Ka Lahui Hawaii, Volume II, Number 28, 6 Iulai 1876 — Page 1

ʻaoʻao PDF (1.23 MB)

KA LAHUI HAWAII.
"Ua mau ke Ea o ka Aina i ka Pono."
BUKE II.}  HONOLULU, POAHA, IULAI 6, 1876.  {HELU 28.

KA NUPEPA KA LAHUI HAWAII.

Paiia ma kela Poaha me keia Poaha.
H. H. PALEKA,  Luna Hooponopono.
He pepa i hoopukaia i kela me keia hebedoma no na Ohana a me na Ekalesia o Hawaii; he mea kokua i ka noho pono ana o na ohana, ka maluhia o kanaka, a me na pomaikai kino a uhane o ka Lahui Hawaii. "Aole paonioni; aole haanui; aole hikiwawe ka huhu; aole noonoo ino."
O na Kumumanao a pau, na Nu Hou o kela me keia ano, na Mare, Hanau, Make, e kakau mai i ka Luna Hooponopono, a e paiia no ke kupono.
Aole e aeia ka pilikino, ke kuamuamu, ka hoino, a me ka huhu, a ua makemakeia ka hoohoihoi, hoolana manao, hoonaauao, a me ka hoopono.
He $1.75 ka auhau o keia pepa no ka makahiki, a he $1.00 no ka hapa makahiki.
E hookaa mua ia ka auhau o ka pepa mamua o ka loaa ana i kekahi mea makemake e lawe.

NO NA OLELO HOOLAHA.

E lawe ana keia pepa i na Olelo Hoolaha a na makamaka, e like me ke kupono, a e lawa pono ai hoi me ka hoohaiki ole i ka huina o na kolamu kukulu manao, no ka uku haahaa.
O kela a me keia makamaka e makemake ana e hoolaha, e hele mai ma ke keena a e hui pu me ka Luna Hooponopono.
Aole e paiia kekahi Olelo Hoolaha ke ole e hookaa mua ia ka auhau.
Eia kekahi, ke noiia aku nei na makamaka e hoouna mau mai i na mea hou; mai hooloihi loa i na palapala; e hai pololei mai i na manao me ke kuawili ole, a e kakau mai me na hua moakaka.
H. H. PALEKA,
Luna Hooponopono.

C. H. DICKEY, (Kale Kika,)

LOIO!
A he Luna Kepa i apono ia e ke Aupuni no ka Apana o Makawao, Maui Hikina.
E HELE NUI mai ka poe a pau i loohia ia me na pilikia pili Kanawai o ka "Ua-ukiu" nei, a no ko oukou makamaka oiaio no e kokua a e hooikaika e hoopau i na pilikia ma na ano a pau o ke Kanawai.  17-1y

OLELO HOOLAHA.

MAI KA HAKUAINA C. C. HARRIS, o Kailua Ahupuaa o Koolaupoko, Oahu, ua lilo mai ia makou ka hoomalu ana i na kai lawaia o Mokulua, Ahulili a me Kea. Nolaila, ua koho pono ia o JOHN A. CUMINIS i Luna nana e hoomalu a hooponopono i na mea a pau ma ia mau wahi no ka makahiki.
E hoolohe na mea a pau iaia.
W. L. MOEHONUA.
Mei 20, 1876.  [22tf]

Ama ra! Holokahana!!

UA MAKAUKAU KA MEA NOna ka noa malalo iho e hoolawa i ka makemake ma ka hana nowelo ana i na KAA o kela a me keia ano, me ka nani a me ka paa. Malaila e kiliopu ai ka holo a ka lio, me na kamaa hao i kaupaona likeia, a i hana ia hoi noloko mai o ka hao paa loa me ke kumukuai haahaa loa. Me ka eleu a me ka mikiala, ua hopo ole i ka puana ae "aohe lua e like ai. Ma Ainahou ka lua o ka Hale Amara mai ka Hale Dute mai.  C. B. WILSON,
1 1y  Kale Wilesona.

