Ka Lahui Hawaii, Volume III, Number 14, 5 April 1877 — Page 4

KA NUPEPA KA LAHUI HAWAII.
HONOLULU, APERILA 5, 1877.

KOMI TE HOOPONOPONO NO KEIA AOAO.

LAIKI MAKUA,  MRS. KELA A. GILIMANA,
M RS. ELENA MAKALE,  MRS. C. C. COLEMANA.

Haina o na ninau no Au gate.

          1.—O Aarona.   Nahelu. 33:38.
          2.—O Nebuzaradana.  Ii Na Lii 25:8—9.
          3.—O Ezera.  Ezera 7:8—9.
          O ka ka poe Hebera inoa no keia malama o Ab, aka, aole e loaa ia kakou iloko o ka Baibala, aole anei?

NA HEWA LIILII.

          Hoopiho kahi puka uuku iloko o ka moku iaia ilalo; lawe aku ke kuono kai uuku i na mea a pau mamua ona; o kahi eha iki iloko o ka puuwai o ke kanaka, e make oia; a o kahi hewa liilii, e like me ka mea i kapaia e ka poe noonoo ole, e hiki aku no ia i kona hopena poino; a o ka hewa a ka naau i kaulua iki ai, e hooikaika no ke diabolo e panee 'ku imua. O kahi kulu uuku, hoopoino oia i na kanaka he nui wale—hoomaka ka mea ona me kahi kiaha hookahi.

MAI KA MAKUAHINE MAI.

          He nui na paa mare mawaena o ko makou poe opio i ka pule i hala ae, a ua lana ko'u manao e noho loihi ana na paa mare me ka lokahi a me ka hauoli kekahi i kekahi. He mare hauoli ana ma o, elike me ka Iseraela ma ka lakou huakai hele i hele mai ai i Elima, kahi hoi o na lua wai he 12 a me na laau Pama he 70, he wahi maikai, aka, aia aku o he huakai hele mamua aku. Pomaikai ka poe e hele ana i keia huakai ma ke aloha, e kokua ana kekahi i kekahi, elike me ka ke Akua i hoike m ai ai; owai kai hana i ka mea oiaio hookahi iloko ko o ko lakou mau pono a pau. E ae mai ia'u e haawi i elua mau huaolelo i loaa ia'u, he mana nui hoi no ka hoohauoli ana i na home, oia ka pule a me ka maluhia. He makua akahi, hanohano a me ke aloha ko kakou a pau; e hele i ona la, a nana e kokua mai. Alaila, e kaohi hope iho i na huaolelo huhu. O na hualoelo oluolu, hoopomaikai ia i ka home. He oiaio ka Solomona i olelo mai ai, "O ka mea malama i kona waha a me kona alelo, oia kai hoopakele i kona uhane i ka popilikia, Sol. 21; 23.
          Ua ike au i kekahi kanaka maikai, i hoolilo i kona home, a ane like me he lani la, ma ka pane mau ana aku i na huaolelo huhu mai kana wahine mai, "E kuu wahine aloha," me ka nanaina i piha i ke kahaha.  (Aole i pau.)

No Christophur Columbus.
MAHELE VI.

