Ka Lahui Hawaii, Volume II, Number 40, 28 September 1876 — Page 1
KA LAHUI HAWAII.
"Ua mau ke Ea o ka Aina i ka Pono."
BUKE II.} HONOLULU, POAHA, SEPATEMA BA 28, 1876. {HELU 40.
KA NUPEPA KA LAHUI HAWAII.
Paiia ma kela Poaha me keia Poaha.
H. H. PALEKA, Luna Hooponopono.
He pepa i hoopukaia i kela me keia hebedoma no na Ohana a me na Ekalesia o Hawaii; he mea kokua i ka noho pono ana o na ohana, ka maluhia o kanaka, a me na pomaikai kino a uhane o ka Lahui Hawaii. "Aole paonioni; aole haanui; aole hikiwawe ka huhu; aole noonoo ino."
O na Kumumanao a pau, na Nu Hou o kela me keia ano, na Mare, Hanau, Make, e kakau mai i ka Luna Hooponopono, a e paiia no ke kupono.
Aole e aeia ka pilikino, ke kuamuamu, ka hoino, a me ka huhu, a ua makemakeia ka hoohoihoi, hoolana manao, hoonaauao, a me ka hoopono.
He $1.75 ka auhau o keia pepa no ka makahiki, a he $1.00 no ka hapa makahiki.
E hookaa mua ia ka auhau o ka pepa mamua o ka loaa ana i kekahi mea makemake e lawe.
NO NA OLELO HOOLAHA.
E lawe ana keia pepa i na Olelo Hoolaha a na makamaka, e like me ke kupono, a e lawa pono ai hoi me ka hoohaiki ole i ka huina o na kolamu kukulu manao, no ka uku haahaa.
O kela a me keia makamaka e makemake ana e hoolaha, e hele mai ma ke keena a e hui pu me ka Luna Hooponopono.
Aole e paiia kekahi Olelo Hoolaha ke ole e hookaa mua ia ka auhau.
Eia kekahi, ke noiia aku nei na makamaka e hoouna mau mai i na mea hou; mai hooloihi loa i na palapala; e hai pololei mai i na manao me ke kuawili ole, a e kakau mai me na hua moakaka.
H. H. PALEKA,
Luna Hooponopono.
PAPA, PAPA.
AIA MA KAHI O
LEWE RS & DICKSON
(O LUI MA.)
KE KAHUA KAHIKO MA
Alanui Papu a me Alanui Moi
E LOAA AI NA
PAPA NOUAIKI o kela a me keia ano.
NA PAPA NANI
A PAA NO KE KUKULU ANA I NA HALE.
Na Pani Puka,
Na Puka Aniani,
Na Olepelepe,
Na Pou, na O-a,
Na Papa hele,
Na Papa Ku,
Na Papa Moe.
Na Pili o na ano a pau!
NA PEPA HOONANI,
Na PENA o na wai a pau
Na Kui mai ka nui a ka makalii,
Na Ami-puka,
Na Ami-puka Aniani,
Na Ami o na ano a pau,
NA AILA PENA,
NA AILA HOOMALOO,
NA AILA o na ano a pau.
NA VANIKI
Na mea HOOHINUHINU o na ano a pau.
Na Balaki o kela a me keia ano.
A KE HAI IA AKU NEI KA LONO i na makamaka a pau, ua makaukau keia mau hoa o oukou e hoolawa aku ma na mea a pau e pili ana ma ka laua oihana
—NO KA—
UKU HAAHAA LOA!
like me ka mea e holo ana mawaena o LAUA a me ka MEA KUAI.
E hele mai! E na makamaka!
A e lawa no hoi ko oukou makemake me ka oluolu
1] a me ka maikai.
CECIL BROWN,
Loio a he Kokua ma ke Kanawai
A HE AGENA NO KA HOOIAIO ANA I NA Palapala no ka mokupuni o Oahu.
Helu 8 Alanui Kaahumanu, Honolulu, H. P. A.
C. H. DICKEY, (Kale Kika,)
LOIO!
A he Luna Kepa i apono ia e ke Aupuni no ka Apana o Makawao, Maui Hikina.
