Ka Lahui Hawaii, Volume II, Number 34, 17 August 1876 — Page 1

KA LAHUI HAWAII.
"Ua mau ke Ea o ka Aina i ka Pono."
BUKE II.}  HONOLULU, POAHA, AUGATE 17 , 1876.  {HELU 34.

KA NUPEPA KA LAHUI HAWAII.

Paiia ma kela Poaha me keia Poaha.
H. H. PALEKA,  Luna Hooponopono.
He pepa i hoopukaia i kela me keia hebedoma no na Ohana a me na Ekalesia o Hawaii; he mea kokua i ka noho pono ana o na ohana, ka maluhia o kanaka, a me na pomaikai kino a uhane o ka Lahui Hawaii. "Aole paonioni; aole haanui; aole hikiwawe ka huhu; aole noonoo ino."
O na Kumumanao a pau, na Nu Hou o kela me keia ano, na Mare, Hanau, Make, e kakau mai i ka Luna Hooponopono, a e paiia no ke kupono.
Aole e aeia ka pilikino, ke kuamuamu, ka hoino, a me ka huhu, a ua makemakeia ka hoohoihoi, hoolana manao, hoonaauao, a me ka hoopono.
He $1.75 ka auhau o keia pepa no ka makahiki, a he $1.00 no ka hapa makahiki.
E hookaa mua ia ka auhau o ka pepa mamua o ka loaa ana i kekahi mea makemake e lawe.

NO NA OLELO HOOLAHA.

E lawe ana keia pepa i na Olelo Hoolaha a na makamaka, e like me ke kupono, a e lawa pono ai hoi me ka hoohaiki ole i ka huina o na kolamu kukulu manao, no ka uku haahaa.
O kela a me keia makamaka e makemake ana e hoolaha, e hele mai ma ke keena a e hui pu me ka Luna Hooponopono.
Aole e paiia kekahi Olelo Hoolaha ke ole e hookaa mua ia ka auhau.
Eia kekahi, ke noiia aku nei na makamaka e hoouna mau mai i na mea hou; mai hooloihi loa i na palapala; e hai pololei mai i na manao me ke kuawili ole, a e kakau mai me na hua moakaka.
H. H. PALEKA,
Luna Hooponopono.

PAPA, PAPA.
AIA MA KAHI O
LEWE RS & DICKSON
(O LUI MA.)

KE KAHUA KAHIKO MA
Alanui Papu a me Alanui Moi
E LOAA AI NA
PAPA NOUAIKI o kela a me keia ano.
NA PAPA NANI
A PAA NO KE KUKULU ANA I NA HALE.
Na Pani Puka,
Na Puka Aniani,
Na Olepelepe,
Na Pou, na O-a,
Na Papa hele,
Na Papa Ku,
Na Papa Moe.
Na Pili o na ano a pau!
NA PEPA HOONANI,
Na PENA o na wai a pau
Na Kui mai ka nui a ka makalii,
Na Ami-puka,
Na Ami-puka Aniani,
Na Ami o na ano a pau,
NA AILA PENA,
NA AILA HOOMALOO,
NA AILA o na ano a pau.
NA VANIKI
Na mea HOOHINUHINU o na ano a pau.
Na Balaki o kela a me keia ano.
A KE HAI IA AKU NEI KA LONO i na makamaka a pau, ua makaukau keia mau hoa o oukou e hoolawa aku ma na mea a pau e pili ana ma ka laua oihana
—NO KA—
UKU HAAHAA LOA!
like me ka mea e holo ana mawaena o LAUA a me ka MEA KUAI.
E hele mai! E na makamaka!
A e lawa no hoi ko oukou makemake me ka oluolu
1]  a me ka maikai.

CECIL BROWN,

Loio a he Kokua ma ke Kanawai
A HE AGENA NO KA HOOIAIO ANA I NA Palapala no ka mokupuni o Oahu.
Helu 8 Alanui Kaahumanu, Honolulu, H. P. A.

