Ka Lahui Hawaii, Volume II, Number 45, 2 November 1876 — Page 4

KOMI TE HOOPONOPONO NO KEIA AOAO.

LAIKI MAKUA,  MRS. KELA F. GILIMANA,
M RS. ELENA MAKALE,  MRS. C. C. COLEMANA.

HE PALAPALA

          O na Lede o ka Papa Wahine o Honolulu, ke haawi aku nei i ko lakou aloha i na Makamaka Hawaii a pau, na makua me na keiki.
          Mamuli o ka iini nui o ko makou manao no ka pomaikai piha o na opio Hawaii, ua hooholo makou me Paleka no keia aoao o ka nupepa LAHUI HAWAII, a e kokua makou ma ka hoopiha ana i na kii a me na manao e waiwai ai a e makemakeia'i e ka poe opio, a i waiwai hoi ia no na makua me na keiki.
          Ke kono aku nei makou i na makamaka Hawaii, e kokua pu ma ke aoao ana mai i na mea e pono ai, a me ke kakau pu mai i na manao kupono no keia aoao. He makemake ko makou e kokua ma na mea e lilo ai ka LAHUI HAWAII i pepa e pomaikai ai na ohana, aole nae oia wale no, aka, e lilo keia pepa i kokua nui no ko kakou mau Kula Sabati.
          E na makamaka aloha, ina he manaolana io ko kakou no ka hoomau ia ana aku o ka ekalesia o Kristo ma Hawaii nei, he pono e ala mai kakou ma ka hana Kula Sabati.
          Me ke aloha makou o hoopuka aku nei i keia aoao o ka pepa me ka manaolana e lilo i kokua nui no na home, a no na Kula Sabati, a i apo o ke Kuikahi hoi mawaena o na mea a pau i aloha i ka Haku Iesu Kristo ma keia Paeaina. Me ka mahalo.
LAIKI MAKUA,
M RS. KELA GILIMANA,
M RS. ELENA MAKALE,
M RS. C. C. COLEMANA.
Komi te.

Ko ke Akua malama.

          I kekahi wahine e holo ana maluna o kona kaa maluna aku o kekahi ala pali, ike aku la ia i kekahi pua nani e mohala ana ma ka aoao o kekahi pohaku nui. Lele iho la ia mailuna iho o ke kaa, me ka manao e hehu i kahi pua a lawe e kanu ma kona home. Aka, no ka uuku a me ka hiehie o ua pua la, ike iho la ia, he mea kupono ole iaia ke lawe; no ka mea, ua kolo aku la kona mau aa malalo o ka pohaku o kahi ana e ulu ana. A i ka hoi ana mai o ka wahine a kau iluna o kona kaa, nalu iho la oia iloko ona, "pela o Iesu, ka Pohaku o ka malu, ke hoomalumalu nei Oia i ka poe i paulele Iaia." A pela kela pohaku e hoomalumalu ana i kahi pua, iaia e ulu ana me kona nani, a oia ka mea i olelo ia e ka poe e maalo ae ana, "Iehova Jirch."

He Leo Poloai.