E HELE NUI mai ka poe a pau i loohia ia me na pilikia pili Kanawai o ka "Ua-ukiu" nei, a no ko oukou makamaka oiaio no e kokua a e hooikaika e hoopau i na pilikia ma na ano a pau o ke Kanawai. 17-1y
G. W. WEST!
HALE HANA KAA HOLO LEALEA ME na kaa hali ukana. E hana ia no ho na kaa nahaha no ka uku oluolu. E kapiliia no kapuai lio, no ka uku kupono. Ma ka hale hana mua o Mr. Benfield, ma ke Alanui Alii 1-1y
S. B. DOLE.
LOIO a he Alakai ma na mea pili Kanawai. Ua makaukau oia e pale i na hihia imua o na Aha Hookolokolo a pau o keia Aupuni, me ke kakau ana i na Palapala Pili Kanawai, ma ka olelo Hawaii a ma ka olelo Beritania. 1 1y
J. PORTER GREEN,
"KEIKI O KAUAUKIUKIU."
HE LOIO! A HE KOKUA OIAIO!
E HELE MAI NA MAKAMAKA A PAU I o'u nei, a na'u no e kokua ia oukou imua o ka Aha Hoomalu a me ka Aha Kiekie me ka uku haahaa makepono loa. Me na oki mare, a me ka hooponopono ana i ka waiwai o ka poe make, he eleu loa ka hana. Aia ko'u keena hana ma Alanui Kalepa kokoke i ke keena o ka Lunakanawai Aeko. E hamama mau ana ka puka, e hele nui mai i pau ka pilikia. 1-1y
A. McWAYNE.
Mea Hoomakaukau a Kuai Laau Lapaau.
MA ke kihi o Alanui Papu me Kalepa. E makaukau mau ana me na Waiala o na ano maikai loa, na Kopa Ala, na Limu Huahuakai, a me na mea he nui. O ke ano Aila Hamo Lauoho oi loa o ka maikai maloko o ke Kulanakauhale nei, no ka hapaha dala wale no, (25k.) no ka omole. E kipa mai e hoao i ike pono.
E haawiia no na kukakuka pili i na lau lapaau i kela me keia manawa o ke ao a me ka po.
29-3m.
E. STREHZ,
[AILUENE]
MALAILA E LOAA AI NA ANO LAAU A pau; a me na wai hoomaemae o kela a me keia ano. E hamama mau ana ka ipuka ma na po Poaono a pau. Ma ke kihi o Alanui Papu a me Hotele, ma Monikahaae. 1 1y
J. W. CROWELL,
(KEONI KOLOWELA).
AIA ma Alanui Moi, ma nae iho o ka Hale Kahi Umiumi, Malaila e loaa ai ko oukou hoa'loha, me na kiaha Waimomona o na ano a pau, i awiliia me ke anu huihui o ka hau iniki o ka uka iu o Nuuanu. E naue ae a ike maka iaia, he makamaka oiaio. 19-1y
ELINA KE KOA
HE KANAKA OPIO
PUUWAI WAIPAHE!
KA PALEKAUA LIONA HOI O KONA MAU LA
KE PUKONAKONA O KONA LAHUI, A O
KA OI WELINA HOPO O KONA
MAU ENEMI.
Mokuna IX—Helu 34.
A ILOKO o keia mau hana ano e a ke kaikamahine opio, ua hoomaopopo aku la no o Elina ia mea, a ua ike no, aohe i maikai loa kona manao, he ano lauwili a kupikipikio, aka, aole loa nae i komo iho ka moeuhane ana iloko ona, e ulu ae ana la ka manao pepehi kanaka maloko o kona puuwai palupalu. E like me ko Elina ano mau, ua hoao aku la ia e hoomalielie aku i kona mau manao wela, aka, aole e hiki, me he la ua ano pupule mai la ka noonoo.