C. H. DICKEY, (Kale Kika,)
LOIO!

A he Luna Kepa i apono ia e ke Aupuni no ka Apana o Makawao, Maui Hikina.
E HELE NUI mai ka poe a pau i loohia ia me na pilikia pili Kanawai o ka "Ua-ukiu" nei, a no ko oukou makamaka oiaio no e kokua a e hooikaika e hoopau i na pilikia ma na ano a pau o ke Kanawai.  17-1y

OLELO HOOLAHA.

KE HAI IA'KU NEI KA LONO I NA Kanaka a pau loa, aole e hoaie a e hookipa paha i kuu wahine mare me kuu ae ole, oia o MRS. KAAUKAI KOLOLIO, a o ka poe a pau e hoolohe ole ana i keia, maluna o lakou ke poho, a e ku ana i Kanawai.  JOHN KOLOLIO.
3 t.

          O MAUA O NA MEA NONO NA INOA malalo nei. Ke papa aku nei maua i na holoholona a pau a me na kanaka komo hewa maluna o ko maua aina kuai e waiho nei ma Hoalua. Hanawana, a me ke kuleana o OWILI i lilo ia maua i ke kuai ma Hamakualoa, Maui. A o ka mea kue i keia mau olelo maluna a me na holoholona, e uku i $1.00 no ka holoholona hookahi. Ua kapu no hoi na laau hua maluna o keia kuleana, aole e kii wale me ke noi ole ia maua. A e lilo i kanawai paa mai kona la e puka ai ma ka nupepa. Ua hookohu aku maua ia Mr. Pilali i paniolo, a o ka mea kue i keia, e hoopii no maua ma ke kanawai. O maua no me ka mahalo,
P. NAKOA.
M R. UILAMA.
Hoalua, Hamakualoa, Maui, Iulai 23, 1876.
2 t*

G. W. WEST!

HALE HANA KAA HOLO LEALEA ME na kaa hali ukana. E hana ia no ho na kaa nahaha no ka uku oluolu. E kapiliia no kapuai lio, no ka uku kupono. Ma ka hale hana mua o Mr. Benfield, ma ke Alanui Alii  1-1y

S. B. DOLE.

LOIO a he Alakai ma na mea pili Kanawai. Ua makaukau oia e pale i na hihia imua o na Aha Hookolokolo a pau o keia Aupuni, me ke kakau ana i na Palapala Pili Kanawai, ma ka olelo Hawaii a ma ka olelo Beritania.  1 1y

J. PORTER GREEN,
"KEIKI O KAUAUKIUKIU."

HE LOIO! A HE KOKUA OIAIO!
E HELE MAI NA MAKAMAKA A PAU I o'u nei, a na'u no e kokua ia oukou imua o ka Aha Hoomalu a me ka Aha Kiekie me ka uku haahaa makepono loa. Me na oki mare, a me ka hooponopono ana i ka waiwai o ka poe make, he eleu loa ka hana. Aia ko'u keena hana ma Alanui Kalepa kokoke i ke keena o ka Lunakanawai Aeko. E hamama mau ana ka puka, e hele nui mai i pau ka pilikia.  1-1y

ELINA KE KOA
HE KANAKA OPIO
PUUWAI WAIPAHE!
KA PALEKAUA LIONA HOI O KONA MAU LA
KE PUKONAKONA O KONA LAHUI, A O
KA OI WELINA HOPO O KONA
MAU ENEMI.
Mokuna VIII.—Helu 31.