          Pae aku la o Columbus a me kona mau moku ekolu i Cuba, ma ka la 28 o Novemaba, 1492. Komo aku la lakou ma kekahi muliwai maikai, ma ke komohana akau ae, no umikumamalua anana ka hohonu o ka wai.
          O kapa o ka muliwai o na aoao a elua, ua uhi ia me na laau, na hua nahele a me na pua o na ano a pau. Holo aku la lakou ma ka muliwai no kekahi wahi loihi, a ua nui ka olioli no ka uliuli o ka aina, ka nani o na manu, a me ka maikai o ko lakou leo. Kahaha lakou no na mauna a me na kahawai liilii maikai.
          I kekahi la ae, hele aku la lakou ma ke komohana, kahi a lakou i manao wale ai e loaa ona kulanakauhale nui no kekahi alii nui. Ike aku la lakou i na kauhale he nui wale, aka, ua auhee na kanaka mailaila aku, a haalele i ko lakou mau waiwai a me na hale o lakou. Haawi aku la o Columbus i ka olelo kauoha aole loa e lawe ia a hoopoino ia kekahi o na waiwai. Nolaila, hele aku la lakou ma na hale e makaikai i ka lakou mau mea, me ka lawelawe ole ana aku.
          Manao iho la ka Adimarala i kinohi, o Cipango (Iapana) paha keia aina., aka, noonoo hou iho la ia, o Inia paha keia. Nolaila, hoouna aku la ia, elua o kona mau kanaka me elua Ilikini e hele e imi i ke alii o ka aina.
          Haawi aku la oia ia lakou i na pupu lei i mea e loaa mai ai ka ai, me ka hai pu aku ia lakou, e hoi mai iloko o na la eono. Ua hai ia aku ia lakou kahi e hele aku ai e imi i ke Alii, a me ka lakou e olelo aku ai iaia. Nolaila, haele aku la lakou.
          Hoike aku la kekahi o na kamaaina ia Columbus, aia he wahi ma ke komohana hema, kahi o ka pepa (pepper) a me ke cinemona i ulu ai, a malaila pu no hoi e loaa ai ke gula a me ka momi. O ka inoa o keia wahi, wahi a lakou, o Bohio. Hoike mai la lakou iaia no ka poe kanaka ikaika me ka maka hookahi wale no, a o kekahi poe aku me na helehelena elike me ka ka ilio, he poe ai-kanaka, a ua kamaaina i ka pepehi i ka lakou mau pio a ai ia lakou. Malia paha ua manao na kanaka e hoike hoopunipuni, a i ole o na haole paha kai kuhihewa aku ia lakou, aole kakou i ike.
          Ma ka la eono o No v., hoi mai la na kanaka elua i hoouna ia ai. Hoike mai la laua, mahope o ka hele ana no na mile he kanaha, loaa aku la ia laua he taona he aneane tausani kanaka iloko. Ua hookipa oluolu ia aku laua, honi mai la na kanaka i ko laua mau lima a me na wawae, a kokua mai la ia laua me ke aloha, a pela pu no me kahi kauhale uuku. Aole a laua alii i ike ai.
          Ia laua e huli hoi ana, ike aku la laua he nui wale o na kanaka e lawe ana i kekahi mau ohe hakahaka i hana ia mai na lau laau maloo. Ho-a lakou i kekahi welau me ke ahi, a o kekahi welau o ua mau ohe hakahaka nei, hookomo mai lakou iloko o ka waha me ke omo ana i ka uwahi iloko.
          Kapa aku na kamaaina i keia mau ohe he tobacos. O ka makamua ia o ko na haole ike ana i keia mea, a ua hookahaha ia lakou. A ua ane hoohihi no nae lakou, a lawe aku i kekahi i Sepania. Mai ia wa mai i loaa ai ka baka puhi a puni ka honua.
(Aole i pau.)

KA ELA KUMUMANAO
NO KE KAUOHA HOU.
"HE KAUOHA HOU KA'U E HAAWI AKU NEI IA OUKOU, E ALOHA KEKAHI I KEKAHI.—IOANE XIII; XXXIV."
MOKUNA VI.
KA HAIOLELO.

