Ka Lahui Hawaii, Volume III, Number 12, 22 Malaki 1877 — Page 4

ʻaoʻao PDF (1.26 MB)

KA NUPEPA KA LAHUI HAWAII.
HONOLULU, MARAKI 22, 1877.

KOMI TE HOOPONOPONO NO KEIA AOAO.

LAIKI MAKUA,  MRS. KELA A. GILIMANA,
M RS. ELENA MAKALE,  MRS. C. C. COLEMANA.

NA NINAU NO IULAI.

          1.—O ka lahuikanaka hea kai lilo ko lakou kulanakauhale ma o ka lawe ia ana a me ka wi ma keia malama?
          2.—O ke Kaula hea kai ike aku i kekahi me kupanaha ma keia malama? Ua hikeia ke ano o ua mea la, he mouna holokoa iloko o ka Baibala.
          3.—O ka inoa o keia malama i ka poe Iudaio, aia no iloko o ka Baibala, aole nae oia ka inoa i kapa maoli ia no keia malama, aka, he inoa no kekahi akua kii a na wahine e uwe mau ai, a oia ka inoa i kapaia aku no keia malama. Owai ua malama la?

Ke Kanawai Ekolu.

          Ua kauoha mai ke Akua ia kakou ma keia kanawai, aole kakou e hoohiki ino i Kona inoa. He nui a lehulehu wale na kamalii i hakihaki i keia kanawai. Mahea i ao ia ai lakou e hana pela ? Mai ka poe hewa mai. Aole e hoopoina ke kanaka pono i ka malama ana i keia kanawai, a pela no hoi ke keiki pono, aole oia e hahaki ana. Ua lohe mau au i na keiki liilii a me na kaikamahine, na kanaka makua a me na wahine pu kekahi, e hoopuka ana i na huaolelo pelapela a lakou i ao ai mai na haole lapuwale mai. Aole lakou i ike i ke ano o ia huaolelo, aka, ua ike no lakou ua hewa ia. O keia mau olelo pelapela i kanuia iloko o ka naau, he mea ia no lakou e hoowahawaha aku ana i ke keiki kina ole ia Iesu, ka mea i hamau i kona "alelo mai ka hewa ae, a me kona mau lehelehe mai ka hoopuka ana i na mea haumia."

He ano Karistiano maoli.

          Aia kekahi wahi keiki ma Kanesasa, nona na makahiki ehiku a me ka hapa, e hooikaika mau ana oia e lilo i Karistiano. O ke kumu nana e alakai ana ke Kula Sabati, a ua keiki la e hele ana, ua hoike ae ia no ua keiki la, nona hoi ka inoa o Wili, ua loaa mau iaia ka mea a kakou e kapa nei, ka noonoo maikai ana o kona mau manao, ma na mea o ka pono uhane.
          I kekahi la, iloko o Wili o ka hale, e kiai ana ia Maggie, iaia e koli uala ana no ka aina awakea. Ia Maggie i koli aku ai i kekahi uala nui, keokeo maikai o waho, aka, iaia i oki iho ai ia loko, ua hoike mai ua uala la i kona olohaka me ka eleele o loko, ano popopo. Ia manawa pane koke aku la o Wili.
          E Maggie, he uala hookamani kohu Karistiano ole kena.
          Heaha ke ano o kau olelo? wahi a Maggie.
          Aole ka ou ike he inoino kona puuwai? wahi a ka pane a Wili.
          Me he mea la, o keia wahi keiki Kanesa sa, ua lawa oia i ka noonoo no ko Iesu aupuni, i maopopo ai iaia keia mau mea a pau; ina e maikai ka helehelena o waho, aole e pono ke eleele ka puuwai. E pono kakou e oiaio me ka pololei mailoko a waho.

Pule Hookiole.

