Ka Lahui Hawaii, Volume I, Number 50, 9 Kekemapa 1875 — Page 4
Na Ekalesia o Kawaiahao a me Kaumakapili.
Halawai kakahiaka, la Sabati .... hora 10½
Halawai po ..... hora 7½
Halawai Apana auina la ..... hora 3½
Kula Sabati ..... hora 9½
NA KULA SABATI.
NA HAAWINA.
Dek. 26. —Ka Oihana a Iesu.—Ioane 20:31.
31 Aka, ua.palapala keia mau mea i manaoio ai oukou, o Iesu ka Mesia, ke Keiki a ke Akua; a i ko oukou manaoio ana, i loaa ai ia oukou ke ola ma kona inoa.
———:o:———
KA WEHEWEHE ANA.
Ua kapa ia keia Haawina, ka hoi hou ihope. Ka haawina hope keia o ka mak. 1875.
Ke kumu o keia hoi hou ana ihope. Ka Oihana a Iesu. Wahi a Ioane. Ua nui na hana mana a Iesu i hana ai imua o kana poe haumana, aole i kakau ia maloko o keia buke, oia hoi ka buke a Ioane i kakau ai. Aka, ua kakau ia kekahi mau mea, mau hana, mau olelo, mau wanana.
Elua mahele nui o keia pauku Baibala.
1 Na mea i Palapala ia.
2 Ke kumu o ka Palapala ana.
1 Na mea i Palapala ia iloko o Ioane no Iesu.
E ala mai na haumana makua, a me na haumana keiki, e noonoo a hoopuka pololei mai i na haina.
Ko Iesu ano mua, heaha? Ma hea? Me wai? Owai? 1:1, He aha kana i hana ai i kinohi? 1:3. Kin. 1:1. Ke Akua ka Logou, like pu anei? Noho no ka Logou me ke Akua a loihi loa, a mahope lilo oia i aha? 1:14.
Na Kamalii. —He keiki anei o Iesu e like me na keiki hanau hou a oukou, e ike maka nei? Mahea ka like ole? Aole ona hewa iki. Pehea na keiki e ae? Owai kona mau makua? Mahea Iesu i hana ai? Owai ka i ike maka ia Iesu a hai i kona nani? 1:14. Heaha ka Ioane olelo nona? 1:29.
Owai na haumana mua a Iesu? 1:40, 41 44, 46. Kapa oia ia Simona. Owai? 1:42. He aha kana olelo no Natanaela? 1:47, 48. Heaha ka Iesu olelo wanana? 1:51.
Ka hana mana mua a Iesu, ma hea? he aha? ua aha ka wai? 2:9. He aha kekahi hana kupanaha ana ma ka luakini? 2:14 —16. Kekahi wanana no kona kino, heaha? 2:24, 25.
Na Makua. —Ka Iesu kamailio kupanaha me Nikodemo, heaha? 3:5, 6, 8, 13, 14—21, 36. Iesu me ka wahine no Samaria, mahea? Heaha ke kamailio kupanaha ana? 4:5—7, 9, 10, 13, 14, 16—18, 23, 24. Heaha ka Iesu hana kupanaha no ke keiki a kekahi alii? 4:46, 50, 51. He kanaka mai a loihi loa, aia mahea? Heaha ka Iesu hana iaia? 5:2, 5, 8, 9. Na wanana a Iesu ma 5:25, 28, 29, hai mai, me ka pauku 39.
Ka hanai kupanaha i ka lehulehu, ma 6: 9 —13, hai mai; hai mai, hai p. 27, 35, 51. Hai mai i ka Iesu olelo no ka mea makewai, 7, 37, 38, me kana olelo no ka wahine moekolohe 8:11, a me kekahi mau olelo no na Paresaio, 8:23, 24, 44, 56—58.
Na Kamalii. —No ka Iesu hana i kekahi makapo, heaha ia hana? 9:6, 7. Hai mai i kekahi mau olelo no ka pa hipa, kekahi hipa, 10:9-11, 14, 15—18.
No ka maI, ka make, ke ala hou ana o Lazaro, hai mai, 11:1, 14, 25, 35, 39 —44.
Ke Kala a pau. —Kekahi olelo a Iesu no kona kaulia ana, hai mai 12:33. Hai mai i kekahi mau mea e pili ana i ka ahaaina barena hu ole hope—kekahi hana haahaa a Iesu, 13:4, 5. Me kekahi mau olelo ana ma ke keena ahaaina, ma ke alanui, ma ka mala o Getesemane, ma ke kea, mahope o ke ala hou ana, ia Maria, ia Toma, ia Petero, ia Ioane? 14: 1, 2, 3. 15: 1—6, 16: 7—11, 17: 9, 15, 19: 25—27. 20:15—17, 19, 21—23, 26, 27, 29. 21:6, 15—18, 22.
2 Mahele Alua. —No ke aha i palapala ia ai keia mau mea? 20:31 A pehea? ke manaoio nei anei oukou, o Iesu no ka Mesia, ke keiki a ke Akua? A ke manao nei anei e loaa ana ke ola mau loa ia oukou ma o Iesu la? Heaha ka oukou e hana ai i ola mau?
Haawina no Ian. 2, 1876 —I Sam. 15:10—23.
