Ka Lahui Hawaii, Volume III, Number 3, 18 Ianuali 1877 — Page 1

ʻaoʻao PDF (1.23 MB)

KA LAHUI HAWAII.
"Ua mau ke Ea o ka Aina i ka Pono."
BUKE III.}  HONOLULU, POAHA, IANUARI 18, 1877.  {HELU 3.

KA NUPEPA KA LAHUI HAWAII.

Paiia ma kela Poaha me keia Poaha.
H. H. PALEKA,  Luna Hooponopono.
He pepa i hoopukaia i kela me keia hebedoma no na Ohana a me na Ekalesia o Hawaii; he mea kokua i ka noho pono ana o na ohana, ka maluhia o kanaka, a me na pomaikai kino a uhane o ka Lahui Hawaii. "Aole paonioni; aole haanui; aole hikiwawe ka huhu; aole noonoo ino."
O na Kumumanao a pau, na Nu Hou o kela me keia ano, na Mare, Hanau, Make, e kakau mai i ka Luna Hooponopono, a e paiia no ke kupono.
Aole e aeia ka pilikino, ke kuamuamu, ka hoino, a me ka huhu, a ua makemakeia ka hoohoihoi, hoolana manao, hoonaauao, a me ka hoopono.
He $1.75 ka auhau o keia pepa no ka makahiki, a he $1.00 no ka hapa makahiki.
E hookaa mua ia ka auhau o ka pepa mamua o ka loaa ana i kekahi mea makemake e lawe.

NO NA OLELO HOOLAHA.

E lawe ana keia pepa i na Olelo Hoolaha a na makamaka, e like me ke kupono, a e lawa pono ai hoi me ka hoohaiki ole i ka huina o na kolamu kukulu manao, no ka uku haahaa.
O kela a me keia makamaka e makemake ana e hoolaha, e hele mai ma ke keena a e hui pu me ka Luna Hooponopono.
Aole e paiia kekahi Olelo Hoolaha ke ole e hookaa mua ia ka auhau.
Eia kekahi, ke noiia aku nei na makamaka e hoouna mau mai i na mea hou; mai hooloihi loa i na palapala; e hai pololei mai i na manao me ke kuawili ole, a e kakau mai me na hua moakaka.
H. H. PALEKA,
Luna Hooponopono.

E. STREHZ,
[AILUENE]

MALAILA E LOAA AI NA ANO LAAU A pau; a me na wai hoomaemae o kela a me keia ano. E hamama mau ana ka ipuka ma na po Poaono a pau. Ma ke kihi o Alanui Papu a me Hotele, ma Monikahaae.  1 1y

S. B. DOLE.

LOIO a he Alakai ma na mea pili Kanawai. Ua makaukau oia e pale i na hihia imua o na Aha Hookolokolo a pau o keia Aupuni, me ke kakau ana i na Palapala Pili Kanawai, ma ka olelo Hawaii a ma ka olelo Beritania.  1 1y

Eia ke ola! E kipa!

          OWAU o ka mea nona ka inoa malalo iho, ke kahea aku nei au i na mea a pau, kanaka, haole, pukiki a me ka pake i loaa ka lakou mau keiki liilii i ka mai, e hele mai ma ko'u wahi noho, ma ke alanui Kamika, e holo ala makai o Kaumakapili, a me na kanaka makua, i loaa i ka mai Pake, e haawi no au i na laau e ola'i na kamalii liilii a me kanaka makua. Ua ike ia ke ola e ka'u mai e ko Lahaina, e Nahoke, Aholo o Maui a me Kuihelani o Wailuku.  2-4t*  LOHEA (Pake.)

Wai Hui o ka Hau!

          E IKE IA ka Hale ma ka inoa o "BONANZA" Ke haawi ia aku nei ka poloai i na makamaka keonimana a me na lede o ke kaona Alii, e kipa ae ma ka hale hookipa inu wai momona o ko oukou makamaka nona ka inoa malalo iho, a e loaa no ka hau i hoomomonaia (ICE CREAM) na wai momona o na ano a pau! hoohuihui ia e ka hau iniki o Nuuanu. O keia hale, he hale i hoomakaukauia no na keonimana a he keena nani i hoomakaukau ia no na lede. E kipa mai, a o ka makepono me ka oluolu ke haawi ia'ku, oiai, he makamaka, a he kamaaina no Hawaii nei o  JOHN W. CROWELL.
2-1 y  (Keoni Koloela.)
Ma ka Hale "BONANZA" ma alanui Moi, mawaena o ka hale kahi umiumi a me ka halekuai o Dillingham ma.