          O KE noi, a o ka hoomau ana ma ke noi, he mau mea like ole ia. O ka ka hapa nui o ka poe pule, ua noi lakou i ka mea i makemakeia, a oki iho la malaila, aole hoomau. Ua hoopii lakou i ko lakou noi imua o ke Akua, alaila poina iho la. A mahope e kahaha ana lakou me ka i ana, aole i hoolohe ia ka pule.
          O ka mea e waiwai ai ka pule, oia ka hoomau ana. O ka poe hoomau ma ka pule, o lakou ke lanakila.
          I ka wa a Iakoba i pule ai i ke Akua, iloko o kona pilikia nui, ua like pu ia me he mea la e hakoko ana me kekahi kanaka. A i ka wa i hoopa mai ai ka anela i kona uha a eha ia, me ka i ana mai e hookuu iaia, hoopaa aku la o Iakoba a paa loa, me keia olelo, "aole au e hookuu aku ia oe aia a hoomaikai mai oe ia'u." Alaila lanakila iho la o Iakoba ma ka pule. Hooko ia mai la kona makemake.
          E na makamaka, ua ao mai o Ie su ia kakou ma Luka 18:1, "he pono ke pule mau, aole e hoonawaliwali." Ua nawaliwali ka poe haipule ma keia paeaina ma ka pule, a oia no kekahi kumu o ka nele o ko kakou mau ekalesia i ka mana o ka Uhane Hemolele. Mai pule kakou a hooki wale me ka loaa ole o ka mea i makemake ia. E hoomau ma ka pule.
          "He kanaka no o Elia, ua like kona ano me ko kakou, a pule ikaika aku ia, i ua ole mai ; aole loa i ua mai ma ka honua i na makahiki ekolu a me na malama keu eono. A pule hou aku ia, a haawi mai no ka lnai i ka ua, a hooulu mai ka honua i kona hua." He pono e noi ka poe pono i ka ua o ka Uhane e haule mai maluna o na ekalesia a maluna o keia lahui.

Na Keiki haaheo.

          E noho ana kekahi wahi keikikane me ke kaikamahine ma kae o kekahi kihapai pua, a e kamailio ana laua me ka haaheo no ko laua mau aahu.
          E nana mai, wahi a ke keikikane, he papale hou a maikai loa ko'u ; he lakeke palu nani me ka lolewawae; me na paa kamaa hou loa ; he kakaikahi ka poe i aahu a nani e like me a'u.
          Pela io no, wahi a kahi kaikamahine, aka, ua manao au, ua oi aku ko'u kahiko i kou ; no ka mea, he papale kilika ko'u a me ka uhi, a me ka hulu nani ma kuu papale. A ua ike no hoi au, he kumukuai nui ko ko'u lole.
          Aole i oi aku i ko'u, pela ka'u ike, wahi a kahi keiki.
          E noho malie iki, wahi a ke enuhe, oiai oia e kolo ae ana ma hai o kahi a laua e noho ana. Aole olua he mea i kuleana e kaena ai no ko olua mau aahu ; no ka mea, o ka papa elua ia, ua aahu mua ia e kekahi wahi holoholona, au hoi e manao ole nei, mamua o ko lakou hoaahu ia ana aku ia oe. O kela papale kilika i kinohi, ua wa-hi ia me kekahi mea kolo e like me a'u.
          Aia la ! heaha kau pane no keia ? wahi a kahi keikikane.
          A o kela hulu, wahi a kekahi manu i pane mai ai, iaia i kuu iho ai maluna o kekahi kumulaau, ua lawe kolohe ia, a haalele ia e kekahi o ko makou ano like.
          Heaha kau pane no kela ? wahi a kahi keikikane i pane hou aku ai i ke kaikamahine. O ko'u mau lole, aole loa i aahu ia e kekahi mau manu a me kekahi o na mea kolo.
          He oiaio, wahi a ka hipa e ai weuweu koke mai ana, aka, ua aahu mua ia nae ma ke kua o kekahi o ko makou ohana, mamua o ka loaa ana ia oe ; a no ka papale hoi, ua ike au, na ka holoholona biva i hoolako i ka hulu no ia mea ; a o kuu mau hoa'loha e hele mai la ma kela kula la, oia ka pipi keiki me ka pipi kauo, ua pepehiia, aole no ka lawe ana i ka io i mea ai, aka, e loaa pu ai ko lakou ili i mea hana kamaa nou.
          Ke ike nei olua i ka lalau, o ka haakei ana no ko olua mau aahu e na keiki; ua aie nui aku kakou i na holoholona liilii loa no keia mau mea; aole hoi e hiki ia kakou ke hoohana aku, ina aole ke Akua i haawi mai ia kakou i ka noonoo e hoolala i ka mea kupono e hana aku ai ia lakou a kupono i ka aahuia, a me ka hoolako ana mai ia lakou i mea no kakou e pono ai.—Sunday Visitor.

