Ka Lahui Hawaii, Volume II, Number 24, 8 June 1876 — Page 1

KA LAHUI HAWAII.
"Ua mau ke Ea o ka Aina i ka Pono."
BUKE II.}  HONOLULU, POAHA, IUNE 8 ,1876.  {HELU 24.

KA NUPEPA KA LAHUI HAWAII.

Paiia ma kela Poaha me keia Poaha.
H. H. PALEKA,  Luna Hooponopono.
He pepa i hoopukaia i kela me keia hebedoma no na Ohana a me na Ekalesia o Hawaii; he mea kokua i ka noho pono ana o na ohana, ka maluhia o kanaka, a me na pomaikai kino a uhane o ka Lahui Hawaii. "Aole paonioni; aole haanui; aole hikiwawe ka huhu; aole noonoo ino."
O na Kumumanao a pau, na Nu Hou o kela me keia ano, na Mare, Hanau, Make, e kakau mai i ka Luna Hooponopono, a e paiia no ke kupono.
Aole e aeia ka pilikino, ke kuamuamu, ka hoino, a me ka huhu, a ua makemakeia ka hoohoihoi, hoolana manao, hoonaauao, a me ka hoopono.
He $1.75 ka auhau o keia pepa no ka makahiki, a he $1.00 no ka hapa makahiki.
E hookaa mua ia ka auhau o ka pepa mamua o ka loaa ana i kekahi mea makemake e lawe.

NO NA OLELO HOOLAHA.

E lawe ana keia pepa i na Olelo Hoolaha a na makamaka, e like me ke kupono, a e lawa pono ai hoi me ka hoohaiki ole i ka huina o na kolamu kukulu manao, no ka uku haahaa.
O kela a me keia makamaka e makemake ana e hoolaha, e hele mai ma ke keena a e hui pu me ka Luna Hooponopono.
Aole e paiia kekahi Olelo Hoolaha ke ole e hookaa mua ia ka auhau.
Eia kekahi, ke noiia aku nei na makamaka e hoouna mau mai i na mea hou; mai hooloihi loa i na palapala; e hai pololei mai i na manao me ke kuawili ole, a e kakau mai me na hua moakaka.
H. H. PALEKA,
Luna Hooponopono.

C. H. DICKEY, (Kale Kika,)
LOIO!

A he Luna Kepa i apono ia e ke Aupuni no ka Apana o Makawao, Maui Hikina.
E HELE NUI mai ka poe a pau i loohia ia me na pilikia pili Kanawai o ka "Ua-ukiu" nei, a no ko oukou makamaka oiaio no e kokua a e hooikaika e hoopau i na pilikia ma na ano a pau o ke Kanawai.  17-1y

OLELO HOOLAHA.

MAI KA HAKUAINA C. C. HARRIS, o Kailua Ahupuaa o Koolaupoko, Oahu, ua lilo mai ia makou ka hoomalu ana i na kai lawaia o Mokulua, Ahulili a me Kea. Nolaila, ua koho pono ia o JOHN A. CUMINIS i Luna nana e hoomalu a hooponopono i na mea a pau ma ia mau wahi no ka makahiki.
E hoolohe na mea a pau iaia.
W. L. MOEHONUA.
Mei 20, 1876.  [22tf]

Ama ra! Holokahana!!

UA MAKAUKAU KA MEA NOna ka noa malalo iho e hoolawa i ka makemake ma ka hana nowelo ana i na KAA o kela a me keia ano, me ka nani a me ka paa. Malaila e kiliopu ai ka holo a ka lio, me na kamaa hao i kaupaona likeia, a i hana ia hoi noloko mai o ka hao paa loa me ke kumukuai haahaa loa. Me ka eleu a me ka mikiala, ua hopo ole i ka puana ae "aohe lua e like ai. Ma Ainahou ka lua o ka Hale Amara mai ka Hale Dute mai.  C. B. WILSON,
1 1y  Kale Wilesona.

