Ka Lahui Hawaii, Volume II, Number 43, 19 ʻOkakopa 1876 — Page 1

KA LAHUI HAWAII.
"Ua mau ke Ea o ka Aina i ka Pono."
BUKE II.}  HONOLULU, POAHA, OKATOBA 19, 1876.  {HELU 43.

KA NUPEPA KA LAHUI HAWAII.

Paiia ma kela Poaha me keia Poaha.
H. H. PALEKA,  Luna Hooponopono.
He pepa i hoopukaia i kela me keia hebedoma no na Ohana a me na Ekalesia o Hawaii; he mea kokua i ka noho pono ana o na ohana, ka maluhia o kanaka, a me na pomaikai kino a uhane o ka Lahui Hawaii. "Aole paonioni; aole haanui; aole hikiwawe ka huhu; aole noonoo ino."
O na Kumumanao a pau, na Nu Hou o kela me keia ano, na Mare, Hanau, Make, e kakau mai i ka Luna Hooponopono, a e paiia no ke kupono.
Aole e aeia ka pilikino, ke kuamuamu, ka hoino, a me ka huhu, a ua makemakeia ka hoohoihoi, hoolana manao, hoonaauao, a me ka hoopono.
He $1.75 ka auhau o keia pepa no ka makahiki, a he $1.00 no ka hapa makahiki.
E hookaa mua ia ka auhau o ka pepa mamua o ka loaa ana i kekahi mea makemake e lawe.

NO NA OLELO HOOLAHA.

E lawe ana keia pepa i na Olelo Hoolaha a na makamaka, e like me ke kupono, a e lawa pono ai hoi me ka hoohaiki ole i ka huina o na kolamu kukulu manao, no ka uku haahaa.
O kela a me keia makamaka e makemake ana e hoolaha, e hele mai ma ke keena a e hui pu me ka Luna Hooponopono.
Aole e paiia kekahi Olelo Hoolaha ke ole e hookaa mua ia ka auhau.
Eia kekahi, ke noiia aku nei na makamaka e hoouna mau mai i na mea hou; mai hooloihi loa i na palapala; e hai pololei mai i na manao me ke kuawili ole, a e kakau mai me na hua moakaka.
H. H. PALEKA,
Luna Hooponopono.

PAPA, PAPA.
AIA MA KAHI O
LEWE RS & DICKSON
(O LUI MA.)

KE KAHUA KAHIKO MA
Alanui Papu a me Alanui Moi
E LOAA AI NA
PAPA NOUAIKI o kela a me keia ano.
NA PAPA NANI
A PAA NO KE KUKULU ANA I NA HALE.
Na Pani Puka,
Na Puka Aniani,
Na Olepelepe,
Na Pou, na O-a,
Na Papa hele,
Na Papa Ku,
Na Papa Moe.
Na Pili o na ano a pau!
NA PEPA HOONANI,
Na PENA o na wai a pau
Na Kui mai ka nui a ka makalii,
Na Ami-puka,
Na Ami-puka Aniani,
Na Ami o na ano a pau,
NA AILA PENA,
NA AILA HOOMALOO,
NA AILA o na ano a pau.
NA VANIKI
Na mea HOOHINUHINU o na ano a pau.
Na Balaki o kela a me keia ano.
A KE HAI IA AKU NEI KA LONO i na makamaka a pau, ua makaukau keia mau hoa o oukou e hoolawa aku ma na mea a pau e pili ana ma ka laua oihana
—NO KA—
UKU HAAHAA LOA!
like me ka mea e holo ana mawaena o LAUA a me ka MEA KUAI.
E hele mai! E na makamaka!
A e lawa no hoi ko oukou makemake me ka oluolu
1]  a me ka maikai.

E. STREHZ,
[AILUENE]

MALAILA E LOAA AI NA ANO LAAU A pau; a me na wai hoomaemae o kela a me keia ano. E hamama mau ana ka ipuka ma na po Poaono a pau. Ma ke kihi o Alanui Papu a me Hotele, ma Monikahaae.  1 1y

J. W. CROWELL,
(KEONI KOLOWELA).

AIA ma Alanui Moi, ma nae iho o ka Hale Kahi Umiumi, Malaila e loaa ai ko oukou hoa'loha, me na kiaha Waimomona o na ano a pau, i awiliia me ke anu huihui o ka hau iniki o ka uka iu o Nuuanu. E naue ae a ike maka iaia, he makamaka oiaio.  19-1y

