Ka Lahui Hawaii, Volume II, Number 44, 26 ʻOkakopa 1876 — Page 4

KA NUPEPA KA LAHUI HAWAII.
HONOLULU, OKATOBA 26, 1876.

KOMI TE HOOPONOPONO NO KEIA AOAO.

LAIKI MAKUA,  MRS. KELA F. GILIMANA,
M RS. ELENA MAKALE,  MRS. C. C. COLEMANA.

Na Home Liilii.

          Ua hoomanao iki anei oe e kuu keiki, i ka pomaikai o ka loaa ana he home ? Aole o ka poe kiekie a waiwai wale no ka i loaa na home, aka, o ka poe hune kekahi i loaa ia lakou kahi i kapaia, "he home."
          O na holoholona kekahi o ke kula, na manu o ka lewa, a me na mea kolo liilii a ka lima o ke Akua i hana ai, he wahi malumalu ko lakou mai na kikiao makani ino a mai ko lakou mau enemi mai. Ke ike nei oe e kuu keiki, i ka malama akahele ana o ke Akua maluna o na mea ola hanu a pau. O ka liona, he wahi kona e hooluolu ai iloko o ka waonahele; o ka bipi kauo a me ka lio, he ai ka laua mai ko laua haku hana mai, a me kahi moe mauu iloko o ko laua hale; he punana e pumehana ai ko na manu o ka lewa a me kana mau keiki liilii iwaena o na lala laau; o kahi ia uuku loa o ke kai, he hale kona o ka momi i hana ia a paa loa me na pohaku ako'ako'a, a e anapa ana na waihooluu o ke anuenue.
          Ua haawi mai ke Akua i keia mau pomaikai i kekahi o na mea ola o ke kai a me ka aina, na lakou ponoi no e kukulu i hale no lakou iho, ka mea i hiki ole i ke kanaka akeakamai o keia ao ke hana. Aia hou aku ua wa, e hoike hou aku no makou no kekahi mau mea kupanaha o keia mau home liilii; a ia wa, e ike oukou e na kakuaana a me na kaikuahine o'u i ka punana o na ano manu like ole, a me na kuhikuhi no ko lakou hana ana i kela a me keia punana me na mea paahana a lakou i ike ai he kupono a i loaa hoi ia lakou; a me ko lakou hana ana e ku i ko lakou iini a me ko lakou makemake.

Ka la hiki mai—Ka makuakane hoopono.

          Owai la ka mea nana i hoaahu a i hana ia oe? O kou makuahine aloha no.
          Nawai i imi i ke dala a kou makuahine i mea kuai lole a ai nau? Na kou makuakane i haawi iaia.
          Pehea i loaa ai ke dala i kou makuakane ? Mailoko mai o ka hana a me ka malama ana. Ua oluolu i kou makuakane e haawi i ke dala nau. He aloha anei oe i kou makuakane ? Ina paha e make ana kou makuakane, heaha kau e hana ai ? E lilo ana oe he keiki makua ole. E make ana anei kou makuakane? Ae, ua lohe au no kekahi wahi keiki uuku nona kekahi makuakane i haule mailuna iho o kekahi alapii a make loa. A o ka makuakane o kekahi keiki aku no, i peku ia e ka lio a make. Malia o make pu me kou makuakane, aka na ke Akua no e hoopakele ia ia. E pule aku no oe i ke Akua e malama mai oia iaia. Aka, ina e waiho mai ana ke Akua e make kou makuakane, alaila, e koe ana hookahi makua nou. Owai la ka'u makua e kamailio nei ? Owai la ka kakou e noi ai ma ka pule ? "E ko makou Makua iloko o ka lani." Ae, oia no, he makua kou aia ma ka lani, oi ae i kou makua ponoi, nana oe e malama ; o ke Akua no kou makua. E make ana anei kou makua lani ? Aole, aole loa. He aloha anei oia ia oe ? Ae. He aloha oia ia oe i oi aku i ko kou makua. Ke hoomanao mau la oia ia oe, a ke kiai mau nei no oia ia oe. E hoomanao oe i keia. Ke haawi mau nei ua makua lani la i kekahi mau mea ia oe. Ua makemake oia ia oe e noho pu oe me ia ma ka lani. He aloha no oia i kou makua ma ke kino. O ke Akua no ka makua o kou mau kupuna. E nana kakou i kekahi mau mea a kou makua lani e haawi nei ia oe, a e helu pakahi kakou :
          1.—He makuakane hana nou.
          2.—He makuahine i malama ia oe.
          3.—He hale nou e noho ai.
          4.—He moe nou e hiamoe ai.
          5.—He lole nou e aahu ai.
          6.—He ai nau e ai ai.
          7.—He hanu ana i na minu te a pau.

