Ka Lahui Hawaii, Volume I, Number 49, 2 December 1875 — Page 1
KA LAHUI HAWAII.
"Ua mau ke Ea o ka Aina i ka Pono."
BUKE I.} HONOLULU, POAHA, DEKEMABA 2 1875. {HELU 49
KA NUPEPA KA LAHUI HAWAII.
He pepa i hoopukaia i kela me keia he besdoma no na Ohana a me na Ekalesia Hawaii; he mea kokua i ka noho pono ana o na ohana, ka maluhia o kanaka, a me na pomaikai kino a uhane o ka Lahui Hawaii. "Aole paonioni; aole haanui; aole hikiwawe ka huhu; aole noonoo ino."
HOOKA HI DALA ka uku no ka pepa no ka makahiki hookahi. Hapa makahiki, Hapalua.
E hoouna mai i na leta no KA LAHUI HAWAII ia H. H. Paleka, Honolulu, Oahu.
We'll Stand the Storm.
River of Life, p. 28.
1 Hooho me ka oli ae,
Hooho me ka mele mai,
Hooho kiekie e,
Ke iho mai Iesu,
Mai luna mai na ao makau,
Me kona ano kamahao,
Me kona nani no a pau,
E alii ai ma ke ao.
Cho—Kupaa mau, paa mau,
A e ku ae ma ke ao, ma ke ao ;
Kupaa mau, paa mau,
A e ku ae ma ke ao, ma ke ao.
2 Ke kani nui mai ka pu,
Ke kani weliweli no,
Hoolohe e, mai o a o ,
Ka aina me ke kai.
Ala'e, ala'e, na hoahanau,
E pau na leo kanikau,
E oli na naau a pau,
E ola a mau ae.
Cho—Kupaa mau, paa mau, & c.
3 E wiki no e hiki mai
Ia la maikai e alii ai
Ie su maluna a maanei,
A lanakila mau ;
E pau na kaua, na kue,
A pio ae na enemi,
A malu kuikahi e,
Mai nei a mau loa no.
Cho—Kupaa mau, paa mau, &c.
HA WAII.
HE MOOLELO KAAO
NO KE
KEIKI ALII NIEDA!
KA PUUWAI LIONA O KE AUPUNI O KONA
MAKUAKANE
KE ALII KA MOI LABODA!
A ME KE PIO ANA O KE
KUPUA GOGONA LAUOHO NAHESA!
He Nanea no na Au i Hala.—Helu 22.
OIA NO keia e ke alii, a ke kali aku nei no kou makemake. A ina ua nele oe i ka manao, alaila, o Nieda nei ka mea manao e hai aku, ke oluolu oe no ia mea."
"Ha! Ha! Mai hele mai me kau mau olelo ano hookoa," wahi a ua Moi nei. "Aole makou he poe hupo, aole hoi i nele ia mea he koa. Ae, he manao ko'u, a ke kauoha aku nei au ia oe e kukuli mai, a e hoolohe i ka olelo kauoha o ke alo alii, a mai hookuli ke lohe oe."
Ua liuliu loa o Nieda iloko o ka pa alii, a no ia mea, ua ano pihoihoi ka manao o na kanaka e noho mai ana me na puuwai hae mawaho o na ipuka pa, a lohe ia aku la na leo huhu, e kauoha mai ana i na kiai e hai aku i ke kumu o ko Nieda lohi loa. No ka ikaika loa o koi a ka lehulehu, ua ae ia kekahi kanaka o lakou e komo malu mai me ka lohe ole o ka Moi, a hoi hou aku me ka hai aku i kana mau mea i ike ai no na mea e pili ana ia Nieda a me ke kumu o kona lohi loa, a no ko lakou hooia ia ana aku e kekahi o lakou ponoi, ua ano maluhia hou iho la.
I ka puka ana mai o keia mau huaolelo ano hoonaukiuki a ka Moi imua o Nieda, ua ike ia aku la ka pii ana ae o ka ula wena o ka inaina maluna o kona mau papalina mohaha, a hoike mai la ka ikaika o ka pana o kona puuwai, ua paila ka hahana o kona keena inaina, a me na maka oolea oia i haka pono aku ai i ka Moi, kau ae la kona lima akau iluna o ka lewa, a pane mai la :
"Imua o ko na lani wale no ka'u lawe ana i ka hoohiki paa e kukuli iho ai, a aole hoi imua ou a imua paha o kekahi mea e ae maluna ae o ka ilihonua nei, koe ko'u makua, ka mea a'u i aloha nui ai."
"E hopu koke iaia a e lawe aku a haawi aku i ka haawina like me kona makuahine, me ka hoopaa hou ana i kekahi kaulahao nui ma kona a-i," wahi a ka Moi me ka leo haalulu i pane ae ai i ka leo kauoha imua o kona mau kauwa.
