Ka Lahui Hawaii, Volume I, Number 42, 14 ʻOkakopa 1875 — Page 4

Na Ekalesia o Kawaiahao a me Kaumakapili.

Halawai kakahiaka, la Sabati .... hora 10½
Halawai po ..... hora 7½
Halawai Apana auina la ..... hora 3½
Kula Sabati ..... hora 9½

NA KULA SABATI.
NA HAAWINA.

O ct. 31.—Na hoaaloha me na enemi o Iesu. Ioane 15; 11—19.
11 Ua olelo aku au ia mau mea, i mau ai kuu olioli no oukou, i mahuahua ai ko oukou olioli.
12 Eia ka'u kauoha, i aloha ai oukou i kekahi i kekahi, e like me a'u i aloha aku ai ia oukou.
13 Aole ko kekahi kanaka aloha i oi aku i keia, o ka waiho aku a kekahi i kona ola no kona mau hoaaloha.
14 O oukou ko'u mau hoaaloha, ke hana oukou i na mea a'u e kauoha nei ia oukou.
15 Aole au e kapa hou aku ia oukou he poe kauwa ; no ka mea, aole e ike ke kauwa i ka mea a kona haku e hana'i ; aka, ua kapa aku au ia oukou he poe hoaaloha ; no ka mea, ua hoike aku au ia oukou i na mea a pau a'u i lohe ai i ko'u Makua.
16 Aole oukou i wae mai ia'u, aka, owau kai wae aku ia oukou, a i hookaawale ia oukou, i hele ai oukou, a e hoohua mai ai i ka hua, a i mau ai hoi ko oukou hua ; i haawi mai ai ka Makua ia oukou i ka mea a oukou e nonoi ai iaia ma ko'u inoa.
17 O keia ka'u e kauoha aku nei ia oukou, e aloha aku oukou i kekahi i kekahi.
18 Ina e inaina ko ke ao nei ia oukou, e hoomaopopo oukou, ua inaina e mai ia ia'u mamua o oukou.
19 Ina no ke ao nei oukou, ina ua aloha mai ke ao nei i kona iho ; aole nae no ke ao nei oukou, aka, ua wae aku au ia oukou noloko mai o ke ao nei ; no ia mea, ke inaina mai nei ko ke ao nei ia oukou.