J. PORTER GREEN,
"KEIKI O KAUAUKIUKIU."

HE LOIO! A HE KOKUA OIAIO!
E HELE MAI NA MAKAMAKA A PAU I o'u nei, a na'u no e kokua ia oukou imua o ka Aha Hoomalu a me ka Aha Kiekie me ka uku haahaa makepono loa. Me na oki mare, a me ka hooponopono ana i ka waiwai o ka poe make, he eleu loa ka hana. Aia ko'u keena hana ma Alanui Kalepa kokoke i ke keena o ka Lunakanawai Aeko. E hamama mau ana ka puka, e hele nui mai i pau ka pilikia.  1-1y

A. McWAYNE.
Mea Hoomakaukau a Kuai Laau Lapaau.

MA ke kihi o Alanui Papu me Kalepa. E makaukau mau ana me na Waiala o na ano maikai loa, na Kopa Ala, na Limu Huahuakai, a me na mea he nui. O ke ano Aila Hamo Lauoho oi loa o ka maikai maloko o ke Kulanakauhale nei, no ka hapaha dala wale no, (25k.) no ka omole. E kipa mai e hoao i ike pono.
E haawiia no na kukakuka pili i na lau lapaau i kela me keia manawa o ke ao a me ka po.
29-3m.

Olelo Hoolaha
HALE KUAI!

KE HAAWI ia aku nei ka leo ahailono imua o na makamaka a pau o'u. UA WEhE AE NEI AU, ka mea nona ka inoa malalo, he HALE KUAI HOU, ma KAIOPIHI, KOHALA, HAWAII.
o G. C. AKINA, Pake.
Aia malaila e loaa ai na LOLE NANI HOU LOA, no na kane, na NANI IHIIHI LILO I KA WAI no na Kaikamahine opio me na Wahine, a me na Kamalii, no ka uku make pono loa. He emi loa ka lole o na ano a pau, me ka oluolu o na kumukuai. O ka poe a pau e kipa mai ana a kuai, e loaa nona MANUAHI ia lakou me ka nele ole.
6 m  G. C. AKINA—Pake.

CECIL BROWN,

Loio a he Kokua ma ke Kanawai
A HE AGENA NO KA HOOIAIO ANA I NA Palapala no ka mokupuni o Oahu.
Helu 8 Alanui Kaahumanu, Honolulu, H. P. A.

G. W. WEST!

HALE HANA KAA HOLO LEALEA ME na kaa hali ukana. E hana ia no ho na kaa nahaha no ka uku oluolu. E kapiliia no kapuai lio, no ka uku kupono. Ma ka hale hana mua o Mr. Benfield, ma ke Alanui Alii  1-1y

S. B. DOLE.

LOIO a he Alakai ma na mea pili Kanawai. Ua makaukau oia e pale i na hihia imua o na Aha Hookolokolo a pau o keia Aupuni, me ke kakau ana i na Palapala Pili Kanawai, ma ka olelo Hawaii a ma ka olelo Beritania.  1 1y

ELINA KE KOA
HE KANAKA OPIO
PUUWAI WAIPAHE!
KA PAKEKAUA LIONA HOI O KONA MAU LA
KE PUKONAKONA O KONA LAHUI, A O
KA OI WELINA HOPO O KONA
MAU ENEMI.
Mokuna IX—Helu 36.