C. H. DICKEY, (Kale Kika,)
LOIO!

A he Luna Kepa i apono ia e ke
Aupuni no ka Apana o Makawao, Maui Hikina.
E HELE NUI mai ka poe a pau i loohia ia me na pilikia pili Kanawai o ka "Ua-ukiu" nei, a na ko oukou makamaka oiaio no e kokua a e hooikaika e hoopau i na pilikia ma na ano a pau o ke Kanawai.  17-1y.

E. O. HALL & SON
[E. O. HOLO MA.]

NA MEA KUAI I NA MEA MAHIAI
NA LOLE, PENA, AILA,
—A ME—
NA ANO LAKO E AE A PAU.
Kihi o Alanui Papu me Moi.  1-1y

Hoolaha Hoopau Hui.

O KA HUI I IKE IA MAMUA AKU NEI MAloko o keia kulanakauhale, mawaena o E. B. FRIEL a me R. W. LAINE, a i hoomaopopo ia hoi ma ka inoa hui o Friel & Laine, kuai mea ai, ua hoopau ia ma ka ae like ana. O na bila a pau i aie ia aku, a i aie ia mai, e hookaa ia, a e uku ia e E. B. Friel, ka mea e hoomau aku ana ma ke kahua kahiko, alanui Papu, Helu 52, ma ka Hale Mu, kahi hoi ana e makaukau mau ai a halawai me ka oluolu me na makamaka e makemake ana i na ono o kela a me keia ano.  E. B. FRIEL.
Dekemaba 30, 1876.  1 —1m

PAPA, PAPA.
AIA MA KAHI O
LEWE RS & DICKSON
(O LUI MA.)

KE KAHUA KAHIKO MA
Alanui Papu a me Alanui Moi
E LOAA AI NA
PAPA NOUAIKI o kela a me keia ano.
NA PAPA NANI
A PAA NO KE KUKULU ANA I NA HALE.
Na Pani Puka,
Na Puka Aniani,
Na Olepelepe,
Na Pou, na O-a,
Na Papa hele,
Na Papa Ku,
Na Papa Moe.
Na Pili o na ano a pau!
NA PEPA HOONANI,
Na PENA o na wai a pau
Na Kui mai ka nui a ka makalii,
Na Ami-puka,
Na Ami-puka Aniani,
Na Ami o na ano a pau,
NA AILA PENA,
NA AILA HOOMALOO,
NA AILA o na ano a pau.
NA VANIKI
Na mea HOOHINUHINU o na ano a pau.
Na Balaki o kela a me keia ano.
A KE HAI IA AKU NEI KA LONO i na makamaka a pau, ua makaukau keia mau hoa o oukou e hoolawa aku ma na mea a pau e pili ana ma ka laua oihana
—NO KA—
UKU HAAHAA LOA!
like me ka mea e holo ana mawaena o LAUA a me ka MEA KUAI.
E hele mai! E na makamaka!
A e lawa no hoi ko oukou makemake me ka oluolu
1]  a me ka maikai.

I Long to go.
Gospel Singer p 26.

1
He aina nani maluna'e,
He home oli aloha e ;
Kaawale ae na mea luuluu;
Malaila kuu iini mau.
C ho.—Kokoke mai no ka wa hele o'u,
A e kii na anela e kai aku ia'u
I o Iesu e noho pu,
A oia kuu iini mau.
2
Maanei ka u waimaka no,
Ka make o na hoa o'u;
He ola nae a mau ma o ;
Malaila kuu iini mau.
C ho.—Kokoke mai no, & c.
3
Ma o na pua a pua mau,
Aala no, a lai na lau,
Aohe wela, aohe hau ;
Malaila kuu iini mau.
Cho—-Kokoke mai no, &c.
4
Ma o pa mau na oli e
Mai na puu gula a kahakai.
Aohe leo kanikau ;
Malaila kuu iini mau.
C ho.—Kokoke mai no, &c.
5
Ma o ke ku la kuu Iesu,
Poai na kini a mele pu.
Iini au, iini mau
E pii a mele me lakou.
Ch o.—Kokoke mai no, & c.
HAWAII.