          I NA makamaka o ka moolelo o ke keiki Alii Elina, ua hahai mai la kakou i kona meheu mai kona hoomaka ana, a ua ike kakou i kona wiwo ole a me ka paa o kona manao no kana mea i manao ai. Ua hele mai la oia iloko o ka maalahi, a ua lanakila hoi maluna o kona mau enemi ma na hoouka kaua ana a pau. Aka, ke noi ia aku nei oukou, mai pihoihoi no ka kakou koa, oiai, aia ma keia hope iho, ua komo hou aku la lakou iloko o kekahi hoouka kaua i oi pakela aku ka hahana i ko na hoouka kaua mua, ua kau mai na hiona ano pilikia maluna o ke kino o ka kakou aloha, aka, i ka hoea ana i ka hopena, ua kau aku la kona mau kapuai i ka papahele o ka lanakila, a noho alii maluna o na enemi o ka moana a me ka aina.
          Aoao mai la ke kaikamahine opio ia lakou nei i ke ano o ke ana, a me na keena a pau. A i ka maopopo ana ia Elina, kauoha mai la ia i kona mau ukali e kali mawaho, a e komo aku ia e hoomakakiu. Ua hoole aku kona mau hoa i keia, oiai, ua makemake lakou i hookahi no hele pu ana, a i loaa mai ka pilikia, alaila o lakou pu no ke komo ia pilikia ; aka, ua paakiki loa o Elina, a hele aku la ia.
          He pouli aku ke alanui olowi e hele aku ai a hoea i ka rumi o ua poe powa nei e noho ana, a ma ka leo ko ia nei hahai ana. Mamua o ko ia nei hiki ana aku ilaila, o ka hapalua paha ia o ke ala, ua kuia mai la kona mau wawae me kekahi mea, a hina iho la ilalo. Me ka emoole loa a ku ae la keia iluna, a oiai e hoomaopopo ana i ke kumu o keia, ua paa mai la ko ia nei mau lima. He mau kanaka elua e ku ana a paa mai la me ke oolea i ko ia nei mau lima. "Owai oe e keia komo hewa!" wahi a laua.
          Ua ike iho la o Elina ua paa ia, a he mea makehewa iaia ke hoao ae e hookuu ia kona mau lima, nolaila, hawanawana malie aku la ia me ka maalea, i ka pane ana aku: "He ukana ka'u, he lono, aia mawaho o ka rumi hookipa kela koa enemi o kakou o Elina, a i holo mai la au e hai aku ia olua," me ke ano pihoihoi hoi ko ia nei kamailio ana ae.
          Hookuu ino mai la laua i ko ia nei mau lima, a lele aku me ka manao e holo aku i kahi i olelo ia, aka, i ka manawa i hemo ai ko laua mau lima, o ka wa ia i paa ai o ka Elina pahi kaua ma kona lima, a aole i alua o laua kapuai o ka hehi ana aku, aia hoi, ua halawai aku la ka make me laua. Mamua nae o ka lele ana o ka hanu o kekahi o laua, ua kahea ae la ia me ka leo nui i ka pane ana ae. "He powa! Make maua!"
          Pili ae la o Elina ma ka aoao o kekahi pahu hao e ku koke ana, a lohe aku la ia i ka nakeke ana mai o na mea make a na powa, me ka nui o ko lakou mau leo, a holo mai la me ka mama. He 30 a oi ko lakou heluna, a he poe nunui wale no, me ka ikaika. Aole keia i oni aku, aka, ua kali keia a hala aku lakou i waho, akahi no a hemo aku. Maopopo iho la iaia nei aia ke paio mai la o Egemona ma me na enemi, a aohe hana i koe, o ka hele wale aku no a kokua ia lakou.
