Ka Lahui Hawaii, Volume III, Number 40, 4 October 1877 — Page 1
KA LAHUI HAWAII.
"Ua mau ke Ea o ka Aina i ka Pono."
BUKE III.} HONOLULU, POAHA, OKATOBA 4, 1877. {HELU 40.
KA NUPEPA KA LAHUI HAWAII.
Paiia ma kela Poaha me keia Poaha.
H. H. PALEKA, Luna Hooponopono.
He pepa i hoopukaia i kela me keia hebedoma no na Ohana a me na Ekalesia o Hawaii; he mea kokua i ka noho pono ana o na ohana, ka maluhia o kanaka, a me na pomaikai kino a uhane o ka Lahui Hawaii. "Aole paonioni; aole haanui; aole hikiwawe ka huhu; aole noonoo ino."
O na Kumumanao a pau, na Nu Hou o kela me keia ano, na Mare, Hanau, Make, e kakau mai i ka Luna Hooponopono, a e paiia no ke kupono.
Aole e aeia ka pilikino, ke kuamuamu, ka hoino, a me ka huhu, a ua makemakeia ka hoohoihoi, hoolana manao, hoonaauao, a me ka hoopono.
He $1.75 ka auhau o keia pepa no ka makahiki, a he $1.00 no ka hapa makahiki.
E hookaa mua ia ka auhau o ka pepa mamua o ka loaa ana i kekahi mea makemake e lawe.
NO NA OLELO HOOLAHA.
E lawe ana keia pepa i na Olelo Hoolaha a na makamaka, e like me ke kupono, a e lawa pono ai hoi me ka hoohaiki ole i ka huina o na kolamu kukulu manao, no ka uku haahaa.
O kela a me keia makamaka e makemake ana e hoolaha, e hele mai ma ke keena a e hui pu me ka Luna Hooponopono.
Aole e paiia kekahi Olelo Hoolaha ke ole e hookaa mua ia ka auhau.
Eia kekahi, ke noiia aku nei na makamaka e hoouna mau mai i na mea hou; mai hooloihi loa i na palapala; e hai pololei mai i na manao me ke kuawili ole, a e kakau mai me na hua moakaka.
E hoouna mai na Leta i ka LAHUI HAWAII.
S. B. DOLE.
LOIO a he Alakai ma na mea pili Kanawai. Ua makaukau oia e pale i na hihia imua o na Aha Hookolokolo a pau o keia Aupuni, me ke kakau ana i na Palapala Pili Kanawai, ma ka olelo Hawaii a ma ka olelo Beritania. 1 1y
WAi Hui o ka Hau!
E IKE IA ka Hale ma ka inoa o "BONANZA" Ke haawi ia aku nei ka poloai i na makamaka keonimana a me na lede o ke kaona Alii, e kipa ae ma ka hale hookipa inu wai momona o ko oukou makamaka nona ka inoa malalo iho, a e loaa no ka hau i hoomomonaia (ICE CREAM) na wai momona o na ano a pau! hoohuihui ia e ka hau iniki o Nuuanu. O keia hale, he hale i hoomakaukauia no na keonimana a he keena nani i hoomakaukau ia no na lede. E kipa mai, a o ka makepono me ka oluolu ke haawi ia'ku, oiai, he makamaka, a he kamaaina no Hawaii nei o JOHN W. CROWELL.
2-1 y (Keoni Koloela.)
Ma ka Hale "BONANZA" ma alanui Moi, mawaena o ka hale kahi umiumi a me ka halekuai o Dillingham ma.
E. O. HALL & SON
[E. O. HOLO MA.]
NA MEA KUAI I NA MEA MAHIAI
NA LOLE, PENA, AILA,
—A ME—
NA ANO LAKO E AE A PAU.
Kihi o Alanui Papu me Moi. 1-1y
WIL DER & Co.,
(WAILA MA.)
AIA MA KE KIHI O
ALANUI PAPU me MOIWAHINE.
Ua hoolako mau ia me ke kuai ana aku i na
Papa me na Lako Kukulu Hale
O NA A PAU.
NA PANI PUKA!
PUKA ANIANI.
OLEPELEPE,
LAKA,
AMI LIILII,
AMI LOLOA.
PENA o na ano a pau,
AILA PENA,
VANIKI, &c.