          HE MEA hiki ole i ka mea nana ka makakila peni e hoomanawanui pu nei me na makamaka heluhelu, ke hoomaopopo i ke ano o ka kakou koa Elina mau hiohiona ; a me he la ke ike ia iho nei no ke ano kaumaha kaniuhu o ka wai eleele o ka inika, e puana'e ana, he kaumaha ka ukana luuluu o kona puuwai ia minute. Ae! ua punia kona mau noonoo hohonu ana e na ouli o ke kahaha, a holo puni ae la ke anu maeele o ke aloha ma kona mau aakoko i ka ike ana 'ku i na papalina pua rose o kana aloha, ua hele kino a pilalahi, a o ka nanaina, he ano pupule. Ua maopopo no ia Elina ua kaumaha a weliweli ko Emeline puuwai mamuli o kona komohia ana iloko o keia ulia pilikia, a na ia pilikia i hoano e ae i kona kino a me kona noonoo. Ua nui ke aloha o ke koa no kana mea i iini ai; aka, ua oi pakela aku la kona inaina i na enemi, a haalulu ae la kona mau lehelehe. He oiaio, ua pii ae la ka wela ikiiki hahana o ua koa opio nei; a owai la ke kanaka e pii ole ae ana kona inaina ina e kau aku ana keia haawina maluna ona.
          "O! e ka make; ihea la kou wahi noho,
          A pehea hoi i hooloihi ia ai keia aho,
          I kahua anei no na kaumaha me ka luuluu?
          I ukana awaawa, mulea a awahia?"
          Kau ae la o Elina i kona mau lima i kona umauma, leha'e la na maka uliuli iluna, a puana'e la i neia mau huaolelo maluna. Haule hou iho la na maka maluna o ke kino onawaliwali o Emeline, a pane iho la:
          "He oiaio anei ka mea a keia mau onohimaka e ike nei? A he hihio moeuhane anei ? He oiaio anei o kuu Emeline no keia ?" Kulu iho la kona mau waimaka maluna o kona mau papalina. "He mea malihini ka pulu ana o keia mau papalina i na kulu omaka wai kaumaha o ka luuluu, a ke kulu makawalu nei mawaho, a ke kaheawai nei hoi maloko," wahi hou ana me ka inu ana i na omaka wai e kulu ana ma o a maanei.
          Kau mai la o Emeline i kona poo maluna o ka umauma o ka mea ana i moeuhane mau ai, a me ka leo uwe i pau ae ai:
          "E kuu Elina, aole kau he moeuhane, aka, o ka mea au e ike nei a e hoomaopopo nei, he oiaio ia, e like me ka oiaio o keia leo e pane aku nei. O keia kino au e ike mai nei, o Emeline no ia."
          "Alia ! alia, ke ano poniniu mai nei ko'u mau maka a me he la ua pouli ko'u noonoo ana." Kau ae la kona lima i kona lae, a haule maule aku la i ka papahele. He leo nui i piha i ka makau kai puoho ae mai ko Emeline waha, a haule aku la ia maluna o ke kino o kana aloha, a maule pu iho la laua.
          Iloko o ia manawa, ua hoea mai la o Egemona ma i ka ipuka o luna o ke keena mahope, ua lohe aku la i ka leo uwe o Emeline, a holo mai la. I kona ike ana i ke kino o kona haku alii e waiho a make mai ana, a me ke kino hoi o keia kaikamahine, ua lele koke ae la kona oili, a ua puiwa nui me ka manao ua make. Hookahi ona leo kahea i ko laua mau luina, "maanei oukou a pau ano !" A me ka mama o ka lele ana 'ku, a ku ana makahi o keia pilikia. Lalau iho la i ka lima o kona haku, a haha iho la i ke pana, aia hoi e mau ana no, a pela no hoi me ko Emeline. Ua hoomaopopo koke iho la no ia he maule wale no, a mahope iho o ka hoopulu ana i ko laua mau poo me na kuluwai, ua pohala loa ae la.
          O ka mea mua loa ia Elina, oia no ke kaakaa loa ana'e o kona mau maka, ala ino ae la a ku iluna, leha ae la na onohimaka piha inaina ma o a maanei, aaki iho la kona mau kui a nakeke na niho, huki ae la i kana pahikaua, wii ae la iluna a pahu iho la i ka papahele, pane ae la me ka leo moakaka ano eehia, me ke kau ana'e o kona mau lima iluna:
