Ka Lahui Hawaii, Volume I, Number 49, 2 Kekemapa 1875 — Page 3

Na ke Aupuni.

          O KA Poaono, Dek., la 25, oia ka la Carisimaka, a e malama ia ia la i la Kulaia, a e pani ia na Hale Oihana Aupuni ma ia la.
          O KA Poaono, Ian., la 1, 1876, oia ka la Hapenuia Makahiki Hou, a e malama ia i la Kulaia, a e pani ia na Hale Oihana Aupuni a pau.  W. L. MOEHONUA,
Kuhina Kalaiaina.
Keena Kalaiaina, Nov. 24, 1875.

          O ka heihei waapa pea, ua hoomoe hou ia a ka la 25 o Dekemaba, no ka makani ole.

          I keia mau la, ke aneane mai nei kahi makani ma kai mai, e hoike mai ana i na la o ka Hooilo.

          Weliweli ka alani i hiki mai, mai Hawaii maluna o ke kuna Jenny . Momona a huihui ka wai.

          Ma keia ahiahi e Puhi Hoonanea ai ka poe Puni Ohe ma ke kahua o ka Hotele Hawaii.

          Ma ka auina la Poalua nei i haalele mai ai ke Kilauea no Hilo. A keia Poakahi ae no Kona.

          Ua manao ia a keia Poakolu ae, e ku mai ai ka mokuahi Vasco de Gama mai Auseteralia a me na Panalaau mai.

          I Kewalo, na Koa Pualu o ka Hawaiian Guards ma ka la 29 iho nei, no ke kipu makana, a ua lilo ia Kakiana Williams ka makana o ka la, he medala gula.

          Ua lilo ae nei ka Hale Kuai Bipi o Eiluene H. Boyd ma Monikahaae, i ke kudala ia, a ua lilo ia G. Waller, no na dala he $1,562.

          Ua haule iho kekahi opio mailuna aku o kekahi kao, i ke kakahiakanui o ka Poaono iho nei, a mai pilikia e ole ka loaa ana o ke kokua. Aloha ino! Mai hele e paani ma kahi kokoke i ka hohonu.

          I ka hora 12 o ke awakea onehinei ke kudala ia ana o ka moku pauahi Emerald . Ua hoomaka ia ke koho ana i ka $7,250; a i ka $7,500 lilo iho la ia Pope Talbot o Kaleponi.

          Ma ke ahiahi o ka Poaono iho nei, ua uhu aku la ka lio o ke kaa o Mrs. Wm. Mahuia Austin, a moku ke kaulawaha, a iloko o ka aneane o ka pilikia i uhu aku ai a paa ma uka o Kapalama. No ka mau o ka manaolana ke kumu i pakele ai.

          Ma ke Sabati iho nei, i ku mai ai ka moku manuwa Beritani Myrmidon , Kapena Hon. Richard Hare, iloko o na la holo he 30 mai Equimault, V. I. A ua manao ia e haalele mai ana ka lua o na manuwa Beritania Peterel, i keia Poano ae, no ka hoi loa ana i ka home.

          Hilahila ke kanaka e hookele ana i kona huhu, a kapa aku i kona hoa kanaka ma na inoa ino, i kupono ole i ko ke kanaka kulana. Heaha la ke kumu o keia? Ue nele anei i na huaolelo maemae? No ka nele anei i ka noonoo maikai? Mai hoohalike me keia e na makamaka, no ka mea, o kekahi keia o na kulana haahaa loa a ke kanaka e lawe ai.

          Ua loaa mai ia makou ma ka lokomaikai o J. B. Kanakaole, he lono mai ke alii Pauahi a me kana kane Hon. C. R. Bihopa. E hai mai ana no ka mau o ka maikai o ko laua ola kino, a me ka oluolu o ke ea o na aina i hele ia e laua. Ke aneane aku nei i ko laua wa e huli hoi mai ai; ua hele makaikai ia na aina e, a ua lawa ka hooluhi o ka manao no na mea i ike ia, aka, o ke aloha o ka aina hanau, a me kona lahui, ua paa, a ke mau la no kona mau hoomanao aloha ana.