He moolelo no Paulo.
HELU 14.
No ka haaheo o ka naau o ka poe Helene, ua manaoio lakou, he okoa loa ko lakou hana ia ana mai ko na kanaka e ae a pau, a ua maa no hoi lakou e kapa aku i na lahui e ae a pau, he poe Babariana (hupo,) aka, hoike aku o Paulo ia lakou, ua hana mai ke Akua hookahi koko no na lahui kanaka a pau loa. A no ia mea, he pono ia lakou e huli, a e imi aku i ko lakou mea nana i hana, a he mea no hoi oia i kokoke loa mai ia kakou pakahi a pau; maloko ona e ola nei kakou, e hele nei, a e noho nei. He oi aku nohoi ka launa kokoke loa ana mai o ka mea nana i hana me ka poe i hana ia, e like la me ka makua i ke keiki. "No ka mea, he poe keiki kakou nana."
He mau huaolelo mele keia i lawe ia mailoko mai o kekahi mele a Arato, kekahi haku mele Helene e ola ana iloko o na makahiki 200 a keu mamua aku o Paulo. Ma ko kakou ano he mau keiki na ke Akua, aole pono ia kakou ke manao iho, ua like ke Akua me na kii gula i hana ia, a o ke dala paha, a i ole ia o ka pohaku. Ua piha ko Atenai i na kii akua o keia mau ano. O ka like ana o ke kanaka me kona makua lani, he like ana ia ma ke ano uhane —ma ka hemolele, ke aloha, me ka oiaio. Aka, ua hoomanawanui mai no nae ke Akua i na manawa o keia noho naaupo ana, a hiki mai la i keia wa, i hoolaha ia ai ka Euanelio, kauoha mai la oia i na kanaka a pau ma na wahi a pau ma na wahi a pau loa e mihi. A o keia kauoha ana e mihi, ua hooikaika ia mai la ia ma ka hoike pono ana mai, ua koho mai ke Akua i la e hookolokolo ai oia i ko ke ao nei me ka pono, ma o ke kanaka la ana i wae mai ai—oia hoi ke kanaka akua i ike ole ia e na poe e hoolohe mai ana ia Paulo; a o ka mea hoi ana e hoike aku nei ia lakou. I kona wa i olelo aku ai ua hoala mai ke Akua iaia mai ka make mai, ua hookae ia mai la oia. Aole lakou i manaoio no ke ala hou ana, a aole hoi lakou i hoolohe hou mai i kana olelo. Ua hoohenehene mai la kekahi poe, a olelo mai la hoi kekahi poe e hoolohe hou iaia.
He uuku loa ka poe i huli mai ia Paulo ma Atenai. Elua wale no mau inoa i hoike ia mai, o Dionusie no Areiopago, a o kekahi hoi o na lunakanawai o ka Aha o Areiopago, a me Damaria he wahine.
I ko Paulo wa e kakali ana no Sila a me Timoteo i hoeueu ia ai kona naau, a i paio aku ai hoi ia me na poe ake akamai. Ma Tesalonike 3:1, 2, me he la ua halawai pu mai no o Timoteo me ia, mamua paha, a i ole ia, mahope iho paha o kona kamailio ana ma ka puu o Maresa, aole i maopopo; a no kona ake nui loa e lohe i ko Tesalonike poe, ua hoouna aku la oia ia Timoteo, e ike i ke ano o ko lakou noho ana ma ko lakou no Karistiano, "me ka manao ana he pono ke waiho oookahi ia (o Paulo) ma Atenai."
Mahope iho o kekahi manawa, haalele iho la o Paulo ia Atenai, a hele aku la i Korineto. He poe molowa ko Atenai ; hoopaapaa wale ko lakou poe ake akamai, a o na kanaka hoi he puni kamailio. O Korenera ke kulanakauhale poo aupuni, a me kahi kalepa nui o Helene, a ua oi aku no hoi ka mikiala hana, a me ka hoohoihoi hana o ko laila poe kanaka mamua o ko Atenai. He mea kokua nui ka mikiala hana i ka noho maikai ana o na kanaka, a me ka hoomana Akua oiaio mamua o ka palaualelo. Ua kaulana no hoi o Korineto no hoi o Korineto no kona mau hewa a me ka ino, aka nae, i ka hai ia ana o ka Euanelio he mau hopena ano nui ka i loaa mai maanei i oi loa aku i no Atenai.