          E na makua a me na makamaka o ke one oiwi o Hawaii, e lawe kakou i ka olelo i kakau ia ma Hebera 6:12—"Aole e hoomolowa ana oukou, aka, e hoohalike ana me ka poe i loaa ka pono i hai mua ia mai ai, ma ka manaoio me ke ahonui."
          Na ka olelo a ke Akua, i hoike mai ia kakou i na mea he nui o ka wa kahiko, ka poe ma ka manaoio me ka hoino ia, ua loaa ia lakou na hoomaikai ana, a pela pu me ka ekalesia. O kakou pakahi a pau, he hana ka kakou no ka hoomau ana i ka olelo a ke Akua a me kona ekalesia ma Hawaii nei, aole nae he like o na hana. E hoopili kakou i ka kakou hana i ka moolelo o Nehemia, ka mea iloko o na la pouli i hauoli ma ka manaoio a me ka hoinoia mai, ka mea nana i kukulu hou na pa pohaku o Ierusalema, a hookumu i kahi hoomana o ke Akua, a ao aku i na kanaka i kona kanawai; nolaila, ua kaulana kona inoa, aka, aole nana wale no i hana i ka hana, no ka mea, ua heluhelu kakou, ua kukulu aku kela a me keia i kona hale iho mawaho aku o ka pa.
          O ka moolelo o Nehemia a me kona poe kokua, oia kekahi o na poino i loaa ma o ka manaoio la a me ka hoinoia. Iloko o ia au, he 42,360 ke koena o na Iudaio ma Ierusalema, a ua oi aku ka nui a me ka weliweli o ko lakou mau enemi i ko lakou heluna. Nolaila, hooholo like iho la na Iudaio, e kukulu i pa pohaku nui, i mea e pakele ai lakou ame ko lakou mau waiwai. O ka mokuna 3, oia ka moolelo o ko lakou hana ana me ka hoinoia. Ma o ka ohana la ko lakou kukulu ana i ka pa, a o ka pauku 12 ka mea nana e hoike mai ka mea nana i hoomalu kekahi hapa o Ierusalema a me kana mau kaikamahine; a mahele iho la i ko lakou kuleana iloko o ka pa pohaku.
          Maluna o Saloma a me kana mau kaikamahine alii ka mahalo, i ka waiho ana iho me kakou na kuhikuhi o ko lakou hoinoia. Ka mea hoi i aloha i kona Akua a me ko lakou aina, a aole hoi i hoomaha ae ko lakou mau lima no keia hana luhi.
          Aole hoi o Hawaii ake i mau pa pohaku e paku ai iaia, o kona mau kanawai, oia ka pa pohaku e hoopuni nei ia kakou a me ko kakou mau waiwai.
          Aka, ina ua palekana o Hawaii, a ua pau ka hana pono maanei, e pono e hana aku; no ka mea, o ka lima palaleha a me na hora i haawi wale ia no na lealea, aole ia he mea e ola ai o Hawaii.
          E like me ka poe Iudaio i ka wa kahiko, i ko lakou hoopakele ana ia Ierusalema, ma ke kukulu ana i na pa pohaka mawaho aku o ko lakou mau hale iho, nolaila, e makaala kakou e na kanaka Hawaii a e hana i ko kakou mau home.
(Aole i pau.)

He nalo wale no.

          Ua hai ia mai anei ia oe na mea kupanaha o ke kino o ka nalo ? Ke manao nei au aole oe i lohe, a aole no paha oe i manao, aole e loaa ana ia oe he waiwai nui ke hoeha oe ia'u.
          Ua haawi mai ke Akua ia'u he mau eheu mama loa, i pili kupono i kuu kino, i hiki ai ia'u ke lele a ke hele ma na wahi a pau a'u e makemake ai.
          Ua hiki ia'u ke hohola ae i ko'u mau eheu, a lele aku me he wahi manu liilii la; a ke upoi ae hoi, a koele wawae ma kahi a'u e makemake ai.
          Ua hiki ia'u ke hele me kuu mau wawae iluna, a o kuu poo ilalo, i like aku ka hele ana, ina iluna o ke pakaukau a i ka papahele paha. Ua like no a like ia ia'u.
          Malia paha, ua kahaha oe no ko'u haule ole. Ua hana ia ko'u mau wawae a kupono, i hiki ai ia'u ke umii ia lakou a paa i kaupaku, a holoholo io a ianei me ke kanalua ole.
          Aka, he opiopio loa oe e ake mai nei e ike i ka'u mau hana ana. E hoike wale aku no au ia oe ano, i hoomaopopo ai oe i ka nui o na mea au e hoopaa ai o na mea a pau a ke Akua i hana ai.
          Ua hoomaopopo anei oe i ka hikiwawe a me ka palamino o kuu lele ana mai ia oe aku, i kou wa e hoomakaukau ana e hopu ia'u.
          Ua ike au ia oe, i ke keikikane a me ke kaikamahine uuku, ia oe e hoao ana e hookolo malu mai i ou mau lima mahope o'u. Malia paha, ua ake oe e ike i ka hiki ana ia'u ke ike. E hoike aku no au.
          Ua manao oe, elua wale no o'u mau maka, elike me kou ; aole, he nui wale lakou, aka nae, aole o lakou oni elike me kou.
          O ka maka hookahi au e ike mai nei ma kuu poo, ua hana ia a lehulehu wale o na maka liilii iloko. He mau haneri ko lakou nui, a ua like lakou me ka maka o ke kui pine.
          Me kekahi o keia mau maka au e nana ai imua, a me kekahi hoi au e nana ai mahope. Me ia mau maka o'u mahope au i ike ai ia oe, i kou wa o hookolo mai ana i ou mau lima mahope o'u.
          Ke manao nei au, ua lawa oe me keia mau hoike, a e noonoo iho oe, mai hoao oe e hoeha i kahi nalo uuku nei.