          Aka, he mea kahaha i ko ia nei hoea ana aku, ike aku la keia i kona mau hoa e waiho ana i ka honua ua paa i ke kupee ia na wawae. Hoomaopopo koke aku la no hoi keia ua oi loa ka heluna o na powa, aia ma kahi o ke kanalima a oi, me ko lakou makaukau pono me na pono kaua. Holo mai la kekahi kanaka nui me kana pahi i makaukau e uhau mai iaia nei, aka, ua hala wale ae no ia make i ka ia nei pale ana ae me ka hikiwawe, a me ka uhau ana aku maluna o kona poo, haule aku la a make loa.
          Holo mai la he lehulehu o lakou me ka manao e paio mai iaia nei hookahi aka, pane e aku la keia me ka leo piha inaina, "e na ilio, aole anei e komo ka hilahila iloko iho o oukou? owai la ke kanaka koa e hoao ana e alu pa-umi i ka enemi. I hookahi o ka manawa, a owau ka mea nana e hooneo i ko oukou heluna!"
          "Owau hookahi, e ke kuapaa, ka mea nana e hoomaalili i kou puuwai puni hakaka," wahi a kekahi o lakou me ka hele ana mai imua.
          Aole no i kali iho o Elina, aka, ua makaukau, a i ka lua o kana pale ana ae, ua pahu aku la ia i ka maka o kana pahi a ku aku la ma ke kani a-i o kona hoa paio. I kona hina ana aku, ua ku hou mai la no kahi, a elike me kona mau mua iho, pela no i haule aku ai. No keia mea, ua hiki ole i na enemi ke umi iho i ko lakou mau manao huhu, a lele like mai la me ka hoao ana mai e uhau ; aka, ua kokoke ole mai lakou, oiai, ua eleu loa ka Elina uhau ana a me ka pale ana, a ua pa aku la no kekahi o lakou i ka ia nei pahi. Oiai lakou e noke ana i ka uhau ma o a maanei, a e pale hala ole ana no hoi keia, ua hopu mai lu ia mai la mahope mai e kekahi mau kanaka eha, a hoohina ia iho la ilalo. Paa koke iho la i ke kupee ia, a waiho iho la lakou a pau ilalo.
          Ia manawa, ua piha hauoli loa ae la na powa, a hoomaka e inu i ka waina me ke kani o na leo mele, no ka mea, o ka akahi keia o ka paa ana o Elina ia lakou, a ua paumi ia ko lakou hauoli. Hoomaka iho la lakou e hulahula a e inu i ka waina, a i ka pau ana o lakou i ka pouli i ka ona, oia iho la ko lakou manawa e pepehi ai ia lakou nei. Ua makaukau loa lakou a pau, a o ka make wale no koe o lakou nei, a ke uwe mai la hoi ke kaikamahine opio.
          Me ka maalea nui o Elina i hooikaika ai a hemo ae la ke kaula i hoopaa ia'i o kona mau wawae a me kona mau lima, me ka ike ole mai o na powa, oiai ua pau lakou i ka ona, a nee malie aku la ia a wehe aku la i ko Egemona kaula i hauhoa ia'i. O ke kaikamahine opio hoi, ua wiwo ole ia a wehe mai la i ke kaula o na luina ; a i ka ike ana o Elina ua pau ko lakou pilikia, a ua lanakila lakou, ia manawa i ku ae ai iluna me kana pahikaua i hele aku ai imua, a o na ukali mai no hoi kahi. Puiwa ae la na enemi no keia mea, a kahaha ko lakou manao, aka, aohe a lakou mau hana mai, oiai ua lele aku la na iliohae imua, a lele liilii ae la na powa ma o a maanei.
(Aole i pau.)