Ma Balaki Pena me Puna,
Na Pepa Hale me na Lipine Pepa.
Aniani, Paakai, &c.
O na mea a pau maluna'e, e kuai makepono loa ia'ku no ke Dala Kuike. [3—1y.]
PAPA, PAPA.
AIA MA KAHI O
LEWE RS & DICKSON
(O LUI MA.)
KE KAHUA KAHIKO MA
Alanui Papu a me Alanui Moi
E LOAA AI NA
PAPA NOUAIKI o kela a me keia ano.
NA PAPA NANI
A PAA NO KE KUKULU ANA I NA HALE.
Na Pani Puka,
Na Puka Aniani,
Na Olepelepe,
Na Pou, na O-a,
Na Papa hele,
Na Papa Ku,
Na Papa Moe.
Na Pili o na ano a pau!
NA PEPA HOONANI,
Na PENA o na wai a pau
Na Kui mai ka nui a ka makalii,
Na Ami-puka,
Na Ami-puka Aniani,
Na Ami o na ano a pau,
NA AILA PENA,
NA AILA HOOMALOO,
NA AILA o na ano a pau.
NA VANIKI
Na mea HOOHINUHINU o na ano a pau.
Na Balaki o kela a me keia ano.
A KE HAI IA AKU NEI KA LONO i na makamaka a pau, ua makaukau keia mau hoa o oukou e hoolawa aku ma na mea a pau e pili ana ma ka laua oihana
—NO KA—
UKU HAAHAA LOA!
like me ka mea e holo ana mawaena o LAUA a me ka MEA KUAI.
E hele mai! E na makamaka!
A e lawa no hoi ko oukou makemake me ka oluolu
1 a me ka maikai.
STAND FAST.
Golden Sunbeams p 136.
1
Kupaa mau oukou no ke Akua mau,
Me ka ikaika o ka naau a pau,
Me ka pili no i ka Haku Iesu ;
Kupaa mau a mau me ka hana pu ;
Kupaa mau oukou ke kue ke ao,
Kupaa mau oukou ke kue ka po,
Kupaa mau oukou ke hina'e na koo ;
Kupaa mau a mau a e mau loa no.
2
Kupaa mau oukou no ke 'Lii Iesu,
Oiai paapu koonei mau onou,
Na pahele hei, me ka hoolalau ;
Kupaa mau oukou, o ke Akua pu.
Kupaa mau oukou mai kapeke e,
Kupaa mau oukou, ole ku a hee.
Kupaa mau oukou, mai ohumu e
No na hana paa me na luhi nei.
3
Kupaa mau oukou no ka pono mau,
Ke po ae ke ao, a e pee na hokae,
Kupaa mau oukou, Iesu no ke koo,
A hoomalu mai, a e malu no.
Kupaa mau oukou a kau mai ka po,
A e ku a pii i ke ao ma o,
A e komo ae a e hui pu
Ma ka nani lai a mau loa no.
HAWAII.
KA NANEA EEHIA!
O NA LA
I AU WALE KA MANAWA
A O KA
NO NA
KOA KAVALIA OPIO:
NA
SEPANIA EKOLU!
He Nanea Walohia o ka Weli Eehia.
MOKUNA VII—HELU 20.
———O! Ano, no ka manawa pau ole,
E aloha auanei e ka manaolana mahie,
Aloha! e ka puuwai maha!"
HE KANAKA mana nui o Dona Padilla, a he nui hoi ka pomaikai i loaa iaia mailoko mai o kona mau waiwai ma Amerika, i hoomahuahua ia ma ka imi ana ma ia aina nui, a mamuli hoi o ka hoohui ia ana mai o kona mau waiwai paa ma Gerenada, aole i kana mai ka nui o kona waiwai.
O kona loaa makahiki, ua like no ia me ko ke Keiki Alii, a ke manao nei hoi oe, he mea maalahi wale no ka lawe ana mai i ke kanaka karaima nui e like me ia (ina hoi oia keia) imua o ka Aha Hookolokolo. E huna kaua iloko o kaua iho, i ko kaua mau manao a pau, a na ke au o ka manawa e hookokoke mai i ka hora, e hiki ai ke haawi aku i ka uku panai kupono. E noonoo hoi oe, ua hoopili paa ia kuu manao ia Vireginia, a e hoomaopopo oe, e Padilla no kona makuakane.