Moolelo o ka Ahahui Euanelio o Oahu.

Halawai ka Ahahui Euanelio o Oahu ma Waialua, i ka la 10 o Okatoba, 1876, hora 10 A. M.
Weheia na hana me ka pule a S. Paaluhi. Hooponopono ia na lala i hiki mai.
Ekale sia  Kahu  Elele
Kawaiahao   ———  Ioela
Kaumakapili   ———  S. K. Kuhano
Kalihi & Moanalua  S. Paaluhi  J. W. Kinoiki
Ewa   ———  Naueiki
Waianae   ———  Kekilo
Waialua   J. N. Paikuli  J. Kapua
Kahuku   J. Kekahuna  Niau
Hauula   D. Kekiokalani  Maluae
Kahana     Hale
Waikane   ——— Puuweuweu
Kaneohe   J. Manuela  Kahuakai
Waimanalo   J. Waiwaiole  Kawelo
Wailupe   ———  ———
Koho ka aha ia J. Manuela i Lunahoomalu, a o S. Paaluhi i Kakauolelo.
Koho ka aha ia J. Kaluhi, J. Keau, J. Amara, Eduve, S. Kailaa, i mau hoa kuka no keia aha.
Heluhelu mai ke kakauolelo he palapala na H. H. Paleka, e hoike mai ana o J. K. Iosepa he hope kahu no Kawaiahao.
Koho ka lunahoomalu ia J. Kekahuna, Ioela, S. K. Kuhano, i komite imi hana.
Heluhelu mai ke kakauolelo he leta mai a Rev. J. Bikanele o Hamakua, Hawaii, e hoakaka mai ana no Welewele, aole ia he keiki na ia aha, he hoa kuka wale no.
Hoike hapa mai o J. Kekahuna i keia mau kumuhana:
1 He hapalua hora haipule mamua o ka hoomaka ana i ka hana i kela la keia la.
2 Na hoike kihapai.
3 Heluhelu haawina.
4 Na palapala hoopii.
5 Na ekalesia kahu ole.
6 Ke ola o na kahu.
7 Ka hoike a na komite i kohoia i ka halawai o keie aha ma Aperila.
8 Ka manao o keia aha no J. K. Iosepa, J. S. Kalana, J. W. P. Kahalewai.
Hapai ka aha i ke kumuhana 2, na hoike kihapai.
Heluhelu mai ke kakauolelo i ka hoike o ka ekalesia o Wailupe.
Heluhelu ia ka hoike o na kihapai o Wailupe, Kalihi me Moanalua.
Koho ia o J. K. Iosepa, J. S. Kalana, J. W. P. Kahalewai i hoa kuka no ka aha.
Heluhelu ia ka hoike o na kihapai o Waianae, Waialua, Kahuku, Hauula, Waikane, Kaneohe, Waimanalo.
Ma ke noi a Ioela, ua hoomaha ka aha a hiki i ka hora 2 P. M., me ka pule a Puweuweu.
Ho ra 2 P. M. halawai hou ka aha me ka pule a Kahalewai.
Koho ia o S. Waiwaiole i komite imi haawina, a me Kahalewai, Iosepa.
Koho ia o S. Paaluhi, M. Kuaea i komite pai moolelo.
Hapai ia ka noonoo no ke kumuhana 3, heluhelu haawina.
Heluhelu mai o J. Manuela i kona haawina, no ka pule a ka Haku ma ka mala o Getesemane, "E ko'u Makua e, i na paha he mea hiki ia e lawe aku oe i keia kiaha mai o'u aku nei," heaha la ia kiaha? Mataio 26:39.
Heluhelu mai o S. Waiwaiole i kona haawina, "He pono anei i ke kahunapule ke hoemi i kona ikaika i ka hana a ka Haku ke loaa kekahi mau mea e hookuia mai ana iaia iloko o kona wa e noho kahu ana?"
Hapai ia ke kumuhana 4, na palapala hoopii.
Heluhelu mai ke kakauolelo he palapala hoopii na D. Kekiokalani, no ke koena aie o ka ekalesia o Wailupe iaia no kona noho kahu ana no ia ekalesia.