          "Ma o ka mana o na lani, ke haawi nei o Elina he hoohiki, a ke kuni paa nei ma na kuono o kona puuwai. He kanaka au i manao nui i ke ola o ke kanaka, oiai, ma ko'u manao paa, o ka makana momi oi ia o ka makamae i ko ke ao nei. Ua halawai au me na hoapaio lehulehu wale, a ua paio no hoi me lakou. Ua hoao lakou e lawe i ko'u ola, a ua minamina ole i ko lakou iho: a owau hoi, ua paio aku au no ka lawe pio ana i ke kino me ka malama i ke ola, a me ka manao nui hoi i ko'u ola kino. Aka, ano, ke haalele nei au ia kulana, a o ka powa mua e maalo ana mamua o ko'u mau maka, e inu no au i kona koko i hoomaaliliia'i ka inaina e hoopunana nei iloko o keia puuwai. A e kuu hoa'loha, e Egemona; a e kuu mau makamaka alo kai a pau, ke haawi aku nei au i ke kauoha paa, e haawi aku i ka hoopai kupono i na powa, oia hoi ka make. A ano, e hoike mai ia'u i kekahi kino powa, a na'u e haawi aku ano i ka hoopai kupono maluna ona."
          Ua ano pioo kona noonoo, a ua piha i na mea hoolauwili, aka, aole no i liuliu, e like hoi me ke ano mau o na koa, ua maalili iho la kona wela, a hoi hou mai la no kona ano mau.
          I ka lohe ana o Egemona ma i keia mau huaolelo a ko lakou haku, ua ano kahaha, aka, ua pane ae no nae ko lakou mau leo me ka puana like ana: "Ma ka mana o na lani, o kou makemake e hookoia."
          Aole i hoomaopopo mua o Egemona o Emeline keia kaikamahine, oiai ua pioo ko lakou mau noonoo a ua ano hoohewahewa; no ka mea, ua ano loihi ae nei na la o ko lakou kaawale ana. Oiai lakou e ku ana me ke kahaha, ua huli mai la o Elina a pane mai la:
          "Auhea na enemi i keia manawa? ua paa anei lakou, ua lawe pio ia anei? a ua lanakila paha!"
          Ma ka inoa ou e ka makua alii, ua lawe pio ia lakou, a o ka poe i make, ua nalo aku na kino malalo o ka ilikai. O ka moku o ka powa, eia ke kali nei i kou makemake," wahi a Egemona.
          "E puhi i ke ahi, oiai, aole loa e ae keia mau onohi maka e ike hou i kahi i hoopaahao ia ai kuu Emeline e na powa aihue!" wahi a Elina.
          O ka maopopo mua ana ia ia Egemona ma o Emeline no ka keia. I ko lakou hoomaopopo ana o Emeline keia, ua ulu ae la ka pakeu o ko lakou inaina, no ka mea, ua like kona inoa ia lakou me he momi la.
          Ua ano nawaliwali o Emeline, a hapai ia 'ku la ia me kona koolua i hoopaahao ia a kau iluna o ka Zelina. A i ka makaukau ana o na mea a pau, ua kuniia 'ku la ke ahi, a he manawa pokole, ua hao ae la i kona mana a lalapa ae la a puni ka moku o na powa. Ua hoa ia i ke ahi e like me ka Elina kauoha. Kau hou aku la ka ihu o ka Zelina no ka home, a haalele mai la i ka moku pauahi mahope.
          I ka luana ana o na mea a pau iluna o ka Zelina, ua hui aloha iho la o Emeline me ke kaikamahine opiopio a Elina ma i hoopakele mua ai mai ka powa, a ua maikai a oluolu ko laua launa pu ana.
          Hahai mai la o Emeline i ke ano o kona aihue ia ana i kana aloha, a penei no kana mau kamailio ana:
          "I kuu alii, mai ka nalo ana o kou mau maka mai ka aina au, mai ka pau ana hoi o ka ike ana o keia mau onohi i kou mau hiohiona kamahao, mai ia manawa mai ua uhi ana o ke kaumaha maluna o ko'u kino a hiki mai i ka manawa hauoli o ko kaua hui hou ana iho nei. Ua haalele iho oe ia'u mahope iloko o ka hanohano nui, oiai, ua hoonoho oe ia'u malalo o ko kakou Moi lokomaikai, aka, oia mau hanohano a me na lokomaikai, ua nalowale aku, a ua auhee hoi i ko'u aloha nou. Ua hooikaika ka Moi a me ka Moiwahine e hoohauoli ia'u, a ua hauoli ole au. I kekahi po, ua hoonani kamahao ia na paia o ka halealii Roiala, a ua piha i ka nani a puni ka pa alii, me he mau hoku gula la na kukui hoonani, a he malamalama ka mea i hohola ae a puni.
