Ka Lahui Hawaii, Volume II, Number 33, 10 August 1876 — Page 1
KA LAHUI HAWAII.
"Ua mau ke Ea o ka Aina i ka Pono."
BUKE II.} HONOLULU, POAHA, AUGATE 10 , 1876. {HELU 33.
KA NUPEPA KA LAHUI HAWAII.
Paiia ma kela Poaha me keia Poaha.
H. H. PALEKA, Luna Hooponopono.
He pepa i hoopukaia i kela me keia hebedoma no na Ohana a me na Ekalesia o Hawaii; he mea kokua i ka noho pono ana o na ohana, ka maluhia o kanaka, a me na pomaikai kino a uhane o ka Lahui Hawaii. "Aole paonioni; aole haanui; aole hikiwawe ka huhu; aole noonoo ino."
O na Kumumanao a pau, na Nu Hou o kela me keia ano, na Mare, Hanau, Make, e kakau mai i ka Luna Hooponopono, a e paiia no ke kupono.
Aole e aeia ka pilikino, ke kuamuamu, ka hoino, a me ka huhu, a ua makemakeia ka hoohoihoi, hoolana manao, hoonaauao, a me ka hoopono.
He $1.75 ka auhau o keia pepa no ka makahiki, a he $1.00 no ka hapa makahiki.
E hookaa mua ia ka auhau o ka pepa mamua o ka loaa ana i kekahi mea makemake e lawe.
NO NA OLELO HOOLAHA.
E lawe ana keia pepa i na Olelo Hoolaha a na makamaka, e like me ke kupono, a e lawa pono ai hoi me ka hoohaiki ole i ka huina o na kolamu kukulu manao, no ka uku haahaa.
O kela a me keia makamaka e makemake ana e hoolaha, e hele mai ma ke keena a e hui pu me ka Luna Hooponopono.
Aole e paiia kekahi Olelo Hoolaha ke ole e hookaa mua ia ka auhau.
Eia kekahi, ke noiia aku nei na makamaka e hoouna mau mai i na mea hou; mai hooloihi loa i na palapala; e hai pololei mai i na manao me ke kuawili ole, a e kakau mai me na hua moakaka.
H. H. PALEKA,
Luna Hooponopono.
PAPA, .APAP
AIA MA KAHI O
LEWE RS & DICKSON
(O LUI MA.)
KE KAHUA KAHIKO MA
Alanui Papu a me Alanui Moi
E LOAA AI NA
PAPA NOUAIKI o kela a me keia ano.
NA PAPA NANI
A PAA NO KE KUKULU ANA I NA HALE.
Na Pani Puka,
Na Puka Aniani,
Na Olepelepe,
Na Pou, na O-a,
Na Papa hele,
Na Papa Ku,
Na Papa Moe.
Na Pili o na ano a pau!
NA PEPA HOONANI,
Na PENA o na wai a pau
Na Kui mai ka nui a ka makalii,
Na Ami-puka,
Na Ami-puka Aniani,
Na Ami o na ano a pau,
NA AILA PENA,
NA AILA HOOMALOO,
NA AILA o na ano a pau.
NA VANIKI
Na mea HOOHINUHINU o na ano a pau.
Na Balaki o kela a me keia ano.
A KE HAI IA AKU NEI KA LONO i na makamaka a pau, ua makaukau keia mau hoa o oukou e hoolawa aku ma na mea a pau e pili ana ma ka laua oihana
—NO KA—
UKU HAAHAA LOA!
like me ka mea e holo ana mawaena o LAUA a me ka MEA KUAI.
E hele mai! E na makamaka!
A e lawa no hoi ko oukou makemake me ka oluolu
1] a me ka maikai.
C. H. DICKEY, (Kale Kika,)
LOIO!
A he Luna Kepa i apono ia e ke Aupuni no ka Apana o Makawao, Maui Hikina.
