Ka Lahui Hawaii, Volume II, Number 42, 12 October 1876 — Page 4

KOMI TE HOOPONOPONO NO KEIA AOAO.

LAIKI MAKUA,  MRS. SARAH F. GILMAN,
M RS. ELENA MCCULLY,  MRS. C. C. COLEMAN.

KA NUPEPA KA LAHUI HAWAII
HONOLULU, OKATOBA 12, 1876.

HE PALAPALA.

          O na Lede o ka Papa Wahine o Honolulu, ke haawi aku nei i ko lakou aloha i na Makamaka Hawaii a pau, na makua me na keiki.
          Mamuli o ka iini nui o ko makou manao no ka pomaikai piha o na opio Hawaii, ua hooholo makou me Paleka no keia aoao o ka nupepa KA LAHUI HAWAII, a e kokua makou ma ka hoopiha ana i na kii a me na manao e waiwai ai a e makemakeia'i e ka poe opio, a i waiwai hoi ia no na makua me na keiki.
          Ke kono aku nei makou i na makamaka Hawaii, e kokua pu mai ma ke aoao ana mai i na mea e pono ai, a me ke kakau pu mai i na manao kupono no keia aoao. He makemake ko makou e kokua ma na mea e lilo ai ka LAHUI HAWAII i pepa e pomaikai ai na ohana aole nae oia wale no, aka, e lilo keia pepa i kokua nui no ko kakou mau kula Sabati.
          E na makamaka aloha, ina he manaolana io ko kakou no ka hoomau ia ana aku o ka ekalesia o Kristo ma Hawaii nei, he pono e ala mai kakou ma ka hana Kula Sabati.
          Me ke aloha makou e hoopuka aku nei i keia aoao o ka pepa me ka manaolana e lilo ia i kokua nui no na home, a no na kula Sabati, a i apo o ke Kuikahi hoi mawaena o na mea a pau i aloha i ka Haku Iesu Kristo ma keia Pae Aina. Me ka mahalo.
LAIKI MAKUA,
M RS. SARAH F. GILMAN,
M RS. ELEN M. MCCULLY,
M RS. CHAS. C. COLEMAN.
Komi te.

KA HOME.

          MALUNA ae nei e ike ai na makamaka i ke kii o kekahi home ma na aina e. Ia kakou na kanaka Hawaii, he mea liilii ka home i na wa kahiko; oia kekahi o ko kakou mau hemahema, o ka loaa ole ia kakou o na home maluhia maikai e pono ai. E like me ke ano o ka home o na keiki, pela auanei ke kulana o ke kanaka makua. Ua oi aku ka pomaikai i loaa mai i na lahuikanaka no loko ae o na home kupono mamua o ko na hale kula. Maloko o ka home e hoopololeiia'i na manao o ka poe opiopio loa, malaila kahi i ao ia'i kamalii ma ka pono, a o na ao ana olaila he paa, aole poina i na la o ka noho'na kanakamakua. O ka home ka hale kula o ka makuahine, oia ke kumu a o na keiki na haumana. Ua olelo o Napoliona akahi, "O na makuahine na poe kau kanawai no Farani." Eia ke ano o ia olelo, na na makuahine i hoomaopopo i ke kulana o ko Farani lahui ma ka lakou hooponopono ana iloko o na ohana ma na home.
          Ke paipai aku nei makou i na makua Hawaii e hana i na home o lakou a maikai, e like me ka mea i ikeia iloko o keia kii. E hoomaemae ia loko, aohe o ka waiho kapulu. O ka ka makuahine hana ia, i maemae kona hale, i ala, oia kekahi mea e pipili aloha ai ka naau o na keiki i ka hale o ka makua. E hoopuni iho i ka hale me ka pa i maluhia. E kanu i na pua ma ke alo iho o ka hale a me na laau hoonani. E hoohalike kakou me na haole ma ia mea.
          Eia no hoi kekahi, e pale aku i na mea hewa a pau mai ko kakou mau home aku. Mai ae i ka poe hana ino, na mea hoohaunaele, e luana malaila. He mea make ka poe hoowalewale ke ae aku kakou e hookipa ia lakou iloko o ko kakou mau home. O ke aloha, ke ahonui, ke kuikahi, ka manaolana, ka hauoli, oia kekahi mau pua e nani ai na home o kakou. E hoao kakou e hoopiha ia Hawaii nei me na home maikai, oia kekahi kumu e ulu ai ka lahui a e mau aku ai ka inoa Hawaii.
          He pono i na kanaka opio a pau e kuko i home ponoi no lakou; e imi a loaa ia mea. Mai ae kakou e hoolauwili ia kakou iho a e hoolapuwale i ko kakou inoa. Mai kuai aku i na wahi kuleana aina, aka, e malama pono; e kukulu iho i wahi hale maikai, e mahi i ka aina, e malama i ka home, e hana i ka pono, a e noho oe maluna o ka aina me kau poe mamo.