Mahope koke iho o ko Paulo hiki ana aku i Korineto, ua hoolauna aku la oia ma Akula, a me Perisekila, o ko laua hiki ana mai no ia mai Roma mai, ua kipaku o Krlaudio, ka Emepera o Roma i na poe Iudaio a pau ma ke kulanakauhale. Ua hoike ia mai e Suetonio, kekahi kanaka kakau moolelo o Roma, i kipaku o Kelaudio i na poe Iudaio no ko lakou hoohaunaele mau. Me Akuila a me Perisekila i noho ai o Paulo, a me laua no hoi i hana pu ai oia ma ka oihana hana hale lole. Aole i makemake ka Lunaolelo kaulana e noho wale, a ua olelo pinepine mai oia maloko o kana mau palapala, no kona hana ana me kona mau lima ponoi, a ua "olelo mai no hoi oia, ina aole e hana kekahi, aole hoi ia e pono e ai." (II Tes. 3:10.) Ua hana o Paulo i kumu hoohailike nona iho, a no ka mea hoi, aole hoopaa ia kana poe Karistiano i hoohuli a e kokua mai i kona mau hemahema a pau (II Tes. 3:8, 9.) (E nana ma Luka 10: 7 a me 1 Kor. 9: 11.) A oiai e hana ana oia no na la eono o ka hebedoma, ma ka la Sabati i hai aku ai oia i ka Euanelio maloko o ka hale halawai, i na poe Iudaio a me na kanaka e. Ma keia manawa i kakau ai o Paulo i kana Episetole mua i ko Tesalonike, mamuli o na mea i hoike ia mai iaia e Timoteo na ko Tesalonike; me he la o ka M. H. 52 ia. He manao ikaika loa kona, a oiai e hana ana ia me kona lima, e hoomanao aloha ana oia no kana poe i hoohuli ai ma na wahi he nui o Asia a me Europa, e pule mau ana no lakou, a e kakau pinepine aku ana hoi ia lakou. Me he la he mau Episetole e ae no kekahi ana i kakau ai, aole i malama ia a hiki i keia wa. Pela i hana pono ai oia, oiai e hana paka ana me kona mau lima, e waiho mai ana hoi i kumu hoohalike maikai no na mea a pau e hoomahui ai; e hai aku ana hoi i ka olelo, i ka wa kupono e loaa ai iaia, a e kakau aku ana i na Episetole i na Ekalesia, a me na poe e ae.
I ka wa i hiki mai ai o Sila a me Timoteo mai Makeaonia mai, iho la laua, e hooikaika loa ana ka lunaolelo ma ka hai ana aku i ka Euanelio, (Oihana 18:5) e hoike aku ana i na Iudaio no Iesu, oia no ka Mesia. Ma keia manawa ua kue wiwo ole mai la na Iudaio, a ua ike ia hoi ma o ko lakou olelo hoino ana, he mea makehewa ka paipai hou ana aku ia lakou. Nolaila, ua lulu ae la o Paulo i kona kapa komo, a kamailio mai la i na Iudaio ma o na olelo ao la a Ezekiela, "Aia maluna o ko oukou poo iho ko oukou koko;" "Ua maemae au, ma keia hope aku, e helu au i ko na aina e."
I ka wa i kono ia mai ai o paulo e haalele iho i ka hale halawai no ke kue ia mai e na Iudaio, ua hoohamama mai la o Iouseto i kona hale i wahi e halawai ai, he kanaka haipule oia, aole nae he Iudaio, a ua kokoke no hoi ua halo nei i ka hale halawai. I ka wa o ua poe hookeikei haumana nei na Mose (Io. 9:28) e hele ae ai i ka hale halawai me ko lakou naau hoomana ole, a e hailiili ana i ke Kaula ia Mose i hai mua mai ai (Kanaw. 18:15,) aia no na kanaka e maloko o ka hale o Iouseto, e hoolohe ana me ka iini nui i na huaolelo o ke ola. Ua manaoio no nae kekahi poe Iudaio o Korineto, a mawaena o lakou, o Kerisepo kekahi, ka luna o ka hale halawai.
Aka hoi, iloko oia pomaikai i loaa i ka lunaolelo ma o ka hoohuli ana mai i na uhane, me he mea la, ua hoopauha ia mai oia no ke kue mai o ka poe hewa a me ka poe lapuwale, ka poe hoi i makemake e pepehi iaia, (II Tes. 3:2.) No ia mea i olelo mai ai ka Haku iaia ma ka hihio, i ka hooia ana mai, oia pu no kekahi me ia, a me ka hoomaopopo ana mai hoi, no kona palekana, a me ka pomaikai ma kana hana nui. Mai kahiko loa mai, ua hauoli nui na keiki o ke Akua i ka noho kino ana mai o ko lakou makua lani. Nonoi aku no o Mose "Ina aole oe e hele pu aku me makou, mai lawe aku oe ia makou mai nei aku;" (Puk. 33:15,) a hooho ae no hoi o Davida, "Imua o kou alo he piha i ka hauoli." (Hal. 16:11.)
O Korineto ke kulanakauhale nui o ka okana o Akaia, a o Galio ko laila alii kiaaina; a oiai o Paulo ma Korineto, o ke kaikuaana o Galio ke kanaka ake akamai Senika, oia ke kumu a ka Emepera Nero. Ua ala kue mai la ua Iudaio ia Paulo, a lawe aku la iaia imua o ka Aha a Galio, e ahewa ana iaia no ka hoohaunaele i ko lakou oihana akua. Hoolohe aku la o Galio i ka lakou olelo hoahewa iaia; aka, i ka wa i ku ai o Paulo e pale nona iho, ua hooki pokole iho la oia i ua hihia la ma ke kipaku ana i na Iudaio mai ka noho hookolokolo aku, me ka hoike akea ana ae, aole loa oia e hana i na ninau e pili ana i ko na Iudaio kanawai. Ua makaukau oia e hoolohe i kekahi hihia hewa, a i lawehala hoi i ka kanawai o Roma, aka, aole e hiki i kana oihana ke hooholo i na hihia pili hoomana. He lunakanawai kupono oia, aole hoi i ae wale aku e hooholo (e like la me Pilato mua,) (a haawi i olelo hooholo paewaewa) mamuli o na leo uwa a me na olelo hooweliweli a ka lehulehu. A i ka wa i hopu ai ka poe e ku ana ia Sosetine, ka luna hale halawai, a oia paha ka waha olelo o ka poe nana ka hoopii, a hahau iaia imua o ka noho hookolokolo, aole i manao aku o Galio no ia mea. Pela i pakele ai o Paulo mai kona mau enemi Iudaio mai.