Ka laau Nohu o Auseteralia.

          O ka mea nui i hoomaopopoia no keia ano laau ma keia aina, oia no ka laau nohu kuku. He nunui ka lau o keia ano laau, e like me ko ka pua nana la, a me na mea kuku malalo ae o ka lau e like la me ko ke kikania lei ; a o kela a me keia mea kuku he mau hope eha o hui ai ke kino ke pa mai. I kekahi keonimana e ohi ana i na ano laau o kela me keia, i mea hoikeike no ka Hoikeike nui o Parisa, ua hai mai oia ua ana ia kekahi o keia mau ano laau nohu kupanaha a he 32 kapuai ke anapuni, a he 140 kapuai ke kiekie. He ikaika loa ka hui ke pa i ke kuku o keia ano laau ; ina e ho-a ia ana he pua lio maloko o ka ululaau a komo lakou ma kahi e ulu ana keia laau kuku, a i pa mai lakou me na lau o keia ano laau, e loaa ana i ka mai a make. Ua ike au i ka hoike a kekahi kanaka no ka make hikiwawe ana o kona lio no keia ano mai, oiai oia e kaahele ana ma ia mau wahi ; a wahi hoi a kekahi komite o ka hoikeike nui ia'u, ia lakou e hele ana ma kekahi o na ulu laau o ia aina, o kahi kanaka opio, he malihini ia, akahi no a hiki mai, a aole hoi i ike i ke ano o ka laau nohu, hahaki ae la oia i kekahi lala, oiai ia e hele ana, a lolo koke iho la kona lima ia wa. Ua pipili paa loa ia kona manamanalima, a ua la-au koke e like me ka pohaku ke oolea. Aia hoi kekahi kanaka kalepa e kokoke mai ana, ike mai la oia, a hele mai la i ka mea poino, i mai la. "Ua ike au i ke kumu o kou pilikia, a e pau ana nae hoi." Lapulapu aku la oia i kekahi mau nahelehele e ulu koke mai ana, a hamo mai la i ka lima, a o ka mokala koke ae la no ia o ka upiki ana o na manamana lima, a hoi ae la e like me ka mau. A ma keia, ua hoohalike na kamalii ma ka lakou paani me keia, ano laau. I ka wa e hoohaehae ai kekahi i kekahi, e hamo lakou i ka ili me ka lau o kekahi mea ulu, a penei lakou e puana ai i na wa a pau. "E ka nohu eha hele iwaho, e kela lau olu komo mai iloko."

HOOKO PONO OLE.

          Elua mau kaikamahine liilii, he mau hoahanau laua, ua hooluhi loa ia laua i ka okioki ana i na pepa kii. Mahope iho, kauoha aku la ko laua mama i ka mua, "o Daisy, o ka wa keia nou e waiho ai i kau mea paani, a o na apana a me na hunahuna pepa e ohiia." "Aole na'u wale no i okioki i na pepa," wahi a Daisy i pane aku ai, a ohi ae la oia he mau apana uuku wale no. Mahope koke iho, komo mai la kona muli iloko o ka rumi, a kauoha hou mai la ko laua mama, "e ohiia na apana a me na hunahuna pepa a pau loa." "Ua ohi ae nei au i ka'u mau mea i okioki ai," wahi a Daisy. "Ae, e mama," wahi a kona muli, "ua ohi ae nei o Daisy i kana mau mea i okioki ai a pau, a e ohi ae au i ka'u." Ohi iho la o Alice ka muli i na hunahuna a pau me ka noii ana i na apana i helelei aku a nalowale, a ua like oia me ka nalomeli ka luhi i ka hana ; a ua hauoli hoi e like me ka manu, a hiki wale i ka pau ana o na hunahuna liilii loa ; oiai hoi, na Daisy ka hapanui o na pepa i okioki liilii ia i oi aku mamua o kana. He wahine ka i kipa mai e ike i ko laua mama, a e kiai ana oia i ka hana a na kaikamahine, a owai la kau i manao ai ua hooko ole o laua, o Daisy a o Alice paha?