DANIELA ILOKO O KA LUA O NA LIONA.

          O ke alii e nohoalii ana i ka wa o Daniela, o Dariu no ia. He kanaka haaheo oia a he hoomana i na akua kii ; aka, ua aloha oia ia Daniela, nolaila, hoonoho aku la ke alii ia Daniela maluna o na haku a me na 'lii a pau o ka aina, a kauoha aku la oia i na kanaka a pau o ka aina e hoolohe ia Daniela. He kanaka haahaa a akahai o Daniela, a ua kupono ke kulana lunakanawai iaia. Aka, aia he nui wale o na kanaka waiwai a koikoi i hookae ia Daniela, no ka mea, ua kauoha ke alii, e hoolohe lakou iaia, a ua oi aku ko ke alii makemake ia Daniela imua o ko lakou. Ua enemi loa keia poe kanaka ia Daniela, ua like lakou me Kaina ka mea i enemi i kona pokii ia Abela, a me na kaikuaana o Iosepa i enemi ai ia Iosepa, a me Saula hoi ia Davida.
          Aka, e na keiki aloha a'u, i kekahi wa, e loaa ana kaia haawina ia oukou, ka enemi ana i kekahi, ma ka ike ana aku e makana ia ana a hoomaikaiia ia keiki e kekahi mea. Nolaila, ua like oe me Satana. E pule oe i ke Akua, e hoopau ae i na manao enemi ou, no ka mea, e komo ana no kakou iloko o ia haawina hookahi, oiai, he poe hewa kakou.
          Ua ake nui loa iho la keia poe kanaka waiwai e hoopilikia ia Daniela, e imihala iaia imua o ke alii, aole he kumu kupono na lakou e imihala ai, oiai, aole lakou i ike ua hana o Daniela i ka hewa. Ke manao nei au, ua makau paha lakou i ka hoike hoopunipuni aku i ke alii no Daniela, o ike auanei ka lakou mau hana kohu ole. Mahope mai o ia wa, loaa iho la i ua poe kanaka nei kekahi kumu e imihala ai ia Daniela. Ike aku la lakou iaia e pule ana i kona Akua ia Iehova, nolaila, hele aku la lakou imua o ke alii, a noi aku la iaia e kau i kanawai; aole e pule kekahi kanaka i kekahi o na Akua a kanaka paha, aka, i ke alii wale no, iloko o kanakolu la; a i pule kekahi kanaka i kekahi mea e, e kiola ia oia ilko o ka lua o na liona. Aole nae i ike ke alii i ke kumu o ke  noi ana aku o keia poe kanaka iaia e kau i keia kanawai; ina paha e ike mua ke alii, he pule mau o Daniela i kona Akua, ina la paha aole oia e kau i keia kanawai, no ka mea, he aloha ke alii ia Daniela.
          Ua naaupo hoi ke alii i ka ae ana e kau i keia kanawai e like me ko lakou makemake, no ka mea, o ke alii, he hupo, a aole oia i ike i ke Akua ola a aloha aku iaia. Nolaila, kakau iho la ke alii i ke kanawai a kauoha aku la aole e hoololiia.
          Lohe o Daniela i ke kanawai a ke alii i hana'i. E manao anei oe ua hoomau aku oia i ka pule ana? He mea kupanaha loa keia ia Daniela i kona lohe ana, aole e pule i ke Akua no na la he kanakolu; aka, o kona iini piha ka pule mau aku ia Iehova, e noi ana e hoopomaikai mai iaia.
          Kukuli iho la oia ilalo i ekolu manawa i kela a me keia la, me ka pule e noi ana i ke Akua e aloha mai iaia.
          O ka poe kanaka i enemi ia Daniela, hoomakakiu aku la lakou, a ike aku iaia e pule ana oia i kona Akua, a hoi aku la lakou a hai aku la i ke alii no Daniela.
          Ninau aku la lakou i ke alii, "aole anei oe i kau i ke kanawai, aole e pule kekahi kanaka i kekahi Akua a mea e ae paha, aka, ia oe wale iho no e ke alii, a o ka mea e kue ana i kou kanawai, e kiola ia oia iloko o ka lua liona?"
          I mai la ke alii, "ae, he oiaio ua kau au i ke kanawai, a aole e hiki ke hoololi ia." I aku la ua poe kanaka la iaia, "o Daniela, ka mea i lawe ia mai mai Ierusalema mai e lilo i kauwa, aole ia i hoolohe i kau e ke alii, a i kou kanawai hoi, aka, ua pule aku ia ekolu manawa no ka la."
          Ua kaumaha loa iho la ke alii, no ke kau ia ana o ke kanawai no ka mea pule, nolaila, imi iho la oia i mea e make ole ai o Daniela, aka, aole he kumu kupono e pakele ai oia. I kekahi ahiahi, hele mai la na kanaka i ona la, i mai la, "aole e hiki ia oe e ke alii ke hoololi i ke kanawai au i kau ai, no ka mea, ma ko makou nei aina, he kanawai paa na kanawai i kau ia, aole e hiki ke hoololiia.
