Ka Lahui Hawaii, Volume II, Number 17, 20 ʻApelila 1876 — Page 1

KA LAHUI HAWAII.
"Ua mau ke Ea o ka Aina i ka Pono."
BUKE II.} HONOLULU, POAHA, APERILA 20, 1876. {HELU 17.

KA NUPEPA KA LAHUI HAWAII.

Paiia ma kela Poaha me keia Poaha.
H. H. PALEKA, Luna Hooponopono.
He pepa i hoopukaia i kela me keia hebedoma no na Ohana a me na Ekalesia o Hawaii; he mea kokua i ka noho pono ana o na ohana, ka maluhia o kanaka, a me na pomaikai kino a uhane o ka Lahui Hawaii. "Aole paonioni; aole haanui; aole hikiwawe ka huhu; aole noonoo ino."
O na Kumumanao a pau, na Nu Hou o kela me keia ano, na Mare, Hanau, Make, e kakau mai i ka Luna Hooponopono, a e paiia no ke kupono.
Aole e aeia ka pilikino, ke kuamuamu, ka hoino, a me ka huhu, a ua makemakeia ka hoohoihoi, hoolana manao, hoonaauao, a me ka hoopono.
He $1.75 ka auhau o keia pepa no ka makahiki, a he $1.00 no ka hapa makahiki.
E hookaa mua ia ka auhau o ka pepa mamua o ka loaa ana i kekahi mea makemake e lawe.

NO NA OLELO HOOLAHA.

E lawe ana keia pepa i na Olelo Hoolaha a na makamaka, e like me ke kupono, a e lawa pono ai hoi me ka hoohaiki ole i ka huina o na kolamu kukulu manao, no ka uku haahaa.
O kela a me keia makamaka e makemake ana e hoolaha, e hele mai ma ke keena a e hui pu me ka Luna Hooponopono.
Aole e paiia kekahi Olelo Hoolaha ke ole e hookaa mua ia ka auhau.
Eia kekahi, ke noiia aku nei na makamaka e hoouna mau mai i na mea hou; mai hooloihi loa i na palapala; e hai pololei mai i na manao me ke kuawili ole, a e kakau mai me na hua moakaka.
H. H. PALEKA,
Luna Hooponopono.

NO NA OLELO HOOLAHA.

OLELO HOOLAHA.

E IKE AUANEI NA MEA A PAU MA KEIA Olelo Hoolaha, ke hoole a ke papa aku nei au i na kanaka a pau o kela a me keia ano, mai puni a mai haawi aku i kekahi Dala a waiwai e ae paha, ke hele aku o W. S. Pahukula imua o oukou me kekahi Palapala Aie Dala ma ko'u inoa, e like me kekahi Palapala Aie Dala e piha ana na makahiki elua i ka la 10 ae nei o keia mahina, oiai, aole au i kakau inoa aku ma ia palapala. Nolaila, mai ae aku, o poho oukou.
C. KANAINA.
Honolulu, Apr. 3, 1876. (15 tf)

J. PORTER GREEN,
"KEIKI O KAUAUKIUKIU."

HE LOIO! A HE KOKUA OIAIO!
E HELE MAI NA MAKAMAKA A PAU I o'u nei, a na'u no e kokua ia oukou imua o ka Aha Hoomalu a me ka Aha Kiekie me ka uku haahaa makepono loa. Me na oki mare, a me ka hooponopono ana i ka waiwai o ka poe make, he eleu loa ka hana. Aia ko'u keena hana ma Alanui Kalepa kokoke i ke keena o ka Lunakanawai Aeko. E hamama mau ana ka puka, e hele nui mai i pau ka pilikia. 1-1y

E. STREHZ,
[AILUENE]

MALAILA E LOAA AI NA ANO LAAU A pau; a me na wai hoomaemae o kela a me keia ano. E hamama mau ana ka ipuka ma na po Poaono a pau. Ma ke kihi o Alanui Papu a me Hotele, ma Monikahaae. 1 1y

Hoolaha Komohewa.

