Ka Lahui Hawaii, Volume I, Number 39, 23 Kepakemapa 1875 — Page 4

Na Ekalesia o Kawaiahao a me Kaumakapili.

Halawai kakahiaka, la Sabati .... hora 10½
Halawai po ..... hora 7½
Halawai Apana auina la ..... hora 3½
Kula Sabati ..... hora 9½

NA KULA SABATI.
NA HAAWINA.

O ct. 10—Ko Iesu holoi ana i na wawae o na haumana—Ioane XIII : 1—9.
1 Mamua o ka ahaaina moliaola, ike iho la o Iesu, ua hiki mai kona manawa e hele aku ai ia i ka Makua mai keia ao aku, i ke aloha ana i kona poe ponoi i ke ao nei, ua aloha oia ia lakou a hiki i ka hope.
2 A i ka ahaaina ana, ua hookomo ka diabolo iloko o ka naau o Iuda Isekariota na Simona, e kumakaia ia ia.
3 Ike no o Iesu, ua haawi mai ka Makua i na mea a pau i kona lima, a ua hele mai ia mai ke Akua mai, a e hoi hou aku no ia i ke Akua ;
4 Ku ae la ia mai ka ahaaina ae, a waiho aku la i kona aahu, a lawe ae la ia i ke kawele, a kaei iho la ia ia iho.
5 Alaila ninini iho la ia i ka wai iloko o ka pa holoi, a hoomaka iho la e holoi i na wawae o ka poe haumana, a holoi maloo hoi me ke kawele ana i kaeiia'i.
6 A hiki mai ia io Simona Petero la ; ninau aku la oia ia ia, E ka Haku, e holoi mai anei oe i ko'u mau wawae?
7 Olelo mai la o Iesu, i mai la ia ia, O ka mea a'u e hana nei, aole oe e ike i keia wa; aka, e ike auanei oe mamuli aku.
8 I aku la o Petero ia ia, Aole loa oe e holoi mai i ko'u mau wawae. I mai la o Iesu ia ia, Ina e holoi ole aku au ia oe, aohe ou wahi kuleana pu me au.
9 I aku la o Simona Petero, E ka Haku, aole o na wawae wale no o'u, o na lima a me ke poo kekahi.

———: o :———

Ma keia haawina, ua hoikeia mai kekahi hana haahaa a Iesu i hana'i i kumu hoohalike na na haumana. I ka manawa hea i hanaia'i ia hana? Heaha hoi ia hana?
I ka ahaaina ana, heaha keia ahaaina? Ka ahaaina moliaola ehia keia i loaa ia Iesu? Mahea i kakauia'i ka mua? me ka lua? me ke kolu? E huli i loaa. A loaa ole, akamai anei? Ka ahaaina hope anei keia i loaa ia Iesu ma keia ao? Mahea ka ahaaina pu hou ana me na haumana?
Ke ano o ko Iesu aloha, hai mai, he mau, he pokole, heaha? Ia wai ka hoomau ana i kona aloha a hiki i ka hopena? Heaha keia hopena? Owai hoi na haumana ponoi? Eia anei maanei kekahi mau haumana ponoi na Iesu? Heaha na hoailona o na haumana ponoi? 2 Tim. 2:19. Ua haalele loa aku anei oukou i ka hewa?
Ua lohe kakou ma kela Sabati, he poe kauwa kekahi na ka hewa, a na ke Diabolo. A ma keia haawina, he poe kauwa okoa, owai lakou? Na haumana a Iesu, he poe kauwa lakou kekahi na kekahi? Owai ka Haku? Aole anei oia he kauwa kekahi? Ae, oia ke kauwa nui i hele mai mai hea mai? i kauwa nawai? na ke Akua, na kakou, a na ke ao nei. Heaha ka hana a na kauwa? Na hana a pau loa e pono ai, e pomaikai ai, e mama ai, e maha ai, e olioli ai, e oluolu ai, e ola'i kanaka, kamalii, mai na hana liilii a haahaa loa, e like me ka holoi ana i na wawae o kekahi me kekahi, a hiki i na hana hanohano loa. Hai mai i kekahi mau hana.
1 Halihali ukana. 2 Hele wawae e kokua i ka poe pilikia. 3 Mahiai, kopa lole uwi bipi, pena hale, hana kamana, pulumi hale luakini, haalele i ka aina hanau, a hele i na aina naaupo, a noho ilihune, ma na halepili, halelepo, a ai i ka ai a ka poe ilihune—noho pu me ka poe naaupo, lole ole, &c. A hana i keia mau hana i aha? i mea e pono ai, e ike ai, e ola'i kanaka.
A pehea ka poe hilahila, makau wale i ka hana, i ka luhi, a noho wale, a kau i ka luhi maluna o hai? He kuleana anei ko lakou me Iesu? Ma ke alanui hea i hiki mai ai Iesu i ke ao nei? Ma ke alanui hea oia e hoi aku ai i ka lani? Owai ka i
hanauia i mea e hiki ai ia Iesu ke hana i kana hana hope a hoi aku i ka lani? No ke aha oukou i hanau ai ma keia ao? E noonoo, e halalo, e nowelo i akaka. Malama ua kuhihewa kekahi no ke kumu o kona hanau ia'na.

