Ka Lahui Hawaii, Volume III, Number 40, 4 October 1877 — Page 4
KA NUPEPA KA LAHUI HAWAII.
HONOLULU, OKATOBA 4, 1877.
KOMI TE HOOPONOPONO NO KEIA AOAO.
LAIKI MAKUA, MRS. KELA A. GILIMANA,
M RS. ELENA MAKALE, MRS. J. M. KUKE.
A Beautiful Home.
The re's a beautiful home for thee, brother,
A home, a home for thee
In that land of bliss where pleasure is,
There, brother's, a home for thee.
Chorus.
A beautiful home for thee, brother,
A beautiful home for thee;
In that land of bliss where pleasure is,
There, brother's, a home for thee.
There's a beautiful rest for thee, brother,
A rest, a rest for thee;
In those mansions above where all is love,
There, brother's, a rest for thee.
Chorus.
A beautiful rest for thee, brother,
A beautiful rest for thee;
In those mansions above where all is love
There, brother's, a rest for thee:
There's a beautiful crown for thee, brother,
A crown, a crown for thee,
When the battle is done, and the victory won,
Ou r Saviour will give it to thee.
Chorus.
A beautiful crown for thee, brother,
A beautiful crown for thee;
In that land of bliss where pleasure is,
A beautiful crown for thee.
KA POMAIKAI A ME KA POHO.
Ua kuai kekahi kanaka i no ohia he 96, ma ka pakolu ohia no ke peni hookahi, a oia heluna hookahi no, ma ka palua i ka peni hookahi, a hoolilo hou aku la oia i ua mau ohia nei, ma ka palima no na peni elua. Ua puka anei oia ua poho paha? A ehia la ?
NA KANAWAI HE UMI A KE AKUA.
1 Aohe ou Akua e ae imua O'u.
2 Mai hana oe i kekahi kii i kalaiia.
3 Mai hoohiki ino oe i ka inoa o Iehova kou Akua.
4 E hoomanao i ka la Sabati, e malama me ka hoano ia.
5 E hoomaikai i kou makuakane a me kou makuahine.
6 Mai pepehi kanaka oe.
7 Mai moekolohe oe.
8 Mai aihue oe.
9 Mai hoike hoopunipuni oe.
10 Mai kuko oe & c.
O keia mau kanawai he umi, ua haawi ia mai e ke Akua, no na makahiki he eha tausani i hala, aole no hoi lakou i hoopoina iki ia, aole loa no a mau aku. E nalowale aku ana ka lani a me ka honua, aka, aole loa e haule kekahi wahi hapa iki o keia mau mea.
O ka mea kue i ke kanawai, he make mau loa kona. "O ka uhane lawehala, e make ana ia."
I kekahi manawa, ua pakele no na kanaka mai na hoopai ae, no ke kue i na kanawai o keia ao, no ka mea, aole lakou i loaa pono aku. Aka, aia no na maka o ke Akua ma na wahi a pau, e nana ana i ka mea hewa a me ka mea maikai.
O ka lealea ana iloko o ka hewa, no kahi manawa pokole wale no; e loaa mai anei he uku maikai ia oe, no ka poino mau loa ana o kou uhane? Ke kahea mai nei ke Akua ia oe, e hoopau i ka hana hewa. Ke i mai nei Oia, no ke aha la oe e make ai ? E hoomaikai ia ke Akua. Aia no he laau lapaau, e hoopau ia ai ka hewa. E mihi a e manaoio aku i ka Haku Iesu Kristo, a e hoopakele ia auanei oe. Ano, eia wale no ka wa e ae ia mai ai oe. O keia wale no ka la o ke ola e loaa ai ia oe.
E kuu Mele aloha.
He mea pono e loaa ia'u he manawa, i makaukau ai no ka hoouna leta ana'ku ia oe ma keia mokuahi aku. He hana aloha oiaio ia no'u, ke loaa mai kau mau leta, nolaila e oluolu oe e kakau ia'u i leta loihi, elike me ka hiki ia oe. Nani kuu akaaka, ia'u i heluhelu ai no kou kamailio ana me kou kaikunane.