———:o:———

P. 11. E hoomau ana Iesu i kana kamailio ana ma ke alanui. Ma kela Sabati, ua lohe kakou i kekahi mau olelo ana no ka pili ana o na haumana iaia, no ka hoohua ana i na hua maikai a nui. Ma ke aha e mau ai ko Iesu olioli ia lakou? Ma ke aha hoi e mahuahua ai ko lakou olioli iaia? Olioli anei Iesu ke malama ole oukou iaia? Olioli anei oukou ke pili ole a malama ole ia Iesu? Pehea ka makua a me ke keiki, ke hookuli a haalele ke keiki?
P. 12. Heaha ke kauoha no ke aloha? Me ke aha hoi e aloha'i kekahi i kekahi?
P. 13, 14. Ke ano o ko Iesu aloha, heaha? Me ia anei oukou e aloha'i, e waiho i ke ola o kekahi no kekahi? Ua waiho Iesu i kona ola no na hoaaloha wale no anei? Pehea Roma 5 : 6—8? He poe hewa no ka poe hoaaloha mamua, a mahope, huli mai a lilo i poe pono. He poe hoaaloha oukou ke aha?
P. 15. Ua kapaia na haumana i poe aha mamua? A e kapaia ana he poe aha ma ia hope mai? Heaha ka like ole o na kauwa me na hoaaloha? Elua ano o na kauwa, hai mai ia mau ano elua. He poe kauwa no ka poe pono na Iesu, he poe kauka hanohano no nae, e like me na hoaaloha. Mahea Iesu i hoike ai, a e hoike ana i kona mau manao i na haumana? Ma kana olelo wale no anei? A ma keia ao wale no anei?
Heaha kekahi mau manao a Iesu i hoike mai ai ia kakou?
P. 16. Ko Iesu wae ana i na haumana, heaha ia wae ana? Kona hea mua ana ia lakou e hahai mamuli ona. A, o kona hea, a wae, a hookaawale ana i umikumamalua, i poe luna olelo, i poe Aposetole. Nana Mataio 4:18—22. 10:1—15. No ke aha Iesu i wae ai a hookaawale ae ia lakou? 1 I hoohua. 2 I mau ka hua. 3 I loaa na mea i noi ia ma kona inoa. Owai ka i wae mua? Iesu? na haumana? Owai ka ke aloha mua ia Hawaii nei? Na Hawaii nei anei i kahea aku ia Amerika e kokua mai? I nahea ka wae mua ana o Iesu i kekahi poe i poe haumana nana? Epe-
so 1 : 4. Pehea e moopopo ai. Ua wae e ia kekahi no ke ola mau loa?
P. 17, 19 No ke aha ke kauoha pinepine ana a Iesu e aloha kekahi i kekahi? No ka mea paha, he mea nui loa ke aloha, oia ka mea i oi ae. Ina loaa ole ke aloha, pehea? Ola anei? Pehea ko ke ao nei i ka pono io? Owai ka i inaina mua ia? He mea mau anei ka hoomaau ana o ko ke ao nei i ka Iesu poe haumana? Ae, ke noho haipule io. 2 Tim. 3 : 12. Ioane 16 : 33.
1 Ioane 3 : 1, 13. Pehea hoi ka poe i makau i ka noho hemolele loa, o henehene ia mai, a hoomaau ia, a, nolaila, hoolauna lakou me ko ke ao nei? 1 Ioane 4:5. Heaha na kauoha ma Roma 12 : 2. 2 Kor. 6 : 16—18?

HEAHA LA NA HANA KUPONO
e ao aku ai i na Kaikamahine ma na Kula
Kaikamahine.
[NA REV. J. H. MAHOE.]