Ka hanau ana o Mose.

          He mau kauwa kuapaa ka ohana a Iseraela ia lakou iloko o Ai gupita, a ua hoomainoino ino loa ke alii o Aigupita a me kona mau makaainana ia lakou. Ua makau ko Aigupita o kaua aku ka Iseraela ia lakou, a pakele lakou, a pau ko lakou noho kauwa hou ana. Nolaila, olelo iho la lakou, "e hoohana kaou me ka ikaika loa ia lakou, a e pau lakou i ka make wale, a e pepehi aku kakou i na keikikane liilii a pau loa, alaila, aohe mea nana kakou e kaua mai, a aole o kakou mea e hopo ai." Kiola aku la na kanaka manao ino i na keikikane a pau e loaa ana ia lakou iloko o ka muliwai.
          Ke hoike mai nei hoi ko kakou moolelo o keia la no kekahi makuahine a me kana keiki liilii. Ua aloha loa oia i kana keiki uuku, a ua piha pu oia i ke kaumaha nona; no ka mea, ua maopopo iaia, ina e loaa ana i na kanaka manao ino, e kiola ia ana e lakou ke keiki iloko o ka muliwai. Huna iho la ka makuahine i ke keiki iloko o ka hale, a hiki i ka piha ana o na malama ekolu ona; nolaila, manao iho la ka makuahine, aole e hiki iaia ke huna hou aku i ke keiki.
          Ke manao nei au, na ke Akua i hookomo i ka manao iloko ona no ka mea ana e hana ai. Hele aku la ia ilalo i ka muliwai, a lawe mai la i kekahi mau nahelehele loloa e alu ana ilaila, a ulana iho la i wahi waa me ka uhi, i nui kupono no ke keiki e waiho ai. Kapalapala iho la oia a puni o waho o kahi waa me ke kepau, i komo ole ai ka wai iloko. Alaila, waiho iho la oia i ke keiki iloko, a halihali aku la ilalo i ka muliwai, a huna aku la mawaena o na nahelehele loloa ; hoonoho aku la oia ia Miriama, kona kuahine e kiai iaia. Aole nae e hiki ia Miriama ke noho a kiai aku iaia, no ka mea, ina oia e noho ana, e ike ia ana oia e na kanaka manao ino a e loaa ana ke keiki, nolaila, hele aku la oia ma kahi e, kahi ana e ike mai ai i ka mea e hele aku ana i ona la.
          Aole i liuliu, ike aku la ia i kekahi poe wahine e iho mai ana i ka muliwai. Hookokoke aku la ia e ike pono i ka lakou mea e hana ai. Ike aku la ia i kekahi wahine, o ke kaikamahine a Parao ke alii, a o ka nui o na wahine he mau haiawahine nana.
          I ka ike ana o ke kaikamahine a Parao i kahi waa, kena aku la ia i kekahi o kona mau kauwa e kii e lawe mai i kahi waa. I kona wehe ana ae i ke poi, ike iho la ia he wahi keiki uuku e uwe ana. Ua hoomaopopo koke iho la ia na kekahi o na wahine paaua, nolaila, olelo aku la ia, "e lawe au i ke keiki na'u ponoi."
          I ka lohe ana o Mi riama i ka olelo ana ae a ke kaikamahine alii, pane aku la o Miriama, "e kii ae anei au i kekahi wahine kauwa i mea nana e malama ke keiki nau e ke alii ? " I mai la ke kaikamahine a Parao, "ae." Nolaila, holo aku la ia a lawe mai la i ka makuahine. I mai la ke kaikamahine a Parao iaia, "e lawe i keia keiki a e malama iaia na'u, a na'u e uku ia oe." Aole nae i ike ke kaikamahine alii, o ka makuahine ponoi keia o ke keiki.
          Aole anei oe e manao; ua hoopihaia ka makuahine me ka hauoli? Aole anei oe e manao, ua hoomaikai aku oia i ke Akua, no kona haawi ana mai i ka manao maikai iloko ona, no ka mea pono ana e hana ai no ke keiki, a hoouna mai la i ke kaikamahine a Parao, i mea nana e malama nona ponoi, i mea e hiki ole ai i ka poe kanaka manao ino ke lawe a pepehi iaia?
          Mahope iho, nui ae la ua keiki nei, a hoi aku la ia a noho pu me ke kaikamahine a Parao, a nana i kapa aku i kona inoa o Mose. "A nui ae la ua keiki la, a ikaika ae la hoi kona manao, a piha i ka naauao, a maluna ona ke aloha o ke Akua."—Luka II: 40.