Koho ia o J. Munuela e hele aku e launa me ka ekalesia o Wailupe no ko lakou aie ia D. K. Kekiokalani.
Heluhelu ia he palapala hoopii na ke komite o ka ekalesia o Waialua, e nei ana e noi aku e hookuu i ko lakou kahu, no ka nui o ko lakou aie.
Ua kuka nui ka aha no keia mea, me ka ninau pu i ka manao o ko lakou kahu, a ua hoapono ia ka palapala hoopii.
Heluhelu mai ke kakauolelo he palapala hoopii no ka ekalesia o Waikane, e noi mai ana ia J. N. Paikuli i kahu ekalesia no lakou.
Waiho ia keia palapala ma ka lima o ka mea i kahea ia, e noonoo a hai mai i kona manao.
A mamuli o ka apono ana o J. N. Paikuli ia palapala kahea, ua hoapono ka aha ia palapala kahea.
Ma ke noi a J. Kekahuna, ua koho ia o S. Waiwaiole, J. Manuela, D. Kekiokalani, J. Kekahuna i komite nona e hoonoho ia J. N. Paikuli i kahu no Waikane.
Heluhelu ia he palapala hoopii no Waianae mai, e noi mai ana e lilo o J, W. P. Kahalewai i kahu no lakou.
Waiho ia a hapai ia ke kumuhana 8.
Ma ke noi ua hoopanee ia ka aha a halawai hou i ka la apopo hora 9 A. M. Pule o J. Kekahuna.
LA HANA 2, O ct. 11.
Halawai ka aha e like me ka hoopanee ana. Malama ia ka hapalua hora haipule.
Heluhelu ia ka moolelo o ka la i hala, a hoaponoia.
Heluhelu mai ke kakauolelo ka palapala hoopii na J. N. Paikuli, e noi mai ana e noonoo keia aha i ka aie o ka ekalesia o Waialua iaia he $300.
Koho ia o S. Waiwaiole, J. Kekahuna, D. Kekiokalani i komite e lana aku me na kahu waiwai o ka ekalesia o Waialua, e hoomaopopo i ka oiaio o keia mea.
Koho ia o J. Kapua i luna e hai aku i na kahu waiwai e akoakoa ae lakou e halawai me ke komite o keia aha i ka hora 2½ P. M.
Ma ke noi a D. Kekiokalani e lilo o A. Kaoliko i hoa kuka no keia aha; hooholo ia.
Hapai ka aha i ke kumuhana 5, no na ekalesia kahu ole.
No ka ekalesia o Wailupe, aole mea i hooholo ia nona.
No ka ekalesia o Ewa. Na ka ekalesia a me ko lakou haiolelo e noi aku i kekahi kahu e hele mai e malama i ko lakou ahaaina. A pela no hoi me ka ekalesia o Waianae.
Koho ia o J. Kekahuna no ke ekalesia o Waialua.
Heluhelu mai o J, K Iosepa i ka hoike o ka ekalesia o Kawaiahao.
O J. S. Kalana i ka hoike no ka ekalesia o Ewa.
Ma ke noi a Ioela ua hoomaha ka aha a hiki i ka hora 2 P. M. Pule o Kailaa.
Ho ra 2 P. M. halawai hou ka aha. Pule o Kekilo.
Heluhelu mai ke kakauolelo i ka haawina o ka ekalesia o Wailupe, "Heaha ka pono e loaa mai ana no ka ekalesia o Wailupe, o kona kuokoa paha, o kona hoohuiia mai paha?"
Heluhelu mai o J. N. Paikuli i kona haawina, "Heaha la na hana kupono a na ekalesia e hana'i i mea e loaa nui mai ai ka Uhane Hemolele, e like me na aina haole mai nei ma keia makahiki ae nei?"
Hoike mai o J. Kekahuna ka lunahoomalu o ke komite i hoouna la e kuka me na kahu waiwai, he oiaio he aie maoli io no ko lakou, ekolu haneri, a ua ae no lakou e uku mai.
