Ka Lahui Hawaii, Volume II, Number 26, 22 Iune 1876 — Page 1
KA LAHUI HAWAII.
HOLY BIBLE
"Ua mau ke Ea o ka Aina i ka Pono."
BUKE II.} HONOLULU, POAHA, IUNE 22, 1876. {HELU 26.
KA NUPEPA KA LAHUI HAWAII.
Paiia ma kela Poaha me keia Poaha.
H. H. PALEKA, Luna Hooponopono
He pepa i hoopukaia i kela me keia he bedoma no na Ohana a me na Ekalesia o Hawaii; he mea kokua i ka noho pono ana o na ohana, ka maluhia o kanaka, a me na pomaikai kino a uhane o ka Lahui Hawaii. "Aole paonioni; aole haanui; aole hikiwawe ka huhu; aole noonoo ino."
O na Kumumanao a pau, na Nu Hou o kela me keia ano, na Mare, Hanau, Make, e kakau mai i ka Luna Hooponopono, a e paiia no ke kupono.
Aole e aeia ka pilikino, ke kuamuamu, ka hoino, a me ka huhu, a ua makemakeia ka hoohoihoi, hoolana manao, hoonaauao, a me ka hoopono.
He $1.75 ka auhau o keia pepa no ka makahiki, a he $1.00 no ka hapa makahiki.
E hookaa mua ia ka auhau o ka pepa mamua o ka loaa ana i kekahi mea makemake e lawe.
NO NA OLELO HOOLAHA.
E lawe ana keia pepa i na Olelo Hoolaha a na makamaka, e like me ke kupono, a e lawa pono a hoi me ka hoohaiki ole i ka huina o na kolamu kukulu manao, no ka uku haahaa.
O kela a me keia makamaka e makemake ana e hoolaha, e hele mai ma ke keena a e hui pu me ka Luna Hooponopono.
Aole e paiia kekahi Olelo Hoolaha ke ole e hookaa mua ia ka auhau.
Eia kekahi, ke noiia aku nei na makamaka e hoouna mau mai i na mea hou; mai hooloihi loa i na palapala; e hai pololei mai i na manao me ke kuawili ole, a e kakau mai me na hua moakaka.
H. H. PALEKA,
Luna Hooponopono.
C. H. DICKEY, (Kale Kika,)
LOIO!
A he Luna Kepa i apono ia e ke Aupuni no ka Apana o Makawao, Maui Hikina.
E HELE NUI mai ka poe a pau i loohia ia me na pilikia pili Kanawai o ka "Ua-ukiu" nei, a na ko oukou makamaka oiaio no e kokua a e hooikaika e hoopau i na pilikia ma na ano a pau o ke Kanawai. 17-1y.
OLELO HOOLAHA.
MAI KA HAKUAINA C. C. HARRIS, o Kailua Ahupuaa o Koolaupoko, Oahu, ua lilo mai ia makou ka hoomalu ana i na kai lawaia o Mokulua, Ahulili a me Kea. Nolaila, ua koho pono ia o JOHN A. CUMINIS i Luna nana e hoomalu a hooponopono i na mea a pau ma ia mau wahi no ka makahiki.
E hoolohe na mea a pau iaia.
W. L. MOEHONUA.
Mei 20, 1876. [22tf]
Ama ra! Holokahana!!
UA MAKAUKAU KA MEA NOna ka inoa malalo iho e hoolawa i ka makemake o na makamaka ma ka hana noelo ana i na KAA o kela a me keia ano me ka nani a me ka paa. Malaila e kiliopu ai ka holo a ka lio, me na kamaa hao i kaupaona likeia, a i hana ia hoi noloko mai o ka hao paa loa me ke kumukuai haahaa loa. Me ka eleu a me ka mikiala, ua hopo ole i ka puana ae, "aohe lua e like ai." Ma Ainahou, ka lua o ka Hale Amara mai ka Hale Dute mai. C. B. WILSON,
1 1y Kale Wilesona
G. WEST!
HALE HANA KAA HOLO LEALEA ME na kaa hali ukana. E hana hou ia no ho na kaa nahaha no ka uku oluolu. E kapiliia no kapuai lio, no ka uku kupono. Ma ka hale hana mua o Mr. Benfield, ma ke Alanui Alii. 1-1y
S. B. DOLE.
LOIO a he Alakai ma na mea pili Kanawai. Ua makaukau oia e pale i na hihia imua o na Aha Hookolokolo a pau o keia Aupuni, me ke kakau ana i na Palapala Pili Kanawai, ma ka olelo Hawaii a ma ka olelo Beritania. 1 1y
OLELO HOOLAHA.