No Christophur Columbus.
MAHELE IV.

          Ma ka helu 10 o ko kakou pepa, ua hai aku au, ua holo aku o Columbus ma no Palos, i Augate 3, 1492, (ua pai hewa ia nae 1432.) He eiwa la ka loihi o ka holo ana o na moku a pae i ka Pae Aina o Kanere, (Canary Is.), ua noho iki lakou ilaila ekolu pule, no ka hana hou ana i kekahi o na moku o lakou, oia ka Pinta. He elima pule mahope iho o ko lakou haalele ana aku ia Sepania i nalowale aku ai ia lakou ka mokupuni o Teno, kekahi o na paemoku o Kanere. Ua makau loa ia iho la na luina no ka nalowale ana aku o ka aina mai ia lakou aku, a ike iho la o Columbus i ke ano e o ko lakou mau manao, aka, hoomalielie aku la ia ia lakou. Hoike aku la ia ia lakou i ka maikai o ka aina ana e manao ana e loaa; oia hoi ke gula, kala a me na pohaku makamae i loaa ma keia mau aina, me ka hoike pu aku ia lakou, o keia huakai, e lilo ana ia i mea e waiwai loa ai lakou a lilo i poe kanaka hanohano. Ua manaoio no hoi o Columbus i keia mau mea i hai aku ai ia lakou.
          Ma ka waena o ka malama o Sept., halawai aku la lakou me kekahi o na nahele ma kapa no na muliwai, e lana hele mai ana.
          Ike pu aku la no hoi lakou i kekahi mau mea e ae o ka aina. Aka nae, aole he manaolana o na luina. Aia ka moana akea e hoopuni ana ia lakou, a e nee mau aku ana lakou imua me ka mamao aku o na home i na la a pau, mai ia lakou aku. He nui ka poe i hookahe i ko lakou mau waimaka, a ua uwe kumakena kekahi poe no ko lakou mau hoa'loha i haalele ia aku mahope. Kuka like iho la lakou i keia manao iwaena o lakou iho, a lokahi like ia lakou; ina aole e huli hoi ka Adimarala, alaila, e hui like lakou a kiola iaia iloko o ke kai, alaila, e kia aku lakou no Sepania. Ilaila e hai aku ai lakou i na alii, ua haule o Columbus iloko o ke kai.
          Ua ike mua o Columbus i ke ano o ka mea e hana ia ana, aka, hana aku la ia me ke akahele, e hoomau ana i ka manao lokahi. Haawi oia i ka hoopai i kekahi, a i kekahi hoi me na olelo aloha. Ma ka Poaha, Oct. 11, ua nui loa na hoailona o ka aina i ike ia. Ike lakou he wahi apana papa, he lala laau me ka hua no, a me ke kookoo i hana ia.
          Na keia mau mea i hoike mai ia lakou, ua kokoke lakou i ka aina, a he kanaka ko luna o ka aina. Pohala maikai mai la na helehelena o na luina manao ohumu, a nana like aku la na mea a pau o ka moku no ka aina. Ua hoolaha ae hoi ka Moikane a me ka Moiwahine o Sepania, e haawiia he $30 no ka makahiki no ke ola o ka mea e ike mua ana i ka aina.
          I kela ahiahi, kahea aku la o Columbus i na mea a pau e akoakoa mai. Haipule lakou a pau, a olelo aku la ia ia lakou i ka lokomaikai o ke Akua. Hai pu aku la no hoi ia ia lakou, ua manao ia o ike ana lakou i ka aina ia po, a kauoha aku la oia ia lakou e hakilo no ka aina. Olelo aku la no hoi ia, oia pu kekahi e haawi makana i ka mea mua e ike i ka aina. Ua piha loa ia lakou i ka hauoli i ka moe ana ia po. O ka Adimarala no kekahi i kiai aku me lakou. I ka hora 10 paha o ka po, ike aku la ia he malamalama. Kahea aku la o Columbus elua mau keonimana, a ike pu aku la lakou. Ike aku la lakou i ka pu-a ana mai, a nalowale iho la, me he la iloko o kekahi wahi waapa. Ma ka hora elua o ka wanaao, ki aku la ka Pinta he pu, he hoailona ua ikeia ka aina. Na ka nee o ke kukui i hoike mai ia lakou, he kanaka no ko luna o ka aina, aka, heaha ia ano kanaka, aole lakou i ike. Ua hoopihaia ko lakou mau puuwai me ka hauoli, a aole he mea o ka moku i hiamoe ia po.  (Aole i pau.)