G. W. WEST!

HALE HANA KAA HOLO LEALEA ME na kaa hali ukana. E hana ia no ho na kaa nahaha no ka uku oluolu. E kapiliia no kapuai lio, no ka uku kupono. Ma ka hale hana mua o Mr. Benfield, ma ke Alanui Alii  1-1y

S. B. DOLE.

LOIO a he Alakai ma na mea pili Kanawai. Ua makaukau oia e pale i na hihia imua o na Aha Hookolokolo a pau o keia Aupuni, me ke kakau ana i na Palapala Pili Kanawai, ma ka olelo Hawaii a ma ka olelo Beritania.  1 1y

J. PORTER GREEN,
"KEIKI O KAUAUKIUKIU."

HE LOIO! A HE KOKUA OIAIO!
E HELE MAI NA MAKAMAKA A PAU I o'u nei, a na'u no e kokua ia oukou imua o ka Aha Hoomalu a me ka Aha Kiekie me ka uku haahaa makepono loa. Me na oki mare, a me ka hooponopono ana i ka waiwai o ka poe make, he eleu loa ka hana. Aia ko'u keena hana ma Alanui Kalepa kokoke i ke keena o ka Lunakanawai Aeko. E hamama mau ana ka puka, e hele nui mai i pau ka pilikia.  1-1y

E. STREHZ,
[AILUENE]

MALAILA E LOAA AI NA ANO LAAU A pau; a me na wai hoomaemae o kela a me keia ano. E hamama mau ana ka ipuka ma na po Poaono a pau. Ma ke kihi o Alanui Papu a me Hotele, ma Monikahaae.  1 1y

Hoolaha Komohewa.

KE HAI IA AKU NEI KA LONO I NA kanaka a pau, aole e hele wale ma ka aina i kapaia o Waimanalo, maloko o ke Ahupuaa o Honouliuli, Apana o Ewa, Mokupuni o Oahu, aole e hookuu wale i na holoholona, aole hoi ma ke oki ana i na laau, ka lawe ana i na wahie, a pepehi, a uhai wale paha i na bipi hihiu. Pen e na palena o ua aina nei: "O na aina hoolimalima mua ia ia JOHN MEEK, o ke kula o Lihue, e me ke kula o Honouliuli ma ka aoao ma uka a ma na aoao ma kai o Nanakuli ma kahi aoao, a no Koilina ma kahi aoao."  J. H. CONEY.
Honolulu, Feb 9, 1876.  [14 tf]  Luna Hooko.

CECIL BROWN,

Loio a he Kokua ma ke Kanawai
A HE AGENA NO KA HOOIAIO ANA I NA Palapala no ka mokupuni o Oahu.
Helu 8 Alanui Kaahumanu, HOnolulu, H. P. A.

WIL DER & Co.,
(WAILA MA.)

AIA MA KE KIHI O
ALANUI PAPU me MOIWAHINE!
Ua hoolako mau ia me ke kuai ana aku i na
Papa me na lako Kukulu hale
O NA ANO A PAU.
NA PANI PUKA!
PUKAANIANI,
OLEPELEPE,
LAKA,
AMI-LIILII,
AMI-LOLOA
PENA o na ano a pau,
AILA PENA,
VANIKI, &c.
Na Balak Pena me Puna,
Na Pepa Hale me na Lipine Pepa.
Aniani, Paakai, &c.
O na mea a pau maluna ae e kuai makepono loa ia aku no ke DALA KUIKE  1-1y

THOUGH THE TIME IS SHORT.
Brightest and Best. p. 76.

1
Ala e ano, oiai ke ao,
Hana no kakou, hana no a mau,
Ku no a lulu i ka hua maikai,
Mahiai a kiai i ka hua mai.
Cho.—Hana pule nei, hana aloha pu,
Hana no ke ao, hana no Iesu,
Hana mau, hana mau, o pe e ke ao,
Koonei hana nae, ole ia i pau.
2
He poe auwana'e, imi ia lakou,
Kii ma o, maanei, mai ke ao a po ;
Apo ae a paa, alakai maikai
Mai ka hewa ae, a hoohui mai.
Cho.—Hana pule nei, &c.
3
He poe kanikau, u no ka naau,
Launa me lakou, a hoolu no
Me na hua maikai, ka lau bama nei ;
Hoohauoli ae, e aloha e.
Cho.—Hana pule nei, &c.
4
A he poe ninau no ke ola mau,
No ke ao ma o, kahi maha no;
Kuhi pololei i ke ala e,
Ala ololi, ala e ola'i.
Cho.—Hana pule nei, &c.
5
A he poe maimai, palupalu e,
He mau pua mae, ane helelei ;
E hoala mai, hanai a maikai,
I mohala hou ma o, maluna'e.
Cho.—Hana pule nei, &c.
6
Ane pau ke ao, hana awiwi,
I apono mai ka Makua e
I ka po ana'e, a pii ae i o,
I hooleiia'e i ka lei nani mau.
Cho.—Hana pule nei, &c.
HAWAII.