G. W. WEST!

HALE HANA KAA HOLO LEALEA ME na kaa hali ukana. E hana ia no ho na kaa nahaha no ka uku oluolu. E kapiliia no kapuai lio, no ka uku kupono. Ma ka hale hana mua o Mr. Benfield, ma ke Alanui Alii  1-1y

S. B. DOLE.

LOIO a he Alakai ma na mea pili Kanawai. Ua makaukau oia e pale i na hihia imua o na Aha Hookolokolo a pau o keia Aupuni, me ke kakau ana i na Palapala Pili Kanawai, ma ka olelo Hawaii a ma ka olelo Beritania.  1 1y

J. PORTER GREEN,
"KEIKI O KAUAUKIUKIU."

HE LOIO! A HE KOKUA OIAIO!
E HELE MAI NA MAKAMAKA A PAU I o'u nei, a na'u no e kokua ia oukou imua o ka Aha Hoomalu a me ka Aha Kiekie me ka uku haahaa makepono loa. Me na oki mare, a me ka hooponopono ana i ka waiwai o ka poe make, he eleu loa ka hana. Aia ko'u keena hana ma Alanui Kalepa kokoke i ke keena o ka Lunakanawai Aeko. E hamama mau ana ka puka, e hele nui mai i pau ka pilikia.  1-1y

E. STREHZ,
[AILUENE]

MALAILA E LOAA AI NA ANO LAAU A pau; a me na wai hoomaemae o kela a me keia ano. E hamama mau ana ka ipuka ma na po Poaono a pau. Ma ke kihi o Alanui Papu a me Hotele, ma Monikahaae.  1 1y

Hoolaha Komohewa.

KE HAI IA AKU NEI KA LONO I NA kanaka a pau, aole e hele wale ma ka aina i kapaia o Waimanalo, maloko o ke Ahupuaa o Honouliuli, Apana o Ewa, Mokupuni o Oahu, aole e hookuu wale i na holoholona, aole hoi ma ke oki ana i na laau, ka lawe ana i na wahie, a pepehi, a uhai wale paha i na bipi hihiu. Pen e na palena o ua aina nei: "O na aina hoolimalima mua ia ia JOHN MEEK, o ke kula o Lihue, e me ke kula o Honouliuli ma ka aoao ma uka a ma na aoao ma kai o Nanakuli ma kahi aoao, a no Koilina ma kahi aoao."  J. H. CONEY.
Honolulu, Feb 9, 1876.  [14 tf]  Luna Hooko.

CECIL BROWN,

Loio a he Kokua ma ke Kanawai
A HE AGENA NO KA HOOIAIO ANA I NA Palapala no ka mokupuni o Oahu.
Helu 8 Alanui Kaahumanu, HOnolulu, H. P. A.

WIL DER & Co.,
(WAILA MA.)

AIA MA KE KIHI O
ALANUI PAPU me MOIWAHINE!
Ua hoolako mau ia me ke kuai ana aku i na
Papa me na lako Kukulu hale
O NA ANO A PAU.
NA PANI PUKA!
PUKAANIANI,
OLEPELEPE,
LAKA,
AMI-LIILII,
AMI-LOLOA
PENA o na ano a pau,
AILA PENA,
VANIKI, &c.
Na Balak Pena me Puna,
Na Pepa Hale me na Lipine Pepa.
Aniani, Paakai, &c.
O na mea a pau maluna ae e kuai makepono loa ia aku no ke DALA KUIKE  1-1y

Singing for Jesus. —I CHO, p 94.

1 Mele no Iesu , a hana no Iesu,
Hana mau nona, ma o a maanei,
Ao no a kuhi io i ke Ola,
Ka'u hana keia, ka'u hana maikai.
Aia a paio no kuu aina aloha.
Paio i mau kona inoa maikai,
No Iesu ia o kona pakaua,
No kona inoa kuu mele ana'e.
2 Mele no Iesu, a hoomana oli,
Pii ae kuu leo i o i ke ao;
Hai i na hoa i ko luna nani,
Kona mau oli, a maha a mau,
Ma kuu mau mele e hooluolu,
Hooauhee ae i na lia luuluu.
Paa no na hua na hua aloha,
Na hua hope a kuu ia au.
3 Mele no Iesu, kuu Iesu Hoola,
Nou no kuu mele, kuu mele maikai,
Aia a kaa au ma na wahi poino,
Mau nae kuu mele kuu hookani ae;
Nani, hoonani i kuu Haku lani,
Ane kuu uhane e pii i ke ao,
Mele no Iesu ka hana oluna,
A haleluia a mau loa no.
HAWAII.