Moolelo o ka Ahahui Euanelio o Hawaii Akau.

Halawai ka Ahahui Euanelio o Hawaii Akau, ma Imiola, Waimea, Hawaii, ma na la 1, 2, 3 o Sepatemaba, M. H. 1875. Ua wehe ia na hana o ka la me ka Himeni, a me ka Pule a S. Aiwohi, ke Kakauolelo mua o ka halawai i hala.
Koho ia o S. Kaaua, J. Bicknell, a me S. C. Luhiau i Komite e hoomaopopo i na lala o keia Aha i hiki mai.
Ekale sia.  Kahu.  Elele .
Hamakua Hik.  Rev. S. Kaaua  J. Waiohinu
" W.  " J. Bikanele  P. Kaaekuahiwi
" Kom.  " "  —————
Waimea   " L. Laiana  W. B. Kealoha
Kohala Hema  " S. Aiwohi  D. Kilakau
" Kom.  " S. C. Luhiau  Kekuewa
" Akau  " Elia Bona  Kilakau.
Ma ka balota ana, ua koho ia o P. Kaaekuahiwi i Lunahoomalu, a o W. B. Kealoha i Kakauolelo. 1 Koho ia o E. Bona, S. Kaaua, a me Kekuewa i Komite Imihana. 2 Koho ia o L. Laiana, S. Aiwohi, a me S. C. Luhiau i Komite Imi Haawina.
KA HOIKE A KE KOMITE IMI HAAWINA.
1 H apalua hora Haipule.
2 Hoike Kihapai.
3 Heluhelu Haawina.
4 Kula Kaikamahine.
5 Na Palapala Hoopii.
6 Mahele Kokua Mahina-hou.
7 Kula Kahuna.
8 Hoole Waiona.
9 Ke kulana o na Ekalesia iloko o keia Aha.
10 Ka nupepa LAHUI HAWAII.
11 Kahi e halawai hou ai keia Aha. Lilo na Hoa a pau i akoakoa mai, i poe Hoa kuka pu iloko o keia Aha, a me Rev. J. F. Pogue.
2 Hoike Kihapai. Na kela a me keia Kahu o na Ekalesia mai Hamakua Hikina, a hiki i Kohala Akau, e hoike mai.
3 Heluhelu Haawina. Na kela a me keia Kahu i heluhelu mai i na Haawina o lakou, a ekolu o keia mau Haawina i aponoia, e hoouna ia e pai ma ka LAHUI HAWAII.
Hoopanee ia keia halawai, apopo ho ra 9 A. M., me ka Himeni a me ka Pule a E. Bona.
LA HANA 2—Poaha, Sept. 2.
Halawai hou ka Aha ma ka hora i hoopanee ia. Wehe ia na hana o ka la me ka Himeni, a me ka Pule a ka Lunahoomalu. Malama ka Aha i ka hapalua hora Haipule. Heluhelu ia ka moolelo o ka la i hala. Apono ia.
4 Kula Kaikamahine. Na E. Bona i heluhelu mai i ka hoike o ke Kula Kaikamahine Mokupuni. A ua noi koke ia mai e lilo o Pogue i Hope no Bona, e hai aku ai i na mea i hana ia i keia Aha, imua o na Ahahui ana e hele aku ai. Apono ia. He leo keakea i lohe ia no ua Kula nei, a ua lilo ia i mea e hooemi iho ai i ka ikaika o ka manao o na Agena o ke Kula, a me ke kumuao. Nolaila, kuka nui ka Aha, a hooholo. 1 E hoomau ia aku no ke Kula. 2 E mau no ke Poo oia Kula, (E. Bona,) a e mau no ke Kumu-ao, Miss Laiana. Waiho mai o Bikanele he Olelo Hooholo.
