Ka Lahui Hawaii, Volume II, Number 39, 21 Kepakemapa 1876 — Page 1

ʻaoʻao PDF (1.20 MB)

KA LAHUI HAWAII.
"Ua mau ke Ea o ka Aina i ka Pono."
BUKE II.}  HONOLULU, POAHA, SEPATEMA BA 21, 1876.  {HELU 39.

KA NUPEPA KA LAHUI HAWAII.

Paiia ma kela Poaha me keia Poaha.
H. H. PALEKA,  Luna Hooponopono.
He pepa i hoopukaia i kela me keia hebedoma no na Ohana a me na Ekalesia o Hawaii; he mea kokua i ka noho pono ana o na ohana, ka maluhia o kanaka, a me na pomaikai kino a uhane o ka Lahui Hawaii. "Aole paonioni; aole haanui; aole hikiwawe ka huhu; aole noonoo ino."
O na Kumumanao a pau, na Nu Hou o kela me keia ano, na Mare, Hanau, Make, e kakau mai i ka Luna Hooponopono, a e paiia no ke kupono.
Aole e aeia ka pilikino, ke kuamuamu, ka hoino, a me ka huhu, a ua makemakeia ka hoohoihoi, hoolana manao, hoonaauao, a me ka hoopono.
He $1.75 ka auhau o keia pepa no ka makahiki, a he $1.00 no ka hapa makahiki.
E hookaa mua ia ka auhau o ka pepa mamua o ka loaa ana i kekahi mea makemake e lawe.

NO NA OLELO HOOLAHA.

E lawe ana keia pepa i na Olelo Hoolaha a na makamaka, e like me ke kupono, a e lawa pono ai hoi me ka hoohaiki ole i ka huina o na kolamu kukulu manao, no ka uku haahaa.
O kela a me keia makamaka e makemake ana e hoolaha, e hele mai ma ke keena a e hui pu me ka Luna Hooponopono.
Aole e paiia kekahi Olelo Hoolaha ke ole e hookaa mua ia ka auhau.
Eia kekahi, ke noiia aku nei na makamaka e hoouna mau mai i na mea hou; mai hooloihi loa i na palapala; e hai pololei mai i na manao me ke kuawili ole, a e kakau mai me na hua moakaka.
H. H. PALEKA,
Luna Hooponopono.

PAPA, PAPA.
AIA MA KAHI O
LEWE RS & DICKSON
(O LUI MA.)

KE KAHUA KAHIKO MA
Alanui Papu a me Alanui Moi
E LOAA AI NA
PAPA NOUAIKI o kela a me keia ano.
NA PAPA NANI
A PAA NO KE KUKULU ANA I NA HALE.
Na Pani Puka,
Na Puka Aniani,
Na Olepelepe,
Na Pou, na O-a,
Na Papa hele,
Na Papa Ku,
Na Papa Moe.
Na Pili o na ano a pau!
NA PEPA HOONANI,
Na PENA o na wai a pau
Na Kui mai ka nui a ka makalii,
Na Ami-puka,
Na Ami-puka Aniani,
Na Ami o na ano a pau,
NA AILA PENA,
NA AILA HOOMALOO,
NA AILA o na ano a pau.
NA VANIKI
Na mea HOOHINUHINU o na ano a pau.
Na Balaki o kela a me keia ano.
A KE HAI IA AKU NEI KA LONO i na makamaka a pau, ua makaukau keia mau hoa o oukou e hoolawa aku ma na mea a pau e pili ana ma ka laua oihana
—NO KA—
UKU HAAHAA LOA!
like me ka mea e holo ana mawaena o LAUA a me ka MEA KUAI.
E hele mai! E na makamaka!
A e lawa no hoi ko oukou makemake me ka oluolu
1]  a me ka maikai.

CECIL BROWN,

Loio a he Kokua ma ke Kanawai
A HE AGENA NO KA HOOIAIO ANA I NA Palapala no ka mokupuni o Oahu.
Helu 8 Alanui Kaahumanu, Honolulu, H. P. A.