ELINA KE KOA
HE KANAKA OPIO
PUUWAI WAIPAHE!
KA PALEKAUA LIONA HOI O KONA MAU LA
KE PUKONAKONA O KONA LAHUI, A O
KA OI WELINA HOPO O KONA
MAU ENEMI.
Mokuna VI—Helu 22.

          I KA hoopuka ana mai o Emeline i ka ninau, "E Elina kuu haku, e hoopalaka mai ana anei oe ia'u ?" Ia manawa i kau ae ai o Elina i kona lima ma kona umauma, a me na maka i hoike mai ai i kona aloha, pane mai la me ka leo waipahe, me ka mau no nae o ke ano kuoo. "E Emeline, ma na ale hauliuli o ka moana loa kai lipolipo a'u e alo aku ai, ma na puu a me na kualono a neia mau kapuai wawae e hehi aku ai, a iloko o ka inea, ka pilikia, ka hauoli a me ka lanakila, ke hoohiki paa aku nei au imua ou a imua hoi o ko ke ao nei, e lilo no oe i lei no kuu kino, a i kukui hoomalamalama hoi no ko'u puuwai. E hoolilo no au i na hoomanao ana ia oe i ahi wela hahana no loko o'u, a na ka enaena oia ahi wela e hoopiha mai i ko'u puuwai i ka manao koa wiwo ole, a e alakai hopo ole aku hoi i ko'u mau hehina wawae imua a halawai he maka he maka me na enemi o kuu alii, a e like me ke kanaka oki palaoa i kona wa e hahau aku ai i kana pahi imua o na kumu palaoa, pela no kau kauwa nei imua o kona mau hoa paio, a e hoohelelei aku hoi ia lakou e like me na kumu palaoa. A ke manao na lani e hookau mai i ka popilikia maluna o'u, ka mea hoi a keia puuwai i moeuhane ole ai, alaila, nou na mapuna leo pule hope loa a keia mau lehelehe e puana ae ai. Pela wau e lawe nei i keia hoohiki paa, a e make au ano ke manao mai oe he oiaio ole."
          Lele mai la o Emeline a kau mai la kona mau lima maluna o ka a-i o kana aloha, alawa aloha ae la kona mau onohi maka hauliuli, pua ae la ka ula pua lehua onaona o kona mau papalina, a pana ae la ke koni ana a kona puuwai, e hoike mai ana kona kulana ia manawa, ua hooia oia i na huaolelo a ke koa opio. Pane ae la oia me ka leo nahenahe kohu leo manu noho kuahiwi, me ka haka pono o kona mau maka iloko o na maka o kana aloha, me ke kulu iho o na waimaka ano kehau ma kona mau papalina, i ka puana ana ae:
          "Owai la, a auhea la ka mea maluna ae o ka ilihonua a malalo iho hoi o na kukuna malamalama o ka la, e hooia ole ana i kau mau huaolelo e kuu aloha. Ke hai aku nei au imua ou e Elina, mamuli o kau mau huaolelo i pane mai nei, ke hauoli nei au e noho mahope nei, a e like me kou malama ana i na hoomanao ana no'u, ke kaikamahine makua ole a i noho hoi malalo o na inea a na powa, ke hooia aku nei au imua ou, e lei no au i kou aloha, a me na hoomanao ana a hiki i ka haule hou ana o keia mau onohi maluna o kou mau helehelena, a i ole, no ka wa e mau ana ka hanu iloko o ko'u kino nei."
"I hoike no ko'u manaoio ana i kau mau huaolelo e kuu momi, ke haawi 'ku nei au i keia, ka mea hoi a'u i manao ai e malama no na papalina o kuu makuahine," a puliki ae la o Elina ia Emeline i kona poli, a honi iho la iaia. O ka poi ia ana ia o ka buke sila o ko laua aloha, a aole no i hemo a hiki i ka waiho ana o ko laua mau kino i kahi i oleloia, "hoi ka lepo i ka lepo."
          Na ka leo o ka ohe i kahea mai ia laua e huli hou aku na kapuai i ka hale alii Roiala, oiai, ua lawe kohana aku la o lehua i ka la mahope o kona kua, a ua uhi ae la ka pouli maluna o ka aina, a o na kukuna mahina ka mea e pii malie ae ana mahope mai o na puu o ua aina nei nona ka olelo ia "Beritania oiaio, ka haku maluna o na ale." I ko laua hiki ana aku i ka ipuka o ka lumi nui, e noho mai ana ka Moi a me ka Moiwahine, na 'lii a me na luna aupuni, a me na maka hanohano o ka aina, me ka makaukau e haawi mai i ka lakou mau huaolelo hoolanamanao a me ke aloha i ke kanaka koa opio nana e hele aku ana e paio no lakou, oiai, i ka wa e wehe ai kai ao o ke kakahiaka ana ae, oia ka wa e haawi hope loa mai ai o Elina i kona aloha ia Emeline a me na Moi me ka lehulehu, a hehi hou kona mau kapuai maluna o na papahele oneki o ke aliiwahine moana Zelina, ka hale lana hoi nana e lawe aku ke koa o Beritania me kona mau ukali luina puuwai hae, ka poe hoi i hoohiki ma ka inu ana i ke koko wela o ka enemi, e ukali mahope o ko lakou haku opio a hiki i ka lawe ia ana aku o ke ola.
          Ku like ae la na mea a pau i ko laua nei komo ana aku, a haawi mai la i ke aloha a pela no hoi laua nei i hoihoi hou aku ai ia aloha. I ka hoea ana i na holaliilii o ka liula, e uhi ana na eheu o ka hauoli maluna o na paia o ka hale alii o ka Moi Rikeke, a hiiki loa aku i na kuono o na papai hale o na makaainana a puni ka aina. No ka mea, he ekolu la mamua iho, ua hoea aku ka palapala kuahaua a ke Alii ka Moi imua o kona mau makaainana i heluhelu ia penei.