Ahaolelo Kau Kanawai.
o ke Aupuni Hawaii
Ka Moolelo o na hana o ke Kau o
ka M. H. 1876.

LA HANA 75—Poalua Augate 1.
Halawai ka Ahaolelo e like me ka mau.
Hoike mai ka hapa uuku o ke komite wae no ka noonoo ana i ka bila e hoololi ai ka pauku 235 o ke kanawai kivila, e pili ana i ka pa ana i na aina i mahi ia, e noi mai ana e hoopanee loa i ka bila. Waiho ia a noonoo pu me ka hoike a ka hapa nui o ke komite.
Hoike mai ke komite wae no ka noonoo ana i ka olelo hooholo e apono ana i ke Kuhina Waiwai no ka uku aku i na luna aupuni a me na lilo o na ahakaapuni no ka malama o Iulai e like me ka Bila Haawina o 1874, e noi mai ana e hooholoia ka olelo hooholo. Aponoia.
Heluhelu mai o Mr Waterhouse no ka manawa mua he bila e hoololi ai i ka pauku 64, o ke kanawai kivila.
Ma ke noi ua kapae ia na rula, a heluhelu alua ia ka bila. Waiho ia i ke komite o ka hale ma ka Poaha.
Heluhelu mua mai o Mr Waterhou se he bila e hoololi ai i ka pauku 66 o ke kanawai kivila, e pili ana i na palapala hoopaa o na luna kudala.
Ma ke noi ua heluhelu alua ia ka bila. Waiho ia i ke komite o ka Hale ma ka Poaha.
Mr Gay he olelo hooholo, e ninau ana i ke Kuhina Kalaiaina heaha ke kuleana o ke aupuni ma na ahupuaa o Kailua a me Kaneohe i kuai ia ia Hailaki. Hoihoi hou ia no ka halahu mawaho loa o na rula.
Heluhelu mai o Mr Birch he olelo hooholo e kauoha ana i ke kakauolelo, e hoihoi koke mai i na bila a pau i waiho ia no ke kakau poepoe, a oia ka hana mua o ka Hale o ka Poaha. Hooholoia.
Waiho hou mai o Mr Gay i kana olelo hooholo i hoihoi hou ia ai. Hooholoia.
Heluhelu mai o Mr Kalaukoa he olelo hooholo i $1,000 no ka hoomaemae ana i ke alanui kula, mai kela aoao aku o ke ka-
hawai o Waikahalulu a hiki i ke alanui Liliha. Waiho ia i ke komite nana e noonoo nei i ka palapala hoopii e pili ana ia mea.
NA HANA O KA LA.
Heluhelu akolu ia ka bila e hoopau ai i ka pauku 480 o ke kanawai kivila, e hoopau ana i ke dala hookahi o ka auhau kino. Mahope o ka noonoo ia ana, ua hooholoia ka hoopau ana i ka auhau kino.
Eia ka poe ae ma ka hoopau ana i ka auhau kino. Leleiohoku, Moehonua, Aholo, Kahuila, Kaiue, Kanealii, Kamauoha, Pilipo, Lilikalani, Birch, Halstead, Gay, Helekunihi, Barenaba, Kalaukoa, Aiwohi, Nawahi, Halemanu, Mahoe, Nahaku, Wana, Nakaleka, Mahelona, huiia he 23.
Eia ka poe hoole i ka auhau kino. Dominis, Kapena, Green, Walker, Kakela-opio, Kakela-makua, Waila, Ake, Naili, Gay, Waterhouse, Naukana, Preston, hui ia he 13 poe hoole.
Heluhelu alua ia ka bila e hoololi ai i ka pauku 1 o ka mokuna 56 o ke kanawai karaima, e pili ana no ka haalele ana i na mea i mare ia. Hoopanee loa ia.
Heluhelu alua ia ka bila e hoololi ai i ka mokuna 40 o ke kanawai karaima, e pili ana no ka walaau po. Kakau poepoe ia.
Hoomaha ka Hale.
Halawai ka Hale ma ka ho ra 1 P. M.
Heluhelu alua ia ka bila e hookuu ai i na paahana malalo o na aelike ma na la koho balota. Waiho ia i ke komite wae, Hon. Gay, Aholo, Kapena, Barenaba, a me Mahoe na lala o ka komite wae.
Heluhelu alua ia ka bila e hoopau ai ka mokuna 10 o na kanawai o 1870 e pili ana no ke oki mare. Waiho ia ma ka papa a hoi mai ka Hon Kauai  ka mea nana ka bila i lawe mai.