E HELE NUI mai ka poe a pau i loohia ia me na pilikia pili Kanawai o ka "Ua-ukiu" nei, a no ko oukou makamaka oiaio no e kokua a e hooikaika e hoopau i na pilikia ma na ano a pau o ke Kanawai. 17-1y
OLELO HOOLAHA.
MAI KA HAKUAINA C. C. HARRIS, o Kailua Ahupuaa o Koolaupoko, Oahu, ua lilo mai ia makou ka hoomalu ana i na kai lawaia o Mokulua, Ahulili a me Kea. Nolaila, ua koho pono ia o JOHN A. CUMINIS i Luna nana e hoomalu a hooponopono i na mea a pau ma ia mau wahi no ka makahiki.
E hoolohe na mea a pau iaia.
W. L. MOEHONUA.
Mei 20, 1876. [22tf]
Ama ra! Holokahana!!
UA MAKAUKAU KA MEA NOna ka noa malalo iho e hoolawa i ka makemake ma ka hana nowelo ana i na KAA o kela a me keia ano, me ka nani a me ka paa. Malaila e kiliopu ai ka holo a ka lio, me na kamaa hao i kaupaona likeia, a i hana ia hoi noloko mai o ka hao paa loa me ke kumukuai haahaa loa. Me ka eleu a me ka mikiala, ua hopo ole i ka puana ae "aohe lua e like ai. Ma Ainahou ka lua o ka Hale Amara mai ka Hale Dute mai. C. B. WILSON,
1 1y Kale Wilesona.
G. W. WEST!
HALE HANA KAA HOLO LEALEA ME na kaa hali ukana. E hana ia no ho na kaa nahaha no ka uku oluolu. E kapiliia no kapuai lio, no ka uku kupono. Ma ka hale hana mua o Mr. Benfield, ma ke Alanui Alii 1-1y
S. B. DOLE.
LOIO a he Alakai ma na mea pili Kanawai. Ua makaukau oia e pale i na hihia imua o na Aha Hookolokolo a pau o keia Aupuni, me ke kakau ana i na Palapala Pili Kanawai, ma ka olelo Hawaii a ma ka olelo Beritania. 1 1y
J. PORTER GREEN,
"KEIKI O KAUAUKIUKIU."
HE LOIO! A HE KOKUA OIAIO!
E HELE MAI NA MAKAMAKA A PAU I o'u nei, a na'u no e kokua ia oukou imua o ka Aha Hoomalu a me ka Aha Kiekie me ka uku haahaa makepono loa. Me na oki mare, a me ka hooponopono ana i ka waiwai o ka poe make, he eleu loa ka hana. Aia ko'u keena hana ma Alanui Kalepa kokoke i ke keena o ka Lunakanawai Aeko. E hamama mau ana ka puka, e hele nui mai i pau ka pilikia. 1-1y
CECIL BROWN,
Loio a he Kokua ma ke Kanawai
A HE AGENA NO KA HOOIAIO ANA I NA Palapala no ka mokupuni o Oahu.
Helu 8 Alanui Kaahumanu, Honolulu, H. P. A.
THE WATCHWORD.
Royal Songs, p. 87.
1
Aloha i na hoa,
Hana maikai no,
Hana me ke aloha e,
Pela mai Iesu.
Ie su no ke Kumu,
Kumu kamahao,
Oia hoi ke Hoa,
Aloha oia mau.
Cho. —Aloha, e aloha,
Ke kanawai paa mau;
Aloha i na hoa
A e kuikahi pu.
2
Aloha i na hoa,
Hana maikai no,
Ke aloha ole mai,
Aloha nae kakou.
I na hana ino,
A hoino pu,
Hana maikai aku,
Kauoha mai Iesu.
Cho. —Aloha, e aloha, &c.
3
Oluolu Iesu
E kokua mai,
I ka hana maikai ae
I ka poe kue.
Me ka noho pono,
Noho nona mau,
Noho me ke aloha e,
A hana maikai pu.
Cho. —Aloha, e aloha, &c.