O ka manawa i noho ai o Paulo ma Korineto, he makahiki ia a me ka hapa; a mamua o kona haalele ana ia laila, ua kakau aku oia i ka lua o ka Episetole i ko Tesalonike. Ma kana Episetole mua, ua hoike oia no ka hiki ana mai o ka Haku; (Tes. 4:15 —17 a me 5:2) a ua hoomaopopo lakou ma o kana olelo la, e hiki koke mai ana oia. No keia mea, ua haalele okoa kekahi poe o lakou i ka hana, me ka manao iho, ina pela ke kokoke ana mai o ka hopena o ke ao nei, he makehewa e hana. Nolaila, ua komo lakou iloko o ka pilikia no ka nele. Ma kana Episetole alua i hoopololei aku ai o Paulo i ke kuhihewa a lakou i hookahua ai maluna o kana olelo, a hoomaopopo aku no hoi ia lakou, o ka hele alua ana mai o ka Haku aole ia i kokoke loa, e like me kahi poe o lakou i manao ai (II Tes. 2:2 a me 3.) Mawaena o na poe Karistiano, aole pono i poe molowa, aole hoi i poe hoopilikia wale; no ka mea, he mea hoohaahaa keia i ka Ekalesia o Karisto. Nolaila, hooikaika aku la oia i ko Tesalonike, e hana me ka noho malie, a e ai hoi i ka lakou ai penei iho,—oia hoi ka ai i loaa mai ia lakou ma ka hana ana. (II Tes. 3:12.)
I ka haalele ana o Paulo i na hoahanau ma Koriento, hele aku la ia i Kenekerea, ke awa kumoku ma ka hikina o Korineto, a he aneane eiwa mile ka loihi. Maanei i amu ai oia i kona poe, e hoike ana i ka lawa piha o ka hoohiki ana i hoohiki ai. O Akula a me Perisekila kona mau hoahele a hiki i Epeso. O ka loihi o ka holo ana ma ke kai, mai ka 12 a hiki i ka 15 na la. Aka nae, he manawa pokole wale no ko lakou i noho ai ma Epeso. Ua komo koke aku o Paulo iloko o ka hale halawai, a ao aku la i na Iudaio no Karisto. Ua iini nui mai la lakou i kana olelo, a kaohi mai la, e noho liuliu oia me lakou; aka, aole oia i ae aku, no kona ake nui e hiki kino ma ka ahaaina e hiki koke mai ana ma Ierusalema, oia no paha ka ahaaina Pasoa.
Mai Epeso i hele aku ai oia i Kaisereia, a mailaila aku i Ierusalema, oia ka Luka i hoike mai ai me ka huaolelo pokole, "pii aku la ia." (Oih. 18:22.) Ua hoike ia mai kona uwe ana aku i ka Ekalesia; aka, aohe mea e ae i hoike ia mai nona, iloko o kona wa i noho ai ma Ierusalema. Me he mea la, ua pau e paha ka ahaaina mamua o kona hiki ana aku. Me he la nae, he manawa pokole loa kona i noho ai ma Ierusalema, a hele aku i Anetioka. A he pono hoi e manaoio, o keia ka hoomaka ana o kana huakai Misionari ekolu. O kana huakai hope loa paha keia i Anetioka. I kona hele ana i Epeso, ua kipa ae la ia e ike i na Ekalesia o Galatia a me Perugia, a e hai aku ana i ka Euanelio ma kela wahi keia wahi, e lapaau ana i na mokuahana, a e hooikaika ana hoi i na hoahanau. Mamua o kona hiki ana aku i Epeso, ua hiki ae la o Apolo ilaila, he kanaka no Alekanedero i Aigupiita, —ua ao ia, a he kanaka akamai i ka olelo, a ua ike loa i ka Palapala Hemolele. Ua imi ikaika oia i ka olelo a ke Akua, a ua noonoo nui no ia mea, a no keia imi ana a me ka noonoo ana i loaa ai iaia ka ikaika, (Hal. 119:99.) Aka, aole nae oia i ike i kekahi mau mea ano nui i ikea. Aole hoi i ike i ka hana nui a ka Uhane Hemolele, —o kana mea i ike o ka hoomaopopo aku i ka hewa, a me ke alakai ana aku i na poe hewa i ke keikihipa a ke Akua. Na Akula a me Perisekila i hoakaka pono aku iaia me ka hoomaopopo lea i ka aoao o ke Akua; a ma ia hope koke iho, ua holo aku la oia i Akaia, me he la i Korineto no, i ke kulanakauhale nui o laila. Maanei i hookahekahe aku ai oia i ka wai i ka mea a Paulo i kanu ai; (I Kor. 3:6.) "Hoohuli nui mai la ia i na Iudaio, hoakaka ae la ma ka Palapala Hemolele ia Iesu, oia no ka Mesia."