Hooholoia .—E hooikaika like na Kahu, a me ka poe a pau e pili ana i keia Aha, me ka manao lokahi e malama i ke Kula Kaikamahine e ku nei ma Kohala Akau, e like me ia e ku nei. Waiho mai o E. Bona he Olelo Hooholo.
Hooholoia .—Ua hooholo ka Aha, e hookomo i keia mau olelo malalo iho o na loina a E. C. Bona i waiho pu ai me ona mau dala $500.00 i haawi ia mai no ke Kula Kaikamahine i ka malama o Maraki iho nei. "Ua oluolu keia Aha e lawe i ua mau dala la me keia mau loina hou e malama ia ai."
Hoopanee ia keia Halawai a ka hora 2 P. M. Pule o Kilakau.
Hoomaka hou ka hana me ka Pule a Haina.
5 Na Palapala Hoopii, aole.
6 Mahele kokua Mahina-hou. Lawe ka Aha a noonoo. Eia na mea i hooholo ia.
Hooholoia .—E mahele ia ke Kokua Mahina-hou o na Ekale sia iloko o keia Aha, i ekolu puu, penei : 1 No ke Kula Kaikamahine Mokupum. 2, 3 No ka waihona o ka Papa Hawaii ; i mea e holo ai no ka oihana kuwaho, a me ka oihana kuloko.
7 Kula Kahuna. Na ke Kakauolelo o ka Papa Hawaii e wehewehe mai no keia Kula, me ke kamailio o na hoa e ae. Eia na mea i hooholo ia. Ke apono aku nei keia Aha i ko Waiohinu, a me ko Kaawa hele ana i ke Kula Kahuna ma Honolulu, ke hiki.
8 Hoole Waiona. Ua nui na kamailio ana no keia Kumuhana. He Olelo Hooholo ka Pogue, waiho ia a apopo. Hoopanee ia keia halawai a ka hora 9 A. M., me ka Himeni a me ka Pule a S. Kaaua.
LA HANA 3—Poalima, Sept. 3.
Hoomaka hou ka hana ma ka hora 9 A. M. Malama ia ka hapalua hora Haipule. Noi mai o Waiohinu e hookuu aku keia Aha iaia e hoi no ka pilikia, ae ia. Kahea ia na inoa, heluhelu ia ka moolelo. Apono ia.
Hapai ia ka noonoo ana no ke Kumuhana 9, nupepa LAHUI HAWAII. Ma ke kukakuka ana, ua waiho ia mai he Olelo Hooholo.
Hooholoia. —-Ke ae aku nei na lala o keia Aha e hooikaika, i holo pono ka nupepa LAHUI HAWAII iwaena o na kanaka ma keia mau Apana, me ka apono i ka manao e hoomahuahua ae i kona kino, a like me ka nupepa Kuokoa, a e hoomahuahua ae i kona uku $1.75, e like me na mea a kakou i kuka pu iho nei. Hapai hou ia ka noonoo ana no ke Kumuhana 8. He Olelo Hooholo na Pogue.
Hooholoia .—Ua maopopo i keia Aha, he mea e poino ai keia lahui, ka inu ana i na mea ona. Nolaila, ke hooholo nei keia Ahahui Euanelio o Hawaii Akau.
Akahi. —Ke mahalo aku nei keia Aha i ko ka Moi kue ana i na mea ona.
Alua. —Ke noi haahaa aku nei keia Aha i ka Moi, e kapae aku i na Luna Aupuni a pau no lakou ka inu ana i na mea ona a ona, mai ka oihana aupuni aku.