4
Aloha i na hoa,
Hana maikai no,
Oia no ke kanawai,
Kanawai paa mau.
Kei no kona mana,
Hua kamahao;
Kei na pono ona,
Na pono oia mau.
Cho. —Aloha, e aloha, &c.
HAWAII.
ELINA KE KOA
HE KANAKA OPIO
PUUWAI WAIPAHE!
KA PALEKAUA LIONA HOI O KONA MAU LA
KE PUKONAKONA O KONA LAHUI, A O
KA OI WELINA HOPO O KONA
MAU ENEMI.
Mokuna VII—Helu 30.
AOLE lakou nei i hooloihi wale i ka manawa no ke ku ana malaila me ka hoolohe aku i keia leo, aka, ka i aku la no na kapuai imua, oiai, aia lakou ke ku nei ma kahi a lakou i ike ole ai i ke ano, a aole hoi i maopopo ka manawa a ka enemi e lele mai ai. Aole no i liuliu ko lakou nei hele ana 'ku imua, ike aku la i ka hamama mai o ka puka, a na ka malamalama i hoike mai na mea a pau.
Aia kekahi kaikamahine kino maikai, me na maka onaona, a me ka helehelena nani, e luhe ana kona mau lauoho uliuli pahee a pili i ka papahele. Aia oia maluna o kekahi noho nui ano hanohano kahi i noho ai, a e uhi ana na kihei o na waihooluu ano ole ma o a maanei o kona noho. O ka nani no a nani o na hiohiona o ua keena nei, a o ka ui no hoi a ui o ua kaikamahine nei ka lakou nei i hoomaopopo aku ai.
Alawa aku la o Elina ma o a maanei o ua keena nui nei, aohe kanaka e ae, o ua kaikamahine wale nei no; a no ka hiki ole iaia ke ku malie iho, nolaila, komo aku la no ia iloko, me ka hoonoho ana 'ku i kona mau hoa e ku malie malaila a hiki i kona wa e kauoha mai ai ia lakou e komo aku.
Me ka pololei a me ke ano koa o ko ia nei kino i komo aku ai, a ku aku la imua o na maka o ke aliiwahine o ke ana powa.
"He mau koa no na kiai o keia keena, aka, he ano e hoi kou e keia mea e ku mai nei imua o'u. He ano i oi aku ke koa mamua o ka'u i ike mua'i," wahi a ua kaikamahine nei.
Ua ano hoohewahewa ua kaikamahine nei, oiai, o ke kapa o kekahi o na powa ko keia kanaka e ku aku nei, aka, o ke ano o ke kino a me na hiona e ae, ua ano e ae, a me he la, ua oi aku ke kulana koa a me ke kilakila.
Wehe ae la o Elina i kona papale, kulou aku la imua, a puana aku la i keia mau huaolelo:
"Ma ka inoa o ke Alii ka Moi Nui Rikeke o ke Aupuni Beritania Nui, aole keia kanaka e ku aku nei imua ou he kiai no keia keena i hooluaia e na powa, aka, e ke kaikamahine maka palupalu a leo nahenahe, he kiai au no ka pono a me ka pomaikai o na makaainana o ka Moi i aloha nuiia; a he kahu malama no ka maluhia o ka Hae Kalaunu o kona aupuni."
Ku wikiwiki ae la ua kaikamahine nei iluna, hele mai la a paa mai la i ko ia nei lima, a me ka haalulu oia i pane mai ai imua o Elina:
"Na ka uhane ino hea i alakai mai i kou mau kapuai a ku ma na papahele o ka make? E ke kanaka opio, he oiaio, ke hai aku nei au, he make, ae, ha make ka hopena o na malihini a pau e hoea ana i keia wahi;" a puni ae la kona kino i ka haalulu, a kulu iho la kona mau omaka waimaka ma na papalina mohaha pua rose.