J. PORTER GREEN,
"KEIKI O KAUAUKIUKIU."
HE LOIO! A HE KOKUA OIAIO
—:o:—
E HELE MAI NA MAKAMAKA A PAU I o'u nei, a na'u no e kokua ia oukou imua o ka Aha Hoomalu a me ka Aha Kiekie me ka uku haahaa makepono loa. Ma na oki mare, a me ka hooponopono ana i ka waiwai o ka poe make, he eleu loa ka hana. Ali ko'u keena hana ma Alanui Kalepa kokoke i ke keena o ka Lunakanawai Aeko. E hamama mau ana ka puka, e hele nui mai i pau ka pilikia. 1 1y
E. STREHZ,
[AILUENE.]
MALAILA E LOAA AI NA ANO LAAU A pau; a ma na wai hoomaemae o kela a me keia ano. E hamama mau ana ka ipuka ma na po Poaono a pau. Ma ke kihi o alanui Papu a me Hotele, ma Monikahaae. 1 1y
Hoolaha Komohewa.
KE HAI IA AKU NEI KA LONO I NA kanaka a pau, aole e hele wale ma ka aina i kapaia o Waimanalo, maloko o ke Ahupuaa o Honouliuli, Apana o Ewa, Mokupuni o Oahu, aole e hookuu wale i na holoholona, aole hoi ma ke oki ana i na laau, ka lawe ana i na wahie, a pepehi, a uhai wale paha i na bipi hihiu. Pene na palena o ua aina nei: "O na aina hoolimalima mua ia ia JOHN MEEK, o ke kula o Lihue, a me ke kula o Honouliuli ma ka aoao ma uka a ma na aoao ma kai, o Nanakuli ma kahi aoao, a no Koilina ma kahi aoao." J. H. CONEY.
Honolulu, Feb. 9, 1876. [14 tf] Luna Hooko.
CECIL BROWN,
Loio a he Kokua ma ke Kanawai.
A HE A GENA NO KA HOOIAIO ANA I NA Palapala no ka mokupuni o Oahu.
Helu 8 Alanui Kaahumanu, Honolulu, H. P. A.
WIL DER & CO.,
(WAILA MA.)
AIA MA KE KIHI O
ALANUI PAPU me MOIWAHINE!
Ua hoolako mau ia me ke kuai ana aku i na
Papa me na Lako Kukulu Hale
PUKAANIANI,
OLEPELEPE,
LAKA,
AMI-LIILII,
AMIl-LOLOA
PENA o na ano a pau,
AILA PENA,
VANIKI, &c.
Na Balaki Pena me Puna,
Na Pepa Hale me na Lipine Pepa.
Aniani, Paakai, &c.
O na mea a pau maluna ae e kuai makepono loaia aku no ke DALA KUIKE. 1-1y
BY AND BY:
Pure Diamonds, p. 110.
1 Maule anei kou uhane,
E ka mea paahana e,
No ka nui o ka hana,
A lauwili io ia nei?
Koa nae a mau ke aho,
Hana me ka ole no;—
Ai a hala koonei pouli,
Poho mai ke ao ma o.
Cho.—Mao ae poha ka lama,
Mao ae, mao ae;
Ano no he wa pouli,
Poha nae ke ao mao.
2 Luuluu anei kou uhane
No na keiki paakiki?
Lilo nui i ka pule,
Mele oli himeni—
Nana i ko o Makua,
Pili mau i kou Iesu,
Ai a pau koo nei kaumaha,
Poha mai ke ao mao.
Cho.—Mao ae poha ka lama, & c.
3 Hele anei oe a luhi
I ka hana, hana?
Lanalana mau ka ikaika;
Hana i na la a pau.
Ina kau na aka pouli,
A kaa mai na ino po,
Ai a hala koo nei ino,
Poha mai ke ao mao.
Cho.—Mao ae poha ka lama, & c.
4 Luhi anei e na hoa,
Na haumana kula nei,
No ka lilo i ka hana,
I ka imi i akamai?
Hoi aku a hoomaha,
Noho no a maha pu.
Ai a pau ka wa hoomaha,
Hui mai a kula hou.