"Ma o ka mana o na lani, mai hoopa mai hookahi o oukou ia'u. O na lani ka palekaua o ke kanaka hewa ole, a nana no e hoopai mai i ke kanaka hewa. Ku aku, a mai kai hou mai hookahi kapuai, o moku auanei ke kaulahao o ka maluhia o ke aupuni o ko oukou mau oiwi kupuna, a kau io mai ka hoopai a na lani maluna o ka aina hanau o oukou e na makamaka."
I ka pane ana mai o Nieda i keia mau huaolelo, ku iho la na kauwa o ka Moi imua ona me ka oni ole mai imua, me he la, ua ike iho la no lakou i ke ano eehia o na olelo a me ke kulana o ke keiki alii kupaa a oiaio no hoi. Huli hou ae la o Nieda imua o ka Moi a pane aku la:
"Ina he manao kou e ke 'lii ka Moi, ke ae haahaa nei au me ka hoolohe pono i kau mau olelo ; a ina he makemake kou, ano ka manawa e hai mai imua o kau kauwa haahaa nei, a e hooko pono ia no ina he mea hiki ; aka, o kou hoao ana e hoopaa ia'u a e lawe pio hoi me ko'u hoomaopopo ole iho i ko'u hewa, ke hai aku nei au, he mea kupono ole ia nau e ka Moi e hana mai ai, oiai, he mea i ae ole ia e na kanawai o ke kanaka, a i hoole loa ia hoi e ka makemake o ka mana o na lani. Nolaila, ke noi hou aku nei au i ka oluolu o ka haku Moi, e hai mai i kona makemake."
"E lawe aku iaia e na koa," wahi a ke alii me ka inaina, "ina e nele ko oukou mau kapuai i ka hele ana aku imua a lawe pio i keia kanaka hookiekie, alaila, ano e hui ana ko oukou io me ka oi o ka'u pahikaua."
I ka lohe ana o na kauwa i na olelo hooweliweli a piha inaina no hoi a ko lakou Moi, ua hiki ole ia lakou ke hoolohilohi iho, a oni like ae la lakou me ka manao e hopu aku ia Nieda ; aka, mamua o ka holopono ana o ko lakou manao, aia hoi, ua like o Nieda me he liona hae la ka lele ana aku imua, a unuhi ae la me ka hikiwawe i kana wahi pahi poomuku, a me ka leo i hoike maoli mai i ka manao paio, i pane ae ai :
"E aua i kou inaina maluna o na kauwa au e ka Moi, a mai ae i ka huhu naaupo e kauwo hele i kou manao maikai. Owau kou hoa kamailio, a ia'u oe e hoao mai ai e hana ino, oiai, owau ke kumu o ke ala ana o kou mau manao huhu, a aole hoi o kau mau kauwa. Ke noi hou aku nei au i ka Moi, e haawi mai ia'u i ke kauoha, a e hooko no au i na he mea hiki."
Lele mai la ka Moi mai luna mai o kona noho alii me ka manao e hahau mai i kekahi o kana mau kauwa, aka, iaia i kokoke mai ai me kona inaina, ua lele hou aku la o Nieda a ku iho la mamua pono ona : "Mai lalau i kekahi o lakou, oiai aole na ko lakou manao iho ka hooko ole i kau kauoha, aka, ua haawi mai la na lani i ke kokua mahope o ka mea hewa ole, a ua hookomo mai la i ka weli iloko o lakou, a na ia weli e hoolauwili nei i ko lakou mau noonoo, a hiki ole ke hoopa mai ia'u. E pono oe e ka Moi e ninau mua aku ia lakou i ke kumu o keia hana kupanaha a hooko ole hoi i kau mau kauoha," wahi a Nieda.
"Ua piha makou i ka weli, no ka mea, ke hai mai nei ko makou lunaikehala, he make weliweli ka uku ke hoopoino a hoopilikia paha i ke kanaka hewa ole. Nolaila, ina i manao ka Moi e hoopai ia makou malalo o keia mau kumu, alaila, ke ae aku nei makou, a ke noi ae nei i ke aloha o ka palekaua o Nieda, e haawi mai i kana mau hoomaikai ana." Pela na kauwa i pane mai ai me ke kali ole i ka ninau aku a ka Moi.
I ka ike ana o ka Moi ua lilo kana mau olelo i mea ole, ua haawi aku la ia i ka olelo kauoha i ka puali koa o ke alo alii, e hoakoakoa koke mai. I ka manawa pokole, ua hooko koke ia mai la kana kauoha, me ko lakou makaukau i na pono a pau no ka hele ana i ke kaua, a ku ana imua o ka Moi.