"Ua nele au ia mea he uhane ino e ke kaikamahine maikai, aka, na ka uhane maikai, ae, na ka uhane o ko'u lunaikehala, na ka uhane o ko'u aupuni, a na ka uhane o ke aloha i ko'u mau hoakanaka e hoomainoino mau ia nei; a na ia uhane maikai au i kono e hele mai, a na neia mau ami a me keia mau onohi maka i alakai mai a hehi i keia papahele o na powa," wahi a Elina i pane hou aku ai me kona ano mau.
"O! e na mana lani, ka puuhonua hoi o'u mau kupuna, e kiai mai iaia a hoihoi hou aku i kona mau kapuai i kahi ana i hele mua mai ai, oiai, he make ka hopena ke noho iho," pela ke kaikamahine i pane hou ae ai me ka leo pule a piha aloha no hoi.
"Ke ike nei au ua ano pihoihoi kou noonoo ana e kuu makamaka maikai, a no ke aha ? No ka hiki ana mai anei o ke kokua ma keia wahi e hoopakele ae ia oe, a lawe pio mai i na enami o kuu Moi? Mai kaumaha, e lana kou manao, a e hai mai ia'u, auhea lakou?" Pela ke koa Elina i pane aku ai me ka wiwo ole.
"O lakou? O Dumesa me kona mau koa anei kau e ninau mai nei, ka poe hoi a'u e makau nei nou?" Wahi a ke kaikamahine.
"Ae! Ae! Oia, a o lakou no a pau, auhea lakou?" Wahi a Elina.
"O ko lakou manawa hauoli keia, a ua hele aku nei mahope he mile paha ka hohonu mai keia wahi aku. Aia ilaila ko lakou keena waina, a ilaila lakou e hauoli mau ai no ka po okoa," wahi a ke kaikamahine.
"A! Ma ka mana o na lani, a ma ka inoa o ka Moi o Beritania, e nohoalii ana o Elina maluna o keia kahua, a ke kauoha aku nei au ia oukou e na tiga o ke kuna Zelina e hele mai imua me ka makaukau no oukou iho." Pela ka puana ana'e a ke koa o keia moolelo, a i kona kauoha ana'e i kona mau tiga e hele mai imua, ua lele mai la o Egemona imua me ka mama a ku iho la ma ka aoao o kona alii opio, a o na ukali hoi, ua lele pu mai la a ku iho la mahope, a kunou like aku la lakou imua o ke kamaaina. Ua puiwa ia oia no ka hoea ana 'ku o keia poe me ka nakeke o na pahikaua a me ka weli o ko lakou mau helehelena, a ua ano hopohopo loa oia, aka ua huki koke ae la o Elina i kana pahi, wili ae la i ka lewa a pahu iho la i ka honua, a i kona hookuu ana'e, naka ae la ka papahele, a kani hoi ke o i ke kapalili o ke kumu o ua pahi nei, pane aku la o Elina me ka mino aka maluna o kona papalina, i ka puana ana 'ku:
"E ka haku aliiwahine, mai wiwo, o keia mau kino e ku aku nei imua ou, he mau palekana ia nou, a o kou maluhia, ke lawe nei au malalo o ka'u malama ana, a o ka mea mua e hoopa ana i kekahi lihi o kou kino, e lilo no oia i enemi no'u, a i home hoi kona umauma no ka oi o keia makakila." Huli ae la ia me na maka uwila a pane ae la i kona mau hoa: "E lohe oukou, ha kauoha na'u!"
Kulou like mai la na ukali, a me ka puana like ana i pane mai ai: "E hooko ia, a ma o na lani la, e ola o Elina!"
"He oiaio aole au e wiwo ana no'u iho, aka, e makau ana au no oukou, oiai, he mea ole oukou i kela heluna lehulehu," wahi a ke kaikamahine.
"Ua oki, ua oki, e kuu makamaka! Mai manao no ko lakou heluna, oiai, he oiaio he heluna nui ko lakou, aka, he heluna iloko o ka hewa, a kue hoi i ka maluhia a na lani i makana mai ai, a o keia heluna uuku, ke ukali nei mahope o ka makemake oia mana lani, a ma o kana alakai ana, ke lana nei ko'u manao, aohe pilikia e kau mai ana, aka, he lanakila, a he hoopakele ana 'ku hoi ia oe e ka mea i lawe pio ia mai e na enemi."