          O ka mokuna 13 o ka euanelio i kakauia e Ioane ; pauku 34 me ke 35. He kauoha hou ka'u e haawi aku nei ia oukou, E aloha aku oukou kekahi i kekahi ; e like me ka'u i aloha aku ai ia oukou, pela oukou e aloha aku ai i kekahi i kekahi. Ma keia mea, e ike ai na kanaka a pau, he poe haumana oukou na'u, ke aloha aku oukou kekahi i kekahi.
          Hikilele koke ae la o Helena iaia i lohe aku ai i ka poolelo, a kahaha iho la ina ua hoomaopopo ia Ela inehinei i ka mea a Kauka Bowen e haiolelo ana i keia la. Huli aku la ia a nana i kona makamaka hanauna, a ike aku la i ke ano kahaha o ko Ela mau helehelena. A alawa mai la ia iaia, a halawai like ae la ko laua mau maka.
          Ike iho la o Ela ma ka nanaina hoihoi o ko Helena mau manao i ku ai, ana hoi i hoomaopopo ai. Pule ikaika aku la ia na ke Akua e hoomaikai i kana kauwa hoolohe ia la, a e hoolilo ia lakou i mau elele no ka maluhia, i ka naau ehaeha o keia wahi kauwa nei. Aole e hiki iaia ke kapa aku, he loaa ana iaia o ka manawa e huli aku ai i keia poolelo no keia la, me kona kamailio ana me ka maopopo lea i na kamalii liilii o kona pu-a. Ike aku la nae ia i ka lima alakai o ka Makua nona ke aloha, e hoomalu ana i na mea a pau o ka lani a me ka honua.
          Hoomau aku la no ke Kauka i kana haiolelo ana, a ma na olelo a pau ana i hoopuka ai, he oiaio, he momona, he aloha a me ka moakaka, e like me ka maamaama o ka la.
          Hoike mai la ia i ke aloha walenia o ka Hoola no ka poe hewa, a me ke kuleana a me ka hauoli o ke aloha ana aku iaia i panai, a me ke aloha ana i na hoa kanaka a pau. A mahope, wehewehe mai la ia i ke ano o ke "aloha ana o kekahi i kekahi," he kuleana i na Karistiano a pau ke hoomaopopo.
          O ke aloha me ka hoolohe i na makua, hoolohe i na kiaaina a me ka poe hoomalu kanawai, maemae me ka oluolu aku i ko kakou ano like a me ka poe o ke kulana haahaa, lokomaikai aku i ko kakou poe hoa'loha, a e hooluolu aku i ko kakou mau enemi, ua pau loa i ka hoakoakoa ia iloko o keia kauoha a ka Hoola, E aloha kekahi i kekahi.
          Ano, e na kamalii wahi a ke Kauka i pane hope mai ai, ua hoike aku nei au ia oukou i ka nui o ko ka Hoola aloha no oukou. Aka ! e alakai aku au ia oukou, e like me ka mea i oi aku ke aloha ia oukou, a i hoouna ia mai hoi e ke Akua e ao mai ia oukou i na mea e hauoli mau loa ai oukou a hiki i ka hopena,—e ae mai ia'u e kono aku ia oukou e hele ae i keia Hoola ahonui. Ua aloha oia ia-oukou me ke aloha palena ole. Ua make oia i ola ai oukou. Hiki anei ia oukou ke haalele aku i kona aloha a huli ae mai na lima nana e kaikai ae ia oukou mai ka poino mai a me ka make a i ka lani kahi o ka hauoli palena ole.
          E hele io Iesu la e na kamalii liilii, aole oia e kipaku mai ia oukou, aole oia e hoole i ka mea nawaliwali a me ka mea hewa loa iwaena o oukou, ina nae oukou e aloha aku ana Iaia. E kai no ia i ko oukou mau kapuai i ke ola, a i maalo ae oe ma ka awawa poeleele, aole oe e weliweli, no ka mea, o kona kookoo a me kona mana o kou mau mea ia e oluolu ai.
          A e hoomanao, o na popilikia a pau e halawai ana me oe ia oe e hahai ana ia Iesu, a me na okupe ana a pau e alalai ana i ke ala o ka opiopio Karistiano, he mau kahea ana ia i kou manaoio. Ua aloha o Iesu ia oe, i na keakea a pau, i ke kaumaha, a iwaena hoi o na palapu o ka hoowalewale ia ; i na manawa hoi e waiho pili kaumaha ana kou mau hewa i kou naau, i kou wa e manao ole ai e hapai ae i kou mau maka i ke kea ma ka puu o Kalivari, a e haalulu oe ke hoomanao ae i ka nohoalii keokeo nani ; nolaila, e hoomanao e na keiki, ua aloha o Iesu ia oe. E malama mau iloko o ko oukou naau i na olelo walohia ana i olelo aku ai i kana mau haumana i kela la kamahao mamua iho o kona kumakaia ia ana. E hoolohe me ka malama i na olelo hoopomaikai ana e olelo mal nei ia oukou, e aloha aku oukou kekahi i kekahi ; e like me ka'u i aloha aku ai ia oukou, pela oukou e aloha aku ai kekahi i kekahi.