No ka ikiki o ke ea iloko o ia mau la a me na po, ua hooholo iho o Elina e hoi aku maluna o ka oneki e hiamoe ai o ka po, a haalele iho la i kona lumi o lalo. Aia ma ka aoao akau o ke alapii e iho aku ai, aia malaila ka lumi o ke kaikamahine opio, a mahope aku o ia lumi ko Elina, a me ko Egemona ma. I kekahi po, oiai na mea a pau iloko o ka hihio pauhia o ka hiamoe, aia hoi, e ala ana no ua kaikamahine nei. E kuko ana o loko ona, a na ia manao ano e a weliweli i hoohaalulu mai i kona kino holookoa, a kahe mai la ka hou ma kona lae.
"He hana weliweli keia a'u e manao nei e hooko," wahi a ua kaikamahine nei i hawanawana ae ai, a holo mai la ka hoomanao ana'e i ka hopena weliweli o ka make ma ka amana, ke loaa aku oia, a ano wehewehe ae la na manao lili o kona puuwai no ka mea nona ka inoa o Emeline; aka, aole no nae e liuliu iho nalowale aku la na manao wiwo, a hoi hou mai la ka inaina. Puiki ae la ia i kona mau lima ma kona umauma, a puana hou ae la me ka leo hawanawana ano hae: "Aole! Aole loa ia e kaili mai a'u aku nei i ke aho o ko'u puuwai! Mamua o ke ko ana o kona mau manaolana, e lawe mua no keia mau lima i ke ola o ka mea a'u i aloha ai, a e nele like maua." Kikoo malie iho la kona lima malalo o ka uluna o kona keena, a huki mai la e paa ana he pahi. Ae! He pahi o ke ano oi loa, e like me ka pahi a na powa e pahu aku ai ma ka umauma o ko lakou mau enemi. O keia pahi, ua malama mau oia me ka huna loa maloko o kona poli, mai kona lohe mua ana i ka inoa o Emeline mai ko Elina mau lehelehe mai, a oiai oia ua noho pu me na powa no ka manawa loihi, ua ano maa oia i ka lawelawe ana me na mea make. Ala ae la ia me ka malie loa, me ka naka haalulu o kona kino, e hanu ana me ka malie loa. Ku ae la oia iluna me ka maloeloe o kona kino, huli ae la kona mau maka iluna, a puana ae la me ka hawanawana: "E na lani, o ka hewa a'u e hoao nei e hana, e kala mai!"
Nihi malie aku la oia a ka ipuka, a me ka malie loa i weha ae ai. O ka napoo ana 'ku no ia o ka mahina malalo o ka ilikai, a e mau ana no nae ke ano malamalama, a oiai hoi na hoku lehulehu e imoimo mai ana maloko mai o na ao o ka lewaluna, ua hui pu ae la ka malamalama, a ano moakaka na mea a pau mamua o keia nihi po. He wahi ahelau makani huihui ke pa kolonahe ana ia manawa, waiho molale iho la ka ilikai me ka pi ale ole, o ka malino wale no mahope me ka mahae o ke kai mamua o ka ihu o ua Zelina nei e pakika malie ana.
Ku iki iho la ua kaikamahine nei ma ka ipuka me ka haalulu, a hanu aku la me ke ano hoomaha no kekahi kaumaha e kau ana i kona houpo. Pii aku la ma ke alapii a hehi i ke alapii iluna loa, a kiei aku la. Aia mahope ona, he wahi hale no luna iho o ke keena hope, a na ia wahi hale i huna mai iaia mai ka maka o ke kanaka ku hoe mahope aku. Mamua pono aku ona, e moe ana ke kino o ke Keiki Koa Alii Opio, ua paulehia loa ia iloko o ke koloka o ka hiamoe, a hiki ole ke hoomaopopo ae i na hana a keia kaikamahine, a i ke ano hoi o ke au o ia manawa koke iho no.
Alawa ae la kona mau maka ma o a maanei, aohe kanaka, o ke kino hiamoe wale no o ke Koa Opio. Kai aku la kona mau wawae imua, huki ae la i ka pahi e paa ana iloko o kona poli, nee aku la e kukuli iho la ma ka aoao o ua Elina nei. Hapai ae la i kona lima akau iluna a kiekie, hoopololei iho la ma ka umauma o ka mea ana i aloha nui ai, a i ka aneane ana e haule iho a nalo iloko o ka puuwai, a haawi aku ka makakila i ka make, aia hoi, iloko o ia mehameha, iloko o ka eehia oia manawa, ua puka mai la he leo nahenahe, a he mau huaolelo aloha hoi, mai ka waha mai o ua Elina nei, i ka pane ana mai: "Aloha! E ka make—ua makaukau au!"