Akolu. —Ke paipai aku nei keia Aha i na lala o na Hui Pale Waiona, na hoahanau, na luna, a me na Kahu Ekalesia, e makaala, a e imi ikaika aku i na mea e hoopio ai i keia enemi o ka lahui Hawaii. Na Kaaua i noi mai, e hoouna ia kekahi kope o keia Olelo Hooholo i ka Moi. Hooholoia.
9 Ke kulana o na Ekalesia iloko o keia Aha. Kuka ka Aha no ka Ekalesia o Kohala Hema, a me Kohala Komohana Aole mea i hooholo ia.
11 Kahi e halawai hou ai keia Aha. Kuka ka Aha ma ke noi a Bikanele, e halawai ma Hamakua Hikina, i ka Poakolu mua o Maraki.
Hoopanee keia halawai a ka hora 1½ P. M., me ka Pule a Luhiau.
Hoomaka hou ka hana me ka Pule a Jos. Kane. Heluhelu ia ka moolelo. Apono ia. Noi mai o Aiwohi, e hoouna ia ka moolelo o keia Ahahui i ka nupepa LAHUI HAWAII, a me ke Kuokoa .
Hoike mai o S. Aiwohi no kana hana e pili ana i na Kula Sabati iloko o keia Ahahui, ma kona ano luna. Waiho mai o S. Kaaua he Olelo Hooholo. Hooholoia. —Ke mahalo aku nei keia Aha i na hoahanau o ka Ekalesia Makua, a me ka Makua Misionari o Waimea nei, i ko lakou hoolako ana mai i na lala o keia Aha i na mea e pono ai ke kino. Ia L. Laiana ka manao aloha imua o keia Ahahui Euanelio i kokua ia e Pogue.
KA HOIKE A KE KOMITE IMI HAAWINA NO KE KAU E HIKI MAI ANA.
1 Pehea e ulu ai ka ikaika o ke Kahunapule i ka hana a kona Poo?
S. Kaaua.
2 O ka paakiki hea o ka naau o ke kanaka ka ke Akua i hoonaukiuki ai, a i hoike ia ma Hal. 95:8?  J. Bikanele.
3 E wehewehe ia Oih. 26:28.
P. Kaaekuahiwi.
4 Heaha ke ano o ka mihi ana o ke Akua i olelo ia ma Kinohi 6:6?
J. Waiohinu.
5 E wehewehe i ka oihana i oi i olelo ia ma I Kor. 12:31.  D. W. Kaawa.
6 Heaha la ke ano o ko ke Akua Kahikolu ana?  S. C. Luhiau.
7 Ke ano o Hoik. 20:1—3.  E. Bona.
8 Ke ano o ka ihana a Levi, a me na mohai.  W. B. Kealoha.
9 Ke ano o na Eklesia Hawaii ma keia mua aku.  L. Laiana.
10 E hoike mai i kekahi mau hoailona o ka poe i kapa ia mai, he poe enemi lakou i ka pono o Kristo.  S. Aiwohi.
11 Pono anei e ao ia na keiki i na kaao kahiko o Hawaii nei?  S. H. Mahuka.
12 Heaha la ka mea nui e imi ia ai i ka hoopai ana i ka poe kolohe.
Z. Paakiki.
13 He mea hoonaauao anei na kaao haku wale iloko o na nupepa?
G. W. D. Halemanu.
Hoopanee ia keia Halawai, a halawai hou ma Hamakua Hikina, i ka Poakolu mua o Maraki, M. H. 1876, me ka Himeni, a me ka Pule a E. Bona.
W. B. KEALOHA,
Kakauolelo.

