka malaila, a o ke alii Kiaaina kekahi malaila, e hoopuni ia'na e kona mau ukali hiehie, e lawelawe ana i na hana. O keia mau lawelawe eleu ana ka mea i hoopakele ia'i ke kulanakauhale, oiai, ua hoopakele ia'i ke kulanakauhale, oiai, ua holopono ka hoopaaia ana o kahi naha o ka muliwai.
          Oiai hoi aole o kakou mau Kuhina a mau Hope Kanikela hoi ma keia hapa o ka honua, nolaila, mamua'e o kuu haalele ana'ku i ke kulanakauhale o Kairo, ua hookomo aku la au i kekahi leta hoolauna i ko kakou Kuhina noho ma Konatinopela, me ka nonoi aku ia ia e hoouna ae oia no'u ma Bagedada i na hoike no ka hookipa ia'ku i ke alii Kiaaina i kupono i ka hana a'u e hele ana no Babulona, a me kekahi mau wahi ano nui e ae maloko o Mesopotania. Ia'u i hiki aku ai i Bagedada, halawai aku la au me kekahi elele mai ke aupuni Tureke mai, i hoike ia'ku hoi i ke alii Kiaaina, a e kauoha mai ana i ka Amerika kaahele nei, malalo o kona hoomalu me ka hookipa aloah. Ia'u i komo aku ai iloko o ke keena hookipa nui o ua alii nei, ike aku la au iaia e noho ana ma kekahi kihi o ke keena e kokoke ana i kekahi pakaukau i uhiia me na pepa, a ia'u i hele aku ai, ku ae la oia iluna a hele mai la imua o'u, a lulu lima pu iho la maua, a kuhikuhi mai la oia ia'u e noho maluna o kekahi noho ma kona aoao. He kanaka nui a kiekie oia, a me he mea la he 45 kona mau makahiki, me ka helehelena piha, me ka umiumi hauliuli, a me na maka ikaika, a he aahu Europa kona mailuna a lalo, a koe wale no ka papale, he papale kapu ulaula uuku, aole hoi he mau hoailona hoohanohano e hoike mai ana i kona kulana.
          He ano mikimiki a kuoo kona, he haahaa a he oluolu hoi kana mau hana. Ua hoolaunaia mai la me a'u kona mau alii a pau e ku poai ana, aka, aole loa kekahi o lakou i ae ia e noho ilalo, o ke alii Kiaaina wale no a me a'u.
          A oiai hoi o ka olelo Tureke wale no a me ka olelo Arabia kana e kamailio ai, ua lilo mai la o Mr. Setanno he kanaka e lawelawe oihana ana malalo o ke aupuni, i maheleolelo mawaena o maua.
          He ano akahele no ko maua kamakamailio ana, aka, o na ninau a me na haina, ua maheleia me ka eleu. Hoomaopopo iho la au i ke ano naauao o ua alii Kiaaina nei, ma ka Hoikehonua a me ka noho aupuni ana o ko na aina e, a ua hoomaopopo piha oia no Amerika a me Beritania, he mau aupuni ku kaawale laua. Hoikeike mai la hoi oia i ke kulana oluolu o na mea a pau ma Bagedada, me ka olelo mai, he manaolana kona e loaa ana ia'u ka manao mahalo no ka aina, oiai hoi owau hookahi wale no ke kanaka Amerika mua loa i hele aku e ike iaia.

Na Wahine Kosaka.