          O ka manao ana o ke kanaka e holo balota, a e hoao e komo i Lunamakaainana no keia makahiki e hele mai nei, aohe mea nana e hoahewa, no ka mea, ua ike lakou e like me ka mea i hoikeia aku ia lakou ma na nupepa, a ua komo ka manao o ka hoa keia no Hawaii e hooikaika ai no Hawaii. Aka, ina e lilo ana ka aoao nui o na hoa o ka Hale Ahaolelo i na ano inoa a makou i ike iho nei, alaila, ke manao nei makou e like me ka kekahi mau makamaka, "ma o, ma o aku ka uahi."

          O ka hoike oiaio loa no ke ano o ko kakou mau alanui, oia no ka mea i ike ia ma ke alanui Maunakea i kekahi o na la i hala iho nei. He mau koloa e au ana iloko o ke kio lepo iwaena o ke alanui. "Naku aku naku mai."

          Ua hoohanohano ae ka puali Prince's Own i ka la Kuokoa, Nov. 28 i hala iho nei, ua puka ae a iho aku la ma Ainahou kahi i paikai ai. Ua maikai na mea a pau, hookahi nae a makou mea i minamina ai, oia no ka haawi ia ana o ka waiona i kela a me keia lala o ia puali, mahope iho o ka hoi ana aku i ka hale paikau. He mea minamina keia, oiai, o ke ao ana aku ia lakou e lalau i ke kiaha o ka make.

          O ka Poaono i hala iho nei, o ka la ia i malama ia ai ka piha ana o na makahiki ekolu o kekahi opio nona ka inoa o Giovanni Apiani, o ka malama ana me ka maluhia i ka la hoopomaikai ia mai ai e ka makua o ka lani, aole mea nana e hoahewa, oiai, o ka papale kalaunu ia o ka makua i noho iloko o ka maluhia, a ke noi ae nei makou e hooloihi ia kona ola, a i lehulehu hoi na mano o kona ano.

          O ka hoomanao ana o ke kanaka i ka piha ona o na makahiki o kona noho ana me kana wahine mare maloko o ke kaula maluhia, he hoomanao nani ia, a he kumu hoomau hoi i ke kahe malie ana o ka wai lana malie o ke kahawai o ko laua mau puuwai. Pela makou o hoomanao ae nei i ka piha ana o na makahiki elua o kekahi o ko makou makamaka o ka Hale Pai, malalo o ka berita mare, a iloko o ia manawa aole loa i loaa kekahi mea e hoonioni ai ia mamaluhia. Mahalo makou i keia a ke ake nei e hoomau ia a e lawe like na makamaka a pau i hoohui ia, me keia haawina hanohano. O ka mare he kalaunu ia ke malama ia me ka maluhia, a pomaikai ka lahui me ke aupuni.

          Ma na ahiahi Poaono, e ike ia ana ka piha o ke ala e hele aku ai ma ka Makete Kuai I-a, a ane hoopilikia i ke ala hele o ka lehulehu. No keia mea, ua lehulehu ka poe i hele mai io makou nei me ke noi mai e kamailio ma ia kumu. He oiaio keia, no ka mea, ma keia ahiahi Poaono i hala iho nei, ua paa ke alanui a hookeke na kaa; aneane hiki ole aku na kanaka, a ina paha e puiwa kekahi lio, aole e nele ana ka poino. Ke ahewa loa nei makou i keia uwai aku o na kaa a kahi haiki, oiai, he mea hiki wale no ke ku mai ma kahi e, a waiho aku kahi o ka lehulehu hele-wawae. Pehea keia hana? E pono e kaupale ia, a ina e kaawale, alaila, aole kumu e makau ai i ka poino a hoopilikia paha.