Aole i ike na kanaka i ka nui o ka hana e hana ia ai, ina e hoopaa pono ia ko kakou mau home, a makaala hoi ma ka hana, elike me ko kakou aoia ana mai, e hele ma ke kula. Aka, ua noonoo nui au no kela ninau au i hoike mai ai, ma ka hapa hope o kau leta. Heaha la ka kakou e hana ai, no ka pono o ko kakou poe kanaka? I kekahi wa, ua hoao no au e hana aku i kekahi wahi pono no hai. Ua kakau aku au ia oe, no ko'u hoao ana e hooliloi ko'u home a oi aku ka oluolu, mamua o kekahi poe o kakou. Manoa au ua loaa paha i ko'u mau makamaka ka hauoli o ka manao.
He nui no ke dala loaa i kooeni poe mamua, a he lehulehu na hale laau i kukulu ia. A ua lohe au ia lakou e kamailio ana, pehea la e hiki ai ia lakou, ke hoopaa pono. E oi ae auanei ko lakou maemae mamua o na mea kahiko ; a he nui wale na hana ano hou, i hana ia e lakou iho, aole nae he mau mea hoikeike i kuai ia ma ke kudala. Nani ka nui o ko kakou hauoli, no kela a me keia mea a kakou e hana ai no kakou iho, mamua o ke kuai ana i kekahi mau mea ano haahaa a kahiko nae.
Aka, e hoomanao oe no Mi ss—Kona hana ana i kona keena a maemae, oiai he mau wahi pahu huinaha kahiko wale no kana, he mau barela, a me kekahi mau mea wahi lole kalakoa nani.
E pono hoi kakou e kokua pu aku i i na makuahine, ma ka malama maikai ana i ka lakou mau kamalii. Aole o'u makemake iki, i ka ike ana aku ia lakou e paani hua mabala ana ma ka lepo, i na wa a pau a lakou e puka mai ai mawaho o ke kula. Ua lawe aku au no kekahi poe e lakou, i na kii nani, a'u i kuai ai mai ke kula mai, a ua makemake loa na kamalii i ka noho ana me a'u malalo iho o ke kumu laau, a ua hai aku au ia lakou no na mea pili i ua mau kii la, elike me ka Miss—hai ana aku i na kaikamahine liilii ma ke kula. Ua makemake loa lakou ia mea, a ke manao nei au, e hai aku ia lakou i kekahi mau moolelo Baibala ma ka la Sabati.
Ua kamailo pu au me na kaikamahine Honolulu i keia wa—Ua hauoli loa wau i ko'u mau wahi hou e noho nei.
Me ke aloha nui i na kaimahine a pau, ke ike aku oe ia lakou. Kou hoaloha. KETE.
nunui, a e lawe ana makou i kekahi mau koena apana lole o ko makou mau lole ponoi, a e hana i kekahi mau aahu no na kamalii o ko makou kahunapule. Aole mahuahua o kahi dala loaa iaia, a he hana paakiki loa hoi ka hiki ana e kuai i na aahu no kona mau ohana liilii. Ua pilikia loa no hoi kana wahine i ka humuhumu no lakou a pau.
He maikai a oluolu oia ia makou a pau, a ua makemake au e kokua iaia. Manao au e huna no makou i keia mau hana a pau, i mea hoopuiwa iaia i kekahi la.
Aka, oiai aole no e hiki ia'u ke hana i na mea nui no kuu mau makamaka, ua manao nae au e hoike aku i ko'u wahi malamalama uuku, i mea hoike aku hoi i kekahi poe, no na mea maikai a'u i ao ai ma ke kula.
Ke hoomanao nei, no na mea he nui a'u i lohe ai malaila, aole hoi au i hoomaopopo he mau mea waiwai ia iloko oia wa. E hai i kuu aloha i kou makuahine. Aole o'u manao e holo aku i
NA MAKUAHINE ELUA.
[He moolelo no na Kamalii opiopio.]