C. H. DICKEY, (Kale Kika,)

LOIO!
A he Luna Kepa i apono ia e ke Aupuni no ka Apana o Makawao, Maui Hikina.
E HELE NUI mai ka poe a pau i loohia ia me na pilikia pili Kanawai o ka "Ua-ukiu" nei, a no ko oukou makamaka oiaio no e kokua a e hooikaika e hoopau i na pilikia ma na ano a pau o ke Kanawai.  17-1y

G. W. WEST!

HALE HANA KAA HOLO LEALEA ME na kaa hali ukana. E hana ia no ho na kaa nahaha no ka uku oluolu. E kapiliia no kapuai lio, no ka uku kupono. Ma ka hale hana mua o Mr. Benfield, ma ke Alanui Alii  1-1y

S. B. DOLE.

LOIO a he Alakai ma na mea pili Kanawai. Ua makaukau oia e pale i na hihia imua o na Aha Hookolokolo a pau o keia Aupuni, me ke kakau ana i na Palapala Pili Kanawai, ma ka olelo Hawaii a ma ka olelo Beritania.  1 1y

J. PORTER GREEN,
"KEIKI O KAUAUKIUKIU."

HE LOIO! A HE KOKUA OIAIO!
E HELE MAI NA MAKAMAKA A PAU I o'u nei, a na'u no e kokua ia oukou imua o ka Aha Hoomalu a me ka Aha Kiekie me ka uku haahaa makepono loa. Me na oki mare, a me ka hooponopono ana i ka waiwai o ka poe make, he eleu loa ka hana. Aia ko'u keena hana ma Alanui Kalepa kokoke i ke keena o ka Lunakanawai Aeko. E hamama mau ana ka puka, e hele nui mai i pau ka pilikia.  1-1y

A. McWAYNE.

Mea Hoomakaukau a Kuai Laau Lapaau.
MA ke kihi o Alanui Papu me Kalepa. E makaukau mau ana me na Waiala o na ano maikai loa, na Kopa Ala, na Limu Huahuakai, a me na mea he nui. O ke ano Aila Hamo Lauoho oi loa o ka maikai maloko o ke Kulanakauhale nei, no ka hapaha dala wale no, (25k.) no ka omole. E kipa mai e hoao i ike pono.
E haawiia no na kukakuka pili i na lau lapaau i kela me keia manawa o ke ao a me ka po.
29-3m.

E. STREHZ,
[AILUENE]

MALAILA E LOAA AI NA ANO LAAU A pau; a me na wai hoomaemae o kela a me keia ano. E hamama mau ana ka ipuka ma na po Poaono a pau. Ma ke kihi o Alanui Papu a me Hotele, ma Monikahaae.  1 1y

J. W. CROWELL,
(KEONI KOLOWELA).

AIA ma Alanui Moi, ma nae iho o ka Hale Kahi Umiumi, Malaila e loaa ai ko oukou hoa'loha, me na kiaha Waimomona o na ano a pau, i awiliia me ke anu huihui o ka hau iniki o ka uka iu o Nuuanu. E naue ae a ike maka iaia, he makamaka oiaio.  19-1y

Sabbath Home.
Crown of Life. P 27.

1
La hoano maha nei,
Ku a hele oli mai
I ke Kula Sabati,
I ka home maikai e.
Maanei no e ao ia ai
Na olelo e ola ai,
No ke aloha o Iesu.
A no ka home ma ke ao.
Cho. —La hoano maha nei,
Ku a hele oli mai
I ke kula Sabati,
I ka home maikai e.
2
Maanei no e pule ai,
Mele hoi a hoomaikai,
Noi pu i loaa mai,
Na makana e ola ai,
Hele me ka oli e,
Hui kuikahi mai.
Nani no ka pomaikai,
Nana ko luna a oli ae.
Cho. —La hoano maha nei, &c.
3
Oiai kakou maanei,
Mau ka hui ana mai;
Hui mau a pii kakou
I ka home ma ke ao,
Kahi ia e hui ai,
A memela a mau ae,
Kau na lei mae ole no
Ma ko ka lani hale mau.
Cho. —La hoano maha nei, &c.
HAWAII.

ELINA KE KOA
HE KANAKA OPIO
PUUWAI WAIPAHE
KA PALEKAUA LIONA HOI O KONA MAU LA
KE PUKONAKONA O KONA LAHUI, A O
KA OI WELINA HOPO O KONA
MAU ENEMI.
Mokuna VIII.—Helu 34.