Cho.—Mao ae poha ka lama, & c.
HAWAII.
ELINA KE KOA
HE KANAKA OPIO
PUUWAI WAIPAHE!
KA PALEKAUA LIONA HOI O KONA MAU LA
KE PUKONAKONA O KONA LAHUI, A O
KA OI WELINA HOPO O KONA
MAU ENEMI.
Mokuna VII—Helu 24.
A OIAI o Egemona maluna o ka oneki, a o Elina wale no me laua malalo o ka rumi ilalo, ala hoi, ua komo iho la paha ka manao iloko o kona mau hoa kamailio, ua nele oia i ke kokua, a o ka manawa kupono la hoi ia e hopu mai ai.
Ku ae la kekahi o laua iluna a me ka mino aka i nee koke mai ai a ku iho la ma ko ia nei aoao, me ka hoopuka ana mai i na huaolelo ano hoohauoli, a i kona aneane ana e pili mai, ia wa no oia i huki ino ae ai i kana pahi a hapai ae la iluna me ka hikiwawe loa me ka manao e hoomoe iho maluna o ko Elina poo, aka, ua hoomaopopo mua ko kakou koa, a mamua o ka haule ana iho o ka pahi a ka powa, ua halawai aku la ke puanuanu o ka makakila a Elina me kona puuwai, a haule aku la ia iluna o ka papahele he kino i nele i ke aho, a ua hala aku la kona uhane ma kela aoao o ka muliwai uliuli. I ka ike ana o kona kokoolua, oia hoi ke kanaka ano alii, i keia mea, ua pii ae la kona inaina, a me kona lima ma kana pahikaua, i pane mai ai me ka leo haalulu ia Elina.
"Ano, e ae mai ia'u e lilo i hoa paio nou, a e hoohiki mua mai aole loa oe e ae aku i ke alu ana mai o kou mau luina."
"Ko'u makemake ano e lilo oe i hoa paio no'u, a ke hooia aku nei au aole loa e ku mai kekahi kanaka e hoao e alu; o ka mea mua e hana pela, na'u no e haawi aku ka maka iaia."
Ku ae la kela mau kanaka opio iluna, he mau kahaka ui, aohe paha he mau kanaka elua hou aku a puni o Beritania e like me ko laua kulana, ka ui, koa, a wiwo ole, a he mau ano kaukau alii no hoi ko laua. Mamua o ko laua hoomaka ana e paio, ua lulu lima pu iho la, me ke kau no nae o na hiohiona wela a hahana maluna o laua. Huki ae la laua i na pahi i ka manawa hookahi, a pane mai la ka leo o ke kanaka opio malihini i ka i ana mai, "i keia la oe e Elina ai, a i keia la hoi e Elina ole ai; a i ikaika oe a nui ke akamai, alaila ola oe, aka i hapa ikaika a nele i ke akamai, alaila, ke hai aku nei au ia oe i keia la oe nele i ka inoa, pau kou mana a o ka hohonu o ka moana kou lua kupapau."
"Pela anei kou manao paio? E hele mai imua a na ka oi o na pahi a kaua e hoike mai i ka mea e noho alii ana." wahi a Elina.
Iloko o ka manawa pokole, ua halawai pu aku la ka laua mau pahikaua, a e noke ana laua i ka uhau aku a uhau mai, a e pale ana no hoi kekahi i ka oi o ka makakila a kahi. O ke kanaka koa opio ua hoike mai la oia i kona kulana makaukau a eleu no hoi ma ka lawelawe ana i ka makakila, e lele ana mao a maanei me ka mama maoli, a e uhau palua ana i ka manawa hookahi. O Elina hoi e ku malie ana oia me ke ano wiwo ole, e kai aku ana kona mau kapuai imua, a he oia mau no o ka ula kanaka maikai o kona mau papalina. Ma na hoomoe ana mai a kona hoa paio i kana pahi maluna ona, ua hala ole kana pale ana ae.