          Aia iwaena o ka lahui Kosaka kekahi mau ano kupanaha. He poe kanaka opipio ko lakou, a ua aneane e pau holookoa lakou i ka mare i na wahine opiopio. He mea mau ia lakou, ina e hele ana na kane i ke kaua, e kaawale ana lakou mai na home aku no 3 a 4 paha makahiki, a o ka hopena mau, oia ka haalele ana iho i na wahine mahope.
          Ua maa mau na Kosaka i keia ano, a i ko lakou manawa e huli hoi mai ai no ka home, ua kuai lakou a loaa na hinaka keokeo, a lawe pu mai la ia mau mea i ko lakou hoi ana. I ka manawa e hoomaka'ku ai ke komo ana i ko lakou mau kauhale, ua puka mai la ka lehulehu iwaho—na wahine, na kaikamahine, na elemakule a me na kamalii e halawai me lakou, a mawaena o keia poe, o na wahine mare pu a ka poe hele i huli hoi mai la.
          Ia manawa iho la, o ka poe wahine i mareia, i hoolohe ole i na kauoha a ko lakou mau haku, hele mai la imua o ka lakou mau kane ponoi, a kukuli iho la ilalo ma ke alanui imua o lakou, me ka hoopili ana i ko lakou mau papalina ma ka lepo, me ka hooili ae i na wawae o na kane ma na a-i o lakou.
          O ke ano o keia, e hoike aku ana ua hewa oia, a ma ia manawa hookahi no, ke nonoi aku la ma ka pule, e kala ia mai kona hewa. Ina e hoouhi iho ke kane i ka lole keokeo ma ke poo o kana wahine, he hoike ana ia, ua kala aku ke kane i ka hewa o kana wahine, me ka hoopoina loa ana'ku hoi i na mea i hala, aole hoi he mau niele hou ana 'ku. Ma keia ano, aole loa e pono i kekahi mea ke hoonaukiuki aku i ua wahine la no kona lalau, a ina e hana kekahi pela, alaila, e kuka pu oia me ke kane, ka mea nona ka hoomalu ana i ka hanohano o kana wahine.
          Ina hoi aole i hoouhiia iho ka hainaka keokeo, alaila, e hoi pololei aku no ua wahine la ma ka hale ponoi o kona makuakane, aole hoi e komo hou aku i ka hale o kana kane, a ma ia mea e hookaawale ia'i laua.
          Aka, he lehulehu wale no na wahine i hele mai e halawai me ka lakou mau kane, me ke kukuli ana ilalo, a hoopili iho i ko lakou mau papalina ma ka lepo, aolo nae i loaa ia lakou ke kala ia 'ku. Ua hoikeia mai he wahi moolelo e pili ana no keia mea. Aia i ka manawa e hoi mai ana o kekahi koa Kosaka, ua kolopeka ia'ku la oia e kekahi hoa manao ino, mamua'e o kona hoohiki loa ana'ku i kauhale, me ka hoike ana 'ku o ua hoa nei no ka hana o kana wahine i ka hewa, me ke kakali ole ana hoi i ka hele mai o ua wahine hewa la e hoike mai i kona mau hewa.
          Ike mai la ua hoa manao ino nei, ua inu ua koa Kosaka nei i ka waiona a ua ona loa, oiai hoi he kanaka oia i maa ole ia mau hana ino.
          Iaia i hiki aku ai i kauhale, hele mai la ua wahine la a kukuli iho la ilalo, me ka hoopili ana i kona papalina ma ka lepo, malalo iho o kona mau kapuai wawae. Kau pono mai la ka nanaina o ka lehulehu maluna o ua koa nei, a maluna hoi o ka wahine, oiai oia e moe la ma ka lepo no ka manawa loihi. Elua a ekolu na wa ana i hooholo ae ai i kona mau lima ma ka umauma, no ka hainaka keokeo, me he mea la e manao ana oia e hoouhi ia mea ma ke poo o kana wahine e mihi mai la—palua a pakolu na wa i hookuemiia mai ai. Mahope koke iho no o ia wa, me he mea la ua hoouluahewa ia kona noonoo, unuhi koke ae la oia i kana pahikaua, a me ka hauna hookahi wale no, ua lele aku la ke poo mai ke kino aku o ua wahine la. Ua haopaiia ua koa nei he 2 mahina ma ka hoopaahao ia no kona karaima, a o kela hoa manao ino hoi nana i kolopeku mua'ku iaia no ka hewa o kana wahine, a loohia mai keia pilikia, ua laweia oia ma Siberia e hoopaahao ia'i no na makahiki 3.

Na Wahine ma Inia.

