Ka Lahui Hawaii, Volume I, Number 51, 16 December 1875 — Page 1
KA LAHUI HAWAII.
"Ua mau ke Ea o Aina i ka Pono."
BUKE I.} HONOLULU, POAHA, DEKEMABA 16, 1875. {HELU 51.
KA NUPEPA KA LAHUI HAWAII.
He pepa i hoopukaia i kela me keia he besdoma no na Ohana a me na Ekalesia Hawaii; he mea kokua i ka noho pono ana o na ohana, ka maluhia o kanaka, a me na pomaikai kino a uhane o ka Lahui Hawaii. "Aole paonioni; aole haanui; aole hikiwawe ka huhu; aole noonoo ino."
HOOKA HI DALA ka uku no ka pepa no ka makahiki hookahi. Hapa makahiki, Hapalua.
E hoouna mai i na leta no KA LAHUI HAWAII ia H. H. Paleka, Honolulu, Oahu.
The Shining Ones.
River of Life, p. 33.
1 Ma o ae, ma o ae la ka aina ao,
Kauhale aulii me na lamaku mau.
Kuu home no nei, a e noho au
Me na kini lai o ke ao ma o.
Cho—Ma ia home aulii, ma ia aina ao,
Kau no a mau na lama kamahao.
Komo auanei au,
A e noho oli mau
Me na kini lai o ke ao ma o.
2 Naue ae, naue ae i ka aina ao,
I kauhale lai, i kauhale nani mau ;
He gula na pa a e kaa mau au
Me na kini lai o ke ao ma o.
Cho—Ma ia home aulii, &c.
3 Kikoo ae, kikoo ae, ua kokoke no
Ia aina aulii, ia kauhale ma ke ao.
A e kau mai na lei, a e mele au
Me na kini lai o ke ao ma o.
C ho—Ma ia home aulii, &c.
4 Oli e, oli e, ke hoea mai
Na puu uli e o ia aina aulii,
A e hui pu au, a e poai mau
Me na kini lai o ke ao ma o.
Cho—Ma ia home aulii, &c.
HE MOOLELO KAAO
NO KE
KEIKI ALII NIEDA!
KA PUUWAI LIONA O KE AUPUNI O KONA
MAKUAKANE
KE ALII KA MOI LABODA!
A ME KE PIO ANA O KE
KUPUA GOGONA LAUOHO NAHESA!
He Nanea no na Au i Hala.—Helu 24.
I KA pau ana o ka ka Moi mau olelo, ua pii ae la ka huhu o Nieda a me Babela. Huki ae la o Babela i kana pahi a hou iho la i ka honua, a o Nieda hoi owini ae la i kana pahi makakila i ka makani, a pane mai la: "Ua hooko ia kau kauoha, a o ka makana iho la anei keia? Ke hoohiki ae nei au imua o na lani, aole loa au e hele hou aku ma kekahi huakai o ia ano, aka, ke kauoha aku nei au imua ou e ka Moi opu ino, ka mea hoi nana i hoomainoino ke ola o ko'u makua me ke kumu ole, e hookuu lanakila mai iaia i keia manawa ano, o hoopaa ia oe a hiki i kou make ana ma kona wahi." Me ka inaina o Nieda i pane mai ai. Lele mai la o Babela imua me ka oi o kana pahi i hoopololei ia i ka Moi, a pane ae la, "O kona makua o ko'u makua no ia. Ua ike au i ke ano o kau mau hana hoomainoino maluna ona, he mea hiki ole ia oe ke huna, a ina oe e hoole mai i ke noi a kana keiki, ke alii oiaio hoi maluna ae o kou kulana, ke hai aku nei au, mamua o ka puka ana mai o ka huaolelo hoole mai kou waha mai, e halawai ana ka oi a ka makakila o ka waoakua me kou i-o, a e pau kou noho ana ma keia ao."
Ku iho la ka Moi me ka naka o kona kino, a haalulu kana mau huaolelo. "Aole au i hana ino aku i ko olua makuahine, aka, oia ka i hana ino mai ia'u. Ua hoao ia e hoohulihuli i ka manao o na kanaka mahope ona, e kipi mai ai lakou ia'u a haulehia hoi ko'u noho Moi a me ka maluhia o ke aupuni," wahi a ua Moi nei me ka maalea nui.
Huli koke ae la o Nieda i kekahi o na alii koa e ku koke mai ana, a pane aku la, "Ano, e lawe koke aku ia'u imua o kuu makuahine ; ano, e hoike mai ia'u i kona keena i hoopaa ia ai, no ka mea, ina ua hewa io kuu makua, alaila e make au malalo o na kapuai o ka Moi."
