Ka Lahui Hawaii, Volume III, Number 18, 3 May 1877 — Page 3
Olelo Hoakaka.
E pono e makaala na Kahu Ekalesia no na Kokua i ka Waihona o ka Papa Hawaii no keia makahiki. E hoopaaia ana na buke o ka Puuku ma ka la 15 o Mei ae nei. Nolaila, e hoouna mua mai i na Kokua Mahinahou a me na kokua e ae i manaoia mamua ae o ia la, i komo iloko o ka hoike o keia makahiki. E makaala, mai poina o hemahema auanei ko oukou mau huahelu.
6 t. MA KE KAUOHA.
NA ANOAI.
Ma ka Poalua nei ua ku mai ka moku kiapa "Coringa" mai Nupepeki mai.
O na palapala hoalohaloha alii a na makamaka, ua hookaulua ia a keia pule ae, ua komo loa kakou la.
Inehinei ka holo ana aku a ke kialua birigi "He sperian" no Kapalakiko me na eke leta he nui; a me na waiwai kalepa o keia awa.
Ma keia Poaono iho e haawi ana na keiki aukai o ka manuwa Beritania "Fantome" i wahi aha lealea ma ka hale keaka Roiala.
Ua manaoia e ku mai ana paha i keia la a i ole, apopo paha mai Kapalakiko mai, ka mokuahi "Kulanakauhale o Nu Ioka" ma ona la e lohea mai ai na mea hou o ka Hikina
Ma ka po Poalua nei, ua hopu ia ke kapena o ka moku kiapa Hawaii "Mary Belle Roberts" no kona huna ana malalo o kona moe i na pahu opiuma he 18. Ko kaliia nei oia no ka hookolokolo ana.
Ke ike nei makou i ka hoomakaukau hou ia ana i ona kahua hale hou ma kahi o ka halekuai a pai kii i pau ai i ke ahi ma ke kihi o alanui Papu me Hotele. Ke eliia nei i lua malalo, me he la e hahau uinihepa ia ana paha.
Ma ke "Kilauea o ka Poakahi nei, ua holo aku ke kokua Lunakanawai Kiekie A. F. Judd, a me ka Loio Kuhina Hartwell no ka malama ana i ke kau o ka Ahahookolokolo Kiekie ma ke kulanakauhale o Hilo e noho ana i Mei nei.
Ma Ewa i keia mau la, ka laulaha loa nei ke kanu ana i ka raiki mai na pake a i na Hawaii, mai Halawa a hiki i Honouliuli a malalo loa aku. Me he la aole e ike ia ana ma ia wahi na maka o ka ai makuahine he kalo.
Inehinei, ua hauoli na Ulele o ka hale pai i ka hoonuu i na mea ono makana o ka mare ana o Mr. Schmidt ke kumu puhi ohe aupuni me Miss Booth o Pauoa, i ka po Poalua nei, malaila pu ae ke anaina puhi ohe kahi i hoonanea ai ia laua.
Ua paani ae kekahi sela o luna o ka manuwa Beritania me kekahi kolohe o ka uapo i ka Poalua iho nei, a ua hookui hewa nae na puupuu i na maka a me na ihu, a hele aku ke koko. He hakaka paha he ulele paha?
Ma Wainaano, Ewa, Oahu, ua hoomoe ia kekahi auwai papa i hiki aku kona loa i ka aneane e piha ka mile, e hoomaka ana mai Waimano a moe aku la ma ke kai a kau iluna o kekahi mokupuni iwaena o ke kaikuono o Puuloa, a ke kanu la ka laiki, a o ka oi ia o ka ha wai loihi ma ke awalau o Puuloa.
Ma kela Poakolu aku nei, ua maalo ae mawaho o ke awa kekahi moku kalepa nona ka inoa o "Amerika Hema" me na pea i hele a paihiihi, ua ukali aku o pailata Makinikaea, aohe wahi mea a maliu ia mai. No na mile helu ua powehiwehi ka ikena aku.
PAKELE MAI MAKE.—Ma Onomea, i ka la 21 o Aperila, ua pepehi iho la o Mr. Kapai i kana wahine mare, Mrs. Puikaika Kapai a mai make, e ole e loaa e i na kokua ola ai, o ke kumu, no ka huhu punalua. He elua puka ma ke poo, i hana ia i ka oo pahu huli, a ua lawe ia aku i ka hookolokolo. D. B. KANAKAOKAI OPIO.
HUAKAI POO-LA IKE ALIII.—I ke ahiahi Poakahi nei, hora 5 1/2, ua akoakoa ae ka Hui Poo-la ma ko lakou hale halawai ma Peleula, a i ka hora 6 ponoi, ua hele aku na hoa a pau e ike i ko lakou Moi. "Ia ku mai ka nalu nui mai Kona, ka mahalo, ka mahiehie."