          Aohe mea hauoli e ae iloko o na hooikaika ana ma na hana maikai, i oi ae mamua o ka loli ano hou ana o ke kulana o ko Inia poe wahine. O ka hanohanohano i loaa i na wahine o Inia, ua ike maopopo ia ma o na kanaka Beritania la—kona hoololi ia ana e lawelawe aku ma na hana lima malalo o ke kauoha a kana kane ; oiai hoi ke kane e hauoli nui ana no kona ola ana, aia hoi ke lawelawe ia mai la me ke kiai makaala ia mai hoi e kana wahine a me kana kauwa. Ua hoike moakaka ia mai ke ano o ka noho'na meikai ole o keia poe wahine mamua a penei: i kona manawa e hanau mai ai, aole loa oia e malama maikai ia, aole hoi i ao pono ia i ka wa kamalii, a i kona wa e mare ia ai, he kauwa kupaa maopopo oia, a i kona manawa wahine kanemake, ua hoino loa ia aku la oia, a ina e make ana, aole e uwe ia. Mamua aku nei, ua hele makaikai aku la o Lede Anna Gore-Lanetona, me ka hoomaopopo nui ana me ke akahele, no ke ano a me na hana o na kamaaina, ma ka aoao hema o Inia. Mamuli o kana hoike ana mai ia makou, olelo mai oia, ua hoomale ia no na kamalii Inia iloko o ka manawa he ewalu wale no makahiki. Ua manao na makuakane o lakou, he mea maikai ole ina he kaikamahine wale no maloko o ka ohana, nolaila, ua hooikaika lakou e mare ia na kamalii i ka wa opio ; aole nae lakou e hele mau aku ma na hale noho o ko lakou mau kane mare. He uuku loa ke dala i hoana okoa ia no na pono aahu, a me ka hoonaauao ana, a he nui hewahewa hoi na hoolilo ana no ka oihana mare, mamuli o ka nui o na hoahaaina ana.
          He oiaio no hoi, ua lehulehu wale na ohana i hoilihune ia no kekahi mau makahiki, no ka nui o na hoolilo no na ahaaina mare. Aole hoi he nui loa o ke umi kamalii i keia wa, e like me na makahiki i hala, a ua hooikaika nui no hoi ke Aupuni e hoopau ia hana ino. O ka oihana mare iwaena o lakou, malalo no ia o ka hooponopono ana a na wahine aoo, na lakou ka hele ana iwaena o kela a me keia ohana; e imi i poe ano like wale no. Ma Inia, o na wahine ke noho hoomalu ana maluna o na kane, a he mana loa lakou, a na lakou no ka hooholo ana no na mea e akeakea mai ana i ka hooholo pono ana i ka lakou mau hana. O na wahine o ka papa haahaa iho, ia lakou na hana kaumaha, ma ke kauo ana i na rola (rollers) pohaku, oki mauu, a me ke kokua ana i na kane ma ka hoonoho uinihepa ana. O na wahine kanemake ka poe hana ino loa ia iwaena o lakou; ua haoia ko lakou mau aahu, a me na mea hoonani mai o lakou aku, me ko lakou hoohaahaa ino loa ia.
          Aohe mea ehaeha e ae a ka manao, wahi a Lede Anna Gore-Lanetona, i oi ae mamua o ka ike ana aku i ka olohelohe, nele i na manaolana, a me na helehelena kaumaha o na wahine kanikoo; a ua makemake nui ia hoi na kauka wahine, i mea e hoopakele ia ai na wahine Inia mai ka poino nui mai. Ua hooikaika nui o Sir Salare Junega i kekahi manawa me ke ake nui e loaa mai ona kauka wahine no Inia, a i keia manawa, ua hiki mai la kekahi kauka wahine mai Amerika mai, a ke lawelawe nei oia i kana hana nui iwaena o na wahine kamaaina o Inia.

NA KANAKA KOIKOI OLA LOIHI.