"He oiaio, ua ike no au i kou mau helehelena mamua, a ua lohe no i kou leo, aka, he mau makahiki ae nei nae, a ua ano powehiwehi ka hoomanao ana," wahi a ke kaikamahine.
"He hoa'loha no'u kou kunane hanau mua, ua hele pu maua i ke kula, a o maua pu no kai hele huli ia oe i kou wa i nalowale ai. Na ka lima o na powa i lawe aku i kona ola, a na'u hoi i lawe ae ke ola o ia powa, a malaila mai a hiki i keia la, ua hoomau au i ka luku ana i na powa, a me he la, ke ike nei au i ko'u lanakila ana maluna o na enemi i keia la, a hoihoi aku au ia oe, ke kaikamahine a ko'u makamaka aloha e u mau nei no na makahiki loihi i hala'e, oia hoi ka Haku Alii Dumesa," wahi a Elina.
Akahi no a hoomaopopo iho ke kaikamahine ia ia nei, a pii ae la ka ula wahine maikai ma kona mau papalina, a me ka pihoihoi i lele mai ai me na lima i makaukau e apo mai a honi ia ia nei, aka, ua kaupale aku la o Elina i kana pahikaua, a pane aku la me ka leo aloha:
"Mai hookuu i kou mau noonoo ana e hoolauwili ia e kuu makamaka. Aole keia he manawa kaumaha, aka, e pono kakou e hauoli, a e kupaa ka manao me ka wiwo ole; a ano e hoomakaukau no ka halawai ana me na enemi."
Ua hiki ole i ke kaikamahine ke umi iho i kona waimaka, no ka mea, o Elina kona hoahele o na la kamalii, e hui pu ana me kona mau kunane, a ua komo ke aloha iloko ona mai ia mau la mai, a hiki i kona aihue ia ana. Oia ka rose o Sekotia kona mau la opio, a i ko Elina ike hou ana 'ku, ua oi aku ka nani. Mamua o kona aihue ia ana ua iini oia o Elina no kona hoa, a e hoohuiia laua ma ke kaula gula o ka mare, aka, mamua o kona hoike ana 'ku ia Elina ia mea, ua lilo e aku la ia. Me ko Elina papa 'ku, ua pane mai no kela, i ka i ana mai:
"I keia kakahiaka wale no ko lakou hele ana'ku nei, a aole e hoi mai ana a hala elua a ekolu la, a nolaila, he makemake ko'u e hoike aku ia oe, ua ulu ka hua o ke aloha nou e Elina iloko o ko'u umauma mai ka la o'u i lawe aihue ia mai ai, a i keia la, ua ulu a ua hua. Ua malama mau au me ka hiipoi ana i ke aloha o ko'u la opio, a iloko o ka inea a ma ka hoowalewale a na haku powa o keia wahi—no keia mau makahiki loihi he umi a'u i noho mehameha ai—-ua malama wau ia aloha, a me ka maemae o kou inoa, a me ka maluhia o ko'u kino, a i keia la, ke ku nei au he kino i kikohu ole ia e na hewa o ka noho ana o keia ao—a e Elina, e make au nou, a nou hoi ko'u ola."
Ua ane haohao o Elina no keia mea, he oiaio, ua aloha oia i keia kaikamahine, he aloha nae ma ke ano kaikuaahine, aka, ke ike aku nei oia, he ano aloha ipo maoli ko ia la. Minamina iho la oloko ona no keia, a hoomanao ae la me ka hauoli i ka inoa a me na hiohiona o kana Emelina, a pane aku la:
"E kuu kaikuaahine, he oiaio, aole no e nele ana ke aloha mawaena o kaua, oiai, ma ko kakou ano o ka noho'na o na la opiopio i au aku la, ua lilo kou mau kunane he mau kaikuaana no'u, a ooe la, he kaikuahine no makou: Nolaila e kuu kaikuahine, ke lawe mai nei kou kaikunane i kou aloha a malama iho me ka hiipoi nui ana."