I ko Paulo hiki ana aku i Epeso, loaa iho la iaia kekahi mau haumana, a ninau aku la oia ia lakou, "Ua loaa anei ia oukou ka Uhane Hemolele i ko oukou manaoio ana?" I mai la lakou, "Aole makou i lohe no ka Uhane Hemolele." Ua bapetizo mua ia lakou; aka, aole iloko o Karisto. Nolaila, ua bapetizo ia iho la lakou ma ka inoa o ka Haku, o Iesu; a i ka wa i kau ai o Paulo i kona mau lima maluna o lakou, ua loaa ia lakou ka Uhane Hemolele —oia hoi na haawina kupanaha a ka Uhane Hemolele; nolaila, ua olelo ae la lakou ma na olelo e, a wanana mai la.
(Aole i pau.)
Ka hoike Kula Sabati o ka ekalesia o Ewa.
Ua wehe ia ka Hoike Kula Sabati o ka Ekalesia o Ewa nei ma ka hale halawai o Honouliuli, ma ka la 10 o Novemaba, makahiki 1875; malalo o ke alakai ana a K. H. Kaumialii, ke Kahukula Sabati o keia Ekalesia. O na hana; oia na mele himeni, a me na mele puhi ohe, hookani pu me na pahu. O na Haawina Kula Sabati, mai Kinohi mokuna 1 a hiki i ka mokuna 7, a me na Haawina paanaau ma na wahi a pau i paanaau ia, a pau ia. He lulu dala no ka Oihana Kula Sabati, ua loaa no kekahi mau hua a ke aloha, pau ia. Mare ia e Kauaihilo, elua paa mare, a mahope iho wehe ia mai la he haiolelo akea e kekahi haumana hou, oia o B. K. Kapahau, he hoahanau oia no ka Ekalesia Pope. A ma ka launa pinepine ana me J. Welewele Kaale, ka mea lawelawe na ka Haku ma Ewa nei. Nolaila, ua loaa iaia na kuhikuhi e alakai pono ana i kona lunaikehala, a penei kana kumumanao : "He Makua ka Oihana Kula Sabati no na pono a pau." Ano, ua hoohakukoi ia ko'u lunaikehala e na iini piha o ka manaolana, mamuli o ka lana malie ana o na kuko iloko o ko'u puuwai, aole nae au i ike i ka wa e hookoia ai, aka, aia i ka manao o ka mea nana i hana i ke kino a me ka uhane, oia paha e ko ai ia mau mea.
I ka nana ana iho i na hana a na keonimana a me na lede opiopio, a me na keiki maka palupalu, a me na kaikamahine papalina lahilahi, na elemakule hoi i komoia e ka manaoio hana, e lawelawe ana i keia oihana nui ihiihi, i hookauia iho maluna o ko oukou mau poo, a oukou hoi i hoomakaulii ai i ka wela o ka la, a i ke anuanu a me ke koekoe.
He oihana maikai ka oihana kula Sabati, he mea e hoolaha ana i ka pono, a me ka maluhia maluna o ka honua, he mea hoi e pahola ana i ka oiaio maluna o na Lahuikanaka lehulehu o ke ao nei, a e lulu ana i ka hua maikai iloko o kela naau keia naau. Oia ka mea e laha aku ai ka pono ma kela wahi keia wahi, iwaena o na alii a me na makaainana, maluna hoi o ka poe waiwai a me ka poe ilihune, he hoaaloha hoi no ka poe iloko o ka pouli. Ma ka noonoo piha ana o ka mea nana i haku loea keia kumumanao; ua like ka oihana Kula Sabati me ka Oihana Kauka Lapaau. Oiai, o ka oihana kauka, he oihana ia e hoola ana i na kanaka i loaa i na hoopilikia a ka make i kau iho maluna o lakou, a o ka mea hoi i ike i ka oihana lapaau, oia ka mea hiki ke hoola i keia poino, a nana hoi e palepale keia mau pilikia a pau e like me kona ike lapaau, pela oia e hana ai. Pela no hoi ka oihana kula Sabati, he oihana ia e hoola ana i ka mai o ka uhane o ka poe e noho ana iloko o ka pouli, e ao aku ana hoi e loaa ke ola nui i hoonohoia mai no ko ka honua nei, a e koi aku ana i na hoomaloka e ike i ka oiaio, a me ka poe makapo, i ike i ka malamalama. O keia hoi ke alanui kahi e hele aku ai a komo i ka puka o ke ao maikai, a e loaa ia kakou ke kuonoono, a he hoopono; e hiki ai hoi ke wehewehe i na mea pohihihi o ka ke Akua olelo. Ke kukui aa e malamalama nei iwaena o keia lahuikana. Ke kumulaau hua nui a Amerika i lawe mai ai a kanu iho ma keia Pae Aina, a i ka manawa e hoomaka mai ai kona lau e opiopio, a kokolo mai la kona mau lala maloko o ke kihapai, kahea mai ai oia i ke kahi ohana no Iese, e pipi mai ia'u i ka wai i mohala pono ae kuu mau la, i oo pala memele hoi kuu mau hua, a i maikai kuu ulu ana iwaena o keia lahui. Nolaila ke ike nei au i ka hana a ka Haku, ua holo pono ka oihana kula Sabati mai Hawaii a Niihau. A oia ka hoike oiaio no ko'u kukulu manao, a kapa pono ia ai e ko oukou pokii ke poo o keia kumumanao: "He Makua ka Oihana Kula Sabati no na pono a pau loa" i kukulu ia ai e ka poe Karistiano oiaio. A owau o B. K. Kapahau, ua pau kuu kanalua, a ke hele nei au maluna o ke kahua a na Lunaolelo a me na Kaula i kukulu ai. O Iesu Kristo iho no ka pohaku kumu o ke kihi, kahi a na Karistiano i kukulu paa ai i ko lakou manaoio. B. K. KAPAHAU.
