Ka Lahui Hawaii, Volume I, Number 47, 18 November 1875 — Page 4

Na Ekalesia o Kawaiahao a me Kaumakapili.

Halawai kakahiaka, la Sabati .... hora 10½
Halawai po ..... hora 7½
Halawai Apana auina la ..... hora 3½
Kula Sabati ..... hora 9½

KUU LA HANAU.
[HAKUIA E G. W. KANUHA.]

1. Ua hanau au aole he lopa,
Aole hoi i palaleha a nopa,
Noloko mai au o ka Keawe,
Mai ka poli mai o Iliawe,
O keia ko'u la hanau,
No keaha aole au e oli?
e mele hoi me ka hauoli.
2. Mai kou loli ana e Mere,
Mai kou nipo ana e Iere,
Mai kou lia ana e Keoni,
Mai poina i hookahi honi,
No'u, no'u nei, no kuu ola,
A no kuu la hanau aloha,
Ka'u uwalo ia ke poina,
A palaka oukou iaia.
3. No keaha i pane ole mai o Mere,
No keaha i o ole mai o Iere,
O Keoni hoi aia la i hea?
I lohe ole ai i kuu oli lea;
I kuu mele poloai aloha,
I kuu mele poloai aloha,
Ha! Heaha ka'u e lohe nei!
Ha! Heaha ka'u e ike nei!
4. He leo, me he hanehane la,
He leo, me e ka nanahe la,
Ka'u ia e lohe nei.
He wena me he lama la,
He weo me he ahi la,
Ka'u ia e ike nei
O! O Mere, Iere a me Keoni,
Ke mele hele mai a oli
Mele hele a oli.
5. I aku au, "Kuhi au e nipo ana o Iere
"E lia ana la o Keoni ia Mere."
"Aole," wahi a Iere, "iuka au me Hiku
"I ke kui lei owi me Hiku,
"I lei hoohie no kuu Haku,
"Ua ike au ia oe e lia ana
"I ka po nei i ka pili o ka pawa."
6. "Mamua o ka puka'na o Hokuloa,
"Ua ala au e hii i ka po loa,"
Wahi a Mere i pane mai,
Aneane no e uwe mai.
"Ala mai e moe loa nei,
"Eia ko lei no ka puloku a I."
7. "I hea hoi oe e Keoni?" wahi a'u,
"Imi au ia oe i ka pohakau,
"I ka pewa i ka pili o ke kau,
"I ka po nei i ka newa o Hikapoloa,
"Aole nae oe i loaa."
"Mamua o ka leo o ka manu,
"Iluna au o na puu ekolu,
"E ho-a i ahi lama nou,
"No Mere, Iere, a me a'u,"
Wahi a Keoni.
8. Haawi pakahi mai lakou hookahi honi,
Haawai pakahi aku au i hookahi poni,
Hauoli lakou no kuu la hanu,
A owau hoi no kuu la hanau,
Pela i kulaia ai makou
A owau hoi me lakou.
A hiki i ka pawa pewa o ka la lipoa,
I ka nawa newa o ka la haoa.
9. Hea mai ka moae me ka malanai,
Hea ke Kaupu iluna o Alakai,
Nohea ke ala e moani nei,
Ka nae lauae i Paholei
"No Keaopolohiwa a Kane,
No Keaomololina a Lale,"
Wahi a Iere.
"Eia ko lei no Iwikauikaua,
Eia ko wahi o Kalakaua."

NA KULA SABATI.
NA HAAWINA.
Dek. 5. —Pauku Baibala.—Ioane 20:11—18.

