Ka Lahui Hawaii, Volume I, Number 52, 23 December 1875 — Page 1
KA LAHUI HAWAII.
"Ua mau ke Ea o ka Aina i ka Pono."
BUKE I .} HONOLULU, POAHA, DEKEMABA 23,1875. {HELU 52.
KA NUPEPA KA LAHUI HAWAII.
He pepa i hoopukaia i kela me keia he besdoma no na Ohana a me na Ekalesia Hawaii; he mea kokua i ka noho pono ana o na ohana, ka maluhia o kanaka, a me na pomaikai kino a uhane o ka Lahui Hawaii. "Aole paonioni; aole haanui; aole hikiwawe ka huhu; aole noonoo ino."
HOOKA HI DALA ka uku no ka pepa no ka makahiki hookahi. Hapa makahiki, Hapalua.
E hoouna mai i na leta no KA LAHUI HAWAII ia H. H. Paleka, Honolulu, Oahu.
Lan d of the Pilgim's Rest.
River of Life, p. 33.
1 Hoolana e na hoa luhi,
Ane pouli no,
A ma o ae o ka pouli
Kau ke alaula ma na puu.
He wa pokole a hee na aka
E kau ele nei,
A e ao loa'e me ka nani lani
Ma ka aina e maha ai.
Cho.—Aina uli a mau, a lai na puu,
Kahi e poai oli ai ;
A hea hui a mele mau mau a mau,
Ma ka aina e maha ai,
Maha a mau, maha a mau,
Ma ka aina e maha ai?
2 He wa pokole, naue, naue,
Naue oli ae,
Ke waiho nou he lei olino,
Na Iesu e haawi mai.
E naue, e kuu hoaluhi,
Naue pono n e.
Aia a po ae, e loaa ka maha
Ma ka aina e maha ai.
Cho.—Aina uli a mau, a lai na puu, & c.
3 I mau ke aho, e na kumu,
Ao, e ao a mau;
A ma o ae o Io redane.
Pau ka luhi, ka luuluu.
E hooikaika ma ka hana
Mai pauaho e
Ma ka home ao e hauoli oli,
Ma ka aina e maha ai.
Cho.—Aina uli a mau, alai na puu, &c.
HAWAII.
HE MOOLELO KAAO
NO KE
KEIKI ALII NIEDA!
KA PUAWAI LIONA O KE AUPUNI O KONA
MAKUAKANE
A ME KE PIO ANA O KE
KUPUA GOGONA LAUOHO NAHESA!
He Nanea no na Au i Hala.—Helu 25.
UA makemake ole ke koa e hooko i ka Nieda kauoha, aka, no kona hoomaopopo ana i ko ia la piha inaina, ua hiki ole iaia ke hookaulua iho. Aole no i liuliu loa, ua hoea mai la ke kaa, a aole no hoi i kali iho o Nieda, aka, kau koke aku la laua me kona makuwahine, a holo pololei aku la i ka halealii. Iloko o ka nawaliwali nui o Badusa i hoomanawanui ai, a hiki laua i ka ipuka pa alii. "E wehe i ka puka," wahi a Nieda i pane aku ai i ke koa kiai, a i ka hoomaopopo ana mai a ke koa i ka ole' ua hooko koke ia mai la. Iloko o na leo walohia o na kanaka ko laua nei hele ana aku, no ka mea, i ka ike ana mai o na kanaka i ke kino ano make o Badusa, ua hiki ole ia lakou ke uumi iho i ka inaina a ke paa mai hoi i ka hiolo a ka waimaka ; a hoomaka mai la lakou e hookeke, me ke ake e komo i ka pa alii. Lawe pololei aku la o Nieda i kona makua a ku iho la mamua pono o ke anaina, kahi hoi a ka Moi me kona mau ukali e noho mai ana. Pii ae la ka ula ma na kumu pepeiao o ka Moi, a ano haalulu kona mau kanaka i ka ike ana mai i ka Nieda hana. Lele mai la o Babela imua, a pane mai la ia Nieda, "O ko kaua makua anei keia?" "Oia, e kuu hoahanau, o ko kaua makua keia!" Lele aku la ia a honi iho la ia Badusa, a huli mai la a ninau ia Nieda no ke ano o kana huakai, a me na mea a pau e pili ana i ko Badusa hoopaaia ana i ka hao. Mahope iho o ka lohe ana o kana aikane i ka moolelo, ua hooholo iho la laua e ninau aku i ka moi i kona manao. "Aole anei ou manao e ka Moi, ua hana oe i ka hana hoomainoino maluna o ke kino o ko maua makuahine," wahi a Babela. "Ua lawa ko olua kamailio ana, ke manao nei au ua uhaki olua i ka maluhia o ke aupuni, ma ke kii ana aku a hookuu akea i ka paahao, me ke noi mua ole mai i ka mea nona ka mana e hiki ai ke mukiki aku i ko olua koko. Nolaila, e make olua e pono ai,' a huki ae la ia he pahikaua nui launa ole mai kona puhaka