ELINA KE KOA
HE KANAKA OPIO
PUUWAI WAIPAHE!
KA PALEKAUA LIONA HOI O KONA MAU LA
KE PUKONAKONA O KONA LAHUI, A O
KA OI WELINA HOPO O KONA
MAU ENEMI.
Moiuna VII—Helu 25.

          UA makaukau ka Zelina no ka hoouka kaua, ua hookuu ia iho la kona mau palekai a ua luli iho la a palahalaha wale no, me he kao ala. Huli pono aku la ka waha o na pukuniahi nunui i luna, e haka pono ana ko lakou mau maka nunui i ka oneki o ka enemi. O Egemona, e kua ana oia mamua loa me ka makaukau e hooko i na kauoha a Elina e haawi aku ai; a o na luina hoi, ua hoike mai ko lakou mau helehelena i ka aa, no ka hana e haawi ia aku ana ia lakou. O Elina, ku ihola ia iwaena konu o ka oneki me kona kulana ano mau. E paa ana kana pahikaua ma ke kaei o kona puhaka, o kona lima akau ma ke kumu, o kona mau maka e haka pono ana imua, a me kona lima i kuhi aku ai imua, puana ae la i na huaolelo kauoha. "E hoomakaukau! A e haawi aku i ka ukana a ka pauda ia lakou!"
          Na ia kauoha i haawi aku i ka lono i i na enemi, ua aa aku la ka Zelina e paio me lakou, a na ia mau poka no hoi i hoala ka hoomaka ana o ka hoouka kaua ana. Poha mai la ka leo nui weliweli o na pukuniahi kupinai ma o a maanei, pahola iho la ka punohu pouli o ka uwahi maluna o ka moana, a pii pololei aku la i ka lewa, me he la, e hai aku ana i ka lono, no ke ano o ka manawa. Iloko o keia manawa, aohe leo lohe ia mai kekahi aoao mai, a aole no hoi mai kekahi aoao aku, o ka leo wale no o na pu.  Ua kupinai ke poha ana mai o na leo o ka elele o ka make o na enemi, aka, ua komo ka maalea nui iloko o ko lakou mau hoapaio, ua nee mai la lakou a pili pu, a nolaila, ua hala wale ae la no na poka maluna, a pakika aku la maluna o ka ilikai Elike me ka eleu a me ka makaukau o Elina a me kona mau hoa, pela no ka holo o na hana maluna o ko lakou wahi waa uuku. Leie aku la na poka nunui, a o kana hana ua weliweli no; mahae pu aku la ka palekai o ka enemi, lele liilii aku la na apana papa ma o a maanei, a ua aneane iho e hooia iho na powa i ko lakou ane poino. Aka, ia Elina ma e manao ana ua kokoke mai la ka manawa e noho lanakila ai lakou maluna o na hoapaio, aia hoi, ua hoomaka mai la na luina o ka enemi e iho makawalu mai he heluna nui o lakou ma ka aoao, me ka manao e kau iluna o na papahele o ka Zelina, a e paio he alo a he alo me na maka kila.
          He kumu ano anoninoni keia no ko Elina aoao, oiai, he wahi heluna kauna wale no ko lakou huina ke hoohalike 'ku me ka huina nui o na enemi, a ke halawai pu aku lakou, alaila, e palima mai ana ko lakou nui i ka pa hookahi o kona mau hoaponoi. Aka, ina e hiki mai ana ia haawina, alaila, aole no e hiki ke pale ae, aka, o ke ku aku no a paio. Nee aku la lakou a pau a pili i ka palekai, me ka lakou mau makakila i makaukau a i hele hoi a hulali ka oi ke pa mai ka la maluna o lakou. Ua hele na helehelena o na enemi a kohu holoholona hihiu, e kau ana na hiohiona o ka poe inu koko maluna o lakou. Ke iho iho la he mau haneri o lakou me na pahi i hookala ia a oi loa, a e wawalo ana ko lakou mau leo uwa hiena ano daimonio.
          O ke kanaka mua loa o lakou, he kanaka nui, oia ke alakai ma ka nana aku, me kona mau aahu i haonani ia, a me kana pahi kumu gula. Kau mai la kona mau onohi maluna o Elina, a ike mai i ko ia nei ku aku me ke ano molale malie o na helehelena, me he la, e noonoo ana ia no kekahi mea ana i manao nui ai me ka hauoli, aohe wahi ano pihoihoi maluna o kona ano a pau, a o kona kulana mai luna a lalo, e hoike aku ana, he koa, a he puuwai i nele i ka wiwo. E paa ana no kona lima i ke kumu o kana pahi, a e kau aku ana kona mau maka ano mino aku maluna ona.