Eia he wahi keikikane uuku nani, akahi no a hoomaamaaia ma ka hele ana. E nana i kona mama e paa nei me ke alakai lima ana iaia. O Faraineki ka inoa o keia wahi keiki. Aole auanei oe i ike i ke aloha nui ana o kona makuahine iaia ? E nana i kona helehelena, hoike mai ia i kona oluolu. Nani kona hauoli i ke kiai makaala ana maluna o Faraineki, iaia e paani ana me Puse! Oluolu no o Puse i ka paani ana o Faraineki me ia, a i kona huki ana ma kona hulu ; aole hoi oia i nanahu a uwalu aku ia Faraineki. Aka, ano la, ke nana huhu aku nei o Puse iaia ; no ka mea, ua hopohopo oia o kii auanei o Faraineki i kana mau keiki popoki liilii, a he makuahine aloha loa o Puse ia lakou. Ua huna no oia i kana mau popoki keiki maloko o kekahi hinai, ma ka hale waiho ukana, no kekahi mau hebedoma, i ole ai e hoopoinoia lakou e kekahi mea. I ko lakou wa i lawe ia mai ai imua o Faraineki, paipai ae la ola i kona mau lima, me ka hoao ana e hopu aku ia lakou. Aka, ua waiho iho la ka makuahine o Faraineki ia lakou ma ka papahele, a haawi aku i kekahi pa waiu ia Puse. Ke ike nei oe, hookahi popoki keiki i hele aku la ma kahi o ke pa waiu, a hookomo aku la i kona ihu iloko o ka waiu, aka, aole e hiki iaiaake palu i keia wa, he hokae wale iho no e kihe ai, me ke ano kahaha paha, pehea la i hiki ai i kona mama ke inu me ka hikiwawe. E hoao oe e popoki liilii, a e ike oe i ke ano e inu ai. Aia hou hoi kela wahi popoki uuku, e paani ana me ke kihei o ka wahine, maluna o ka noho, a mamuli no e paani na popoki liilii a pau me Faraineki, a e hoolealea nui aku hoi iaia. He lehulehu wale na ano popoki. O keia popoki nae ma ke kii, he huelo loihi kona, o kekahi mau popoki huelo, a he pokole, me ke ano kumkumu.
He mea lealea loa ka ike ana aku i keia mau ano popoki, e holo hele ana a puni na kihi o ka hale. He mau popoki Manake lakou. O na popoki Malitese, na mea ano maikai loa, a mau popoki akamai ma ka hopu iole ana. O ka popoki noho wale iho no, me ke poi ole i na iole nunui, a me na mea liilii, aohe o lakou waiwai.
E na ohana liilii, e hana aloha aku i ko oukou Puse, a e aloha auanei oukou iaia, a e lealea pu oia me oukou, e like me ko oukou makemake, e hanai pono ia Puse, no ka mea, he hauoli loa oia i ka inu waiu, ina no he iole kekahi ana ia wa.
NO HOLOHOLOPINAAU A ME KONA MAU MAHINA.
I kekahi manawa i hala, ua hoike aku au ia oukou no na mea e pili ia Holoholopinaau kekahi o na Hokuhele nani.
Ua hoonuiia ae kona malamalama, no kekahi mau pule; a he mea kanalua ole, ua lehulehu wale o oukou i nana aku iaia i kona wa i pii kiekie ae ai iloko o ke aouli. O ka poe kilo hoku, ma kekahi mau aupuni, ua hakilo lakou a ua imi aku hoi no ia mea me ka pomaikai nui. O ka helehelena o ka wai a me ka aina ma kona ili, oia na mea nana i hookomo mai iloko o lakou i ka noonoo loihi ana no ia mea; a i keia wa hoi, ua hookokoke loa mai ua hokuhele la io kakou nei, a ua hiki ke ikeia aku me ka maopopo loa.
O Mr. Holo, o ka Hale Kilo Hoku ma Wasinetona, oia ke kilo hoku kaulana. He ohenana nui kona a me ka ikaika. I kekahi po ike aku la oia i kekahi wahi lilelile o ka malamalama maloko o Holoholopinaau, a mahope iho o kona kilo ana me ke akahele, maopopo iho la iaia he mahina ia mea, a mahope koke iho no, ike aku oia i ka lua o ka mahina. O ka mahina mua, me he mea la, he 14,000 mile mai a Holoholopinaau mai, a ua aneane hoi e 100 mile kona anawaena; o ka lua, he emi iho kona nui a he umi wale no mile kona anawaena, a he 4,000 mile kona mamao mai a Holoholopinaau mai. O ka mua o na mahina, hookahi ona kaa ana iloko o na hora he 30; a o ka mea kokoke aku, he 7 mau hora e piha ai kona kaapuni ana. O laua a elua, he emi iho ko laua nui mamua o ka mahina. Aka no ko laua kokoke loa ana aku ia Haloholopinaau, e loaa mai auanei ko laua malamalama nui.