Ua noi ia mai makou e hai aku i na hoa o ka hui Poo-la e hoomanao na lala a pau i ko lakou halawai mau ma keia Poaono ae. Nolaila e eleu ae ka pono. A o ka wa no hoi keia a ka poe hou e komo ae ai me na koina o ko lakou mau kuleana i ka hui.
Ua hoonanea ae he aha mele i ka hanohano o kekahi mau paa mare ma ka huina o na alanui Puowaina a me Alahele Halealii i ka po Poalua nei, aka, aole i ume ia aku na kaula ehakoni o ko makou puuwai no lakou, e like me ko makou haule moeuhane ana i ka leo nahenahe o ka ui Akeneki e kololio ana me ka eehia ma na paia o ka lewa, i hui pu ia ae me ke kani hone olu o ka piano.
Ma ka Poakahi a Poalua iho nei o keia pule, ua hoolaukanaka ae ka pa o Haimoeipo me na ano kanaka lehulehu no ke kuai ana aku i na waiwai o ke Alii C. Kanaina i make ma ke ano kuai kudala. Ua pii loa na kumukuai o na waiwai i kudala ia aku, a ma kahi o ka alima a me ka eono tausani dala ka loaa ma ka makou koho wale aku.
Ma Waioli, Kauai, Aperila la 12, ua hoohohoia'ku o H. Puuiki (Haiolelo) i kahu maluna o ia Ekalesia malalo oke koho ana o ka ahahui ona Ekalesia, a me na hookele ana a na Rev. Dr. Smith, Puuloa a me Mahoe.
I keia mau la, ua hele huhu mai ka pilikia ma na pea eha o ke kulanakauhale o Honolulu nei, ua hahana ino loa ka wi ma na kuaaina, a ma Honolulu, o kahi umeke poi, ua hele a hehee, he hapalua, aole nae e hiki ke haalele, o kahi umeke a hapaha, he oki loa, ua like me ka wai.
Ma ka hora 8 1/2 o ke kakahiaka Poaono nei, ua kepa ia kekahi keiki opiopio ma kahi o ke poo nui o na makai ma Kaakopua no ke kumu kupono paha i hooholo ia e ka Aha Hoomalu o Honolulu, no ka naha ana a me ka haihai ana o ke kaa lawe ohua o Samuel Macy, mawaena o ke alanui Moi, ma Kalihi i ka la hoolewa nei o ke Keiki Alii, a ua olelo ia e hoihoi aku a i ke poho o ka mea kaa i na dala maoli he iwakalua.
I keia mau la iho nei, ua haule mai la he mau kulu hoolu honua mai ka lewa mai, a ua mohala ke ea. I ke kakahiaka molehulehu o ka Poaono, he kehau wehe olu o ka iniki hui kai kamoe iho maluna mai ona puu e hoopuanuanu ana i ka mea holoholo kakahiaka molehulehu, a i ke ahiahi Sabati hoi, ua hoohakukele ia na alahele o ke kaona nei, me he la, i hoopulu ia e na waimaka o ke aloha.
Ulumahiehie luna a mahie loko oko makou hoohihi i hookahi ka au pu ana me ka hale lana KILAUEA maluna o ka ale kuwaho o Pailolo ma kana huna huakai hope loa iho nei i ka Poakahi nei. I kona nee ana'ku mai ka uwapo aku, a ike ia aku la kona lawe kohana ana i na hoa, a wehe ka pili hemo, ua ano halialia no a me ka hakukoi. I ka hoomaopopo aku; ma kahi o 200 a oi na ohua i holo aku. Laukanaka ka oni ana i ka moana.
Ua lohe wale mai makou e holo aku ana ke Alii ka Mea Kiekie Hooilina Moi Liliuokalani i na moku o luna i keia mau la aku, me ka ukali ia aku e kona mau hoa aialo. O kana huakai mua keia mahope iho o kona lilo ana i Hooilina Moi, a me he'la, no ka ike ana'ku i na makaainana ma ia kulana keia huakai. E ka moana, e lana malie, e ke ahe makani, e kolonahe pa aheahe, a e Kama a hoea io Keawe. "e—i—a—wa—u."
Ua haawi ae ke Kiaaina Bush o ka mokupuni o Kauai he haiolelo imua o kekahi anaina i akoakoa ae ma ka luakini o Kaumakapili i ke ahiahi Poaono i hala iho nei, a e like me ka mea i manaoia, ua waiwai kana mau olelo. He mea maopopo lea, o na iini ana o keia Kiaaina opiopio, oia no ka hoao ana a me ka hooikaika e hooi ia na pomaikai o ka Hawaii, a e hooholo mua ia ke kulana o kona mokupuni e noho kahu mai nei, a ma ia mea, e pomaikai ai ke aupuni. Imua, a e ukali ia e ka lanakila ko makou leo e puana'e nei me ka manaolana.