          AOHE hana i koe a ke alii powa, ua lele liilii aku la na apana o kana pahikaua ma o a maanei, a ke ku olohelohe mai la oia imua o ke koa aukai o Beritania. O ka akahi wale no keia o kona hoohoka ia ana. Ua puni na maona iaia i ka hele ia, a ua lehulehu wale na kanaka ikaika a kaulana no ke koa ana i paio pu ai; a aohe loa oia i halawai me kekahi koa e like me keia. Aka, me keia nele no o ua powa nei i ka pahikaua, aole oia i haawi pio mai, oiai he poe lakou i minamina ole i ko lakou mau ola, a ua oi ke aloha i ka hakaka mamua o ka noho maluhia ana. Lele aku la ia a lalau i ka pahi a kekahi o kona mau ukali, a ua ala mai la  no hoi lakou me ka hoomaka ana e paio me Egemona ma.
          "E inuia kou koko e keia kanaka ino!" wahi a ua powa nei ia Elina, me ka lele ana mai me ka mama a uhau mai la; ua ikaika a hahana kana pahi o ka haule ana iho, a ina i pa mai ma kahi a kona manao i makemake ai, ina la o ka hopena ia o ka kakou koa, aka, me he  la ua nele loa ke ao nei ia mau la no ke koa e like me Elina, oiai, me ka malie loa, a me ka mino aka ana oia i hapai ae ai i kana pahi a pale ae la i ka maka kila oi e iho iho ana me ka hahana, a ia olepe ana ae, aia hoi, ua lele aku la ka pahi a ua powa nei i kahi e. Ua moku aku la na manamana o ka lima e paa ai i ka pahi, a ua hiki ole ke paio mai me ia la, aka, iloko no oia pilikia, ua hopu hou iho la no ia me kona lima hema, a huli hou mai la no e hakaka.
          "Ina oe i makemake e nele loa i ka manamana-lima, alaila e ku mai imua o'u, aka, ina oe he minamina ia mau mea, alaila e noho malie," wahi a Elina me ke pale malie ae no i ka iala mau uhau ana mai. Aole no i hoolohe mai ka powa i keia mea, a he manawa pokole loa, ua nele iho la kona mau lima i ka manamana ole, a o ka holo wale iho la no i o a ia nei me ka huhu, aole nae ana hana i koe.
          Ke noke nei o Egemona ma i ka hakaka me ka ikaika loa. A i ko Elina huli ana'ku a ike aku la i ka lehulehu loa o ko lakou mau hoa paio, o kona manawa ia i hookuu aku ai i kana maka kila e hana i kana hana. Ma o a maanei, ma kahi hoi a kona oi e halawai aku ai me kekahi kino kanaka, o ka make aku la no ka ukali, a waiho aku la ke kino kupapau i ka papahele. He hapa hora, a aohe koa i koe oloko o ia hale, koe ke alii i nele i na manamana-lima.
          Huli aku la o Elina ma iwaho, e nana i ka hana a na koa, aia hoi, ua holopono ka lakou hana. Ua akamai ka hoomakaukau ana a Elina, a ua hoolohe lakou i kana mau kauoha. Aohe powa hookahi i hemo mai loko mai o ko lakou mau hale lole. I ko lakou manawa i ala ae ai, a hoao mai la e hemo, aia hoi, ua puiwa lakou a kahaha i ka halawai ana mai me na makakila a me na mea make e kau aku ana imua o lakou, "Ke hoao kekahi o oukou e hemo mai iwaho nei, o kona make ana no ia." Ua ike lakou i ka oiaio o keia, a iloko o ko lakou mau manao koa a pau, ua hiki ole ke hoao mai e hoole i keia kauoha, me he 'la, ua hoikeia mai imua o lakou ma ka moeuhane, o Elina keia koa, a i ole, ua aloha mai la na lani ia lakou, a hookomo mai la i ka manao wiwo iloko o ko lakou mau puuwai; oiai, ina lakou i aa mai e paio, ina o ka manawa koke ia o ko lakou mau uhane e haalele ai i ke kino, a mokaki na kino kupapau maluna oia kahua kaua, aka, ua wiwo lakou, a o ka lawe pio wale no ka hana i koe. He kaumaha luuluu keia i kau aku maluna o ka hokua o keia poe koa, oiai, e noho ana lakou me ka nanea hauoli, e hiolani ana maloko o keia mau hale lole me ka moeuhane ole ae no ka hoea ana mai o kekahi ulia pilikia maluna o lakou, aka, oiai lakou e noho ana iloko o keia kulipo o ka noonoo ole, aia hoi, ua like me ka popoki noho o ka uka waonahele, pela o Elina i hele nihi mai ai, a iloko o ka manawa pokole, ua haule pio iho la lakou a pau.
          I ko Elina hoomaopopo ana ua pau ka ikaika o na powa, a u a lilo hoi lakou he mau pio malalo ona, ua kauoha koke aku la ia e hoomakaukau na mea a pau, no ka holo ano aku iluna o kona moku, a e lawe aku hoi i na powa i lawe pio ia maluna o na aumoku kaua. Ua hooko ia keia mau kauoha e like me ke ano mau o na koa eleu o ko kakou koa, a he manawa pokole wale no, ua pau aku la ua mau powa nei i ka paa iluna o na moku. Ua pii ino ae la ka inaina maluna o na powa, no ka mea, he mau hora wale no kai hala ae mai ko lakou lawe pio ana i ua mau moku nei me na kanaka oluna, a ano ke hoolilo ia nei lakou i mau paahao. He oiaio ua nui ko lakou inaina, aka, aohe a lakou pono i koe, ua hala ko lakou manawa o ka noho alii ana, a ua hiki mai ka manawa no lakou e ike ai i ka uku o ka lakou hana.