          "He ahaaina hauoli nui, he hulahula alii, a he mau hoonanea e ae kai haawiia e ke poo karaunu o ko kakou aupuni, i mea e hoohauoli ia'i ko'u puuwai, aka, he mea kamahao ia'u, ma kahi o ka hauoli, he kaumaha kai loko o'u, e hoomanao mau ana au nou, me he la aia no kou mau hiohiona mamua pono o ko'u mau maka.
          "Ia po, ua uluaoa na 'lii a me na maka hanohano i poloai ia 'ku, a mawaena o ko lakou heluna, ua ike aku la au i kekahi kanaka opio, a i ko'u mau maka, ua like kona kulana, kona mau hiohiona, a me kona leo, me ka'u mea e iini nei. Ae! o kona mau ano a pau, ua like loa me kou e kuu Elina. Lele ae la ko'u hauli, hakapono aku la ko'u mau maka iaia me ka ninau iho o loko, oia anei kela? ina oia, heaha la kona mea i ike ole mai ai ia'u, a pehea hoi kona hiki ana mai ia nei? He aahu kona o ke kanaka koa Beritania, o kona kaei, ua like loa me kou, a pela ka pahikaua e paa ana ma kona aoao. Paa iho la ko'u manao e ike maka, a e kamailio pu, i maopopo ai ia'u, ina o ka mea a'u i kuko mau ai i ka la a me ka po, a ina paha he mea okoa.
          "Kauoha aku la au i kekahi o ko'u mau kauwa e kii aku i ka Moi. Hiki mai la ka Moi imua o'u, a noi aku la au i kona oluolu e hoolauna aku ia'u me ua kanaka nei, a ke mihi nei au no ia manao pupule o'u. Ua oluolu i ka Moi ka'u noi, a ua hoolauna ia mai ai, o Kavalia Eduada. Pane aku la au iaia: O kou mau ano a pau, ua like no ia me kuu Elina, a no ia mea, ua noi aku nei au i ka Moi e hoolauna au ia'u, no ka mea, o ka ike ana 'ku i kou mau helehelena, oia no ka mea nana i hoomahuahua ae nei i ko'u aloha, a me he la, eia no kuu Elina imua o'u i keia manawa."
          Me ke ano puiwa ua Kavalia nei i kuemi hope aku ai, a pane mai la me ka leo haalulu: "E ka wahine ui makamaka maikai o ka mea nona ka inoa au i hoopuka mai la, oia no ko'u kaikuaana ponoi. He mau makahiki loihi ko'u kaawale ana, aole maua i ike i kahi me kahi, a ano, i kou hoopuka ana mai nei i kona inoa, ua like ia me ke ahi uwila i oaka'e nei iloko o ko'u puuwai."
          "O, e Elina! ua like kana mau kamailio ana me kau, a he keu o ko'u mau manaoio i kana mau huaolelo. Mahope o ko maua mau kamailio ana no na mea e pili ana ia oe, ua ano hoohuoi no au, no ka mea, i ko kaua launa mua ana a hiki mai i kou haalele ana ia'u, aole loa oe i olelo mai he kaikaina kou, aka, ua hai mai no oe he mau makua no kou, aole hoi e hihi, ua hoomaka mai la kela i ke kamailio ana no na mea e pili ana ia oe, a no ke akamai, a me ka pahee o kana mau huaolelo, ua manaoio aku la wau iaia."
          "Alia! alia! wahi a ua Kavalia nei ia'u, "he aloha ko'u e paila nei no ko'u hanau mua, a
          E na lani, e hooloihi mai i ko'u hanu ana,
          I ko'u ola ana ma keia honua,
          E ae mai! E ka mana lani kiekie,
          E ike au i kuu kuaana, kuu mea aloha nui!"
          No keia mau huaolelo a ua Kavalia nei, ua holo ae la ke anuanu a puni ko'u kino nei, a uhi iho la ke aloha a pouli ko'u noonoo.