KA NANEA EEHIA!
—O NA LA—
I AU WALE KA MANAWA
—A O KA—
HIHIO ILIHIA A KA UI
LEON ROSE!
—NO NA—
KOA KAVALIA OPIO!
—NA—
SEPANIA EKOLU!
He Nanea Walohia o ka Weli Eehia.
MOKUNA II—HELU 3.

          O KA la, i keia manawa, ke ane haule aku la malalo o ka ilikai a haalele mai ia maua. Me ka nani olino o kona mau kukuna i iho malie aku ai. Pii mai la na ao uli panopano ma ke kihi komohana o ka moana, a i ka poha ana mai o ka ula o na kukuna la maloko mai o ia mau ao, i kona aneane ana 'ku e haule, ua hooleiia'e la ka nani olino maluna o ka ilikai a haule aku la maluna o ka aina, a he nani kamahao ka maua i ike ia manawa. Ke lawe mama nei ka makani ia maua, a ke hoomaka mai la na ale e hanupanupa, a no ko maua ano malihini i ka holo moana, a no ke ano uuku o ko maua wahi halelana, ua hilahila ole au i ka hai ae, ua ane kau mai la no ka halia weli maluna o ko maua mau manao koa. O kekahi mea hopohopo, oia no ka nui o na koa enemi e hoopu ana ma kae o ka muliwai, o ko lakou ike mai ia maua, o ke ki pu mai no ia.
          Aole no i liuliu mahope iho o ka huna ana 'ku o ka ilikai i ka malamalama o ka la, aia hoi, ua hoomaka mai la na pakaua nunui e helelei, a haule kuaua nui iho la maluna o maua. Ua makemake nui e hoopae aku i kahi waapa i kula, aka, no ka nui loa o na lae aa, ua hoomanawanui iho la no, mamua o ka hekau ia ana 'ku a lilo he mau apana liilii e ka inaina o ke kai a me na aa wakawaka.
          He hapa hora paha mahope iho, aia hoi, ua hoomaopopo aku la maua maloko o ke ano powehiwehi o ka po, i kekahi kahuhale Kakela o ka poe Moorish, e ku ana ma kae o kahakai. O luna o ua hale nei, oia mau no ka maikai, a o lalo iho, ua helelei a ano pau i ka nahaha no ke kahiko. Ke mau nei no ka ikaika o ka nu a ka makani, a me ka haule ana o na pakaua ; a no keia mea, ua hooholo iho la maua e hoopololei aku i ka ihu o kahi waapa i ua hale nei, a e imi i wahi e malu ai. Aole no i liuliu loa mai ka hoopololeiia ana'ku ilaila, aia hoi, ua pae maalahi aku la maua iuka, mamua pono o kekahi wahi ipuka e hamama mai ana. Hauhoa ino iho la i ke kaula o ka waapa a komo aku la. Uhi iho la ka pouli paa a puni maua, a me na lima i kuikui ia, a me na pahikaua i hoopololei ia imua, hoomaka aku la e hele. Ua hoomau aku maua i ka hele makapo ana iloko o ka pouli ma kekahi alanui olowi a kuia mai la i kekahi alapii e pii ana iluna, noonoo iho la i ka mea pono e hana ia, a hooholo iho la e hele aku no imua a ike pono ia ke ano o keia hale, no ka mea, ua kau mai la maluna o maua ka lia ilihia o ka weli no ke ano e o na hiona a pau. Hoomau aku la maua i ka pii ana, a i ka hiki ana iluna o ka papahele, ua puiwa'e la au i ka hopu ana mai o Fenado i ko'u lima, a pane mai la me ke ano pihoihoi: Alia, aole anei ou lohe i kekahi mea ano e?