Lele ino ae la ua kaimahine nei, me ka manao e holo aku a lele iloko o ka opu hohonu o ka moana, oiai, i ka wa i puoho mai ai ka leo nahenahe o Elina a me na huaolelo aloha, o ka wa no ia i kau mai ai ka lia anuanu o ka makau nui, a hoao aku la e hooko i ka manao naaupo i komo koke mai iloko o kona puuwai, aka, mamua o kona kaawale loa ana aku, aia hoi ua paa aku la ia ia Elina, a pakele kona ola.
"Ma o ka mana o na lani e hookuu mai ia'u!" wahi a ua kaikamahine nei.
"Ma o ka mana o na lani aole loa wau e hookuu aku ia oe!" wahi a ua koa opio nei a kakou.
"E hookuu ae oe i ko'u lima i ko ai ka manao e ake nui nei a ko'u puuwai, a lanakila hoi ka'u moeuhane."
"Ma ka nanaina o na ao o ka lewaluna, a ma ka hihio hoi i loaa ia'u ma ka pili ana o ko'u mau maka, ke hooia ia mai nei ia'u, he ino ka manao o ko'u puuwai e ake nui nei, a e kau mai ana ka hopena weliweli ke ko kau moeuhane. A nolaila, e ke kaikamahine opio, ke hai aku nei au ia oe, o kau mau kuko a me kau mau moeuhane ana, ua hoikeia mai ia'u, a oiai ko'u mau maka ua pili, a o ko'u noonoo iloko o ka hihio hiamoe, aka, o ko'u mau ike a me na hoomaopopo ana, aia no ia imua o'u me he buke laulaha la i hohola ia mai, a ike aku la au i na hana a pau a ka poe e hana ino mai ana. Oiai ua loaa pono oe ia'u, a ua ko ole kau mau hana, ke noi aku nei au ia oe, ma o kou aloha kunane la, e haalele aku i na manao inaina, a e hiipoi i ke aloha kuahine, a oia aloha kuahine kau e haawi mai ia'u, a e malama hoi no'u," wahi hou a Elina i pane aku ai.
"Pehea la e hiki ai ia'u ke ola, mahope iho o ka ike ia ana o ko'u manao, a me ka'u mau hana, a e laha auanei paha ma kela a me keia pea o ka aina?" wahi a ua kaikamahine nei me ke ano uwe.
"Mai makau no ia mea e kuu makamaka maikai, oiai, o kaua wale no keia, aole mea ma ka honua nei i ike, koe ka maka nui malamalama o ka mana lani, a iaia oe e mihi aku ai, a nana no e kala mai kou mau hala a pau, a e hoihoi mai au i ko'u mau manao kaniuhu a pau, a e haawi aku i ke aloha o ke kaikuahine maikai ia oe," wahi a Elina me ka leo kupouli o ke aloha.