Ua maalea no, a ua nui hoi ka naauao a akamai o ka Elina mau kamailio ana, oiai, ua ike no ia, ua komo kona mau iini ana i ke kukonukonu no ka ui iwaiwa o ka hale kakela o ka aukai, oia hoi ka pua nani Emeline e noho mai la me ka hoomanao mau no kona hoa maloko o na paia o ka hale Alii o ka Moi Rikeke o Beritania Nui. Nolaila, ua lawe ae oia i keia nani o ke ana eehia o ka honua powa, a hoolilo iho la i kona aloha, i kaikuahine, a i hoa hoi no kana Emeline no na la e hiki mai ana.
(Aole i pau.)
I KA POE HELUHELU NUPEPA.—I na makamaka e lawe nei i ka nupepa KA LAHUI HAWAII, mai loko aku o ka'u ope. Ke hai ia aku nei ka lohe; ia'u e kaawale aku nei mai ke kaona aku nei, ua ili iho la ka lawe ana i ka'u ope nupepa ia L. Kealakai. E hilinai oukou iaia. D. R. ALAPAKI.
Lawe nuhou o ke kaona.
Ahaolelo Kau Kanawai
O ke Aupuni Hawaii
Ka Moolelo o na hana o ke Kau o
ka M. H. 1876.
LA HANA 70.—Poakolu, Iulai 26.
Halawai ka Ahaolelo e like me ka mau.
Hoike mai ke Komite Wae no ka noonoo ana i ka bila e pili ana i ka la koho balota, a waiho mai he hoololi no ka bila. Waiho ia ma ka papa.
Hoike mai ke Komi te Wae no ka noonoo ana i ka bila e hoololi ai i ka pauku 798 o ke Kanawai Kivila, a waihoia mai he hoololi no ka bila. Aponoia.
Hoike mai ke Komite Wae no ka noonoo ana i ka bila e hoololi ai i ka mokuna 56 o ke Kanawai Karaima, a waiho mai he bila hou ma kahi o ka bila mua, aponoia.
Heluhelu mua mai o Mr Kauai he bila e hoololi ai i ka pauku 1 o ka mokuna 4 o ke Kanawai o 1870, e pili ana no ka aihue holoholona. Waihoia no ka heluhelu alua.
NA HANA O KA LA.
Hapaiia ka noonoo ana no ka Bila Haawina imua o ke Komite o ka Hale, P Isenberg ma ka noho.
Noi mai o Mr Birch i Haawina no L K A Kaanapali $400.
Mr Nawahi, e hoopanee loa ia keia noi. Hooleia.
Noi mai o Mr Barenaba e hapai hou ia ka noonoo ana no ka uku o ka Lunakanawai Hoomalu o Honolulu, a e hoomahuahua ae i $4000. Hooleia.
L K A Molokoi 600 Hooholoia
Noi o Mr Aholo, na lilo o kona hoihoi ana mai i kana Hoike Hapaha $50.
Mr Barenaba, hoole loa. Oiai e noonoo a ana, ua hoomaha ke komite a noho hou ma ka hora 1.
Halawai hou ke komite ma ka hora 1 auina la.
Hoololi mai ka Loio Kuhina, e hooliloia ia mau dala mamuli o ke kauoha ana a ke Kiaaina o Maui.
I ka ninauia ana, ua hooholoia ka haawina i noiia mai i
L K A o Lanai $400
Mr Barenaba 420
" Kalaukoa Hoole loa
i ke noi a Mr Barenaba.
Hooholoia 400
L K A Ewa & Waianae 600 Hooholoia
" Waialua & Koolauloa 600
Mr Naukana e hookaawale i mau apana hookolokolo okoa ko Waialua a me Koolauloa, a e ukuia laua 600 pakahi.