MOKUNA IX.

          E na makamaka maikai o keia kaao, ka poe hoi i hui pu mai ma ka hoomanawanui ana i ka ukali ana mahope o ka meheu o na kapuai o ke keiki alii Elina, ano ua hala aku la mahope, ua lawe aku la na eheu o ka manawa i na hiona o kona hui ana me na enemi, a me kona lanakila ana maluna o lakou. Ua hooikaika oia mamuli o kana mau hoohiki, a ua ko; a i ka hehi ana o kona mau kapuai maluna o ka papahele o ka lanakila maluna o keia poe powa, o ka manawa no ia i ulu mai ai ka manao iloko o ka puuwai o Elina e huli hoi aku i ka home, a e hai aku i kona haku Moi i ke ano o kana huakai, a e ike hou aku hoi i na helehelena o kana aloha, o Emeline, ka pua nani lua ole o Beritania a puni, ka mea hoi nona ka puuwai e kapalili mau ana me ke aloha nui no keia koa.
          I ka pau ana o na powa i ka paa maluna o na moku, i ka wa hoi i makaukau ai na mea a pau, ua haalele aku la ke kuna Zelina i na kapakai o ka aina powa, i ukaliia mai e na aumoku kaua, o ka home ka ihu, me na pea heke i hele a poho pono i ka makani, ua ulumahiehie ae la na mea a pau no ka huli hoi ana me na lono hauoli. Iloko o keia huakai huli hoi, he ekolu la i ka moana, ua ala mai la he ino nui ma ka moana, a aneane ku i ka poino ko lakou nei mau moku. He elua la o ka noke ana o ka ino, a he elua no hoi o lakou nei mau la o ka hoomanawanui ana, a hiki wale i ka malie ana o ka ino.
          Oiai lakou nei maluna o ka moana, e lawe ana hoi ka ihu o ka Zelina i kana mau ukana makamae me ka hanohano, aia hoi, ua hala ole ke kaikamahine opio ma ka hoao mau ana e hoohuli aku i ko Elina manao mahope ona, a e haalele aku hoi ia Emeline. I kela a me keia aluna ahiahi, i ka manawa hoi a na kukuna la e aneane aku ana e iho malalo o ka ilikai komohana, oia ka manawa a ua kaikamahine opio nei i neenee mai ai a pili ma ko ia nei aoao, a hookuu mai la i na huaolelo hoalohaloha me ka mania
ke lohe aku. I kekahi aluna ahiahi, oiai kahi makani e ani peahi ana ma kona mau papalina, ua pane mai la oia:
          "E kuu haku alii—e Elina; ano he mau la wale no koe a hoea hou aku kakou i ke one hanau. He mau la koe a ike ia aku ka piko o na kuahiwi o ua home nei o kaua, a ke u nei ko'u puuwai me ke kaumaha nou!"
