Ka Lahui Hawaii, Volume I, Number 43, 21 October 1875 — Page 2

KA NUPEPA KA LAHUI HAWAII
HONOLULU, OKATOBA 21, 1875.

          PEHEA la kakou kanaka Hawaii e hana aku ai i ka poe hookae a hanaino mai ia kakou ma na olelo kuamuamu ino ? Ua kahea ia makou e halawai me keia ninau, a he mea pono ia makou ke hai pololei aku imua o ko makou poe heluhelu i kekahi mau manao e alakai pono ia'i lakou. Mamua aku nei ua hoolaha ia maloko o keia pepa he palapala e pili ana i keia mea. E hoike ana ia palapala no na olelo pono ole a kekahi kanaka (a he haole no ia) e lawelawe nei ma kekahi o na oihana pili pono loa i ka pomaikai o keia lahuikanaka. Ua kapa ia mai la ke kanaka Hawaii ma na inoa lapuwale loa. Ua hoahewa ia makou no ia palapala. Ua ike makou i kekahi o ko makou poe heluhelu, i keia pule iho nei no, ua kapa ia mai oia e kona haku hana he keiki na ka holoholona, me ke kahea pu ia o ka inoa o ke Akua e hoino mai iaia. I ka wa e halawai ai ka holoholona me na hoino e like me ia, e haalulu ana oia, he makau ; o kona ano holoholona ia. Aka, i ka wa e lohe ai ke kanaka i na olelo hoino e like me ia i hoike ia ae la maluna, e ala koke mai ana kona ano kanaka e kue ia mea. E ka Hawaii, heaha oe ? He kanaka anei, a he holoholona paha ? Ke i nei makou he kanaka oe, a he kulana kanaka kou. Aole hiki ia oe ke ae aku e waiho ia oe iho malalo o na olelo hoino lapuwale, e hoohalike ana ia oe me kekahi o na holoholona ino loa. O ka mea noho malie malalo o ia mau olelo hoino me ka hapai ole iaia iho iluna, oia ka i hana ino i kona uhane iho, a e aneane ana oia e haalele i ke kulana kanaka. Aole oe he kauwa kuapaa, e ka Hawaii; aole no hoi oe he ilio, e kamailio ia mai ai oe ma ia ano.
          Heaha ka mea pono a kakou e hana aku ai no keia mau hana ino ? I ka wa a kekahi kanaka e halawai ai me na hoino ana i olelo ia, eia kona manao mua, e hapai aku i kona lima akau ikaika a e hoopai aku, he manao hikiwawe ia. Aole makou e ao aku e hana pela. E aho e haalele aku i ka mea hana ino ; mai lawelawe pu ma ka olelo ino. Ina e haalele oe i kana hana, aohe mea nana oe e hoahewa. Aole oe i hoolimalima ia i holoholona nona. Aole oe i haawi ia oe iho iloko o kona lima e kapa ia mai ai he ilio, a e poku ia me he ilio la. Nolaila, mamuli o kou ano kanaka e ka Hawaii, a me kou aloha i kou uhane iho, mai ae aku oe e hooili ia mai na olelo kuamuamu lapuwale maluna iho ou, mai hoolohe aku. E holo mai ia mea aku. E lawe hana pu me ka poe maikai, a o ka mea hana ino mai, e haalele loa aku iaia, a e kiola aku i kana mau olelo. E hapai ae kakou ia kakou iho maluna o keia mau olelo hoino, me he mea la aole i lohe ia mea.

He Leta mai Mikonisia mai.
(Ho ra 1 o ka po keia wa.)