A i ka pau ana o keia haiolelo, hora 2 weheia ka paina no na mea ai i hoolakoia e na kamaaina, hookahi paha hora ka loihi, ka poi kalo ka ai, he puaa ka inai, ua ai a lawa a koe aku, a pau ka wa paina. Lilo hou ka manawa e hoolohe i ka Haiolelo alii, wehe ia me ke mele —"E ke 'Lii mana mau" a pela aku, mele pu me na ohe, a me na pahu, a pau ia. Wehe mai la o J. W. Kaale i ka Haiolelo Alii no ka La hanau o ka Moi D. Kalakaua. Aia a hoomaka ka haiolelo ana, alaila, puana mai la o Kaalouahi he kanaenae e heluhelu ana i ka inoa, "He nalu nui ku mai" a pela aku. Waiho mai la o J. W. Kaale i kana haiolelo hope, ua like me ka wai kahe ke hoolohe aku, lealea no, a kaniuhu no hoi, piha no hoi na naau i ka olioli. Iaia no a hoomaha, waiho hou mai la o Kaalouahi he kanaenae—O ka waa nui, a pela aku; me ka leo moakaka pono. Hauoli olioli pu kakou. Waiho hou mai la o J. W. Kaale i kana haiolelo hope, e nonoi ana: E malamaia ke Ola o ka Moi, ke Keiki Alii W. P. Leleiohoku, na Moiwahine, na Alii hanau o ka aina, na Luna Aupuni, na Makaainana. "E ola i ke Akua a kau i ka pua-aneane." Ka Haiolelo elua o ka la, na K. H. Kaumialii. No ka la hanau o D. Kalakaua. Ka haiolelo ekolu, na Kauaihilo, a i kana kamailio ana a hoomaha iho la. Waiho mai la o Huluhulu i ke kanaenae—Ke welino mai nei ke kini, a pau ia. Hookuuia na hana me kekahi olelo hoolana manao. Olioli ka naau i ko ke Akua malama ahonui ana, aole ma ko ke kanaka pono, aka, ma kona lokomaikai wale mai i ka keiki hewa a Adamu Kahiko. Ma ko'u ano, he hoa lawe hana pu iloko o ka haku iwaena o oukou, a he hooulu hana hoi, ke olioli nei au. Aole i loaa kakou i kekahi haunaele he oluolu wale no. E pule hoopau no na hana. E aloha nui na keiki ulele hua pai, ke hoi nei au i ke Ao Lewa.
W. K. HULU.
Kaiakuhilima, Ewa, O. Nov. 20, 1875.
[Hakuia no "Ka Lahui Hawaii."]
.KE KUAHIWI HOONAAUAO.
HE HIHIO NO KA MANAWA.
I ke kau o ka makahiki e molale ai na ao polohiwa o ka lewaluna, e haawi mai ai na laau o ke kula i ko lakou mau hua momona ; a e aahu ai hoi ka makuahine honua i kona koloka nani o na lau uliuli nahele; a hoopiha mai i ka waihona noonoo o ke kanaka me na hoomanao hauoli no na mea i pahola ia mai imua ona; ia manawa, e auwana hele ana ko'u mau kapuai wawae ma kekahi aina mamao, i uhiia me na nani o ke Akua ; a hiki i ka hanini ana o ka punawai mahalo o ko'u lunaikehala, a noho iho la au malalo o kekahi kumu lehua i anapuniia me na lau hihi ala o ka waonahele, a na ka owe malie o ka wai o ke kahawai o ka malu lau, ke kani hone hoohaihai o ka leo o na manu o ka wekiu laau —i lawe aku i ka noonoo o ke ao kanaka, a haule iho la au no ka manawa, iloko o kekahi hihio hiamoe. Ua aihue mai la ka nani a'u i ike aku ai, i ko'u ao kanaka, he manawa pokole, e hele ana ko'u noonoo iloko o ke kiowai o ka hihio moe uhane.
