Ka Lahui Hawaii, Volume I, Number 49, 2 Kekemapa 1875 — Page 4

ʻaoʻao PDF (1.04 MB)

Na Ekalesia o Kawaiahao a me Kaumakapili.

Halawai kakahiaka, la Sabati .... hora 10½
Halawai po ..... hora 7½
Halawai Apana auina la ..... hora 3½
Kula Sabati ..... hora 9½

NA KULA SABATI.
NA HAAWINA.
Dek. 19.—Iesu me Petero.—Ioane 21:15—22.

15 A pau ka lakou ai ana, ninau mai la o Iesu ia Simona Petero, E Simona na Iona, ua nui mai anei kou aloha ia'u i ko keia poe? I aku la kela ia ia, Ae, e ka Haku ; ua ike no oe, ua aloha au ia oe. I mai la oia ia ia, E hanai oe i na keikihipa a'u.
16 Ninau hou mai la oia ia ia, o ka lua ia, E Simona na Iona, ke aloha mai nei anei oe ia'u? I aku la kela, Ae, e ka Haku; ua ike no oe, ua aloha au ia oe. I mai la oia iaia, E hanai oe i ka'u poe hipa.
17 Ninau hou mai la o Iesu ia ia, o ke kolu ia, E Simona na Iona, ke aloha mai nei anei oe ia'u? Kaumaha iho la o Petero, no ke kolu o kona ninau ana ia ia, Ke aloha mai nei anei oe ia'u? A i aku la kela ia ia, E ka Haku, ua ike oe i na mea a pau; ua ike hoi oe, ua aloha au ia oe. I mai la o Iesu ia ia, "E hanai oe i ka'u poe hipa.
18 Oiaio, he oiaio kau e olelo aku nei ia oe, i kou wa opiopio, kaei oe ia oe iho, a hele aku la i kau wahi i makemake ai; aka, i kou wa elemakule e kikoo aku oe i kou mau lima, a na hai oe e kaei mai, a e alakai aku i kahi au e makemake ole ai.
19 O keia kana i olelo mai ai, e hoike aku ana i ke ano o ka make e hoomaikai aku ai oia i ke Akua. A pau kana olelo ana i keia, i mai la oia ia ia, E hahai mai oe ia'u.
20 Haliu ae la o Petero, a ike mai la i ka haumana a Iesu i aloha ai e hahai mai ana, oia hoi ka mea i hilinai ma ka poli o Iesu i ka ahaaina, a ninau aku la, E ka Haku, owai ka mea nana oe e kumakaia?
21 Ike ae la o Petero ia ia, ninau aku la ia Iesu, E ka Haku, e aha hoi oia nei?
22 I mai o Iesu ia ia, Ina makemake au e noho ia a hoi hou mai au, he mea aha ia ia oe? E hahai mai oe ia'u.