          Ua hiki mai ka Hoku Ao i Butaritari nei ma ka la 15 o Iulai nei, a he Kapena hou kona a me kana wahine, a me ka Elele a ka Papa Hawaii, a me na Kumu Hawaii a pau loa. Piha-u o luna o Hoku Ao.
          Ua hoomaka ka Aha ma ka la 16 ae, ua akoakoa mai na lala a pau o keia Misiona. Ua wehe ia ka hana me ka pule.
          Akahi—Ua heluhelu ia ka leta nui o ka Papa Hawaii, a ua lohe ia na manao a pau mai mua a hope. Ua nani wale no na manao a pau. A ua loaa ke kumu hana o ka leta nui a ka Papa Hawaii.
          1 No Ahia.  2 No Kaehuaea.  3 No ka waapa nui a ke Kapena nei e noi ai i kona mau hoa Karistiano i Nu Ioka i mea e kokua ai i keia Misiona nei.  4 No ka barena a me ka raiki a ka Papa Hawaii i hoouna mai nei na na Kumu Samoa.  5 No ke Kula Kahuna ma Apaiana.  6 No Rereo (Leleo,) no ka nee ae i ka Mokupuni e ae, no ka maimai o kana wahine i ka Mokupuni o Nonouti.  7 No'u, no ka hoihoi aku i na keiki i ke kula, a no ka make ana hoi kahi o ka'u wahine.  8 No na Hoike Kihapai, ua ike ia ka holo ana o kahi mau hana maikai, ma na kihapai. He nui wale na kumu hana mamuli ike oukou ia mea i kakau ia. He umi mau la i pau ma keia Misiona.
          Ua holo koke na noonoo ana no ka eleu maoli o ka Elele a ka Papa Hawaii. Mahalo piha ko'u i ka Papa Hawaii.
          Ua pau ko Ahia noho kahuna ana. Ua waiho aku keia Aha ia Kaehuaea na Ahaolelo o Ebon (Makala.) Ua ae keia Misiona ia Kaehuaea e kau maluna o Hoku Ao, me ka uku nae. Ua ae ia au e hoi aku i keia makahiki i Honolulu. Ua ae ia o Leleo e nee ae i ka Mokupuni o Apaiang. Ua ae ia ke Kula Kahuna e hoomaka koke no i keia makahiki.
          Ua hookahuna ia o Lono, a me Kanoho, ma ka la Sabati aku nei, oia ka la 25 o Iulai nei. Ua hoihoi aku nei o Hoku Ao i na Kumu i nehinei, i ko lakou mau Mokupuni, oia ka la 26 o Iulai nei.
          Mamuli lohe pau oukou i ka Moolelo o keia Misiona ke hiki aku ka Hoku Ao i o oukou la.
          Ua pepehi ia kekahi haole a make loa e kahi kanaka Apaiang, i ki pu ia. Ua koe kana wahine. Hulueu no hoi o Apaiang, me Tarawa i ka pepehi i na kanaka o na aina e mai. Aole i pau ae ke alina o Mahoe, kau hou iho la no keia maluna. Hoolana, a hookano keia mau Mokupuni i ka pepehi i na haole. Ke olelo nei kahi poe, aole e hiki i ka manawa ke pepehi ia lakou. Ua nui na manuwa i holo mai i o kakou nei aole e hiki. Pela io no.
          Ke hoouna nei au i keia mau leta ewalu i Liti. E loaa ana paha ia oukou. Na ke Kapena ekolu; na ka Elele a ka Papa Hawaii, elua; na ka Malamamoku o Hoku Ao, elua; a na'u hookahi. O ke aloha hou no ko oukou a nui a mau aku.
          Ua hoike hapa aku nei au i ka Moolelo o keia Misiona. E aho ia wahi hui niho, a na wahi opala manao o na aina e nei.
          Ua hoouna aku au i kahi leta a'u i Samoa ma ka lima o Binamu, no ka make ana o ka'u wahine.
Owau iho no o ko oukou Pokii,
J. W. KANOA.
Butaritari, Iulai 27, 1875.

Ke Alanui o ke Kanaka Opio.