HALE ALII ROIALA,
MA KA LOKOMAIKAI O NA LANI.

          I na oiwi aloha o ka aina o'u mau makua—Ke kuahaua aku nei—I keia la he ekolu la mahope iho, ke kauohaia 'ku nei na puuwai Beritania a pau, e kulaia, e hauoli piha, a e hoomaikai i ko na lani. O ka aina mai na kuahiwi, a o ke kai a hiki i ka moana lilo, e waiho akea ia no oukou. O na mea a pau e ulu ana, e kolo ana mauka nei, a me na mea a pau o ke kai, na oukou ma ia la; a o na hauoli a pau no oukou ia ma ia la. No ka mea, ma ke kakahiaka ana o ka lua o ka la, e haalele mai ai ke koa alii, kuu keiki ELINA i na aekai o ka aina nei, a hele aku mamuli o na hooikaika ana iloko o na inea no ka pono a me ka pomaikai o ka hae, ka nohoalii, ke aupuni, ka aina a me na makaainana o Beritania. E hauoli a mai hopo! E hoomanao a mai hoopalaka! A o ka mea e kue i ka makemake alii, e kau ia no ka hopena o ka n oho'na ma keia ao, a e nele ka noho alii i ke aloha o ke kala ana aku. E hoomaikaiia na lani.  RIKEKE ka Moi.
          Me ka pumehana i apo aku ai na puuwai o na makaainana o ka Moi i kana kauoha, oiai, ua iini lakou nona mamuli o kana mau hana aloha, a oia ke kumu i huliamahi ai na makaainana ma ia la a po no ka hauoli ana.
          I ka aneane ana e hoea mai ka manawa a na kukuna la e oili mai ai maluna o na kuahiwi, ua noi ae la ka Moi i na 'lii a me na mea a pau i hiki mai, mamuli o ka makemake o Elina, a meha na mea a pau. Ua hookoia keia noi, a haawi ae la o Elina i ka pule me ka manaoio, e pomaikai a me ka  malama maluhia ana i ka Moi, na makaainana o ke aupuni, a no ka ukali ana hoi o na eheu maalahi ma kana mau huakai iloko o na la i hala ae; a e noi aku ana e kau hou mai ia lokomaikai palena ole ma na la e hiki mai ana. Aole no hoi oia i poina no ke noi ana no kana aloha, a e like me ka oleloia, "ma ka manaoio e hookoia'i kau noi," pela no i hookoia'i na huaolelo hoohaahaa a Elina.
          I ka pau ana o ka Elina mau olelo noi imua o ka mana o na lani, ua pa-e mai la ka leo o na ohe me na pahu,wawalo hele ae la ka leo hae o na pukuniahi, a ua hoika mai la ka aina holookoa i ka hiki ana mai o ka manawa a ke koa opio e haawi mai ai i kona aloha i na hiohiona o ka aina. Ua oleloia, ua nele na Moi a me na poe aupuni e ae i ka hanohano ke hoohalikie aku me ko Elina, a he mea hoi na ke kanaka Beritania i haaheo mau ka puana ana ae, "he alii no'u o Elina, ka mea hoi nana i hoomoe ka iwikuamoo papahele o ka maluhia maluna o kuu one hanau aloha Beritania Nui," a ko ai na olelo e puana ia nei i keia la, "ua nele ke ao nei i ka la, e ike ai i ka noho kauwa ana e Beritania."