G. WEST!

          HALE HANA KAA HOLO LEALEA ME na kaa hali ukana. E hana hou ia no ho na kaa nahaha no ka uku oluolu. E kapiliia no kapuai lio, no ka uku kupono. Ma ka hale hana mua o Mr. Benfield, ma ke Alanui Alii  7-1y

MAKEMAKEIA!

          I Kanaka akamai i ka hana bipi hou, akamai i ka hoolakalaka i na bipi ohi hanau mua. Me ke akamai oluolu nae e hana ai.
Ina he kanaka noho pono, eleu, hoolohe, e ninau ia  S. N. EMERSON.
Waialua, Oahu.

MA RE.

          Ma Kalahiki, Kona Hema, Hawaii, ua hoohui ia o Miss Tamara me Mr. Palaunu. Na Rev. S. Papaula laua i mare.
          Mei 8—Ma Koloa, Kauai, ua hoohui ia o Punahoa k., me Kaia w. Na Rev. J. H. Mahoe laua i mare.  Iune 17, ma ia wahi no, ua hoohui ia o Luahine k., me Luli w. Na Rev. J. W. Smith laua i mare.  Aug. 16, ma ia wahi no, ua hoohui ia o Noa Kuiki k, me Sara w., a o Makanui k., me Kawelo w. Na Rev. J. H. Mahoe lakou i mare.
          Iulai 16—Ma Waianae, Oahu, ua hoohui ia o Kaiwi k., me Kahoohuli w. Na Rev. A. Kaoliko laua i mare.

HANAU.

          Iulai 8—Ma Kalahiki, Kona Hema, Hawaii, hanau o Hana w., na Kukeolani k., me Kamaka w.  Iulai 18, ma Kalahiki no, hanau o Kamaka w. na Kaai k., Kaelemakule w.  Malaila no hanau o Kalehuakona k. na Polikapu k. me Kahooheno w.
          Au g. 7—Ma Iwilei, Oahu, make o Puuloa k.
          Au g. 15—Ma Kapalama-kai, Oahu, make o Tililehuaokaono w.
          Sept. 11 —Ma Hauhaukoi, O. make o Mrs. Kamoonohu West, wahine a Kapena Jo West.
          Sept. 12 —Ma Kilohoku, Honolulu, hanau o Kekuipua k., na Kanui k a me Sarai w.
          Sept. 15 —Ma Kapalama-kai, O. make o Makapo k.
          Iune ——— Ma Koloa, Kauai, hanau he keikikane, na Kamali k., me Kaulana w.  Iune, ma ia wahi no, hanau he keikikane, na Kekauoha k., me Nalia.  Iulai 28, ma ia wahi no, hanau o Abesaloma k., na Jos. M. Kaakau me Kahalewai w.  Aug. 27, hanau he keikikane, na Abela k., me Piilani w.  Sept. 9, hanau he kaikamahine, na Obeda k., me Lanihau w.
          Dek 20, 1874 —Ma Kamaile, Waianae, Oahu, hanau o Maui Kahuilaokalani k., na Kanui k., a me Sarai w.

MAKE.

          Iulai 27—Ma Koloa, Kauai, make he kaikamahine, he bepe na Mr. Kalaea haole mahiko.
          Iulai 30—Ma Lawai, Kauai, make o Kaopa w.
          Au g. 19—Ma Kalahiki, K. H. Hawaii, make o Kawale k.  Aug. 20 ma ia wahi no make o Nawahine k.
          Sept. 3 —Ma Lihue, Kauai, hanau he keikikane, na Paulo Isenberbg a me Beta Isenberg. Aka, i ka wanaao Poakahi la 6, make aku la ua keiki nei. O ka ekolu la hoi ia o ka laua kamalei i hoewe ia Hawaii, a hala e aku la ia mao. Kaumaha no ka manao, nui ke aloha, aka, ua kii mai la no ka mea nona ka anela.
          Sept. 3 —Ma Niula, Honokohau, Maui, make o Kekahuna Kahoike k.  Sept. 5, malaila no, make o Samuela Kahoike-liilii.
          Sept. 11 —Ma Niupaipai, H. Oahu, make o Mrs. Mileka Kiha.
          Sept. 8 —Ma Manamana, Honolulu, O., make o Holau w.
          Sept. 15 —Ma Lahaina, Maui, make ka Hon. P. Nahaolelua. Ua hanau ia oia ma Kawaihae, Hawaii, i ka la 15 o Sept. M. H. 1806, a nolaila, o ke 69 makahiki keia o kona ola ana.
          Sept. 18 —Ma Waikiki, Oahu, make o Poopuu w.