          No koia nei ano kaena ma na ano wale iho no, ua piha loa iho la ke alakai powa i ka inaina, a hui pu mai la hoi me ka inaina mua, ua paila hahana loa ae la ka wela o kona umauma no ke koa Elina, me ke ake nui e haule koke mai oia ilalo a e hahau koke mai hoi i kana pahi maluna o kona enemi a pepehi a make me ka hikiwawe. Ua paa loa kona manao aohe e lanakila o Elina maluna ona, a ua hauoli o loko iho ona no ka loaa'na o keia enemi nana i hooauhee na powa iloko o na la i hala aku. Me ka leo nui awahua oia i pane mai me ka aa o kona mau maka ia Elina: "O oe e kena holoholona, i keia la he ilio oe na'u, a e palu kou elelo i ke koko o kou puuwai!" Hookuu ae la i ka leo uwa nui, a wili mai la i kana pahi iaia nei. Pane aku la o Elina me ka malie: "Aole loa e ae aku keia makakila e hoohaumia ia na papahele o kona home aukai e kou mau kapuai haumia e ka puuwai eleele!"
          O ka Elina mau olelo, ua ko a oiaio, no ka mea, mamua o ka hehi ana o na wawae o ke kanaka powa i ka papahele o ka Zelina, aia hoi, ua ome aku la ka oi wini o ka makakila a ke keiki Elina mawaena o kekahi o kona mau iwi aoao, halawai aku la me kona puuwai a huli aku la ma kela aoao o kona kino. "E make oe e kuu enemi!" wahi a ke koa. He leo ano kanikau ko ka enemi i puoho ae, lele ino ae la kona mau lima iluna a kuho iho la ia mawaena o na moku elua, a nalo aku la kona kino iloko o ka lua kupapau o ka moana kaiuli o ka hohonu. O keia mea, ua ike ia mai la e na enemi, a ua hoomahuahua ia ae la ko lakou inaina, a ua hooikaika mai la lakou e iho mai. I ka makamua, ua nui ka weliweli o na hana a na hoa o Elina, oiai, mamua o ka pa ana o na kapuai wawae o na enemi i ka oneki o ko lakou kuna, aia hoi, ua halawai aku la na pahi a lakou me na enemi, a e helelei ana iloko o ke kai na kino make. Aka, aole no nae i liuliu aku, ua hoomaka mai la ka mahuahua loa ana o lakou, a ua piha mai la ka oneki ia lakou, a ua hui aku hui mai.
          Pili aku la o Egemona i ke kia mamua, a huli aku la kona alo imua o na enemi, e hahau ana, a e pale ana me ka eleu a me ka hikiwawe. O na luina, ua honi aku lakou i ke koko o ka enemi, ua  ala mai la ko lakou mau manao wela, a ua hooko lakou i na olelo i kamailio ia no lakou, a hoike hoi, he oiaio ko lakou inoa, o na ilio hae o ka moana. Ua ike o Elina i ke ano pilikia o kona hoa o Egemona, oiai, ua puni aku la ia i na enemi a e noke aku ana lakou i ka hahau makawalu me ko lakou mau pahi ma o a maanei ona. Ia manawa, aole no i nele o Elina i ka hoa paio, ua puni no ia i na enemi, aka, aole nae e hiki ia lakou ke ku loihi mai imua ona, oiai, ma kahi o kana pahi e oni aku ai, o ka make no ka hopena o kona enemi. Lele aku la ia imua elike me ka mama o ke tiga a me ka ikaika hoi o ka liona, oili aku la ke ahi lalapa o ka inaina mai kona mau onohi aku, a me ka hikiwawe nui i hahau aku ai i kana pahi ma o a maanei, helelei aku la kona mau enemi mamua ona, a me ka lele hookahi ana, ku aku la ia ma ka aoao o Egemona. Ua ano hoomaka mai ko Egemona paupauaho, ua moku lihi mai la kona papalina, a e kulu ana na omaka koko maluna o kona papalina. Pii mai la ke aloha mai na aa welina mai o ko Elina puuwai, a hoohanini mai la i na kulu waimaka mai loko mai o kona mau maka.
          "E na ino e hoao ana e paio he haneri me ka mea hookahi, aole loa oukou e lanakila, owau ke halawai me oukou a hiki i ka neoneo ana o keia oneki mai ko oukou mau helehelena." Ua a ka inaina a ua hoomaka ka hahana piha o kona puuwai, i ka ike ana aku i ke koko o kona hoa aloha aukai, a ua nee aku la kona mau kapuai imua, me ka weliweli nui o ka hana a kana pahikaua. Ua hoike mai la oia i kona aloha nui i kona hoa, a ua like me ka ikaika o kekahi kupua kona mau ami ia manawa. Ua hoomanawanui oia i ka alo ana i ka make a na enemi i manao'i e kau mai maluna ona; aka, ua hookaumaha ia no nae kona manao. No ka mea, i kona nee ana aku i mua, e pale ana i na poino i kau ia mai maluna o kona hoa, a i kona huli ana ae i hope e nana aku i kona nawaliwali, aia hoi, ua nalo aku la ia. Ua like me he ihe la i pahu ia mai i kona umauma ka lele ana ae o kona hauli a hoomaka iho la e lauwili i kona noonoo. Me keia ano hookaumaha i kona noonoo aole no oia i hoonawaliwali ia mai, aka, me he la ua hooi ia aku ka ikaika a me ka hahana o kana pahikaua. Holo aku la ia ma o a maanei o ka moku me na maka e au ana ma na wahi a pau, aka, o kona hoa, ua nalowale loa iho la iloko oia manawa koke no.  (Aole i pau.)