          Mele ia mai la ka himeni hope, haiia mai la ka pule hookuu anoano, a puka aku la ke anaina me ka malie iwaho, iloko o na kukuna malamalama o ka la.
          Hele mai la o Ela ma ko Helena aoao, iaia e ku ana me ke kali ana i ke kaa, a kau malie aku la ia i kona lima ma kona poohiwi. Pane aku la ia, he nui wale ke aloha a me ka paumako nona. Nana mai la ia, a ike aku la o Ela i na moali waimaka ma kona papalina. Hele mai la kahi Lile, a lalau iho la i ko Ela lima iloko o kona mau wahi lima liilii, me ka hawanawana ana mai; e like me kona ano mau ; e Ela, aole anei he mea kupanaha no Dr. Bowen ka haiolelo ana mai no ke kauoha hou i keia la, oiai ua hai mai oe ia makou no ia mea hookahi.
          Ae, he kupanaha maoli no, aka, na Dr. Bowen i hai mua mai ia'u no ia mea, he mau makahiki lehulehu wale i hala ae nei, i ko'u wa aole i nui ae e like me oe. Ua hoomaopopo anei oe e Lile i kana mau mea i hai mai nei?
          Ae ; ua manao au ua hoomaopopo au i na mea a pau ana i hai ai, wahi a Lile.
          Ua hamau loa ia o Helena. Aia he manao iloko ona, i loaa mua ole he wahi e noho ai mamua. Aia he kahua maopopo ole ka pono, ka noonoo ana i kekahi mea nui i makemakeia, a me ka noho lokahi pu ana no ka uhane e hoomaka ana e imi i ka mea o keia ao i kupono ole i ka makemakeia, a me kona hoomaopopo ana i kona nele i ke kokua ole, ua ane makaukau e hoolohe i ka leo kahea o ka Hoola.
          Ua mau no nae ka poeleele i ko Helena wahi manao. Aole i moakaka lea ka olelo eehia i kamailio ia, "I malamalama ! " aka, pela i ka hookumu ia ana o ka honua, nolalia, ano ma keia hana maikai o ka hookumu hou ana i ka uhane ola, oiai ka pouli e hoopunana ana maluna iho o ka hohonu, aia hoi, hoopunana iho la ka Uhane o ke Akua maluna o na wai.
          Hoi aku la o Helena me ka piha i ka noonoo me malie a me ka haahaa. Aole oia i hui pu aku me ka lehulehu o na kamalii e akaaka ana a e kamailio ana, i ka wa a ke kaa e niniu poahi ana na huila, me na lio e kainepu malie ana. Hilinai aku la ia ihope o ke kaa, me na hiona kaumaha, a i kekahi manawa, me he la, e pane mai ana ia i ka nohea o na hiona o Ela. E kamailio ana o Ela me Frank Edmund me ka paulehia, oiai lakou e holo pu ana, aka, aole oia i hoopoina i ka hiona o kahi helehelena akahai iluna o ke kaa.
          I na manawa a pau mahope mai o ko Helena noho ana, ua hoomanao mau oia i keia la kalae, oluolu maikai o ka haule lau, kona mau ea nohea a me na hihio malie ano like. Hoomanao mau oia i ka leo mele eehia ana i hoolohe ai iloko o ka luakini, a me na olelo a ke Kauka i hai ai, nana i waiho mai mamua ona i ke aloha o ka Haku ma kona mau ano a pau. E kuawili mau ana  oia iloko iho ona i kela mau olelo, He aloha o Iesu ia oe ; He aloha o Iesu ia oe. E hiki anei i ka Haku ke aloha i ka naau hewa a aloha ole o keia keiki, iaia i ike mau ai iaia iho pela mau oia ? Ua lana kona manao, me ka lana maopopo ole nae, ina paha e ae ia mai ana e loaa iaia ka lei alii o ke ola, no ka mea he aloha o Iesu iaia.
          Ia auina la a po, iaia e heluhelu pu ana me kona makuahine a me na keiki, a ia ahiahi iaia e noho hookahi ana oia wale no ma ke anuu alapii, e kiai ana i na hoku i ka oiliili pakahi mai iwaho o na aouli panopano o ka lewa maluna ae ona, e hoomanao mau ana oia i na olelo aloha me ka haahaa ana i lohe ai, a i ka wa a kona mau maka maluhiluhi i pili iho ai no ka hiamoe, me he la, e pa-e mau ana iloko o kana mau moeuhane keia mau olelo hookahi, He aloha o Iesu ia oe.  (Aole i pau.)