          Nolaila kauoha aku la ke alii ia Daniela e lawe ia mai, a e kiola iaia iloko o ka lua o na liona: he wahi hohonu ko na liona, i eliia iloko o ka honua; a o ka wa pololi loa o na liona, oia no ka wa ahiahi, e uwo nui ana lakou no ka lakou ai ia manawa. Aole anei e pau o Daniela i ka ai ia a lele liilii i ko lake mau maiuu i kona wa e kiola ia'ku ai iloko o ka lua, kahi hoi o na liona e noho ana?
          Aka, manao iho la o Dariu ke alii, e hoopakele no ke Akua o Daniela iaia, i aku la ke alii iaia, "Na kou Akua e malama a hoopakele ia oe mai ka waha o na liona."
          E manao iho paha oe e ka mea heluhelu ua lohe mahui iki ke alii i ka hoopakele ana o ke Akua i kekahi mau kanaka ekolu mailoko mai o ka imu ahi enaena. Lawe ia mai la he pohaku, a kau ia i ho la ma ka waha o ka lua, a hoopaa iho la ke alii i kona Sila maluna o ua pohaku la, e olelo ana, aole kekahi mea e wehe i keia pohaku, a kau pu iho la oia i ke sila o ka poe i manao ino ia Daniela.
          Hoi aku la ke alii i kona hale alii ia ahiahi, me ka manao maikai ole, aole oia i ai, aole hoi i ae aku i kana mau kauwa e mele mai imua ona, e like me ka maa mau, a i kona hoi ana e moe, aole oia i moe.
          Ala ae la oia i kakahiaka nui. A mahea kona wahi i hele ai? Hele aku la oia i ka lua liona, kahi o Daniela e noho ana; a i kona hiki ana i ka waha o ka lua, kahea aku la ia me ka leo aloha, "E Daniela, ua hiki anei i kou Akua ke hoopakele ae ia oe mai ka waha mai o na liona?"
          Hoolono aku la ke alii o ka pa-e mai o ka leo o Daniela, a lohe aku la ia. Pane mai la o Daniela: "E ola mau loa ke alii. Ua hoouna mai la ko'u Akua i kona poe anela e pani i ka waha o na liona, a aole lakou i hoeha mai ia'u, no ka mea, aole au i hana i ka hewa."
          A ua hauoli ke alii i ka lohe ana aole oia i make; ua kokua kona Akua iaia, nolaila, kauoha ae la ia e hukiia ae oia iluna; a aole he wahi o kona kino i eha a manuheu.
          Heaha ka mea i malama ai ke Akua ia Daniela? No ka mea, ua aloha a paulele o Daniela iaia, a ua makemake ke Akua e hoike i ke alii, ua makaukau oia e hoopakele ia Daniela, a oia hookahi ke Akua oiaio.
          Ua ho-a ia ka inaina o ke alii i ka poe nana i noi mai iaia e kiola ia Daniela iloko o ka lua liona, nolaila kauoha aku la ia, e kiola ia lakou iloko o ka lua liona, ka lakou mau wahine a me na keiki. Ua hewa loa ke alii i ka lawe ana i na wahine a me na keiki a kiola pu iloko o ka lua liona, aka, o ka uku hoopai kupono ia no ka poe kanaka hewa, e kiola ia iloko o ka lua liona. I ka wa i kiola ia ai lakou, ua kauliilii koke ae la lakou i ka waha o na liona, mamua o ko lakou haule ana i lalo i ka honua, ua pau ko lakou mau iwi i ka hakihaki ia e na liona pololi; nolaila, ke ike nei oe ua pololi ino loa na liona, aka aole lakou i kau aku i ko lakou mau maiuu maluna o ke kauwa a ke Akua, oia o Daniela.
          Ke ike nei oukou, e ka'u mau keiki aloha, i ka nui o ke aloha o Daniela i ke Akua, a me ko ke Akua malama ana iaia mai ka waha o na enemi hihiu. E kiola ia anei oe iloko o ka lua liona ke pule i ke Akua? Aole, e kuu keiki, e pule aku oe i ke Akua i na wa a pau a ma na wahi a pau me ka wiwo ole. Ua ike ke Akua ia oe ma na wahi a pau, a e lohe no ia i kau pule ke noi aku oe iaia me kou naau a pau.
          Ke manao nei au e hiipoi ana oukou e na keiki liilii i ke Akua, ka mea nana i hana ia oe, a i hana i keia honua holookoa a kakou e luakaha nei, a e poino ole ai oe i ka hoomanao mau ana iaia, me ka pule, a i ka wa e komohia'i oukou iloko o ka pilikia, e nonoi aku no oukou iaia e kiai mai oia ia oukou, e like la me kona kiai ana ia Daniela.