O na kini i hana ia no ka pomaikai o ka lehulehu; oia hoi na ipuki; na ipukukui, na kini; a me ka hoopaa ana i na paipu wai, a me na mea e ae a pau e pili ana i ke kini, ua lawa wale no ma ka nale hana kini o kela Hawaii opio, o John Kamalii, ma alanui Beritania, ma o aku o Kaopuaua. E kipa aku a e lawa no ka makemake.
Ua pohu lai o waho o Mamala i keia kakahiaka, ke lula mai nei na pea.
Ua lohe mai makou ua pau i ka aihue ia ka luhi o na keiki ma Keoneula, oia hoi, ka ai. Kolohe.
KUMUMANAO O KA AHAHUI KULA SABATI.
Ua haawi mai ke Komite o ka Ahahui Kula Sabati i na Kumumanao a lakou i koho ai no ka halawai iloko o June, a me na inoa o ka poe haku manao, a oia keia :
1. Ka mana o na Kula la iloko o na kula Sabati—C. J. Lyons.
2. Ka pono o ka hele ana o na haumana Kula Sabati i ka pule anaina a noho pu me na makua.—W. W. Hall.
3. Ka mana o na Kula Sabati iloko o na ohana.—W. H. Rice.
4. Heaha na hana e ulu ai ka makemake i keia Ahahui?—S. B. Dole.
5. Na lulu mau iloko o na Kula Sabati, no na kumu hea e pono ai ?—N. Kaiaikawaha.
6. Heaha na haawina Kula Sabati maikai loa ae?—Kekapa.
7. Mahea ka oi o ka pono, o na papa nui anei, o na papa uuku paha ?—J. N. Haole.
8. Mahea e loaa ai na kumu no na Kula Sabati?—Seta.
9. Na hoike lealea o na Kula Sabati.—H. Martin.
10. Na hana hui i ka hoomaka ana a me ka hookuu ana o na Kula Sabati.—J. Nawahi.
11. Na halawai o na kumu.—Hookano.
12. Na hoike hapaha o na Kula Sabati. Iosia Waiwaiole.
Na Komite.
J. F. POGUE, M. KUAEA,
W. W. HOLO, S. B. DOLE,
H. H. PARKER.
Nu Hou o an Aina E.
Ke omamalu kaua ma Europa.
Hoole o Tureke i ka Olelo Hooholo maluhia a na Komisina Poo Aupuni.
Ke nee la o Rusia imua o Moldavia ma.
Ke hoonoho papa hele la o Tureke maluna o ka muliwai Danube.
E ano nanamaka ia ana o Tureke e Enelani.
Heahi weli nui ma Sana Lui, Amerika!
Ma ke ku ana mai o ka moku kiapa "Mary Bell Robberts" i ka la Sabati iho nei, mai Kapalakiko mai, ua loaa mai na lono nuhou, a hiki aku i ka la 16 o ka mahina i hala.
O ka mea nui loa ma keia mau lono, oia no ka hooia ana mai o ka aneane ana e kukalaia ke kaua mawaena o Tureke a me Rusia. O na hooholo kahua malama maluhia i hanaia no ke kapae ana ae i na hookahe koko weliweli mawaena o keia mau aupuni, ua kakau inoa ia e na Komisina o na mana aupuni o Enelani, Rusia, Geremania, Auseturia, Farani a me Italia, ma ka la 31 o Maraki iho nei, a ma ka la 13 mai hoi o Aperila, ua haiia ae la ka lono hooia, ua kue a hoole loa o Tureke i ua olelo hooholo malama maluhia nei, a ua hoomaopopoia e Europa holookoa, o ke kaua no ka hopena o ia mea me ka hala ole.
Aole no i kuahaua ia ae ke kaua mawaena o na aupuni a i elua, aka, he kali wale no nae no ka manawa, oiai o ka hopena no ia, a aole i kowa loa ka manawa, he mau hora wale no paha, a i ole he mau la pokole.
Ma na wahi a pau, ke hoomakaukau hiki wawe loa ala na hoa paio me ko laua mau pono no ke kahua kaua. Ua pae aku la na puali Bea o Rusia, ma kela aoao o ka muliwai o Pruth, a ke haomakaukau ala e komo aku maloko o na palena o ke kulanakauhale o Moldavia, ke ala kokoke hoi e hoea aku ai imua o ke kahua hoomoana o Rusia, mamua pono o ke kahua kaua.
Ke kukulu la ka puali koa Tureke i na papahele uwapo maluna o ka muliwai Danube, a malaila e hele aku ai a hoea ma kela aoao, oia hoi ke ala e hele aku ai a hui he alo a he alo me ka hoa paio.