          "Ae! he mau la wale no koe a honi hou aku i ke ea onaona aloha o ka aina makuahine. He mau la koe a ike hou aku au i na helehelena o ko'u mau haku alii, a kilohi hou aku maluna o na papalina pua rose o kuu Emeline, a heaha la ko'u mea e kaumaha ai e like me oe? Aole! ke hauoli piha nei au, me ke ake e hiki koke aku ilaila."
          O keia mau huaolelo a Elina, ua like no ia me ke au o ka bea noho kuahiwi, ka awaawa a mulea i ka puuwai o keia kaikamahine. Mai ia ahiahi mai, ua hoomaka mai la ke ano e o kana mau hana a me kona mau helehelena, a he mea maopopo ke nana aku a noonoo iho, ua komo aku la ka manao lili iloko o kona puuwai, a ke paila ala me ka mulea nui. Ala mai la na manao ino iloko o kona puuwai a o ka hopena oia mea, oia no ke ala ana mai o ka manao iloko, e pepehi malu ia Elina, a e lawe ae i kona ola ponoi iho, ke hiki i ka manawa kupono, mamua o ka hiki ana i ka aina. Ua ulu mai keia manao mamuli o kona aloha oiaio maoli ia Elina, no ka mea, ua like me ke anu hui o ka hau iniki olu o ka wao nahele kuahiwi loa, pela ka puanuanu mau o ke aloha ia Elina maloko o kona puuwai. A ua hoao oia e hooko i kona makemake, ma ka hookahuli ana ae i ke aloha o ua iwa nei mai ia Emeline ae, aka, ua like me ka malamalama o na kukuna o  ka la, pela ka mohala maikai o ko Elina noonoo, a e iike me ka paakiki o ke kila ma ka maka o kana pahikaua, pela no ka paakiki o kona manao. No ia mea, ua makemake keia kaikamahine e nele o Emeline, a aohe wahi e nele ai, o ka lawe wale ana no i ko Elina ola.
          I ka ulu ana mai o keia mau noonoo kupouli iloko o kona mau aa-koko, ua ane haalulu oia, a maopopo ole kona kulana. He oiaio, he aloha palena ole kona no keia kanaka koa wiwo ole, a he makemake e hooloihiia kona ola ana ma keia ao me ka oluolu a maalahi mau, aka, pehea la e hiki ai ia ia ke hoomanawanui ma ka noonoo pono ana iho, o kana mea i aloha ai, i iini ai a i hiipoi ai no na la lehulehu wale, e lilo aku ana he hoa haiahi olelo a he puuwai hookahi me kekahi mea e aku. Aole! a aole loa i ae kona puuwai i keia mea, a nolaila, ua hooholo iho la kona manao e pepehi malu iaia, a e lawe ae i kona ola ponoi iho, a i hookahi ko laua hui pu ana ma kela ao. Aloha ino keia kaikamahine opio, ua ae i kona noonoo e hoopouliia, a lawe ae la i ka manao pepehi kanaka. E ko ana anei? Aloha wale o Elina a me kana Emeline ke ko! aka, ma keia pule ae e hoomaopopo ia ai.  (Aole i pau.)

Ahaolelo Kau Kanawai
O ke Aupuni Hawaii
Ka Moolelo o na hana o ke Kau o
ka M. H. 1876.