Ka la hiki mai—Ka uhane.

          Ua aloha anei ke Akua i na ilio? Ua haawi mai anei ia he kino ko lakou? Ae. He iwi he io a he ili anei ko lakou? Ae. He kino ko ka ilio e like me kou. Ua like anei ko ka ilio kino me kou? Aole. Ehia ou mau wawae? Elua. Ehia mau wawae o ka ilio? Eha. He mau lima anei kou? Ae; elua. He mau lima anei ko ka ilio? Aole ona mau lima. Aka, he mau wawae nae ko lakou lima, he pahee kou ili, aka, o ko ka ilio ili, ua uhiia me ka hulu. He kino anei ko ka popoki e like me kou? Aole, ua uhiia ko lakou kino me ka hulu pahee. Ua like anei ko ka moa kino me kou? Ehia wawae o ka moa? Elua, e like me kou. Aka, ua like anei kona mau wawae me kou? Aole, he mau wawae liilii nioniolo ko ka moa, a he mau manea me ka maiuu ko lakou. He hulu anei kekahi maluna o kou ili? He mau eheu anei kou? Ua like anei kou waha me ka nuku o ka moa? He mau niho anei ko ka moa?—Aole; he like ole loa ko ka moa kino me kou. Aka nae, he kino ko ka moa, no ka mea, he io, he ili, he iwi, a he koko kona. Na wai i haawi mai ke kino i ka ilio, lio a me ka moa? Na wai i malama i ko lakou ola? He hoomanao mau ke Akua i na mea ola hanu a pau i na wa a pau. Hiki anei i ka ilio ke hoomaikai i ke Akua? Aole; o ka ilio, ka lio, hipa a me ka bipi, aole e hiki ia lakou ke hoomaikai i ke Akua. Aka nae, he aloha Oia ia lakou. Mai hoeha oe i kekahi mea a ke Akua i hana'i. Heaha ko lakou mea i hoomaikai ole ai i ke Akua? No ka hiki ole anei ia lakou ke kamailio? Aole oia ke kumu. O ke kumu i hiki ole ai ia lakou ke hoomaikai aku i ke Akua, no ko lakou lohe ole he Akua. Aole hiki ia lakou ke hoomaopopo he Akua kekahi. No ke aha mai hoi? No ka mea, aole o lakou uhane ola e like me kou. He uhane kou, aole loa e make, hiki ia oe ke manao i ke Akua. Hana ke Akua ia oe he mea kino uhane ola. I ka hana ana o ke Akua i ka ilio, he mea ola kino hanu wale iho no, aole loa e hiki ia lakou ke manao i ke Akua. Hiki anei ia'u ke ike i ka uhane? Aole; o ke Akua wale no ka i ike. Hiki loa Iaia ke ike lea i kou mau manao ano. E make ana kou kino, aka, o oe aole e make. E make ana kahi ilio i kekahi wa. E kiola wale ia ana kona kino. E nalo ana kona ano ilio i ka wa e make ai kona kino. Aka, a i make kou kino, e ola ana no kou uhane, a aole e nalowale. Ma hea e waiho ia ai kou kino ke make? E waiho ia iloko o kekahi lua iloko o ka honua, aka, aole o oe ka i waiho ia iloko o ka lua, o kou kino wale no. Pela hoi ke keiki liilii he uhane ola iloko ona. I kekahi la, ia'u e hele ana ma ke alanui, ike aku la au he kanaka e lawe ana i kekahi pahu. A he poe kanaka e hele ana mahope me ka uwe. Aia nae he kino make o ke keiki liilii iloko o ka pahu. Aia anei malaila ke keiki liilii? Aole; ua hoi aku ia me ke Akua. Aole anei oe e hoonani aku i ke Akua no ka hana ana mai ia oe he mea uhane? Aole anei oe e noi aku Iaia e lawe aku ia oe e noho pu me Ia i ka wa e make ai kou kino? E noi aku Iaia penei: "E ke Akua, ke nonoi aku nei au e lawe aku Oe ia'u a noho pu me Oe, i ka wa e nalo ai keia kino a lilo i lepo."