He hora okoa ko laua nei paio ana, a ua aneane pulu ko laua mau aahu i ka hou. Iloko oia manawa, akahi no a hoomaka mai o Elina e hooikaika i kana pahi, me ka lele ana mai imua. Ia manawa no hoi kona enemi i hahau mai ai me ka ikaika nui, me ka manao o ke kau hope loa ana ae ia o ke pale o kona hoa paio a haule aku i ka papahele, aka, me ka ikaika nui o Elina i hahau mai ai i kana pahi, a lele liilii aku la na apana kila ma o a maanei. Ia manawa no hoi i lele aku ai ua kanaka nei a holo aku la maluna o ke alapii, a pii wikiwiki aku la iluna o ka oneki. I kana hiki ana iluna, ua haawi aku la ia i ke kauoha i kona moku e ki mai i ka pu, a lele aku la iloko o ke kai. He emoole a ua ike ia aku la na pukuniahi o ka moku nui i ka oili ana mai, a me ka holo pioo ana o na kanaka. Ua makaukau mua ka Zelina, a he ani wale ana ae no no ko Egemona lima, o ka hoomaopopo koke ana mai no ia o ko lakou mau luina. He manawa pokole, a mamua ae hoi o ke kani ana mai o kekahi pu mai ka moku enemi mai, ua makaukau loa iho la lakou nei.
O ke kanaka maalea, ka hoa paio hoi o Elina, ua au aku la ia iloko o ke kai, aka, mamua o kona kawa loa ana aku, ua kau aku la kekahi o na luina i kana pu a o ka lele wale aku no koe o ka elele o ka make, aka, ua paa koke mal la kona lima ia Elina, a kani ae la ka pu i ka lewa. "Mai lawe i ka hana powa, no kou ike anei ua nele kela kanaka i ke kokua kupono nona iho, oia anei kou mea e makamake nei e kau aku i ka make maluna ona?"
"No ka mea," wahi a ka luina, "nana ka huaolelo kauoha kipi i haawi aku nei i kela moku, a o ke kanaka oia ano, he ilio oia, a e pono e nalo kona mau helehelena iloko o keia moana."
(Aole i pau.)
[E ka mea heluhelu, ma keia pule ae e hoomaka ana ka moolelo o kekahi o na hoouka kaua hahana a ke kuna Zelina me keia moku powa, ke kau ana o ka ulia poino maluna o ke koa Egemona, kona aihue ia ana e na powa, a me ka imi ana a loaa o kona hoa Elina, a noho alii hou oia maluna o na powa. No ka piha loa o ka pepa o keia pule, ua hookauluaia a keia pule ae. L. H.]
Ahaolelo Kau Kanawai
O ke Aupuni Hawaii
Ka Moolelo o na hana o ke Kau o ka M. H. 1876.
LA HANA 33.—Poakolu, Iune 7.
Hoomaka na hana ma ka hora 10 A. M., e like me ka hoopanee ana.
Nonoi mai ke komite i waiho ia ai e noonoo i ka olelo hooholo e ninau ana i ko Aseu mana i ka holo ana aku nei i Kina e ohi pake, e haawi hou aku i e umi la, a e papa ia ke Kuhina Waiwai aole e uku aku i na pake a hiki ka wa e maopopo ai keia komite. Aponoia.
Waiho mai ka Makai o ka hale i ka hoike a ke Kauka, no ka nana ana i ko Hon. Mr. S. M. Kamakau ola kino, ke nawaliwali loa aku nei ia aole e ola ana. Ua lolo no hoi a hiki ole ke ku iluna. Aponoia.
Hoolaha mai ka Loio Kuhina e lawe mai ana ia he eono mau bila.
Heluhelu mua mai ka Hon. Mr. Kalaukoa i kana hoololi no ka pauku 65 o ke Kumukanawai. Waiho ia malalo o na rula.
Heluhelu mua mai ka Hon. Mr. Kauai, he bila e hoololi ai i ka pauku 7 o ka mokuna 11 o ke karaima. Waiho ia malalo o na rula.
Heluhelu mua mai ka Hon. Mr. Halemanu he bila e hoololi ai i ka pauku 3 o ke kanawai i aponoia i Iulai 18, 1870.
Heluhelu mua mai ka Hon. Mr. Halemanu he bila e hoololi ai i ka pauku 1 o ka mokuna 33 o ke kanawai o 1872.
Heluhelu mua mai ka Hon. Mr. Halemanu e hoololi ai i ka pauku 6 o ke kanawai i aponoia i Iulai 21, 1870.
Waiho mai ka Hon. Mr. Birch he olelo hooholo, e kauoha ia ke Kiaaina e paikau hookahakaha na puali koa a pau ma ka la 12 o Iune.