"Auhea oe, o ke kahu o ka'u mau hana, aohe ma kahi e aku, a aohe no hoi mawaho ae, aka, o ke aloha wale no iloko o keia puuwai nou e ke kanaka koa ui. Ua hoao au me ka ikaika e pale ae i na koni hala ole ana o keia puuwai, ua imi ma na kuono a me na aakoko o ko'u kino holookoa nei i wahi e loaa'i ka maha, ua nalu iho o loko a ua hihio, aka, o ka maha, ua like me he la he mau eheu kona, a ua lele aku a kaawale loa mai a'u aku, a hookahi wale no haawina i koe iho, o ka wela ikiki o ka hahana kupouli a puni kuu kino. Ua ala mai la na manao makee—ae! he mau manao makee na'u e mihi nei—a na ia mau manao makee i hoa ae ke ahi o ka opu keemoa, a paila ae la ka wa wela o ka ipuhao lili, a o ka hopena o ia mau mea a pau—auwe! he makehewa ia'u ke hai aku ia oe, oiai ua ike iho nei no oe, a me he la e aneane ae ana e mauliawa kou aho ke hoopuka ae au ia mau huaolelo, a hoi hou mai na manao weliweli ana," haule iho la ua kaikamahine nei maluna o ka papahele, kukuli iho la, a me na onohi maka i piha i ka wai o ke aloha e kulu makawalu ana ma o a maanei o kona mau papalina mohala, i huli ae ai me ke ano kulipolipo o ke aloha, poha aku la kona leo mihi imua o ka makua nana e kala mai na hala. A oiai oia e hoopuka ana i kana mau huaolelo mihi, aia hoi, ua lawe aku la ke ahe lau maawe kehau maluna o ka ilikai, a me he la, iloko oia manawa koke, ua uhi paa iho la na eheu o ka meha mania o ka walohia eehia, a no ka manawa pokole, o ka leo moakaka wale no o ua kaikamahine nei ke lohe ia, a me he la, ua lohe ia mai la e ko luna pepeiao aloha, a ua hoohamama ia mai la ka ipuka, a pii pololei aku la kona leo me na huaolelo o ka mihi oiaio a nalo aku la maloko o na ao o ka lani. Aloha kona mihi ana no kana mau hana i alakai ole ia e ka manao ino, aka, i kauo maoli ia e ke aloha, iini kupouli.
I ka pau ana o kana mau olelo mihi, huli mai la oia imua o ka mea ana i aloha ai, puiki ae la kona mau lima ma kona umauma, kulou iho la me ka hookuu ana aku i na pakaua waimaka o ke aloha, a i ka huli ana ae a kau aku la na onohi uliuli o kona mau maka maluna o ua Elina nei, ua pane aku la.
"Eia au la! he lawehala imua ou, a o kou mau makemake, e hooko no au, a e lawe i na hoopai au i manao ai e kau mai maluna o'u, i uku no ka'u mau hana!"
Ua hiki ole ia Elina ke pale ae i ke kulu ana iho o kona mau waimaka; ua hoao ia e kaohi aku, aka, aole e hiki, a no ia mea, ua kulu wale mai la no.
"E ku mai iluna!" wahi ana me ka leo ano hauoli. "O ke kanaka e manao ana e hoeha aku i kekahi o kou mau maawe lauoho, he ilio ia, a he mea pono kona make ana i ka make o ka ilio. Ua hanau ia o Elina me ka puuwai waipahe, aole hoi me ka puuwai hoomainoino. O kekahi kaikamahine opio, i nohoalii ia e na nani kinohinohi, a o ka ui mohala maikai o ke ao nei, e like me kou nani nohenohea lua ole, owai la ke kanaka e kau aku ana i ka manao ino maluna ona? Aole loa o Elina! a aole loa o Elina e ae ana e hookoia ia mea imua ona. O kau mau hana a me ka'u mau moeuhane ana iloko o na minute i kunewa hope aku la, he ku no i ka mainoino kona hopena, aka, e ala mai ana ka ninau, heaha la ke kumu o keia ulu ana'e o keia mau manao? Ina no ka manao ino, no ka inaina, a no ke aloha ole, alaila, he okoa paha ke ano o na hopena, aka, oiai, na ke aloha, ae! na ke aloha wale no, a aole hoi na kekahi mea e ae i alakai i kou manao ma ia mea, alaila me he la, o ke aloha no ka'u e haawi aku i panina no kau. E ke kaikamahine opio, aole loa he mea malalo o keia la e oi aku ai ka hanohano o ka make ana o kekahi koa e like me ka make ana no kekahi wahine, ka puuwai palupalu hoi a na lani i makana mai ai i pua hoonani no ke kihapai o ke kanaka ma keia noho'na, a ina paha i oluolu i ka makemake o na lani e hooko i kou makemake, a halawai ka oi o kau makakila me ko'u puuwai, alaila, o ke kalaunu hanohano a hiwahiwa no ia o ko'u kino kupapau, a he make ana na'u e hauoli ai i na manawa a pau, oiai hoi, he make ana ia no kuu aloha, ka Emeline hookahi hoi a'u e lei ai, a i hoomanao mau ai iloko o na la inea o ka huakai maluna o na kai uli o ka opu hohonu o ka moana." (Aole i pau.)