Ka la hiki mai—Na popo palaoa me na ia.

          I kekahi wa, hele o Iesu me kana mau haumana iloko o ka waonahele, a he nui loa ka poe kanaka i hahai aku iaia ; alaila, haiolelo mai la o Iesu i ka aha kanaka, a hoike mai la ia lakou no kona Makua, a me ke ano o kona iho ana mai mai ka lani mai e hoopakele ia lakou mai ia Satana. Ua hoolohe aku lakou iaia mai kakahiaka mai a hiki i ka po ana.
          I ka aneane ana aku e poeleele, hele mai la kana mau haumana i ona la a i mai la, "E hoihoi aku anei oe i ka aha kanaka ma na kauhale, no ka mea, ua hala ka manawa?"
          Aka, ua ike mua o Iesu aole i komo ai lakou ia la a po, aole hoi oia i makemake e hoihoi aku ia lakou ma na kauhale me ka luhi a me ka pololi. Nolaila, olelo aku la ia i na haumana, "Aole anei e hiki ia kakou ke hanai aku ia lakou?"
          "Aole," wahi a lakou, "he elima wa le no a kakou mau popo palaoa a me na ia elua, a pehea e lawa ai keia anaina kanaka a pau."
          Aka, olelo aku la o Iesu, "E hoonoho aku i na kanaka maluna o ka mauu, a e lawe mai i na popo palaoa a me na ia elua ia'u." Nolaila, olelo aku la na haumana ia lakou e noho like ilalo.
          He nui loa na kanaka, e piha ai paha na luakini he umi—elima tausani kane a me na wahine, a me na kamalii pu hoi kekahi.
          Ua luhi loa ia hoi na kamalii, a o ka manawa pono ia no lakou e ai ai i ko lakou aina ahiahi a hoi aku e hooluolu. E lohe kakou ano i ko Iesu hanai ana ia lakou.
          Noho like iho la na kanaka ilalo iluna o ke kahua mauu uliuli. Lawe ae la o Iesu i na popo palaoa a me na ia elua, leha aku la ia iluna i kona Makua, a hoomaikai aku la Iaia no ka ai, alaila, lawe ae la ia i ka popo palaoa a wawahi liilii ae la, a haawi aku la ia Petero, a i aku la, "E hanai aku i kela poe ma o;" a haawi aku la ia i kekahi ia Ioane, "E hanai aku oe i kela poe;" a haawi aku la ia i ka ai a me ka ia i na haumana pakahi ana a pau.
          O kahi apana ai uuku, aole ia i lawa no na kamalii a pau maloko o keia keena; aka, na Iesu i hoolawa i ka ai na ke anaina holookoa a pau: o kahi huna ai uuku, aole ia i uuku iho, no ka mea, ua ai ia kekahi, aka, ua nui mau ae e like me mamua. Ua hoolawa like ia na mea a pau, me ka hoomaunauna wale o lakou i na apana ai iluna o ka mauu. Aka, olelo aku la o Iesu i kana mau haumana, "E lawe oukou i na hinai a e hoiliili maii na hunahuna ai!" a he umikumamalua hinai i piha i na huna ai. Alaila, olelo aku la o Iesu i ke anaina kanaka e hoi.
          Aole anei he hana kupanaha ka Iesu i hana ai! Ua hanai oia ia oukou e ka'u mau keiki, a me na kanaka a pau loa o ka honua nei.
          Pehea oia i hanai ai ia oukou?
          Mai hea i hana ia ai ka berena?—Mai ka palaoa.
          Mai hea i hana ia ai ka palaoa?—Mai ka huita.
          Nawai i hana ka huita?—Na ke Akua i hana ka huita.
          Mai hea mai oia i hana ai i ka huita? Mai ka ole mai.
          Ua hana ke Akua i na mea a pau no loko mai o ka ole. Na Iesu i hookumu i ka honua, a hooulu i ka huita; no ka mea, o Iesu oia no ke Akua. Ina aole ke Akua i hooulu i ka ai ma na waena, e make ana kakou. Aka, aole oia i palaka ia kakou. Ua hoomanao mau oia i na manu liilii. Aole lakou i ike i ka palau ana, ke kanu ana a me ka ohi ana, a me ka hoiliili ana i na hua ai iloko o na hale papaa, aia nae, aole ke Akua i waiho wale ia lakou e make i ka pololi. Aka, ua aloha ke Akua ia kakou i oi aku i ko na manu liilii, no ka mea, he uhane ko kakou.
          Ua uwe aku na manu i ke Akua, a ua lohe mai oia ia lakou, me ka haawi mai ia lakou e huli i ka lakou ai.
          Ina aole he ai a kou makuahine iloko o ka hale, a ina aole he dala ana e kuai ai i wahi ai, e hoolohe ke Akua i kana noi ke aloha oia iaia. Aole oia e waiho wale iaia e make i ke pololi. E noi mau aku kakou i ke Akua i ai na kakou i kela a me keia la, penei: "E haawi mai i ai na makou no keia la."
          E pono kakou e hoomaikai aku i ke Akua no ka ai a kakou e ai nei: mamua o ko kakou ai ana i ka aina kakahiaka, ka aina awakea a me ka aina ahiahi, e olelo kakou, "E mahalo ia oe, E ka Haku, no keia ai maikai a makou e ai nei."