Ke keiki i nalowale me ke kao.

          I ka malama o Iulai, 1866, i kekahi wahi keikikane nona na makahiki eha e paani ana me ke kao, ma ke alo o ka hale o kona makua, oiai he kahuhipa kana, hana ma ke kalana o Port-Lincoln i Auseteralia Hema. Aole mea e ae a kahi Wile e noonoo ana, aka, o ka lelele wale no a kahi kao, ka mea hoi ana i hialaai nui ai, auwana hele aku la laua i ka nahelehele, a nalowale iho la ke ala. Hoomau aku la ia i ka hele ana imua a imua a hiki i ka aneane ana aku o ka la e napoo, me kahi kao no ma kona aoao e lelele hele ana, a hoomaka koke mai la ia e pololi. Aia hoi, aole he mea e loaa ai iaia, aole he wahi palaoa me ka bata a me ka ti no Wile, a e uwe ana hoi ia no kona makuahine, aka, aole he makua e lohe mai ana i kona leo.
          Aka he Makamaka kai aloha i na keiki liilii i lohe ia lakou. Na keia Makamaka i hoolako i na holoholona me ka hoomaopopo ana i ka mea kupono, a ma ka hoomaopopo ana o ke kao i pakele ai ko Wile ola. Ua nui ka ai no laua, a hoomaka aku la ke kao e hanu i na lau o kekahi laau shee oak loihi a pololei, i like ke ano me ka maawe kaula huipa. Ike aku la o Wile i kona wahi hoahele e hoolawa ana iaia iho me keia ano lau nahele, hoomaka aku la oia e ai pu aku me ia. Ua loaa ia laua he wahi paina ano kupono ole ; a i ka nalo ana aku o ka la, a uhi mai la ka pouli, haule aku la kahi kao hiamoe, komo aku la o Wile iloko ona, i loaa iaia ka mehana mai kona kapa hulu aeae mai, no ka mea, he anu ia po. Ala ae la o Wile i kakahiaka nui, me ka manao kaumaha e loaa iaia he aina kakahiaka, aka, aole ana mea e ai ai, o ka lau nahele wale no. Aka nae, ua mau no ka ikaika o kona manao, a haele aku la no me kona wahi hoahele wawae eha, me ke ake nui e ike i kona makuahine, aka, ua poho kona mau manaolana, a ua oluolu hou ia oia e hiamoe pu hou me kana kao ahonui no ka lua o ka po. Hala ae la he la hou a me ka po hou, a hoea mai la ka ha o ke kakahiaka o ko Wile auwana ana ; aka, ua mau no kona ikaika me ka piha hauoli, ka mea hoi i maa mau ole no ka mea auwana, oiai aole ana ai, o ka lau nahele wale no.
          Aka ke kahaha mai nei paha kekahi o ko'u mau hoa heluhelu opio, heaha la ka hana a ko Wile mau makua i ka wa i nalowale ai ka laua kamalei. Ua huli laua ma na wahi a pau a laua i manao ai, ma na kauhale, aka aole nae i loaa. O ka poe i kaawale, ua hui pu lakou ma ka huli, aka, i ka ha o ka la loaa aku la kahi Wile me kana wahi kao he 18 mile ka mamao mai ka hale aku, aole oia i luhi a pololi hoi no ka loa o kana huakai hele.
          Ke ike nei kakou mai keia moolelo oiaio, i ka mana o ka ulu ana o ke aloha i na holoholona. Na ke aloha i hoohua mai i ke aloha iloko o ka holoholona; ina aole o Wile i hana aloha aku i ke kao, ina la ua haalele ia oia i ka nahelehele, a hoonele ia i ka mehana mai kona kapa hulu mai i ka po, a mai kona hoomaopopo ana e kuhikuhi iaia he mea maikai kela lau nahele ke ai ia, ina la ua make oia i ke anu a me ka pololi a ka ai.

Ka la hiki mai—Ka Pule a ka Haku.