Ua hoomaopopo iho la au ia'u iho e ku ana maluna o kekahi kula palahalaha nui, a i waena o ua kula nei, ua pii ae la kekahi kuahiwi i oi ae ke kiekie maluna o na kuahiwi a pau a'u i ike ai mamua. Ma na aoao o ua kuahiwi nei, ua uluaoa i na kanaka, he poe opio ka hapa nui, a he lehulehu o lakou e hooikaika ana me ka hoomanawanui a kau aku iluna o ke kiekiena; he ane ino nae a kupololei kekahi wahi o ke ala. Ua hoomaopopo aku au i ka poe akahi no a hoomaka e pii aku; ua manao iho la ua aneane lakou e kau aku maluna o ka honua palahalaha o ke kiekiena, aka, ia lakou e pii ana, ua ala hou ae la he mau puu hou, a pela ka pii mau ana a hiki i ka nalo ana o ke kiekiena o ke kuahiwi iloko o na aouli o ka lewa. Oiai ke kupanaha e hoolauwili ana i ko'u noonoo, aia hoi, ua pu-a mai la he leo nui ano eehia, a pae pono mai la iloko o na pahu lohe o kou mau pepeiao na huaolelo.
"E ke kino a ke Akua i haawi mai i ke ano like me kona! E ka makamaka maikai! o ke kuahiwi e ku mai la imua ou, oia no ke Kuahiwi Hoonaauao. Maluna pono, aia malaila ke kuahu o ka oiaio, o kona poo maluna ae o na ao o ka lani, a ua uhiia kona helehelena me ka uhimaka o ka nani malamalama. E hoomaopopo i kau mau mea e ike aku nei, a e hoopaanaau me ka hoomanao mau."
Ua hoomaopopo koke aku la au, aohe ala e hiki aku ai i ke kiekiena, aia wale no maloko aku o kekahi ipuka nui, i kapaia kona inoa, ka Ipuka o na olelo. He wahine me na hiohiona ike ke kiai o keia ipuka, e hoike mai ana i ke ake imi hana, akamai, a me ke ano hoihoi. E oni mau ana kona mau lehelehe, me he la e kamailio ana iaia iho no kekahi mea ana i ake nui, a ua kapa ia kona inoa o Hoomanao. Komo aku la au maloko o ua ipuka nei, a i ka hala ana ma kela aoao, ua puiwa ae la au i ke ano e o ka leo, a me ka lehulehu o na olelo like ole, a me he la, o ka wa o ke kahli ana o na olelo i ka wa o ke kuahu o Babela. Ua nui ka ino a me na kumu hookuemi hope o ke alanui, a o kekahi poe, ua haalele koke i ka manaolana a huli hoi hou aku la ilalo me ka haalele loa i ka manao pii hou; a o kekahi poe hoi, ua molowa a ano hoihoi ole, a noho koke iho la iwaena o ke ala, a hoomaka aku la e hoike i na hana hookano a hookiekie maluna o ka poe ilalo me ka pai ae no ia lakou iho.
I ka hapalua paha o ke kiekiena, ua ike aku la au ma kela a me keia aoao o ke alanui, he mau awawa hohonu, me ka uhi paa mau ia e ka noe ano pouli, me na alanui liilii kikeekee, i hihi ia e ke kakalaioa a me na laau kuku a ooi e ae he lehulehu wale. Ua kapa ia keia mau awawa o na Waonahele o ka Hewa; a lohe aku la au i na leo ehaeha o ka lehulehu e paialewa ia ana iloko o keia mau awawa weliweli. Ua ulu ae la na laau loloa a kiekie a maluna iho la ke ao punonohu pouli, aka iloko oia pouli ua hala ole ka malamalama o ka hoku e kau mai ana ma ka hikina nona ka inoa o Hoopono.
Ma kahi nani loa o na kuahiwi nei, ua kukulu ia o Hoolanamanao ma, he mau kaikamahine ui lakou, o ke mele ana me ko lakou mau leo nahenahe i awili ia me ka hoene o na lira ka lakou hana. E haawi mai ana i na poloai hoohoihoi imua o na malihini pii aku e aloha mai ana, e hoomau a mai pilihua ka manao —no ka hehi ana i ke kahua nani o ke kuahiwi kiekie. Aole no i kaawale loa mai ko lakou wahi e hauoli ana ka waonahele o Hoohoihoi, i ulumahiehie me kona mau pua nani o ka waokele o na ano a pau, e paoa mau ana na ahe lau kehau me ka onaona o ke ala waianuhea, he nani a he onaona na'u i hoomaopopo ole mamua ae. E waiho mai ana i ka liula ka malulaau o Maluhia, e hihi ana na lau maluna me ka nani kelakela, a ke hele aku kekahi malalo o kona malumalu, e ike ana ia i ka olu nahenahe o ke ahe kehau, o ka wa ia o ka la iluna pono, a e o mai ana hoi ka hahana wela o kona mau kukuna maluna o ka ilihonua, a malalo o ka malu o keia ululaau, ua like me ka olu o na po o ka hooilo, i hoonani ia me ke konane o ka mahina. A oiai ko'u mau manao makahehi e hoohialaai ana, a e hoohihi ana hoi i keia nani kupaianaha, aia hoi, ua kolo mai la maluna o na eheu kehau he ala onaona, komo mai la iloko o ko'u mau puka-ihu, a hoomaopopo iho la au i ka oni malie iloko o ko'u kino holookoa, e hoopiha ana i na aa koni o ko'u puuwai me ke onaona o kona ea, a e hoomama ana hoi i ka lolo o ko'u puniu. Ano e mai la oloko, me he la ua loaa ia'u ka nani a me ke kulana kilakila i oi ae mamua o na mea a pau o keia ao, a kulu iho la na waimaka o ka hauoli ma ko'u mau papalina, i awiliia me ka eehia kuhohonu. O keia ala, mai ka pua kaulana hookahi mai ia oloko o ka mahinaai a ka mea nona keia mau nani, i kapaia hoi kona inoa ka pua Aloha oiaio. (Aole ia pau.)