          Ma ka auina la Poakahi nei, oia hoi ka la Kulaia i hoopanee ia, ua hookui ae la ke kaa bipi me ke kaa lawe waiu e ku ana mawaho iho o ka hale kuai o Keo Paiko, ma na huina o ke alanui Hotele a me Nuuanu : aka, ua pakele no ke kaa waiu, ma o na lima kokua.
          —A ma keia auina la no, ua hookui ae na lio holo nui o Kea k. a me Kaope k., mawaho iho o ka hale Hana Kopa ma Leleo, a ua make loa na lio, a pakele mahunehune ke ola o na kanaka, aka, o Kea no nae ka i eha loa, a he olioli hoi ka Kaope. Mamuli o na lono i hiki mai i ka Hale Wai, ua make loa na kanaka a me na lio, nolaila, ua hiki ae ka Ilamuku Nui a me na Makai, a i ka hiki ana ae, o na lio wale no ka i make. A ua hoomaopopo ia, ua ona keia mau kanaka, a nolaila keia hana naaupo. Aka, no hea mai ko laua rama i loaa ai? A ma keia la no, he lehulehu o keia ano i ike ia maluna o na kaa a me na lio.

Na Le ta a na Makamaka.

          —Ua loaa mai kau e Callies Kauanihi o Kalaupapa, Molokai, a e noonoo ana makou i kou kumumanao e pili ana i ka Papa Ola.
          —O kau e J. W. Kalai o Kona, e pane ana i John Puha, i puka iho nei ma ke Kuokoa , ke malama nei makou.
          —-Eia kau e Hener y Kaili, ua mahalo ia oe a me kou kumumanao. O na kumumanao o ia ano ka makou makemake, a e pai aku ana i keia pule ae.
          —-Eia kau e J. E. Hart, e pane ana ia Kanakaokawai, no na mea e pili ana i ka ninau Buleta, ke waiho nei maklou a ka wa kupono.

He moolelo no Paulo.
HELU 18.