Heluhelu alua ia ka bila e hoololi ai i na pauku 1, 2, 30, o ka mokuna 59 o ke kanawai karaima, oiai e noonoo ia ana. Ua waiho ia imua o ke komite o ka Hale. Noho o Kahanu ma ka noho. Heluhelu ia ka pauku 1, 2, 3, 4, 5, a hoopau ia ke komite, me ka hai aku i ka Hale, ua hooholo loa ia ka bila no ke kakau poepoe ana. Aponoia. Hooholoia e heluhelu akolu ma ka Poaha e hiki mai ana.
Heluhelu alua ia ka bila e hooholo ai i ka mokumahu holopili aina. Waiho ia e noonoo pu me kekahi bila mokumahu e ae, ma ka Poalua.
Heluhelu alua ia ka bila e hoololi ai i ka pauku 49 o ka mokuna 55 o ke kanawai karaima. Waiho ia no ke kakau poepoe, a e heluhelu akolu ia ma ka Poaha.
Heluhelu alua ia ka hoololi no ka pauku 20, o ke Kumukanawai, mahope o ka noonoo ia ana, ua hooholoia ka hoololi no ke kakau poepoe ana, a e heluhelu akolu ia ma ka Poakahi.
Eia ka poe i makemake aole pono ke koho ia na lunakanawai i lunamakaainana, Moanauli, Martin, Aholo, Kahuila, Kaiue, Kanealii, Pilipo, Lilikalani, Birch, Naili, Halstead, Gay, Helekunihi, Kalaukoa, Aiwohi, Nawahi, Mahoe, Waterhouse, Nakaleka, Preston, Mahelona, Kaina, hui ia he 22.
Eia ka poe ae e noho no na lunakanawai i lunamakaainana iloko o ka Ahaolelo, Leleiohoku, Dominis, Kapena, Green, Moehonua, Walker, Kakela-opio, Kuihelani, Parker, Kahanu, Ake, Kamauoha, Barenaba, Halemanu, Nahaku, Wana, Naukana, hui ia he 17.
Heluhelu alua ia ka bila e hoololi ai i ka pauku 1, 3, o ke kanawai o 1863, e pili  ana o ka lole a me kuai ana aku i ka pipi. Waiho ia no ke kakau poepoe, a e heluhelu akolu ia ma ka Poalua.
Heluhelu alua ia ka bila e hoololi ai i ka pauku 2 o ka mokuna 35 o ke kanawai hoopai karaima, e pili ana no ka maluhia Sabati. Hoopaneeia.
Hoopanee ka Hale.
LA HANA 76.—Poakolu, Augate 2
Halawai ka ahaolelo e like me ka mau.
Noi mai o Hon Kaai e hapai hou ia ka noonoo ana no ka bila e hoopau ai i ka auhau kino, a e waiho ia ma ka papa. Hooholoia.
Hoika mai ka Loio Kuhina i na mea e pili ana i ka oihana makai o Honolulu, e like me ke kauoha a kekahi olelo hooholo ia e keia Hale.
Heluhelu mua mai o Mr Halstead, he bila e haawi ana i ka mana i ke Kuhina Kalaiaina e haawi aku i na laikini lapaau. Waiho ia no ka heluhelu elua.
Heluhelu mua hou mai no ia he bila e hoopau ai i ka pauku 259 o ke kanawai kivila. Hoihoi hou ia.
NA HANA O KA LA.
Noonoo ia ka Bila Haawina imua o ke komite o ka Hale. Noho o Mr Kalaukoa ma ka noho.
OIHANA KAUA.
Ke ola o na koa   $58,840
Kapae ia ka noonoo ana a hoike mai ka Oihana Koa.
OIHANA KALAIAINA.
Uku Kuhina   10,000
Noi o Mr Birch.  8,000
" Nakaleka,  6,000
" Pilipo,  7,000
Hooholoia   8,000
Kakauolelo mua  4,000
Noi o Mr Pilipo  3,600
" Nakaleka  3,000
Hooholoia   4,000
Kiaaina o Oahu  3,600
Noi o Mr Kanealii  3,000
" Kuihelani  4,000
" Gay  5,000
Hooholoia   3,000
Kiaaina o Maui  3,600
Noi o Mr Barenaba, e hoopaneee iki.
" Kaai  4,000
" Lilikalani  3,000
Hooholoia   3,600
Kiaaina o Kauai  2,400
Noi o Mr Kanealii  2,000
Hooholoia   2,400
Kiaaina o Hawaii  3,600
Noi o Mr Kanealii  3,000
Hooholoia   3,600
Kakauolelo Kiaaina o Oahu,  Hoo.  800
" " Maui  1,200
Noi o Mr Kanealii  1,000
Hooholoia   1,200
Koena uku Kakauolelo Kiaaina o Maui,  Hooholoia  150