Ua hoomakaia no hoi kekahi mau kilo ana ma Nu Ioka, a ua hoouna ia aku na telegarama ma Enelani, no keia mau mea hou i ikeia. Nolaila, ke ike nei kakou i na nuhou e pili ana no na mea kino lani, ma kahi a kakou i manao ai aole he mau mea e ike hou ia aku ana, aole no e hiki ia oe ke ike i keia mau mea kino hou me na maka kokua ole, aka, ha nui ka pomalkai ma ka hakilo ana aku i ko Holoholopinaau hele mua ana. Aia no hoi o Saturena, kekahi hokuhele ma ia wahi hookahi o na lani, a e kaalo aku ana a kaalo mai laua kekahi me kekahi. Ke hoomalamalama mai nei hoi o Venusa ma ke ano he hoku ahiahi i keia wa ma ke ano he hoku ahiahi i keia wa ma ke komohana, oiai hoi o Iupita e kau ana maluna ae iloko o ke aouli, maluna o ko kakou mau oo, a o Holoholopinaau hoi a me Saturena ma ka hikina.
No Christopher Columbus.
HELU 24.
He nui na kanaka i lawe ia mai e Columbus maluna o kona mau moku. O kona manao e kukulu i kulanakauhale kahi kokoke i ka pa kaua o La Navidad. I kona ike ana ua pau ia pa kaua, a ua make hoi na kanaka, e like me ka mea i hoike mua ia, hoopau iho la oia i kona manao e kukulu i ke kulanakauhale ma ia wahi. Holo hou aku la na moku a i Monte Christi; a koho iho la o Columbus i kekahi wahi e waiho ana he kanakolu mile ke kaawale mai ia awa aku. He kulana maikai ia no ka noho ana o kanaka. He momona ka aina, he nui ka ia, a he maikai ke awa. Mauka aku oia wahi he ululaau e paa pu ana, a he kahua maikai ia no kekahi pa kaua. Ua olioli nui na kanaka maluna o na moku i ka wa i hookuu ia'i lakou e hele i uka. No ka loihi loa o ko lakou noonoo ana ua hohono na moku e like me ka hohono o na hale paahao. O na holoholona kekahi i pomaikai i ka lele ana iuka.
Ua hoonoho ia ke kahua no ke kulanakauhale, a hoomaka iho la na mea a pau e hana. Ua kukulu mua ia he luakini, alaila he hale hoahu waiwai, alaila ka hale o ka Adimarala. O na hale aupuni, he mau hale pohaku; a o na hale o na kanaka he mau hale laau. O na Ilikini e noho kokoke ana, o lakou kekahi poe i kokua i ka hana ana i na hale, a ua haawi mai no hoi lakou i ka ai. Ua kapa aku o Columbus ia wahi o Isabela, mamuli o ka inoa o kona Moiwahine.
Aole i kupono na mea ai a ka poe Paniolo. Aole no hoi i kupono ka ai o na kamaaina ia lakou; a ano omaimai iho la na haole. Aole i hikiwawe ko lakou loaa, a he poe ano naaupo no hoi, a ulu iho la ka hakaka ana iwaena o lakou.
Ua mau no ke kaumaha o ko Columbus manao no ka hoopau ia o ka pa kaua. Ua manao oia ua loaa i na kanaka ke gula a loaa la kekahi iaia i mea hoihoi aku i ka home maluna o na moku. Ano hoi aole wahi mea iki ana e hoouna aku ai, a ua manao oia e hoohoka ia ana ku manao o na 'Lii. Manao iho la oia e imi i mea e hooili aku ai maluna o na moku. Ua olelo mai na Ilikini a pau, he gula aia i ke kuahiwi kahi i waiho ai. Nolaila, i ka wa i paa ai ke kulanakauhale, ua hoounaia kekahi poe e imi i ke gula. Elua koa hopo ole na mea nana i alakai i ka poe imi gula. O Gorvalan ka inoa o kekahi, a o Ojeda ka inoa o kekahi. Elua la o ko lakou maki ana me ka ike ole ia o kanaka o ka aina. Ma ka po o ka la elua moe iho la na Paniolo ma ka piko o kekahi mauna kiekie.
