Ka Lahui Hawaii, Volume I, Number 38, 16 September 1875 — Page 1
KA LAHUI HAWAII.
"Ua mau ke Ea o ka Aina i ka Pono."
BUKE I.} HONOLULU, POAHA, SEPATEMABA 16, 1875. {HELU 38.
KA NUPEPA KA LAHUI HAWAII.
He pepa i hoopukaia i kela me keia he bedoma no na Ohana a me na Ekalesia o Hawaii; he mea kokua i ka noho pono ana o na ohana, ka maluhia o kanaka, a me na pomaikai kino a uhane o ka Lahui Hawaii. "Aole paonioni; aole haanui; aole hikiwawe ka huhu, aole noonoo ino."
HOOKAHI DALA ka uku no ka pepa no ka makahiki hookahi. Hapa makahiki, Hapalua.
E hoouna mai i na leta no KA LAHUI HAWAII ia H. H. Paleka, Honolulu, Oahu.
GOD MY JOY.
Songs of Salvation, p. 125.
1 Oli ia Iehova,
Oli i kona aloha,
Kona kiai ia'u la,
Kiai mau.
E mau no kona aloha,
Oia kuu Palekaua,
Ma ona la au la
Ma kela ao.
C ho.—Mele haleluia,
Oli haleluia,
Nani haleluia,
Oia mau.
2 Oli i kona aloha,
Kona imi ia'u la,
A kai ae iluna
I ke ao
Aloha lua ole,
Lelele ae kuu pouli
A lama kuu aumoe,
A ao loa no.
C ho—Mele haleluia, & c.
3 Oli a ho sana,
Kau i kona bana,
Nona no ka mana
E ola'i.
Olino no ka lani,
Alohi mau a nani,
Hoolea e na uhane,
A hoomaikai,
C ho.—Mele haleluia, & c.
4 Oli haleluia,
Oli ia Ie su la,
Lanakila pu la
Ke Lii mau.
Ua mau no kona aloha,
Me kana mau kauoha,
Malaila no ke ola
A mau loa no
C ho —Mele haleluia, & c,
HAWAII.
HE MOOLELO KAAO
NO KE
KEIKI ALII NIEDA!
KA PUUWAI LIONA O KE AUPUNI O KONA MAKUAKANE
KE ALII KA MOI LABODA!
A ME KE PIO ANA O KE
KUPUA GOGONA LAUOHO NAHESA!
He Nanea no na Au i Hala.—Helu 11.
HULI aku la ko ia nei alo imua me ke auau o na kapuai, no ka mea, ua hoomaopopo aku la keia i ka waiho mai o ka moana kai lipolipo mamua ona, a ike aku la no hoi i ka nani o ke kuahiwi uliuli i hoonani ia me na ululaau o kahi mokupuni e ku mai ana i ka waena moana. I ko ia nei hoea ana aku i kaheka, ike koke aku la no keia i ka waapa, e like me ka hai a na luahine.
"Ua oiaio ka na luahine i hai mai nei no na mea e pili ana i ka'u mau mea e ike nei i keia manawa, koe aku ka huakai maluna o ka ili-kai a me ka hehi ana i ke one o kela wahi mokupuni hiehie. Ua maalahi mai la kahi i hala mahope, a pehea la ko mua aku nei. E like ana no paha, a he hoohoihoi maka anei, e hoowalewale ana i pae aku au ilaila, alaila hana ino mai? Heaha no ka hewa, o ke ala ia i ike a i hoomaopopo ole ia, a ano, ke hoao nei o Nieda e pae ilaila a e noho alii hou maluna o Madusa, ina aia io ilaila oia," wahi a Nieda.
Kau aku la kona mau wawae maluna o ka oneki o ka waapa, a hookuu mai la i ke kaula, a oiai keia e hilinai ana mahope, me ke kilohi ana i na nani o luna o ka oneki, e lawe pololei ana ka ihu o ua wahi waapa nei me ka holo launa ole maluna o ka ilikai.
He nani a he hauoli keia i oi pakela ae mamua o na mea i moeuhane ia no ko ke kanaka ola ana, a me he la, o ke aloha no keia o na i-a o ka moana, a ke ehu-kai e kapi mai nei i ko'u mau papalina. Ano, aohe a'u hauoli makemake e ae, ina o ko'u makuahine aloha pu me a'u, a maloko o keia waapa nani, maluna o keia ilikai uliuli lipolipo, a maluna hoi o na eheu o keia ahe lau makani huihui, e nanea pu ai maua, a na ka ea waianuhea o kela mau kuahiwi nani e hooluolu i ko maua mau hiolani ana," wahi a Nieda.