11 Aka, ku ae la o Maria ma ka halekupapau mawaho e uwe ana. A i kona uwe ana, kulou iho la i ka halekupapau.
12 A ike iho la i na anela elua i kahiko ia i ke kapa keokeo e noho ana, ma ke poo kekahi, a ma ka wawae kekahi, ma kahi i waihoia'i ke kino o Iesu.
13 I mai la laua ia ia, E ka wahine, no ke aha la oe e uwe ai? I aku la oia ia laua, No ka mea, ua lawe aku lakou i kuu Haku, aole au i ike i kahi i waiho ai lakou ia ia.
14 Pau kana olelo ana ia mau mea, huli ae la ia ihope, a ike aku la ia Iesu e ku ana, aole nae oia i ike, o Iesu ia.
15 I mai la o Iesu ia ia, E ka wahine, no ke aha la oe e uwe ai? Ia wai la oe e imi nei? Manao iho la ia, o ka mea ia nana i malama ka mala, i aku la ia ia, E ka haku, ina ua lawe aku oe ia ia, e hai mai oe ia'u i kahi i waiho ai oe ia ia, a na'u no ia e lawe aku.
16 I mai la o Iesu ia ia, E Maria. Haliu ae la ia, i aku la ia ia, e Raboni, oia keia olelo, E ke Kumu.
17 I mai la o Iesu ia ia, Mai hoopa mai
oe ia'u; no ka mea, aole au i pii aku i ko'u Makua : aka, e hele oe i ko'u poe hoahanau, e i aku ia lakou, E pii ana au i ko'u Makua, a i ko oukou Makua; a i ko'u Akua, a i ko oukou Akua.
18 Hele aku la o Maria Magadalena, a olelo aku la i na haumana, ua ike ia i ka Haku, a ua olelo mai oia i keia mau mea ia ia.

———:o:———

P. 11. Maria hea keia? Heaha kona ano mua? He wahine pilikia mamua, ua uluhia i na daimonio ehiku. Ua manaoia oia ka wahine lawehala i komo i ka hale o Solomona, Luka 7:36—50. Ma ia manawa, ua mahiki aku Iesu i ua mau daimonio ehiku la, Luka 8:2; Mareko 16:9. A olelo Iesu, ua kalaia kou hewa, ua ola oe i kou manaoio ana, e hele aku oe me ka pomaikai. A eoopili mau oia ia Iesu mahope. Mahea oia i ka wa e kau ana o Iesu ma ke kea? Mahea hoi oia i ka wa i kau ia'i o Iesu? A ma ka noa ana'ku o ka Sabati, ma ke kakahiaka nui mahea oia? Heaha kana i hele ai i ka luakupapau o Iesu? Oia wale no anei ka i hele? Owai kekahi? p. 1, Luka 24:1. Loaa anei Iesu ma ka lua? p. 2. Heaha ka i loaa? p. 5—7. Manaoio anei o Perero ma? a aha aku la? p. 8—10. A pehea o Maria? p. 11.
P. 12, 13. Aole o Maria i ike ia Iesu, ike nae oia ia wai? mahea? Heaha ka laua ninau ana? Pehea hoi o Maria i pane aku ai? Aia la mahea Iesu?
14, 15. A i ko Maria huli ana ihope, ike oia ia wai? Ua akaka koke anei ia Maria, o Iesu no ia. No ke aha ka maopopo ole? Heaha ka Iesu i ninau ai ia Maria? Ehia ninau? A pane aku Maria pehea? Kuhi o Maria, owai ia mea? Makau ole Maria e a i ke kaumaha o ko Iesu kino. Hiki no ke waha, ke loaa.
P. 16, 17. Ma ke aha i ike ai Maria o Iesu ia? Ma ke ano o kona leo, he ano i maa ia Maria. Nani paha kona olioli, a manao oia e apo, e puliki, e honi ia Iesu a noho pu me ia a loihi loa, aka, ua papa mai Iesu, mai aha oe ia'u? Ke ano paha keia, ke ike mai nei oe ia'u, ua ala hou, ua olioli oe. Ua pomaikai oe, mai noho nae oe maanei me a'u, e holo a hai aku i na haumana, na hoahanau o'u, Petero ma, ua ala hou au, aole nae i pii aku i ka lani, i ko'u Makua, a i ko oukou Makua, e pii aku ana nae, i lohe lakou a hele mai a ike.
18. A pehea Maria? Hoio mama loa aku paha me ka ilihia i ka olioli, a hai aku i ko Iesu ala hou ana. Manaoio anei lakou a pau? Owai ka i kanalua?
Manaopili .—-Elua kumu hoohalike. 1. Maria Magedalene, he lawehala oia mamua, ua mihi, ua kalaia—a mahope pili mau ia Iesu. Pela kakou, ua hewa mamua—ua mihi, ua kalaia. E pili mau ia Iesu e aloha nui iaia, e launa ma ko Iesu mau wahi ma ke kea, ma ua halawai, ma na Kula Sabati, ma na ahaaina a ka Haku, me ka uwe ana, a makaukau e lawe i na mea kaumaha nona, me ka wikiwiki e puka e i na wahi e ike ai ia Iesu.
2. Iesu—E hoohalike me Iesu ma ke kala ana me ka olelo oluolu i ka poe i haalele ia kakou i ka wa pilikia, e hoi hou mai ana nae.
3. Mai noho a hauoli wale iho no ke loaa Iesu, e hele a hai aku i na hoa. E hele io ia nei e hai aku, ua ala hou Iesu, a ua lilo i mea e ola'i ko ke ao nei.