Ahaolelo Kau Kanawai
O ke Aupuni Hawaii.
Ka Moolelo o na hana o ke Kau o
ka M. H. 1876.

LA HANA 44.—Poaha, Iune 22.
Halawai ka hale i ka hora 1 P. M. Hon. Mr. Rhodes ma ka noho. Pule ka Rev. M. Kuaea.
Heluheluia ka moolelo o ka la i hala, a ma ke noi, ua aponoia.
HOIKE A NA KOMITE WAE.
Hoike mai ke Komite Wae no ka noonoo ana i ka bila e pili ana i ka maluhia o ka la koho balota, a waiho mai he pakui mahope o ka bila. Hoihoi hou ia ka hoike a me ka pakui e hooponopono.
Heluhelu mua mai ke alii Kamika he bila e huikala aku aii ke Kuhina Waiwai. Waiho ia no ka lu heluheelua ana.
Heluhelu mai ka Hon. Mr. Mahoe he olelo hooholo, e aua ia ke Kilauea a pau pono ka hana a ke Komite no ka nana ana i na mai lepera.
Hoololi mai ka Hon. Mr. Aholo, e haalele ke Kilauea i ka hora 9 o ke ahiahi Poalima, a e ku mai i ke ahiahi Sabati ma Honolulu nei. Ua hooholoia ka olelo hooholo me ka hoololi.
Ma ke noi ua kapaeia na rula, a heluhelu mai ka Hon. Mr. Mahoe he mau hoopii. 1. I Lunamakaainana okoa ko Hilo Akau. Waihoia i ke Komite Wae no ka noonoo ana i ka bila e hoololi ai i ka pauku 780 o ke kanawai kivila, e pili ana no ka hoomahuahua ana i na Lunamakaainana. 2. I lunaauhau okoa ko Hilo Akau. 3. I lunahelu okoa ko Hilo Akau. Waihoia i ke Komite Waiwai.
Hoolaha mai ka Hon. Mr. Barena ba he bila e hoololi ai i ka uku o na Kumukula.
Heluhelu mai ka Hon. Mr. Nahaku he olelo hooholo, i $400 no ka laweleta mai Kaanapali a i Waihee. Waihoia a noonoo pu me ka bila haawina.
Ua waiho hou mai oia he olelo hooholo, i $800 no ke alanui pali mai Honokohau a hiki aku i Waihee. Waihoia a noonoo pu me ka bila haawina.
Heluhelu mai ka Hon. Mr. Kahuila he olelo hooholo, i $2,000 no ka hawai o ke kulanakauhale o Waiohinu, Kau.
Heluhelu mai ka Hon. Mr. Kalaukoa, e holo pu o Kahui i kauka no ka nana ana i na mai lepera. Ae ia.
NA HANA O KA LA.
Ka noonoo ana i ka bila e hoololi ai i ka pauku 1419 o ke kanawai kivila, ma ka heluhelu elua ana  Waihoia i ke Komite Wae.
Ka noonoo ana i ka bila e hoololi ai i ke
kanawai e hoohaiki ana i ka lawe ana a me ke kuai ana i ka opiuma, i aponoia ma ka M. H. 1874, ma kona heluhelu elua ana. Waihoia no ke kakau poepoe.
Ka heluhelu elua ana i ka bila e hoololi ai i ke kanawai o ka pauku 1423 o ke kawai kivila i aponoia ma ka la 28 o Iulai, 1872. Waihoia i ke Komite Wae mua.
Ka heluhelu elua ana i ka bila e hooponopono ai i na kai lawaia.
Kamailio mai ke alii Kaai ma ka aoao kue i ka bila, a ua hoopanee loa ia.
Kamailio mai ka Hon. M r. Waterhouse ma ka aoao kokua i ka bila.