S. B. DOLE.
LOIO a he Alakai ma na mea pili Kanawai. Ua makaukau oia e pale i na hihia imua o na Aha Hoakolokolo a pau o keia Aupuni, me ke kakau ana i na Palapala Pili Kanawai, ma ka olelo Hawaii a ma ka olelo Beritania. 29 1y.
OLELO HOOLAHA!
E IKE AUANEI NA MEA A PAU, OWAU o ka mea nona ka inoa malalo iho, ke papa a ke hookapu aku nei au i na Lio, Bipi, Puaa, a me na holoholona e ae a pau, a me na kanaka a pau, o kela a me keia ano, aole e hele wale maluna o kela Aina o PALULU K. i make nona ka inoa o Pahihi, e waiho la ma Waihee, Mokupuni o Maui, nona ka Helu 2655 i waiho ia mai ia'u ma ke ano Luna Hooponopono, Agena. A ma keia e hoolohe na mea a pau, o Hoopi ia auanei ma ke Kanawai o ko Hawaii Pae Aina
E. H. NAOHO JR.,
Luna H. Waiwai a Agena o ka Waiwai o Palulu i make.
Honolulu, Nov. 5, 1875. (46 4ts)
NA BUKE
I HOOLAHAIA E KA PAPA HAWAII
—ME KE—
KUMUKUAI O KELA ME KEIA.
BAIBALA HEMOLELE NUI ILI GULA NANI me na kuhikuhi ma na aoao.....$12 00
Baibala Hemolele Nui ili eleele kaekae waigula.... 5 00
Baibala Hemolele uuku iki iho kae wai gula..... 8 00
Baibala Hemolele pananaiki iho ili eleele..... 4 00
Baibala Hemolele ili eleele 2 00
Kauoha Hou ili gula nani me na kuhikuhi..... 3 00
Kauoha Hou ili eleele kaekae wai gula..... 1 00
Kauoha Hou ili eleele..... 75
Kauoha Hou Hapa Haole..... 75
Moolelo Ekalesia..... 50
Haiao ili lahilahi..... 10
Hele Malihini ana..... 25
No ko ke Akua ano..... 25
Hoike Palapala Hemolele..... 25
Moolelo o Heneri Opukahaia..... 15
Hoike Akua..... 25
Wehewehehala..... 25
Ninau Hoike ili manoanoa..... 50
Ninau Hoike ili lahilahi..... 20
Kumumua Kula Sabati..... 20
Buke Lawe Lima..... 10
He Buke no ka Pope..... 15
Ui Kula Sabati Helu 3..... 25
Ui Kula Sabati Helu 4..... 15
Ui Kula Sabati Helu 5..... 25
Buke Euanelio a Ioane Hapahaole..... 10
Buke Wehewehe Huaolelo Baibala, elua ano..... 2 00
Buke Wehewehe Ano Mataio..... 1 00
NA KAUOHA HOU PAKEKE.
Ili gula nani..... 1 50
Ili eleele kaekae nani..... 50
Ili eleele..... 35
KAUOHA HOU PAKEKE ME NA HALELU.
Ili gula nani..... 1 70
Ili eleele kaekae wai gula..... 65
Ili eleele..... 50
NA HALELU PAKEKE.
Ili Gula nani..... 50
Ili eleele kaekae wai gula..... 30
Ili eleele..... 20
Ka hae Hoonani (Buke Mele)..... 25
NA BUKE MELE.
Himeni Hawaii ili nani..... 1 75
Himeni Hawaii..... 1 00
Kumu Leo Mele ili manoanoa..... 50
Kumu Leo Mele..... 10
Li ra Kamalii..... 25
Li ra Hawaii 1848..... 25
Li ra Hawaii 1855..... 25
Hae Hoonani..... 25
Leo Hoomana..... 20
EIA NA BUKE HAAWI WALE.
PALAPALA LIILII—
Helu 4—Makemake anei oe i ke ola?
Helu 6—E hele i o Kristo la.
Helu 7—Ka hoi ana mai o ke Keiki Uhauha.
Helu 11—No ka hoohiki wahahee i ke Akua.
Helu 16—Ka Eehia ana o ka Ahaaina a ka Haku a me ka Bapetizo ana.
Helu 17—Mai hana ino i na holoholona.
Helu 18—No ka mahi ana, kuai ana a me ka inu ana i ka Awa.
Ka Davida Malo Kumumanao.
Ka Moolelo o Batimea Puaaiki.
Aia ke keena kuai buke o ka Papa Hawaii ma ka huina o Alanui Betela me Alanui Kalepa, e kokoke ana i ka Hale Leta. J. F. POKUE.
Kakaule ta o ka Papa Hooko o ka Ahahui Euanelio o ko Hawaii Pae Aina.