          I ka wa a na kini lehulehu o na miliona kanaka e haiamu ana a puni ka hale alii, oiai ua hookuu akea ae ka Moi i na ipuka o kona kahua Moi ma ia kakahiaka; o ka wa ia i ike ia aku ai o Elina i ka puka ana mai me kona hoa Emeline, i ukali ia mai e Egemona a me na luina a me na Moi a me na 'lii, a ku iho la ma ka papa hele o luna loa o ka hale alii, no ko na haawi ana mai i ke aloha imua o ka lahui a me ka hooia ana aku i ka paa o kona manao e paio no ko lakou pomaikai.
          O ka aahu o Elina, aohe huaolelo e hiki ai ke hoakaka ia, a o kona kulana mai luna a lalo, ka nani o kona kahua a me ke ano mohaha maikai o na papalina, o ka oi ia ma ia la ma ia aina a puni. O Emeline hoi, aohe ona lua, a pela no hoi kahi Egemona, a me na hiohiona koa o na luina. Ua hai kau o Elina i kona manao imua o na kanaka me ka leo koa a moakaka no hoi, e hooia aku ana imua o lakou i ke ano o kana mau hana e hele  nei, a wahi ana ma ka hapa hope loa o kana mau olelo: "E hele ana au e kau aku i ka hoopai kupono maluna o na enemi o kuu aina hanau, a e hoike aku hoi aole loa i nele kona mau oiwi mamo i ka manao koa no ka hele ana aku imua o lakou a haawi aku i ka hoopai kupono. Ma keia huakai a'u a me ko'u mau ukali, aole loa makou e hoopoina ana i ke noi ana ae i na lokomaikai o ko na lani, a ke pahola aku nei au i ka leo poloai ia oukou a pau, e haawi pu ae i ka oukou mau noi ana no ka maalahi o ka makou huakai. A ano, aloha oukou, aloha kuu aina makua, aloha kona mau kuahiwi uliuli, me ne aemakani aheahe, aloha no hoi ka ohana, na makamaka a me ka lehulehu holookoa, ke hele nei au e wawahi i na kahua o na powa, e hoohelelei i ko lakou mau ikaika, a e paina auanei na laka kaulahao o ko lakou kahua, a e neoneo hoi ka aina mai ko lakou mau helehelena hiena. Pela wau e haawi aku nei i ke aloha ma o ka inoa o ke kuna Zelina a me kona mau luina a pau."
          Puana mai la ka lehulehu i na leo aloha, a hoi aku la lakou nei iloko o ke keena alii no ke aloha hope loa mawaena o lakou iho. I ka makaukau ana o na mea a pau, ua kau aku la o Elina ma me na 'lii maluna o ke kaa, a holo aku la i kahi a na waapa e kali ana. I ka hiki ana ilaila, aole no i hoolohilohi iho o Elina, aka kau koke aku la lakou a holo aku la, no ka mea, ua maopopo no iaia, he mea e hoonui loa ai i ka uwe ana o Emeline, nolaila, ua kali ole ia. I ke kau ana iluna o ka moku, ua uu koke ia ae la na pea, haawi mai la i na pu aloha, a nee pakika aku la ua Zelina nei maluna o ka ilikai, i ukali ia aku e na moku kaua i hoomakaukau ia e ke aupuni e like me kana noi i ka Moi.
          I ka nalu ana o na moku i ka mamao, akahi no a huli hoi aku ka Moi me Emeline ma, a me ka lehulehu a pau i hele aku e ike. O ko Emeline mau helehelena, oia mau no o ka nani ui wahine maikai, aka, aia maloko o kona puuwai kahi i hana ai ke aloha i kana hana. O kana hana i na la a pau, o ka hoomanao mau i ko Elina mau helehelena, e noi mau ana i na lani e malama maalahi ia lakou ma na wahi a pau a lakou e hele ai, a pela no hoi ka Moi.