I ke ao ana ae, ike aku la lakou i ka aina nani loa. Ike aku la lakou i na hale, na kumu laau a me na waena i kanuia. O Ojeda a me kona poe, ua hele aku lakou ilalo a i na kauhale, a ua hookipa maikaiia lakou. Ua manao lakou e loaa ana na kulanakauhale o ke ano e like me ka mea i oleloia e Marco Paulo; no ka mea, ke manao nei lakou he apana keia no Asia. Aka, o na kanaka, aole kapa, aole no hoi i ao ia, aole no hoi kulanakauhale nui. He mau muliwai e kahe ana mai na kuahiwi aku maluna o ke one, ua hele a hulali ke one me ke gula. Ua olu na Ilikini i na hunahuna gula a me kekahi mau apana gula iloko o na pohaku, a lawe mai la i na Paniolo e kuai ai. Manao iho la lakou ua loaa ka aina o na lua gula; nolaila, hoi aku la lakou ia Columbus a hai aku la i na mea a lakou i ike ai. O Gorvalan, ua hele oia ma kekahi alanui e ae, a ua hoi pu mai no oia me ke gula.
Manaolana iho la ka Adimarala, a manao ia he wa kupono kela e hoihoi aku ai kekahi mau moku he umikumamalua i Sepania, me ka moolelo o na mea i hana ia e ka poe i hoonohoia malaila. Aole i pau.
E na kamalii aloha. Ua kakau aku au ia oukou i kekahi wa i hala aku nei no ke kaikamahine hoolohe ole, a i ka pule i hala iho nei, ua kakau au no ka hewa o ka hoolohe ole. He nui wale na kamalii hoolohe ole ma keia aina. Ua makemake au e kokua ia lakou ma ka hoike ana aku i ka ehaeha a me ke kaumaha o ka hua e loaa mai no ka hana hewa.
E hai aku no au ia oukou i ka moolelo o kekahi keiki i hoolohe ole i kona makuakane a me kona makuahine. O Bennie kona inoa, a e noho ana oia ma Nu Ioka. Hoouna aku la kona makuakane iaia i ke kula, aka, ua mahuka mau oia ma na uwapo e paani ai me na keiki ino. Malaila oia i akamai ai i ka aihue, ka hoopunipuni, a me ka hoohiki ino, a lilo loa iho la oia i keiki lapuwale loa. Aole oia i manao aku i ka hoopai ana a kona makuakane iaia, a i na waimaka helelei hoi o kona makuahine. Ua makemake loa oia e kaawale mai ka home aku a me ke kula, nolaila, olelo iho la oia iaia iho, e mahuka ana wau a lilo i kanaka holomoku, alaila, e hauoli auanei au ; no ia mea, ua puolo ae la oia i kekahi mau lole iloko o ka hainaka, a ma ka po, i kona mau makua no e hiamoe ana, holo aku la oia e like me ka mama i loaa iaia. Ua hele wawae oia i ua po nei, a me kekahi la okoa ae. Iaia i hiki aku ai ma kahi kepa kanaka no na moku, ua hoao oia e kepa ia ma ke ano luina, aka, aohe mea nana i makemake mai a manao mai la hoi nona. Ua pololi oia, aole hoi he mea i haawi mai i ai nana.
Kokolo aku la oia maloko o kekahi barela, a uwe ae la, me ke ake nui ana e hoi hou aku i ka home, aka, ua hilahila oia i ka hana aku pela. Ua akaaka mai na kamalii iaia. Mahope iho, lawe ae la kekahi kapena iaia ma kona moku, no kekahi huakai holomoana loihi. Oial ha keikikane oia, a he lima i maa ole i ka hana, ua loaa iaia he manawa pilikia loa malaila. Ua hoomaemae oia i na pa, kokua i ke kuke, a he kauwa mau no kela a me keia mea. He ai ino loa kana e ai ai, a moe hoi ma kahi moe inoino ua wahi Bennie nei, he wahi huluhulu wale no kona e moe ai ma kela a me keia wahi o ka moku. Ua kahea aku na mea a pau iaia ma na inoa ino, a ua hoonaukiuki mau aku hoi na luina iaia.
He pinepine ka uwe ana o ua keiki nei i ka po me ka walania o ka naau, iaia e hoomanao ae ai no kona home a me kona mau makua. Aka, ua maa loa oia ma ke ano o ke ola kaumaha ana, a ua lilo loa oia he keiki ino oolea, e like me na luina kahiko. Me keia mau ano ino oia i hele ai no ka manawa loihi, aka, aia no ka maka o ke Akua e ukali hele ana maluna o keia keiki, me ka hoopaa ana i kona mau hewa a pau. E hiki mai ana ka hora o kona hoopai ia.
I kekahi la, hookomo mai ana iloko o ke awa o Bosetona kekahi moku kaua, a e lawe pu mai ana oia i kekahi moku e ae me ia, a he moku powa hoi ia i lawe pio ia mai.