Ma ka ninau ana, o Dominis, Kanoa, Kapena, Green, Moehonua, Walker, Kakela opio, Kuihelani, Waila, Kahanu, Moanauli, Martin, Ake, Paulo, Kamauoha, Halstead, Gay a me Preston ma ka aoao hoopanee loa i ka bila. A o Kahuila, Kaiue, Kanealii, Pilipo, Kauai, Birch, Naili, Helekunihi, Barenaba, Kalaukoa, Aiwohi, Nawahi, Halemanu, Mahoe, Waterhouse, Nahaku, Wa na, Naukana, Nakaleka, Mahelona a me Kaina, a mahope o ke koho ana, ua hoohui mai ka Hon. Mr. Kaai ma ka aoao hoole loa i ka hoopanee, a o lakou nei ka poe aloha aina a aloha makaainana. A ua hooholo ia ka bila me ke kakau poepoe ana.
Hapaiia ka bila e hoomana ai i ke Kuikahi Panailike.
Kamailio mai ke Kuhina o ko na aina e, a noi mai no e ninau ano. Hoopaapaa ka hale, a noiia mai e.
Hoopaanee ka Hale.
LA HANA 45.—Poalima, Iune 23.
Halawai ka hale i ka hora 1 P. M. Pule ka Rev. M. Kuaea.
Heluheluia ka moolelo o ka la i hala a aponoia.
NA OLELO HOOHOLO.
Heluhelu mai ka Hon. Mr. Kanealii no ka manawa mua, he kanawai e hooponopono ana i na manawai o ka apana o Wailuku maloko o ke ahupuaa o Waihee, Waiehu, Wailuku a me Waikapu. Hooholoia no ka heluhelu elua ana.
Waiho mai ka Hon. Mr. Kalaukoa he olelo hooholo, e hoomaka ka halawai ana o keia hale ka hora 10 A. M., a e hoomaha ma ka hora 12 M., a hoomaka hou ma ka hora 1 P. M. Hooholoia.
Hoolaha mai ka Hon. Mr. Naili he kanawai e hoololi ai i na pauku 6 & 7 o ke kanawai i apono ia ma ka la 23 o Aug., 1862, e pili ana i na luna alanui.
Waiho mai ka Hon. Mr. Kanealii, e kauoha ia ke Kuhina Waiwai e waiho mai i ka bila haawina no na lilo a me na loaa o ke aupuni imua o keia hale ma ka Poakahi.
Ua pane mai ke Kuhina Waiwai, e makaukau ana ma ka Poalua, a e waihoia mai no ma ia la.
Hoolaha mai ka Hon. Mr. Naili he hoololi i manaoia no ka pauku 56 o ke Kumukanawai.
Ma ke noi, ua kapaeia na rula, a ua aeia ka Hon. Mr. Mahoe e heluhelu mai i kekahi mau hoopii no Hilo, e pili ana i ke ano o ka hoohanaia ana o na haumana kula, a me ka uku o ka Lunakanawai hou o Hilo Akau i manaoia.
Heluhelu mai ka Hon. Mr. Kanealii no ka manawa mua, he kanawai e hoopau ana i na auhau maluna o na makua i oi aku ka heluna o na keiki mamua o 4. Hooholoia no ka heluhelu elua ana.
Waiho mai ka Hon. Mr. Barena ba he olelo hooholo, e kauohaia ke Kakauolelo o ka hale e haawi ae ma ka lima o na Komite he 13 na hoopii a pau mai Kalawao mai.
Heluhelu mai ka Hon. Mr. Birch no ka manawa mua, he kanawai e hoololi ai i na pauku 1 & 2 o ke kanawai e hooponopono ana i na olelo aelike mawaena o na haku a me na kauwa. Hooholoia no ka heluhelu elua ana.