LA HANA 98.—Poakahi Augate 28.
Halawai ka Ahaolelo e like me ka mau. Hope Peresidena ma ka noho.
Hoike mai ka hapa uuku o ke komite wae no ka noonoo ana i ka bila e hooponopono ana i ka lawe ana mai a me ke kuai ana aku i ka opiuma, e noi mai ana e waiho ia ka bila ma ka papa. Waiho ia ma ka papa a hoike mai ka hapa nui o ke komite.
Hoike mai ke komite wae no ka noonoo ana i ka bila e haawi ana i kekahi mau pomaikai i na koa ku mau o ke aupuni, e noi mai ana e hooholo loa aku i ka bila no ke kakau poepoe ana. Apono ia ka hoike.
Hoike mai ke komite pai ua pai ia ka bila e haawi ana i kekahi mau pono i na aina i hoopomaikai ole ia ma ka hoomoe ia ana o kekahi auwai a hawai paha. Aponoia.
Hoike mai ka hapa nui o ke komite wae no ka noonoo ana i ka bila e hookapu ana i na manu, oo, mamo, iiwi, a me ka akakane, aole e pepehi ia, a na ke'Lii ia mau manu. Ua hooponopono hou ia ka bila, me ke noi mai i ka Hale e hooholo loa aku i ka bila no ke kakau poepoe, e like me ia i hooponopono ia e ke komite. Aponoia.
Kamailio mai o Hon. Kaai no ka olelo ana mai o ke'Lii, ka Moi ia ia, e noi aku i ka Hale, e hoihoi mai i kana mau olelo i kapa aku ai i ka Loio Kuhina he wahahee. Ua kamailio mai oia, aole oia e hoihoi ana a kamailio loihi mai no ia mea me ka maopopo.
Noi ka Loio Kuhina e kakau pololei ke kakauolelo i na olelo a pau i hoopuka mai ai, oiai, aole i maopopo ka hopena o keia hana. Mahope o ka hoopaapaa ana, ua waiho pu iho la.
Heluhelu mai o Mr. Nahaku he olelo hooholo. E kauoha ia ka Loio Kuhina e hoihoi hou aku i kana haiolelo e kapa ana i na hoa o keia Hale he aihue i ke dala. 2 E kauoha ia ka Peresidena mau e hoi e noho ma kona noho. 3 E kauoha ia na kakau nupepa aole e hoolaha aku i keia mau mea a pau e pili ana i ka olelo hooholo e haawi i $100 na kela hoa lunamakaainana. Hoopanee loa ia.
Heluhelu mai o Mr. Kanealii he olelo hooholo e kauoha ana i na Kuhina o ka Moi, i ke kumu o ko lakou aua ana i na dala $6,500 i hooholo ia e keia Ahaolelo, a i kakau inoa ia hoi e ka Moi. Hoopanee loa ia.
Heluhelu mai o Mr. Pilipo he olelo hooholo e kauoha ana i ke kakauolelo, e kikoo aku i ke Kuhina Waiwai, i na dala he $6,500 i hooholo ia e ka Ahaolelo a i kakau inoa ia e ka Moi.
Noi o Mr. Birch e hoopanee loa i keia olelo hooholo.
Kamailio mai o Mr. Pilipo ma ka aoao kokua i ka olelo hooholo a hiki i ka hoomaha ana ma ka hora 12.
Halawai hou ma ka hora 1 P. M.
Kamailio hou mai o Mr. Pilipo ma ka aoao e kokua ana i ka olelo hooholo.
Eia na mea i kamailio ma ka aoao kokua i ka olelo hooholo, Pilipo, Mahelona, Nahaku, Kaai.
Eia na mea i kamailio ma ka aoao kue i ka olelo hooholo, Loio Kuhina, Birch.
Mahope o ka hoopaapaa loihi ia ana no na hora 4 a oi aku. Ua hoopanee loa ia ka olelo hooholo, he 19 ae, a he 17 hoole.
Noi o Hon Kaai e hoopanee keia halawai a noho hou ma ka hora 10 o ka la appop. Hooleia.
Heluhelu mai o Hon. Kaai he olelo hooholo, e kauohaia ke Kuhina Waiwai e hookaawale i $20,000 no na lilo o ka hele ana aku nei o ka Moi e imi no ke Kuikahi Panailike. Hooholoia. He 19 ae, a he 14 hoole.
Noi ke'lii Kaai e hapai hou ia ka noonoo ana.
Kamailio mai ka Hon. Kapena Roke ma ka aoao kokua i ke noi, a noi mai e hoopanee ka Hale. Hooholoia.