          O Sila a me Timoteo ka i noho iho ma Berea no kekahi manawa, e hana aku i ka hana maikai i akahi a hoomaka malaila. O Atenai ke kulanakauhale pookela o Helene Kahiko, a ua kaulana ia no kona mau kanaka naauao, a oia hoi kahi o ke akeakamai a me na oihana noeau i noho ai. Ike iho la o Paulo i ke kulanakauhale, ua "piha i na akua kii;" a oiai hoi oia e kakali ana ia Sila a me Timoteo, na mea ana i kauoha aku ai e huli koke mai iaia, ua hoaa ia kona manao iloko ona, iaia e nana aku ai i na akua kii a me ka manao o na kanaka e hoomana ana ia mau mea, ua like ka olelo a ke Akua iloko o kona puuwai me he ahi lapalapa la i papani ia iloko o kona mau iwi, aole e hiki iaia ke noho mumule wale iho no. (Ier. 20:9.) Nolaila, ua hoopaapaa aku la oia me ka poe Iudaio maloko o ka hale halawai, a me ka poe i halawai mai me ia ma ka makete, (Oihana 17 : 17.) O ka makete oia kahi kuai, i kapa ia he foruma , oia kahi i hoakoakoa pinepine ai ka lehulehu, a kahi hoi e kuka ia ai na ninau a pau loa, mai na ninau ano nui a na ninau waiwai ole, a me kahi e kamailio ia ai na nuhou o ka la. Maanei no hoi i hai aku ai o Paulo i ka Euanelio o Karisto i kela la keia la, e like me kona hai ana maloko o ka hale halawai, a i pane aku ai i na haina o na ninau a ka poe ninau mai, a i pane aku ai hoi i na manao o ka poe i kue mai. Oiai oia e ao aku ana i ka olelo o ke ola ma ia ano, ua paio mai la iaia kekahi poe akeakamai o ka poe Epikoureio, a me ka poe Setoiko. Ua manaoio ka poe Epikoureio o na oluolu o keia ao ko ke kanaka pomaikai kilohana; ua manaoio no nae i ke ola mau ana o na akua, a i ko lakou noonoo hoi, aole i pili ka hana a me ka pomaikai o na kanaka ia lakou. O ka poe Setoiko ua hoole lakou i ke ano okoa mawaena o ke kaumaha a me ka lealea. Ua hooia nae lakou he Akua Kiekie no, a me ke kiekie ana o na hana maikai.
          O ka Paulo ao ana ma Atenai, aole ia i hoopuka mai i kona mau hua mau. Eia ka ninau a kahi poe, "Heaha ka mea a keia haukae e olelo mai ai?" I mai la hoi kahi poe "Me he kanaka la e hai ana i na akua e keia." Pela iho la i lilo ai ka hai ana aku i ke kaulia ana o Iesu ma ke kea, he mea lapuwale i na poe Helene. (I Kor. 1:23.) A no ka mea aohe hana e ae a na poe Atenai, o ka hoolohe wale mai no, a me ka hai aku i kekahi mea hou (17 : 20,) ua alakai aku la lakou iaia ma Areiopago, ka Puu o Maresa , (Mars kekahi o na 'kua i hoomana ia e ko Helene poe) i wehewehe pono aku ai oia imua o lakou i kana olelo ao hou. O ka puu o Okali he kiekiena kulipilipi, he 50 a 60 paha kapuai ke kiekie, ma ua anuunuu pohaku e pii aku ai, a o kahi ia e akoakoa ai ka Aha Kiekie no ka hookolokolo ana i na hihia ano nui a pau. Ua kalai ia na noho iloko o ka pohaku, a he waiho hamama wale iho no.
          O ka Paulo haiolelo ma ka Puu o Muresa, he haiolelo kupanaha—no kona pili pono loa i ka poe e hoolohe mai ana, no ka ikaika o ka manao, a no ka oiaio o ka olelo a ke Akua iloko o ua haiolelo la. I ka hoomaka ana, he olelo mahalo aku, ma ia mea i hoolaulea ia ai na poe e hoolohe mai ana iaia. "E na kanaka o Atenai nei, ke ike nei au ua ikaika loa oukou i ka malama i na akua ma na mea a pau." Aole lakou i hoomana aku i na akua wale no a pau i ike ia, aka, ua kukulu pu no lakou i mau kuahu no ke Akua ike ole ia. I ko Paulo ike ana ae i ke kuahu o keia ano, hai aku la oia ia lakou, aole he mau akua hou kana e hoike aku nei ia lakou, o ke Akua no a lakou i hoomana aku ai, aole nae lakou i ike iaia. No ia mea, ua hoike aku la oia i ke Akua Nui, i ka mea nana i hana na mea a pau, ka Haku nona ka lani a me ka honua, ka mea nana mai ke ola a me ka hanu, a me na mea maikai a pau. Aole oia i noho maloko o na luakini i hana ia e na lima kanaka, aole hoi i nele i kekahi mea e hiki ai i ke kanaka ke haawi aku.  (Aole i pau.)