          I ka wa o Iesu ma keia ao, ua piha oia i ke aloha ke hoomanao ae i kona Makua iloko o ka lani. Ua makemake ia, oia hookahi wale no e pule aku ai i kona Makua; i kekahi manawa, kahe iho na kahawai waimaka ma kona mau papalina i kona wa i pule ai. I kekahi po, pule o Iesu he po holookoa oia hookahi wale no maluna o ka piko o kekahi puu kiekie.
          I kekahi wa, pule aku o Iesu i kona Makua, me ka noho koke mai no o kana mau haumana a hoolohe.
          I kekahi wa hoi, ia Iesu e pule pu ana me lakou, i mai la lakou iaia, "E ao mai oe ia makou i ka pule ana." Alaila ao aku la o Iesu i keia pule.
          Oia keia: "E ko makou Makua iloko o ka lani, e hoano ia kou inoa: e hiki mai kou aupuni: e malamaia kou makemake ma ka honua nei elike me ia ma ka lani la: e haawi mai ia makou i keia la, i ai na makou no keia la: e kala mai i ko makou lawehala ana, me ka makou e kala aku nei i ka poe i lawehala mai ia makou: a mai hookuu oe ia makou i ka hoowalewale ia mai, aka, e hoopakele ia makou i ka ino: no ka mea, nou ke aupuni, a me ka mana, a me ka hoonaniia, a mau loa aku, Amene."
          Malia paha, e kuu keiki, ke pule mau nei oe i keia pule i ka po a me ke kakahiaka. Na kou makuahine paha i ao ia oe i keia pule. Aka, ua ike anei oe i ka mea nana i pule mua? Na ka Haku Iesu no ia; nolaila, ua kapaia keia o ka "Pule a ka Haku." He pule maikai keia, no ka mea, na Iesu i pule mua; aka, he paakiki nae i na kamalii ke hoomaopopo iho.
          Heaha ke ano "E hoano ia kou inoa?" Eia ke ano, e hoonaniia ka inoa o ke Akua.
          Ua makemake anei oe e hoonaniia ke Akua?
          Heaha hoi ka "lawehala"? O ka lawehala, oia no na hewa.
          E noi aku oe i ke Akua e kala mai i kou mau hewa a me kou lawehala ana.
          Ke manao nei au, ke pule nei oe i kekahi mau pule e ae, au i hoomaopopo lea nui ai.
          Aole anei ou makemake e loaa ia oe ka Uhane mana o ke Akua, i maemae ai oe? E hoouna mai no ke Akua iloko o kou naau ke nonoi aku oe iaia.
          Ua haawi mai ke Akua ia oe i ka ai, a me ka aahu no kou kino. E haawi mai no Oia he mau mea i oi'ku i keia. Heaha ka mea oi aku o ka maikai a ke Akua e haawi mai ai ia oe?—Oia no Kona Uhane Hemolele. Nana e hoomaemae i kou uhane. E noi aku oe i ke Akua, "E haawi mai i kou Uhane Hemolele ia'u, keia wahi keiki hookuli a hune hoi."
          Hiki no ia oe ke pule aku i ke Akua i kekahi manawa oiai o oe wale no. Pule no o Iesu oiai oia wale no. He nui wale na kamalii liilii i pule aku i ke Akua, ka mea hoi ma ka lani i keia wa, a ua hoomaemae ia lakou. Ke pule nei kekahi poe kamalii e noho nei ma keia ao Iaia; aole nae lakou i maemae, aka, ke hoopii mau ae nei ke Akua ia lakou i ka maemae i kela a me keia la, a mahope aku, e hele aku no lakou ma ka lani, a lilo i poe maemae.
          *"Oia hoi, i na la o kona noho kino ana, ua kaumaha aku la i ka pule, a me ka nonoi ana, me ke kahea nui ana, a me na waimaka helelei."  Heb. 5:7."

HAAWINA KULA SABATI.
HELU 3.—SABATI, APR. 15.
KUMUHANA.—Naamana ka Lepera
PAUKU BAIBALA.—2 Na Lii 5:1—14.