———:o———

P. 15. Pau ka lakou ai ana. Ka ai ana aha keia? Owai na hoa ai? Heaha ka ai? he ia anei kekahi? Nawai ia i hoomakaukau? Nohea hoi ka berena me ka ia? No ka mana paha o ka mea nana i olelo, E kuu iho i ka upena ma ka aoao akau o ka moku, a e loaa no ka ia. A i ke kuu ana iho, Ua loaa anei ka ia? Ehia? Moku anei ka upena? No ke aha ka loaa ole o ka ia mamua? No ke kuu ana paha o ka upena ma ka aoao hema o ka moku, kahi ia ole. Aia la i hea ka ia ia wa? Nawai i hooholo aku? no ke aha? Nawai i hooholo a hookomo i ka ia iloko o ka upena ma ka aoao akau? no ke aha? I ike na haumana. O Iesu ia, ka mea mana, nana i hoonele, nana i hoolako, nana i hoohuli.
Ua ai pu anei Iesu me na haumana? Ae, nana ia Luka 24:36—43. Akaka he ano kanaka ko Iesu, a he ano Akua hoi. Akaka hoi, ua ala hou Iesu mai ka make mai. Ka hoike ehia keia o Iesu iaia iho i na haumana mahope iho o kona ala hou ana? Mahea ka mua? ka lua? ke kolu? Mahea ka hoike hope loa ana iaia iho me kona ano kino? Luka 24:50, 51. Ma keia hoike ekolu ana, heaha ka Iesu i ninau aku ai ia Petero? Pahia ka ninau ana? Pahia ka pane ana? Heaha ka ninau mua? ka lua? ke kolu? Mahea ka like ole o ka ninau mua me ka lua a me ke kolu? Heaha ka pane mua? ka lua? ke kolu? Mahea ka like ole o ka pane ekolu me ka mua a me ka lua? Kaumaha paha Petero no ka pakolu o ka ninau ana. Manao paha oia, ua kanalua Iesu no ka oiaio o kona aloha.
No ke aha ka pakolu ana o ka ninau,
Aloha anei oe ia'u? Malia paha, no ko Petero hoole pakolu ana, aole oia i ike ia Iesu. Ma ka ninau mua, E Simona na Iona, ua nui mai anei kou aloha ia'u i ko keia poe? Owai keia poe? Na haumana e ae paha. Ua olelo Petero mamua, Maleko 14:29—31. Ina hihia a hoole na mea a pau ia oe, aole loa au e hihia a e hoole ana ia oe. Makaukau au e make pu me oe, me he la ua hooi oia iaia iho imua o na haumana e ae a pau. E hoole ana e haalele ana paha lakou ia oe, aka, owau, aole loa au e haalele ia oe. Ua haalele no nae.
A, ninau Iesu, E Simona, pehea oe i keia wa? Manao oe mamua ua oi aku kou aloha ia'u mamua o ko keia poe haumana e ae a pau ; aole nae, ua like pu no, ua pau pu oukou a pau i ka haalele ia'u. A pehea i keia wa? Ke paa nei anei kou manao, ua oi aku kou aloha ia'u mamua o ko keia poe hoa ou? Ua pane anei oia, ae, ua oi aku? aole. Ua pane haahaa, ua ike oe, ua aloha au ia oe. Ua hoohalike oia iaia iho me na haumana e ae, ua aloha like paha lakou ia Iesu. Ma ke aha e hoomaopopo ai Petero i kona aloha ia Iesu? Ehia kauoha e hanai i na keikihipa? Ehia kauoha e hanai i na hipa? Owai na keikihipa? Owai na hipa? A pehea? e lilo elua hapakolu o ka manawa i ka hanai ana i na makua; a hookahi hapakolu i na keiki? Pehea ka pili ana o ka Iesu kauoha i na kahu me na kumu Kula Sabati i keia wa? Me ke aha ka hanai ana? Ke hanai pono nei anei oukou i ka oukou mau haumana? A i ole, aloha anei oukou ia Iesu?
P. 18—22. Ko Iesu ike i na mea pili i ko Petero wa opiopio, me kona wa elemakule, ma ke aha ia ike? Ua ko anei ka wanana? Make Petero pehea? ma hea? ma ke kea? ma Roma, ilalo ke poo, iluna na wawae, wahi a ka moolelo ekalesia, no ke aha ka make ana pela? Owai ka i make mua? Petero? Ioane? Pehea ko Ioane make ana? Heaha kekahi mau olelo a Petero ma 1 Pet. 5:1—4?

Moolelo o ka Ahahui Ekalesia o Kauai.