O keia waapa, oia no ka waapa o na luahine e holo ai i ka hookele, a e pae aku ai hoi i ka mokupuni o Madusa. O kona oneki ua hana ia mailoko mai o ka ili o kekahi ano laau nani, i uhi ia me ka pela hulu manu omaomao. Ua hoonani pu ia kahi e noho iho ai me na kinohinohi wai gula, a ua hoomalu ia me ka anini lau laau i uhi ia me na pua.
Iaia nei e holo ana maluna o ka ilikai, ua pa mai la ka makani aheahe o ka aina, pi-o ae la he wahi anuenue ma kapakai, a helelei pakiko iho la na paka ua. O kahi kupanaha loa o keia waapa, oia no ka holo pololei ana me ka pailaka ole ia, e holo ana me ka pololei loa, a aole no i liuliu, kaalo ana keia malalo o kekahi pali kiekie, a pae loa aku la i uka o ka aina.
I ko ia nei hehi ana i ka aina, honi koke aku la ko ia nei ihu i ke ala onaona o na pua, hui aku la ke kino me ka ea mama, a hoolai hoi na pepeiao i na leo mele lea o na ano manu nani a pau.
Mamua nae o ko ia nei kaha ana aku e hele, huli koke mai la a haawi mai la i na hoomaikai ana i kahi waapa i ka i ana mai:
"He waapa wale no oe, aka, he kupanaha kau mau hana. Ua lawe maalahi mai nei oe ia'u maluna o ka opu o ka hohonu a pae lanakila ma na kapakai o keia mokupuni nani, a aohe makana e ae a'u e haawi aku ai, o ke aloha no a me ka hoomanao mau ana no ka hiki mai o ka manawa e ae ia mai au e kau hou maluna o kou mau papahele a huli hoi lanakila aku."
He nani io no keia wahi mokupuni, ua piha i na laau a me na pua o na ano a pau, a e lawe haaheo mau ana ke ahe makani huihui i ke onaona ma na kihi eha o kona anapuni. O na manu, aohe lua o ko lakou nani, a o ka helu ekahi hoi ma na mele. Uliuli maikai na mea a pau. Malalo o na lala laau, iwaena hoi o na lau me na pua, e owe malie ana ka nawe a ka wai o ke kahawai. Maluna o ke kiekiena o ke kuahiwi kukilakila e ku mai ana mamua pono o ia nei, e uhi iho ana ka noe, e ane pulou iho ana i ka nani o ke kahiko hau o ka mauna.
"He moeuhane anei keia? He oiaio anei ua hoopomaikai ia au? O ka Paredaiso nani anei keia a kuu makuahine i ao mau mai ai ia'u? Pehea la e hiki ai ia'u ke hoomaopopo iho i ke ano o ka'u mau mea e ike nei? He oiaio aohe mea nana e enemi keia kupua Madusa no kona lili ana a luku hoi i ka poe e ake ana e hehi i ka lepo o kona home nani. He waiwai nani keia, a he kuleana pono kona e kue mai ai ia'u, oiai, he komo hewa wau, aka, ina e kokua mai na lani, alaila he mea pono iaia e kiai pono, a e paio mai hoi me ka ikaika, o noho alii auanei ke keiki a Laboda maluna ona, nele ia i ka waiwai ole, a lilo kona home nei i home no Nieda me kona makuahine. Aka, i nele au me ka lanakila ole, a poino hoi malalo o kona ikaika, alaila, aohe a'u kamailio ana, hookahi wale no, oia ka hoomaikai ana ae i kona pomaikai, a noi ae e ola kuu makuahine, a e hai aku i ka lono, ua poino kana keiki ma na kapakai o ka mokupuni nani a kamahao hoi, a imua hoi o ke alo o ke kupua lauoho nahesa, oia hoi o Madusa, ka haku maluna o keia nani a'u e makahehi nei," pela o Nieda i kalokalo leo nui ae ai, oiai oia iloko o na poluluhi moeuhane o ka hoomaopopo ana i na nani mamua o kona mau maka, a me ke onaona hoi o ke ea i kona honi ana aku.