          Ano, wahi a'u, me ka puiwa, heaha kau mea i lohe aku la? A owai keia e paa nei i kuu lima, e hai mai o make ano!
          Aohe mea e, owau no, wahi a ko'u hoa. Me he la ua lohe aku nei au i kekahi mea ano e, a ua puiwa'e la.
          A, he oiaio, me he la ke lohe io aku nei no au e like me kau e Fenado, wahi a'u, me ka hoolono ana'ku, oiai, ua ane lohe aku la no au i kekahi leo ano haalulu mai lalo ae. E hoi kaua, wahi a'u i kuu hoa, a e hoao hou i ka ino a me ka makani mamua o ka noho ana iloko o keia pouli me ka ike ole i na ano. Onoi paha he hale keia no ka poe powa.
          Aole, aole, wahi a Fanado, e hele aku kaua imua a e make a i ole e lanakila, e hoomanao oe, ua lawe kaua he aelike ana e hele imua ma keia huakai, a mai ae e wiwo mamuli o ka pouli.
          Na keia mau huaolelo i hapai hou ae i ka manaolana iloko o'u, a pane aku la. E hele aku imua, a ko ko kaua mau manao. O keia rumi, he keena nui, me he la o ka rumi hookipa ia o keia hale Kakela i na la kahiko, a ku iki iho la maua, e hoolono ana i ka hu ae o ka makani mawaho, a me ka nakulukulu o na paia i ka ua mea o ka nakolo o ka hekili. Anapa mai la ka uila, a komo mai la kahi malamalama uuku ma kahi puka aniani, a ike aku la maua i na mea o loko o ua rumi nei no kahi manawa pokole loa a nalo koke iho la no. He koki a he mau noho ua pau i ka nahaha ke waiho ana. Nee malie aku la maua e haha ana a loaa'ku la ke koki, a noho iho la ilalo, me ka nune ana i ke ano e o keia hale. Me he la e lohe mau ana maua i na leo kanaka e pu-a mai ana maloko o na paia, a kaalo ae la maluna o ka welelau makani a nalo loa'ku la. Ke malie iki iho ka halulu ana a ka hekili e lohe aku ana maua i ka nakulu mai o ke kai, e noke ana i ka hae me ka inaina nui o ka makani, a e haule hala ole iho ana ka ua me ka ikaika nui. Owaka mai la he lapa uila a ike aku la maua i kekahi mea e waiho ana ma ka papahele. Heaha kela, wahi a Fenado. Heaha hoi, wahi a'u. E hou aku i ka pahi, mai paha he powa e kali ana o ka manawa kupono, a hoeha mai ia kaua. Aole pono oia hana ana, wahi a Fenado, a hele aku la maua a hiki i kahi o ka puolo me ka nihi o na kapuai wawae.
          Me ka lima haalulu o Fenado i lalau iho ai me ka manao he kino kanaka keia mea a maua i ike iho ai, aka, hoomaopopo koke iho la he puolo ka. Lalau iho la a hapai ae, e paa ana he apo ili, a oki ae la ia i ua apo ili nei, lohe aku la maua i ka haule ana aku o kekahi mea kaumaha iluna o ka papahele. A! wahi ana, heaha kela mea a'u i lohe aku la. He waiwai nui paha i aihue ia e na powa, a ke hoomakakiu mai nei ia kaua, wahi a'u, me ke ku makaukau ana ke lele ia mai. I hehi hou aku ko'u kapuai imua, a pa ana kekahi mea i kuu wawae, a i lalau iho ana ka