He nui loa ka poe i hele aku e nana i na kanaka powa o ka moana, i ko lakou wa e lawe ia ana i ka halepaahao, a mawaena oia heluna, o ua Bennie nei kekahi, keia keiki hoolohe ole.
Ua hookolokolo ia oia, a ua ahewa ia. Ua kau ia ka hoopai maluna ona, e liia ma ka amana.
Ua hiki anei ia oe ke hoomaopopo i ka nui o ke kaumaha o kela makuakane a me ka makuahine, i ko laua wa i hele aku ai i ka halepaahao e ike i ka laua keiki ia Bennie i ka la mamua iho o kona li ia ana ? Auwe ! wahi a laua, ina o maua ke make no ka maua keiki. No ka nui o ko laua kaumaha, ua uwe pu mai ka lehulehu a pau me laua.
Ua li io ia no ia! O keia iho la ko Bennie hopena ma keia ao. Aia aku la kona uhane malalo o ka malu o ke Akua Nui, a Oia no hoi kai olelo mai, "E hoolohe oukou e na kamalii i ko oukou mau makua.
HAAWINA KULA SABATI.
KUMU HANA—Paulo ma Ierusalema.
PAUKU BAI BALA—Oih. 21:27—39
27 A kokoke e pau kela mau la ehiku, ike ae la ka poe Iudaio no Asia ia ia, maloko o ka luakini, hoohaunaele ae la lakou i ka lehulehu, a hopu iho la ko lakou lima ia ia,
28 Kahea aku la lakou. E na kanaka o ka Iseraela, e alu. Eia ke kanaka nana i ao aku i kanaka a pau mai o a o i ka mea ku e i kanaka, a me ke kanawai, a me keia wahi ; a lawe mai no hoi ia i mau Helene maloko o ka luakini, a ua hoohaumia i keia wahi hemolele.
29 (No ka mea, ua ike mua lakou me ia maloko o ke kulanakauhale, ia Teropima, no Epeso, kuhi iho la lakou ua kai mai o Paulo la ia maloko o ka luakini )
30 Ua pioloke ke kulanakauhale a pau, holo kiki mai la na kanaka a pau ; hopu mai la lakou ia Paulo, kauo aku la lakou ia ia mawaho o ka luakini ; papani koke iho la i na puka.
31 I ko lakou imi ana e pepehi ia ia, lohe aku la ka lunatausani koa, ua haunaele o Ierusalema a pau ;
32 A lawe koke ae la ia i na koa, a me na lunahaneri, a holo kiki aku la io lakou la : a ike mai lakou i na lunatausani la, a me na koa, oki ae la ko lakou pepehi ana ia Paulo.
33 A hiki mai ua lunatausani la, hopu mai la ia ia, a kauoha aku la e paa ia i na kaulahao elua ; ninau mai la. Owai keia? Heaha ka mea ana i hana'i?
34 Uwauwa aku la kekahi i kekahi mea a o kekahi i kekahi mea, iwaena o ka ahakanaka Aole i hiki ia ia ke ike i ka oiaio no ka haunaele kauoha aku la ia, e alakai ia ia maloko o ka pakaua.
35 Aia ia iluna o na anuu, kaikaiia 'ku la ia e na koa, no ka anehenehe o ua ahakanaka la.
36 No ka mea, hahai aku la ka ahakanaka, uwauwa aku la. E, e kai aku ia ia.
37 A kokoke kaiia iloko o ka pakaua, i aku la o Paulo i ka lunatausani, E pono anei ia'u ke olelo aku ia oe ? I mai la kela, Ua ike anei oe i ka olelo Helene?
38 Aole anei oe ka Aigupita, i ku iluna i na la mamua aku nei, a alakai ai i na kanaka eha tausani ma ka waonahele, he poe powa?
39 I mai la o Paulo, He kanaka Iudaio no wau, no Tareso i Kilikia, he kamaaina wau no kekahi kulanakauhale kaulana; ke nonoi aku nei au ia oe e ae mai ia'u e olelo aku i kanaka.
Pauku Gula. " Aole i oi aku ke kauwa mamua o kona haku. Ina ua hoomaau la kou ia'u, e hoomaau no hoi lakou ia oukou " Io. 15:20.
Mahele 1. Ka haunaele ma ka luakini.
2. Ke kumu o ka haunaele.
3. Ka mea i emi ai ka haunaele.
Mele.—Mele hou, 8—7.