Hoolaha mai ke alii Waila, e holo ana ka mokuahi Kilauea no Kalawao ma ka hora 9 o keia po.
Waiho mai ka Hon. Mr. he olelo hooholo, e hookaawaleia i $2,000 no ka hana ana i na alanui me na uwapo o Kau, Hawaii. Waihoia a noonoo pu me ka bila haawina.
NA HANA o KA LA.
Ka noonoo ana i ke kanawai e hoomana ana i ke Kuikahi. Ua noiia ka ninau ano ma nihinei e ke Kuhina o ko na aina e, a ua rula ka Peresidena, ua kue ia noi i na rula a me ka hanohano o keia hale. Ua hoopii aku ke Kuhina i keia rula ana a ka Peresidena imua o ka hale; a mahope o ke kamailio ana o na hoa, ua hooholo ka hale ma ka aoao e hoahewa ana i ka rula a ka Peresidena, a ua ae ia ka ninau ano.
Ma ka ninau ana, ua hooholoia ke kanawai.
Hoopanee ka Hale a halawai hou ma ka Poakahi hora 10 A. M.
LA HANA 46—Poakahi, Iune 26.
Halawai ka hale ma ka hora 10 A. M.
Hon.Mr. Rhodes ma ka noho. Pule ka Rev. M. Kuaea.
Heluheluia ka moolelo o ka la i hala, a ma ke noi, ua aponoia.
Heluhelu mai ka Hon. Mr. Kauai he hoopii no Waimea, e noi ana e hooholoia ke Kuikahi. Waihoia ma ka papa.
Waiho mai ka Hon. Mr. Barenaba he he olelo hooholo, e hookaawaleia i $3,000 no ka palekai o Waiahole. Waihoia a noonoo pu me ka bila haawina.
Kamailio mai ka Hon. Mr. Waterhouse no kekahi mea pilikino, oiai ua hoolahaia ma ka nupepa haole P. C. Advertiser o ka Poaono i hala, malalo paha o ka mana o ke Kuhina Waiwai, ua koho ka wau ma ka aoao kue i ke Kuikahi, ke hoole aku nei au, aole.
Ua hoole mai ke Kuhina Waiwai, aole nana.
Waiho mai ka Hon. Mr. Wana he olelo hooholo, e hookaawaleia i $300 no ke kao ma Kalihiwai, Kauai. Waihoia a noonoo pu me ka bila haawina.
Waiho mai ka Hon. Mr. Helekunihi he olelo hooholo, e hiki e mai na hoa mamua o ka hora 10 A. M. Hooleia.
Waiho mai ka Hon. Mr. Nahaku he olelo hooholo, e noonoo ia ka bila haawina ma na la a pau mahope aku o keia la.
Oiai na hoa e hoopaapaa ana, ua hapaiia
NA HANA O KA LA.
Ka noonoo ana i na hoike a ka hapa nui a me ka hapa uuku a ke komite Hoonaauao me na bila kanawai e pili ana i ka Oihana Hoo-naauao, iloko o ke Komite o ka hale.
Mahope o ka hoopaapaa ana o na hoa, ua hoomaha ka hale i ka hora 12 M.
Hoomaka hou na hana ma ka hora 1 P. M.
A mahope o na hoopaapaa loihi ana o na hoa, ua hoopauia ke Komite, a ua hooholo ia ka hoike a ka hapa uuku o ko Komite.
Hoopanee ka Hale.
LA HANA 47—Poalua, Iune 27.
Halawai ka hale i ka hora 10 A. M. Hon. Mr. Rhodes ma ka noho. Pule ka Rev. M. Kuaea.
Heluheluia ka moolelo o ka la i hala, a ma ke noi, ua aponoia.
Hoolaha mai ka Hon. Mr. Aholo, he bila e hoololi ai i ka pauku 913 o ke kanawai kivila.