Oiai e hoopaapaa ana no ka olelo hooholo, hiki ae la ka wati i ka hora 12 awakea, nolaila hoomaha ka hale.
I ka akoakoa hou ana i ka hora 1 P. M. ua hoopanee loa ia ka olelo hooholo.
Nonoi mai ke Komite Waiwai e hookuu aku ia lakou i ka la apopo mawaena o na hora 10 A. M. a me 1 P. M. Ae ia.
Hoolaha mai ka Hon. Mr. Kanealii he mau bila malalo iho: e papa ana i ke Kuhina Waiwai aole e uku i na uku makahiki o na luna aupuni i kaawale ma na aina e, a e kau ai i 10 keneta auhau no ke poo o ka bipi.
NA HANA O KA LA.
Oia ka heluhelu akolu ana i ka bila e hoopau loa i ka aie miliona dala. Hooholoia.
Heluhelu akolu ia ka bila e hoololi ana i ka pauku 4 o ke kanawai i apono ia i Iulai 13, 1874. Hooholoia.
Heluhelu akolu ia ka bila e hoopau loa ana i ke kanawai e hoohana ana i na keiki kula o na kula maoli o ka Ahaolelo o 1874 i hala.
Mahope o ka hoopaapaa loihi ana, ua waiho ia i ke komite hoonaauao.
Heluhelu akolu ia ka bila e kau kanawai hou ana no ka poe aea haukae.
Hoopanee ka Hale.
LA HANA 34.—Poaha, Iune 8.
Halawai ka Hale ma ka hora 10 A. M.
HOIKE A NA KOMITE WAE.
Hoike mai ke Komite Wae i kohoia e noonoo i ka bila e hoololi ai i ka puaku 12 o ka mokuna 86 o ke kanawai hoopai karaima, e hoopanee loa i ka bila, a waiho mai lakou he bila hou.
Noi mai ka Hon. Mr. Birch e kapae loa i ka hoike a ke komite.
Kamailio mai ka Loio Kuhina ma ka aoao o ke komite.
I ka ninau ia ana ua waihoia ka bila hou no ka pai ana.
Hoike mai ke Komisina Dominis e pili ana no na loaa o na aina lei alii, $36,778,83, iloko o 2 makahiki.
Noi mai ke komite wae i koho ia no ka bila Hooulu Lahui i manawa hou.
Hoike mai ke Komite Wae e pili ana no ka hoopii a ko Honolulu, e pili ana no ka nawaliwali o S. M. Kamakau. E hoonoa i kona kohoia ana, a e kauoha ana i ke kakauolelo o ka hale e kauoha koke aku i ka Papa Nana o Honolulu e koho hou.
Hoololi mai ka Hon. Mr. Halstead, e haawi ia aku kona uku.
Kamailio mai ka Hon. Mr. Nahaku ma ka aoao kue i ka hoololi.
Kamailio mai hoi ke 'lii Kaai, Green a me Preston, e kue ana i ka hoike a me ka hoololi.
Mahope o ka hoopaapaa ana, ua hoopanee ka hale a halawai hou i ka hora 1.
Halawai hou ka hale ma ka hora 1 A. M.
Noi ia mai e ninau hou ia. Hooholo ia.
I ka ninauia ana, ua apono ia ka hoike a ke komi te.
NA OLELO HOOHOLO.
Waiho mai ka Hon. Mr. Halemanu he olelo hooholo, e hoonohoia i keiki no ke awa o Honokaa, Hawaii. Waiho ia a noonoo pu me ka bila haawina.
Heluhelu mua mai ka Hon. Mr. Preston, he bila kanawai e pili ana no ka mare ana o na wahine Hawaii me na pake. Waiho ia no ka heluhelu alua ana.
Nana no i heluhelu mai he bila e pili ana no ka olelo hooholo e apono ana i ua hoolilo waiwai paa a na kahu a me na luna hooponopono. Waiho ia no ka heluhelu alua.
Nana no i heluhelu mai he bila e hoololi ai no ke kanawai e kauoha ana i na mea e lawelawe ana i ka oihana aupuni e hookupa. Ma ke noi, ua kapae ia na rula a heluhelu alua ia ka bila, a waiho ia i ke komite hooponopono bila kanawai.
Hoolaha mai ka Hon. Mr. Bir ch e lawe mai ana oia he bila e hoopau ai i ka pauku 16 o ka mokuna 41 o ke kanawai hoopai karaima.