          Halawai ka Ahahui Ekalesia o Kauai ma ka luakini o Koloa i ka la 13, 14, 15 a me 16 o Okatoba. 1875. O ka Lunahoomalu mua ma ka noho. Pule ka Lunahoomalu, kohoia o Rev. J. H. Mahoe i Lunahoomalu, a o G. Puuloa i kokua kakauolelo.
EIA NA LALA I HIKI MAI.
Kihapai.   Kahu.  Elele.
Waioli,   R. Puuki haiolelo,  Uilama.
Anahola,   G. M. Keone "  G. B. Meheula.
Lihue,   G. Puuloa,  M. Kekaa.
Koloa,   J. H. Mahoe,  Apolo.
Waimea,   J. Kauai Lunakiai,  Kanakahelela.
Lala mau—Rev. J. W. smith, S. Kahookui. Na keiki a ka aha. S. R. Hapuku, A. W. Maioho, a malamaia ka hapalua hora haipule, a pau ia.
Kohoia o Rev. J. W. Smith, G. M. Keone, G. B. Meheula i Komite Imihana, a me G. Puuloa, J. Kauai, R. Puuki i Komite Imihaawina. Hoike hapa mai ke Komite Imihana i na kumuhana penei:
1. Hapalua hora haipule.
2. Hoike kihapai.
3. Heluhelu haawina.
4. Na palapala hoopii.
5. Na Ekalesia kahu ole.
6. No ke Kokua Mahinahou.
7. No ka ona.
8. Ka nupepa "Ka Lahui Hawaii."
9. No ka buke papa inoa o na hoahanau a me na buke moolelo o na Ekalesia. Aponoia ka hoike hapa a ke komite. Ma ke noi ua apono ka aha ia Kaluahi, Kauahoa, Kaaiohelo, Ku Puniwai i mau hoa kuka.
Kumuhana 2. Hoike kihapai. Na J. Kauai i heluhelu mai i ka hoike o ke kihapai o Waime. Na G. Puuloa i heluhelu mai i ka hoike o ke kihapai o Lihue. Na G. M. Keone i heluhelu mai i ka hoike o ke kihapai o Anahola. Na Uilama i heluhelu mai i ka hoike o ke kihapai o Waioli.
Kumuhana 3. Heluhelu haawina. heluhelu mai o Rev. J. H. Mahoe i kona haawina, "Heaha na hana kupono a na wahine iloko o ka Ekalesia?"
Heluhelu mai ke kokua kakauolelo i ka haawina o Z. Seta kekahi keiki a keia aha, "Heaha ka hewa o ka hula?" a me kana leta aloha i ka aha. Hooholoia. E hoounaia keia kumumanao i ka nupepa Ka Lahui Hawaii.
Heluhelu mai o G. M. Keone i kana haawina, "He kuleana anei ko ke Kahu ekalesia iwaena o ka poe mai?" A ua nui ke kamailio ana o na hoa no ia haawina. Ma ke noi ua hoopanee ka halawai a apopo hora 9 A. M., a e malamaia ka hapalua hora haipule ma ka haiolelo ana a ka Lunahoomalu mua. Pule o J. Kauai.
La hana 2, Poaha, O ct. 14. Halawai ka aha ma ka hora 9 A. M. e like me ka hoopanee ana. O ka Lunahoomalu ma ka noho, malamaia ka hapalua hora haipule me ka haiolelo a ka Lunahoomalu mua, aia ke poolelo ma Mataio 10:32, 33.
Na Rev. J. H. Mahoe i heluhelu mai i ka hoike o ke kihapai o Koloa. Na ke kokua kakauolelo i heluhelu mai i ka haawina o Dr. Smith, "Pehea la e ike ai ke kanaka i ke Akua?" Ioa. 1:18. Heluhelu mai o S. R. Hapuku i kona haawina, "Heaha na kumu e ulu ai ka makemake iloko o ka naau o ke kanaka no ka pono o ke Akua?" Heluhelu mai o A. W. Maioho i kona haawina, "Heaha ka waiwai o ka nupepa Karistiano i hoolahaia iwaena o na kanaka?" Heluhelu mai o G. Puuloa i kona haawina, "E wehewehe ia 1 Ioane 5:17." Hoike waha mai o S. Kahookui i kona haawina, "I ke ala hou ana mai o ka poe make—me ke kino hea lakou e ala mai ai?"