          Maloko o ka mokuna iwakaluakumamawalu o Kinohi kahi i ike ia'i ka hihio o Iakoba, iaia i hele aku ai mai ka hale aku o kona makua, no ka makau ia Esau. E mahuka ana o Iakoba mai kona home aku, no ka mea, ua pilikia kona ola i kona kaikuaana. He hua keia o kona hoopunipuni ana. Hele aku la ia a ahiahi, aohe hale e moe ai. Lawe mai la i pohaku uluna no kona poo, a hiamoe loa iho la. Ia po, ike aku la oia ma ka moe he alahaka, ua hele kona welau a kau i ka lani; e iho mai ana na anela a e pii aku ana, a maluna o ke alahaka i ike aku ai oia i ke Akua o kona makuakane a o kona kupunakane. Kamailio mai la ke Akua iaia malaila, a ua hooikaika ia kona naau, ua hoolana ia kona manao.
          Aole kanaka opio ma keia paeaina i nele i ke alanui e waiho maopopo ana imua o kona alo; he alahaka, he ala e hiki aku ai iluna, a i ole ia ilalo. E nana pono kela a me keia i kona alanui. Ma na hana maikai e pili ai oukou iluna, a ma na hana ino e iho ai oukou ilalo. O ka hana, he alanui ia no oukou. Aohe ala e ae e hiki ai ke kanaka i ke kulana kiekie, a waiwai, a naauao, a kuonoono, o ka hana pono wale no. Aole e hiki i ke kulana i makemake ia i ka la hookahi, aole no hoi i ka makahiki hookahi. Ua like loa ko oukou alanui me ke alahaka; hoomaka malalo a pii aku iluna, e pii akahele, e hele naauao.
          Mamua aku nei, ua olelo mai kekahi kanaka noonoo ia'u, (he kanaka Hawaii no ia.) "Ua like ka noho'na malamalama imua o ko Hawaii nei lahui me kekahi aina papu nui maluna o ke kuahiwi kiekie ; ua hoomanawanui na keiki Hawaii i ka pii ana aku me ka eha a me ka luhi, a kau iluna o keia aina maikai, aole lakou i hele aku i kona loa a me kona palahalaha e ako ai i na punawai a e lawe mai i na hua ai maikai ; aka, o ka huli koke mai la no ia a kupopou poo ilalo, o ka haule ino loa no ia." Ua oiaio no ka olelo a keia kanaka noonoo o ko oukou lahui, ke hoopili ia i kekahi poe i hala. Aka, ke noi aku nei au ia oukou, ka poe i lohe i kuu leo, e hoolilo oukou i keia i olelo oiaio ole ma keia hope aku, a mau loa. I poe hele mua oukou, aole i hope.
          Elua mea e pono ai ke alahaka. E kukulu ia maluna o kahi paa, pakika ole, i ole nee kahi malalo ke pii aku oe. Ina e nee ke kumu mahope o ko pii ana, alaila, e haule auanei. Pela e hookumu ia'i oukou maluna o kekahi hana pono, e pono ai. Aia a loaa ia hana, o ka hoomaka ana no ia o ko oukou alanui. I pono ka hoomaka ana, i maemae, i hana hilahila ole, alaila, hoomaka aku e pii. O ka hookumu ana i ka oukou mau hana maluna o ke kahua paa o ka Pono, oia kekahi mea e pono ai ko oukou alanui. A o ka lua oia keia, e kau aku ka welau o ko oukou alahaka ma ka lani, e like me ko Iakoba. Mai hana oukou no keia ao wale no, ina pela, mahope ike oukou ua pokole ke alanui. E hiki ana oukou ma kona welau hope, a aohe wahi e hele hou aku ai. E kuleana oukou ma ke ao pau ole. E komo ka hua o ka oukou hana ana ma keia honua iloko o ka lani. E pii oukou i kela la i keia la ma na hana maikai, a komo aka iloko o na palena o ka aina ma o. E kau aku i kela welau o ko oukou alahaka ma ka lani, a na ke Akua o Iakoba e haawi mai ia oukou na olelo hoomaikai.
          E na hoa'loha, na pokii, he mea nui ka ike ana o ke kanaka i ka hana i kupono iaia. Ua noonoo mua ke Akua i hana no kela a me keia ; o ka hana a ke Akua i noonoo ai no oukou, oia ka hana e pono ai. Oia ka mea i ike i ka hana i hiki ia oukou. E imi oukou i ka hana ana i koho ai, alaila e pono ana. Mai makee i na oihana hanohano. O ka hana a ke Akua i koho ai no oukou, oia ka hana hanohano. O ka mea kuko ika oihana kiekie, me kona makaukau ole no ia mea, he lapuwale ia. Ua like ia me ke keiki liilii naaupo, i hookau ia maluna o ka lio holo, a maluna o ka mikini mahu paha, aole hiki ke hooponopono, a o ka hopena, he pilikia ka mea hana a poino pu me ka oihana. Ua ike au i na oihana maikai he nui, ua hoolapuwale ia mamuli o na hana kupono ole o ka poe nana e lawewale, a ua hoino pu ia ka mea lawelawe me ka oihana. Na ka Makua ma ka lani e alakai oukou ma ka hana ana i koho mua ai no oukou, oia ke alanui e hiki ai oukou i ka pomaikai mau loa.  NA PALEKA.
Kawaiahao, Oct. 13, 1875.