          Ua hiki aku no na makahiki o ka Hope Peresidena o ka Ripubalika o Farani i ke 80, i kona manawa i make ai, a ua ulu mai na noonoo, ua alakai a hoomalu ia na Lahui naauao o ka honua nei, e na kanaka kanikoo. Ma ka la 22 o Maraki o keia makahiki, ua piha pono na makahiki he 80 o ka Emepera o Geremania, ua ike nae keia kanaka mana nui, i na inea o keia ao e like no hoi me ke kiekie i loaa iaia i keia wa. I kona wa kamalii he umi wale no makahiki, ua holo malu aku la oia me ko na makuahine i pakele ai i na puali kaua lanakila o Napoliona ka Nui. Mahope iho o ka hala ana ae nei o na makahiki he 40, holo malu hou aku la oia no ka lua o ka manawa mai Berelina aku, a imi i malumalu ma Ladana, mai ka hoino aku a ko na Lahui penei iaia.
          O Ilamuku Makamahone, Duke o Mageneta, a Peresidena hoi o ka Ripubalika o Farani, ua aneane aku oia i ke 69 o kona mau makahiki. Iloko o kona ola ana, he kupaa oia ma kona kulana, aka, ke ku nei oia i keia la ma ke kulana ano pohihihi.
          O ka Emepera Alekanedero elua hoi, a Antocerata hoi o ko Rusia a pau, aole oia i hiki aku i ke kanaono o kona mau makahiki, aka, he ano nui ka mea i hana ia iloko o kona ola ana. Iloko o ka makahiki 1861, ua hana ia oia kekahi hana nui loa iloko o ka moolelo, oia hoi kona hookuu ana aku ia 23,000,000 mau kino kanaka mailoko ae o ka noho hookauwa kuapaaia ana.
          O ke Kuhina Nui hoi o Rusia, oia hoi o Gosekakofa eia oia i ke 79 o kona mau makahiki. O ke Keiki Alii Bisimaka hoi, ka mea i hanau ia, ma ka la o na mea a apu e apuhiia ai, aia oia maluna aku o na makahiki he 62. O ka mea Kiekie Diseraela o Beconafila, he 72 kona mau makahiki; o ka Haku Pohaku hauoli, aia oia i ke 68 o kona mau makahiki, oiai hoi o ke Kauna Anederasa, he kanaka nui no Hunegari, a he alakai hoi no na manao lehulehu iloko o Auseturia, aole oia i oi aku mamua o ke 54 na makahiki. Oiai hoi o Adimarala Konatanetine, ua noho Peresi-oia no ka Aha Kuhina, a oia no hoi ka manaolana o ko Helene. He 55 na makahiki i hala ae nei, nana no i hookau aku la ka hoopai weliweli maluna o Sekio ma ka hoopaa ana aku i kekahi moku i hoopihaia me na mea pahu, a ua pahu ae la ua moku la, a he nui na haneri kanaka i make oiai lakou e hauoli ana, no ka hookeai ia Mahomeda. Aia hoi Vitoa Hugo, mawaena o ka pakolu iwakalua a me ka umi makahiki a me ka pa-ha iwakalua o ka mea Haku Halelu. O ka Haku Rusela hoi he 85 kona mau makahiki; O M. Gereve hoi, he mea i hooliloia i Lutanela ukali no Gamebeta, he 64 ona mau makahiki; O Iule Simona he 63 na makahiki, a o ka Haku Setaredafoda de Radelife hoi, aole no e haule iho kona mau makahiki i ke 89. No na kanaka koikoi hoi iloko ponoi o Amerika, he mea maalahi wale no ka hoomahuahua ana ae i na inoa. O Simona Kamerona, ke alakai nui o ka Ripubalika o Peniselevania, he 78 kona mau makahiki; O Kalepa Kusini o Makekuseta he 78 na makahiki ona; O Alekanedero H Setepano hoi, he lunamakaainana Demokarata no na mokuaina hema, he 65 kona mau makahiki. O Ioane A. Dix o Kapalakiko, ua hiki aku la i ke 79 na makahiki. He 61 na makahiki o E. B. Waseburene o Ilinoi, a he 67 hoi o Horatio Semoura. O Evarts hoi, ke Kuhina Nui a loio kaulana hoi o Amerika he 61 ona mau makahiki i keia wa.