Ua makemake lakou e kuka pu me ke kahu no ka hookaa ana, J. Kekahuna, S. Waiwaiole, D. Kekiokalani ke komite.
Hapai ka aha i ke kumuhana 8.
No J. K. Iosepa, J. S. Kalana, J. W. P. Kahalewai, e noho lawelawe nei ma ke kihapai o Kawaiahao, Ewa a me Waianae.
Hooholo ka aha e ninaninau ia lakou mahope o ka ninau ana, ua hooholo ia e haawi i mau palapale haiolelo no lakou.
Ka hoike a ke komite imi haawina.
1 Heaha ke koi i oleloia e waiho ana ma ke kumu o kela laau keia laau, a heaha hoi ka laau i olelo ia e oki i hoike ia ma Mataio 3:10. Rev. J. Manuela.
2 Heaha ka aahu keokeo o ka poe pono i hoike ia ma Hoikeana 3:5. J. W. P. Kahalewai.
4 Ua olelo mai o Iehova e noho oia ma kahi pouli loa, heaha ia pouli i hoikeia ma I Nalii 8:12. Rev. J. N. Paikuli.
5 E wehewehe i ka pauku ma Hebera 12:28. Rev. S. Waiwaiole.
6 Owai la ka makuahine o na wahine hookamakama, a heaha ka mea i oleloia ai he makuahine hookamakama ia Hoikeana 16:5. J. K. Iosepa.
7. Ina i kahea ia kekahi kahunapule i kahu no kekahi ekalesia, a hele oia a noho ma ia ekalesia, aole nae i hoonohoia e ka aha kahi ana e noho ai, he kahu anei oia no ka ekalesia ana i noho iho ai, aole anei? Rev. J. Kekahuna.
8 O ka pule ikaika a ke kanaka pono e lanakila nui ia, heaha la ka ikaika kupono o ka pule i lanakila nui ai ke kanaka pono? Rev. S. Paaluhi.
9 Heaha ke ano e ka olelo i hoikeia ma ka hana hope o ka pauku ma Oihana 1:12. Rev. M. Kuaea.
10 O ka mare ana o kekahi kahu mare a mau kahu mare paham, i kekahi mau mare a mau mare paha, a loaa kekahi keakea a mau keakea paha iloko o ka wa e mare ia ana e ke kahu mare, kauo, hina, ua mana anei a ku i ka maikai o ia mare ana. Rev. D. Kekiokalani.
11 E wehewehe i ka pauku ma Hoikeana 11:4. H. H. Paleka.
12 Heaha la ka hana kupono a ka aha e noonoo ai no na ekalesia kahu ole, o ka hoomau anei ia mau ekalesia ma ka malama kahu ku i ka wa ana, a o ka imi aku i kahu noho paa anei. Rev. B. W. Paleka.
13 Heaha la ka hana kupono a ke kahu ekalesia e hana ai i mea e ola ai oia a me kona ohana, ke hanai ole ia mai oia e kona ekalesia? Rev. L. Kamika.
Komi te S. Waiwaiole, J. K. Iosepa, J. W. P. Kahalewai.
Ma ke noi a S. Waiwaiole e lilo ke kakauolelo i hope no ka haiolelo a ka lunahoomalu o keia aha ke hiki ole mai ia, hooholoia.
E malama ia ka hebedoma haipule, oia hoi ka hebedoma mua o Ianuari 1877, a me ka Poaha hope o Feberuari i la haipule no na kula.
Hooholoia—Ke haawi aku nei keia aha i ke aloha a me ka mahalo nui ia Rev. J. N. Paikuli no kona hiipoi ana i na lala o keia aha, ma ka hookipa ana a me ka hanai ana, a lawa pono i na mea e oluolu ai ke kino me ke kokua ole mai o kona ekalesia.
Ina e hoopanee keia aha, e halawai hou aku ma Kawaiahao i ka Poalua elua o Aperila, 1877.
Heluheluia ka moolelo o ka aha a hoaponoia.
Pule ka lunahoomalu, J. Manuela.
S. PAALUHI, Kakauolelo.