          O na Kula Kaikamahine, malaila i ao ia aku ai na kaikamahine i na mea naauao ma na buke hoonaauao, a ua loaa ka ike i kekahi poe ma ka olelo haole, a ma ka olelo Hawaii no hoi, a he waiwai nui no ia o ka ike i na buke, o ka makemake no ia o ka naauao a me ka ike.
          Aka, ma ka ninau ke Kumuhana, "Heaha la na hana kupono e ao ia aku ai i na Kaikamahine ma na Kula Kaikamahine?"
          He mea moakaka paha ke hai aku i na hana kupono a na kaikamahine ke ao ia lakou ma na kula kaikamahine, a he ninau kupono keia a he pono ke hai ia aku kona haina.
          Eia iho na hana kupono, i na he mea ia e pono ai ke alakai ana i na kaikamahine.
          1. E ao ia na kaikamahine i ka noho ana Karistiano, he mea nui keia, ina i hookomo ia aku ka pono o ke Akua i ka naau o na kaikamahine hoomaa ia ma ia mea a lilo i poe makau i ke Akua a lawelawe mau ma ka pono i ka wa e noho ana ma ke kula, alaila, i ka puka ana mai ke kula aku, ua mau ka malama i ka pono me ka naauao no hoi, alaila, he kahua ia o na pono he nui wale e ili mai ana mahope aku ; Kau mau mai na maka o ke Akua maluna o na kaikamahine e noho pono ana, a nana e alakai ia lakou ma na hana kupono e ola'i ke kino a me ka uhane.
          2. E ao ia aku i na mea pili kino, e laa ka hana ana i na lole ponoi o na kaikamahine ; e ao ia i ka helehele lole ana i ike i na loina o ka helehele lole ana o na ano a pau. E ao ia no hoi i ka humuhumu lole maikai ana i nani na lole ke nana ia aku. E ao ia no hoi i ka hana i na palule (k.) a me na lole wawae (k.) a me na kuka, a pela aku. E ao ia no hoi i ka holoi lole ana a maemae maikai, a me ka aiana lole i maa i ka aiana lole me ka maikai. E ao ia aku no hoi na kaikamahine i na loina o ka malama pono ana i na lole, a me na kapa moe, i ole e kapulu wale ia na lole a lilo koke i mea ole. He mau hana kupono wale no ia i ke ao ia aku i na kaikamahine.
          3. E ao ia na kaikamahine i ka hooponopono hale ana, i walea i ka malama hale ana, aole e noho hoopelapela o loko o ka hale, a kapulu, aka, e noho hoomaemae ka pono, a oia ka mea e lilo ai i mea naauao i ka noho haku hale ana mahope aku. I manao nui ka wahine i kona hale o kona home ia, kahi e noho ai o ka oluolu ke hana pono ia.
          4. E ao ia aku no hoi na kaikamahine i na rula o ka malama ohana ana, i hiki ke malama pono i ka ohana mahope aku i ka wa e wahine ai, i naauao i ka malama keiki ana, a me ka hooponopono ana, i hoomalu pono i ka ohana i ka wa e hiki aku ai i kona manawa, "no ka mea, o na makuahine, oia na lunakanawai no na lahuikanaka."
          5. E ao ia aku na kaikamahine i na rula o ka hookipa ana i na malihini; i ike i na mea e pono ai i ka wa makua, alaila, e maa no i ka hookipa ana ma na ano naauao; aole hoi e ike ole ma ia ano, no ka mea, i ka wa e kipa ia mai ai kona hale e ka poe maikai, aole i ike i na rula, oia noho lolo wale iho no me he mea la ua noho ia e ke kuamu, oia nana wale mai no o na maka, aole ka eleu a me ka miki iloko oia wahine, he mea hilahila ia, a he mea olelo ia me ka hoohenehene ia, ma kona kulana he wahine naaupo, a me ka makona o kona noho ana.
          6 E ao ia na kaikamahine i ka oihana kuke i na mea ai, he mea kupono loa ia no na kaikamahine e ike i ka hana mea ai, a me ka hooponopono ana i na mea pili i ka papa ai o kona hale ke hiki i ka wa pono, alaila, ua makaukau no, aole e kali ka ike ia hai a me ka pono o ka lawelawe ana o na mea ai, no ka mea, ua lawa ia mau mea iloko ona, no kona noho ana aku me he hoalawe hana la ma na mea maikai a pau.
          7 E ao ia aku na kaikamahine, e hoomanao i na rula o ka noho ana ma ke kula, ke kulana noho ana lede, i mau ka noho ana me ia ano, a hiki i ka puka ana mai ke kula aku e malama no, he mea maikai ia i ka noho ana iwaena o kanaka, i ole e haalele i ka mea i ao ia mai, aka, i hoomau no i na loina o ka noho maikai ana, i wawa ole ia kona inoa, aole hoi e like me ke ano o ka wahine naaupo, e aea hele ai i kauhale, me ka noho ulala, a pau ae la ka nani o kona kulana, a heaha la kona hopena? O ka hoowahawaha ia, a me ka pau o ka inoa maikai.
          Oia iho la kekahi mau hana kupono e ao ia aku ai i na kaikamahine. He nui aku no paha na hana kupono e ao ia aku ai na kaikamahine ma na Kula Kaikamahine.
          Ke hana nei pela kekahi mau Kumukula ma kekahi mau Kulahanai Kaikamahine. A ina i hooko pono ia keia mau hana a pau, ma na Kulahanai Kaikamahine ma keia mua aku, alaila, e puka aku ana na makuahine maikai o "Ka Hooulu Lahui," ka io paha ia o ke AU O KALAKAUA, ka manawa o ke aupuni Hawaii. Ka piko ponoi o ka Pae Aina Hawaii? Na ke Akua Mana Loa e hoomau i na Kula Kaikamahine.