KA ELA KUMUMANAO
NO KE KAUOHA HOU.
"HE KAUOHA HOU KA'U E HAAWI AKU NEI IA OUKOU, E ALOHA KEKAHI I KEKAHI.—IOANE XIII; XXXIV."
MOKUNA V.

          E like me ka makani iloko o na laau paina, ka leo mele i hohola ae me ka hoopiha ana ae i na paia lai ku o ka lewa me ke anoano, a hoakoakoa mai la i ka manao hooikaika i ke kino, a hiki i ka nalohia ana o na leo e ae iloko o ka eehia me ka ilihia o keia leo mele. Ua hoakoakoa mai la na kamalii a kokoke i ka ipuka o ka luakini, me ka hoolona ana i keia leo mele me ke kahaha nui a me ka olioli. Ma ka pau ana ae o keia kani ana o ke mele, ua meha iho la no kekahi manawa ke anaina e hoolohe ana.
          He leo mele kupanaha kela, wahi a Frank i kamailio aku ai ia Ela me ke akehele ; he leo mele hoohoihoi maoli kela.
          A owau hoi la, aia e ala hou au me kou ano, alaila au e maha io ai, wahi a Ela e namunamu ana, ka mea hoi nona na maka i piha i na kahawai waimaka.
          Owai la? wahi a Dr. Bowen me Mr. Morton i puana like mai ai i ka wa hookahi, me ka hele ana aku e nana ia loko o ka luakini.
          Ua meha nae, oiai o Miss Ellis e pani iho ana i ka ogana, a e hoi iho ana o Mrs. Conway ilalo o na alahele me na hiona o ka hoihoi me ka olioli. Aole anei he nani maoli? wahi ana i hawanawana mai ai. Ua lohe anei oe i kekahi leo me keia? a ua manao anei oe o keia leo mele ua puka mai ia mai ko kakou ogana mai?
          Ua ike nae oe i kela lede? wahi a Dr. Bowen.
          Ae, oia ka mea hoomalu i na keiki, o Miss Kate Ellis; aole au i lohe mua iaia e mele ana mamua. He keu aku o ka maikai.
          Ua pii aku la o Ela iluna e kamailio pu me Miss Ellis, a ua komo kuhohonu ia laua iloko o na haiahi olelo ana. A na keia mea i hoi hou aku ai o Miss Kate i ka ogana, a hoomaka aku la e hookani i ka haawina a Ela i haawi 'ku ai iaia, me ka hoomaamaa ana i na himeni a me na leo hoano no kekahi la ae. Ua lawe mai la o Ela i ka ahewa ana mai iaia, no ka mea, ua maa oia i ka hookani ana iloko o ka luakini.
          He kahunapule ko'u makuakane, a ua maopopo ia oe, a o ka'u hana hoi ka imi ana i ka mea e pono ai ka luakini, wahi ana.
          Ano hoi, he kuleana kou e hana i ka mea e pono ai ka luakini a me a'u pu, wahi a Ela me ka aka. Ua mauiha loa ia au i na Sabati a pau ke hoomaka au e hookani, no ka mea, aole he maikai loa o ka'u hookani ana,—a he oiaio keia,—a ma ka pakela hooikaika me ka hoomanawanui e pono ai wale no, me ka okupekupe ole. Nolaila e hookani oe i kekahi manawa, aole anei?