HAAWINA KULA SABATI
HELU 4—SABATI, OCT. 22, 1876.
KUMU HANA.—Simona ke kilo.
PAUKU BAIBALA, Oih. 8: 9—24.

9 Malaila no kekahi kanaka o Simona ka iaoa, he kilo no ia mamua ma ia kulanakauhale, a pilihua ka lahuikanaka o Samaria iaia, i kana olelo ana, o kekahi mea nui ia.
10 A malama mai la lakou a pau iaia, mai ka poe uuku mai, a ka poe nui, i ae la, Oia nei no ka mana nui o ke Akua.
11 Malama no lakou i kana, no ka mea, loihi ka manawa i hoopilihua ai oia ia lakou i ke kilokilo ana.
12 A i ko lakou manaoio ana ia Pilipo, i kana hai ana mai i ka euanelio o ke aupuni o ke Akua a me ka inoa o Iesu Kristo, bapetizoia iho la lakou, na kane a me na wahine.
13 O Simona no hoi kahi i manaoio aku; a bapetizoia iho la no hoi ia, a e hoomau ana me Pilipo, a ike iho la ia i na mea maha, a me na hoailona nui i hanaia, pilihua loa iho la ia.
14 A lohe ka poe lunaolelo ma Ierusalema, ua loaa i ko Samaria ka olelo a ke Akua, hoouna ae la lakou ia Petero a me Ioane i o lakou la.
15 Iho ae la laua, pule aku la laua no lakou, i loaa ia lakou ka Uhane Hemolele.
16 No ka mea, ia manawa, aole ia i haule mai maluna o kekahi o lakou : ua bape tizo wale ia no lakou iloko o ka inoa o ke Haku, o Iesu.
17 Kau iho la laua i na lima maluna iho o lakou, a loaa iho la ia lakou ka Uhane Hemolele.
18 A ike iho la o Simona, ua haawiia mai ka Uhane Hemolele ma ke kau ana o na lima o na lunaolelo, haawi aku la oia ia laua i kauwahi kala.
19 I aku la, E haawi mai olua i keia mana na'u i loaa ai ka Uhane Hemolele i ka mea a'u e kau ai i na lima maluna iho.
20 I mai la o Petero iaia. E lilo pu kau hala me oe i ka make, no kou manao e loaa mai ka makana o ke Akua me ke kala.
21 Aole ou wahi kuleana, aole ou wahi lihi iki ma keia olelo; no ka mea, aole i pololei kou naau imua i ke alo o ke Akua.
22 Nolaila, e mihi oe i keia hewa ou, a e nonoi aku i ke Akua, ina paha e kalaia mai nou ka manao o kou naau.
23 No ka mea, ua ike au, aia no oe maloko o ke au awaawa, a me ka mea paa o ka hewa.
24 Olelo aku la o Simona, i aku la, E pule aku olua i ka Haku no'u, i hiki ole mai ai keia mau mea a olua e olelo mai nei maluna o'u.
Pauku Gula, p. 22.
Mele Robina Gula, Mele 24
Ma o ae he aina nani,
Ku na puu olilo e;
Owe nani na wai lani,
Pua mau na pua maikai;
Luli ae na pama nani
I na ahe ani mau,
Oli mai na manu lani,
Uli mau la na laau.
Cho. —Ma na puu olino lani.
Maha mau ka poe luuluu,
Pau ka luhi, mele nani,
Maha lani me Iesu.
Pule, e hiki koke mai ka Uhane me kona mana e hoohuli mai na haumana, &c.
Na ninau a na kumu.