KE HAI IA AKU NEI KA LONO I NA kanaka a pau, aole e hele wale ma ka aina i kapaia o Waimanalo, maloko o ke Ahupuaa o Honouliuli, Apana o Ewa, Mokupuni o Oahu, aole e hookuu wale i na holoholona, aole hoi ma ke oki ana i na laau, ka lawe ana i na wahie, a pepehi, a uhai wale paha i na bipi hihiu. Pene na palena o ua aina nei: "O na aina hoolimalima mua ia ia JOHN MEEK, o ke kula o Lihue, a me ke kula o Honouliuli ma ka aoao ma uka a me na aoao ma kai, o Nanakuli ma kahi aoao, a no Koilina ma kahi aoao." J. H. CONEY.
Honolulu, Feb. 9, 1876. [7 tf] Luna Hooko.

CECIL BROWN,

Loio a he Kokua ma ke Kanawai
A HE AGENA NO KA HOOIAIO ANA I NA palapala no ka mokupuni o Oahu.
Helu 8 Alanui Kaahumanu, Honolulu, H. P. A.
741 1yr 792

WIL DER & Co.,
(WAILA MA.)

AIA MA KE KIHI O
ALANUI PAPU me MOIWAHINE!
Ua hoolako mau ia me ke kuai ana aku i na
Papa me na lako Kukulu hale
O NA ANO A PAU.
NA PANI PUKA!
PUKAANIANI,
OLEPELEPE,
LAKA,
AMI-LIILII,
AMI-LOLOA
PENA o na ano a pau,
AILA PENA,
VANIKI, &c.
Na Balak Pena me Puna,
Na Pepa Hale me na Lipine Pepa.
Aniani, Paakai, &c.
O na mea a pau maluna ae e kuai makepono loa ia aku no ke DALA KUIKE 1-1y

Leo Ellen Bayne.
Golden Robin, p 45.

1 Moe malie,
Pau na luuluu,
Moe uhane,
Moe olu no,
Moe, e moe,
Ka wa moe nei;
Pua na pua nou,
No Elena Lei.
Cho. Moe a maikai,
Moe olu a ala'e;
Noho au la a kiai,
Elena Lei.
2 Moe eha ole,
Ole makau;
Mau kou mau hoa,
Hoa aloha ou—
Ke moe ke ala,
Ke ole, ke uwe,
Mau no ka oli nou.
No Elena Lei.
Cho. Moe oe a maikai, &c.
3 Na pua i mae la,
Pua hou nou,
Na oli i hala,
Ua ala hou—
Na hoa ou la,
Ua hoi hou mai,
A mele oli nou.
No Elena Lei.
Cho. Moe oe a maikai, &c.
HAWAII.

ELINA KE KOA
HE KANAKA OPIO
PUUWAI WAIPAHE!
KA PALEKAUA LIONA HOI O KONA MAU LA
KE PUKONAKONA O KONA LAHUI, A O
KA OI WELINA HOPO O KONA
MAU ENEMI.
Mokuna V—Helu 16.