          Ina hoi e hoohuliia ae ana ko kakou nanaina mai ka poe e noho hoomalu ana, a maluna o ka poe naauao e ike iho no auanei kakou, he heluna nui hoi ko ia poe aoo, no lakou na hooikaika ana o ke kaulana a puni ka honua nei.
          O Tamaki Karelilo, ka mea hakumanao, a haku moolelo hoi, eia oia i ke 82 o kona mau makahiki. O Alefereda Tenesona hoi ka mea haku mele he 67 ona mau makahiki; O Kale Robata Darewina he kumuao, he 68 na makahiki; a o keia iho la na kanaka naauao a malamalama nui iloko o Enelani. Iloko hoi o Amerika, aia o Heneri W. Kanakaloihi, he 11 na makahiki.
          O Ioane G. Whitter he 70; o Ralepa Waledo Emesona he 74; o Geogi Banekarofa he 77; o Wiliama Culena Beriana, ka mea haku mele a me ka hoolaha nupepa, ua aneane i ke 83; o Wiliama L. Garisona he 73; o Teodoa D. Wulese he 76; a o Petero Kupa hoi he 86; ma na hana hoi e pili ana i ka oihana kanawai maloko o ka aina o Amerika a mawaho aku, aia malalo o ke kuhikuhi ana a Kale O'Conora o Kapalakiko, nona na makahiki he 73; aia hoi o Isaaka A. Keremio he loio, a he Luna Ahaolelo hoi no Farani, he 79 ona mau makahiki; aia hoi o Firemina—Agoseto Cabaleso, he loio no Sepania, he kanaka hoolaha nupepa, a he noeau hoi ma na hooponopono pili aupuni, he 77 ona mau makahiki; o ka haku a Lunakanawai Nui hoi o Enelani, he 75 makahiki, a o ka Barona Nui hoi, aia oia maluna aku o ke 80 makahiki.
          O Pio IX hoi, nona ka mana nui a kiekie maluna o na aina Pope ma Roma, he 85 na makahiki o kona ola ana; o ka Bihopa Nui o Enelani holookoa, ke ola nei oia i ke 67 o kona mau makahiki; a o ka Bihopa Amesa, he 71;  a o Kauka Dolinegera hoi, he Kumuao Kula Kahunapule, a he mea haku moolelo hoi, eia oia ke ola nei i ke 78 o na makahiki.
          Mawaena hoi o ka poe alakai no na manao pili hoomana, aia ka Bihopa Dupaneloupa o Farani, he 76 na makahiki; o Kauka Numana, he 67 ona mau makahiki; oiai hoi o Kadinale Makolosake i ke 77 o na makahiki; o Kauka Kamaki Woresetera hoi, aia oia maluna aku o na makahiki he 75 o ke ola ana; o Heneri W. Beechera, he 64 na makahiki; o Kauka Kapine he 63 makahiki.
          O Kauka Makoseha he 56; a o Rev. Setepano H. Tinega hoi, he 77 na makahiki o kona ola ana. Ma na mea pili hoi i ka lawelawe oihana kaua ana, o na mea kaulana Kenela Von Moleke, ua hanauia ma ka makahiki 1800; o Kenela W. T. Keremana hoi, i hanauia ma ka makahiki 1820, a me Kenela Garibaladi hoi ka oi o na kanaka kaulana ma ke aupuni o Italia, a ke aneane nei oia i ke 71 o kona mau makahiki.
          Nolaila, ma keia hoike e hiki ai ia kakou ke hoomaopopo iho, ua alakaiia a hoonaauao ia na lahuikanaka o ke ao nei e ka poe i hele a aoo, oiai, ua hoakea ia ka averika o ko ke kanaka ola ana, a he mea pohihihi hoi ia kakou i keia mau la ke kapa ana'ku ua kanikoo ka poe i loaa na makahiki he 60, a pela hoi ka mea i oleloia, aole ma ka lima o ka poe opiopio ka manao ka noho maluhia ana, aka, aia no ma na poho lima o ka poe i hele a lauoho lua.