"Ano, e na kanaka kupa o ka aina o na kupuna, ka poe hoi i komo ke aloha no ka laina alii kahiko, ke haawi aku nei au i ka leo kauoha imua o oukou pakahi, e hopu i keia Nieda, a me keia mau kanaka kipi ; no ka mea, ua hoole lakou i ka mana o ko oukou aupuni ; ua hoao e wahi i ka maluhia, a o ka hoohilahila ana no ia i ka inoa o ko oukou lahui a me ke aupuni a kakou i hiipoi mau ai a hiki mai i keia la ; nolaila, ano, e hopu ia lakou a pau, e hoopaa ia lakou me ka hao, a e hoo aku maloko o na rumi pouli o ko kakou papu paahao, a hiki i ka wa kupono a ko kakou aupuni i manao ai e kau aku i ka hoopai maluna o lakou."
I ka pau ana o ka ka Moi mau olelo kauoha, ua maki pololei aku la o Nieda imua o na koa, a haawi aku la i kona mau lima e hoopaa ia mai i ka hao, me ka pane ana aku, "Ina he oiaio, ua hoao au e wawahi a kipi paha i ka maluhia o ko oukou aupuni e na makamaka, alaila, ano, e lawe pio aku ia'u." A haawi aku la ia i kona mau lima.
"Aole o makou makemake e lawe pio ia oe e Nieda, aka, oiai makou malalo o na kauoha a ka Moi, he mea hiki ole paha ke aua iho, aka, e ae no makou ia oe e pale ia oe iho, ke hiki mai i ka wa a ka Moi e oluolu ai no ka hookolokolo ana ia oe."
"He manao ko'u e makemake nei e hai aku imua o ka Moi, oiai ua hoole mai ia i ka hoolohe ana i ka'u, nolaila, e lawe aku ia'u ano."
"He makehewa," wahi a ka Moi, "No ka mea, ua hooholo ia ka olelo, ina oia e hele a hoi nele mai me ka loaa ole ana o ke poo o ke Gogona, alaila o kona lilo pio ana no ia, a he make ka hopena."
Ua pane aku ka Moi i kana mau huaolelo imua o na koa me ka maalea nui, no ka mea, ua hoomaopopo iho la ia i ka huliamahi o na makaainana mahope o Nieda, a ina he mea hiki iaia ke hoomau i ka noho alii ana maluna o kona mau koa ponoi, a lawe pio a hoopaahao ia Nieda, alaila, o ka pau ana no ia o na kanaka.
Iloko o keia manawa, ua ike pu iho la o Nieda i ka pau o na kanaka mahope ona, a ua makemake ole ia no ia mea, oiai, o ka lanakila o kona makuahine kana mea i manao nui ai, aole hoi o ka hookahulihia ana i ka noho ana aupuni a oia kona mea i manao ai e haawi pio, a hiki i ka wa e maha pono iho ai ka manao o na kanaka, alaila, he ninau wale no ka manawa kona lanakila hou ana ; aka, i ka hoopuka ana mai o ka ka Moi i neia mau huaolelo, ua pii ae la ka inaina o Nieda, a pane aku la:
"Ano e lawe pio aku ia'u, a ina e hoohakalia oukou, e nele ana oukou i ke pio ole. Ua hele aku au me ka hoomanawanui mahope o na kauoha a ka Moi, ua alo i ke anu a me ke koekoe, ka welawela a me na makani kikiao o ka aina mamao ; a ua huli hou mai la mahope iho o ka hui pu ana me na inea he lehulehu, aka, i ka hoea ana mai imua o ka mea nana ka leo kauoha, o ka makana iho la keia e haawi ia mai ia'u, me ka ninau ole ia ana mai." I keia manawa, komo mai la na hoomanao ana iloko ona no kana mau moeuhane no kona makuahine, a paila loa ae la kona inaina. Haawi hou mai la ka Moi i ka leo kauoha e hopu ia lakou nei; aka, ua hoomaka ae la ko Nieda inaina, kulou iho la kona poo i ka honua, kulu iho la na waimaka, a me ka inaina nui oia i ea ae ai a pane hou mai la:
"E ku aku, o ke kanaka mua o oukou e hoopa ana i kekahi lihi o ko'u kino a me ko'u mau hoa e ku aku nei, e make oia e like me ka make o ka holoholona hihiu." Ku iho la na koa me ka naka haalulu, a hiki ole ke hana mai i kekahi mea. "Ke noi aku nei au ia oe e ka Moi e hoolohe mai i ka'u mau olelo, a pau ia, alaila, na ke au o ka manawa e hai mai na mea i ike ole ia."
(Aole i pau.)