          UA ano kaumaha pu na helehelena o ua Don Kito nei, a ua hoike pu mai no hoi ke ano o kona leo a me kana mau huaolelo.
          "Oia weli au e hoomaopopo ala, e kau pu aku ana no ia maluna o ko oukou mau heluna a pau, a ina he mea hiki, ke hai paa aku nei au imua ou a imua hoi o na ao o ka lewa, e hooikaika ana wau e like me ka hiki ia'u e kau aku i ka hoopai maluna o lakou no ka lakou mau hana hoomainoino. Hookahi wale no a'u kauoha ia oe, no ka mea, ua maa hoi oe i na ano a me ke kulana o ke ano o ka noho ana o na powa, e kuhikuhi mai oe ia'u i na ano a pau o ko lakou kahua hoomoana ke hoea aku kakou ilaila."
          "E hoomau aku i ko kakou ihu ma keia aoao, a hala ka po o ka la apopo, alaila, e ike no kakou i ka aina," wahi a Don Kito.
          Ua hoomau ia aku keia ihu malalo o ka Elina kauoha elike hoi me ka Don Kito mau kuhikuhi. O keia mau kuhikuhi ana o ka powa, ua pololei no, aka, ua komo mai la ka manao iloko ona e loaa ana ka manawa kupono no kona hooikaika ana e pakele mai ka noho paahao ana na Elina, oiai, ina oia e lilo i alakai no Elina ma, ma ka holo ana aku i keia mokupuni o na powa, a huli aku ia lakou, alaila, he mea hiki wale no iaia ke hookele aku i ka Zelina ma na kumu hoopunipuni, a komo iwaena konu o ka poe powa, ma ia mea e lanakila ai oia, a e lawe pio ia ai hoi o Elina ma.
          I ka po o ka lua o ka la, ua hoolulu ia iho la na pea o ka Zelina, no ka mea, ua hiki mai ka manawa e aneane loa aku ai lakou i na ae kai o na mokupuni nei. Hoomakaukau iho la lakou nei no ka hoouka kaua ana, hoopiha iho la na pu kuniahi nunui me na poka pahu o ke ano ikaika loa, a o kela a me keia kanaka, mai a Elina mai a me na luina, koe wale no ka powa, ua makaukau wale no me na pu panapana a me na pahikaua. I ka wa i omaka mai ai na kukuna o ka la maloko mai o na ao poniponi o ke kakahiaka nui, ka wa hoi akahi no a wehe ae kai ao o ke kakahiaka molehulehu, ua ala ae la o Elina mai kona hiamoe, a honi koke aku la no i ke ea o ka aina, a i ka alawa ana aku o kona mau maka ma ko lakou aoao hikina, ike aku la ia maloko aku o ka noe i ke opu mai o na pali kiekie hauliuli. Me ka leo malie oia i haawi aku ai i ke kauoha i na kiai e malama ana i ka maluhia o ka oneki, i ka pane ana aku:
          "Eia ka aina he mile ka mamao mai ia kakou aku ; a e haawi aku i ka leo hoala i na mea a pau, me ko lakou hoomakaukau ano."
          Ua hooko koke ia keia kauoha, a he manawa pokole, ua ala mai la na kanaka a pau, e ku ana maluna o na papahele o ka oneki me ka makaukau e hooko aku i na kauoha a ko lakou haku. O Don Kito hoi, ka powa paahao, ua pii mai la maluna o ka oneki a pane mai la me ka hoomaalea, e hoopihoihoi ana i kana mau kamailio ana, i manao ia aku he mau manao maikai wale no kona.
          "Auwe ! auwe !" wahi ana, "eia kakou mamua pono o ka waha o na pu kuniahi a na enemi, oiai aia ko lakou papu mamua pono o kakou, a aia no hoi ma kahi e kokoke ana malaila kahi e hoolana mau ai ko lakou mau aumoku kaua. E pono e huli aku kakou a e holo aku ma ka aoao malalo, ano, ano, mai lohi."
          "Mai pihoihoi oe, a mai haawi wale i na kauoha. E hai mai oe ia'u i na kulana o ka aina, a na'u no e haawi aku i ke kauoha, oiai aole loa au e ae ana e hoohaumia ia ko'u mau koa, ma ka hooko ana i na kauoha a kekahi enemi powa o ko'u Moi, ka mea hoi e noho ana malalo o ko'u mana ma ke ano he pio, a he paahao na ke aupuni Beritania, "wahi a Elina.