          [E na makamaka heluhelu, ano, ke ike nei kakou i ka molale o na huaolelo a keia kanaka Kavalia opio, nona hoi na hiona like me ko Elina, wahi a Emeline, aka, e ae mai oukou e hai aku ka mea nana ka makakila e kakau nei, ua ike mua ia ko laua wahi i like ole, oia hoi, he puuwai waipahe ko keia Kavalia i komo kukonukonu iloko o na manao ino o ka powa, a o ko Elina, he puuwai waipahe kona i nele i na manao ino, aka, ua piha a hu me na manao waipahe o ke aloha oiaio, i kilihune ia me na momi makamae o kona puuwai huihui, a kahua hoi o ke kupaa a me ke koa oiaio.]
          Wahi a Emeline, i kona hoomau ana aku i kana mau kamailio ana: "Pane mai la ua Kavalia nei, e hele aku kaua mawaho, a e hai aku no au i kekahi mea a'u i lohe mai nei nona, kuu kaikuaana hoi a'u i aloha nui ai, a o kau mea hoi i iini nui ai. Hele aku la maua malalo o na pua a me na lau, a hoomaka mai la oia i ke kamailio ana me ka maalea. Ua panemai kela, no ka mea, ua lilo ka wau he aloha nau, e kuu Elina, a oiai hoi he muli oia nou, ua haawi mai la kela i ke aloha o ke kaikunane. A ua lawe au i kona aloha kunane, a haawi aku la hoi au i ke aloha kuahine. Aka, e kuu aloha, he mea kaumaha ko'u hai ana aku ia oe, ua punia au me ka uhane ino, a me na hoowalewale lapuwale, no ka mea, ua honi aku la au i kekahi mea ala, a holo ae la i ko'u umauma, a maule aku au. I ko'u ala ana ae, eia ka wau iloko o ka lumi o kekahi moku, e holo ana i ka moana. Hoomaopopo iho la au, ua hoohoni ia au me ka waiala hoohiamoe, a ua lilo au malalo o ka mana o na powa. O ka uwe, he mea ole ia, aka, he muliwai kai kahe aku mai loko o keia mau onohi maka, a auwe! kuu pilikia a me ka ano make. I ko'u ike ana iho ua lilo au, hoomaka mai la ka puanuanu o ko'u kino, a hoomaka'ku la au i ka pule ana i ka lokomaikai o na lani e hoouna mai ia oe a hui pu kaua, a i ole, e lawe aku i keia ola kino, a me he mea la, ua lohe mai la ka mana kiekie a ua ae mai i ka'u noi, hoouna mai la ia oe a hui iho nei kakou.
          O ke aloha nou e kuu Elina,
          O ka iini nou e kuu aloha,
          Mai ka Mana Lani mai,
          A loaa wau! Aole loa e pau.
          "O kela kanaka i haule au la i ka papahele a make, oia no ka mea nana au i hoowalewale. He umi a me elima la ae nei i hala mai ko'u aihue ia ana, a iloko oia mau la, aole loa i hoomaha iki ke kulu ana o ka waimaka, a aole no hoi i hoomaha ko'u u ana. Holo mai la na hoomanao ana nou e kuu aloha, a me ko kaua mau makua. O kou mau hiona, he kii no ia e kau mau ana imua o ko'u mau maka, a o kou mau ano a pau, ua halialia mai ia ia'u. He kaumaha o ke ano i ike ole ia e ka mea ola ma keia honua, a aia wale no ma ka moeuhane, a halawai aku la me kou mau helehelena, alaila, kulu makalii iho la na omaka wai o ka hauoli no ka manawa pokole.
          "Ua kau mai na hana ino a ka powa maluna o'u, aka, ua noi ikaika aku au me ka manao paulele maluna o ka lokomaikai o ka mana lani, a ua hoolilo au i ka manaolana e hui hou kaua i palekaua no ko'u mau kaumaha a me ka luuluu. Ua noho au no elima la me elima po me ka ai ole, a no ka nui o ko'u uwe, ua hauhoa ia iho la ko'u mau wawae me ke kaula hao, a hooaka ia mai la e hoomakaukau. Me ka olelo, mai, ina aole au e hauoli aku me lakou, alaila, e kiola ia no au iloko o ka opu o ka moana, a e lilo hoi i inai na na ia waha nui o ka pouli hohonu. Auwe! Ua wiwo au a ua hopo, punia mai la ko'u kino me na makau haalulu, aka, oiai au e ku haalulu ana imua o na powa, me ko lakou mau maka inaina e haka pono mai ana ia'u, ua holo mai la ke anu huihui hooipo o ka maeele ma ko'u houpo, a hoi hou mai la na hoomanao ana i hooni paa iho i ko'u manao koa, a pane aku la au me ka leo kalakala i ka i ana aku:
(Aole i pau.)