O keia mau hana a Rusia a me Tureke, o na hoike oiaio no ia no ka hopena kaua. Ua oleloia nae, e hoao hou ana no o Auseturia e hoohuli ae i ko laua manao, e malama ia ka maluhia, aka, ua ike maopopoia no nae, e holopono ole ana ia mau haupu ana ; no ka mea, ua hooleia na hooikaika ana a na mana aupuni e ae ma ka lakou mau olelo hooholo, i kakau inoa ia hoi e lakou, ma ka inoa iho o ko lakou mau aupuni pakahi, e malamaia ka maluhia, alaila, he mea makehewa wale no paha ia mana aupuni hookahi, ke hoao aku i ka mea i hiki ole i na mana aupuni lehulehu ke hooko.
Ua hoike moakaka ae ke aupuni Beritania i kona hooholo ana i ka manao, he mea makehewa wale no ka hoao hou ana aku, e malamaia ka maluhia, a e hoopau i na manao kaua o keia mau aupuni. He oiaio no, he mea hiki ke manaoia aku, e kokua aku ana no o Enelani ia Tureke, kona hoa hoi o na au i hala, no ka mea, ua ikeia no na makemake o Rusia, a ke ko, o ke ano hoohaiki ana mai no ia i na palena mana kaua o Enelani, a nolaila, he mea pono, iaia no kona pono iho, e kokua aku ia Tureke, a ma ia mea, e lilo ai ia i hoa paio no Rusia, ma ke ano hoonalonalo; aka, ua hoomaopopoia, he mea hiki ole iaia ke hana ia mea, me ka ole e loaa mai na kuee ana mai na aupuni e ae ; a ina hoi ia e noho malie wale aku, e komo poo ana ka hahana maluna o Tureke, mai ka maiuu mai o ka Bea Rusia, a o ka aneane ana ia e ko na na iini ana a ia aupuni.
Ina hoi ia e kokua ana ia Tureke, o ke kumu maopopo ia e haule ai ka noho Kuhina Nui ana o Disraeli, no ka mea, mamuli o na hana hoomainoino a ka poe Tureke maluna o ka poe Kristiano o Bulgaria, ua hookahuliia na manao maikai o ka lahui Beritania ia Tureke, a lilo i mau manao kue a hoino. A nolaila, ma na hiona a pau, me he la, e ku hookahi ana o Tureke imua o kona hoa paio, me ka nele i ua manao hoomaikai a pau o Europa holookoa.
Ame rika.
Ua hooia ia ka noho Kiaaina ana o Wade Hampton maluna o Karolina Hema, a ua hoihoi hou aku o Mr. Chamberlain i kona mau mana a pau no ia noho, malalo o na hooponopono ana a ka Peresidena Hayes.
I ke kakahiaka o ka la 11 o Aperila, ua pau iho la kekahi o na hotele nani o Amerika, oia ka Hotele Hema ma Sana Lui. O ke kiekie he eono hale ; a o ka nui o ka lilo no ke kukuluia ana, ua hiki aku i ka $1,000,000. Ua piha hoi ua hotele nei i na kanaka he mau tausani ka nui, a i na hale o luna ka hapa nui kahi i noho ai. Ua hoomaka ka a ana o ke ahi mai lalo ae, a paa ke ala e iho mai ai ilalo. A no ia kumu, ua nui ka pioo, e lele ana ma na pukaaniani, a o kahi poe, ua noho pu wale iho no no ka makau i ka lele. I ka haule ana o ka poe i lele aku, ua pau i ka make, a ua pau pu no hoi i ka make me ka poe i noho iho. Aole i hoomaopopoia ka poe i pilikia, aka, o ka manao waleia, he lehulehu no. Ua oleloia, aole i ikeia kekahi mea manaonao nui e like me keia mamua.
MAKE WALOHIA.
E KA LAHUI HAWAII E;—Aloha oe.
Ma kou lokomaikai palena ole, manao au e ae mai ana oe ia'u e hooili aku i ko'u wahi puolo maluna o kou kino holookoa i ike mai ai o'u mau kini makamaka mai ka hikina mai a ka la i Kumukahi a ka welo ana a ka la i Lehua. Ma Puunui, Honolulu, Oahu, make o Mokuohai i ka la 21 o Aperila, 1877. Ua hanau ia no malaila i Okatoba 13, 1876, na P. Puhalahua laua o Hookohu, nolaila o ka loihi o na la a ka mea Mana Loa i ae mai ai ka maua keiki e noho pu, ekolu malama a me na la keu. Me ka hauoli o ko maua manao i kona lawe ana i kana o ka uhane, a waiho iho i ke kino lepo me maua. Ua loohia oia i ka mai wela ma ke poo i ka Poakolu la 18 o Aperila, oia ka hoomaka ana mai a hiki i ka la i hoike ia ae la maluna, heke ka uhane mai kona kino aku. Ua ae aku no au i na hooponopono ana ia Piipiilani me ka lana o ka manao e loaa ana ka lanakila maluna o kuu keiki, aole i kuanui kana mau hana, aka, e like me ka mea maa mau iaia ka makahiki i hala. O ka pule oia kana kauoha ia maua a me na kupuna aole no hoi i hoonele ia kona makemake o ka pule, i ka pule no ia la, make no iloko o ka pule, i mana no ka paha ka pule i ka la o ka mana; wahi a ka olelo, aka o na hoomanao ana no ke keiki iloko o na hora kupilikii loa, aohe mea nana e kala kona pilikia me ke kaumaha o kuu manao a me ka mokumokuahua no kana mau auwe ana iloko o kona hora hope a kaili loa ae la ke aho.
