Ka Lahui Hawaii, Volume I, Number 44, 28 October 1875 — Page 2

KA NUPEPA KA LAHUI HAWAII
HONOLULU, OKATOBA 28, 1875.

          ILOKO o keia mau la, ua hoea mai io makou nei na leo o na makamaka, e haawi mai ana i na olelo hoolanamanao no na mea e pili ana i ka kakou wahi elele nei, ma ke ano, e koi mai ana e hoonui ae i kona wahi kino. He hana nui keia, aole no he mama, aka, me ke kokua o na makamaka e lanakila ai a lilo i mea holomua mawaena o na paemoku o kakou nei. O ko makou iini nui keia, ua kamoe makou i ka manawa a me ka luhi mamuli o ka waele hoomanawanui ana i meheu nona mawaena o ko kakou lahui, a o ka hoomaopopo ana iho, ma na leo kupinai i hoea mai no ka loaa ana o kona home ma ko lakou mau puuwai, ua like ia me he lei momi 'la i kau ia maluna o ko makou hokua, a kupono ke kaena ae, "Ua luhi makepono, a waiwai hoi na manaolana."
          Ke noi aku nei makou i na makamaka e hookaulua iki, oiai, "na ke au o ka manawa e hoike mai i na mea i hoomaopopo ole ia." Ke hiki mai i ka wa kupono, mamua hoi o ke kaalo ana ae o na la hope o keia makahiki, e pahola aku no makou i na lono piha no na mea e pili ana i ka kakou wahi nupepa nei. Aka, hookahi nae a makou mea e hai e aku, oia hoi keia. Aole a makou mau makana kii ; a aole no hoi a makou mau olelo pakika ; aole a makou pelo. Aka, ke hiki mai ia manawa, e ku aku ana KA LAHUI HAWAII imua o Hawaii, me ka makana i oi ae mamua o na kii a pau. Aole makou e hoonawali aku ana ma ka hai ana i mea e puni mai ai ko oukou manao, aka, e waiho no makou a i hiki mai ia manawa, e hoike aku no me ka waiho kaokoa aku imua o ke akea.
          Ua hai ae nei makou, he hana nui keia, ae, he hana nui a koikoi io no ; aka, ina ua loaa ka pomaikai ia oe e Hawaii mamuli o keia luhi ; ina ua hooko io ia na iini o ko makou puuwai, alaila, aohe luhi, aohe hopo, a aohe kuihe ; a e lawe no makou i ka aumaka a hapai me ka hauoli, a e hooko i ka makemake o oukou e na makamaka, me ka oiaio.

          ILOKO o na mahina i kaahope ae nei, ua hapai ko kakou Moi i ke kumu hana hoole i ka ona. Ua haiolelo ponoi ke 'Lii no ia mea imua o ka lehulehu. A iloko o ia mau la, he nui na olelo mahalo i lohe ia no keia hana hou a ka Moi. Wahi a kela a me keia, "He mea hou keia, aole mai na'lii mua mai; he hana maikai loa keia a ka Makua o ka lahui ; akahi no a pono ; e pau ana ka ona ; ina pela ke 'Lii e alakai ai e hoopau i keia ino a me na ino e ae, e ola hou ana ka aina." Oia na olelo a makou i lohe ai iloko o ia mau la, a he nui wale aku, oia ano hookahi no.
          Ke manao nei makou aole i haule wale ia mau haiolelo ana a ke 'Lii. Ua ike ia ka hua. Aole kaulana loa ka ona i keia wa e like me na malama mua o keia makahiki. Aka, o ka noho'na maalahi loa, a o ke kahua kilohana e kaulana hanohano ai ko kakou  lahuikanaka, aole i loaa aku, oia keia: aole e ae ia kekahi kanaka ona e noho ma kekahi oihana o keia aupuni. Ke manao nei makou oia no ke kulana kahi a na haiolelo kue i ka ona e alakai ai. A he pono ke imi aku kakou i keia pomaikai nui no keia mua aku. Aohe kumulaau i kanu ia, a ulu, a hua, a oo ka hua i ka la hookahi. Pela na pomaikai e ulu ana noloko o ka hoole ana i ka ona—e hana a e kali. O na hua kakaikahi mua, a mahope aku ka hua nui ana.
         He pono anei ke haule iho ka noonoo maikai a me ke akamai o ke Aupuni malalo iho o ko ka poe mahiai, a me na kalepa, a me ka poe ona moku, me na mea akamai e ae ma ka imi waiwai? Aole. Aka, ina e nana kakou i kela poe, ua akaka aole mea noonoo pono o lakou e ae ana e lawe mai i ke kanaka ona a hoonoho iho maluna o kona waiwai i mea hooponopono ia waiwai, no ka mea, ua ike lakou he mea ia e poho ai ko lakou waiwai. Ua akamai ka poe waiwai ma ia mea. Aia a lawe mai ke Aupuni a me ka lehulehu i keia akamai o ka poe imi waiwai, alaila, aole e noho hou ka poe ona ma na oihana aupuni e hoohilahila ai i ka inoa o ke aupuni; alaila no hoi, aole e noho hou ka poe hana ino a me ka poe ona iloko o na hale ahaolelo e hoohilahila ai i ka inoa o ka lahuikanaka.