Ua pono, ua pono, wahi ana o keia iho la na mea e hakukoi nei iloko o ko'u manao ; aka, e hoomanao ia no hoi ; eia wau ua paa malalo o na hoohiki hemolele, i hiki ole ia'u ke mawehe ae, a oiai hoi, eia maloko o keia hale kakela, kekahi mea huna. a ina e ike ia ana, e lilo auanei ia i mea nana e hooauhulihia i ka mana nui o Padilla iloko o ka manawa pokole.
Mai hoikeike mai hoi ia'u no kela mau hoomanao weliweli, wahi a'u. Ke halialia mai nei hoi imua o'u, na kahoaka eehia o kela keena, a ua hooholo iho kuu manao, i keia po e ike ai au i na mea a pau, ina he oiaio kuu mau lia ana, a i ole paha alaila, ua hoopahaohao wale ia mai ka hoi kuu ike e ka makau a me ka weli o ka manawa.
E ukali mau aku no au ia oe, i pane mai ai o Ferenado ; he hana keia e kono ia mai ai kaua, e hooko aku me ke kanalua ole—aole hoi he mau hana e ae nana e hoohuli aku i ko kaua manao, ma kekahi mea okoa. A e ike auanei o Padilla i ko kaua hiamoe kaawale ma na keena okoa, a e hoomau aku kaua pela, aole auanei e nele kona manao iho, oia ko kaua maa: aole hoi i kaawale kou keena me ko'u, a e hui pu no kaua ma kahi hookahi no kekahi mau minute pokole wale no ; mamua ae o ka hiki pono ana aku i ka hora 12 o ka po.
A mamua ae o ka loaa pono ana ia'u he manawa e ae aku ai i keia manao o kuu hoa'loha, komo mai la o Gonazaleza iloko o ke keena, malalo o ke kumu, he hookaawale ana aku i na waiwai ma kahi e. Ke hopohopo nei au e na opio, wahi ana, pehea la keia—ua hookanalua loa ia kuu manao, i ka manawa a na lede i ninau mai ai no ke ki o ka ipuka, ua hoomaopopo ole iho la wau no ia mea ; aka, ua hookui mau ia mai no au, e na alakai kupaianaha no ua wa a pau.
Ke manao nei au, aole paha he nu hou ulia wale mai, wahi a'u. Ae, i pane mai ai oia, ua ike no ka Mea Hanohano, eia oukou a pau iloko nei o ke keena paikii, a ua kau ia no hoi ka paku iluna. Ua haaleleia oia iloko o na manao kupilikii, a ua nuku aku la oia i na lede, oiai lakou e kumakena ana, ua hele hoi a upehupehu na maka ; aloha wale lakou . Ua komo mai au iloko nei, no kou kuleana ; aka he elemakule wau, a ua koloua (kahiko) hoi, a ua kamaaina hoi i na ino a pau i uhi mai maluna o'u.
E ka hupo! i pane aku ai o Ferenado; Oia nei———Hamau! e na opio, e akahele o lohe ia mai auanei e kekahi mea ; he kuhihewa nui ko'u, ina hoi aole he kiu iwaena o ka ohana. E hoomanao oe i kela leo kupaianaha a kaua i lohe ai i kela po. Ua maopopo no ia'u ka hopena, e na ui, ina wau e kumakaia ia ana.
E hooluolu ia oe iho e Gonazaleza, wahi a'u, a e maliu mai hoi a mai hoike wale aku ma ke akea no kekahi mea, a na ke au o ka manawa e hoaiai mai i na haawina kupaianaha. I ka la apopo, e haalele koke no maua i ka hale kakela, e kiai oe me ka makaala i na lede, a ina hoi e hoopilikia ia mai ana lakou a me oe, e hoouna koke ae i ka elele io'u la ma Maderida, a e hiki koke mai no maua me kekahi puali kaua lio ikaika, a e hoohiolo i kona wahi a pau ilalo ma kona mau pepeiao.
Mino aka iki iho la o Gonazaleza, no kiea mau olelo, a no kona hopohopo o haule hope auanei oia, ua haalele mai la oia i ke keena.