Kanikau aloha keia nou e Mokuohai,
O oe ka uhane i hele i ka la 21 o Aperila,
Waiho ke kino aole ka hanu,
Ua hele ka hanu ka makani ka'u mea aloha,
Uwe helu ae nei o Puhalahua,
Aloha ino no kuu keiki,
Kuu hoa pili o ka po me ke ao,
Kuu hoa pupuu o ke anu me ke koekoe,
Ua anu iho nei ka po ua hele oe ka'u mea aloha,
Kuu keiki mai ka piihe uwa lua o ke kaona
Kuu keiki mai ka pele kuilua o Kaukeano
E ano aloha mai ana ia'u na wahine o Kawaiahao,
Haohao iho nei au aole oe,
Aia ka oe me lia wahine,
Me ka wahine i ka iu kapu o lono,
Hoolono iho nei au o ka leo,
O ka hea mai auhea oe e papa,
O huli kua o paiauma ka uwe a mama,
Kuu keiki mai ka ai uahi ole,
Mai ka ia mili i ka lima o Uulakoheo,
E hoolohe ana i ka o e o na kaa,
I ka halulu a na lio,
Kuu keiki mai ka ua popokapa o Nuuanu,
Pulu ma ke kua malu ma ke aloha,
I ke alo no kuu keiki a hele,
Hele aku la oe i ke ala hoi ole mai,
Noho iho nei au me ka u me ka minamina ia oe.
Kuu pilikia kuu kaumaha ia oe,
Uwe helu ae nei o Uha ke kupunakane,
Aloha ino kuu moopuna,
Ka nui ka lehulehu o ua hale nei,
O lau wawa ka piha i ke aumoe,
O kui lua ka piha i ka wanaao,
I ka oili hoku loa i ka wehena o ke alaula o ke ao,
Kaawale aku la oe i ka hale wai hale koekoe,
Koekoe iho nei kuu po ua hele oe kuu moopuna,
Kuu mea aloha e—Aloha oe,
Uwe helu ae nei o Makanui,
Aloha ino no kuu moopuna,
Ka mea i manao nui ia,
Ka hiwahiwa a na makua,
Ka hii alo a na kupuna,
Ua hele ka lono i ka hikina,
Ua lohe aku la na kupuna,
O Laa ma i ka hiki i ka pihe make,
Ua make o Mokuohai i Apr. M. H. 1877,
Haloi ku o ka waimaka o ke kupuna wahine,
E uwe ana i ke aloha i ka moopuna,
Kuu minamina nalowale ole, kuu ike ole ia oe,
Kuu hopu hewa i ko kino wailua,
E uwe no au i ko aloha ke hiki mai,
Uwe helu ae nei o Koa,
Kuu moopuna mai ka uka anu o Puunui,
Mai ka wai olelo mai ma ke kala o ka hala me he kanaka la,
I kuhi aku au o ka leo ia o Mokuohai,
I ka hone mai a ka leo o ka wai me he hanehane la i ke aumoe,
O paumako o ka uwe a na kupuna,
Aloha ino minamina wale,
Uwe helu ae nei o Awili,
Aloha ino no kuu moopuna,
Kuu hoa nana ululaau makai o Mamala,
Ke malama nei no au i ko aloha,
Kuu aloha pau ole i na makahiki,
I ke kau me ka hooilo.
Kuu moopuna mai ka la wela o ka makalii,
E hea aku ana i ka haku e hoihoi mai i kuu moopuna,
Ua noho aku la ma ka lima akau,
Ma ka umauma o Aberahama,
Me ke kupuna o na mea a pau,
Euwe au i ko aloha ke hiki mai,
Uwe helu ae nei o Kahele,
Aloha ino no kuu moopuna,
Mai ka makani anu he Waikoloa,
Loa ka hele ana a Mokuohai,
Hoi ole mai i ke kau a kau,
Kuu moopuna mai ka la kahiko a maikai hele,
Kuu moopuna mai ka la kanaka nui o Honolulu,
Ua lulu ka makani ia oe e Mokuohai,
Ua ano ka lani ua malu ka honua,
Ua hoi aku la oe ia Kumuhonua i ka makua nui,
Ka wahine ia Kumuhonua,
Ololo honua o mea lani,
Ko inoa e Mokuohai e,
Aloha ino minamina wale,
Uwe helu ae nei o Mahelona,
Aloha ino no kuu keiki,
Kuu lei mae ole i ka la,
Kuu lipine moku ole i ka makani,
Kuu lei anuenue o ka ua me ka la,
Kuu hoa hoolohe i ka leo o ka bana,
He bana like ia na kaua i ka lani,
He huina like ia na ka waialohia,
Ehia a'u mea aloha o ka leo,
O ka pane ana mai aloha oukou,
Ke lawe nei ka po i kuu kino,
Pau ko'u ike ana i ka nui a me ka lehulehu,
Aloha ino minamina wale.