hana, aia hoi, me ke kahaha nui, loaa iho la he pahi puhaka. Haha iho la au i maopopo ai ka laula a me ka loa, a ike iho la ua paapu me ka lepo hao. A! he pahi puhaka ua hele a paumaele i ka lepo hao, wahi au i pane aku ai ia Fenado. Ae, wahi ana, ua oki loa io aku la i ka lepo hao, oiai, ua hou ia paha e ka lima menemene ole o ka powa iloko o ka umauma o kekahi mea hewa ole; homai ia'u, a na'u e malama. No ko'u ano makahehi i kona ano koa, ua haawi aku la au i ua pahi nei iaia.
          Ua hoea loa aku la maua iloko o na hora liilii o ka po, a ua nui loa mai la ka ikaika o ka makani, a pane aku la au i ko'u hoa'loha. Ke makau nei au e pau ana ko kaua wahi waa i ka nahaha, a pehea la auanei kaua e hiki hou aku ai i Garanada.
          O ka mana hookahi no nana i lawe mai ia kaua, oia mana no ke hoihoi hou aku ia kaua, wahi a Fenado.
          Ua paa anei kou manao, wahi a'u, he mana honua ka mea nana i iawe mai ia kaua a hiki i keia wahi. Ae, wahi ana, me ka hoopau koke ana ae i kana kamailio ana, me he la, e noonoo ana no kekahi mea kahiko i komo mai iloko o kona mau hoomanao ana.
          A ke manao nei oe he mea mana no kahi o ka honua nei e hiki ana ke kau iho i kona makemake maluna o kahi mea a e hookoia ? wahi a'u i ninau hou aku ai. Ae, he kuleana ko'u e manao ai pela, e kuu hoa'loha, a he mau kumu hoi e hooiaio iho ai oe ; wahi ana.
          Ina pela ke ake nui nei au e lohe, a oiai no na makahiki loihi he umikumamalima i hala'ku la, ua alo pu kaua i na inea a me na pomaikai, ke manao nei au ua huna oe ia mau mea ia'u, a he mea pono e hai mai ia'u.
          Aole mamua'e au i hooikaika nui ai e poina i ka'u mau mea e noonoo aenei e like la me keia manawa, aka, ma ka loaa ana iho nei o keia mau mea kupakaha, ua hoi ino mai nei na hoomanao ana, a ke hoolauwili nei ia loko o'u. E kamailio aku no au me ka leo mama nae, oiai ua maopopo no ia'u ke noho ia nei keia wahi, aka, e ke ano oia mea, h e poe ola paha a he poe paha o ka po, aole ia i maopopo ia'u.
          Ke hoomanao nei no anei oe, wahi ana, eiwa mahina i hala'e nei, i keia la hookahi no, o ko'u komo ana'ku ia i na makahiki o ke kanakamakua? A ua hoomakaukau kaua e malama ia la me ka hauoli ana mawaena o ko kaua mau hoa'loha, aka, ua hoopau koke ia ia mau manao mamuli o ka loaa ana mai o kekahi kauoha e hele aku au ma na ululaau ma ke ano kiu i na enemi? Aole anei ou hoomanao i ke ano lena o ko'u mau helehelena a me ke ano omaimai, a i kou ninau ana mai i ke kumu oia mea ua hai hoopunipuni aku au, o ke kumu oia ano e no kou, loaa ana i kekahi ulia omaimai?
          Ae, wahi a'u, ke hoomanao nei no au me'he la i ka la no inehinei. A owau kahi e hoomanao nei, wahi ana, a aole no e poina ana a make au.
(Aole i pau.)