E KA LAHUI HAWAII; Aloha oe:—
          Ke hoike aku nei au ia oe i ka moolelo pokole o ka haule ana o Keoni Parisa ma Kona, Hawaii. Ia'u ma ke Kilauea no Kaawaloa, pae aku la au ma ka Poaha, a halawai pu no au me Keoni Parisa opio me ka olioli, a i ka Poalima ana ae o ke ahiahi, halawai koke no au me ka lono kaumaha, ua nalowale oia. Ma ke kakahiaka Poalima, la — o Nov., pii aku la o Keoni Parisa, me kona mau paniolo ma ka manua, ma uka pono o Honalo, ma Kona, Hawaii i ka hoohuli bipi, mahope o ka aina awakea, hoomaka lakou e ho a i na bipi i kai ma ka pa.
          Hoonohonoho aku la oia i na paniolo ona, ma ka akau kekahi a ma ka hema, a oia mawaena ; ua kaawale lakou kekahi me kekahi. Hai mai la kekahi paniolo ana, e malama loa oia ke kokoke aku i ke kumulaau koa e ku mai ana me he la he 2 mile ke kaawale mai a lakou aku, ua huina kupono ia i ko Keoni Parisa alo e iho aku ai. I ka hoomaka ana e alualu i na bipi e ho a i kai, a i ke ahiahi, hui aku la na paniolo elua ma ka pa bipi, aole nae o Keoni Parisa kekahi, aole i haupu mai ka manao haohao ia manawa, ua manao ia, ua hiki koke la oia i ka hale, hiki mai ka elele aole nae i hiki aku, a hoomaka ka imi ana o na kanaka i ua ahiahi Poalima nei a ao ae Poalima.

KONA HAULE ANA.

          Oiai lakou e alualu a e ho a ana i na bipi iloko o ke ino a me ka nahelehele, a i ko ia nei kokoke ana aku i ua wahi nei, haule iho la o Keoni Parisa i ka lua meki, he 26 kapuai ke kiekie, ua like me 4 anana me 2 kapuai, ma ka hora 2 P. M. Poalima, make loa ka lio, a i ka pohala ana ae oia nei, ike ae la oia i na eha, i ili iho ma kona kino elua hai ma ka lima, mahope o ke poo a me ke kua. A ma ka po o ua la nei, ke lohe ae la no oia i ke o o na kanaka e imi ana iaia, hoao ae la oia i ke o ana, aole nae he lohe ia, no ka mea, he haiki oluna o ke ana (lua meki), a he hohonu, a ua nawaliwali hoi oia.
          O kona ano ia manawa, aohe ona manao e ola ana oia, no ka mea, aohe mea i ike i keia lua hou, o ka lua mua a ke paniolo i kuhikuhi ai iaia, he lua okoa ae no ia ma ia wahi no. Nolaila, wehe ae la oia i ka ili waiho pahi ana, a hoopili i kona lima hai, a wili ae la me ia i na kaulaili o kona pale ili wawae; a pau ia, kahakaha iho la oia me ka apana pohaku i ka la, ka mahina a me ka makahiki i haule ai iloko o ua lua meki nei, me ka hoomanawanui oia i hoao ai e nou iluna, aole nae i hookoia ia iini ana, imi ae la oia i kahi e hiki ai iluna, aole i loaa. Pau ae la ke ao kanaka iaia, moe iho la oia me ka hoomanawanui i ke ko-u o ka pohaku a me ke anu, a i kona pohala ana ae i ke kakahiaka nui, hoomanao ae la oia i ka olelo a na paniolo ana i kuhikuhi mai ai iaia, oia wale no ka lana o kona manao no ke ola; oiai na kanaka e imi ana iaia, komo like iho la ka manao i ua mau paniolo nei e hookolo ma ka meheu o Keoni Parisa, oia lakou i hoonohonoho ai i kinohi, a ua loaa aku la no ia laua malaila. Hooho ae la oia me ka leo olioli loa mai loko ae o ka lua, "Eia no au e Hea, aole au i pilikia loa," a hiki mai la ka nui o lakou.
          Ia wa, hookuukuu ia elua keiki ilalo, o Henry Weeks a me Henry Peters, a kau ae la oia iluna mai loko mai o ka pilikia nui, a o kona lio ua make loa, a ua mahunehune nae kona kino. Nani ko ke Akua lokomaikai i kona poe kanaka, oia ka puuhonua ke kokua koke loa i ka wa popilikia. Me ka weli o ka'u penei, ke eehia nei au i keia wahi moolelo walohia pokole, i mea hoomanao no na opio Hawai. Me ka mahalo—owau no he kauwa na ka lehulehu.
E DWARD LILIKALANI.
Honuakaha, Nov. 23, 1875.