Kauoha aku la ia ia Babela e noho malie, a e kali hoi iaia, a huli hoi koke mai ia. Ua lohe aku la ke koa i ka olelo kauoha, a ua hiki ole iaia ke aua, a hoolohilohi iho. Kaha aku la kona mau kapuai wawae e hele, a ukali aku la no hoi o Nieda mahope. Kaalo ae la laua mahope o ka hale alii, a ku iho la mamua o kekahi ipuka hao nui, me na ami laka eono. Unuhi ae la ua alii koa nei i na ki eono, a wehe ae la. I ka hemo ana o ua ipuka nei, aia hoi, ua holo mai la na ea polopolona kupono ole i ke kanaka ke honi aku mailoko mai o na keena; ku iho la o Nieda me ke ano kahaha, "O ka lua kupapau anei keia i kanu ola ia ai kuu makuahine?" wahi ana iloko iho ona. Hele pololei aku la ke koa a hahai aku la no keia a hiki i ka ipuka o ka rumi hope loa, oia hoi ke keena pouli loa oloko o ka hale paahao.
"O kou makua, eia oia maloko o keia keena. He mau makahiki loihi kona noho ana maloko o keia wahi. Ano ke haawi aku nei ou ia oe i ke ki, a ke imi aku nei hoi e kala mai ia'u mai ka ike ana aku i kona mau helehelena hoomanaonao, a me ko olua hui ana," pela ke alii koa i pane mai ai iaia nei me ka hawanawana.
"Heaha kou kumu e hawanawana mai nei," wahi a Nieda. "He makau anei? He oiaio anei o oe kekahi puuwai eleele nana i kokua na manao ino o ka Moi? Aole loa kuleana o kela kapa koa maluna ou, oiai, he hohe wale, a he kuemi hope hoi ka manao. Aole! Aole! e lalau aku kou lima, a e komo pu aku kaua, a aole hoi oe e haalele i keia keena, ke ole au e ae aku."
Wikiwiki ino aku la ke koa e wehe i ka ipuka me kona lima haalulu, a i ka hemo ana mai, auwe! weliweli ka mea i halawai me ka ike a ko laua mau maka. Aia maluna o ka pohaku papahele e waiho ana kekahi wahine, o ka iwi wale no koe, ua hihia kona lauoho, weluwelu kona aahu, a me he la, he puu opala. Pae ae la o Nieda i kona puhaka me kona mau lima a nihi malie aku la. Ua komo mai la ke anu huihui iloko ona, a pane ae la, "Ma ka nanaina o kona ano e waiho nei, me he la, ua nele ia i ka hanu ole, aka, ke ike nei no nae au i ka nawe malie o ke aho." Kau iho la kona papalina pumehana maluna o ka helehelena o kona makuahine, kulu makawalu iho la na waimaka aloha, a pane iho la ia : "E kuu mama! E kuu mama hoi! He oiaio anei ua nalo aku kou leo nahenahe? He oiaio anei, e pau ana ko kaua hui hou ana ma keia ao? E mama, eia wau, eia o Nieda kau keiki i hiipoi ai iloko o na la o ka inea ; Auwe au—E mama! Ua haalele mai anei oe ia'u? E kuu makuahine, eia kau keiki, e lokoino mai ana anei oe ia'u?" Lalau aku la kona mau lima i ke kaulahao, a me ka inaina i huki mai ai. Hahaki ae la a lele liilii ke apo hao ma kona puhaka a me kona mau wawae. Honi iho la i na papalina huihui o kona makua, a hookuu mai la na punawai o kona mau onohi i na kulu wai luuluu o ke aloha.
Ua pauhia loa ia kona makua iloko o ka hihio hiamoe; aka, i ka pa ana iho o ka hihio hiamoe; aka, i ka pa ana iho o ka ili o kana keiki aloha i kona, ua puoho ae la ia. Haka pono mai la kona mau maka maluna o Nieda ; huli aku la a ike i ke koa, a pane mai la, "Ua makaukau au i na o ko'u manawa keia, a i na i kii ia mai nei au no ke kau ana mai o ka make, alaila, e awiwi, a hala koke aku au ma kela aoao."
"Aole oe i kii ia mai nei e ka make ; aka, ua kii maila o Nieda kau keiki ia oe, ano e lanakila, a ano e hauoli."
Puoho ae la ia, ku ino ae la iluna, a haka pono mai la iaia nei. "He oiaio anei keia? a he moeuhane anei? Ke ike nei au i na hiohiona, a ke lohe nei hoi i ka leo aloha o ka'u keiki ; aka, ua ane hiki ole ia'u ke hooia iho iloko o'u no kona pakele ana, E hai mai, o oe anei kuu keiki, o Nieda no anei oe, ka mea a'u i hoomanao nui ai."