Kai aku la ko Nieda mau kapuai imua, e au ana na maka mao a maanei. Komo aku la malalo o ka malu laau ; a no kona ano maluhiluhi, haule iho la maluna o ka nolunolu o na lau nahele, a he manawa pokole, e hui aloha pu ana ia me kona makuahine ma ka moeuhane. Ua liuliu loa kona hiamoe ana, a i kona puoho ana ae, e aneane aku ana ka la e nalo malalo o ka ilikai. Iho mai la kewai anu o ke ahiahi maluna o ke kuahiwi a iniki hooipo mai la i ko ia nei ili, a puana ae la keia i na huaolelo hoalohaloha:
"Kupanaha! Eia au maluna o keia wahi mokupuni iwaenakonu o ka moana kai hohonu, he mamao loa mai ka aina a'u i haalele aku ai mahope ; a hiolani hookahi ana, aohe lua, — heaha la hoi ka mea a keia wahi kehau e iniki malu mai nei ia'u. Owau hookahi wale no keia, he auwana ilihune ma na papalina o ka honua; a ua manao hoi aohe hoa'loha kokoke mai, eia no ka hoi keia hoa'loha. E ka hau anu huihui, ke hoope nei oe i ko'u mau papalina, ke hoolana nei oe i na manao o loko o keia malihini, a nolaila, ke lawe nei au ia oe i hoa'loha no'u. Ke lawe 'la oe i na hiohiona o Nieda maluna o kou mau eheu mama, ke noi aku nei au i kou lokomaikai, e puolo ae oe, e ahai aku maluna o na ale kawahawaha o ka ilikai, e pii aku maluna o na kuahiwi a iho malalo o na awaawa, e lawe kohana aku maluna o na kula, e alo aku malalo o na lau laau, a e hoauau aku i na papalina o kuu makuahine aloha. E haawi aku i kona manao na omaka wai aloha o kana keiki, e hoona aku i ka pilihua o kona puuwai, a e hai aku i ka lono, ke hoomanawanui nei au mamuli o ka mea a'u i ae ai. E hai aku iaia, ua ike a ua lohe au i na mea kupanaha o na ano a pau, ua weliweli au a ua makahehi no hoi i na mea i hui pu mai ma ka'u huakai, aka, maluna ae o na mea a pau, ke lei nei no au i na welina o ke aloha makua ma ko'u puhaka. He hoa hele no'u na hoomanao ana nona, a he hauoli hoi no'u ka ike ana aku i kona kino ma ka moeuhane. Auwe au! He oiaio anei ka'u i ike iho nei ma ka moeuhane? He oiaio anei ua kau aku kekahi pilikia maluna ona mai ka lima menemene ole o kela Moi? E na lani, e ae mai i keia kauwa e ola no ka manawa kupono no ka hoihoi ana aku i ka hoopai kupono maluna o kela puuwai eleele. Aole anei i ana kona inaina kumu ole mamuli o kona hoouna ana mai ia'u ma keia huakai? Ma o ka malamalama o ke ao, a ma ka pouli hoi o ka po, ke lawe nei au i ka hoohiki paa, aole e ana ka inaina o Nieda a inu i ke koko eleele o kona puuwai."
Puliki ae la o Nieda i kona poo, a pii ae la ka ula mao a maanei o kona mau papalina. Ua wela kona puuwai, a hae hoi kona inaina. Oiai oia iloko o na hihio nanea o ka hiamoe, ua loaa aku la na hiohiona o kona makuahine ma ka moeuhane, e noho ana iloko o kekahi rumi pouli me kona aahu lepo weluwelu, ua hihi ia kona mau maka e ka punawelewele, ua nalo aku kona kino ui maikai, a e uwe mau ana no kona eha a me ke aloha no kana keiki. Iloko o kona inaina, ua puoho ae oia me ka piha i ke aloha i awili pu ia me ka huhu, a nolaila kana mau olelo no kona makuahine.
(Aole i pau.)
Ka Nane Alua.
E KA LAHUI HAWAII E; Aloha oe:—
E oluolu oe e hookomo iho i keia wahi nane. Aia ma kahi i kapa ia o Kamoku, e noho ana kekahi kanaka hanai manu, aia nae ma kekahi ahiahi, ho-a aku la oia i kana poe manu kane a pau ma ko lakou hale, a pela no hoi me na manu wahine, aka, i kona helu pono ana iho, hookahi o lakou aole i hoi aku, ua hoi no oia ma kona punana kahiko. I ka wa a ke kahu i hele aku ai e imi, loaa aku la he popoki e ku olohelohe mai ana. I ka wa a ka popoki i ike aku ai i ke kahu, hoomaka aku la oia e holo mai ka punana ae ak, no kona olohelohe ua hiki ole iaia ke eu ae, no ka nui o kona hilahila, pepelu ae la oia i kona huelo mawaena o kona mau wawae hope, a kulou iho la kona poo ilalo me ka loha ana o kona mau pepeiao. PIPIHOLOKAAO.