E noi aku me ka oluolu.

          "E haawi mai no'u kekahi waiu, e Hale," wahi a Kale, me ka paa ana ae i kona kiaha.
Ua akoakoa ka ohana ma ka papaaina ia manawa.
          I ka haalele ana mai o ke kaikamahine i ka rumi aina, olelo aku la kona makuahine,—
          "E Kale, aole pela oe e noi ai. E olelo aku oe e oluolu."
          Mumule iki iho la o Kale.
          "E olelo anei au, "e oluolu" i na kauwa, e mama ? Oiai ua uku ia lakou no ka lakou hana."
          "He oiaio ia ; aka, he mea pohihihi ole ke kamailio oe me ka oluolu, a he mea ia no lakou e hauoli ai. O ka mea e kokua ana i kekahi me ka hoohauoli aku, he mea maikai ia."
          "Aka, aole o Hale i hoomaopopo."
          "Pehea oe i ike ai ia? Ua ike anei oe ia ia e mino aka ana i ka wa a Carrie i noi aku ai me ka haahaa, e oluolu e Hale i mea ono hou?" Ua kali mai oia no olua, aka, me kekahi manao ano e."
          "Ka," "he kaikamahine o Carrie," wahi a Kale.
          "E kuu keiki," wahi a kona makuahine, me ka leo ano aloha, o ke kanaka uuku a o ke kanaka koa o ke ao nei i ikeia, ua oluolu lakou me ka manao ia hai, pela me na mea liilii. Ua lohe paha oe no ke Duke o Welinetona,—he Kenela nui oia a he alakai wiwo ole. O ka hua hope loa ana i puana ae ai i kana kauwa, "e oluolu oe." Ninau aku la kekahi o kana mau kauwa iaia, iaia e waiho ana maluna o kona wahi moe me ka nawaliwali, e oluolu anei ia i wahi bola ti, pane mai la ia, e like me kona ano keonimana, "ina oe e oluolu."
          "Aole anei o ke Duke o Welinetona e mama" wahi a Carrie i ninau aku ai; "ka mea nana ke keiki holoholona milimili i hanaiia, iaia i pau aku ai mai ke kula aku, a kakau iho la oia no ua mea la?"
          "Ae ; he manao oiaio kona, i hele ole ia e ka mea uuku a me ka mea haahaa ma o kana mau hoakaka ana. O ka mea nui hookahi i oi aku mamua o ka Welinetona haawi ana mai ia kakou, oia ka Rula Gula, ka mea nana i alakai ua Duke wiwo ole la, e hana i na mea a pau, ina kakou e hana pu ana."

HAAWINA KULA SABATI
HELU 6.—SABATI, NOV. 12, 1876.
KUMU HANA.—Ka Paulo haiolelo mua.
PAUKU BAIBALA, Oih. 9:19—30.