MOKUNA VII.

          Mahope iho o ko Elina ma haalele ana i ka aina, ua lawe haaheo aku la na eheu makani i ko lakou mau halelana me ka maalahi maluna o ka ilikai no hookahi pule, a i kekahi po pouli, oiai lakou e nanea ana maluna o na oneki, ua ike ia aku la ke owaowaka mai o kekahi kukui, me he la he hoku maluna ae o ka ilikai, a lohe ia aku la ka leo hooho o ke kiai o luna o ke kia i ka pane ana mai:
          "He kukui ka'u e ike nei mamua pono o kakou, me he la he elima mile ke kaawale, a ke ike pu aku nei no hoi au i kekahi mea nui me he la he moku e nee mai ana i o kakou nei."
          Aole i pau pono ka leo ahailono o ke kiai, aia hoi, ua pii aku la o Elina me ka mama, a e ku ana kela ma ka aoao o ke keiai me ka hakapono ana aku o kona mau maka imua. Nana aku la ia, a i kona hoomaopopo ana, ua haawi iho la i ka leo kauoha i ka poe o ka oneki, i ka puana ana iho:
          "E Egemona, e hoopiha i na pu, a e hoomakaukau no ka paio ana!"
          "E hoolohe ia," wahi a Egemona, a haawi aku la ia i ka leo kauoha i na sela, a ua eleu mai la no hoi lakou, a iloko o ka manawa pokole, ua makaukau iho la na mea a pau e like me ke kauoha a ko lakou haku alii.
          I ka aneane ana o ua moku nei e kokoke mai i o lakou nei, ua iho mai la o Elina me ke kiai a hiki i ka oneki. "He moku powa kela," wahi a Elina i kona mau hoa, no ka mea, ke hoomaopopo aku la au i kona ano a pau, aohe nae i ike mai nei ia kakou. Ano, e puhi i na kukui a pau, a mai ho-a kekahi i ke ahi."
          Malalo o ka Elina mau kauoha, ua pu-a ia ae la na pea, a e lana malie ana ua Zelina nei me he manu nene la maluna o ka ilikai.  (Aole i pau.)

Kekahi Makaikai io anei?