LA HANA 99—Poalua Augate 29.
Halawai ka Ahaolelo e like me ka mau. Hope Peresidena ma ka noho.
Hoike mai ka Peresidena i kekahi palapala mai a Mr. Kauai mai e noi mai ana e hookuu aku ia ia. Hooleia.
Hoike mai ka hapa uuku o ke komite wae no ka noonoo ana i ka bila e hoonoho ana i na luna leta ma na apana, e noi mai ana e hoopanee loa ia ka bila. Waiho ia a hiki mai ka hoike a ka hapa nui.
Heluhelu mai o Mr. Kanealii he olelo hooholo e noi aku ana i ka lokomaikai o ka Moi e iho mai e hookuu i keia Ahaolelo ma ka hora 12 o ke awakea o ka Poaono Sepatemaba 2 makahiki 1876.
Noi o Mr. Wana e hoopanee loa ia keia olelo hooholo.
Eia na mea kamailio ma ka aoao kokua i ka olelo hooholo, Nawahi a me Kaina.
Eia na mea kue, Wana a me Green.
Mahope o ka ninau ia ana, ua hooholo ia ka olelo hooholo. He 20 ma ka ae, a he 15 ma ka hoole.
Eia ka poe makemake e hookuu ia ka Ahaolelo. Kahuila, Kaiue, Kanealii, Kamauoha, Kauai, Birch, Naili, Halstead, Helekunihi, Kalaukoa, Aiwohi, Nawahi, Halemanu, Mahoe, Nahaku, Nakaleka, Naukana, Mahelona, a me Kaina hui ia he 20.
Eia ka poe hoole, Leleiohoku, Dominis, Green, Moehonua, Walker Loio, Kuhina, Kapena Roke, Kuihelani, Parker, Moanauli, Waterhouse, Preston, Waila, Martin, Kahanu, hui ia he 15.
Noi o Mr. Waterhouse e noi aku keia Hale i ka Peresidena e hoi ma kona noho. Noi o Mr. Nawahi aole e hoi hou keia Peresidena ma kona noho i ka ninau ana, ua hooholo ia e hoi hou ka Peresidena ma kona noho.
Kamailio mai ka Peresidena no ke kumu o kona haalele ana i kona noho, a noi mai e hoopau ana i kona manao mua.
Noi o Mr. Kauai e hapai hou ia ka noonoo ana no ka olelo hooholo, maluna ae nei. Hooholoia.
Noi o Mr. Aholo e waiho kela olelo hooholo i ke komite wae.
Noi ka Loio Kuhina e hoopanee loa ia ka olelo hooholo.
Mahope o ka noonoo ia ana, ua waiho ia i ke komite wae, Birch, Kauai, Preston, Loio Kuhina a me Kalaukoa.
Hoopanee ka Hale.
LA HANA 100.—Poakolu, Augate 30.
Halawai ka Ahaolelo e like me ka mau.
Hoike mai ke komite wae no ka noonoo ana i ka haawina no na kula $13,000 e noi ana e hoomahuahua ae i $25,000, a me ka haawina o na kula Hawaii a me Beritania, e noi mai ana e hooholo aku e like me ia iloko o ka bila. Waiho ia a noonoo pu me ka Bila Haawina.
Hoike mai ke komite wae no ka noonoo ana i ka olelo hooholo, e noi ana i ka lokomaikai o ka Moi, e iho mai e hookuu i ka Ahaolelo, a me ka olelo hooholo e haawi ana i ka mana i ke Kuhina Waiwai e uku aku i na luna aupuni mahope o ka pau ana o ka Ahaolelo, e like me ka Bila Haawina o 1874, e noi mai ana, e hoopanee wale ia no ka Ahaolelo, me ka maopopo ole o ka manawa e akoakoa hou ai, a e uku aku ke Kuhina Waiwai i na luna aupuni e like me ka Bila Haawina, i hooholo ia e keia Hale, a o kekahi mau haawina i hoopanee ia ka noonoo ana, e uku ia aku ia mau haawina e like me ka Bila Haawina o 1874.
Kamailio loihi mai o Mr. Preston ma ka aoao kokua i ka hoike, a e hooholo loa aku i ka olelo hooholo, me ka hoike pu mai i kekahi olelo i kamailio ia e kekahi luna Senate iloko o ka Aha Senate o Amerika, a ua pai ia ma ka nupepa haole "Hawaiian Gazette." "Ua hoouna mai ka Moi o kekahi aupuni e noho kuikahi nei me kakou i kekahi o kona mau luna aupuni kiekie a eia oia ke noho pu nei me kakou, no ka nana ana no keia kuikahi, a ua olelo mai oia, ina e hooholo ia keia kuikahi, alaila, o ka lilo mai no ia o ke aupuni malalo o ko kakou mana, a pau ko lakou noho aupuni ana," a nui aku. Hoopanee loa ia.