Ua hauoli loa wau no ka hookumu ia ana o keia kukakuka olelo. A he mea waiwai ole nae ko kaua hoaiai ana aku iaia, i ke kanaka nona na akeakea ana mai e like me keia, o kau aku auanei imua ona na weli makau he tausani, a haalele e mai oia i ka hale kakela.
Ua maopopo loa iho la ia maua ko Dona Padilla ano ma ia po; me he mea la, ua pilikia loa oia no ka nui o na hana e lawelawe ai; aole loa no hoi i ike ia'ku na lede, a ua komo mai la ka noonoo iloko o maua, anoai paha ua haawi ia na kauoha ia lakou, aole e haalele wale i na keena o lakou. Hoi koke aku la wau ma ko'u wahi moe me ka hoomakaukau ana, no ka maua hana i hoolala ai; hoopiha iho la i ka'u mau pu panapana i ka poka, a me na ipukukui i ka aila. Hoomakaukau pu no hoi i na mea e pono ai no ka'u huakaihele o kekahi la ae; no ka mea, ua hooholo iho la kuu manao, aole e hooliuliu hou aku i ko'u noho kaawale ana mai Maderida mai, kahi a ko'u kuleana maopopo i waiho ai.
Hiki mai la ka hora eehia o ke aumoe, a o Ferenado hoi, ua lako pono oia me na mea kaua ; nolaila, aole loa a maua mea e hopohopo ai no ka paio ana aku me Iakuisa, ina no e kokua mai ana o Padilla iaia. Koli pono iho la i ka uwiki o ko maua ipukukui, a i mea hoi e hoopale aku ai i ke komo ana o ka ea iloko, ua hana ae la o Ferenado i uhi maluna iho, i pio ole ai.
Hapai maile ae la wau i ka paku lole, i owili ia, a komo aku la iloko, me ka hoopaa hou ana iho i ka paku mahope o maua me ke akahele loa, a hiki ma ke keena nui, kahi i hoahu ia ai na mea hana akamai o ka poe kahiko.
Eaneane ana wau e huki mai i ka paku o ia keena, ia wa no au i lohe aku ai i kekahi halulu me he mea la, he kapuai wawae no kekahi mea e hele ana. Ku iho la maua me ka hanu malie ana no kekahi manawa, aka, ua meha hou iho la na mea a pau.
Huki mai la au i ka paku me ke akahele a nana ae la a puni ke keena, ua pouli a meha na mea a pau. Hele aku la maua imua, me ka nihi malie loa, me he mau powa la no ke kulu aumoe, a ke lele la a hoi hou mai la na leo kupinai aheahe o ua keena nei, ua loloa a upehupehu launa ole ko maua aka, i hoolele ia aku e ka malamalama o ke kukui a pili ma na paia, a komo mai la ka weli makau, a noho alii iho la hoi ke eehia iloko o maua, ke hoomanao ae no na ulia i loohia mau mai.
Iho aku la maua ma ke alapii, kuu wahi i haule ai, a naue malie aku la a hiki ma ka puka o na keena, kahi o'u i makau ai no na kino make polopolona. Aole ae la ke ki maloko o ka laka o ka puka, ua maopopo iho la no ia maua, ua hiki mua kekahi mea malaila, aole loa i kuhihewa keia noonoo ana. Hoonou aku la maua me ka ikaika nui e hemo ae ka ipuka, aka, o ko maua ikaika a pau e hookui aku nei, aole loa i loaa he wahi mahole o ka paa a me ka ikaika o ua ipuka nei, a ua hoohoka maopopo ia mai la maua.
Hoomaha iki iho la maua me ka manao e hoi hope paha e imi aku i wahi hou e puka ai.
Oili mai la ke kau wahi malamalama ahiahia ma kekahi aoao o ke alanui, a ike aku la maua he wahi ala ololi e moe aku ana a hiki ma kekahi mau keena i hana like ia ma ka lalani, a maua nae i ike mua ole ai.
Na keia malamalama uwiki paha auanei e kumakaia ia kaua, wahi au, ina e noho iho oe maanei me ko kaua ipukukui, ke aa nei au e iho aku ilalo me kela mau wahi i maopopo ai hoi kahi o kela wahi malamalama i hoea mai ai.
Aole no i ae koke mai o Ferenado i keia manao; o kona manao ka waiho ana iho i ko maua ipukukui e a maluna o ka papa pohaku, a e hele pu no maua, aka, ua hoike aku la wau i ka poino, oiai e nui loa auanei ka halulu o ko maua kapuai.