HOOLAHA A KE KOMISINA PALENA AINA.

          NO ka mea, ua waiho ia mai i keia Keena, e ka HON. H. A. WIDEMANN kekahi palapala nonoi, e hooponoponoia na palena o ke Ahupuaa o Waihee, e waiho la ma ka Apana o Wailuku, Mokupuni o Maui. Nolaila, ke haiia aku nei i na mea a pau e pili ana e hooloheia ana ka Hale Hookolokolo ma Wailuku, ma ka hora 10 o ke kakahiaka.  JNO. M. KAPENA,
Komi sina P. A. o Maui a me na Mokupuni e pili ana.
Lahaina, Sept. 1875.  41 3ts.

          No ka mea, ua waiho ia mai i keia Keena e WM. H. BAILEY kekahi palapala nonoi, e hooponoponoia na palena o kekahi Apana Aina ma ka Ahupuaa o Makaehu, Kula, Apana o Makawao, Mokupuni o Maui. Nolaila, ke haiia aku nei i na mea a pau e pili ana, e hooloheia no keia nonoi ana ma ka Poaha, la 14 o Okatoba, M. H. 1875, ma ka Hale Hookolokolo ma Wailuku, ma ka hora 10 kakahiaka.  JNO. M. KAPENA,
Komi sina P. A. o Maui a me na Mokupuni e pili ana.
Lahaina, Sept. 1875.  41 3ts

          No ka mea, ua waiho ia mai i keia Keena, e HON. C. KANAINA kekahi palapala nonoi, e hooponoponoia na palena o ka aina o Puhiawaawa, Kaohe, Puuohala, Lemukee, Manienie, e waiho la ma ka Apana o Wailuku, Mokupuni o Maui. Nolaila, ke haiia aku nei i na mea a pau e pili ana, e hooloheia no keia nonoi ana ma ka poalima, la 15 o Okatoba, M. H. 1875, ma ka Hale Hookolokolo ma Wailuku, ma ka hora 10 o ke kakahiaka.
JNO. M. KAPENA,
Komi sina P. A. o Maui a me na Mokupuni e pili ana.
Lahaina, Sept. 1875.  41 3ts.

LEWE RS & DICKSON
(O LUI MA.)

MEA KUAI PAPA A LAKO KUKULU HALE o na ano a pau.
AIA MA KE
Alanui Papu a me Alanui Moi
E LOAA AI NA
Pani Puka,
Puka Aniani,
Olepelepe,
Laka,
Ami Liilii,
Ami Loloa, &c.
PENA o na ano a pau,
Aila Pena,
Vaniki, &c.
NA BALAKI me PUNA,
NA PEPA HALE me na LIPINE HALE.
O na mea a pau maluna ae, e kuai makepono loa
14]   ia aku no ke DALA KUIKE.  [1y
WIL DER & Co.,
(WAILA MA.)
AIA MA KE KIHI O
ALANUI PAPU me MOIWAHINE
Ua hoolako mau ia me ke kuai ana aku i na
Papa me na Lako Kukulu Hale
NA PANI PUKA!
PUKAANIANI,
OLEPELEPE,
LAKA,
AMI-LIILII,
AMI-LOLOA
PENA o na ano a pau,
AILA PENA,
V ANIKI, &c.
Na Balaki Pena me Puna,
Na Pepa Hale me na Lipine Pepa.
Aniani, Paakai, &c.
O na mea a pau maluna ae e kuai makepono loa ia aku no ke DALA KUIKE  7-1y

MAKEMAKEIA!

          I Kanaka akamai i ka hana bipi hou, akamai i ka hoolakalaka i na bipi ohi hanau mua. Me ke akamai oluolu nae e hana ai.
          Ina he kanaka noho pono, eleu, hoolohe, e ninau ia  S. N. EMERSON.
Waialua, Oahu.