O NAAMANA ka luna o ka poe kauwa o ke alii o Suria, he kanaka koikoi ia imua o kona haku, a he hanohano o kona maka; no ka mea, ma o na la, ua hoolanakila mai o Iehova i ko Suria; he kanaka koa nui no hoi ia, a ua lepera.
2 A ua hele aku ka poe koa hao wale, no ko Suria, a ua lawe pio mai lakou i kekahi kaikamahine oipopio mai ka aina o ka Iseraela mai ; a ua lawelawe ia na wahine a Naamana.
3 I aku la ia i kona haku wahine, Ina o kuu haku ma ke alo o ke kaula ma Samaria, ina ua hoola mai kela ia ia i kona lepera.
4 A hele aku kekahi, a hai aku la i kona haku, i aku la, Penei a penei ka olelo ana a ke kaikamahine no ka aina o ka Iseraela.
5 I mai la ke alii o Suria, O hele, o hele, a e hoouna aku au i palapala na ke alii o ka Iseraela. A hele aku la ia, a lawe aku la ia ma kona lima i umi talena kala, a me na apana gula eono tausani, a me na lole aahu he umi.
6 A lawe aku la ia i ka palapala i ke alii o ka Iseraela, i aku la, Ano, i ka hiki ana 'ku o keia palapala ia oe, aia hoi, ua hoouna aku au i ou la ia Naamana i kuu kauwa, i hoola mai ai oe ia ia i kona lepera
7 A pau ka heluhelu ana a ke alii o ka Iseraela i ka palapala, haehae iho la ia i kona aahu, i aku la, He Akua anei wau e pepehi aku a e hoola, i hoouna mai ai keia kanaka io'u nei, e hoola i ke kanaka i ko ua lepera? no ia mea, ke noi aku nei au, e noonoo, a ike, ke imi mai nei paha i mea no'u e hewa'i.
8 A i ka manawa i lohe ai o Eli sai ke kanaka o ke Akua, ua haehae ke alii i kona aahu, hoouna aku la ia i ke alii, i aku la, No ke aha la oe i haehae ai i kou aahu? e hele mai ia ano i o'u nei, a e ike auanei ia, he kaula no iloko o ka Iseraela.
9 A hele mai o Naamana me kona mau lio, a me kona halekaa, a ku ma ka puka o ka hale o Elisai.
10 Hoouna aku la, o Elisai i elele io na la, i aku la, E hele oe e auau iloko o Ioredane, ehiku auau ana, a e hoi hou mai no kou io ia oe, a e maemae oe.
11 Huhu iho la o Naamana, a hele aku la, i iho la. Aia hoi, ua i iho au ia'u iho, E hele io mai auanei ia iwaho, a e ku, a e kahea aku i ka inoa o Iehova o kona Akua, a hapai i kona lima maluna o ka wahi, a e hoola i ka lepera.
12 Aole anei e oi aku ka pono o Abana a me Parepara, na muliwai o Damaseko, mamua o ko na wai a pau o ka Iseraela? aole anei e pono ia'u ke holoi iloko o ia mau mea, a maemae? A huli ae la ia a hele aku la me ka huhu.
13 Hele mai kana poe kauwa a kokoke, olelo aku la ia ia, i aku la, E kuu makua, ina i olelo mai ke kaula ia oe i kekahi mea nui, aole anei oe i hana? oiaio hoi, i kana i ana mai ia oe, E auau oe, a e maemae?
14 Alaila hele aku la ia ilalo, a lu iho la iloko o Ioredane, ehiku lu ana, e like me ka olelo a ke kanaka o ke Akua; a hoi hou mai kona io e like me ka io o ke keiki uuku, a ua maemae ia.
Pauku Gula. "E holoi mai ia'u, a e oi aku kuu keokeo i ko ka hau."  Hal. 51:7.
Mele Him. 241, 7—6. Leo Hosana kamalii.
1
Auwe! kuu ano make!
Ia wai la e ola'i?
Owai la ke kahuna
No kuu uhane mai ?
Auwe no kuu uhane!
Ua pilikia no,
Lolo, lepera, wela,
Hehena kuu manao.
Pule i launa mai ka uhane e hoike mai i na hewa, e hoala i ka ninau no ka mea e ola'i.
Na Ninau a na Kumu.
Mahope o ko Elisai hoola ana i ke keiki make a ka wahine Sunema, heaha kekahi mau hana mana a Elisai no ka mea make iloko o ka ipu hao? a no ka hanai ana i na kanaka he 100, a ma ona a koe? 2 Na Lii 4:38—44.