A mahope iho o ka'u mau kamailio ana aku iaia, ua ae mai la kela i ko'u manao, a hele aku la wau imua me ka nihi malie, a pii aku la ma ke ala mahope, aia no ua wahi malamalama nei e a mai ana me ka ikaika, aole nae i emo a nalowale koke iho la, me he mea la, ua papani ia ae la ka puka o ke keena kahi e a ana. Ke naue aku nei no ko'u mau kaina wawae imua, me ka hoolono ana. I ka hala ana ae o na kaina wawae he iwakalua mahope o'u, lohe koliuliu aku la wau i kekahi mau leo haahaa me ka maopopo ole o na hopuna olelo.
Hoomaha iho la wau no kekahi manawa, a aia hoi kekahi ipuka ma ko'u akau i hoohamama hapa ia, a oili mai la he malamalama piha mailoko mai o ke keena hooluana, a kiei mai la kekahi mea mawaho, me he mea la, e hakilo mai ana, ina paha aohe enemi i kokoke aku. Emi hope aku la oia iloko, me ka hoopaa ole aku i ka puka, a hele aku la wau, me ka hoomama ana i ko'u hanu. Hookokoke loa aku la wau, me ka lohe maopopo ana i ka leo o Padilla, a he leo ano kalakala hoi no kekahi mea e ae i puana ia nae me ka haahaa, i hiki ole ia'u ke hoomaopopo iaia.
He oiaio na mea a pau au i hai mai nei ia'u, wahi a Padilla.
He oiaio, e ka mea hanohano.
A ua lohe no oe i kela hapauea kahiko, e hoolealea ana ia lakou me na hoopunipuni a pau, i hoolaulaha ia e ka poe hupo hoomaloka e like me ia.
Ae, e Kou hanohano, ua kamailio mai la oia, no ke komo kupaianaha ana o ke Kauna (Count) Ferenedeza, ma kela po ou i mare ia ai; a ma ia mea, ua haawi mai lakou i ko lakou mau hoomaikai. Ua maopopo ia'u, ua lohe loa mai no ka Makuisa, iaia e hooluolu ana ma ke kumu laau.
A no ia mea, ua pono e hooki ia kau mau huaolelo, wahi a Padilla, e pono nae kaua e kukakuka nona———he pono nona e uku ia no kona hana kupaianaha ! Ae, ae, ma o Petero Hemolele la ! wahi a ke kanaka powa, a'u i kanalua ole ai o Iakuisa no ia ; ina e lawe ana wau iaia maloko o kuu poho lima, e lilo auanei ia he hana paakiki nona—oia ko'u aie iaia, no ka powa ia ana o kuu hoa'loha. He kupaianaha loa oia ma kana mau niele ana mai no na lede.
Pela anei oe e olelo ai, wahi a Padilla. Ua manao anei oe he hookamani kona ?
He oiaio ia e like me ka make, wahi a Iakuisa; ua oi aku mamua o ka hookamani———E hoolawa no au i ka hana nona ma ia po, ina i loaa aku oia ia'u e hiamoe ana. (Aole i pau.)
Ka Honua nei.
A ME NA MEA A PAU MALUNA IHO.
(Kakauia e J. H. Kanepuu.)
Alanui Rikeke, mai kahakai o Kaholoakeahole a hiki i kahi o Limaikaika w e noho nei, Alanui Puowaina, mai Kakaaka a hiki i Kehehuna, waiho oohu, Alanui Alapai, mai Kakaako ma nae iho a hiki i ke Alanui Beritania, malalo mai o Puowaina.
A he mau alanui ma nae o Kulaokahua, alanui Vitoria, Kapiolani, Piikoi, Keeaumoku, a hiki i ke alanui Manoa. Oia na alanui e pii ana iuka a e iho ana i kai. A he mau alanui pokopoko iho no kekahi, alanui Kaahumanu, Betera, Kamika, Likelike, &c.