          E ka LAHUI HAWAII; ke kalaunu o ka puuwai o na kanaka Hawaii mai Keawe a Mano; kuluma oe:—Ua halawai iho au me n a hiohiona o ka mea nana ka pane i kou makamaka nei, i pulou iho malalo o ke koloka hoopunipuni, a hoomaopopo iho la au, ua helehele aku nei au i kukapililakeke nona, a.me he la ua kupono. No ka mea, ma o ka'u mau olelo ma kela pule, e pili ana i ka poe nana i kakau ka palapala hoopii i ka mea hanohano L. W. D. Kanealii, a me ka haulehia ana o ko lakou manaolana, ua ku aku nei kela i ke kuikele, a ke wili mai nei ka huelo i ka lepo. Auhea oe e ua o kekahi makaikai mea Lunamakaainana ae ana, mai huna oe ia oe iho, a mai pai ae no hoi ia oe; no ka mea, aole loa e kohu kau oiaio ole me ka'u oiaio. Mai kau oe i kela inoa malalo o kou mau manao pane ia'u, no ka mea, aohe makaikai i hele aku e hoolohe i na hana o ka Ahaolelo i mahalo i kau mau hana, ole loa aku hoi ka pane ana ma kou aoao. O ka poe wale no i mahalo ia oe, oia na Kuhina a me ka poe o kou hulu ano like. Mai walaau loa oe, eia no au ke kakau nei i kou oukou mau koho ana a pau, a me kau mau kalaimanao, aia wale no ma o oe, pau poo pau hiu, a he makole ka kou mau makaainana, ka poe hoi nana oe i koho mai. Ma na ninau pili i ka pono o na makaainana a pau, aole loa i haalele ka Hon. L. W. D. Kanealii ia makou ma ia mau mea, ua kupaa oia, ua hopo ole, a ua hooikaika ma ko na makaainana aoao ma kana mau kamailio ana a me ka o lima ana, aka o oe, ua nui ko leo, kuhi ko lima, a liki na puupuu, a o ka lima ma kela aoao, a heaha ko makou? Ma na ninau e ae, ua kaupaona ka Hon. L. W. D. Kanealii i ka pono kaulike, aka o oe, ua kaupaona oe ma kela aoao, a hoopalaka ia makou. E pono oe e pelu i ko huelo Liona (au i haanou mai nei) malalo o kou hope, a e hina mai na pepeiao, a mai uwo hou, no ka mea, he nui leo, a he liki haanopu wale iho no me ka waiwai ole. Owau no me na hoike makaikai a pau.  D. D. HONOLULU.

Kaikamahine Pau-ahi.

E KA LAHUI HAWAII; Aloha oe:—
          Ma ka hora eiwa o ke kakahiaka o ka Poalima iho nei, (Iune la 2,) ua pau iho la i ke ahi kekahi uuku ma Pauoa, nona na makahiki 3 me 11 mahina a me 7 la. O kona inoa o Kepola Kealoha.
          Ma ka hora 6 paha o ua kakahiaka Poalima la, ua hoomaka ke kupunakane o ua wahi kaikamahine la e hele i ka hana i kai o Honolulu, kauoha aku la ke kupunakane ia Kepola nui, he kaikaimahine makapo ia nona na makahiki he 16 me 5 mahina "E noho malie no i ka hale nei me ko kaikaina, e hele au e imi wahi ola no kakou." Ae mai la no o Kelohanui. Kaha aku la ke kupunakane e hele, kahea aku la ua wahi kaikamahine nei: "E kupuna e, aloha aku ia Papa me Mama;" o ka pau no ia o kana kamailio ana. Hoi aku la ke kaikamahine makapo ma kekahi lumi o ka lanai, a o kahi kaikamahine uuku, hoi aku la ma ka lumi moe, a hala paha ka hora a oi, ia wa lohe aku la ka makapo i ka uwe kapalili mai a kahi kaikamahine uuku, o kona holo koke aku la no ia i ka lumi moe e hapapa hele ana o na wawae me na lima, a loaa aku la ua wahi kaikamahine nei e a ia ana ke kapa e ke ahi, hopu aku la i ke kaikaina a holo aku la iwaho o ka hale, a kahea aku la oia i kanaka me ka leo nui. "Kokua! kokua!! ua pau maua i ke ahi!!!
          Ia manawa holo aku la o Kaioipahia a hahae i ke kapa o ke kaikamahine uuku me ka awiwi loa, a mahope mai kekahi kanaka me ka pakeke wai a ninini iho la maluna o ke kaikamahine. I ka hemo ana o ke kapa, ikeia aku la ua pau na uha, na lima, ka opu, a me ka umauma, a hiki i na papalina, ua moapu i ke ahi, he ku i ka hoomainoino ka hana a ke ahi. He 17 wale no hora o kona ola ana, mai ka pau ana i ke ahi a hiki i ka lele ana o ka hanu. Ua hoao aku ka mana o na lau lapaau, a ua lilo he mea ole. Ua pakele mahunehune ke ola o ka makapo, ua pau lihilihi kekahi mau manamana o kona mau lima; i ka nana aku e pau ana kona pilikia.
          O ke kumu i pau ai keia mau kaikamahine i ke ahi, o ke ahikoe no; i ka wa i komo ia aku ai ka hale e nana, e waiho mokaki mai ana no ke ahikoe iluna o ka moena, ua manaoia, ua hele ua kaikamahine la e huli i ke ahikoe o ke kupunakane a loaa, a o kana no paha ia i koe ai a pau ai oia i ke ahi. O kekahi kumu pilikia no o keia mau kaikamahine, o ka mea ole nana e malama pono, hele no ke kupukane i ka hana, e imi i wahi ola no lakou, noho mehameha wale no laua i ka hale; pela mau ko laua noho koolua ana, a loaa wale keia pilikia. "Auwe! aia he hopena no na hana a pau, a he wa hoi no na mea a pau e konohia mai ai.—Aloha ino."
S. W. KAAUMOANA.
Pauoa, Iune 1876.