Ahaolelo Kau Kanawai
O ke Aupuni Hawaii
Ka Moolelo o na hana o ke Kau o
ka M. H. 1876.
LA HANA 105—Poalua Sepatema ba 5.
Halawai ka Ahaolelo e like me ka mau.
Hoike mai ke komite pai, ua pai ia ka bila e auhau ana i na hoailona pai. Apono ia ka hoike.
Hoike mai ke komite wae i koho ia aku no ka noonoo ana no na bila e pili ana i ka palapala ganasi, e noi mai ana e hooholo loa aku i ka bila no ke kakau poepoe, a heluhelu akolu ia ma ka Poaha.
Heluhelu mai o Mr Kalaukoa he olelo hooholo e kauoha ana i ka makai o ka Hale, e hoopaa ia ka lunahoopuka H M Wini a me ka hope lunahooponopono o ka nupepa Kuokoa, J U Kawainui, e hoopaahao ia no na la he 30. Mahope o kona kamailio ikaika ana, ua rula mai ka Peresidena, ua kue keia olelo hooholo i ka pauku 6 o ke Kumukanawai, a me ka rula o ka Hale, a no ia halahu a lalau loa mawaho o ka rula, ua hoihoi hou ia.
M r Gay he bila e kokua ai i ka wehe akea ana i na waiwai o keia aupuni.
Heluhelu mua mai ke Kuhina Kalaiaina he bila e wehe ai i kekahi mau pilikia o na konohiki i loaa ko lakou ma mahele aina mai ka Moi Kamehameha III mai, a me ka poe e noho ana malalo o lakou. Ma ke noi ua kapae ia na rula, a ua heluhelu alua ia ka bila ma ke poo, a ua waiho ia i ke komite hooponopono bila kanawai.
Heluhelu hou mai o Mr Kalaukoa i kana olelo hooholo, e kauoha ana i ka makai o ka Hale, e lawe ia mai ka lunahoopuka a me ka lunahooponopono o ke Kuokoa imua o keia Hale e hookolokolo ia.
Noi o Mr Birch e hoopau loa a haiolelo mai no ke kue i ka pauku 4 o ka kumukanawai, i ka ninau ia ana, ua hoopanee loa ia.
Hoolaha mai ka Loio Kuhina he bila e hoololi ai i ka puaku 3, o ke kanawai e hoololi ai i ka pauku 9 o ka mokuna 32 o ke kanawai karaima.
Heluhelu mua mai ke Kuhina Kalaiaina he bila e pili ana i na palapala hooia a na komisina palena aina. Waiho ia no ka bila heluhelu elua.
Ma ke noi ua kapae ia na rula a hoike mai ke komite wae no ka noonoo ana i na bila e pili ana i na laikini kuai nui i ka lole a waiwai kalepa e ae a me na laikini hoolimalima lio, ua waiho mai lakou he mau bila hou, me ke noi mai e hooholo loa aku ia mau bila no ke kakau poepoe. Apono ia ka hoike. Waiho ia na bila no ka heluhelu elua.
NA HANA O KA LA.
Noi o Mr Nakaleka e hapai hou ia ka noonoo ana no ka bila e hoololi ai i ka pauku 1477 o ke kanawai kivila, e ae ana i na hoa aina e kii i na laau a pau o ke kuahiwi i waiwai no lakou. Hooholoia. I ka ninau ia ana no ka hoopanee loa i ka bila ua hooholo ia; he 19 ma ka ae, a he 18 ma ka hoole. Eia na poe i ae, Halstead, Gay, Halemanu, Kamauoha, Waterhouse, a me Preston, hui me 13 alii, like me 19.
Eia ka poe hoole, Aholo, Kahuila, Kaiue, Kanealii, Pilipo, Lilikalani, Kauai, Naili, Helekunihi, Barenaba, Kalaukoa, Aiwohi, Nawahi, Mahoe, Wana, Nakaleka, Mahelona, Kaina, hui ia he 18 wale no poe i makemake.
Heluhelu alua ia ka bila e hooponopono ai i ke dala o ke aupuni. Waiho ia imua o ke komite o ka Hale ma ka hora 12.