He Make i aloha nui ia.

          E oluolu oe e hookomo iho i keia wahi puolo ma kahi kaawale o kou pepa.
          Ua make o Mr s. D. M. Kaipupau ma ka la 6 o keia mahina. Ua hanau oia ma Kona Akau, Hawaii ma ka makahiki 1836 a make ma Honolulu nei, 1876. He 40 ka nui o kona mau makahiki o ke ola ana. He wahine oia i manao nui ia e ka poe i launa mau meia, he oluolu, he malama ohana, he mikiala ma ka hooponopono hale ana, ua haalele iho nei mahope nei he mau keiki elua, ka makuakane a me ka lehulehu e kahikau aku ma keia aoao o ka pahu hopu. Aka, ua olelo ia, Pomaikai ka poe make iloko o ka Haku Iesu Kristo. A ke kanikau aku nei makou iaia, oia keia:
Kanikau aloha ia oe e Kaipupau;
Aloha oe, aloha au.
Aloha ka leo o na keiki a kaua,
E uwe mai—e.
Aloha ino no kuu wahine,
Kuu hoapili o ke anu me ko koekoe,
Kuu hoa kulolia i ka ua me ka makani;
Hoa nana i ka ua kamakaahala o Nuuanu.
Ua hala ua makani kuu wahine,
Ua hele aku nei i ke ano ahiahi.
I oili kohana aku la i ke aumoe.
Ku kohana ka uhane o kuu wahine
Iluna o Nuumealani i ke ao opua oo—e,
I ka pea kapu o Kane ma laua o Kanaloa
Ooe paha ka uhane iluna o ke opu makani,
O ka uhane i lilo iho nei, o ke aloha ua hala
Ua lilo ke aloha ma Hiikua Hiialo
I na kupueu o Moakea,
Ia Mokukeleikahiti ma laua o Kaeloikamalama
Naueue aku la luna o Kealohilani.
I ke ku a ka uhane i ka pae opua ooe—e,
E nana ana i ka manu nana i kaohi ka la;
E kukai olelo ana me Laukieleula,
Loaa ka hoa noho o kuu wahine—e,
Aloha ino. E uwe mai—a.
Me he ao naulu la ke aloha e kau nei ;
Kauhi paapu, pouli i kuu manawa,
Holo ka maeele loku hui i kuu manawa,
Loaa ka ukana nui a loko e hana nei,
E auhau mai ana i kana o ke aloha,
O ka u o ka minamina paumako ia oe—a,
O oe ka'u i ike i ka ponei e maaloalo ana,
Hikilele puiwa au i ko aloha,
Hopu hewa ana au i ke kino wailua—e,
Aloha ino ooe, E uwe mai—a.
O ka leo paha ia o kuu wahine
E wawalo nei makai o Ulakua oe,—
Eia i ka welelau aheahe makani,
E hoolono ana i ka nehe a ke kai i ke one,
Auwe kuu wahine e, E uwe mai—a.
Aloha ka leo hanehane o kuu wahine
Aloha ka wahine ka hoapili o kaua o ka la—e,
Ka hoa ohumuhumu o ke ala wai koekoe,
O ke ala wai anu a kaua e pili ai—e,
Kuu hoa hoolaukanaka o kahi mehameha
Nou paha ka uhane aloalo e heahea nei,
Aheahe ka leo malihini hou o kuu wahine o oe,
O oe kai hele aku nei i ke kulu o ke aumoe,
Ko ke ano he kuaua na ka waimaka,
He kauwa hooluhi na ka lia me ke kuko
Aloha ino no kuu wahine.
O ka wahine o ka uhane i hele iho nei,
O ke aloha o ke anoano ua lilo aku la—a,
Ua lilo kuu wahine ua maliu ole mai ia'u,
Ua hoi aku la i Kahakaekaea;
I ka aina kapu o na kupuna.
Huhuhui aku la me Moanalihaikawaokele
Ike aku la oe i kini lehu kupuna ou,
Kuu wahine e, E uwe mai—e.
Ua hele au a paila i ko aloha e,
Ua hele a maeele au i ka uluku a ka manao;
O ke aloha o ke kuko o ka lia ia oe—a,
Eia hoi au, e ke Aloha e. Hoi mai kaua—a
E uwe mai—e!
D. H. KAUA.
Aloha ino no kuu makuahine,
Ua haalele mai nei ia maua na keiki,
O ka uhane ka ia o kuu makuahine,
E ku nei iluna o kaonohi o ka la,
Hoi ka wela i Kahakaekaea,
Ka uhane nana i alai kaua;