          Ua hiki ole ia Miss Ellis ke hoole aku i ke noi a Ela, a mahope iho o ka pau ana o ka hoike ia ana o na kamalii,—ua hoomaka ia ka malama ia ana ma ka Poaono, no ka mea, o ka poe e noho ana ma kahi mamao, ua ike lakou i ke kupono ole ka hele kakahiaka nui ana mai ma na la Sabati, me ka ae e kukulu ia na hana ma ia hope aku,—hoomaka iho la ke anaina himeni e halawai, malalo o ke alakai ana a me ka hooponopono ana a Ela, piha kui ae la kahi ogana me na leo mele ilihia a kekahi i moeuhane ole ai mamua. Ua hoopiha ia ka papa himeni me ka hoihoi; ike aku la o Ela mai na helehelena mai o Kate, i ka piha hauoli no ke kulana i loaa iaia, no ka mea, o kana mea hialaai loa o ka leo hone o ka ogana; ua hoopiha ia hoi o Mrs. Conway me na manao huna o ka haaheo no ke talena i loaa aku ia Ellis; a ua hoomama ia aku ka haawe kaumaha mai ia Ela aku, a ma na hana aloha ana i hana ai, ua haawi aku oia i kekahi mea e hoohoihoi nui ana i ka manao mehameha o Ellis. Kaomi iho la ia i ka manao lili i ulu ae iloko ona, iaia i lohe aku ai i ka leo pumehana o ka eehia e ukali hele ana mahope o ka leo mele a Miss Ellis, me ka nui o ka hauoli i ka hui pu ana aku o Kate me ka eleu e lawe i kona wahi me he mea hookani ogana la.
          Ua hoopuka ia mai na mele maikai mai ka papa himeni mai, a hoi aku la ke anaina uuku i akoakoa mai i na home, a ua hoohauoliia ka manao o na kamalii no na mahalo me na hoomaikai ana a ke Kauka no ko lakou hoolohe i ka hoopaa ana i ka lakou mau haawina, a o ka poe makua o ke anaina anoano, ua loaa he pakui hou no ka papa himeni o ko lakou luakini.
          Ua hooluolu nui aku ka leo mele a Kate ia Helena, a ua oluolu oia e apo aku ia mea, oiai aole e hiki ia Ela ke hookani a maikai. Malia paha o ka maikai o ke mele ka mea nana i haawi aku iaia e nee ae i kulana okoa mai ka loli ana ae o kona mau manao, ka mea hoi i hoike ia mai ia ahiahi i na manao oluolu me ka haahaa i kona mau kaikunane a me Lile. Malia paha aole oia i ane haalele i ka manao ana ae e malama i ke kauoha hou, a e lilo iaia ka leialii o ke ola. He mea kekahi nana i hooluolu iaia, a ane pilihua, i ua ahiahi Poaono lai ku la, a ua naue au oia i ka pule i kekahi la ae, me ia mau manao hookahi no.
          Ua hoea mai la no ke kakahiaka Sabati me ka nani a me ke ea maikai. A ua hoopiha ia ka luakini e like me ka mea mau, a manao iho la o Ela aole oia e pono ke hookani imua o ke anaina kanaka nui. Ua ane aloha aku o Ela ia Miss Ellis, a hoomaka iho la ia e hoino iaia iho, aka i kona ike ana 'ku i ka hololea o kana hana me ka piha i ka hauoli i na mele halelu i maa mau  a me na himeni. Aka ma ka hakilo ana aku i ka helehelena o Miss Ellis, ua hoike mai oia i kona hauoli, me ka haalulu ole e like me ka mea i maa mau ka loaa ana ia Ela iaia e noho alakai ana no ka papa himeni.
          I ka pau ana ae o ka himeni ana, haliu like aku la ke anaina a nana aku la i ke Kauka iaia i ku mai ai e hoike i kana poolelo.

          "Ua kaupaona ia oe ma ka mea kaupaona, a ua ike ia kou mama ana"—oia ka hoahewa ana o ka mea hookuli i ka leo o ka Pono.
          "Ua kala ia kou mau hewa, o hele a mai hana hewa hou aku."—oia ka leo aloha a ka Haku i ka mea i mihi; he leo hoola.