Haunaele! hopu wale!
Kuhihewa, huhu no;
Kuhihewa no no Paulo,
Hahau ino, naaupo!
Akahele, noonoo pono,
Umi e i ka huhu.
Aloha kahi i kekahi,
Hoohalike me Iesu.
Pule no ka poe i hoomaau ia, i makau ole lakou, &c.
Na ninau a na Kumu.
Ua hiki Paulo ma i Ierusalema 75 mile mai Kaisareia mai. Ua hookipaia ma ka hael o Menasona, he hoahanau ia no Kupero mai. Uwe aloha no i na haumana a ia Iakobo, me na lunakahiko. A hai aku Paulo i na hana a ke Akua ma Asia uuku, i ka huli nui o ko na aina e, i ka hana ino ia mai. Olioli no lakou, Iakobo ma. He manao hopohopo nae ko lakou no ka hiki ana mai o Paulo i Ierusalema. Nui wale na Iudaio i manaoio ka i akoakoa malaila, me na Iudaio hoomaloka hoi, no ka mea he wa Penetekoka ia, he ahaaina makahiki kahi i akoakoa'i ko kela, ko keia wahi. Ua lohe lakou, ua kue Paulo i ke kanawai o Mose, i ke oki-poepoe ana, &c, he kuhihewa nae ia. Makau Iakobo ma i ke ala ana mai o ka haunaele no ia lohe hewa o na Iudaio. A i ole e haunaele, a i akaka hoi, aole. Paulo i kue i ke kanawai o Mose, ua hoopuka lakou i kekahi mea a Paulo e hana'i, oia hoi kona hui pu me kekahi mau kanaka Iudaio eha, a e hana pu i kekahi mau mea e pili ana i kekahi hoohiki.
Ua ae hoi o Paulo ia manao. Ua hui pu me lakou eha ma ka luakini no ka huikala pu ana. Mok. 21:16—26.
Pauku 27, 28, 30. Ka haunaele ma ka luakini. Ane pau na la 7 no ka hoohiki. Ka hoomaka no ia o ka haunaele. Owai ka i hoohaunaele i ka lehulehu? A aha lakou ia Paulo? Kahea lakou pehea? Hopu a kauo ia ia mahea? Papani lakou i ka puka o ka pa no keaha? I paa Paulo iloko, i hiki ia lakou ke hahau ia ia a make.
P 28, 29. Ke kumu o keia haunaele. Heaha la ke kumu? 1 Ko lakou lohe ana, ua kue Paulo i ke kanawai o Mose, i ke oki-poepoe ana, i ka luakini, &c. 2 Ko lakou kuhi ana, lawe pu oia i kekahi Helene ia Teropima iloko o ka luakini, ka mea hoohaumia i ka luakini. He mau kumu oiaio anei keia? Aole, he mau kuhihewa no. Aole kue Paulo i ke kanawai, i ka luakini. Aole i lawe pu i ka Helene ma ka luakini. Eia nae ke kumu oiaio o keia haunaele, ua huhu loa na Iudaio hoomaloka ia Paulo, no kona hoole ana, aole lakou e ola ma ke kanawai, ma ke oki poepoe ana, ma na mohai kahiko. O ka make a me ke ola hou ana o Iesu, me ka manaoio ia ia, oia wale no ka mea e ola'i. Ina pela, no keaha kona hoohalike ana me na Iudaio ma kekahi mau mea? I Kor. 9:20.
Pauku 31—39. Ka mea i emi iki ai ka haunaele. Heaha ka mea i oki iki ai ka haunaele, a pakele Paulo i ka make koke?
1 Ka lohe ana o ka lunakausani koa, oia hoi Kelaudio Lusia, mok. 23:26
2 Lawe oia i na koa me na lunahaneri. He poe kiai lakou i ka luakini me na Iudaio, i ole e haunaele, a i haunaele, e kinai koke ia. Aia lakou ma ka Papu o Anetonia e ku kokoke ana i ka luakini. No Roma lakou.
3 Holo kiki na koa me ka lunakausani i kahi o ka haunaele. A o ke oki no ia o ka pepehi ana ia Paulo.
4 Ka hoopaa ana ia Paulo i hiki i ka lunakausani ke ninau, ke hookolokolo ia ia i akaka ka oiaio, ka oiaio ole o na kumu o keia haunaele.