Kiaaina maikai.

          Owai la keia Kiaaina i mahalo ia, a i kapaia he Kiaaina maikai. O Nehemia kona inoa—o Hakalia ka ihoa o kona makua. No ka ohana kahuna ia i ka manao o kekahi poe, ma ka manao hoi o kekahi, no ka ohana alii o Iuda. Ua hanau o Nehemia ma Babulona i ka wa o ke pio ana. He luna lawe kiaha no Ahasuero ke alii o Peresia a me Media, a me Babulona, a me Kanaana; hookahi haneri a me ka iwakaluakumamahiku o kona mau Okana, mai Benegale Inia a hiki i Aitiopa.
          Ua hoolilo ia o Nehemia i Luna Iudaio i kukulu hou i na pa o Ierusalema, aka ua huhu ia mai oia e Sanebalata a me Tobia no kona hiki ana mai e imi i ka mea e pomaikai ai na mamo a Iseraela. Pane aku la o Nehemia, i aku la, "o ke Akua o ka lani, oia ko makou mea e pono ai, nolaila, e ku ae ai makou kona poe kauwa, a e hana aku." "He hana nui ka'u, aole au e haalele** aole au e auhee." Hakaka iho la ua Kiaaina maikai nei me na luna o Iuda no ka malama ole ana i ka la Sabati o Iehova. I iho la oia ia lakou, "No ke aha la oukou e noho ai ma ka pili pa (ma ka la Sabati,) ina e hana hou oukou pela, e kau aku ko'u lima maluna iho o oukou." Kauoha no hoi ia i ka poe mare i na wahine a e hoohemo ia lakou, a i ole ia, e noho lakou ma ka aina e.
          Houluulu iho la i kahi hookahi o na kanaka, a me na wahine, a me na mea lohe a pau, ku ae la iluna o Ezera ke kahuna ma ka awai, wehe ae la i ka buke, a ku ae la na kanaka, hoomaikai aku la ua kahuna nei ia Iehova i ke Akua nui, a lokahi iho la na kanaka "Amene." Alaila, heluhelu iho la o Ezera i ke kanawai o ke Akua ma ka buke, a ua hai aku la i ke ano i lohe lakou; a i kekahi la hoopololi lakou me ka mihi, a me ka hai aku i ko lakou hewa. I aku la kekahi, "E ku ae oukou iluna, e hoomaikai aku ia Iehova, i ko oukou Akua mau loa; e hoomaikai mau ia'ku kou inoa hanohano, o oe wale no Iehova." Nani! Nani maoli ka hana a ke Kiaaina maikai!! He kumu hoohalike ia no na Kiaaina a pau—e hahai kakou e na kanaka Hawaii mamuli o ke kumu hoohalike maikai, alaila, me kakou o Iehova, ke Akua a mau loa aku.

Na Paona o na Apana o Wahikapuniu.

E KA LAHUI HAWAII: Aloha oe:—
          Ua ike au ma kou Helu 44 o Okatoba, 1875, i na Apana o Wahikapuniu, mai ia Alpha Kekulaihaole mai, e ninau ana i na paona io oia mau apana laau kahiko. Eia iho malalo nei na paona (haina) like ole o na apana pakahi:
          Apana 1.—Haina. 6.37 + iniha ke anawaena o ka poka; 35-344+lbs. ke kaumaha o ka pokah.
          Apana 2.—Haina. 3 mile a oi ke kiekie o ua baluna 'la mai ka honua ae.
          Apana 3.—Haina. 5.273+milemeta (ma kau ana nae.)
          Apana 4.—Haina. 2.387+tona.
          Apana 5.—Haina O ka Poaha (Thursday;) he 15 5/8 kaulahao ka laula o ka muliwai o Rhine.
          Auhea oe e Alpha Kekulaihaole e kali oe, a mahope aku, oili aku na poka boma.
Owau iho no me ka Mahalo,
J. H. R. KINGSTON.
Makawao, Maui, Nov. 6, 1875.