HAAWINA KULA SABATI.
NO KA HAPAHA ELUA.
HELU 1.—SABATI, APR. 1.
KUMUHANA.—Ka mahuahua ana o ka aila.
PAUKU BAIBALA.—2 Na Lii 4:1—7.

O KEKAHI wahine no na wahine a na haumana a ka poe kauila, auwe aku la oia ia Elisai, i aku la, Ua make kau kauwa o kuu kane; a ua ike no oe, ua makau kau kauwa ia Iehova: a ua kii mai ka mea i aieia kana e lawe aku i kuu mau keikikane i mau kauwa nana.
2 I aku la o Elisai ia ia, Heaha ka'u e hana aku ai nou ? e hai mai oe ia'u, heaha kau mea iloko o ka hale? I mai la ia, Aole kekahi me i au kauwawahine iloko o ka hale, hookahi ipu aila wale no.
3 I aku la ia, E hele oe, e noi aku i kou mau hoalauna a pau i na ipu nou, i na ipu kaawale hoi; mai noi uuku.
4 A i kou komo ana mai iloko, e pani aku i ka puka mahope ou a mahope o kau mau keikihan, a e ninini ae maloko o ia mau ipu a pau, a hookaawale i ka mea i piha.
5 A hele i mai ona aku la, a pani aku la i ka puka mahope ona a mahope o kana mau keikikane, na mea i lawe mai ia ia, a ninini iho la ia.
A piha na ipu, i aku la ia i kana keiki, E lawe hou mai i ipu. I mai la kela ia ia, Aole ipu i koe. A mau iho la ka aila.
7 Alaila hele ia a hai aku i ke kanaka o ke Akua: i mai la kela ia ia, E hele oe, a e kuai aku i ka aila, a hookaa aku i kau aie, a e ola oe, a me kau mau keiki i ke koena.
Pauku Gula. E hiki no i ke Akua ke hoonui ae i na mea maikai a pau ia oukou. 2 Kor. 9:8.
Mele.—Him. 321, 8—6. Leo.
1
Pomaikai e, ka Haku e,
Na kauwa pono au;
O oe ko lakou Alakai,
A maluhia mau.
2
Maanei, a mau na aina e,
Nau lakou e hanai;
Ma kahi ino, wela, mai,
Nau no e pale ae.
Pule no na kauwa a ke Akua, na misionari, kahunapule, kumukula Sabati, &c.
Na Ninau a na Kumu.
Haalele kakou ia Elisai ihea? mok. 2:25. Owai ke lii o ka Iseraela? mok. 3:1. Heaha kekahi hana pono a Iorama? p 2. Hoo-
pili nae oia i na hewa owai? p 3. Owai ke lii o Moaba, a heaha kona hookupu no Iorama? p 4. Ua aha Mesa ia Iorama? p 5. Kii Iorama ia wai e hele pu me ia e kaua aku ia Mesa? p 9. Heaha ka pilikia? p 9, 10. Owai ke kaula i hoopiiia e kokua? p 11, 12. A ninau ia Iorama pehea? p 13, 14. Heaha hoi ke kauoha a me ka olelo hoolana a Elisa ? p 15—19. Heaha ka hana kupanaha a me ke kuhihewa ana o ke lii o Meaba ma? p 20—23. Heaha ka hope o keia kuhihewa? p 24, 25. I ka hooikaika ana o Mesa e hoopakele ia ia iho a hiki ole, heaha kana hana ino, me ka hope o ia hana? p 26, 27.
Mok. 4. P 1. He wahine aha keia e auwe ana ia Elisai? Ua manaoia, ka wahine kane make keia a Obadia, ke kauwa a Ahaba. He kane aha keia? 1 makau, hoomana ia Iehova. 2 Ua nui kona aie. Ina o Obadia keia kane, no ka hanai ana i kela mau kaula he 100 kona aie ana. Heaha ka pilikia o keia wahine? Pehea ke kanawai no ka aie a ka mea ilihune? Oihk. 25:39—42. Hana aloha ole ea keia haku. Pehea Mat. 18:25?
P 2. Heaha ka ninau a Elisai a me ka haina?
P 3. Heaha ka hana e hana'i ua wahine nei? E noi uuku anei? e noi nui paha.
P 4. Owai ka i komo pu me ka wahine iloko o ke keena? a pehea e hana'i?