5 No ka nui loa o ka uwauwa, ka haunaele, kauoha ka lunakausani e alakaiia Paulo i ka pakaua, ka papu o Anetonia e hookolokoloia. I ka ane make ana o Paulo i ka lehulehu, apo na koa iaia a kai malu aku.
6 Ka ae ana o ka lunakausani ia Paulo e haiolelo oia i ka lehulehu. I ke noi ana o Paulo i ka luna e ae i kana olelo ana, pehea ka pane mua ana? Heaha ke kuhihewa o ka luna no Paulo? Owai oia ma kona manao? A pane Paulo pehea? p 37—39. Ka ae anei ia o ka luna i kana haiolelo ana?
Mele.—Mele hou, 8—6.
1
Ua hana ino ia Iesu,
A pela na kauwa,
O Paulo me Petero pu,
Paa i na kaula paa.
2
Pela na hoahanau oonei,
Ua hoomaau ia mai;
I nui nae ke aho e,
Ma o ka pomaikai.
Na Ninau a ke Kahu.
Na makua. I ka puka ana o Paulo ma i Ierusalema, nowai lakou i hookipa? Heaha, a nohea Menasona? Hai mai Heb. 13:1—3. No keaha ko Paulo hele ana i Ierusalema? I loaa ka ahaaina aha? Ehia ona hele ana ilaila mamua? Mahea ka mua? Gal. 1:18. Mahea ka lua? Oihana 15:2, 3. Mahea ke kolu? Oih. 18:22. Aole nae i maopopo keia pii akolu ana. Manao kekahi poe, aole Paulo i pii i Ierusalema, aka i Kaisareia, a uwe aku i ka ekalesia malaila, a hoi hou i ka moku, a holoaku i Anetioka. Ma keia hele ana o Paulo i Ierusalema, mahea ka hoomaka ana? Ehia makahiki mai ka wa i haalele ai oia ia Anetioka a hiki oia i Ierusalema? Eha paha. A puka oia ilaila, owai ka lunaolelo? Iakobo hea keia? Auhea Petero? Aia la i hea? Heaha ka Paulo hana mua? Nui loa anei na Iudaio ma Ierusalema ia wa? No hea mai? no keaha? Heaha ka lakou i lohe ai no Paulo? I akaka he lohe hewa keia, ua ao aku Iakobo ma ia Paulo e hana pehea i oluolu na Iudaio ia ia? I ka ae na o Paulo e hana pela, pakele anei oia i ka hana ino ia mai? I ka imi ana e hooluolu i ke kanaka, he mea aha ia? Pehea e kupono ai I Kor 9:20 me Gal. 1:10?
Na keiki. Heaha ka wanana mamua a Agabo no Paulo ke hele oia i Ierusalema? Mok 21:10,11. Ua hookoia anei ia wanana? Ae, ua hopuia Paulo, ua hoopaaia, ua hahau iho ia, a mai make no. Nawai i hana ino ia ia? Heaha ko Paulo hewa? Aole ona hewa. Ua kuhi na Iudaio, elua ona mau hewa, heaha ia mau hewa? He oiaio anei? Aole, he mau kuhihewa wale no. Heaha ke kumu io o ko lakou pepehi ana ia Paulo? Kona hooel ana, aole lakou e ola ma ke oki-poepoe ana, ma ka lakou mau mohai, mau pule, mau ahaaina.
A pehea oukou, ola anei ma ka pule, ma ka bapetizoia, ma ka hele i na halawai, i na kula Sabati? Aole, ke ole ka manaoio me ke aloha ia Iesu.
Ke kula a pau. Elua mahele i pau i na makua me na keiki, heaha ka mahele ekolu? Hai mai i na mea eono i emi ai ka haunaele a pakele Paulo i ka make koke.
Owai ka lunakausani? Nohea oia? Heaha kona kuhihewa no Paulo? Owai ka inoa o ka papu? Owai malaila? Heaha ka hana a ia poe koa?
Heaha ko kakou pakaua, me na koa kiai ia kakou? Hal. 34:7.
Hai mai i ka pauku gula.
Mele—Mele hou 8.
1
A lele mai na enemi,
A nui, kini, lehu e,
Na anela ke keia mai,
Kokua no a pale ae.
2
Ie su ka Papu o kakou.
Papu paa loa a mau no,
E komo iloko na pokii.
A malu, maha, ola e.
Pule no na hoahanau, na keiki, &c.
Haawina no Sept. Oh. 22:17—30