Maloo na kiowai o Kulanihakoi,
Auwe kuu makuahine—e,
O maua ia e uwe aku nei ia oe,
I ka makua nana e hooponopono mai,
Nou paha ka uhane i halulu aku nei,
I ke ano wailiula o ke ahiahi,
I oili kohana iho nei ma Hiikua.
Palanehe ole ka helena a kuu makuahine,
I hele aku nei me Laukieleula,
Loaa ka hoa hele o kuu makuahine—a,
Auwe kuu makuahine—e.
E uwe ae ana au i ka hele ana o ka makua
O ka hoapili o ke anu me ke koekoe,
Akahi a anu loko o ka houpo—
Ua hele a haalulu i kuu manawa,
I kanae kolopua a Kamanawaino
Haihai pua a ke aloha ole e, aloha ole,
Aloha ole kuu makuahine ia maua,
I ka uwe a na keiki makua ole—a,
Auwe kuu makuahine—e.
Eia maua ua haiki loko,
Ua kupu halialia i ka manao—e,
Ke hoopouli mai nei i kuu manawa
I ke aloha me ka paumako ia oe—e,
E huli, e hoi! Hoi mai kakou—a!
MISS. LIZZIE M. K. KAUA.
E kanikau ae ana au ia Mama,
Ua haalele ino mai nei ia'u'
Ua hele manawaino aku nei,
I kana huakai hoi ole mai.
Mihimihi ole mai ia maua
Ia'u me kuu hanau mua—e.
Aloha ino no ka makua
Ka hoa noho o ka hale,
Hoa ohumuhumu,
Auwe oe e Mama e, E uwe mai—e.
O ka leo paha ia o Mama,
E pa aheahe nei,
E wawalo nei i ke aumoe,
E hea ana ia Haiwahine,
I hoa hele no kuu makuahine,
Loaa ka hoa ohumuhumu o ke ala,
Walea ai kuu makuahine.
I ke aheahe makani moae,
Ua makani kuu makuahine.
Ua lilo aku la i ke keiki hou—e,
Auwe oe e Mama e! E uwe mai—a!
MASTER D. S. KALANAKILA KAUA.
Kanikau aloha ia oe e Kaipupau,
Kuu kaikamahine mai Kalai o Kona,
Kuu hoa aukai pu no e.—
Aloha ino no kuu milimili.
O oe hookahi hoi ka'u nui,
Loaa ka'u ukana nui.
E au mai ai hoi i ke kai ia oe,
Akahi paha hoi a pau.
Ko'u au ana mai,
Ua hala oe, ua haalele mai ia'u.
Auwe kuu kaikamahine e, E uwe mai—
Aloha ino no kuu keiki,
I hele hookahi aku nei,
Aohe lua, aohe kolu, aohe ukali
Oia wale no ia i hele aku nei
I hoi aku nei me na kupuna ona,
Aia i ka lewa nuu, lewa lani.
Ke ike 'la oe i ka nui i ka lehulehu,
Auwe kuu kaikamahine—e!
E uwe mai—a.
MR. NAHINAELUA.
He kanikau aloha keia nou e Kaipupau,
Aloha ino no kuu kaikaina,
Kuu hoa mai ka la wela o Kawaiahao
Mai ke kula iiki a ka manao e noho nei,
Ua ikiiki au ua paupauaho i ko aloha,
Aloha ino no ka uhane o kuu kaikaina.
I oili aku la i ke aumoe,
Hele hookahi ka uhane aohe lua;
Ai ka lua o na wahine maka'kai
E nanea ana i ke kuipua lauahea a ka makani,
Ua makani ka uhane o kuu kaikaina,
Ua haalele mai nei ia makou.
Ua lilo aku la me Liawahine,
Me ka makua aloha i kuahaehae.
O laua no i Hanakewa,
Kupa kauhale i Kauai a Kanaulu,
I ke ahe makani o ka aina, ke noho—la,
Aloha ino, E uwe mai
E aloha ae ana au i kuu kaikaina,
I ka hele hookahi ana,
Aohe lua, aohe kolu,
O oe ka uhane e maalo hookahi nei,
Iho aku la oe ma ka lala pali o Maunoloia,
Hui aku la oe me ou kini aloha o ka po;
Me ke aikane me Haiwahine i ka pali e,
Aloha ino,
I Iku-a lua o ka uhane i ke aumoe.
O Hanehane oe, o ka leo i ke ahiahi;
O puiwa au hiki lele i ko aloha
O ko aloha oia ka'u e malama nei e lia nei;
E hoolawa nei ia loko a lawa,
Ua lawa au, ua paumako i ko aloha e,
E uwe mai—e!  MRS. KEAU.
Waiahao, Honolulu, Oct 11, 1876.