O na alanui hoi e moe aoao ana ma ka loa o ka aina, alanui Moiwahine, ma kai; mai ka makeke kuai ia a hiki iwaho o Kalia, alanui Kalepa, mai ka puka pa o Halealii a hui me ke alanui Marina ma ke alanui Nuuanu, alanui Moi, e hele ana ma Ewa, a hele hoi ma o o Waikiki a hiki i Leahi paha, (ke hana pono hou ia nei,) alanui Hotele, mai ke alanui Maunakea a hiki i ke alanui Puowaina; alanui Beritania, mai ka uapo o Kamika a hiki i Kamoiliili, alanui Kula, mai Kehehuna a hui me ke alanui Liliha, alanui Kauka, mai Maemae a ma o aku o Puunui.
He mau alaliilii no kekahi, e like me ke alanui Kukui, a me ko Kulaokahua. Ua manaoia, aole e emi malalo o 6,000 kanaka, aole paha e oi maluna o 10,000.
I ka m h 1854, ua hoopii kekahi mau haole kalepa a kamaaina o Honolulu i ka Moi Kauikeaouli, e hoohuiia keia aupuni i Panalaau no Amerika Huipuia i wahi e maluhia ai na haole a me na kanaka Hawaii, a i ole ia, e kuaiia paha keia aupuni me Amerika Huipuia i $7,000,000, a e lilo nae o Kamehameha III i kanaka waiwai a ona miliona paha, a o kona hanohano Moi, e lilo na ke aupuni e ka hookohu mai ma o kona mau Kiaaina la. A heaha iho la hoi, ua pau wale ia manao hoohui a kuai aina ana.
Ia wa, ua lohe ponoi makou i ka olelo a kela haole i noho ai ma Niu me Aikake hapahaole, (Isaac Adams Alika) o Kupa ka inoa oia haole, penei, "ina e lilo keia aupuni ia Amerika, e nui ana ka waiwai o ka poe mea kuleana, a pau ana na kuleana i ke kuaiia me na dala makepono, e pau ana ko oukou ai ana i ka poi, a he ai haole ka oukou mahope aku nei."
Pane aku makou iaia, pehea hoi auanei makou e haalele ai i ka ai i ka makou ai i maa, he poi kalo, a he poi uala. Pane hou mai kela, "aole oukou e hele ana i ka mahiai kalo, e hele ana oukou i ka hana hoolimalima a ka haole, ina e haawi ana ka haole ia oukou i elima dala no ka la a emi mai paha, aole oukou e mahiai ana, o kela pohaku e waiho kinikini nei ma Pahoa, Waikiki-waena a hiki i Keahukailiai, e lilo ana ia pohaku waiho wale i mau hale nui no ka haole, no ka mea, o ke kulanakauhale o Honolulu, o ka palena ia ma nae nei, a o ka palena o ka aoao malalo, aia no ia ma Kapukaki ma o aku o Moanalua, a o kahi mawaena iho, e lilo ana la i kulanakauhale neepaa papapu, me ka papa hono o na hale, a me na alanui lehulehu wale e hewa ai ka maka ke nana'ku. O keia mau puu e ku nei, (kuhikuhi ae la ia Leahi a me Kawaihoa) e lilo ana lakou i mau papu no Amerika, a me na lae e oi ana mawaho o keia Paeaina, e laa ka lae o Makapuu, Kahuku a me na lae oi o Molokai, Maui a me Hawaii, a pela ma ka aoao hema o keia mau mokupuni."
O ka hoolohe wale aku no ka makou i ka ia la olelo mai, a he nuhou no hoi ia ia oukou e ka poe heluhelu no kela olelo kahiko, he 23 makahiki a keu i hala'e nei.