G. WEST!

          HALE HANA KAA HOLO LEALEA ME na kaa hali ukana. E hana hou ia no ho na kaa nahaha no ka uku oluolu. E kapiliia no kapuai lio, no ka uku kupono. Ma ka hale hana mua o Mr. Benfield, ma ke Alanui Alii  7-1y

NA BUKE
I HOOLAHAIA E KA PAPA HAWAII
—ME KE—
KUMUKUAI O KELA ME KEIA.

BAIB ALA HEMOLELE NUI ILI GULA NANI me na kuhikuhi ma na aoao ..... $12.00
Baibala Hemolele Nui ili eleele kaekae wai gula ..... 5.00
Baibala Hemolele uuku iki iho kae wai gula ..... 8.00
Baibala Hemolele uuku iki iho kae wai gula ..... 4.00
Baibala Hemolele ili eleele ..... 2.00
Kauoha Hou ili gula nani me na kuhikuhi ..... 3.00
Kauoha Hou ili eleele kaekae wai gula ..... 1.00
Kauoha Hou ili eleele ..... .75
Kauoha Hou Hapa Haole ..... .75
Moolelo Ekale sia ..... .50
Haiao ili lahilahi ..... .10
Hele Malihini ana ..... .25
No ko ke Akua ano ..... .25
Hoike Palapala Hemolele ..... .25
Moolelo o Hene ri Opukahaia ..... .15
Hoike Akua ..... .25
Wehewehehala ..... .25
Ninau Hoike ili manoanoa ..... .50
Ninau Hoike ili lahilahi ..... .20
Kumumua Kula Sabati ..... .20
B uke Lawe Lima ..... .10
He Buke no ka Pope ..... .15
Ui Kula Sabati Helu 3 ..... .25
Ui Kula Sabati Helu 4 ..... .15
Ui Kula Sabati Helu 5 ..... .25
B uke Euanelio o Ioane Hapahaole ..... .10
B uke Wehewehe Huaolelo Baibala, elua ano ..... 2.00
B uke Wehewehe Ano Mataio ..... 1.00
NA KAUOHA HOU PAKEKE.
Ili gula nani ..... 1.50
Ili eleele kaekae nani ..... .50
Ili eleele ..... .35
KAUOHA HOU PAKEKE ME NA HALELU.
Ili gula nani ..... 1.70
Ili eleele kaekae wai gula ..... .65
Ili eleele ..... .50
NA HALELU PAKEKE.
Ili Gula nani ..... .50
Ili eleele kaekae wai gula ..... .30
Ili eleele ..... .20
Ka Hae Hoonani (Buke Mele) ..... .25
NA BUKE MELE.
Himeni Hawaii ili nani ..... 1.75
Himeni Hawaii ..... 1.00
Kumu Leo Mele ili manoanoa ..... .50
Kumu Leo Mele ..... .10
Li ra Kamalii ..... .25
Li ra Hawaii 1848 ..... .25
Li ra Hawaii 1855 ..... .25
Hae Hoonani ..... .25
Leo Hoomana ..... .20
EIA NA BUKE HAAWI WALE.
PALAPALA LIILII—
Helu 4—Makemake anei oe i ke ola?
Helu 6—E hele i o Kristo la.
Helu 7—Ka hoi ana mai o ke Keiki Uhauha.
Helu 11—No ka hoohiki wahahee i ke Akua.
Helu 16—Ka Eehia ana o ka Ahaaina a ka Haku a me ka Bapetizo ana.
Helu 17—Mai hana ino i na holoholona.
Helu 18—No ka mahi ana, kuai ana a me ka inu ana i ka Awa.
Ka Davida Malo Kumumanao.
Ka Moolelo o Batimea Puaaiki.
Aia ke keena kuai buke o ka Papa Hawaii ma ka huina o Alanui Betela me Alanui Kalepa, e kokoke ana i ka Hale Leta.  J. F. POKUE.
Kakaule ta o ka Papa Hooko o ka Ahahui Euanelio o ko Hawaii Pae Aina.