Halawai ka Hale ma ka hora 1 P. M.
Noonoo ia ka bila imua o ke komite o ka Hale. Noho o Mr Kaiue ma ka noho lunahoomalu o ke komite.
Heluhelu ia ka pauku 1, 2, 3, 4, 5, 6, 7, 8, 9, 10, a ua hooholo ia.
Ma ke noi ua hoopau ia ke komite me ka hai aku i ka Hale, ua hooholo loa ia ka bila. Apono ia, a ua waiho ia ka bila no ke kakau poepoe a e heluhelu akolu ia ma ka Poaono.
Heluhelu alua ia ka bila e hooholo ai i mokuahi holo pili aina, imua o ke komite o ka Hale. Noho o Mr Kaina ma ka noho.
Heluhelu ia ka pauku 1 o ka bila, oiai, e noonoo ia ana, ua hoopau ia ke komite me ka hai aku i ka Hale, aole he mea i hooholo ia. Apono ia.
Hoopanee.
LA HANA 106—Poakolu Sepatemaba 6
Halawai ka Ahaolelo e like me ka mau.
Heluhelu mai o Hon Kaai he olelo hooholo, e kauoha ana i ka makai o ka Hale, e hoolako mai i aina awakea no na hoa o keia-Hale. Hooleia; he 22 ae, a he 6 hoole.
Heluhelu mai o Hon Kaai he olelo hooholo, e hoomaha keia Hale, no ka make ana o Hon S M Kamakau, a e hele na hoa i kona hoolewa.
Hoololi mai o Mr Pilipo e hoolako pu mai ka makai o ka Hale i mau kaa a me na kanikau pakahi no na lima a me na papale o na hoa o keia Hale.
Kamailio loihi mai ka Loio Kuhina, i kona mahalo i ka Mea Hanohano S M Kamakau, a hoike mai ua aie keia aupuni no ka pomaikai a Kamakau i hoikeike mai ai, a nui aku.
Hoololi mai o Mr Kauai, e hoolako pu ia mai na hoa a me na kuka paina, lolewawae paina, puliki paina, paa kamaa, a me ka papale pakahi, no kela me keia hoa.Mahope o ka noonoo ia ana ua hooholo ia ka olelo hooholo me ka hoololi a Mr Pilipo.
Hoopanee.
LA HANA 107.—Poaha Sepatemaba 7.
Halawai ka Ahaolelo e like me ka mau.
Hoike mai ke komite o na aha hookolokolo no ka noonoo ana i ka bila e pili ana i ka mahele ana i ka waiwai ma na ahupuaa o Wailuku, Waikapu, a me Waihee, e noi mai ana e hoopanee loa i ka bila. Apono ia.
Hoike mai ke komite o na aha hookolokolo, no ka bila e pili ana i ke kuai ana i
kekahi waiwai o ka mea make i mea e kaa ai kona aie, a me ka bila e pili ana no ka hoohalahala ana i na olelo hooholo a na aha hookolokolo, e noi mai ana, ua hooponopono ia a waiho mai he mau bila hou. Aponoia. Waiho ia na bila no ka heluhelu elua.
Hoike mai ke komite wae no ka noonoo ana i ka bila e pili ana i ka hana a me ka lawelawe ana i na hihia karaima, e noi mai ana e hooholo loa aku i ka bila no ke kakau poepoe. Aponoia. Waiho ia e heluhelu akolu ia ma ka Poalua.
Hoike mai ke komite wkae no ka noonoo aun i ka bila e hooponopono ana i ka lawe ana i ka wai maluna o kekahi apana aina i hoopomaikai ole ia, e noi mai ana e hooholo aku i ka bila me ka lakou mau hoololi no ke kakau poepoe. Aponoia. Ma ke noi e heluhelu akolu ia ma ka Poalua.
Noi o Hon Kaai e hookuu aku ia ia. Ae ia.
Heluhelu mua mai ka Loio Kuhina, he bila e hoololi ai i ka pauku 3, a e hoopau loa ana hoi i ka pauku 9 o ka mokuna 48 o ke kanawai karaima. Waiho ia no ka heluhelu elua.