Mr Barenaba 300 "
" Nahaku 400 " Hooh
L K A Koolaupoko 600 Hooholoia
" Hanalei & Anehola 600 "
" Lihue, Kauai 600 "
" Koloa " 600 "
" Waimea " 600 "
K. Olelo Ah. Kp. Ap. 2 400
Mr Pilipo, e ukuia oia i $5 00 no kela la keia la.
Mr Kalaukoa $300
Hooholoia 400
K. Olelo 1 Ah Kp Ap 3 $300 Hooholoia
" 2 " " 300 "
" " 4 300 "
Na lilo o ka Aha Kiekie 2,300
Noi o Mr Kanealii 1,000
" Mahoe 1,700
" Nahaku kapae loa
Hooholoia 2300
Na lilo o na hoike, ma na hihia hewa (e ukuia e ka Lunakanawai e noho ana i ke kau ina he pono) 300
Mr Kanealii e kapae loa.
Hooholoia 300
Na lilo Ah Kp Ap 2 1,800
Mr Nakaleka 1,500
" Birch 1,800
Hooholoia 1,800
Na lilo Ah Kp Ap 3 1,800
Mr Mahoe 1,500
Hooholoia 1,500
Na lilo Ah Kp Ap 4 600
Noi o Mr Nakaleka 500
" Kalaukoa 400
Hooholoia 600
Kuai ana i na Bk Kanawai 750
Noi o Mr Birch 500
" Nahaku kapae loa.
Hooholoia 500
Na lako palapala no na aha apana & hoomalu i huiia ma na lilo a pai a me uku leta. 1,500
Noi o Mr Mahoe hoopanee loa ia.
" Nakaleka 1,000 Hooholoia
Hoopauia ke komite a noho hou ma ka Poalima, a aponoia ka hoike.
Hoopanee ka Hale.
LA HANA 71.—Poaha Iulai 27.
Hoomaka na hana e like me ka mau.
Heluhelu mai o Mr Kalaukoa he olelo hooholo, e kohoia i komite nana e huli aku i ka uku o ka Loio a ka Loio Kuhina i hoolimalima aku ai, a e hoike mai imua o keia Hale. Hooleia.
Kamailio mai ke Kuhina o ko na aina e, no kekahi mau mea i paiia ma ka nupepa P C Advertiser, e pili ana i ka haiolelo a Mr Halstead.
Heluhelu mai o Mr Nawahi he olelo hooholo, e kauoha ana i ke Kuhina Waiwai, e hoihoi au i na dala Sol a me Peso i ka mea a i ka poe hui paha nana i haawi mai ia mau dala iloko o ka waihona, e like me ka nui a lakou i waiho mai.
Eia ka poe i kamailio ma ka aoao kue i ka olelo hooholo: Kuhina Waiwai, ke'lii Kaai, Kapena a me Kahanu, a o Mr Pilipo ma ka aoao kokua i ka olelo hooholo.
Mahope o ka noonooia ana, ua waihoia ma ka papa.
Heluhelu mai o Hon Kaai he olelo hooholo e kauoha aku ana i ke Kuhina Waiwai e noi aku i ka Moi e halawai ka Aha Kukamalu, e noonoo i ka waiwai io o na dala "Un sol," a me "Un Peso," Hooholoia.
Heluhelu mua mai o Hon Kaai he bila e kokua ai i ka hooholo mokuamahu pili aina. Waiho ia no ka heluhelu elua.
Hoolaha mai o Hon Smith he bila e hoololi ai i ka pauku 11 o ke kanawai e pili ana i ka oihana ao palapala, i apono ia ma ka 1864.
NA HANA O KA LA.
Heluhelu akolu ia ka bila e hoololi ai i ka mokuna 30 o na kanawai o 1874 e hoololi ana i na pauku 1452 a me 1453, o ke kanawai kivila, e pili ana i na keiki kamehai. Hooholoia.