19 A i ka lawe ana i ai, ikaika ae la. Noho iho la o Saulo i kekahi mau la me na haumana ma Damaseko.
20 Hai koke aku la ia maloko o na hale halawai, ia Iesu; o ke Keiki ia a ke Akua.
21 Kahaha ino la ka poe a pau i lohe, i ae la ; Aole anei keia ka mea i luku ai i ka poe i hea aku ma ka inoa ma Ierusalema, a hele mai hoi ia nei e lawe ia lakou me ka paa, i na kahuna nui?
22 Mahuahua nui aku la ka ikaika o Saula, a pilipu iaia ka poe Iudaio, e noho ana ma Damaseko, i kona hoakaka ana, o ka Mesia no keia.
23 A hala ia mau la, kukakuka ka poe Iudaio e pepehi iaia.
24 Ike ae la o Saula i ka lakou kuka ana. Hoomakakiu aku la lakou ma na puka i ke ao a me ka po e pepehi iaia.
25 Lawe aku la na haumana iaia i ka po, a ma ka hinai, hookuu iho la iaia ilalo, mawaho o ka pa.
26 A hiki aku la o Saula i Ierusalema, hoao aku la ia e hui pu me na haumana, makau mai la lakou a pau iaia, no ka mea, aole lakou i manao he haumana ia.
27 Lalau aku la o Barenaba iaia, a alakai aku la iaia i na lunaolelo, a hoakaka aku la i kona ike ana i ka Haku ma ke alanui, a me kana olelo ana mai iaia, a me kana ao ikaika ana aku ma Damaseko, ma ka inoa o Iesu.
28 Me lakou pu iho la no ia ma Ierusalema, i ka eele ana aku a i ka hoi ana mai.
29 A e ao wiwo ole aku ia ma ka inoa o Iesu, me ka hoopaapaa aku i ka poe Helene ; a kukakuka iho la lakou e pepehi iaia.
30 A ike iho la na hoahanau, lawe aku la lakou iaia i Kaisareia, a hoouna aku la iaia i Fareso.
Pauku Gula, "O ka mea nana kakou i hoomaau mai mamua, i neia manawa, ke hai aku la ia i ka manao oiaio ana i hoino ai mamua." Galatia 1: 23.
Pauku hoopaanaau p. 20—25.
Mele. Him. 475 7—6 Leo hosana kamalii.
1 Na luna hai olelo,
E hele ae oukou
I na lahui aina
I noho naaupo;
A ma na mokupuni,
Na aina nui no,
E lawe i ke ola
I ola no lakou.
Pule no na kumu, no ka poe haiolelo, i hai me ka wiwo ole, &c.
Na Ninau a na Kumu.
P 19. Ehia la i noho ai Saulo me ka ai ole? p 9. Ua nawaliwali paha, heaha ka mea i ikaika hou ai? Mewai oia i noho ai? mahea? Pehea ka loihi? He manawa pokole paha.
P 20. Heaha ka Saulo i hana koke ai? mahea? Owai io Iesu ma kana hai ana? Aole paha oia i hai wale, ua kuhikuhi paha oia i na pauku baibala, kahi i maopopo ai.
P 21. Pehea ka poe i lohe i ka Saulo mau olelo? Kahaha no ke aha? Heaha hoi ka ninau? Owai kekahi mea ano like? 1 Samuela 10: 12. Nana hoi ma Galatia 1: 13, 23.
P 22. Ka ikaika aha o Saulo kai mahuahua? Pehea hoi na Iudaio malaila? Pilipu i ke aha?
P 23. A hala ia mau la, he mau makahiki ekolu paha, Galatia 1: 15—18, Pehea na Iudaio? No ke aha ko lakou makemake e pepehi iaia?
P 24. Heaha ka Saulo i ike ai? Makau anei?
P 25. Pehea Saulo i hoopakeleia'i i ka make? Owai kekahi mau mea i hoopakeleia i ka make me ia? Iosua 2: 15.