NA HANA O KA LA.
Noonoo ia ka Bila Haawina imua o ke komite o ka Hale. Mr. Nakaleka ma ka noho.
Ke ola o na koa  58,840
Noi o Hon. Kaai  70,686.36
Mahope o ka hoopaapaa ana, ua hooholo ia $70,686.36. He 18 ae, a he 17 hoole.
Eia ka poe ae, Leleiohoku, Kuihelani, Kaai, Kaiue, Kamauoha, Lilikalani, Kaua, Birch, Naili, Helekunihi, Barenaba, Halemano, Nahaku, Wana, Naukana, Kaina, Kanoa, Moehonua.
Eia ka poe hoole, Loio Kuhina, Kakela, Kapena Roke, Kahanu, Kamika, Kahuila, Kanealii, Pilipo, Halstead, Gay, Kalaukoa, Aiwohi, Nawahi, Mahoe, Waterhouse, Preston, Kaina.
Eia ka poe kanalua, Dominis, na Kuhina eha, a me Aholo.
Noi ka Loio Kuhina no ka unuhi a me ka hooponopono ana i na kanawai kivila, $2,000. Hooholoia.
Noi ke'lii Kamika, no na kula Hawaii a me Beritania, $38,000. Hooholoia.
Noi o Mr. Birch, 30,000. Hooholoia.
Noi o Mr. Aholo no ka hana hou ana i na uapo he 10,000, a penei ka hoonohonoho ana:
Hana hou i na uapo o Honolulu, 8,000
" " " Lahaina, 1,000
" " " Makena 1,000
Hooholoia.
Noi o Mr. Martin, no ka uapo o Kaalualu  250
Noi o Mr Kahuila  300
Noi ke Kuhina o ko na Aina e, no na awa a pau, koe ka mokupuni o Oahu, (aole hoi e hoolilo ia no kekahi hana e) $50,000. Hooholoia.
Noi o Mr. Birch e hapai ia ka noonoo ana no ka haawina, no na elele i na aina e, $6,000. Hooholoia.
Eia na lunamakaainana i ae i ka hooholo ana i keia haawina maluna ae, oia hoi e haawi ana i 6,000 dala na ka lunakanawai kiekie e noho mai la i Wasinetona: Aholo, Kaiue, Kamauoha, Lilikalani, Kauai, Birch, Naili, Helekunihi, Barenaba, Halemanu, Waterhouse, Nahaku, Wana, Naukana, hui me 16 alii, like me 30.
Eia ka poe e hoole ana i ka uku ana aku ia ia i keia mau dala, oiai oia, e uku ia ana i kona uku makahiki iho: Kahuila, Kanealii, Pilipo, Gay, Kalaukoa, Aiwohi, Nawahi, Mahoe, a me Mahelona, hui ia he 9 wale no.
Noi ke Kuhina o ko na aina e, no ke Kuhina noho o ke aupuni Hawaii ma Wasinetona, 8,000. Hooholoia.
Noi o Mr. Birch e hapai ia ka noonoo ana no ka haawina o ka Moi. Hooholoia.
Ko ka Moi dala ponoi a me ka oihana alii  $45,000
Hooholoia.
Ke'Lii Leleiohoku  5,000
Noi o Mr. Kuihelani  6,000
Hooholoia.
Noi o Hon. Kaai e hapai hou ia ka noonoo ana no ka oihana koa. Hooholoia.
Noi o Hon. Kaai e hooholoia aku e like me ia i hooholo mua ia iho nei.
Noi mai o Mr. Nawahi, e koho na Kuhina o ka Moi ma ka aoao a lakou e koho ai.
Ma keia manawa ua haalele mai kekahi mau hoa o ka Hale ua haalele ka lunahoomalu i kona noho, a hoi ka Hope Peresidena ma ka noho, ia wa ua komo mai na hoa. Nolaila, ua noho hou ka lunahoomalu ma kona noho.
Ma keia wa, ua uluaoa na hoa o ka Hale, a ano haunaele ke komite, no kekahi mau minute, ua kamailio loihi mai o Mr. Nawahi ma ka aoao e noi ana e koho na Kuhina no kela mea.
Mahope o ka noonoo ia ana, ua hooholo ia $70,386.36 no ka oihana, 20 ae a he 6 hoole.
Hoopau ia ke komite me ka hai aku i ka Hale, ua noonoo ia ka Bila Haawina e like me ia i hoike ia maluna.
Hoopanee.