"KA ENUHE."

          Ia'u e holoholo ana maloko o kekahi mala pua i kekahi kakahiaka laelae, pa maila he kikiao makani, a nana i hoomokaki iho i na pua a me na lau laau.
          Pela iho la, wahi a na pua, no ia mea, li-o ae la ko'u mau pepeiao, a ku aku la au hoolohe. Wahi a kekahi laau kahiko i pane mai ai, "E na pua, e lulu ae i ko oukou mau enuhe." "No ke aha?" wahi a kekahi mau leo helehulehu wale, no ka mea, ua like lakou me kekahi poe keiki e ake 'na e olelo. "No ke aha?" i ka wa i kauoha ia ai e hana ia mea. O na keiki lapuwale ia! Wahi a ka mua i pane mai ai: "Ina aole oe e hana, e pau pu ana me oe." Nolaila, lulu like ae la na pua ia lakou iho a hiki i ka pau ana aku o na enuhe i ka helelei liilii.
         A aia iwaena konu o keia kihapai pua kekahi pua rose nani, ua lulu aku oia i ka enuhe a pau koe hookahi, a wahi ana iaia iho: "O! he mea oi ae keia o ka nani! E malama au iaia hookahi!" I ka lohe ana o ka mua i keia olelo ana, pane mai la ia: O ka enuhe hookahi, ua lawa ia e hoopoino ia oe." "Aka." wahi a ka Rose, "E nana pu mai kaua i kona hulu, he keu o ka nani, lilelile, a me kona mau maka uliuli poniponi nani, ua umii ana o kona mau wawae liilii, hekeheke lua, aohe wahi hoohalahala o'u nona, a ke makee loa nei au, e hiipoi a e malama loa iaia, me ka puniole ae i na leo hoopohala e like me kou; a no ka mea hoi, he oiaio no, aole loa wau e poino i ka mea hookahi."
          He mau kakahiaka mahope mai, ia'u i maalo hou aku ai ma kahi o ka rose nani a maua i papa leo ai; aia hoi, ua nele kona kumu i ka lau ole, ua pau kona nani, a e waiho ana oia me he mea la ua make, a ua lawa kahi ola iloko ona no ke kumakena ana nona iho, oiai na omaka waimaka e hekau ana iluna o na lihilihi, me he kulu wai ke hau la e pakipaki ana iluna o kona mau lau. "Auwe! Aole au i manao o ka enuhe hookahi, he mea ia e poino ai no'u," wahi a ua rose nei. O ka hewa hookahi hoi, he mea ia e poino ai na mea he nui.
          MANAO PILI.—E kuu mau hoa kamalii, he mau Rose nani ohaha oukou mawaena o ke kihapai o na makua, ka ohana; e ao oukou o puni a malama i kahi hewa uuku hookahi, a lilo ia i mea hoopoino mai ia oe a e like auanei kou hopena me ua rose la i nele kona kumu i na lau ole.
Ill. Christian Weekly.

HAAWINA KULA SABATI
HELU 6.—SABATI, NOV. 5, 1876.
KUMU HANA.—Ko Paulo huli ana
PAUKU BAIBALA, Oih. 9:1—18.