"Oia no!" wahi a Nieda, a apo aku la ia i ke kino nawaliwali o kona makuahine, a uwe iho la laua ma ke ano aloha kupouli o ka makua me ke keiki. Kau aku la na maka nawaliwali o Badusa maluna o kana keiki, me ke kulu makawalu o ka waimaka a pane aku la, "Iloko o kau huakai, iloko paha o ka ino a me ka inea a kuu keiki i alo aku nei, ke ike nei au i ka mau o ka mohaha o kou mau papalina, a me ka nani o kou mau helehelena. Ua hele aku oe a ua haalele iho ia'u mahope nei me ka ukana luuluu a kaumaha no hoi he aloha, aka, ua hoomanawanui au, a ua noi mau aku me ka naau haahaa i ke aloha o na lani e nana aloha mai i ka'u keiki. Ua noho au he mau la wale no mahope iho o ko kaua hui hope loa ana, a haalele mai oe ia'u e noho hookahi, a oiai hoi au iloko o ka u a me ke kaumaha nou, aia hoi, ua kii ia mai la wau e na lima menemene ole o ka manao ino, a hoopaa ia iho ma keia keena me ke kaula hao nui i hoopaa ia ma ko'u puhaka a me ko'u mau wawae. Ua noho au me ka hoomanawanui iloko o na makahiki loihi ; ua kau ia mai maluna o'u na hana ino a pau a ke kanaka e manao ae ai, ua noho au iloko o ka inea a me ka ehaeha ; a ua pau ka manaolana, ua aneane e haulehia, a e kali ana no ka lawe ia aku o ke ola. E kuu keiki, kuu mea aloha hoi, eia au, au e ike mai la, ua aneane e nalo na helehelena kanaka, aka, aole i poina ke aloha nou, aole hoi i hoopalaka ke noi ana aku i ke aloha o na lani."
"E kuu makua," wahi a Nieda i pane aku ai me ka leo aloha, "He oiaio, ke ike nei au ma na mea imua o ko'u maka, o ka make keia iloko o ke ola. Ua wela au i ke aloha nou, a ua wela hoi i ka inaina no ka mea nana keia mau hana ino i kau mai maluna o kou kino. Ua piha au i na manao e hai aku ana ia oe, aka, he manawa okoa aku ka wa kupono no ia mea. Hookahi nae a'u mea hai aku ia oe, ua lanakila kau keiki ma kana huakai, ua pio ke kupua lauoho nahesa, ua manele ia mai ia poo a waiho imua o ka Moi ; a ua makaukau au e lawe pio i ka Moi a kau aku i ka hoopai kupono maluna ona ; aka, ua hai mai kela, ua hoopaa ia oe mamuli o ka hewa hoao e hoala i ke kipi maluna o kona aupuni. E hai pololei mai e kuu makua aloha ; he oiaio anei ua hana oe pela?"
"I lohe na lani, a e make hoi au, e kuu keiki, ua hoopaa ia wau i ka hao me ke kumu ole. Aole loa i komo mai ia manao iloko o kou makuahine nei ; o ka lahuikanaka holookoa ko'u hoike, a na ke ao hoi e hooia mai."
"E haki ana ke kaula hao o ka mana o keia Moi, a e nakulukulu ana hoi kona noho alii."
Me ka inaina nui o Nieda i ku ae ai a hoopuka i keia mau huaolelo, kauoha aku la i ke koa e kii aku i ke kaa, oiai, ua nawaliwali loa kona makuahine. Hala aku la ke koa, a hahai aku la o Nieda i ke ano o ka manao o ka lahui, a me kana mau hana i manao ai. Ua hai pu aku no hoi ia no Babela. I ka lohe ana o kona makua no na mea e pili ana i ko Nieda manao, ua hoao aku la ia e hoopau ia manao, aka, he kanaka manao paa o Nieda, a ua hiki ole ke hoopau ia.
(Aole i pau.)
Lehulehu wale na mele e hakuia mai nei e ka poe i manao iho ia lakou he akamai, a e mele ia mai nei hoi e ka poe i manao he leo nahenahe ko lakou ; aka, ma ka makou hoolohe aku, me he la, ua haule ka hapanui, a i ole o ka huina holookoa no paha malalo o ke kaha ku i ka maemae a mahalo ia. He oiaio, o ke mele, oia kekahi o na punawai hoohauoli i ka naau o ke kanaka, aka, o na mele me na huaolelo ano ole a lapuwale hoi, e pili ana i na mea kupono ole, he kahawai hoalala ia i ka manao e hooko i na kuko haumia. Nahenahe ka leo o kekahi poe opio i kekahi o keia mau po iho nei, me he la, ke hoolohe aku, ua hele a kakau na kani a-i i ka hooikaika e lohe pono ia na huaolelo haumia, aka, i ka hoomaopopo ana iho, ua ano ole, a ku hoi ka hoowahawaha.