Na Aoao Elua.

          Mai ka wa kahiko loa mai a hiki i keia wa ua hookuku ia ka pono a me ka hewa, ka maikai a me ka ino, imua o na kanaka, a ua haawi ia mai i kanaka ka mana e koho i ka mea a lakou i makemake ai. Ua hoike ia mai keia mau mea elua, ka maikai a me ke ino, iloko o kanaka a ma o kanaka la e ike ia ai, a na kanaka no hoi e nana a e koho. Hookuku ia mai la e ke Akua o Abela a me Kaina, a ke ku nei ko laua mau inoa imua o kanaka a hiki i keia la, me he mau kia hoomanao la; o kekahi, no ka maikai; a o kekahi hoi, no ke ino. Ua ike pinepine ia keia mau aoao elua ma o na kanaka la o ke Kauoha Kahiko. A iloko mai nei o ke au Karistiano, ke kau pu nei na inoa elua, o Kristo ka mea hoola, a o Iuda ka mea kumakaia. Nee mai a kokoke ia kakou nei, ma ka Moolelo o Amerika Hui ua ike pu ia ka inoa o Wasinetona a me Arnold; o ka mua, he hoola ia no kona lahui; a o ka lua, ua hoao oia e kumakaia ia lahui iloko o na lima o  ka enemi. Ma ka Moolelo hoi o Enelani aole e poina ana ka inoa haumia o ka Moiwahine Marie, ka mea hookahe koko, a ke hookuku iho iaia me ka Moiwahine Vitoria, ua haule ino ka mua a ua kaulana a alohilohi ka lua ma na aina a pau o ka honua—o ka mua, he ino; a o ka lua, he maikai. Nee ae a i ka aina puni ole ma ka hikina, aia no ke hookuku ia mai la na elemakule elua, o Wiliama ke Alii o Geremania a me Pio Eiwa.
          Ke makemake nei au e hoomaopopo oukou, ke kue nei ka maikai me ke ino ma keia honua ; a iloko o ke kanaka a ma o kanaka la e hana ia nei keia kuee ana. Eia no iwaena o oukou keia hana. Ke hahana nei ka pono me ka hewa, a o ke kanaka ke kahua hana a me ka paahana. A ua kahea ia oukou e hoouka ma kekahi o keia mau aoao. Aole keia he hana pilikino; aole he kue kino. O na Kumumanao o ka pono, e kue ana me na manao ino. He kaua uhane keia. A iloko o keia kaua ua hookuku ia ke kanaka hana ino me ka mea hana maikai. Maanei aku ka oiaio, ka maemae, ke akahai, ka manaoio, ka manaolana, ke aloha; mao mai ka wahahee, ka haumia, ka hookiekie, ka hoomaloka, ka poeleele, ka inaina. Ua hookuku ia keia mau mea imua o ko oukou mau maka, e na makamaka. A o oukou no kekahi poe e hana nei ma kekahi o keia mau aoao elua. Aole mea o oukou i ku i ka wa. Aole hiki ia'u ke kauo lima ia oukou ma ka aoao a'u i makemake ai. ua haawi ia mai ia oukou ka manao e koho e like me ka mea i makemake ia. Mahea na kanaka opio o keia lahui e koho nei a e hana nei? Ma ka maikai anei, a ma ka ino anei? Ke makemake nei au e lawe oukou i keia ninau, a e hoomaopopo oukou i kahi a oukou e ku nei. Mamuli anei oukou o ka oiaio, ka maemae a me ka pono? Ina pela he poe hooulu oukou i na mea maikai, a ma o oukou la e pono ai ko oukou aina, a e mahalo ia ka inoa o ko oukou lahui. Ina aole pela ; ina aia oukou ma na hana ino, ma ka hookamani, a me ka hoolapuwale ana ia oukou iho, ua like ia me ko oukou lawe ana i ka pahi a hou i ka puuwai o ko oukou aina makuahine, me ka hoohilahila ana i ka inoa o ko oukou lahui. Ke hookuku aku nei au i ka maikai a me ke ino imua o oukou, ka pono a me ka hewa, ke ola a me ka make. E koho pono oukou. E hana naauao. Mai hoahu iho oukou i ke ino, ka hilahila a me ka lapuwale no oukou iho. Aka, e hoahu i na mea maikai a nui. "E hele me he poe keiki la no ka malamalama."  NA PALEKA.
Kawaiahao, Oct. 20, 1875.