Kumuhana 9. No ka Buke Papa Inoa o na hoahanau, a me ka Buke Moolelo o na Ekalesia. Ua nui ke kamailio ana no keia kumuhana, a mahope waiho mai o A. W. Maioho he olelo hooholo, penei : Ma ka manao o keia aha, ua pono i na Kahu ekalesia a me na haiolelo o keia aha e lawe mai i na buke papa inoa o na hoahanau a me ka buke moolelo o na ekalesia i ka halawai hou ana o keia aha e like me ke kauoha a ka Rula 5 o keia aha. Hooholoia. Ma ke noi ua hoopanee ka halawai a apopo hora 9 A. M.
La hana 3, Poalima, O ct. 15. Halawai ka aha ma ka hora mau e like me ka hoopanee ana. O ka Lunahoomalu ma ka noho, malamaia ka hapalua hora haipule, a pau ia.
Kumuhana 5. Na ekalesia kahu ole. Aole mea i hooholoia no keia kumuhana, mahope iho o ke kamailio ana o na hoa ; a pela no ke Kumuhana 6, aohe mea i hooholo ia.
Kumuhana 7. No ka ona. Kamailio ko ka hale no ia kumuhana a hooholo i keia olelo hooholo penei : No ka mea, ua maopopo lea he mea e poino ai no keia Lahuikanaka, ka lilo nui ana o na kane, na wahine a me na keiki i ka inu ana i na waiona, nolaila, ke hooholo nei keia aha penei :
1. Ke haawi aku nei keia aha i ka mahalo kiekie i ka Moi i kona kukulu ana i Ahahui Hoole Waiona.
2. Ke kokua pu aku nei keia aha e lawelawe pu me ko ka Moi aloha i keia hana nui ana e hapai nei, me ke noi pu aku no hoi i ka mana o na lani e kokua mai.
3. Ke paipai aku nei keia aha i na Hui Hoole Waiona i kukuluia ma na wahi a pau, e hui pu mai ma ke kinai pu ana.
4. Ke paipai ikaika aku nei keia aha i kona mau lala ponoi e hooikaika e kinai i keia hana lawe i ke ola o keia lahui.
5. E lilo na haipule a pau i poe makaala e kinai i keia mea ino awahia o ka make.
Kumuhana 8. No ka nupepa Ka Lahui Hawaii. Kamailio ko ka hale no ia kumuhana, a hooholoia e hoomauia no ka nui o kona kino e like me ko keia wa.
Hoike hou mai ke komite Imihana i na kumuhana penei:
1. No ka ninaninau ana ia R. Puuki.
2. No ke ola o na kahu i hanai pono ole ia.
3. No ka hoomahuahua ana i na keiki a ka aha.
4. No ke Kula Kahunapule.
Aia a hui ia keia mau kumuhana me na kumuhana mua, alaila, he 13 ana kumuhana.
Kumuhana 11. No ke ola o na kahu i hanai pono ole ia. Kamailio nui ka aha no keia kumuhana, a mahope o ke kuka ana. Ua waiho mai o Maioho he olelo hooholo penei : He pono i keia aha e koho i komite e hele aku e huipu me na ekalesia malama ole i ke ola o ko lakou kahu. Hooholoia. Kohoia o Rev. J. W. Smith i komite. Hoopanee ka halawai e hoomaha i hookahi hora, alaila halawai hou. Pule o Kaluahi.
Ma ka hora 3 P. .M., halawai hou ka aha me ka pule o Uilama. Heluhelu ia ka moolelo o ka halawai i hala, aponoia me na hooponopono ; apono ka aha ia J. F. Pokue i hoa kuka.
Kumuhana 4. Na palapala hoopii. Heluhelu mai ke kokua kakauolelo i ka palapala kahea a Anahola a me Koolau ia G. M. Keone e poni i kahu no lakou. Ma ke noi, ua lawe ka aha e noonoo, a mahope o ka noonoo ana, ua hooholoia e hoomoe.