E KA LAHUI HAWAII; Aloha oe:—
          E oluolu oe e ka Lunahooppnopono e hookomo iho i keia wahi kanaenae walohia ma kahi kaawale o ko kakou Kapikala, a nana hoi ia e lawe hele aku ma na kapa kaiaulu o Hawaii nei, i ike mai ai o'u mau kini a me o'u mau lehulehu e noho pa kahi ana ma kapakai o na aina.
          I ka wa a na kukuna o ka la e kiei hooipo mai ana maluna o na kualono hauliuli lipolipo, a pahola ae la kona malamalama ma o a maanei o ua aina makuahine nei. Ma ka la 29 o ka malama i aui aku la, oia hoi ka Poalua iho nei, i ka wa a ke Kilauea e kope hooipo ana i kona hoaloha o ka ili o ke kai, hanu au ae la ka ihu o ua olali nei mawaho ae o Makena, aia hoi, ike ia aku la kekahi mea hou maluna, e welo ana na hae i ka pa kolonahe mai a na aheahe makani o na lai elua o Kanahena. Ia mamanawa, ua ike aku ke keiki lalawai o ka uka ano o Ulupalakua i ka welo haaheo mai a ka welelau o na hae i ka makani, o ka wa no ia i hao ae ai o ua keiki nei i kana mana a lilo ia la i la lealea no ua keiki la, no ka mea i Amerika no e hanaia'i  na hana a pau o ka honi wale ana no ka ua keiki nei i ka  mahu o ka imu a na keiki loea o ia aupuni. Nolaila, ua mahalo paha oia i ka holo ana o ke Kuikahi Panailike.
          Paka-ua. Ke maumaua mai nei no ka haule ana mai o na paka-ua o ke kau e hoomau i na papalina o ka honua, e aho no nae ia ulu na wahi kulina uala, a me na wahi palili kalo.
          Ke wili nei no ke ko o Ulupalakua nei, ke nana aku i na keiki puhi ko, ua enaena launaole, ua like me na keiki hoomoa ko, a pela aku. Me ka mahalo no.
KALAMAKUOKANOIAU.
Ulupalakua, Maui, Iune 24, 1876.

M R. LUNAHOOPONOPONO; Aloha oe:—
          Ma ka la 27 o Mei, alakai mai la kekahi mau paniolo i ka lakou Pipi ma ke alanui ponoi o keia kulanakauhale. Aia hoi hookahi pake e pii ana ma ke alanui, ia wa no e holo pono mai ana ka bipi i ua pake la, ia wa, pili wale ae la no ua pake la ma ka puka pa, ua pakele wale iho la no ke ola mai pilikia. Pela no e hana mau ia nei, ke alakai ana i na bipi ma keia alanui i na manawa a pau. Aia no hoi iwaena konu o keia kulanakauhale ka Hale Lole Bipi; ke ike mai la oukou e na poo aupuni, ka mea iaia ka mana hookaawale i na hana ino ma Waiohinu nei, aole no malama ponoia na Kanawai, ua lilo wale no na mea pilikia i mau mea lealea, e wiki oe e ka LAHUI HAWAII i ka hai aku i keia hemahema, i ike mai ka lehulehu a pau e noho ana mai Hawaii a Kauai. Owau no me ka mahalo.  A. M. KAULULAAU.
Kau, Mei 27, 1876.