Heaha ke kumuhana o kela haawina hope? Ka make ana o Setepano. Owai kekahi i ae i kona make? mok. 8: 1 Na wai Setepano i hoolewa? p 2. U'ahaia ka ekalesia ia wa? p 1. Owai kekahi i luku i ka ekalesia? p 3. No ia hoomaauia, pehea na haumana? p 4. Owai kai hele i Samaria? p 5. Mahea Samaria? Heaha ka hoomana malaila? Ioane 4: 22. Hoomana lakou i ke Akua me ka naaupo. Heluhelu lakou i na buke elima a Mose; hoole nae i na buke baibala e ae.
Owai Pilipo? mok. 6: 5. Pehea ko Samaria poe? p 6. Heaha ka Pilipo mau hana? p 7. Heaha ma ia kulanakauhale? p 8.
P 9. Owai kekahi kanaka ma Samaria? Heaha ka oihana a Simona? A aha ke kulanakauhale iaia? No keaha ka pilihua?
P 10. U'aha lakou iaia? mai ka poe hea a hiki i ka poe hea? Heaha ka lakou olelo nona?
P 11. Pehea lakou i kana? No keaha? Ma ke aha oia i hoopilihua ai ia lakou? He poe kilokilo anei ma Hawaii nei? Makau anei kanaka ia lakou? Ina he poe anaana, a hoopiopio lakou, pehea kanaka?
P 12. Pehea na kanaka o Samaria ia Pilipo, i kana hai ana i ke aha? a i ka inoa owai? Manaoio lakou, a ua aha ia? owai? Maikai ea, hiki wawe ka hoolohe, ka huli ana mai, ka bapetizoia. Aole kanalua.
P 13. Owai kekahi i manaoio a bapetizoia? a hoomau oia me wai? e ike ana i ke aha? a aha iho la ia?
P 14. Owai ka i lohe ma Ierusalema? lohe lakou i ke aha? owai ka lakou i hoouna mai ai i Samaria?
P 15. A hiki laua ilaila, aha aku la? Pule i loaa ke aha? Aole anei i loaa ka Uhane Hemolele mamua? Ua loaa no,
aole nae i loaa ka mana e hana ai i na hana mana.
P 16. Heaha ka i haule ole mai ia wa?
Aole i haule mai me kona mana nui, e like me ia ma ka la Pene tekota. Ua bapetizoia nae lakou iloko o ka inoa owai? Ehia inoa koe? Mat. 28: 19.
P 17. Heaha ka laua i hana'i ? A loaa iho la ke aha ? Ma ke kau i na lima wale no anei i loaa ai ka Uhane Hemolele ? Me ka pule paha, a me ka manaoio kekahi. Ua loaa ka Uhane e huli ai mamua. Akahi no nae i loaa ka Uhane e wanana ai, a hana'i i na hana mana, a kamailio ma na olelo e.
P 18. Heaha ka Simona i ike ai? Heaha kana i haawi aku ai ia Petero ma ?
P 19. Heaha ka Simona i noi aku ai e haawiia mai iaia no keia dala? Kuhi oia he mea kuai ka ka Uhane !
P 20. Heaha ka Petero olelo ia Simona? no ke aha oia e make ai?
P 21. Heaha ka Petero i hoole ai no Simona? no ke aha?
P 22. Heaha ke kauoha? e mihi a e aha? ina paha e aha ia?
P 23. Heaha ka Petero i ike ai? ma keaha kona ike ana ia Simona?
P 24. Heaha ka Simona i noi aku ai ia Petero? Aole anei oia i pule nona iho? Ua mihi io anei oia? a ua kalaia anei? Aole oia i mihi, ua hoomau no i kona ano kilokilo.
Mele, Him. 230. 8—7. Leo Bently.
Nani ka Iesu olelo,
Lohe mai e ko ke ao,
Eia hoi kokoke mai la
Ko ke Akua aupuni hou.
Huli mai oukou e mihi,
E pau i ka hanau hou,
Hookaawale oiaio
I ohua no'u oukou.
Na ninau a ke Kahu.