P 26. A hiki Saulo i hea? Mai hea aku? Hoao oia e aha? Pehea na haumana? No ke aha ka makau? Kuhi lakou aole oia heaha? Aole ka lakou i lohe ua huli mai oia. Ua hala nae na makahiki ekolu. Galatia 1: 18.
P 27. Nawai i hoopau i keia makau me ke kuhihewa? Owai Barenaba? mokuna 4: 36. Owai na lunaolelo ma Ierusalema ia wa? Gal. 1: 18, 19. Pehea ko Barenaba hoakaka ana?
P 28, 29. Hui pu Saulo me wai? i ke aha ana? A ao aku oia ia wai? i ke aha? me ke aha? A kukakuka lakou e aha iaia?
P 30. Pakele hou Saulo i ka make ma ke aha? Pehea ka Saulo olelo nona iho ma 2 Kor. 11: 26? Mahea Kaisareia? Mahea hoi Tareso? Ilaila anei Saulo mamua? p 11. Mok. 21: 39; 22: 3.
Mele. Him. 355. 8—6 Leo
1 Aloha e na hoahanau
Iloko o Iesu;
Hauoli ko kakou naau,
A launa pono pu.
3 Auhea ke Lii maikai e ae,
Auhea ka like pu?
Maanei kakou e kupaa ai
Mamuli o Iesu.
Na Ninau a ke Kahu.
Na Makua. Hai mai ka pauku gula. Heaha ko Saulo ano mua? Heaha kona ano hope? Heaha kana hana mahope o kona bapetizoia ana? Nawai oia i koho i Lunahaiolelo? Noho iki oia ma Damaseko, a ku a hele i hea? Gal. 1: 17. Noho no ma Arabia, a hoi hou no i Damaseko, a haiolelo no i na Iudaio, a huhu lakou, a kuka e pepehi iaia. A pehea ke Kiaaina o Damaseko? 2 Kor. 11: 32. A ma ke aha Saulo i pakele ai i ka make? A mahope iho, kuka na Helene e pepehi ia Saulo, pakele nae oia i ke aha?
Na Keiki. Owai keia kanaka wiwo ole i ka haiolelo no Iesu? Saulo, heaha oia mamua? He kanaka hoomaau a luku i na haumana a Iesu. Nohea keia ano hou ana? Na Iesu i hea a hoano hou iaia. Mahea? Hai mai i na inoa eono i kapaia'i Iesu ma keia haawina. E huli i loaa. Ehia imi ana e pepehi ia Saulo ma keia haawina? Owai? owai? Ua make anei? Aole. Nawai i hoopakele? ma ke aha hoi? owai ka i hookuuia iwaho o ka pukaaniani mamua loa aku i pakele i ka make? He mau kiu elua, a he alii kekahi. Nohea na kiu? Nawai i hoopakele? Owai kela alii? Nawai i hoopakele iaia i ka make? Maikai Rahaba me Mikala. E hoohalike oukou me laua a me ka poe aloha, a hoopakele i ka poe pilikia.
Ke Kula a pau. Hookahi kanaka, elua ona ano okoa loa. Owai ia kanaka? Owai hoi ia mau ano elua? Nui anei ka poe hoomaau mamua, a mahope, hoano e hou ia? Heaha ka pule kupono no ka poe hoomaau? Owai ka poe i makauia ke manao e hui pu? Me wai ko oukou huipu ana? Ma ke aha i maopopo ai ka huli io ana mai o ka poe hana hewa? Na Petero anei i koho ia Saulo i lunaolelo? Nawai hoi? Pehea ka loihi o ka Saulo haiolelo ana mamua o kona launa pu ana me Petero ma ma Ierusalema? Mahea kekahi like ana o keia Saulo me kela Saula alii?
Mele. Robina Gula Mele 5.
Eu a hooikaika,
E na koa 'lii,
Oia ke kauoha,
E hookani ae,
Naue a hai aku
Ia kauoha nei ;
Hooauhee—hooauhee
I na enemi.
Cho.—E u a hooikaika,
Hooauhee—hooauhee;
E u a hooikaika
Hooauhee—hooauhee—
Oia ke kauoha,
E hookani ae—
Hooauhee—hooauhee
I na enemi.
Pule, i huli mai ka poe hewa, a lilo i poe haiolelo, &c.
Haawina no Nov. 19—Oih. 9: 31—43.