          "Mai manao oe e lawe ana kau paahao nei i ka mana, aole pela e ke alii," wahi a ua powa nei, "aka, ke makemake nei au e hoopakele ae ia oe mai ke komo poo ana aku iloko o ka poho o na lima o na powa, a no kou aneane e poino ma ia mea, ua ane pihoihoi au, a ua hikilele ka manao, oiai, ua hooia mai no oe ma ka lawe pio ana ia lakou, alaila e hoopakeleia no au, a nolaila e ke alii ko'u kumu hooikaika ma ia mea," pela iho la keia powa me ka maalea i pane mai ai.
          O Elina, aole ia ha kanaka hiki wale no ke alakai ia e like me ka makemake o kahi poe, oiai, ua piha oia me na noonoo akahele, a e like me ka maalea o na holoholona hihiu tige, e kali ana me ka hoopolo me ka nalu ana iloko iho i ke ano a me ka manawa kupono e hooko ia ai kona mau iini ana, pela no oia, a e like hoi me ka liona weli o na waoakua, ke koa o ka puuwai a me ka hookuu pau ana i ka ikaika o na a-akoni o kona kino holookoa, e anapa hulili ana kona mau maka wena me he ahi lalapa 'la imua o kona mau enemi, pela no o Elina.
          "Ina aia mamua pono o kakou nei na enemi e like me kau i hai mai nei, alaila, e hoomau aku no i ka ihu o ka moku ia wahi, a e lu ae i na pea apau, i hikiwawe aku ai ko kakou holo ana. Aia malaila ko'u makemake, oiai, aia ilaila na enemi, a aole o'u makemake e holo aku ma ko lakou kua. Ina aia io lakou ilaila e Don Kito, e like hoi me kau mau kuhikuhi a ano pihoihoi i hai mai nei, alaila, e hui ana kakou me lakou mamua o ka huli ana ae o ka la makai. E hoomakakukau i na mea a pau no ka hoouka kaua ana, a mai hopo a kuemi hope kekahi, o ke kanaka mua e hoike mai ana i kona ano hopohopo a makau, na ka oi o kuu makakila e hookaawale ae i kona puniu mai ke kino, a haawi aku hoi i ka elele o ka luakupapau he make. E uhai mahope o'u, e hoolohe i ka'u mau olelo, a e ike ia auanei ka ula o ka moana i kela la me ke koko o na enemi, a e welo lanakila ana ka hae nani o Beritania Nui maluna o ke kahua powa, nona hoi ka moolelo weliweli e pa-e mau nei ma na pea o ko kakou home one hanau, a ma ka mana o na lani, a me ke aloha i ke one oiwi, a me ke koni ana o na aa-koko o ko'u mau kupuna o na mamo Sekotia, no ka pono a me ka pomaikai o ko'u mau hoakanaka o ka lahui hookahi, ke hoohiki paa ae nei au imua o na lani, e hooikaika ana wau, a e lilo i pio i keia la, a i ole e noho alii a lanakila hoi maluna o na powa, mamua ae o ka napoo ana aku o ka la malalo o na ilikai ma ke komohana," a hapai ae la ua Elina nei i kana pahikaua, a oniu ae la me ke ano wela o kona umauma, a hulili kona mau onohi maka.
          I ka pau ana o ka Elina mau olelo, ua haawi ae la na luina i na leo huro ekolu a haalulu iho la na papahele o ka Zelina a wawalo hele aku la maluna o ka ilikai me ke ano hae, e hoike ana i ko lakou mau manao paa a me ka inaina, me ka piha i na olelo hoohiki no ka hooko ana a me ka ukali ana mahope o ko lakou haku opio a hiki i ka make ana.
          O Don Kito hoi, ua ike iho la ia i kona hewa, a ua hoomaka mai la e hooikaika ma ka hoopunipuni ana i hoolohe 'ku ai o Elina i kana, a holo aku iwaena o na powa, aka, ua pane hou aku o Elina, i ka i ana aku:
          "Ma kahi o na enemi e noho ana, malaila au e hele aku ai."