Huakai Makaikai ia Hawaii Akau.
Hui ana me Rev. L. Laiana.

Hookele loa aku la no ko maua makamaka a hiki ma ka hale o L. Laiana, a hiki makou i kona hale, a komo e aku la no o Mio a me ka'u keiki, a, aloha nei mai la ka makua Laiana me ka ninau ana ia Mio, owai keia ? Olelo kela o ke keiki keia a Waiwaiole, nui loa iho la kona aloha a paa loihi oia i ka lima, a komo aku la au, a ike mai la kela (Laiana) hopu mai la oia ia'u, a lulu lima maua, a noho maua iluna o ka noho, paa mai la kela i ko'u lima, me ka nui loa o kona aloha, a kii aku la oia ia Laiana wahine a me kona ohana, a aloha nui makou a pau. "O keia makua, ua pau ka ikaika o ke kino, a koe ka ikaika o ke aloha i keia lahui, a he hapalua hora ka loihi o ka launa aloha ana me ke kamailio ana no ka ke Akua hana ma Oahu a me Waimea, me ke kauoha mai e hele a hoi mai, kipa aku e ike hou, alaila, hoi loa i Oahu.
Kanahele o Aiku.

          Haalele makou ia Waimea i ka hora 10, a holo aku no kanahele o Aiku, no ka mea, aia malaila ke alanui Aupuni, aole ma Mahiki. Ma keia hele ana, he maikai no, e ku ana na ohia lehua me ka loloa, a e moe ana ilalo kekahi mau laau loloa, he like me na pahu hae o Honolulu ke kiekie, a oi ae kekahi, he nahele wale no keia hele ana, he oluolu maikai ka makani, a e helelei liilii iho ana na kilihune a ka ua ia makou, ke halawai pu aku nei no makou me na kanaka mai Waipio mai, me na holoholona ai e hoi ana i Kohala, Kawaihae, a me Waimea.
          Kuhikuhi ae la ke kamaaina ia maua i kahi nona ka moolelo e kaulana nei, hoi hou ka Paakai i Waimea ; he loihi loa aku no kona wahi e noho mai ana, a hala kanehele o Aiku ia makou, hoea ana makou i Hamakua i ka hale o Rev. Bikanele, i ka hora 1 1/2, aloha me ka ohana a komo iloko a hui me Bikanele, a noho malaila he hapalua hora a makaukau makou no ka hoi aku i ke awawa o Waipio, haawi mai la o Bikanele i ka Sabati na'u e malama; a haalele makou ia laila i ka hora 2. Holo aku a hiki i ka nuku e iho ai ilalo o Waipio. He aina keia aia ilalo o ke awawa, aia i ka nuku e iho ai i Waipio, ka heiau o Hokuwelowelo, o keia ka heiau a ke Akua e noho ai a hiki i na po o Kanaloa me Kane, oia ka wa a ke Akua e puhi ai ia Kihapu, a oia no hoi ka wa a Liloa e kapu heiau ai, a he nui ka inaina o Liloa i keia pu a ke Akua no ka malu pono ole o kana kapu heiau ana; a iho aku la makou a Kaluahine, he wahi awawa ia. Aia malaila e ike ai na kamaaina o ia wahi i ka malie, aia i ka hele o ka oha a inu i ka wai, manao ae na kamaaina e malie ana; a malaila aku ka iho pololei ana a hiki ilalo, a ma ke poo o ke alanui olalo, he halekuai no Ake, a me na hale noho o Halemanu, ua make hoi o Halemanu, o kana keiki no ke noho la, a no Halemanu ka'u moolelo i lohe ai, aole ka i hele mai na kanaka o ia awawa e ike iaia i kona wa i make ai, no kana mau hana aloha ole i na kanaka olaila, pela ka moolelo ia mai e kamaaina, nui ke kaumaha o na kanaka i kona wa Lunamakaainana a Luna Helu a pela wale aku, a mailaila aku hiki ana makou i ka hale o W. A. Mio. E nana mai ana no kana wahine, a poina iki ae nei au, i ko makou hiki ana i ka halekuai o Ake, malaila kahi i noho ai ke keiki a Halemanu a me kekahi hoa Lahainaluna o ka'u keiki, a hele mai la laua a aloha mai la i na malihini, a kauoha aku la ke kamaaina o maua i ke keiki a Halemanu e kuu i mau anae no ke Dala ke kumukuai, a hiki makou i kauhale a liuliu iki, hiki ana na anae he 15, no ka $1.50, kuu ka luhi o ka hele ana i ke ala loa, oia ka Poaha, la 30.
          Ma ka Poaono ae; hoomaka hou aku la maua e hele wawae e ike i kahi o Liloa i noho ai, aole nae he kamaaina nana i kuhikuhi ia maua, kipa wale ae la no maua ma kauhale kamaaina, aia makai loa keia wahi o ka nuku muliwai, a ma ka hale a maua i kipa aku ai he poe hoahanau moremona lakou, he poe hoahanau no mamua a kapae ia me ke kumu ole wahi a lakou, hoohalahala a huli i ka moremona, i ka huli ana i ka moremona, lilo ka aina a me na hale laau maikai i ka haole a oia ka noho ma kahi i loaa aku ai ia maua, he poe oluolu keia, haawi mai ia maua i ka maia a me ke ko, a noho iki me lakou a hoi aku, a ma ke ahiahi, hiki ae o Rev. Bikanele no ka halawai luna a kipa loa ae ma ko makou hale a kono ia'u e hele pu, a hele pu no maua, a kuka lakou no kahi e noho ai na lala o ka Ahahui Euanelio o Hawaii Akau, a me ka malama ana i ke ola kino a holo me ka maikai, a kauoha aku la o Bikanele, eia iaia nei ke Sabati, e paipai aku i na kanaka e hele nui mai.