Owau iho no o P. PUHALAHUA.
"Aole wahi e like me ka home," wahi a ka olelo. Pela makou e hoomanao ae nei me ka hauoli ia Luke Kualawa, e noho maila ma ka aina malihini, ma Sutter County, Kaleponi. Aole oia i poina ia kakou, a me na hana maikai o kona home nei. Ua hoouna mai kela maluna mai ona ale o ka moana, he $10.00 i ke kakauolelo o ka Papa Hawaii, i mea kokua no na Oihana misiona kuwaho. Ona mahalo ana, oia no ka makou e haawi aku nei, a elike me kona haawi ana mai i kona aloha, a me na hoomanao mau ana no ka home o kona aina makua, pela no makou e hoomanao mau ai iaia. Aloha.
Ua lohe maopopo iho nei makou i ka lilo ana ae nei o H. R. Hikikoki ko kakou kahukula nui i lawelawe iho nei i ka oihana Kahukula no kekahi mau makahiki, ua lilo ae la oia i kumu luna no ke Kulanui o Lahainaluna ma kahi o S. E. Bihopa i haalele mai. A kaa ae la hoi ia Mr. D. D. Baluina ka noho Kahukula nui ana no keia aupuni i keia mau la aku. Ma ka noho Kahukula ana a H. R. H., ua hooponopono hou ae oia i na buke kula o ka olelo Hawaii ma ke ano o na alakai ana o keia au hou. A me he la ua aie nui keia aupuni i kono makaukau akamai. A pela e hoomau ia aku ai nona na haawina maikai. O Mr. Balauina, ke manao nei makou, oia ke kanaka kupono ma kahi kupono.
KUAI A KA LUNA HOOPONOPONO WAIWAI.
E kuai aku ana ka mea nona ka inoa malalo iho ma ke kudala, maluna o kahi i noho iho nei o E. Mikalemi, ma Kapalama-kai, Honolulu, Oahu, ke hiki aku i ka Poaha la 10 o Mei, ma ka hora 10 A. M. oia na lako hale o ka mea i make; oia na Noho, na Pakaukau, na Noho Uwai, na Pakaukau kakau, na Pahu Lole, na Ume waiho kapa, Na mea kau Mamalu, na Moe, na Uluna, he paa ili lio kauo kaa, 2 mau kaa huki l ma, na lako pa, a me na heluna nui o na lako hale maikai a hoonani.
W. L. WILCOX.
18 2t. Lunahooponopono Waiwai.
OLELO HOOLAHA.
KE papa ia'ku nei na mea a pau aole e hele wale maluna o na Aina nona na inoa o Malaekahana a me Kahuku; a o na holoholona, lio, bipi, a me ka puaa e hele wale ana maluna o keia mau aina, e hana ia no e like me ke Kanawai. UA PAPA LOA IA NA ILIO, aole e hookuu wale ia maluna o keia mau aina, a o ka poe e hele ae ana ma ke Alanui Aupuni me na ilio, ke hai ia'ku nei e hoopaa me ke kaula a hala na palena o keia mau aina.
J. A. HASSINGER.
Kahuku, Mei 1, 1877 r 18 5t.
OLELO HOOLAHA.
E IKE AUANEI NA ANO KANAKA A PAU, ke hai ia'ku nei ka lono, ua kapu loa ka hookau wale ana i na ano holoholona a pau maluna o kuu aina kuai, e waiho ia ma NUWANU, apana o Hilo-paliku, nona na eka he 25 a oi aku. O ka mea a mau mea e hookuu wale ana i ko lakou mau holoholona, a i loaa i kuu luna ia F. D. Nawahine, e hooukuia ke poo hookahi $1.00. E lilo keia i kanawai paa loa. Mrs. Kamali
Apr. 14, 1877. Hilo, Hawaii. 17 3t.
UA MAKEMAKEIA,
I ELUA MAU KEIKI HAWAII I AKAMAI I ka heluhelu ana a me ke kamailio ana ma ka olelo Beritania, no ke ao ana i ka Oihana Pai Palapala. E ninau koke ma ka halepai o ka Nupepa PACIFIC COMMERCIAL ADVERTISER. H. L. SHELDON.
17 tf. (Kelekona.)
WILLIAM R. CASTLE.
(Kakela Opio.)
LOIO!