ae, a hoomoe mai la me ka ikaika maluna o ko Nieda poo, aka, mamua ae nae o ke ko ana o kona manao, aia hoi, ua pale ae la o Nieda, a pane aku la, "E kali kou inaina e ka moi!" Aole nae i hoolohe ka moi, a hahau hou mai la oia. Hoomaka mai la na ukali o ka moi e pihoihoi, huki ae lakou i ka lakou mau pahi, a o ka hoomaka iho la no ia o ka haunele. Lele mai la lakou a pau me ka manao e pepehi a lawe pio ia laua nei, aka, ua paio hoomanawanui aku la laua nei. Me ka hahana ko laua paio ana, a hala he mau minute loihi wale ; ua haule aku la i ka papahele he lehulehu wale o na ukali o ka moi e mokaki ana, a ua hoomaka mai la ke ano nawaliwali o Nieda a me Babela, a ua ano e pio malalo o ke alii i ka ua mea o ke aluka i ka lehulehu loa o kela aoao. Ua pa mai la o Nieda i ka pahi a kekahi, a ua haule maule aku la. O Babela, ua piliwale aku la ia. Ua pii ae la ka wela o ka inaina o ka moi, a ua paa hoi kona manao e make laua nei. Holo mai la ia me kana pahi a hapai ae la, a o ka hoomoe iho koe maluna o ke poo o Badusa, ka makuahine o Nieda, aka, ua ike mai la o Nieda, a e like me kahi ikaika uuku i koe iho iaia, pela oia i hoomanawanui mai ai. Lele mai la ia, a ku iho la mawaena o kona makuahine a me ka moi, huli aku la kona mau maka a kau pono aku la maluna o ke kino o kona enemi, a haawi aku la i ka hua o ka paio. Huli ino mai la ka moi, a hoomaka iho laua me ka hahana nui e paio. Ua nawaliwali loa iho la o Nieda, a ua hiki ole iaia ke ku loihi loa, a hahau'ku la ia no ka manawa hope loa maluna o ke kino o ka moi. Pale ae la ua moi nei, a hehee iho la o Nieda maluna o ka papahele no ka paupauaho; a pela laua i pio ai. Hoopaaia mai la ko laua mau lima a me na wawae i ke kaulahao, a o Badusa hoi, ke hoomakaukauia mai la e make. Ua pau ka manao ana ae no ke ola, aka, aole i holopono loa na manao ino o ka moi, aia hoi, ua lohe ia'ku la ka leo uwa nui o na kanaka mawaho o ka ipuka pa, a ano kaumaha ke ea i ka ua mea o ka hauwawa o na leo. O ka make wale no koe o Nieda ma, ke waiho mai la lakou maluna o ka papahele, e kali ana no ka hiki mai o ka manawa. Iloko nae o keia ano pilikia o lakou, aole loa i hoike mai ko Nieda mau helehelena i kahi ano pihoihoi a hopohopo, a me he mea paani wale la no iaia.
Kokoke mai la ka leo uwa, loheia'ku la ke kani o na pila a me na pahu, a he manawa pokole, na hamama ae ka ipuka nui o ka pa alii, a komo mai la he puali koa nui i alakai ia mai e kekahi kanaka ano a oo. I ka ike ana o ka moi i keia mea, ua kahaha oia, a ano haohao loa i keia mea me ka nauki. Maki mai la ua puali nei a hoopuni ae la i ka hale alii, a hele mai la ke kanaka ano a oo nana i alakai mai i ua puali koa nei, a pane mai la me ka leo kalakala. "Ua hai ia mai nei ia'u, ooe ke Alii, ka moi hoi o keia aupuni." "Ae! owau io no, a ano e hai mai oe i kou makemake!" wahi a ka moi. "Ua hele mai nei au mai ko'u aupuni mai, he aina mamao loa mai keia wahi aku, ua lukuia mai nei e a'u a ua neoneo ka papalina o ka honua, ma ko'u ala i hele mai nei. Ua hoohiki au, aole e pau ko'u luku ana a hiki i ka laweia ana'ku o ko'u ola kino, no ka mea, ua aihueia mai ko'u poli'ku ka'u wahine, a me ka'u keiki. He mau makahiki loihi ka i hala ae nei, a aole nae laua i loaa. Nolaila, e lohe oe ano, a e pane koke mai. Owau no keia o Laboda e ku aku nei imua ou, ua piha i ka inaina, a e hoike mai oe i kekahi mea e pili ana no ka'u wahine a me ka maua kamalei aloha he keiki,—o uhi iho auanei ka lepo uliuli o ka ili honua maluna o kou kino."