Mai ke Kai Anu mai.

          Ma ka Poalua iho nei, ua ku mai ka moku okohola Europa , Kapena M'Kenzie, mai ke kai anu mai o Arita. O ka makamua keia o na moku huli hoi o keia kikina. Ua lawe pu mai oia maloko o kona opu, he 1,600 barela aila, 17,000 paona iwi, a he 3,000 paona niho uwalo. Ua lawe pu mai no hoi ia he mau lono maikai mai ke kahua lawaia mai ; e hai mai ana i ka malie o keia makahiki ma ia poai. Ua paa iki no kekahi mau moku i ka hau, a ili hoi kahi, aka, ua pau no nae i ka hemo hou a lanakila. Ua nui ka pomaikai o na moku, ua mahuahua na barela aila. Malalo iho e loaa no na lono no na lono no na moku. O na moku ma na kai Aukaki a me Koliaka, he mau lono kahiko ko lakou, aole i loaa mai ka lono makamaka, no ko Arita wale no na lono. A penei ka Papa Kuhikuhi malalo iho—1 NA INOA O NA MOKU KIAPA OKOHOLA. 2 NA BARELA AILA UWALO. 3 NA I'A, KOHOLA. 4 HUINA PAU O NA BARELA AILA KOHOLA:
1.   2.  3.  4.
  Walrus bbls.  Whales.  Total bbls
Bark Triton, Heppingstone  500  10  1200
Bark Onward, Hayes  600  14  1600
Bark Camilla, Nye  250 bbk  1150  13  2200
Bark Rainbow, Cogan    10  700
Bark Arctic, Whitney  150  10  850
Bark Cor. Howland, Homan  500  9  1100
Bark Florence  600  8  1200
Bark Jas. Allen, Keenan  650  10  800
Bark Java, Fisher  400  6  800
Bark Helen Mar, Koon  850  10  1550
Bark N. Light  250 sp  150 right  2  530
Bark St. George  1000  7  1500
Bark Illinois, Frazer  600  18  2000

He moolelo no Paulo.
HELU 8.