MA NA ANO HANA PILI KANAWAI A pau, e lawelawe koke ia me ka hikiwawe. Na Palapala Sila a me na Palapala pili aina o na ano a pau, e hoomakaukau ia no.
Keena hana, ma ke kihi o Alanui Kaahumanu a me Kalepa, Honolulu. (786 1y) [51]
WIL DER & Co.,
(WAILA MA.)
AIA MA KE KIHI O
ALANUI PAPU me MOIWAHINE.
Ua hoolako mau ia me ke kuai ana aku i na
Papa me na Lako Kukulu Hale
O NA A PAU.
NA PANI PUKA!
PUKA ANIANI.
OLEPELEPE,
LAKA,
AMI LIILII,
AMI LOLOA.
PENA o na ano a pau,
AILA PENA,
VANIKI, &c.
Ma Balaki Pena me Puna,
Na Pepa Hale me na Lipine Pepa.
Aniani, Paakai, &c.
O na mea a pau maluna'e, e kuai makepono loa ia'ku no ke Dala Kuike. [3—1y.]
HOOLAHA A KA LUNAHOOPONOPONO WAIWAI.
O KA POE a pau he mau kuleana koina ko lakou i ka waiwai o ka Mea Kiekie CHARLES KANAINA, i make kauoha ole, ina oia mau kuleana koina he moraki maluna o na waiwai paa a ano e ae paha, ke kauoha ia'ku nei e waiho mai ia mau mea, me na hooiaio kupono, i ka mea nona ka inoa malalo iho, ma ke Keena Ilamuku ma Aliiolani Hale, ma Honolulu, me ka lohi ole, a ke hai ia'ku nei, ina e waiho ole ia mai ia mau kuleana koina iloko o na Mahina Eono mai ka puka mua ana'ku o keia hoolaha, a iloko paha o na mahina eono mai ka la e kikoo ia'i, alaila e hoole loa ia no, a aole loa e ae ia ka Lunahooponopono Waiwai e uku aku ia mau kuleana koina. A o na mea a pau i aie i ka waiwai i oleloia, ke kauoha ia'ku nei e uku koke mai i ka mea nona ka inoa malalo iho.
W. C. PARKE.
Lunahooponopono Waiwai o H. H. C. Kanaina i make.
Honolulu, Aperila 6, 1877. (302 3ts) 15 4t.
NO KE KUAI!
KE KUNA KEONIANA.
I makaukau me na mea a pau.
No ka hoomaopopo pono ana, e ninau ia CHAS. LONG.
(795) [8 3ms.] (Kale Lona.)
CECIL BROWN,
Loio a he Kokua ma ke Kanawai
A HE AGENA NO KA HOOIAIO ANA I NA Palapala no ka mokupuni o Oahu.
Helu 8 Alanui Kaahumanu, Honolulu, H. P. A.
763 1y
WAi Hui o ka Hau!
E IKE IA ka Hale ma ka inoa o "BONANZA" Ke haawi ia aku nei ka poloai i na makamaka keonimana a me na lede o ke kaona Alii, e kipa ae ma ka hale hookipa inu wai momona o ko oukou makamaka nona ka inoa malalo iho, a e loaa no ka hau i hoomomonaia (ICE CREAM) na wai momona o na ano a pau! hoohuihui ia e ka hau iniki o Nuuanu. O keia hale, he hale i hoomakaukauia no na keonimana a he keena nani i hoomakaukau ia no na lede. E kipa mai, a o ka makepono me ka oluolu ke haawi ia'ku, oiai, he makamaka, a he kamaaina no Hawaii nei o JOHN W. CROWELL.
2-1 y (Keoni Koloela.)
Ma ka Hale "BONANZA" ma alanui Moi, mawaena o ka hale kahi umiumi a me ka halekuai o Dillingham ma.
AMA RA! AMARA!!
UA WEHE AE NEI AU I HALE AMARA ma ka Uwapo o Haaliliamanu, malalo o na hooponopono ana a kaua, Hawaii Ponoi. A nolaila, eia ka manawa! he Hawaii a he Hawaii. Ua makaukau mau wau e hana i na Kaa o kela a me keia ano, me ka nani, a haahaa loa ka auhau ana. Malaila e hana ia na kamaa lio me ka eleu, iloko o na minute pokole me ka mikioi lua, i ke Alanui Moi e hulali ai ka hao, haukawewe kela i ka Uwapo o Haaliliamanu. HARRY THOMAS.
16. 1m. (Keliimoewai.)
E IKE IA KAKOU HOOKANAKA!
E LULU LIMA ALOHA!!
ME KO OUKOU MAKAMAKA!!