Ua hoike ia

          Ke Kula Sabati o Waikane ma ka la 14 iho nei o Oct., i ka hora 12 me 30 o ke awakea, malalo o ke alakai ana a ko lakou Kahu Kula Sabati (John M. Kawailiula) i kokuaia e ka eleu o na hoa i hui pu ma ka hapai ana. Mahope iho o ke komo ana o ka huakai i ka luakini, ua mele ia mai e ka Papa Himeni kekahi mele, "Papale Alii," a puleia e ka Rev. D. Kekiokalani.
          Ua hoikeia ke kula me ka eleu nui ma na mea a lakou i hoomakaukau ai no ka uniki ana. Ua mahele ia ehiku papa, a pela no ka nui o na kumu, oia o Joseph Kaoheloahi, Joseph Kaukeano, Papaai, Puuweuweu, S. Kailaa, P. Kahaku a me J. M. Kawailiula. Ma ka pau ana o ka hoikeia ana o kela papa keia papa, e mele ia'na he himeni ; a oia mau himeni a me kekahi mau himeni e ae a ka Papa himeni e mele ai, ua mahalo wale ia no.
          Ua luluia no hoi na $43.80, houluulu ia me $1.75 ka loaa o kekahi mau pepa i kahaia me na wai hooluu like ole e J. Mana a me Joseph W. Keanuenue, ma ke ano kudala, ua like me $45.55, a o keia puudala, no kekahi pilikia o lakou. He mau manao paipai kekahi na Rev. Kaawa a me Rev. D. Kekiokalani, e hoolana ana i ka manao e hoomau. Puleia e Rev. Waiwaiole, a hookuuia mawaho e paina ai i na mea i hoolakoia. O keia iho la ke ano nui o na mea i ike ia ma ke Kula Sabati. Ma keia wahi, ke haawi aku nei au i ko'u mahalo ia Hattie Kaehu a me kona ohana, he poe i puili maluhia mai i keia poe makaikai no na la malaila. Ua inu a kena i kona lokomaikai piha, ua ai hoi a lawa i kona oluolu. Owau iho no me ke aloha i na paahana o keia nupepa.
JAMES H. MAKAIKAI.

NA LETA A NA MAKAMAKA.

          —Eia kau e Z. K. P Nani, o Kaunakakai, Molokai, no ka piha e o ka pepa o keia hebedoma, ua hookauluaia a keia pule ae.
          —Ua loaa mai kau e J. M. Kaiwipunakea, o Kainaliu, Kona, Hawaii, ke hiki, e hoea aku no.
          —Eia kau e Hanakaulani Home, e pane ana ia J. Haumana, o Wailuku, Maui, no ka huhewa o kana mau kuhikuhi ma na Buke, oiai ua ike oe aohe maloko o kau mau buke oia ano, wahi au. Ua komo e kahi waa.
          —Ua heluhelu makou i kau e Chas. N. Kualii, o Puna, nona ka manao pane "He hookamani io no," e hoomaha iki nae.
          —Eia mai a hoea aku kau e Samuel K. Opio, o Lahainalua. Ua mahalo makou.
          —Mahalo makou ia oe e Chas. Kaleoiki, no kau mau wahi makana, e hoea aku ana.
          —Eia kau e L. Maui, a ua minamina makou ma ua ulu kekahi manao kuee mamuli o ia mea. Ina e hiki, e hoea aku no.
          —Ua piha loa kahi elele a ua hookaulua ia kau e S. K. Poohea Opio, o Lahainaluna,
          —Eia no kau e Kalakiela Opio, o Honuaula, Maui. He makehewa paha ka nuku wale iho no, oiai he luna hooko pono no ko ia wahi. Iaia e kamailio aku ai a i hana ole ia ka pono kanawai kaulike, alaila kuleana ka nuku ana. Aohe o kakou wahi mana ilaila.
          —Ua loaa mai kau e Hoa'loa a me Haohao, ano ka piha loa o keia pepa, ua hookaulua iki ia.
          —O na makamaka i hoouna mai i na Mare, a me na Make, e nana malalo o ko lakou mau poo.
          —No na makamaka ke aloha me ka mahalo piha.

Ka Hula o Haena.

E KA LAHUI HAWAII E; Aloha oe:—
          Ia'u e noho ana ma na kaiaulu o Haena nei, e nana ana i na alo pali o Makana, a e nanea ana i ke ahe olu a ka makani o ka aina, e hoonanea ana i ka lau o ke Kawelu. A o ka mea hoi a'u i mahalo ai, o ka hai maikai mai a ka nalu, o ka hoa'loha ka nalu a Lohiau i hee ai i kona au i hala, ma ko kakou moolelo kaao kahiko. Aia hoi, ike aku la au i na kane, wahine, a me na kamalii, o kuu aina malihini a'u e noho nei, e kai a huakai ana i ka hale hula. Aloha ino! E Haena—e, mai eha iho, e noonoo iho. Eia ke au o ka manawa la imua, aia oe ke kue hope nei a ku ia aku i Kanapo. Maanei kakou e na haipule e ike iho ai i ke ino maoli o ka hula a koonei poe, e hele nui nei maloko o keia mimilo ke hele la a le-i Kohala ka nuku na kanaka; aia hoi a kani aku ka pu halawai, o ka naholo aku la ia a nalo aku la.
          "E hele mai oukou e ka poe luhi, a me ka poe kaumaha a na'u oukou e hoomaha aku." Eia hoi, e nana oukou ma Iakobo 5:5 . Nolaila, ke hopohopo nei au i ka ke kaula Ezekiela 33:3—5. E nana i keia kuhikuhi.  Me ke Aloha,
D. P. PUNIAWA.
Haena, Kauai, Oct. 11, 1875.