          Ma ke ahiahi Poaono, Nov. 13, ma ka hale noho o S. P. Kalama, ua hoohui ia ma ka berita o ka mare o William Manchester (k.) me Lulu (w.) kaikamahine a S. P. Kalama; mahope iho o ka mare ana, ua nauwe aku na mea mare me ke anaina ma kahi o Ailuene Bush, no ka hoolawa ana iho i na kohi kelekele a ka puukolu.

MA RE.

          No v. 8—Ma Kukuihaele, Hamakua, mare ia e J. Pickanell o Kalehuawehe k. me Kamala w.

HANAU.

          No v. 4—Ma Kukuihaele, Hamakua, hanau o Miss Kahawai, na S. Keahua k me Puhipuhiili w.

MAKE.

          Iulai 16—Ma Moanalua, make o Palemo k.
          Au g. 2—Ma Kahauiki, make o Miss Ana.
          " 9—Ma Moanalua, make o Kawau k.
          " 17—Ma Moanalua, make o Kolea w.
          " 21—Ma Moanalua, make o Wahanuku k.
          O ct. 2—Ma Moanalua, make o Matalina k.
          O ct. 31—Ma Waialae, make o Keapo w.
          No v 3—Ma Waialae, make e Keiki k.
          No v. 11—Ma Palolo, make o Malohi k.

CECIL BROWN,
Loio a he Kokua ma ke Kanawai

A HE AGENA NO KA HOOIAIO ANA I NA Palapala no ka mokupuni o Oahu.
Helu 8 Alanui Kaahumanu, Honolulu, H. P. A.

LEWE RS & DICKSON
(O LUI MA.)

MEA KUAI PAPA A LAKO KUKULU HALE o na ano a pau.
AIA MA KE
Alanui Papu a me Alanui Moi
E LOAA AI NA
Pani Puka,
Puka Aniani,
Olepelepe,
Laka,
Ami Liilii,
Ami Loloa, &c.
PENA o na ano a pau,
Aila Pena,
Vaniki, &c.
NA BALAKI me PUNA,
NA PEPA HALE me na LIPINE HALE.
O na mea a pau maluna ae, e kuai makepono loa.
14]   ia aku no ke DALA KUIKE.  [1y

WIL DER & Co.,
(WAILA MA.)

AIA MA KE KIHI O
ALANUI PAPU me MOIWAHINE!
Ua hoolako mau ia me ke kuai ana aku i na
Papa me na Lako Kukulu Hale
O NA ANO A PAU.
NA PANI PUKA!
PUKAANIANI,
OLEPELEPE,
LAKA,
AMI-LIILII,
AMI-LOLOA
PENA o na ano a pau,
AILA PENA,
VANIKI, &c.
Na Balaki Pena me Puna,
Na Pepa Hale me na Lipine Pepa.
Aniani, Paakai, &c.
O na mea a pau maluna ae e kuai makepono loa ia aku no ke DALA KUIKE  7-1y

Laau Ola, Laau Ola.
AIA MA KAHI O
DILLINGHAM & CO.

KA LAAU KAULANA A
BISHOP SOULE!
HE LAAU HAMO MAIKAI KEIA!
a ua kaulana iwaena o ka poe nana i hoao; he mea e ola'i
Ka Hui, Lumakeke, Kikala-hanee, Mau-i, O a me na mai o ia mau ano.
UA HOAO IA KEIA LAAU A UA MAHALO nui ia. "He umikumamalua makahiki o ka oopa ana o kekahi mea, a i keia laau ua ola koke." Wahi hoi a kekahi, "He laau waiwai loa keia no ka hikiwawe o kona hoola ana." wahi hoi a kekahi, "Ua pau ko'u hoomaloka, ua hoao au i na laau e ae a pau, aole i ola kuu LUMAKEKE, he nui na makahiki o kuu kaa ana i ka eha, a i nei laau ua ola au, ola loa." Eia hou ka kekahi, "He nui na makahiki o ka waiho ana o kuu wahine ma kahi moe me ka mai, ua lapaau ia aole ola, a i ko maua lohe ana i keia laau kaulana, ua hoao ia, a ua ola koke ia iloko o na pule eono." E hoao ka poe mai i keia laau kaulana. Aia ma ka Halekuai o DILLINGHAM & Co., oia hoi ka hale o Kaimana.

Laau Kaulana
A KAUKA SUCH!
He laau e ola'i ke KUNU, ka eha o ka PUU, me ka HANO me na eha a pau e pili ana i ke AKEMAMA. Aia ma kahi o Dillingham & Co., ma ka Halekuai o Kaimana.
7-1y