Waiho mai ka Hon. Mr. Birch he olelo hooholo, e hoopaaia ka wa halawai o ka hale ma ka hora 10 A. M., me ka hoomaha i ka hora 12 M., a hoomaka hou i ka 1 P. M., a aole hoi e hoopanee mamua o ka hora 5.
Ma ke noi, ua hooholoia ka olelo hooholo, a ua hooleia ka hope o ka olelo hooholo.
Hoolaha mai ka Hon. Mr. Kauai, he bila e hoololi ai i ka pauku 3 o ka mokuna 50 o ke kanawai karaima.
Waiho mai ka Hon. Mr. Halstead he olelo hooholo, e kauohaia ke Kuhina Waiwai e hookomo iloko o ka bila haawina i $10,000, i uku no ke kauka lapaau e hoonohoia ai ma Kalawao, no 2 makahiki.
Mahope o ka hoopaapaa ana, ua waihoia a lawe ia mai he bila o ia ano.
Heluhelu mua mai ke Kuhina Waiwai i ka bila haawina o na makahiki elua e hele nei, no ka huina i hiki aku i ka $1,223,979.79. Kauohaia e pai.
Hoomaha ka hale i ka hora 12 M.
Hoomaka hou na hana i ka hora 1 P. M.
Waiho mai ka Peresidena i ka palapala kono a ka Lunahoomalu E. P. Adams o ke komte Hooponopono o na hana o ka la 4 o Iulai, i na hoa o ka Ahaolelo, no na hana ma Kawaiahao, i ka hora 11 A. M., a me ka ahaaina ma Kahehuna i ka hora 3 P. M.
Ma ke noi, ua kohoia o Green, Castel, Birch, Halemanu a me Barenaba i Komite e pane aku ai i ko keia hale ae ana.
Helluhelu mua mai ka Hon. Mr. Naili i kana hoololi i manao ai no ka pauku 58 o ke Kumukanawai. Hoopanee loa ia.
Waiho mai ka Hon. Mr. Helekunihi he olelo hooholo, e hoounaia i na hoa pakahi o keia kau i hookahi Buke Kanawai o keia kau, i hookahi Kivila i hooponopono hou ia, a i hookahi buke o na olelo hooholo o ka Aha Kiekie. Ae ia.
Ma ke kapaeia ana o na rula, ua ae ia ka Hon. Mr. Kalaukoa e heluhelu mai he hoopii na na inoa he 30, e noi mai ana i $1,000 no ko lakou hana ana i ke Alanui Kula a hiki i ke Alanui Liliha. Waihoia i ke Komite Wae. Pilipo, Kalaukoa, Kakela opio, Kaai a me Aholo.
NA HANA O KA LA.
Ka heluhelu elua ana i ka bila e hoololi ai i ka pauku 1 o ka mok. 41 o ke kanawai karaima, e papa ana i ke kuai ia o ka waiona a me ka lawe ae i ka huaolelo kanaka maoli , a e hookomo malaila kanaka kupa .
Mahope o ka hoopaapaa ia ana, ua hoopau ia ke Komite, a ua hooholoia ka bila me ka lilo i kanawai, mahope aku o Mei 1877. Waihoia no ka heluhelu ekolu ana.
Ka heluhelu elua ana i ka bila e hookuu ana i ke dute maluna o kahi mau waiwai komo mai, ua hoopanee loa ia.
Ka heluhelu elua ana i ka bila e hoololi ai i ka pauku 239 o ke kanawai kivila, ua waihoia i ke Komite Wae, Birch, Mahoe, Waterhouse, Kalaukoa a me Preton.
Ka heluhelu elua ana i ka bila e laikini ana i ka banako, ua waihoia i ke Komite WAe.
Hoopanee ka Hale.

[Nana ma ka aoao ekolu.]