Kakauolelo Kiaaina o Kauai  1000
Noi o Mr Lilikalani  800
" Kaai  950
Hooholoia   800
Kakauolelo Kiaaina Hawaii  1,200
Noi o Mr Kanealii  1000
Hooholoia   1,200
Lunapaahao Oahu  3,000
Noi e Mr Kanealii  2,400
Hooholoia,   3,000
Lunawai a Kakauolelo Makeke,  3,600
Noi mai o Mr Preston, e hoohui i keia haawina me ka Luna Alanui, Luna o na Hana Hou a me ka Lunawai a Kakauolelo, Ka Uku  6000
Noi ka Loio Kuhina. Haawi ia keia haawina ma ka lima o kekahi komite wae
Hooholoia, waiho ia ke komite wae.
Luna Leta Nui  5000
Noi o Mr Birch  4000
Hooholoia   5,000
Kakauolelo mua Luna Leta Nui  2,400
Noi o Mr Pilipo  2000
Hooholoia   2,400
Kakauolelo elua Luna Leta Nui  1,200
Noi o Mr Nakaleka  1000
" Kanealii  kapae loa.
Hooholoia   1,200
Na Luna Leta o Hawaii  800
Noi o Mr Nakaleka  700
" Birch  hoopanee loa.
" Pilipo, e hoopane keia mau haawina a pau me ko na mokupuni e ae, a hoike mai ke Kuhina Kalaiaina i ka nui o na luna leta uku ia ma na mokupuni. Hooholoia.
Kela me keia lilo oihana leta  3,280
Noi o Mr Kenealii  2,400
Hooholoia  3,280
Na Luna Alanui  9000 hoopanee iki ia.
Kiaai Hale ilina alii  600
Noi o Mr Martin, no na ilina alii o Maemae a me ko Lunalilo  800
Hooholoia   600
Noi o Mr Pilipo, e hookomoia ma ka Bila Haawina.
No ke kiai hale ilina o Lunalilo  200
Noi Kiaaina Kapena, e hoopanee loa ia keia haawina.
Noi o Mr Lilikalani  400
" Kaai  300
" ka Loio Kuhina, aole kuleana o ke aupuni maluna o kela ilina, nolaila, aole au e koho ana no keia mea.
I ka ninau ia ana no ka hoopanee loa ana i keia haawina, ua hoole ia.
Eia ka poe makemake e hoole i ka haawi ana ne ke kiai ilina o Lunalilo, me ka manao ole ae i ka makana $25,000 ana i kauoha ai ma kana kauoha no ke kokua ana i ka poe ilihune, ua ane like keia hoole ana me ke aloha ole ia ia e moe malie mai nei i kona ilin, Kiaaina Kapena, Barenaba, Nahaku, Wana, hui ia he 4 wale no a he 25 ma ka hoole, nolaila, ua haule ka hoopanee loa, a hooholoia he $200.
Hoopau ia ke komite me ka hai aku i ka Hale, ua noonoo ia kekahi mau haawina o ka Bila Haawina a hiki i ka haawina, kiai hale ilina o Lunalilo. Apono ia ka hoike a ke komite.
Hoike mai ka Peresidena i ke komite wae no ka noonoo ana i na haawina o na "Luna Leta o Hawaii, Maui, Molokai, Lanai, Oahu, Kauai, a me na haawina o ka Lunawai a Kakauolelo Makeke." Pres-
ton, Kakela-opio, Green, Ake a me Barenaba.
Hoopanee ka Hale.
LA HANA 77.—Poaha, Au gate 3
Halawai ka Ahaolelo e like me ka mau.
Heluhelu mai o M r Mahelona he olelo hooholo e kauoha ana i ke komite o na ahahookolokolo e hoike mai i ka lakou hoike e pili ana i ka hoopii a Mr Haalou no kona uku lawe leta. Waiho ia a noonoo pu me ka hoike a ke komite ma keia Poakolu ae.
Heluhelu mua mai o Hon Kaai he bila e hooponopono ana i ka lawe ana mai a me ke kuai ana aku i ka opiuma. Waiho ia e pai a e heluhelu alua ia ma ka Poaha.
Hoike mai ke komite pai, ua pai ia ka hoike a na komisina e unuhi a e hoohui ana i na kanawai a pau o ke aupuni.
Heluhelu mai o Mr Birch he olelo hooholo e halawai keia Hale ma na Poaono a pau e like me na la e ae. Hooholoia.
Ma Kalaukoa, he olelo hooholo, e haawi i uku hoomanao no Kahaleaahu a e kauoha ana i ke komite o na ahahookolokolo e hoike mai i ka lakou hoike no ka hoopii e pili ana ia mea. Hoole ia.