Na makua. Owai kekahi i ae i ka make o Setepano? Heaha ko Saulo ano mua? Nawai Setepano i kanu? Heaha ka hua maikai o ka hoomaauia o na haumana ma Ierusalema? Holo anei na lunaolelo? no keaha ko lakou makau ole a holo ole aku? Owai ke diagona i hele i Samaria, a hai aku i ka Euaneli malaila? Pehea ko Samaria poe i ko lakou lohe ana i ka Pilipo olelo? Heaha ka pono ke lohe kanaka, kamalii i ka Iesu olelo? E manaoio a huli koke mai, a bapetizoia.
Na keiki. He kanaka kilo ka i lohe i ka Pilipo olelo, a manaoio, a bapetizoia. Owai kona inoa? Heaha ka oihana kilo? Na kekahi makua e wehewehe.
Makau anei oukou i ka poe kilo, a pule anaana, a hoopiopio? Pela paha kekahi poe. Aka, aole pono ke makau. He poe hoopunipuni lakou e like me keia Simona. Heaha kekahi hewa o Simona? Kona manao e kuai i ka mana o ka Uhane Hemolele me ke dala. Hiki anei ke kuai i ke ola mau loa me ke dala? Hai mai. Isaia 55: 1. Mat. 16: 26. 1 Petero 1: 18, 19. Huli hookamani Simona, aole anei i huli hookamani kekahi poe i keia wa? Malama oukou o kahi hewa, a hookamani e like me Simona.
Ke kula a pau. Elua Simona iloko o keia haawina, Owai? Owai? Owai kekahi inoa o Simona ke kilo? Magusa. Owai kekahi inoa o Simona ma Ierusalema? Petero. Simona Magusa, Simona Petero. Owai kekahi Simona? Oih. 9: 43.
Hai mai i ka moolelo o Simona Magusa.
He kilo oia—ma ke kilokilo ana, loaa ka makauia, ka hanohano, ke ola o ke kino. I mea e nui ai kona mana, makemake oia e kuai i ka mana o ka Uhane Hemolele me ke dala. Manaoio oia, huli mai, bapetizoia—i mea e waiwai ai oia. Pela anei kekahi poe i keia wa? Ke dala anei ke kumu pono no ka huli mai a lilo i mau paahana no ke Akua? Hai mai i ka pauku gula. Heaha ka pono o ka poe kuhihewa, a lalau? Hiki anei ke kalaia ke mihi ole, pule ole?
Mele. Him. 172. 8—6 Leo.
Uhane mau! hoolohe mai,
A launa me makou;
E iho me kou mana e,
E iho mai ano.
E iho me he lama e,
I ao ae na naau;
Nau makou e alakai
I kahi ola mau.
Pule i huli io mai na haumana me ka oiaio, me ka naau a pau, i makau i ka huli hookamani, i mihi a pule ka poe i huli hoopunipuni, i kalaia, i make ole, &c.
Haawina no Oct. 26—Oih. 8: 26—40.

NA AHAHUI EUANELIO.
AHA HUI EUANELIO O KA PAE AINA HAWAII.

Ua hoopanee ka Ahahui Euanelio o Hawaii a ka Poakahi mua o Iune, M. H. 1877, hora 10 ma ka luakini o Kawaiahao, Honolulu, Oahu.

AHA LUNA KAHIKO O MAUI.

E halawai hou keia Aha ma Wailuku, Maui, i ka Poakolu hope o Novemaba la, 29, M. H. 1876.

AHA EUANELIO O OAHU.

E hui hou ia keia Aha ma Waialua, Oahu, i ka Poakolu, la 2 o Okatoba, M. H. 1876.

AHAHUI EKALE SIA O KAUAI.

E halawai hou keia Hui ma Lihue, Kauai, ka malama o Okatoba.

AHAHUI KULA SABATI PAE AINA HAWAII.

C. J. Lyons . . . . . Presidena.
Rev. S. Waiwaiole . . . . . Hope Presidena.
Rev. S. Paaluhi . . . . . Kakauolelo.

PAPA HOOKO.

J. F. Pogue.  H. H. Parker.
M. Kuaea.  S. B. Dole.
W. Hall.