Sabati.

          Ma ke Sabati ae, he la maikai loa ia, a malie, he nui na keiki Kula Sabati i akoakoa ma ka luakini, a owau pu no kekahi malaila, a o ke Kahu Kula Sabati, haalele mai la oia i kona Kahu Kula Sabati ana, no ka mea, ua hoole ia kana haina o ka ninau, e na papa kula, a na W. A. Mio no i lawelawe, a pau ia, haawi ia mai ia'u e paipai aku,  a paipai aku la au, me ke kauoha aku i ke Kahu Kula Sabati, e malama i kana oihana, a malama ia ke anaina Sabati, aole nui na kanaka i hele mai.

No Waipio.

          He awawa momona keia, nui na mea ulu, a maikai, o keia ke awawa a Liloa i noho ai, a aloha no ka nui o ka momona ma keia awawa, nui ka oopu, a me ka amaama, a me ke aholehole, na momona no a nui wale. A mai keia awawa e laha aku ai ke ola kino ma na aina e pili mai ana, e like me na hoike ana maluna, no Hamakua, Waimea, Kawaihae, a me Kohala, mai a nei wale aku no ke kalo e piha ai na umeke poi, o kela mau aina ma keia awawa na mea kaulana, ka wai o Hiilawe, a me ka pali a Hainakolo i pii ai, a ai i ka hua ulei a nui aku. Ma ka Poalua, kuahaua aku la o Mio i ka wahine o ia wahi, e hele i ka lawaia oopu, a o maua pu kekahi i hele e makaikai i ka lawaia ana oia i-a, a ike aku la au he mau apua nui, he palaulau ka waha, a uuku ka hope, a he wahi apua uuku iho, he hookomo ia iho ia maloko, i ole e puka hou mai ka oopu iwaho, he hoohaliu ka waha makai, a o ka hope, ma kahi e kahe mai ai ka wai, he hoomoe like mai keia kihi a kela kihi o ke kahawai, a makai mai e ho-a hele mai ai; ua like ka holo ana a ka oopu, me ke kai ana a ka ohua i ka wa e apo aku ai ka lau, ka panee hele a komo i ka apua, a ia lakou nae he pai.
          Ma ke ahiahi Poalua, akoakoa mai la na Lala o ka Ahahui Euanelio a piha ko makou hale, oia ka hale W. A. Mio, a o na hale i manao ia, a i hoonohonoho ia no lakou, aole i noho ia, no ka mea, o ko lakou hale no keia i maa a hui ae la makou me ke aloha nui a piha i ka hauoli, oiai, ua lohe aku la lakou, eia ke Oahu i Waipio, i kahi o Mio, pipili like mai la no lakou a pau i kahi hookahi, o Kaaua wale no kai kaawale aku ma keia hui ana.
          Ma ka Poakolu ae, oia ka la e hoomaka ia ai ka hana, he la ua nui keia, mai ka po mai a hiki i ke ao, a i ka hora 10 a oi ae, malie iki, a hiki mai na Rev. E. Bona a me Bikanele, a o ka hoomaka no oia o ka halawai, mamuli o ka malama ana a ke kakauolelo mua, oiai, aia i Honolulu ka Lunahoomalu o Kalai.