EHA aku ana o Saulo i ka olelo hooweliweli, a me ka luku eku i na haumana a ka haku, hele aku la ia i ke kahuna nui.
2 Nonoi aku la i mau palapala no na hale halawai ma Dameseko, ina loaa iaia kekahi mau mea no keia aoao, na kane paha, na wahine paha, e alakai mai no oia ia lakou me ka nakinakiia ma Ierusalema.
3 A i kona hele ana aku, a kokoke ia e hiki i Dameseko, anapu koke mai a puni iho la ia i ka malamalama.
4 Hina iho la i ka honua, a lohe aku la ia i ka leo, i ka i ana mai iaia, E Saulo, e Saulo, no ke aha la oe e hoomaau mai nei ia'u?
5 I aku la ia, Owai oe, e ka Haku? I mai la ka Haku, O Iesu no au ka mea au e hoomaau mai nei. O ke keehi ana i na mea oioi he mea ia e eha ai nou.
6 I aku la ia me ka hopohopo a me ka haalulu, E ka Haku, heaha kou makemake e hana aku ai au? I mai la ka Haku iala, E ala oe iluna, a e hele i ke kulanakauhale, a e haiia no ka mea pono nau e hana aku ai.
7 A o na kanaka e hele pu ana me ia, ku iho la lakou me ka leopaa, ua lohe no lakou i ka leo, aole nae i ike aku i kekahi maa.
8 Ala mai la o Saulo, mai ka honua mai, oaka ae la kona mau maka, aole nae ia i ike i kekahi mea. Alakai lima aku la lakou iaia a hiki aku i Dameseko.
9 Ekolu la o kona ike ana, aole ia i ai, aole hoi i inu.
10 Aia no ma Dameseko kekahi kanaka o Anania kona inoa. I mai la ka Haku iaia ma ka hihio, E Anania. I aku la kela, Eia no wau e ka Haku.
11 I mai la ka Haku iaia, E ku, a e hele ma ke kuamoo i kapaia, o Pololei, ma ka hale o Iuda, e imi i kekahi mea i kapaia o Saulo, no Tareso, no ka mea, aia hoi, ke pule la ia.
12 A ma ka hihio oia i ike aku ai i kehi kanaka, o Anania kona inoa, e hele mai ana a kau i ka lima maluna ona, i ike ia.
13 I aku la o Anania, E ka Haku e, ua nui loa na mea a'u i lohe ai i ua kanaka la, i ka nui o ka hewa ana i hana aku ai i kou poe haipule ma Ierusalema.
14 Ua loaa no hoi iaia ka mana na ke kahuna nui mai, e hoopaa i na mea a pau i hea aku i kou inoa.
15 I mai la ka Haku iaia, O hele, no ka mea, he ipu i kohoia na'u oia nei, e lawe aku ai i ko'u inoa imua o ko na aina e, a me na'lii, a me na mamo a Iseraela.
16 No ka mea e hoike aku ana au iaia i ka nui o kona ehaeha ana ma ko'u nei inoa.
17 Hele aku la o Anania a komo aku la i ka hale; a kau aku la i kona mau lima maluna ona, i aku la, E Saulo, e ke kaikaina, ua hoouna mai nei ka Haku ia'u, o Iesu, ka mea au i ike ai, ma ke ala au i hele mai ai, i ike oe, a i piha hoi i ka Uhane Hemolele.
18 Haule koke iho la mai kona mau maka mai me he mau unahi la, a ike koke iho la ia, a ku mai la, bapetizoia iho la.
Pauku Gula. "He naau hou no hoi ka'u e haawi aku ai ia oukou." Ezk. 36:26.
Pauku hoopaa 1—6.
Mele, Himeni 488. 8—9. Leo.
1 Auhea la ka mana hiki
Ke hoohuliia mai
Ko na aina pouli wale
A loaa ka pomaikai?
Nou ka mana, e ka Uhane;
Nou ka mana e huli ai.
Pule no na aina naaupo, no ka poe hoomanakii, i haule ka Uhane a hoohuli nui mai, &c.
Na ninau a na Kumu.
P 1, 2. Mahea ka lohe mua ana no Saulo? mok 7: 53. E aha ana oia ia wa? E aha ana oia ma keia pauku? ia wai? I o wai la kona hele ana? E nonoi aku i mau aha? no na hale halawai mahea? Heaha, a mahea Damaseko? He kulanakauhale ma Suria. He palapala aha keia? He palapala hopu ia wai? i ka poe no keia aoao, aoao aha? aoao o Iesu. E hopu a aha ia lakou? E alakai i Ierusalema no ke aha? I hookolokoloia a lukuia. He kanaka hoomaau ka Saulo! hoomaau pehea? Me ka naaupo ea. Nana Galatia 1: 13. 1 Tim. 1:13. Heaha ka Iesu olelo ma Ioane 16: 2? Heaha hoi ka Paulo ma 2 Timoteo 3:12? Ua hookoia anei? Heaha ka olelo hooluolu ma Ioane 16:33?
P 3. A kokoke hiki ia Damaseko, heaha ka ulia i loaa ia Saulo? Ka hora hea? mok 22:6. Heaha keia malamalama? Ka nani o Iehova. Luka 2:9.