          A o Tito kekahi i hele pu. Iloko o keia hoounaia ana, ua loaa mai ia Paulo ka apono ia e ke Akua, he pakui hou ana mai no kona hoouna ia ana e ka Ekalesia o Anetioka. "Pii aku ia no ka hoike ia ana mai," (Gal. 2: 2, 3.) Ma ka lakou huakai i Ierusalema, ua hai aku lakou i ka Euanelio ma na wahi he nui, ua lilo i mea e hauoli nui ai ka naau o na hoahanau ma ka hoike ia ana aku no ka huli ana mai o na kanaka e. I ka hiki ana mai ma Ierusalema, ua kukakuka hou ia ke kupono e hoomau i ka malama ana i ke kanawai o Mose, oia hoi ke oki poepoe ana. Mahope iho o ke kukakuka nui ana, hoakaka mai o Petero i ko ke Akua hooholo mua ana i ka ninau ma ka haawi ana mai i ka Uhane Hemolele i ka poe i oki poepoe ole ia, ma ke ano i like pu me na Iudaio. Alaila hoike aku no o Paulo laua me Barenaba imua o ka Aha i na hana mana a me na mea kupanaha a ke Akua i hoopuka mai ai iwaena o ko na aina e. Na Iakoba, ka Peresidena o ka Ahakanaka i hooholo i na ninau nui imua o lakou. Ua kakau ia iho la keia olelo hooholo a ka Aha a hoouna ia aku la i na poe Karistiano o ko na aina e ma Anetioka, Suria, a me Kilikia, me ka hoike ana aku ia lakou, e hoakoakoa ia lakou mai na mea ai i mohai ia i na kii, a me ke koko, a me na mea i umi ia, a me ka moekolohe. Oihana 15 : 20. He kumu kupono i na poe Karistiano o ko na aina e, e hoakoakoa ai ia lakou i na mea ai i mohai ia i na kii; no ka mea, ma ia mau mohai a me na ahaaina o na kii, ua hana ia na mea hilahila ole e haumia ai ka noho maemae ana. I mea e hooi aku ai i ke kaumaha o keia palapala, ua haawi ia ua palapala nei i kekahi mau kanaka i waeia, oia o Iuda a me Sila; he mau mea i hoomaopopo lea i ka pono e hoohui ia na Karistiano Iudaio a me na kanaka e iloko o ka noho hoahanau ana. Ua olelo hoalohaloha mai ua palapala la no Barenaba ma laua o Paulo, ma ke ano, "he mau kanaka i mauna i ko laua ola iho no ka inoa o ko kakou Haku, o Iesu Karisto."
          Ma Gal. 2:9, i ike ai kakou, o kekahi o ka poe i haawi aku i ka lima akau o ka hoolauna ana ia Paulo ma keia manawa, o Ioane, ka haumana i aloha ia. Aole he wahi e ae i kakau ia ma ke Kauoha Hou, no kahi halawai ana o ua mau lunaolelo nei, aole no hoi i hoike hou ia mai no Ioane, a hiki wale i kona kipaku ia ana i Patemose, kahi i kakau iho ai oia ia Hoikeana.
          He mea e ka hauoli o na hoahanau ma Anetioka i ka hoi ana aku o Paulo a me kona mau hoahele, e heluheluia ka palapalapala a na lunaolelo a me na lunakahiko ma Ierusalema imua o lakou. He oiaio, he palapala "hoolana manao" no ia.
          I ka wa e noho ana o Paulo ma Anetioka e hoopapau hana ana ma ka hai ana i ka Euanelio, hiki mai la o Petero i ke kulanakauhale. No kekahi manawa iho o kona hiki ana mai, ua noa wale kona launa ana me na kanaka e i huli mai. Gal. 2 : 22. Aka i ka wa i hiki mai ai kekahi poe Iudaio i Anetioka, he poe i apono ole i ka mea i kakau ia, a na lunaolelo a me na lunakahiko i hoouna mai ai, ua huli aku la oia mamuli o ko lakou manao hoahewa, a hookaawale iaia iho mai na Karistiano mai o ko na aina e. No keia loli wale ona i ao akea aku ai o Paulo iaia (Gal. 2 : 14—16,) aole nae i lilo keia ao ikaika ana i mea e ano hou ae ai lakou. Ua ike hoi o Petero oia ka i hewa, a ua pono o Paulo; ua hookela ia aku kona aloha iaia no kona manaoio ; i mai no hoi oia nona maloko o kana mau Episetolo "E like me Paulo ko kakou hoahanau aloha," II Pet. 3 : 15.
          Mahope iho o ka noho ana no kekahi mau la ma Anetioka, hai aku la o Paulo i kona manao ia Barenaba, e hele hou, a e kipa aku ma na kulanakauhale a pau a laua i hai mua aku ai i ka olelo a ka Haku, a e ike hoi i ke ano o ka lakou mau hana. Ua oluolu o Barenaba i keia manao ana ; aka ua makemake nae ia o Mareko kekahi e hele pu me laua. No ko Mareko haalele mua ana ia laua, aole i ae aku o Paulo i kona hele ana me laua, a ua ala mai la ka hoopaapaa ana, he hoike ana mai "he mau kanaka laua o keano i like" me kekahi poe e ae, e like me ka laua i hai mua aku ai i na poe o Lusetera. (Oihana 14 :15.) No keia hoopaapaa ke kumu i kaawale ai ua mau lunaolelo la, a na ke Akua no i hooponopono mai i ka hoopalahalaha ana aku i ka Euanelio. Elua muliwai, aole hookahi, nana i hoohauoli i kona mau waikahe i ke kulanakauhale o ke Akua, Hal. 46 : 4. Lawe ae la o Barenama ia Mareko kona hoahanau, a holo aku la i Kupero. Koho ae la o Paulo ia Sila, ka mea i kapa ia o Silouano maloko o na Episetole, i hoahele nona, a hele aku la ma kana huakai Misionari alua, me ka haawi ia mai e na hoahanau i ke aloha o ke Akua. Oihana 15 : 40.  (Aole i pau.)

          I ka pule i ku mai ai na mokumahu lawe leta, ua kau ia mai ke kukui ma Kaimuki i kekahi o ia mau po, a ua hikilele ke kulanakauhale nei, me ka manao he mokumahu. Ua pau mai ka lehulehu ma ka uwapo, a ua oa ia na kukui o na boe , a holo loa aku la ke Pailata mawaho o ka nuku e kali ai. I ka hiki ana i ke aumoe a aneane e wehe kai oa, ua hoi mai la ka lehulehu, a hoi pu mai la ke Pailata, me ka manao ukiuki no keia hana paee a ke kapena huki laau o Kaimuki. Ua olelo ia ua huki ia ke kukui mamuli o na hana kolohe a hoopunipuni a kekahi poe, aka, ua lohe pololei mai makou, ua hoolele ae kekahi kanaka nona ka inoa o Kuheleloa i kekahi lupe nui ma Wailupe ma ia po me kekahi kukui, a ua ike ko Kaimuki poe i keia kukui i ka oni mai i kahi e, a ua manao he mokumahu, a kau ae la i na kukui.