Mok. 5 P 1. Owai ka luna koa o ke lii o Suria? Heaha, a mahea Suria? Owai ka inoa o kona alii? 1 Na Lii 21:1. He luna aha Naamana? Ma keaha kona kokua ana i ke lii o Suria? Ua lilo Suria ia Asuria mamua iki aku; a ma ka ikaika o Naamana i ke kaua, ua hoi hou o Suria i kona alii mua. He kanaka koa nui oia, aka, heaha kona kina? Heaha ke kanawai no na lepera? Ua noho kaawale anei Naamana? no keaha ke kaawale ole? Malama he hapa lepera ia.= P 2. Ua hele ko Suria poe koa e aha? Owai kekahi mea i lawe pio ia? Mai ka aina hea mai? A lawe oia nawai?
P 3. I ka ike ana o keia kaikamahine, he lepera Naamana, heaha kana olelo i kona haku wahine ? He kaikamahine aloha keia, ua ike oia ia Elisai ke kaula, me kana mau hana mana.
P 4. Ua aha ia'ku keia mau olelo a ke kaikamahine i ke alii? Owai ia'lii? Iorama.
P 5. Pehea aku la ke lii? E hele Naamana io wai la? Me ka palapala na wai aku, a ia wai? Me ka makana aha? 10 talena dala ua like ia me 15,000 dala 6,000 apana gula ua like ia me 54,000 dala.
P 6. Heaha ke kauoha a ke alii o Suria i ke alii o ka Iseraela ke ku oia imua ona? Heaha kekahi hewa o ke alii o Suria?
P 7. A heluhelu ke'lii o ka Iseraela i ka leta a ke 'lii o Suria, pehea oia? a heaha kona kuhihewa?
P 8. Alohe Elisai i ka hana a ke lii o ka Iseraela heaha kona ninau, a me kana kauoha? No keaha e hele ai Naamana io Elisai la? Ma keaha e ike ai oia he kaula iloko o ka Iseraela?
P 9. Pehea Naamana me kona mau lio a halekaa?
P 10. Pehea hoi Elisai me kana kauoha? a aha Naamana? Mahea kekahi mau hana e pili ana pahiku?
P 11. Pehea Naamana, a heaha kona kuhi ana i ola oia?
P 12. Pehea hoi kona ninau ana no na muliwai o kona aina? A huli ae oia a hele aku me keaha?
P 13. Owai ka i uwao me Naamana, a ma na olelo aha?
P 14. Ua ae anei Naamana i na olelo uwao a na kauwa ana? A pehea kona lepera? Ka hana mana ehia keia a Elisai?
Mele—Him. 120 6—8. Leo.
1
Aole koko e
E maemae ai kakou,
Aole koko kanaenae,
Ko Iesu wale no.
2
Ie su, no luna mai,
Ka mohai waiwai e,
A nana no e lawe ae
Na hewa a maemae.
Na Ninau a ke Kahu.
Na makua. Heaha maloko o ka ipu hao? heaha ka hana i pau ai ia mea make? Heaha na ipu hao ma ka hoopili ana, a me na mea make maloko? Heaha ka palaoa e hoolei ai iloko i pau ia mea make? No keaha ka mana o ka palaoa?
Na kaikamahine. Ma keaha i lilo ai Elisai i hoailona no Iesu? ma ka hanai ana i na kanaka he haneri me na popo berena he 20. Ai lakou a maona, a koe. Ua aha Iesu me na popo berena elima, me na ia elua? Koe anei ka berena? Nawai oukou e hanai? Heaha ka berena?
Na keikikane. Owai ka luna kaua leperea? Nawai i kuhikuhi i ka mea e ola'i Naamana? He kaikamahine aha keia? Heaha ka pono o na kaikamahine i keia wa? Owai ka poe i like me na lepera? ka poe hewa, lalau, auwana, hookuli, huli ole, mihi ole, ike ole. Heaha ka hana e pono ai lakou? Pehea Iesu i na lepera, ia ia ma ka honua nei? Heaha ka Iesu kauoha, ma Ioane 9:7? Ike anei? Heaha ka mea i pau ai ka lepera o Naamana.
Ke kula a pau. I na he mau hana pahiku, ma ka helu ehia ka mana? Ehia hoopuni ana ia Ieriko? ma ka hoopuni ehia ka mana? Ehia nana'na, a pule ana no ka ua? Ma ka pule ehia ka mana? Ma ka auau ehia i ola'i Naamana i kona lepera?
Na manao. 1 E hoohalike na keiki me kela kaikamahine pio, a e hoohalike kakou a pau me Elisai, ma ke kuhikuhi ana i na mea e ola'i ka poe lepera ma ka uhane.
Mele. Mele hou, 8—7. Leo.
1
Nui koonei poe Naamana,
Na lepera e noho nei,
Ma ke kino, ma ka uhane,
Ma ke aha e ola'i?
2
Ma ka hele a auau la
Ma ke koko o Iesu;
Ku a hele ano no la,
Auau no a ala pu.
Pule no na mai a pau, na lepera, ma ke kino ma ka uhane?
Haawina no Ap. 22—2 Na Lii 5:20—20