Heluhelu akolu ia ka bila e hoololi ai i ke kanawai e kau palena ai ka manawa e noi ai no na aie i ka waiwai o ka mea make, a e hoololi ai i ka pauku 1247 o ke kanawai kivila, a e hoopau loa ai i ka mokuna 21, o na kanawai o 1870. Hooholoia.
Helunelu akolu ia ka bila e hoomana aku ai i ke Kuhina Kalaiaina i na laikini no na mea malama banako. Hooholoia.
Heluhelu akolu ia ka bila e hoololi ai ka pauku 673 o ke kanawai kivila. Hooholoia. Hoopanee.
LA HANA 72—Poalima, Iulai 28.
Halawai ka Ahaolelo e like me ka mau.
Hoike mai ke komite o na aina aupuni a me na hana hou no ka noonoo ana i na palapala hoopi he 13, e noi ana no na alanui a me na alahaka, a me kekahi mau palapala hoopii e aku; ua hooholoia e ke komite e waiho ia na palapala hoopii ma ka papa. Waiho ia ma ka papa.
Hoike mai ke komite wae no ka noonoo ana i ka bila e hoololi ai i ka pauku 5 o ka mokuna 3 o ke kanawai hoopai karaima, e pili ana no ka uku hoopai o ka moekolohe. Hoihoi hou ia ka hoike i ke komite nana i lawe mai.
Hoike mai ke komite wae no ka noonoo ana i ka bila e hoololi ana i ka mokuna 58 o ke kanawai karaima e pili ana i ka hanai hipa, ua hoololi ia ka bila, a waiho mai i ka bila no ka heluhelu alua malalo o na rula. Aponoia.
Hoike mai ke komite wae no ka noonoo ana i ka bila e hoololi ai i ka pauku 780 o ke kanawai kivila e hoomahuahua ana i na lunamakaainana, a waiho mai i ka bila me ka hoololi. Waiho ia ma ka papa.
Hoike mai ke komite wae no ka noonoo ana i na bila a me na palapala hoopii e pili ana i na haku a me na kauwa, e noi mai ana, e waiho ia ma ka papa, a noonoo pu me kekahi mau bila e pili ana ia mea, oia hoi ua waiho ia ma ka papa.
Hoike mai ka hapa uuku o ke komite wae i koho ia no ka noonoo ana i ka bila e hoopau ai ke kanawai hookamakama. Waiho ia a noonoo pu me ka bila e pili ana.
Hoike mai ke komite wae i koho ia no ka noonoo ana i ka bila e hoololi ai i ka puaku 5 o ka mokuna 3 o ke kanawai karaima e noi mai ana e hoopanee ia ka bila i waiho ia aku. Waiho ia ma ka papa.
Hoike mai na komisina i kauoha ia e unuhi a e hoohui i na kanawai o ke aupuni e like me ke kauoha ana a ka Ahaolelo i hala. Waiho ia ka hoike e pai.
Hoike mai ke komite wae i koho ia no ka noonoo ana i ka bila e hoololi ai i ka pauku 1477, o ke kanawai kivila. Ua hooponopono ia ka bila mua, a noi mai a hooholo loa i ka bila me ka hoololi. Waiho ia ma ka papa.
Hoike mai ke komite wae no ka noonoo ana i na bila e hoololi i ka pauku 239, a me 242 o ke kanawai kivila; ua waiho ia ka bila mua ma ka papa, a waiho mai he bila hou ma kahi o ka bila mua. Aponoia.
Heluhelu mai o Hon Kaai he olelo hooholo, e hilinai ole ana i na lala o ka Papa Ola, no ko lakou hoopae ana mai ma ke awa i ka mokuahi "Australia," me ka mai puupuu liili, a e kauoha aku ke Kuhina Kalaiaina, e olelo aku i ka Moi, e hoopaa ia na lala o ka Papa Ola, a me na luna a kakou i koho ai.
(Nana ma ka aoao ekolu.)