P 5. Ua hana anei ka wahine e like me ke kauoha?
P 6. Ua piha anei na ipu i ka aila? a i ke kauoha ana i ipu hou, pane na keiki pehea? Pehea hoi ka aila? Ina he mau ipu hou, pau anei ka aila? Ua noi uuku paha, ea.
P 7. I ka hai ana ia Elisai, ua piha na ipu i ka aila, heaha kana kauoha? Pau ka pilikia o ka wahine me na keiki, ea. Heaha kekahi hana like a Elia i hana'i mamua aku? Heaha hoi kekahi hana like a oi aku a Iesu i hana'i mahope loa iho?
Mele.—Him. 323, 7. Leo.
1
Lawe i na mea a pau
A hoike ia Iesu;
Na iini, na manao,
E hoike aku no.
3
Na kaumaha, na luuluu,
E hoike ia Iesu,
Lohe ia a uwe pu,
Launa a hoomaha no.
Na Ninau a ke Kahu.
Na makua. Make Ahazia, owai kona pani? Owai Iorama? He keiki anei ia na Ahazia? he kaikaina paha? Mahea kona like ole me kona makua? Hoopili nae oia i na hewa a wai? Heaha ia mau hewa? Owai ke lii i kipi ia Iorama? Pehea ka nui o ka uku makahiki o Mesa ia Iorama? Ehia alii i hele aku e kaua ia Mesa? Pilikia lakou i ke aha? A hoopii lakou i ke kaula hea? Ina aole owai me lakou, aole e pane aku Elisai? Pehea i lanakila'i Iorama? Heaha kekahi hana ino a Mesa? No keaha i mohai ai oia i kana keiki hiapo? I kokua mai paha kona akua, Kemosa, ia ia. Owai ka i hana ino ia lakou iho i kokua mai ko lakou akua Baala ia lakou? Owai ke keiki hiapo i mohaiia i kalahala no kanaka?
Na keiki. Heaha ka hana mana hope a Elisai i hana'i? Ehia keiki i haehae ia a weluwelu i na bea wahine elua? No keaha? Heaha kekahi hana mana a Elisai mahope iho? Ke noi ana i ke Akua no ka wai, a loaa no a kahe nui me he muliwai la. A i ke kau ana o na kukuna la maluna o ia muliwai a ulaula mai la, kahi na enemi Mesa ma, heaha ia? he muliwai koko. Ua pepehi Iorama ma ia lakou iho. A lilo ia kuhihewa i aha? i mea e make nui ai na enemi.
He wahine kanemake, ua hoopilikia ia no ka aie a ke kane, a kiiia na keiki kane e hookauwaia; heaha ka hana mana a Elisai i hana ai i loaa ke dala a hookaaia ka aie? Ehia ipu aila ia ia? Hokahi wale no. Noloko mai o ia ipu aila hookahi i hoopihaia'i na ipu ehia? Na ipu he nui wale, a koe no ka aila ma ka ipu mua. Nohea keia aila a nui loa? Pehea ka palaoa uuku, me kahi omole aila o kela wahine kanemake i hookipa ia Elia? He ahaaina mare, aole waina pehea i loaa'i ka waina? He mau tausani kanaka pololi ma ka waonahele, pehea i maona ai ma na popo berena elima me na ia elua, a nui wale ke koena? Pehea e loaa'i ka ai na na uhane he nui wale?
Ke kula a pau. Ma ka hoopili 1. Nui ka pilikia, nui na enemi, na hoomanakii, nui na aie i ka ke Akua, pehea la e pono ai? Pehea la e lilo ai na mea uuku i mea nui? a pau ka aie, pau ka pololi?
Mele.—Him. 459, 6—8, ano e. Leo.
1
Kaei, Iesu ke Li
Ka pahi kaua ou,
A ma kou kaa e—ee,
A holo kaua no.
E hee na puu imua ou,
E pii na awawa a papu.
3
A ma kou mana e
E hina a maule pu
Na kini enemi,
A pio maikai nou.
A ike no ke ao a pau
I kau hana kamahao.
Pule no na aina e.
Haawina no Ap. 8.  2 Na'lii 4:25—37.