HAIOLELO A KA HON. G. W. PILIPO

ma ka La Kuokoa, ma Holualoa, Kona Akau, Novemaba 28, 1876.
          E KA LUNA HOOPONOPONO O KA LAHUI HAWAII; Aloha oe:—Malalo iho ke noi a na makaainana o ka apana o Kona Akau, Hawaii, ia ka Hon. G. W. Pilipo, e haawi mai i kope o kana haiolelo ma ko makou lima, i pai ia ai ma ko kakou nupepa.
          "I ka Hon. G. W. Pilipo, aloha:—Ma o ko makou ike a me na hoomaopopo ana, ua ku kau haiolelo o ka La Kuokoa o Hawaii nei, Nov. 28, 1876, i ka naauao a me ka waiwai, ke noi aku nei makou e haawi mai i kope, a e ae ia makou e hoouna aku ia MR. KAHIKINA KELEKONA 'la no ke pai ana maloko o ka nupepa LAHUI HAWAII, ka wahaolelo hoi o ka lehulehu ana e hooponopono wiwo ole nei me ka naauao. Me ka mahalo a me ke aloha. Na makaainana o Kona Akau, ma o K. KAUANAINOA."
          Pane a ka Hon. G. W. Pilipo:—"Me ka hauoli, ke haawi aku nei au he kope na oukou, a e hana elike me ka makemake.
Aloha,   G. W. PILIPO."
          E na hoa makaainana:—Ua loaa ia'u ka hanohano o ka hoike ana aku imua o oukou no ke kumumanao i kupono i keia la. Eia kakou ke ku nei i ke 33 o na la Kuokoa i hiipoi ia e na puuwai o ka poe aloha aina oiaio.
          KA IMI ANA I KE KUOKOA.—I ke au ia Kamehameha III, ua hoouna ia o W. Rikeke a me T. Haalilio i mau Komisina Mana Nui e imi i ke kuokoa ana o Hawaii, ua alo i ke anu o na moana kai lipolipo, na mauna hau huihui o Aneti Amerika ; ua hele ia e laua keia mau wahi loihi me ka luhi nui o laua. Ua kipa ia e laua ke alo hanohano o Amerika no keia mea nui, a ka Haku o ka aina i hoouna aku ai no keia hana nui.
          KE ANO KUOKOA I AEIA MAI E AMERIKA.—Ua ikea mai kakou ma o ka Peresidena e noho ana ia wa, a ma ona la wale no kakou i hoapono ia mai ai, elike me kekahi palapala e hooiaio ana mai iaia mai i ko kakou noho kuokoa ana: a ma ia palapala, aole no i huipu ka Lahui, a o ke aupuni hoi iloko oia palapala, oiai, aole e noho ana ka Ahaolelo oia aupuni i ka wa i hiki aku ai ko kakou mau Elele.
          KE ANO KUOKOA I AE IA MAI E BERITANIA NUI A ME FARANI.—O ka la 28 o Novemaba, M. H. 1843, ka manawa mua loa i loaa pono mai ai ia kakou o ka ae ia ana mai o ke Aupuni Kuokoa piha, ma na Mana piha oia mau aupuni nui. He nani i ka lokomaikai a me ka oluolu. Ua hoohiki laua, aole loa kekahi o laua e lawe i ke kauwahi o keia mau mokupuni ma ke ano kuokoa, a ano okoa e ae paha. Ua paa hoi ia mau mana nui e kokua i ke kulana aupuni nui kuokoa o Hawaii nei ke kue ia mai. A o kekahi o laua, a o laua hui paha, e pale aku i ka mea e keakea mai ana i ko Hawaii kuokoa, a he mea ia e akaka ai, he mau makamaka ia e kokua mai ana ia kakou i ka wa ino.
          KE ANO AUPUNI KUOKOA O HAWAII.—Aole no ka nui o keia aupuni, aole hoi no ka nui o ka heluna kanaka i loaa mai ai ka ikea ana mai ia Hawaii he Aupuni Kuokoa, aka, no keia mau mea : 1 He heluna aupuni i ikea, a i helu pu ia hoi me na aupuni nui o ka honua nei. He mea liilii loa kakou, me he wahi kiko liilii la iloko o ka moana, elike me kela kiko makalii iloko o kela Palapala Aina, (kuhikuhi aku la i kekahi Palapala Aina e kau ana ma ka paia o ka hale.) 2 He heluna Lahui Hawaii Kuokoa. He uuku loa ko kakou huina i ka wa i ae mai ai keia kuokua ana, he 100,000 paha ka nui; a ke hoohalikelikeia keia huina o kakou, ua uuku loa iho ia malalo o kekahi Puali Kaua o na Aupuni Kuokoa e ae. He heluna o na miliona, a