          He manawa pokole wale no, ua kokoke loa aku ia lakou nei e pili aina, a me na ohe nana o Elina i kau aku ai i kona mau maka, aole nae he ike ia aku o kekahi mea e hooiaio mai ai i na olelo a ke kanaka powa. Ia manawa i hoomaopopo iho ai o Elina i kona manao a kauoha aku la e lawe ia aku ua powa nei ilalo, me ka hoopaa ia o kona mau lima i ka hao, me ka paa o kona manao e pailaka ponoi aku no i kona moku, a ina e loohia ia lakou me na poino, he nani poino ana no ia na kona mau lima ponoi no, a aole e hiki ke olelo ia ua puni wale oia i na hoopunipuni ana a kona enemi, a mamuli oia puni ana i poino ai lakou.
          Kaalo ae la ka Zelina he mau lae, a ike aku la he muliwai nui, e waiho hamama mai ana kona waha mamua pono o lakou nei, a hoopololei ia aku la ka ihu o ka moku no laila. He manawa pokole wale no, a komo aku la lakou ma ka waha o ka muliwai, a holo loa aku la iloko. I ke kokoke ana i kahi e hoomaka ai ka muliwai, no ko lakou ike kanaka ole, a ike ole aku hoi i kekahi mea e hiki ai ia lakou ke hoomaopopo iho he kahua hoomoana ia no ka poe powa, nolaila, ua kuu iho la ko lakou heleuma, a hoomaka iho la e hooluolu no kekahi mau hora, no ka mea, ua maopopo no ia lakou, ina e hui pu ana lakou me na powa, e hahana aua ke kaua, a e loihi ana ka manawa mamua o ka pau ana.
          He mau hora wale no, a huki hou ia ae la ka heleuma, a haalele iho la lakou i ka muliwai mahope. O ke kaapuni ana i ua mokupuni nei ka makemake o Elina ia manawa, aka, mamua o ko lakou kaalo pono ana ma kekahi aoao o na lae aa e waiho mai ana mamua, ua ike ia aku la ekahi moku nui me kona mau pea a pau e iho mai ana io lakou nei. O ko Elina makemake ia, aole e luhi i ka hoopiipii ana aku. Kauoha aku la o Elina e huki ia ma ke kia mua ka hae welo, a me ka hope hoi ka hae o ke aupuni Beretania. Ua hooko ia keia kauoha me ka eleu a me ka hoihoi o na luina. A noho iho la kela a me keia me ka hamama o ko lakou mau pepeiao, no ka moni ana mai i na olelo kauoha a ko lakou haku opio, a me ka makaukau hoi e hooko aku ia mau kauoha.
          He manawa ole ia a hoolulu ana ua moku nui nei ma kahi e kokoke mai ana ia lakou nei, a hoomaopopo koke aku la no lakou nei he moku powa. Aohe oni a aohe leo pane o luna o ka Zelina, a lohe ia aku la ka leo kahea o kekahi mea i ka pane ana mai me ka leo nui:
          "Ma ka inoa o Pedro La Cruza, ka Haku Alii Moi o ke aupuni inu koko, e haawi pio mai ano, a e kuu iho i na hae hoohilahila e kau ae la ma na kia o kona moku pio, a i ole, alaila, na ka waha o na pu kuniahi e haawi aku i na kauoha hope loa!"
          E like me ka hikiwawe o ke kani ana o ka wati, pela ka emoole o ka wehe ia ana ae o na puka pu kuniahi ma na aoao o ka Zelina malalo o ke kauoha a ke koa Elina, a oili aku la i ka manawa hookahi na waha eleele nunui a weliweli no hoi o na pu i hoopiha ia me na poka nunui. Ku aku la o Elina ma ka aoao o ka pu nui o hope loa, a pane aku la.
          "Ma ka inoa o ka Moi o keia moana a me Beritania Nui, a mamuli hoi o ka mana i haawi ia mai ma ka poho o ko'u lima, ke kauoha aku nei au ia oe e kuu i kou heleuma, e pu-a i kou mau pea, a ma ka waha o na pu kuniahi e kali nei i ka huaolelo kauoha, e hoolohe mai i ka hoopai maluna o Pedro La Cruza, a me kona mau ukali a pau!"
(Aole i pau.)