L. ASEU.
UA HOI MAI NEI AU MAI KO'U KIEI ana aku nei i kuu Aina Kulaiwi. Ano, ke ku aku nei au me ka makaukau mau e lawelawe a e kuai makepono loa me oukou e na makamaka o ka Ua Kukalahale, i na Lole Nu Hou loa o kela a me keia ano, mai ko na Lede, Keonimana a me ko na Kamalei. I pau ai kuhihewa, e naue mai ma ko'u Halekuai, ma ke kihi ma Ewa o na Alanui Moi a me Nuuanu. [8 6m.]
NU HOU MAIKAI!
UA LOAA MAI
ENELANI, FARANI A ME AMERIKA MAI!
He nui wale na mea nani e hoohihi ai ka manao.
E LAA NA
Noho Berekane, Noho Mareka, Noho Italia, a me na lako a pau e pili ana i na Noho Paniolo.
NA TINI AILA MAHU!
Na Aila Pena a me na Pena o na ano a pau.
Ma wahi waiho mea ai, e like me na Pa, Pola, Pakeke Poi, Pola Poi, a me na laau o na ano a pau.
Na mea Mahiai,
Na Oo, na Koi, na Kui o na ano a pau.
NA KAULA HE NUI WALE KE ANO.
NA HAO O KELA A ME KEIA ANO HE NUI WALE.
Kuaina, Kuaina Upena, Na Upena, a me na ano Kuaina he makena wale.
Na Makau Lawaia o kela a me keia ano.
NA PU KAUPOOHIWI NANI A MAIKAI, Ka Pauda, Lu, Kukaepele-pu.
NA AHI-KOE o na ano LEHULEHU
Na Lole o na ano a pau,
EMI KE KUIKE.
Ahina Belekane o na ano a pau, na Kalakoa Lilina, na lole e ae he nui, na Alapia, Pahoehoe, a me na mea Silika o na ano he nui, pau ole ke helu aku, na Palule, Kuka, Puliki, Lolewawae, na Kamaa kane, wahine a me keiki, Na Wai hoope kino e moani ai, na Waiala kela loa o ke ala huihui he nui wale ke ano. Na Bakeke laau a hao, Na Kapu o na ano he nui. Na Paakai hoohu maikai, a me na mea he nui e hiki ai ke kaana maikai ia. E kipa mai a luana ma kahi o Walakahauki ma ka Uapo.
J. T. WATERHOUSE.
Honolulu, Mar. 20, 1877. [12 3ms.]
HE PAPA KUHIKUHI MANAWA HOLO
O KA
Mokuahi Hawaii
KILAUEA!
KAPENA MARCHANT!
Ape rila 30—Poakahi, 5 p. m. . . . . . Kaapuni ia Hawaii.
Mei 7—Poakahi, 5 p. m. . . . . . Hilo
Mei 14—Poakahi, 5 p. m. . . . . . Kona
Mei 21—Poakahi, 5 p. m. . . . . . Hilo
Iune 1—Poalima, 5 p. m. . . . . . Nawiliwili
Ku ana ma Honolulu i ke kakahiaka la Sabati.
Iune 4—Poakahi, 5 p. m. . . . . . Kaapuni ia Hawaii
Iune 11—Poakahi, 5 p. m. . . . . . Hilo
Iune 18—Poakahi, 5 p. m. . . . . . Kona
Iune 25—Poakahi, 5 p. m. . . . . . Hilo
I KA HOLO ANA MA KONA, O HOOPULOA KA PALENA.
Ma na huakai a pau a Kilauea e hoi mai ai mai Hawaii mai, aole e haalele ana ia Kawaihae a hiki i ka hora 10, a mahope iho paha; Makena, e like me ka mea i hoolaha wahaia; Maalaea a hiki i ka hora 7 a. m. a mahope iho.
Uku Eemoku mai Honolulu aku.
A hiki i Kaunakakai pela maluna mai . . . . . $5.00
" Lahaina, " " . . . . . 6.00
" Maalaea, " " . . . . . 7.00
" Makena, " " . . . . . 8.00
" Mahukona, " " . . . . . 10.00
" Kawaihae, " " . . . . . 10.00
" Kailua, " " . . . . . 10.00
" Kaawaloa, " " . . . . . 10.00
" Hilo, " " . . . . . 12.50
" Kau, " " . . . . . 15.50
Uku kaapuni ia Hawaii . . . . . 22.00
A hiki i na awa o Kauai . . . . . 8.00
Uku kaapuni ia Kauai, . . . . . 12.00
Uku ohua Hawaii oneki, . . . . . 2.00
Aole aie no na uku ohua.
Ma ka Hale Oihana e loaa'i na palapala.
Aole keena o hope e lilo, aia wale no a kaa mua mai ka uku moku. Aole e ili ka hewa no na paiki, ukana a puolo paha, ke ole e kakauia ka loaa ana mai.
E hookaaia ka uku ukana i ka wa e noiia aku ai.
SAMUEL G. WILDER (Waila,)
A gena.
Keena ma ka Hale Kuai Papa o Waila ma, kihi o Alanui Papu a me Moiwahine. (801 3m) 14 3ms.