o na umi miliona ko lakou, aka, o ko kakou, he heluna o na umi tausani wale no. 3 He heluna Mana Hooponopono Aupuni. Eia me kakou na mana like me ko na aupuni nui, oia hoi, "He Mana Nui Hooko;" oia ka Mana Moi, ma ka hooko ana i na pono a pau a ke Kanawai i kuhikuhi ai. "He Mana Kau Kanawai." He mau Hale Ahaolelo, o ko na 'Lii wale no, a o ko na Luna Makaainana wale no. Malaila i hookiekie ia ai na makaainana, mai ka papa haahaa, a i ka Papa kiekie, a ua kaulike hoi ke kiekie oia mana me ko na'Lii. A ke kanaka lopa hoi i loaa ka naauao e kaena iho ai, "o kuu mana," "o kuu kuokoa," "a o kuu lanakila," "He mana hookolokolo." Malalo iho oia mana i hoonoho papa ia ai ke alanaui a ke kanaka e imi ai i kona pono, a malaila hoi e kau ia ai na kakauha a ke kanawai maluna o ka mea lawehala. "He Mana Noho Like me na Lahui e ma na Kuikahi." Oia ke kaula hoopaa o ka maluhia mawaena o kakou, a me ko kakou mau aupuni makamaka e noho kuikahi nei me kakou. Ma ko kakou aoao, e hana pono aku, a pela hoi ma kela aoaoa mai. He mea e pilikia ai kakou, ke ukali aku i ka kakou mau kuikahi me na aupuni nui.
          NA LA KUOKOA I KE AU O NA 'LII I HALA AKU O HAWAII NEI.—He 11 la kuokoa ia Kamehameha III. He mau la popilikia a kaumaha kona. Oia ka mea nana na Elele imi kuokoa, a loaa ai ka la mua o ke kaulana o ke kanaka Hawaii i ikea mai ai he aupuni ia, me he aupuni nui la. A i ikea mai ai hoi ka Lahui Hawaii me he lahui nui la imua o na Lahui e a kakou i hookuikahi aku ai.
          Iloko o kona mau la, ua kipa mai la kekahi mau pomaikai nui no ka lahui, a lakou i ike ole ai mamua, a o ko lakou mau makua hoi i ike ole ai ia mau manao, a ka Puuwai Hamama o na Lani Lokomaikai lua ole la. Ua haawi mai la oia mailoko mai o kona opu Alii no kona mau Alii, kona mau makaainana, i mau mahele aina no lakou. A owai la iwaena o kakou e hoopoina i keia hana nani a kona Kiekie i makana mai ai no kona lahui. He mea keia, a na makua e ao aku ai i ka lakou mau keiki, a i na moopuna aku, no keia hana maikai lua ole. Ae, he hana keia i hana ole ia e kona mau mua, aole no he mea like ma ia hope mai, aole no ma keia hope aku.
          Ka noho aupuni Kumukanawai—Ma kona aloha, ua haawi mai la oia no kona lahui, i kumukanawai no kona aupuni. He mana koho balota, no ko koho ana i mau wahaolelo no lakou e hui pu me na 'Lii, e kau ai i na kanawai aupuni no kona lahui. Ma ia makana, ua hookiekie ae oia i ka makaainana lopa i mea kuleana pu me ia, no ia pono nui. He hana nani hiwahiwa ia, a ke kanaka Hawaii e mahalo nui ai.
          Ka oihana naauao.—Ua komo nui keia mau mea a pau iloko o kona au, oia mau mea, ka mea nana i kaikai ae i ke kanaka haahaa i ke kulana like me na 'Lii, a me ka poe waiwai. Aole no hoi e hoopoina ia ke komo ana mai a me ka ulu ana, a me ka laha ana o ka oihana Kristiano iloko o kona au, a ua lilo kakou a pau, i poe kuleana pu i ka Hoomana Akua Oiaio.
          A mahope o kona hala ana, ua haule iho la ka lahui me ka minamina nui nona. Aole loa e hiki i kekahi Hawaii oiaio ke hoopoina i kona mau la kuokoa he 11.
          He 8 la kuokoa ia Kamehameha IV. Ua kaulana oia i kona mau la, he kela i ka naauao. Ua kuia ka naauao nui o kona mau Kuhina, a ua hiki ole ma ko lakou ike iho, a naauao hoi, ke hooholo koke i kahi mea ano nui e pili ana no kekahi kuikahi hou e hana ia ana me keia aupuni, a me Farani; aka, nana ponoi i hoike aku i ua Aha la i ka lakou mea pono e hana ai.