Ua lalau ka hoolaha.

Aia ma ka kala 9 o ka Nupepa Kuokoa, ua ike ia ka hoolaha a Kauihonua no kekahi Ekalesia o ka apana o Waiohinu, aole pela ka oiaio. Ua hoolaha lalau wale no ua o hoolehelehekii. O kekahi e malama nei ka hana a ka Haku ma keia apana, aole oia i hana i balota, aole ia i makemake e holo balota, aka mamuli o ka makemake o na makaainana, aole no ia i hai olelo mau iloko o ka luakini no na mea e pili ana i ka balota. Owau no kekahi i kana aha, halawai, o kana haiolelo mau i na Sabati a pau o ka olelo a ka Haku, elike me ka waiu a me ka meli ka ono o kana mau hai olelo.
J. K. HENELI.
Waiohinu, Mar. 20, 1876.

HA MOOLELO
—NO—
KALINO!
—KE KEIKI A—
KAILUA ME HOLUALOA.
Ka Hiwahiwa Hoi Iloko o Kona Mau
La Opiopio.
MOKUNA I.

          A MA ia manawa no haale mai la na waimaka o ke keiki, no kona makau i na leo weliweli a kona makuakane, maia manawa no, o ke ku ae la noia o Hikapoloa a maloeloe, o ka waiho ae la noia i ka puupuu ana ia "peku kahi," a newa aku la no hoi ke keiki a waiho ana ilalo. Ike aku la ka makuahine ua waiho kana keiki ilalo, lele mai la ia e uwao, e loaa aku ana hoi ka makuahine i ka puupuu ia "peku kahi," a waiho like aku la laua.
          A ike mai la hoi na makuahonowai i ka waiho ana o ka laua kaikamahine ilalo, lele mai hoi, pau pu helu papa kolu i ka puupuu ia "peku kahi." Ua neoneo iho la ko lakou kauhale, aole he kanaka, o Hikapoloa wale no.
          Aole i hala 'e keia alina, kukui aku la ka lohe i na lii o Kohala, ia Nunulu a me Wahilani, a lohe lakou no ka ikaika lua ole o Hikapoloa, ua loaa kela poe i na ai a ka ui, o ke okalakala mai la no ia o ua mau alii nei, a hele mai la me ko laua mau kanaka, na koa, na aialo a me ua puali kanaka lehulehu wale, a iloko o ka wa pokole, liuliu a hoomakaukau iho la ke kaua kuloko mawaena o ua mau alii nei me Hikapoloa.
          Na Nunulu mai no hoi pau kekahi mau kanaka o ko Hikapoloa aoao i ka make, na ia nei aku hoi oneanea ke kahua mokomoko o ka aoao o ke alii, a hala he mau hora, pau loa iho la na lii a me na koa o keia aoao i ka make, a koe aku hookahi i ahailono, nana i lawe aku ka lono a lohe o Wahilani, ua pau loa lakou i ka make no ka piha ikaika o Hikapoloa, o ko ke alii kena ae la no ia i kona mau hoa, na aialo, na aipuupuu a me na makaainana a pau ona, a pii mai la e halawai me kona hoa mokomoko ; a hiki ana no hoi o Hikapoloa me kona wiwo ole a ku ana he alo a he alo, o ka manawa no ia o laua i ulele iho ai i na keikikane o laua, na ke koa o ka la, okea kela aoao, na Wahilani mai hoi, hanu a puaa, pili pu o Hikapoloa, a hala he mau hora o ko laua paio ana me ka hahana, lanakila iho la o Hikapoloa maluna o kona hoa mokomoko ke alii Wahilani, a pau iho la na lii o Kohala i ka make.
          Aia hoi, ma ka apua ke ola ana o kekahi koa, a nana i ahai aku i ka lono i na kanaka a puni o Kohala, ua pau lakou i ka make, a ma ka apua ko'u pakele ana mai nei i ahailono ; a o ko Hikapoloa hoi aku la no ia i kai o Lahokahua, (aia no ia wahi i kapaia ai keia inoa ma Kohala,) noho iho la keia malaila, a iaia e nanea ana i ko olu kohaihai o ka makani Apaapaa, a me na ea oluolu maikai o ka moana.
          Ku ana he mau wahine malihini, elima ko lakou nui, a kipa mai la no hoi i ko ia nei hale, hookipa aku la keia e like me ke ano mau o na malihini kipa, a kuu iho la no hoi ko lakou nei nae, me na hooluana maikai ana me ke kamaaina, oiai lakou e hoohialaai ana ma na kamailio o kela a me keia ano, aia hoi, hoowahine aku la keia ia lakou la a pau elima, a pela no hoi lakou i hookane mai ai iaia nei, i loaa ona hale kipa, e like me ka mea mau ia kakou. A moe iho la lakou nei ia po, haawi pakahi mai la ke kamaaina i elima hale no lakou pakahi a ao ia po.
          A i ke kakahiaka nui ana 'e, liuliu a hoomakaukau iho la lakou nei no ka huakai hele, hele aku la lakou nei ma ke kaha a puni, a pii aku la i ka uka iuiu o Kawaihae a hiki i Kapaliiuka, e akoakoa ana he aha kanaka nui malaila ; hoouna aku la o Hikapoloa i na elele ana e ukali aku mahope o ka poe malihini, hiki ana ka elele ilaila, e noho ana lakou la i Kapaliiuka, e nanea ana i na hoolauna maikai a na kamaaina o ia wahi, i hele ko lakou nei mau poo a "hiolo na wai naoa a ke kehau" me na papahi lei lehua.