Hoolaha mai ka Hon. Mr. Kalaukoa e lawe mai ana oia he bila no ka pauku 61 o ke Kumukanawai.
Na Hon. Mr. Kaiue he olelo hooholo i $1,000 no ka muliwai o Waialua ma Molokai.
Ma ke noi ua kapae ia na rula.
Heluhelu mua mai ka Hon. Mr. Mahoe he mau hoopii mai Makawao mai. 1. E uku ia na kumukula o ke aupuni i hookahi dala no ka la. 2. E hoopau ia na laikini awa. 3. E uku ia na la hana alanui ma ka dala. 4. E hoopaa ia i hope ko na luna alanui. 5. E hopu ia na poe moekolohe me ka palapala hopu ole.
Heluhelu mua mai ka Loio Kuhina he bila e hoololi ai i ka pauku 18 o ka mokuna 86 o ke kanawai hoopai karaima. Waiho ia no ka heluhelu alua ana.
Heluhelu mai ka Loio Kuhina no ka manawa mua, he bila e hoololi ai i ke kanawai no ka pili waiwai i apono ia ma ka makahiki 1870. Waiho ia no ka heluhelu alua ana.
Hoolaha mai ka Hon. Mr. Hal stead, e lawe mai ana oia he bila e hoololi ai i ka mokuna 35 o ke kanawai hoopai karaima.
Noi mai ke Kuhina o ko ua aina e ma ka olelo hooholo e noho ke komite o ka hale no ka noonoo ana i na mea e pili ana no ka hoopae limahana. Hooholo ia.
Na Hon. Mr. Naili he olelo hooholo no ka hale hookolokolo a me ka hale paahao o Koolauloa. Waiho ia a noonoo pu me ka bila haawina.
Heluhelu mai ka Loio Kuhina he olelo hooholo, e noho keia hale i na la a pau ma ka hora 1 auina la, a ma ka Poaono ma ka hora 10 a ma ka hora 12 e pau ai. Ua hooholoia.
NA HANA O KA LA.
Hapaiia ka bila e pili ana no ke kaawale ana i 30 kapuai o na luna hooikaika balota aole e komo malaila. Ma ka heluhelu alua ana, waiho ia i na komite wae. Koho ka noho ia Messrs. Nahaku, Preston, Kuihelani, Waterhouse, Wana.
Hapai ia ka noonoo ana no ka bila e hoololi ai i ka pauku 25 o ke kanawai e hoopau ai i ka mokuna 16 o ke kanawai kivila e pili ana i ka uku o na kumukula o ke aupuni i hooholo ia i ka makahiki 1864, ma kona heluelu alua ana. Mahope o ka hoopaapaa ana, ua waiho ia ma ka Poalua e noonoo hou ai.
Hapai ia ka noonoo ana no ka bila e hoololi ai i ka pauku 1, 3, o ke kanawai i hoololi ia i ka makahiki 1868 a me ka pauku 1, 3, o ke kanawai i apono ia i ka makahiki 1874, e pili ana no ka pepehi ana i na bipi ma kona heluhelu alua 'na. Waiha ia ma ka lima o ke komite wae.
Koho ka noho ia Mssr s Birch, Nahaku, Green, Kamauoha, S. K. Kaai.
Hapai ia ka noonoo ana no ka bila e hoololi ana i ke kanawai e pili ana i ka auhau holoholona ma kona heluhelu ana. Waiho ia ma ka papa.
Hapai ia ka noonoo ana no ka bila e hoololi ana i ka pauku 1417 o ke kanawai kivila, ma kona heluhelu alua ana. Waiho ia ma ka lima o kekahi komite wae. Koho ka noho ia Kakela, Aholo, Preston, Birch.
Hapai ia ka noonoo ana i ka bila e hoololi ana i ka pauku 1418 o ke kanawai kivila. Waiho ia ma ka lima o ia komite hookahi no, bila e ae ana i ke kuai ana i ka opiuma. Waihoia ma ka papa.
Hapaiia ka noonoo ana i ka bila no ka hooulu lahui o Hawaii ponoi, a me na hapa. Waiho ia ma na lima oia komite wae no.
Hapai ia ka noonoo ana no ka bila e hoololi ai i ka pauku 11, 12, 13, o ke kanawai e hoopau ana i ka mokuna 10 o ke kanawai kivila. Ma ka heluhelu alua ia ana. Waiho ia ma ka papa.