          Ua hopo hoi kona mau Kuhina no ko lakou mau lawelawe oihana, a malie paha he mau kekee ana, a e ahu wale ana imua o kona noiau. Ua oleloia nona, e kekahi Kamahele kaahele honua, "He Moi naauao o Kamehameha IV ; na kupono ia naauao e noho Moi maluna o kekahi aupuni nui, a me kekahi lahui nui a lehulehu hoi, aole hoi ia i kupono no keia wahi aupuni uuku, a me keia lahui liilii."
          Ua maluhia ka noho ana o ke aupuni i loko o kona mau la, aole kupua i ala mai mai waho mai, aole hoi i hoea ae maloko nei. Ua komo nui oia e alakai ana i kona lahui ma na hana lima e pomaikai ai, a ua kaulana kona mau la, he Poo oia no na oihana Mahiai.
          Nani ka hiwahiwa o kona noonoo, ma kona waiho ana ae i hana kaulana, ma ka lima palupalu o kana Aliiwahine, ma ke kukulu ana i Puuhonua no ka lehulehu o kona lahui, a ilaila e kanaho aku ai ka poe i loohia e na nawaliwali, na mai o ka poe huna, a hoomaha aku la malalo o ka malumalu o ua home la; a ke ku nei ka "Hale Mai Moiwahine," i Kia Hoomanao no ia hana a ua mau Lani la.
          He 10 la kuokoa ia Kamehameha V. He mau mea ano nui iloko o kona mau la, a he mea hoi i hopohopo ia e kahi poe loea manao, a me kona manao paa, a me kona kuleana oiaio, ana i hooholo iho ai, he kuleana kona iloko o ke aupuni; ua hana iho la oia i kahi mea i kanalua ia e na mea a pau, oia hoi:
          Ka hookahuli Kumukanawai ana. Me ka manaopaa, oiai, ka Aha Elele e kue ana i kona makemake, ua kipaku mai la oia i ua aha, a lawe ae la oia ma ona iho, a hana iho la i kumukanawai hou, a hoohiki iho la iaia iho maluna oia kumu; a onou mai la imua o kona lahui, "Eia mai ke Kumukanawai o kuu Aupuni." Ua lawe ae la oia i kekahi mau pono nui o ka lehulehu, a he mau mea hoi i minamina nui ia e na mea a pau. O ka hoohaiki ana i ka pono koho barota, a me ka hoohui ia ana o na Hale Ahaolelo elua i hookahi Hale. Ka pono ao i na L. M. a me na mea e ae.
          Kona komo kino iloko o na hana lima, a he lala nui oia o na ona mahiko, a me ka hanai holoholona. Kona kokua ana i ka manao o ka poe makemake i Kuikahi Panailike, a he mea hoi i hana ia imua o ka lahui; a ua hoole ia mai la e ke aupuni o Amerika Huiia.
          He kulana hooponopono aupuni kupaa, e hooko ana i kana mea i manao ai, a ua hookiekie ae la oia i kona aupuni uuku, a me kona lahui kakaikahi, ma kekahi mau hana hou ana i kukulu ae ai. Elike me ka Hotele Hawaii, ka Hale Aupuni hou. A ua olelo ae kekahi haole kamaaina e noho ona mahiko nei, "ua oi ae ka hanohano o keia Hale Aupuni, mamua o ke aupuni, a me ka heluna nui o na kanaka, a ua oi loa ae no hoi ka nui, ka nani o keia Hale Oihana Aupuni imua o ke kulana o keia kulanakauhale uuku, mamua o kekahi Hale Aupuni ma kekahi kulanakauhale o Europa i papakolu ae kona nui ia Honolulu nei." Pela kakou i ike aku ai i ko Kamehameha manao, a ua hookoia no ia manao.
          Ua ku lohaloha kona mau Kuhina imua ona me he keiki uuku la. He makau ia kona nanaina, a he weliweli hoi kona leo, a ua mana ma ka olelo ana.
          He 1 la kuokoa ia Lunalilo I. He mau mea nui makamaka hou iloko o kona la hookahi. He mea i maopopo lea, he Moi oia na Hawaii i koho lokahi ai; a ua lokahi pu hoi ka Lahui me ka Ahaolelo Kuikawa o M. H. 1873; a he mea hoi i olelo ia, he Puuwai no ka Lahui, a he aloha hoi na Hawaii.  (Aole i pau.)