Kumuhana 10. No ka ninaninau ana ia Puuki. Kohoia o Dr. Smith, J. F. Pokue a me G. Puuloa i komite ninaninau. Ma ke noi e hoopanee i ka halawai a apopo hora 9 A. M., alaila e ninaninau ia o Puuki mahope o ka pau ana o ka manawa haipule. Hooholoia, pule o J. F. Pokue.
La hana 4, Poaono, Oct. 16. Halawai hou ka aha ma ka hora mau e like me ka hoopanee ana. O ka Lunahoomalu ma ka noho; malamaia ka hapalua hora haipule a pau. Ninau ke komite ia Puuki, a mahope ua hooholo ka aha e haawi aku i palapala haiolelo no Puuki i na makahiki elua. Na ka Lunahoomalu a me ke kokua kakauolelo e haawi i ka palapala haiolelo no Puuki. Hoakaka mai o D. Smith no ko Puuki lawelawe ana ma ke kihapai o Waioli, e hoapono aku keia aha no kona lawelawe ana malaila. Hooholoia. Ma ke noi, ua kohoia o G. M. Keone me R. Puuki i mau lala no keia aha.
Kumuhana 12. No ka hoomahuahua ana i na keiki a ka aha. Mahope o ke kamailio nui ana o ka hale, ua hapaiia ka noonoo ana no Uilama, he mea makemake e hele i ke Kula Kahunapule. Kohoia o Dr. Smith i komite e imi aku i kona kupono a hoike hou mai i ka halawai makahiki o keia aha, a pela no hoi ia Kaluahi.
Kumuhana 13. No ke Kula kahunapule. Ua kamailio no ka hale—aohe nae he mea i hooholoia. Hoike mai ke Komite Imihana, a ua aponoia penei:
1. E wehewehe ia heb. 6:18.
Dr. Smith.
2. Pehea la e makaukau pono ai na kahunapule no ka lakou hana?
J. H. Mahoe.
3. Heaha ka pilikia e hanai pono ole nei na ekalesia i ko lakou mau kahu?
G. Puuloa.
4. E wehewehe i ka like ole o ka mihi a me ka hanau hou, a owai ko laua mua?  G. M. Keone.
5. Heaha ke ano o ke kanaka—he pono ke lilo oia i kahunapule?  R. Puuki.
6. No ke aha la i launa nui ole mai ai ka Uhane Hemolele me na Ekalesia o Kauai nei?  S. Kahookui.
7. Pehea la e ike ai kekahi ua kahea mai ka Haku iaia ma ka oihana kahuna haiolelo?  J. Kauai.
8. E hoike mai, o ka Bapetiso ana a Ioane, aole ia o ka Bapetiso Kristiano?
A. W. Maioho.
9. Heaha ka luhi ole o ke Akua?
S. R. Hapuku.
10. He mea pono anei i kekahi lala o na luna ke hooholo i kahi manao me ka hooholo ole o ka Aha luna?  Z. Seta.
Kohoia o Dr. Smith i komite nana e hoomakaukau i na kumuhana o ka hebedoma mua o Ianuari, 1876. Hooholoia. Aia a halawai keia aha i ka malama o Aperila, 1876, alaila e hoomakaia na hana me ka haiolelo o ka la. Kohia o R. Puuki i haiolelo no ka la, a o J. Kauai kona hope. Waiho mai o G. M. Keone he olelo hooholo, a ua hooholoia penei: Ke mahalo aku nei keia aha i kekahi mau hoahanau o ka ekalesia o Koloa, no ko lakou hookipa maikai ana i na lala o keia aha. Hooholoia e hoopanee i keia halawai a halawai hou ma Koloa i ka malama o Aperila, 1876. Heluheluia ka moolelo o ka la, aponoia, hoopaneeia ka halawai me ka pule a Rev. J. W. Smith.
G. PUULOA,
Kokua Kakauolelo.