P 4. Peha iho la Saulo? A lohe i ke aha? ninau mai pehea? ma ka olelo hea? mok 26:14. Ma ke aha ko Saulo hoomaau ana ia Iesu? Ma ka hoomaau ana i kana poe haumana. Mat 25: 40.
P 5. Heaha ka Saulo ninau? Heaha ka pane ana? O ke keehi ana i na mea ooi, he mea aha ia? He mea eha, he mea make ke kue ana ia Iesu me kona aoao. mokuna 5:39.
P 6. Heaha ka ninau hou a Saulo? me ke aha? A pane mai Iesu pehea?
P 7. Pehea na kanaka e hele pu ana me Saulo?
P 8. Ala mai Saulo, a pehea kona mau maka? No ke aha ka ike ole? No ke olinolino o ka malamalama. Pehea oia i hiki aku ai i ke kulanakauhale?
P 9. Ehia la i noho ai oia me ka ike ole, a me ka ai ole? Heaha kana hana ma ia mau la? Ka mihi paha me ka pule.
P 10. Owai ma Damaseko? nana hoi mok 22:12. Owai ka i olelo ia Anania? Ma ke aha? A pane oia pehea? Makaukau koke no e hoolohe ea.
P 11, Heaha ke kauoha a ka Haku? Owai ka inoa o ke alanui? Mahea ia alanui? Ka hale owai malaila? Owai maloko? Nohea Saulo? Mahea Tareso? no Asia uuku. E aha ana Saulo?
P 12. Heaha ka Saulo i ike ai ma ka hihio? Hookoia anei mahope?
P 13, 14. Kanalua ka Anania no Sau-
lo no ke aha ? He kanaka aha oia ? a heaha ka mana i loaa iaia ?
P 15, 16. A pane aku ka Haku pehea? Heaha o Saulo? He ipu aha? He mea kokua i ke kukulu ana i ko Iesu aupuni mahea? A e hoike ana ka Haku iaia i ke aha? Ua hookoia anei mahope?
P 17, 18. Pehea Anania? Heaha kana olelo ia Saulo? E ike oe a e piha i ke aha? Pehea hoi Saulo? Heaha kai haule mai kona mau maka? U'ahaia hoi oia? Huli koke mai ea a bapetizo koke ia e like me wai ma kela haawina? He mea nui kela luna—he mea nui hoi keia.
Mana Iesu me kana olelo.
Mele, Him 462. 6—8. Leo.
1 He hanohano mau
Ko luna Alii maikai;
Mahalo loa kuu naau
I kona nani e.
3 He mana, he maikai
Kou lima e Iesu;
Hoolilo i ou mau enemi
I mau ohua nou.
Na ninau a ke Kahu.
Na Makua. Owai ka i hoomaau nui i ka ekalesia? Aole anei oia he kanaka naauao? Ae, he loio he kumu, he kakaolelo, ua akamai loa ma ko ke Akua mau kanawai. Ikaika hoi i ka malama i ke Akua ma ka aoao o na Iudaio. Mahea kona kuhihewa? Kuhi oia, o ko ke Akua makemake no ia, e hoomaau, e luku i na haumana a Iesu. Hana oia me ka naaupo. No ke aha kona naaupo? No ke aha i alohaia'i oia e ke Akua? Owai kekahi poe e hoomaau naaupo ana i keia wa? Na Pegana, Mahomeda, Katolika, Iudaio, me ka poe paulele nui i ko lakou pono iho. Roma 10: 2, 3. Heaha ko lakou pono?
Na Keiki. Owai keia kanaka nui i huli koke mai? Ma ke aha kona huli ana? Ma kona ike ana i ke aha? Ma kona lohe ana i ke aha? Heaha ka malamalama nui a lakou i ike ai? Ka Iesu olelo. Heaha ka leo a oukou i lohe pinepine ai? Ua hoomaau anei oukou ia Iesu? Ae. Ma ke aha? Ma ka hookuli i kana olelo i kaua poe kauwa. He mea aha ka hookuli? He mea hoeha, he mea e make ai makou. Heaha ko Iesu makemake? E mihi, e huli koke, e lilo koke nona.
Ke Kula a pau. Hai like mai i ka pauku gula me na pauku hoopaa 1—6. Owai na hoomaau i keia wa ? Owai ka malamalama nui? Owai na Anania? Ma ke aha e huli nui ai na hoomaloka, na hoomanakii, &c.
Mele, Him 230. 8—7 Leo Bently.
1 Nani ka Iesu olelo!
Lohe mai e ko ke ao,
Eia hoi! kokoke mai la
Ko ke Akua aupuni hou.
2 Huli mai oukou e mihi,
E pau i ka hanau hou,
Hookaawale oiaio
I ohua no'u oukou.
4 No na kanaka paulele,
Ke aupuni o ke ao;
O ka poe lohe ole,
No lakou ka makemau.
Pule no na misionari ma Maikonisia &c.
Haawina no Nov. 12.—Oih 9: 19—30.

          Ua hiki mai nei na Baibala elua dala i ke Kakauolelo o ka Papa Hawaii, a ua makaukau oia e hoolawa ia oukou ke kipa ae ma kona keena a kaana no oukou iho. E wiki, o nele auanei oukou.

          Ua hoi ae nei ke Kauka Hopemana iloko o kona hale kauka hou, a ua makaukau oia e kokua i ka poe mai a me ka poe i loaa na palapu, nolaila, e naue ae e launa me ia makua oluolu.