Na hale aupuni o Honolulu.—Aia ma Mililani ka hale aupuni hou, ua hoonani ia me na keena hanohano o na Kuhina a me na luna aupuni e ae. Aia ma ka aoao ma Waikiki ke keena Ahaolelo o ke aupuni, a me ka Ahahookolokolo Kiekie o ko Hawaii Paeaina. Aia ma ka aoao ma uka ke keena o ke Kuhina Kalaiaina, a malaila ae ke keena o ke Kakauolelo a ke Kuhina Kalaiaina, a mawaena ke alanui e komo a e puka ana iwaho. Aia ma ka aoao ma Ewa ke keena o ka Luna Kakau Kope a me ke Kakauolelo Alua a ke Kuhina Kalaiaina. Aia ma ka aoao ma kai, ma Waikiki ke keena o ke Kuhina Waiwai, a malalo ae ma Ewa o ka puka komo ke keena o ka Luna Buke Nana Helu o ke Aupuni, a Kakauolelo hoi a ke Kuhina Waiwai. A ma ka aoao ma Ewa mai ke keena o ka Loio Kuhina, a ma kai ae ke keena o ke Kakauolelo a ka Papa Hoonaauao. Aia ma ka hale maluna ma ka aoao ma Waikiki ma uka ke keeha o ka Lunakanawai Kiekie Kokua Alua, a ma kai ae ke keena o ka Aha Banako, a me ka hookolokolo ana no na waiwai hooilina, a make kauoha ole paha. A ma kai ae ke keena o ke Kakauolelo o ka Aha Kiekie, a me na lako palapala a pau. Aia ma ke kihi ma kai loa ke keena o ka Luna Anaaina o ke aupuni a me kana mau Kakauolelo. A ma ka aoao ma uka ko ka Lunakanawai Kiekie keena. Ma Ewa ae ko ka Maheleolelo Nui o ke aupuni keena, a oia paha ke ala e pii ai iluna o ka aleo, me kona ala kikeekee e hooponiniu ai. A ma ka aoao ma Ewa ae no ko ka Lunakanawai Kiekie Kokua Akahi keena. A maka aoao ma kai ke keena o ka Ilamuku, he alapii iho malaila. A ma ka aoao ma Ewa ae ma kai ke keena o ke Kiaaina o Oahu, a he mau keena liilii kekahi malaila ae. A ma ke kihi ma ka hakala ma Ewa maluna ae o ke Keena Hoonaauao ke keena o ke Kahukula Nui, a me na mea hoikeike o na ano a pau. A ma uka ae ke keena waiho Buke o na aupuni a pau. He hiki i ka poe ike olelo haole ke hele malaila e namu ai. A ma uka ae ke keena o ke Kakauolelo a ke Kuhina o ko na Aina e. A ma uka ae ke keena o ke Kuhina o ko na Aina e.
He hale nani a hanohano keia, kupono kona ola loihi ana he mau keneturia. A ua hanohano no ke aupuni no keia hale. Ua makepono no ke dala o ke aupuni i ka lilo ana i keia hale maikai. A e mahalo nuiia no o Kapuaiwa Kamehameha V a me kona mau Kuhina, no ka hooikaika loa ana e kukulu i hale aupuni hou a maikai loa, mamuli o ka lilo pinepine o ke aupuni i na hale hoolimalima. A ke ku nei keia hale hanohano ma ke kikowaena o ke kulanakauhale, ke hoohuiia mai o Kulaokahua. A ua hoopuniia e ka pa laau i hoopaaia i na ku pohaku iliili, i kawiliia me kekahi mau mea ano paa e ae a ka haole e nani ai. A ua kapia ka inoa o ka pa, o "Mililani," a o ka inoa hoi o ka hale, o "Aliiolani Hale," kekahi inoa no o Kamehameha V. Na ka Moi Kalakaua i kapa iho nei, i wahi e kaulana ai ka Moi nana i kukulu.
Aia ma uka ae ka pa Hale Alii, he pa nui, aole paha e emi iho malalo o umi eka ka ili e hoouhi ana ia loko o ia pa. I ka wa o Kamehameha III a me Kamehameha IV, he wahi pauku wale no mawaena, a i na la hope o ka noho Moi ana o Kamehameha V, ua lilo mai o Pohukaina i ke kuaiia no $20,000 a i ka noho Moi ana o Lunalilo I, e oia mau ana no, a i ka noho Moi ana'e nei o Kalakaua I, ua hoohui ia'e nei keia mau pa a pau malalo o kona malu, oia hoi keia, 1 pa mua o Halealii, 2 pa o Pohukaina, 3 pa o Haliimaile, 4 pa o Kinau Hale. 5 pa o Kapilima, (no Keolaloa ma mamua.) A ma ia huiia ana, ua nani a moekahi okoa ka waiho ana o ka pa mai o a o. A he mau puu dala nui okoa no i ka ike aku a ka poe kamaaina a me na malihini makaikai. Aia ma ka aoao ma ka hikina ma uka ae o ke alanui kekahi pa e kukuluia nei o ka hale o na koa ponoi o ka Moi. (Aole i pau.)