Heluhelu mai o Mr Birch he olelo hooholo e kauoha ana i ke komite o na ahahookolokolo e hoike mai i ka lakou hoike no ka bila e hoololi ai i ke kanawai e pili ana i ke kuai ana i ka awa. Waiho ia ma ka papa.
NA HANA O KA LA.
Heluhelu alua ia na bila e hoololi ai i na pauku 64 a me 66 o ke kanawai kivila imua o ke komite o ka Hale. Noho o Mr Halemanu ma ka noho, noonoo pakahi ia na pauku. Mahope o ka noonoo ia ana, ua hoopauia ke komite me ke noi aku i ka Hale, e waiho ia na bila ma ka lima o ke komite wae. Aponoia. Eia na lala o ke komite wae, Waterhouse, Green, Loio Kuhina, Ake, Aholo, a e hoike mai i ka Poaono.
Heluhelu akolu ia ka bila e hoololi ai i ka pauku 233 o ke kanawai kivila, e pili ana i na luna pa aupuni. Hooholo loaia.
Heluhelu akoluia ka bila e hoololi ai i ka pauku 12 o ka mokuna 86 o ke kanawai hoopai karaima. Hooholo loa ia.
Heluhelu akolu ia ka bila e hoololi ai i ka pauku 25 o ke kanawai e pili ana no ka oihana ao palapala o ke aupuni, e hoomahuahua ana 1 dala no ka la, ka uku o na kumukula. I ka ninau ia ana, ua kakau ia na ae a me na hoole. Eia ka poe e hoole ana i ka hookahi dala ka uku o na kumukula. Nahaku a me Preston, hui me 7 alii, he 9 wale no. Eia ka poe ae he 24. Nolaila ua hooholoia.
Hoomaha ka Hale.
Halawai hou ka Hale ma ka hora 1 P. M.
Heluhelu akolu ia ka bila e hoololi ai i ka pauku 1, o ka mokuna 41 o ke kanawai karaima e pili ana i ka ona. Hooholoia i
Heluhelu akolu ia ka bila e loaa ai ka lawelawe ana i ka lapaau naauao ana, a e kauoha ana i na kauka aole e haalele i na wa a pau e kii ia mai ai, ke ole lakou i paa i kekahi mea e ae. Mahope o ka noonoo ia ana, ua hooholo loa ia ka bila, me ke kakau ana i na ae me na hoole.
Eia ka poe e hoole ana i ka hele ana o na kauka e lapaau i ka poe ilihune, Green, Walker, Kakela-opio, Kakela-makua, Kahanu, Ake, Naili, Gay, Waterhouse, Naukana, Preston, Kaina, hui ia he 12.
Eia ka poe aloha i ka poe ilihune, a e kauoha ana i na kauka e hele e lapaau i ka poe ilihune ke kii ia aku. Leleiohoku, Kapena, Moehonua, Kuihelani, Moanauli, Martin, Kaai, Aholo, Kahuila, Kaiue, Kanealii, Kamauoha, Pilipo, Lilikalani, Birch, Halstead, Helekunihi, Kalaukoa, Aiwohi, Nawahi, Halemanu, Wana, Nakaleka, Mahelona, hui ia he 24.
Heluhelu akolu ia ka bila e hoololi ai i ka pauku 18 o ka mokuna 86 o ke kanawai karaima e pili ana i ke koho balota. Hooholoia.
Heluhelu akolu ia ka bila a hoololi ai i ka pauku 53 o ka mokuna 55, o ke kanawai karaima e pili ana i ka lapaau. Hooholoia.
Heluhelu akolu ia ka bila e hoololi ai i ka pauku 485 o ke kanawai kivila, e hookuu ana i kekahi mau waiwai aole e auhau ia. Hoopanee ia a hoi mai ka mea nana ka bila.
Heluhelu akolu ia ka bila e hoololi ai i na pauku 1, 2, a me 30, o ka mokuna 59 o ke kanawai hoopai karaima, e pili ana no ke ola o ka lehulehu. Hooholoia ka bila me kekahi hoololi ma ka puaku 1.
Heluhelu akolu ia ka bila e hoololi ai i ka mokuna 40 o ke kanawai karaima e pili ana i ka walaau po. Hooholoia ka bila me ka hoololi.
Noi ke'lii Kakela e hapai hou ia ka noonoo ana. Hooholoia, noonoo ia ka bila a hooholo hou ia.  Hoopanee.