Hapai ia ka noonoo ana no ka bila e hoololi ai i ka pauku 101 o ke kanawai kivila e pili ana no na laikini waapa. Waiho ia no ke kakau poepoe ia.
Hoopanee ka Hale.
LA HANA 35.—Poalima, Iune 9.
Halawai ka Hale i ka hora 1 p. m.
Noi mai ka Hon. M r. Nahaku e hapai hou ia ka noonoo no ka hoike a ke komite wae e hoonoa ana i ke kohoia ana o Hon. Mr. Kamakau. Hooholoia.
Kamailio mai ka Hon. Mr. Nahaku ma ka aoao e hoopanee loa i ka hoike a ke komite me kona olelo pu mai, ua kue keia hoonoa ana i ke Kumukanawai o ka aina.
Kamailio mai hoi ka Hon. Mr. Kaai ma ka aoao apono i ka hoike.
Noi mai ka Hon. Mr. Pre ston e hoihoi hou ia keia hoike ma ka lima o ke komite, a e hele aku lakou e ninau i ka manao o na Lunakanawai Kiekie no ke kue a me ka ole, e waiho pu aku hoi ia komite me ka hoike a ke kauka i nana ai ia Hon. Mr. Kamakau. Hooholoia.
HOIKE A NA KOMITE.
Hoike mai ke komite pai, ua pau kekahi mau bila kanawai i ka paiia. Aponoia.
Hoike mai ke komite o na Ahahookolokolo no na bila a me na hoopii e hoololi ana i na pauku 1417, 1419, 1420, o ke kanawai kivila, e waiho ma ka lima o ke komite wae. Aponoia.
Hoike mai ka hapa uuku o ke komite hoonaauao no na hoopii lehulehu e pili ana no ka hoopau ana i ke kahukula nui. E hoopau i ke kula o Keoneula. E hoomahuahua i ku uku la o na kumukula i 1 dala. E hoopau ka hana lima iloko o na kula aupuni. E hoololi i ke ao ana o na kula aupuni ma ka olelo Beretania. E hoohana hou aku i na keiki mahope o na hora kula elima.
Ua waihoia kekahi mau hoopii a noonoo pu me na bila e waiho nei imua o ka hale, o kekahi ma ka lima o ke komite wae, o kekahi ma ka lima o ka Papa Hoonaauao, a ua kapaeia kekahi. Waihoia ka hoike a noonoo ia e ka hale ma ka Poakolu, Iune 21.
Heluhelu mai ka Loio Kuhina he olelo hooholo, e kauoha ia ka Papa Nana o Honolulu e kali iki i ka lakou olelo hoolaha no ke koho balota hou ana i pani ma kahi o Kamakau, a puka mai ka pane a ka Lunakanawai Kiekie imua o ke komite wae.
Hoololi mai ke 'Lii Kiaaina Kapena na ka Makai o ka hale e hele koke aku e hai i ka Peresidena o ka Papa Nana. Hooholoia.
Heluhelu mai ka Hon. Mr. Kalaukoa no ka manawa mua i kana hoololi no ka pauku 61 o ke Kumukanawai. Waiho ia no ka heluhelu alua.
Heluhelu mai ka Loio Kuhina no ka manawa mua he bila e pili ana no ke kuai ana i ka opiuma. Waihoia e pai no ka heluhelu alua.
Hoolaha mai ke Kuhina Waiwai e lawe mai ana oia he bila e hoololi ai i ka pauku 773 o ke kanawai kivila.
Heluhelu mai ka Hon. Mr. Hal stead he bila e hoololi ana i ka pauku 237 o ke kanawai kivila. Waiho ia e pai no ka heluhelu alua ana.
Heluhelu mai ka Hon. Mr. Kanealii he olelo hooholo e hookomoia ma ka bila haawina i $1,000 no ka uwapo eli o Waihee. Hooholoia.
Hoolaha mai ke Kiaaina Kapena, e lawe mai ana oia he bila e hoololi ai i na pauku 276, 279 o ke kanawai kivila. Waiho ia no ka heluhelu alua ia ana.
Heluhelu mai ka Hon. Mr. Mahoe he olelo hooholo, e hoomaha ka hale ma ka la apopo no ka hoike hui o ka Kula Sabati o Honolulu, a ma ka Poalua e noho ai ka hale. Hooholoia.