Balota.

          Ma ka balota ana, ua koho ia o S. Luhiau i Lunahoomalu, a ma ka balota no hoi, ua kohoia o Kaaekuahiwi i Kakauolelo, a koho ia ke komite imi hana o Rev. E. Bona ka Lunahoomalu o ke Komite, a hoike mai ke Komite i na kumuhana, a noho ka Aha a hana. O na hoike kihapai ka hana mua i hapaiia, ia manawa i noi ae ai ka Rev. S. Aiwohi e lilo au i hoa kuka no ka Aha, a ua ae ia ma ka ninau a ka Lunahoomalu.
          I ko makou noho ana, a hoolohe i na hoike o na kahu no na kihapai a lakou i malama ai i na malama eono, ua nee malie ne imua, me ke akahai, aole au i lohe i ka ulu ana o ka ona, ma kekahi kihapai o Hawaii Akau ma na hoike a na kahu, ua hoomau ia ka hana a ka hora 3, no ka ua, a ma ka Poaha ae, noho hou ka Aha no na koena hana. O ka hana mua nae, he halawai na ka poe opiopio no na Kula Sabati, a ua koho ia ka poe nana e paipai, oia keia: S. Waiwaiole, Kaaua, H. S. Mahuka, a me Rev. E. Bona. Ma keia kakahiaka, he nui no ka ua, a hiki i ka hora 9, nolaila, aole i hiki mai ko Hamakua mau Kula Sabati, aka, nui no nae ka Waipio mau keiki i akoakoa mai, me na makua pu kekahi.
          Ua paipai pokole kela a me keia mau hoa no na mea e holo ai ke Kula Sabati, a me ka oiaio o keia mea he Kula Sabati, a pau ia, ua hoolana mai o W. A. Mio ke Kahu Kula Sabati o Hawaii Akau, ka mea a ka Ahahui Kula Sabati o ko Hawaii Pae Aina i koho ai, e halawai na Kahu Kula Sabati a me na Kumukula Sabati ma ka hora 2 ae oia la, oiai ua akeakea nui mai la lakou ia la, no ka mea, ua kauoha ia lakou e hui pu mai me ka Aha Euanelio. Makaala keia poe Kumukula Sabati a me na Kahu o lakou.
          Ua noho ka Aha Euanelio no kana mau ana i koe, a i ke kumuhana no na nupepa, ilaila au i lohe aku ai e make ana Ka Lahui Hawaii, no keia kumu a lakou i hoike like ae ai; o ka hoouna pono ole ia o kela helu keia helu ia lakou, i Honolulu nei no e waiho ai a elua pule a hiki aku, a pela mau aku, nolaila, o ka makaala pono ole o ka luna maanei, oia ka mea e pilikia ai ka pepa wahi a lakou, a pela io no.  (Aole i pau.)