I ka lohe ana o Nieda i ka leo o kona makua, a me ka hoomaopopo ana'e hoi i kana mau huaolelo aloha; ua hoomaka hou mai la ke kolo ana o ke anu maeele o ke aloha makua a puni kona kino, a e like me ka ikaika o kekahi holoholona hihiu, okalakala ae la ka lauoho o kona poo, a ooi pololei mai la kona mau lihilihi, a o kona mau maka mohaha, ua like me he mau onohi liona la, a anapa mai la ka ula uila o ke ahi inaina. Me ka inaina nui oia i oni ae ai a lele mokaki aku la ke kaulahao i hoopaa ia ai kona puhaka, a paapaaina aku la ma o a maanei o ka papahele, a ku hou mai la o Nieda e like me kona ano koa mau, a pane mai la imua o kona makua. "Eia au e Laboda kuu makua aloha. He oiaio, ua hiki mai oe i ka aina o ke kanaka puuwai eleele, a ua ike hoi i ke kulana o kau keiki a me ko'u makuahine, aka, ke hai aku nei au imua ou e kuu makua, imua o ka lehulehu, a imua o ka mana o na lani, aole i pio o Nieda, aole hoi i komo mai kekahi kumu e hopohopo iho ai no ia mea. Ua kali au no kou hiki mai mamua o ko'u hooko ana i ka'u mea i hoohiki ai, oiai, ua moeuhane iho la o Babela ma ka po inehinei, a ua ike aku la i ka puali hanohano nui o Laboda e hele awiwi mai ana." (E hoomaopopo e ka poe heluhelu, ua ike mua o Babela i ka huakai o Laboda ma ka moeuhane, a oia ko laua mea i ae ai e hoopaaia i ka hao, no ke kali ana a hoea mai oia, alaila hooko i ko laua makemake.)
"Ano, ke peahi nei ke ahe makani o ka hauoli ma ko'u mau papalina, ke ike nei au i ka hoi hou mai o ka noonoo kanaka, a ke oni nei na aa koko o ko'u kino holookoa." Lele mai la ia e apo mai i kana keiki, aka, kau aku la ka lima o Nieda, a pane aku la, "E hauoli e kuu makua, a mai ae i ke kaumaha e hoolauwili i kou noonoo. E ae mai ia'u e hooko i ka'u mea i lawe ai i ka hoohiki paa, a e hookuu mai hoi ia'u e hoike'ku imua ou i ka hoopai kupono i ka mea nana i hoopaahao, a i hana ino hoi iloko o ka inea i kuu makua."
Huki ae la ia i kana pahi, a huli aku la imua o ka moi, a pane aku la: "Ano, e hoomaikai aku oe i ke aloha o na lani, no ka hope loa. E kau aku i kou mau maka maluna o na hiohiona o kou hale alii nei, no ka mea, ano e haule ana ka makakila a Nieda maluna o kou hokua, a e nele ana hoi keia lahui kanaka i ka moi ole." Lele mai la ka moi me ka manao e hou i kana ihe oi winiwini, aka, he manawa pokole, ua hala aku la ia. Ua halawai aku la ka oi o ka pahi lanakila a Nieda me ka ikaika ma ka hapalua o kona kino, a waiho kaawale ae la maluna o ka papahele. Oni aku la o Nieda imua e kamoe ana i kana pahi ma o a maanei, a helelei aku la na ukali o ka a moi make mamua o ia nei. Akahi a ikeia ka wiwo ole o ke keiki alii Nieda ; ke hoomoe ia mai la na ihe a me na pahikaua he lehulehu, aka, ua lilo i mea ole, a iloko o ka manawa pokole, ua neoneo ae la ka hale alii, a e waiho mokaki mai ana hoi na kino make ma o a maanei.
Haawi aku la o Nieda i ka olelo kauoha e wehe akea ia ka ipuka o ka hale alii, a e hookuuia na kanaka a pau e hele mai a e halawai me ia. Ua hooko koke ia keia kauoha. He manawa pokole ua laulaha aku la ka lono a puni ka aina, e ahai mama ia ana e ka welau makani a loaa ka lohe i kela a me keia kanaka. "Ua make ka moi opu ino, ua palekahana i na makaainana, a e ola ka Moi opio, ka Lani Alii hou hoi o kakou, o Nieda ke Koa Hiwahiwa o ka Lanakila!" E kowelo ana na hae, e ahaaina ana ka lahui, e kani ana na pila a me na pahu, a ua auau iho la ka aina holookoa i ka hauoli, no ka noho Moi ana o Nieda maluna o ke aupuni.
"Ano e na makamaka," wahi a Nieda imua o lakou, "Ke ike nei oukou, ua hooko au i ka inaina i noho iloko o ko'u puuwai no na la i hala ae nei, a ke hai aku nei au, aole i pau, aia wale no a haule pio na ukali a pau o keia moi. Nolalia, o ke kanaka a mau kanaka paha o oukou i manao e paio mai ia'u no keia luku ana a'u, e hele mai la ano, a e paio koke aku au."
(Aole i pau.)