Hoolaha mai ka Hon. Mr. Pre ston e lawe mai ana oia he mau bila e hoopau ai i ka mokuna 50 o ke kanawai o 1874 a me ke kanawai i aponoia ma ka la 28 o Iune, 1868, a me ka mokuna 21 o na kanawai o 1874 a me ka mokuna 18 o ke kanawai hoopai karaima. Waihoia no ka heluhelu alua ia ana.
Heluhelu mai ka Hon. Mr. Pre ston he olelo hooholo, e kauoha ana i na luna aupuni e noonoo nui no ka hoopae lima hana. Hoopaneeia, a noonoo pu me ka olelo hooholo a ka Loio Kuhina no ka noho ana o ke komite o ka hale i keia la e noonoo no ka hoopae lima hana.
Heluhelu mai ka Hon. Mr. Kanealii no ka manawa mua, he bila e papa ana i ke Kuhina Waiwai aole e haawi wale ia na dala mai ka waihona o ke aupuni i na luna aupuni e hele wale ana i o a ianei me ka haalele wale i ka hana. Waihoia no ka heluhelu alua ana.
Hoolaha mai ka Hon. Mr. Mahelona e lawe mai ana oia he hoololi no ka pauku 56 o ke Kumukanawai. Waiho ia malalo o na rula.
Nana no he olelo hooholo e hookomoia ma ka bila haawina $7,400 no na alanui a me na alahaka o Ewa a me Waianae.
NA HANA O KA LA.
Hapaiia ka noonoo ana no ka hoopae lima hana imua o ke komite o ka hale. Noho o Hon. Mr. Birch ma ka noho. Mahope o ka noonoo ua hoapono ka hale a halawai hou ma ka hora 1 auina la Poalua.
LA HANA 36.—Poalua, Iune, 13.
Halawai ka hale e like me ka mea mau.
HELUHELUIA NA HOOPII A WAIHOIA.
Heluhelu mai ka Hon. Mr. Kaiue he hoopii no Molokai, e hookaawale i $1,000 no ke alahaka ma Waialua, Molokai.
Na Hon. Mr. Nahaku, mai Kaanapali mai, e koho ia na alii hanau o ka aina i mau alii ahaolelo, ma kahi o na haole. Nana mai no, i $200 no ona lawe leta mai Lahaina a Kahakuloa.
Na Hon. Mr. Kauhane mai Hilo mai, e kapili ia i ona mokuahi hou a e hoopau i ko Kilauea holoholo ana; nana mai no, mai Honolulu, $1,000 no ke alanui mai Waipilopilo a i Kalihi.
Na Hon. Mr. Barenaba mai Koolaupoko mai, i $2,500 no ka palekai ma Waiahole a me kekahi mau noi e ae.
Noi mai ka Hon. Mr. Parker e hookuu aku iaia no kekahi he bedoma. Ae ia.
NA BILA & OLELO HOOHOLO.
Waiho mai ka Hon. Mr. Rhodes he olelo hooholo, e hoomanaia ke Kuhina o ko na aina e, e ninau aku i ke Kuhina Beritania maanei, ina paha he hiki ke laweia mai na kane a me na wahine mai Inia Hikina a me na mokupuni mai o Azore. Waiho ia a noonoo pu me ka hoopae lima hana i keia la.
Waiho mai ka Hon. Mr. S. K. Kaai he olelo hooholo, aole e ae hou ia kekahi o na hoa e hookuu, aia a hoi mai ka poe i holo mua. Hoopanee loa ia.
Waiho mai ka Hon. Mr. Barena ba he olelo hooholo, e noiia aku ke Kuhina o ko na aina e, e hai mai imua o ka hale i ke ano o ka aelike i hanaia me Chulan ma no ka lawe ana mai i na pake limahana me ka puu dala he $10,000, a ina paha e hoihoi ia mai ana kau wahi dala i ke aupuni.
Pane mai ke Kuhina o ko na aina e, aole wahi dala e hoihoiia mai ana. Waihoia a noonoo pu me ke kumumanao no ka hoopae limahana i keia la.
Waiho mai ka Hon. Mr. Kahuila he olelo hooholo, e kauohaia ka Loio Kuhina e hooko koke aku i ke kanawai Sabati. Hooholoia.
Noi mai ke 'lii Kakela e hookuu aku ia ia i elua hebedoma. Ae ia.
[Nana ma ka Aoao Ekolu.]