         Ike aku la ka elele a Hikapoloa ia lakou la e noho ana, ka huli hoi mai la no ia a hiki ana imua o Hikapoloa, ninau mai la ua eueu nei, "pehea kau huakai i hele aku nei?" "Hiki aku nei au ilaila, e noho ana lakou la, e walea ana i ka pa kolonahe a ke ahiuhiu makani me ke aheahe onaona o ka uka waokele ; eia ka mea hou a'u i ike aku nei, he hookupu makahiki ka ka aha kanaka no Mailelaulii a me na kaikaina ona, he anana ka puaa, elima ka iako o ke kapa pa'upa'u, elima ka hulu o ka O-o, o ka'u ike ana aku nei ia i na hana o ka la," a pau ae la na olelo a ua elele nei o Kalaninalokulolu ia Hikapoloa.
          Pau ae la no hoi ka walea ana o ua poe malihini nei i na ea oluolu o laila, huli hoi mai la lakou a hiki hou ana io Hikapoloa la, ko lakou hale kipa, ka lakou kane hookane hoi ; nolaila, aole no i lilo keia olelo ana ia kakou he mau wahine nana. I ko lakou hiki ana i ka hale, ano hoopepe iho la lakou nei me ka hilahila ; kena mai la o Hikapoloa e komo aku aole o ka hoohilahila.
          Ma keia manawa no, pane aku la o Hikapoloa ia Mailelaulii, "e ke kaikamahine a Kailua me Holualoa, ua hilahila au no ko oukou kipa ana mai i ko'u wahi me kuu hookupu ole aku i na waiwai.
          Nolaila, aole au i manao he huakai kaapuni hookupu waiwai ka oukou no ka makahiki, a ma kuu hoouna ana aku nei i kuu elele e ukali aku mahope o oukou, a ike aku nei ia e hookupu ana na kanaka o Kapaliiuka ia oukou, nolaila, he hilahila nui ko'u e noho nei, a o ke aha la auanei ka'u hookupu ia oukou i keia manawa? Nolaila, e oluolu mai oukou e noho iki kakou, oiai, he wahi waiwai iki no ka'u e haawi aku ai no oukou, ke ae ia mai nae keia manao e oukou, ''a o ka pau no ia o na olelo a Hikapoloa.
          Ae mai la no hoi ua poe malihini nei e noho pu me ia nei, ia wa haawi aku la keia i ka waiwai, elima lakou nei, elima hale, hoonoho pakahi aku la keia ia lakou iloko o ua mau hale nei, a ai iho la lakou i ka waiwai i hookupuia; o Mailelaulii i ka hale mua, a pela aku, a o Kaulana kai ka elima o ka hale.
          Aia hoi ke hele aku nei ka la e napoo i ka ilikai, a i ka molehulehu loa ana, olelo aku la o Hikapoloa i na wahi kahuna ana, ia Homaikawaa a me Kuluaikapo, he wahi olelo ka'u imua o olua, e pono paha au ke hoihoi i na malihini i ka hale, he mea wai-a keia no kakou, ka hea ole i ka malihini e hoi i ka hale aole loaa ka mea e olelo ia ai i ka maka nanau, o ka pau no ia o ka Hikapoloa olelo ana ; ia wa, kamailio mai la na wahine hoowahine ana iaia nei ma keia manawa oiai lakou e luana ana.
          "O ko makou manao e noho nei kakou, e pono e mare olua me Kaulana i keia la, ke ae like nae olua, a o ka paa no ia o olua ma ke kaula maemae o ka hoao, (mare) nolaila, mai manao aku oe ia Mailelaulii o kau wahine ia e mare ai olua, he ui kino wale iho no aole he waiwai, a o ka hua pono keia ia makou e hai aku nei ia oe, o ka wahine waiwai no o Kaulana."
          Nolaila, e ae ana au i ka oukou olelo mai, eia nae ka hihia nui loa, aole i kupono i na makahiki he 20 e pono ai ka mare ana, aole no hoi i hala mawaho o na kapu o ka aina, wahi a Hikapoloa ; ke ike nei au ia Kaulana he uuku loa, me he mea la ua hiki i ka piha pono ana o na makahiki i ka 9, a he mea no paha ia e kanalua mai ai ke kahuna ; e ka mea e heluhelu ana i keia moolelo, e waiho kaua i ke kamailio ana no Hikapoloa a me Kaulana, e kamailio kakou no Mailelaulii me Hikapoloa, e like me ka mea i hoakaka mua ia ; ke hauoli kanalua ole nei kakou no na manao i wehewehe mua ia no ka hoopalau mua, nolaila ua ike no kakou, aia ka lou ana o ka makau i ka mea mua.
          Aia hoi ma kekahi ahiahi o kekahi la ae, akoakoa nui mai la na kanaka me na 'lii, a me ka poe maka hanohano, e makaukau ana no ka mare o Hikapoloa me kana Ewa, i ka wa i makaukau ai, ku mai la na mea e mare ana imua o ke kahuna nui, a hoopaa ia iho la laua ma ka hui lima ana a mare ae la ; hoi aku kela me keia i ko lakou wahi iho, pela no na mea mare i hoi mai ai.
(Aole i pau.)

—He omamalu na ao o ka lewa, aka, ke kiki mau nei na hou o na Ulele i keia mau la.