Heluhelu mua mai o Mr Gay, he bila e hoeueu ai i na oihana kuloko o ke aupuni. Waiho ia no ka heluhelu elua.
Heluhelu mai o Mr Pilipo he olelo hooholo e paa mau ke kanikau ma ka papale a me ka lima hema o na hoa o keia Hale, a hala na la he 30, e hoomaka ana mai ka la 6 o keia malama, no ka noho u ana no Hon S M Kamakau.
Hoololi mai o Mr Mahelona i 20 wale no na la e kau ai ke kanikau. Mahope o ka ninau ia ana, ua hooholo ia i 30 la e kau ai na kanikau.
Heluhelu mua mai ke'lii Ake, he kanawai e hoomahuahua ana i ke dute maluna o na waiwai komo mai. Waiho ia e pai no ka heluhelu elua. Ma ke noi ua waiho ia oia ka hana o ka la apopo.
Heluhelu mai o Mr Kalaukoa he olelo hooholo, aole e hoonoho ia na ona mahiko i mau luna aupuni. Mahope o ka noonoo ia ana, ua hoihoi hou ia.
Heluhelu mai o Mr Nakaleka he olelo hooholo e kauoha ana i ke kakauolelo o ka Hale, e kauoha aku i ka Papa Nana o Honolulu e koho hou. Haule wale.
Heluhelu mai o Mr Kanealii he olelo hooholo, e papa ana, aole e noonoo ia na bila iloko o ka Hale. O ka Bila Haawina wale no; aia a pau ka Bila Haawina, e noi ia aku ka oluolu o ka Moi, e hoopanee ia keia Ahaolelo, a halawai hou ma ka Poaono mua o Aperila 1877, ke ole e kahea hou ia e ka Moi, he Ahaolelo mamua oia manawa. Hoopanee loa ia.
Hoolaha mai o Hon Kaai he bila e pili ana i ka hooponopono waiwai hooilina.
Heluhelu mai o Hon Kaai he olelo hooholo, aole e hoolaha hou ia mai he bila mahope aku o keia la. Hooholoia.
Hoolaha mai ke Kuhina Waiwai he bila e hoakaka ana i kekahi aie.
NA HANA O KA LA.
Heluhelu alua ia ka bila e hoomahuahua ana i ka dute maluna o na waiwai komo mai. Waiho ia aku i ke komite wae, Green, Preston, Walker, Kaai a me Birch.
Hoomaha ka Hale.
Halawai hou ka Hale ma ka hora 1 P. M.
Heluhelu alua ia ka bila e hooholo ana i mokumahu holo pili ana, imua o ke komite o ka Hale. Noho o Mr Martin ma ka noho.
Heluhelu ia ka pauku 1 o ka bila. Mahope o ka hoopaapaa loihi ia ana o na hoa o ka Hale.
Eia na mea kamailio ma ka aoao na ke aupuni e hana i ka mokuahi, Moanauli, Kauai, Halemanu, Pilipo, Nakaleka.
Eia ka poe i kamailio ma ka aoao na ka poe hui e hana i ka mokuahi, Kapena Roke, Helekunihi, Loio Kuhina.
I ka ninau ia ana o ka pauku 1 o ka bila, oia hoi i $1,500 ka ke aupuni e kokua aku ai i ka hui, ua hoole ia; he 24 hoole, a he 17 ae.
No keia hoole ia ana, nolaila, ua lilo ka Hale i ka hoopaapaa no ka make loa o ka pauku a me ka ole. Mahope o ka hoopaapaa ana, ua noi ke'lii Kakela e hapai hou ia ka noonoo ana no ka pauku 1 o ka bila. Hooholoia.
Kamailio mai ke Kuhina no ko na aina e, ma ka aoao kokua i ka hui i haawina, a noi mai e hoopau ia ke komite, a e noi aku i ka Hale, e hoopanee loa i ka bila.
Kamailio mai ke 'lii Kamika ma ka aoao kokua na ke aupuni e kokua aku i ka hui i $1,000 no ka malama. Oiai e noonoo ia ana, ua hoopau ia ke komite me ka hai aku i ka Hale, aole he mea i hooholo ia.
Hoopanee.