Ka Lahui Hawaii, Volume I, Number 36, 2 September 1875 — Page 2
KA NUPEPA KA LAHUI HAWAII
HONOLULU, SEPT. 2, 1875.
UA kipa mai io kakou nei ka moku Adimarala Repulse , o ke aupuni Beritania, a ua holo hou aku ma kana huakai. Oiai oia e ku ana maanei, ua hana ia kekahi hana ku i ka hoohilahila maluna ona, a ua kaumaha makou no ia mea. Ua kamaaina ka hapa nui o ka lehulehu i ka makou mea e kamailio nei, a he makehewa paha ka helu papa ana aku ia mau mea. Aole makou e ahewa ana i ka holo makaikai ana o na kanaka maluna o na moku o keia ano, oiai he mea hou ia ia kakou, aka, o ke ano o na hana i malama ia maluna o ia moku, ua ku i ka hoohilahila, a he hewa nui hoi imua o ka lehulehu.
Ua holo aku he lehulehu wale o na kane a me na wahine, mai ka poe a-oo a hiki i na keiki liilii, maluna o ua moku nei. Ua haawi ia mai la ka waiona i kekahi poe, ua hoomaka ka ona, a o ka hopena, ua ulu ae la ka hakaka. Puka na olelo llapuwale, a hakaka kuikui maoli kekahi mau wahine. Ua hui aku a hui mai na kane me na wahine, a ua hanaia na hana haumia a kapae ia ka maluhia o kekahi poe. Ua noho kekahi poe wahine maluna o ka moku a po ka la, a ao ka po, a akahi no a hoi mai. Ua inu wale lakou i na waiona hoowalewale a na luina, a ua uhauha wale me ka hilahila a menemene ole i ko lakou kino, ua nele kela moku i ka maluhia, a lilo hoi i hale no satana e hooko ai i kana mau hana.
Aole anei i ku keia hana i ka hewa? Aole anei i ku i ka hoohilahila? Ma ko makou noonoo ana, me he la, o kekahi keia o na hewa i hana ia e kuleana maoli ai ka hilahila ma kona wahi, a e kani-uhu iho ai hoi o Hawaii me ke kulou o kona poo, a hiki ole ke ea'e no ka nui o ke kaumaha no kona mau oiwi. Ina o keia ka hana maluna o na moku, me ke kapae loa ia o ka maluhia a hoohilahila ia hoi ka hae hanohano o Beritania Nui, alaila, ke manao nei makou, o ka manawa ia o Hawaii e malama'i i kona inoa kamahao mai na haumia o ia ano, a e kaupale i na kumu e ala mai ai ia mau ino malalo o kona mana, i pau ai ka hoala ia ana o na hana lapuwale e hoalaala ia nei e kahi poe.
An drew Johnson.
I ka Poalima i hala iho nei, i hookani ia ai na pu hapa hora, mai na moku manuwa elua mai, mai ke kakahiaka a po, no ka make ana o Andrew Johnson. Owai ia? Oia kekahi o na Peresidena o Amerika Hui, iloko o na kau i hala, a he hua ia no na hoopomaikai i ka lehulehu ma ia aina, he hoike no ka pomaikai kau like i haawi ia mai nei i ka lehulehu mai o a o oia lahuikanaka. Mai ke kulana haahaa loa kona pii ana ae aa kau iluna o ka oihana kiekie loa oia aupuni.
Ua hanau ia oia ma Karolina Akau, i ka makahiki 1808, eha makahiki mahope iho o kona hanau ana, make aku la kona makuakane. He ilihune kona makuahine, a aole i ao ia ke keiki iloko o na kula, aole no hoi i loaa iaia ka pomaikai o kekahi la kula hookahi mai kona wa kamalii mai a hiki i kona wa kanaka makua. O kona naauao a pau, mamuli no ia o kona hooikaika maoli ana nona iho. I ka umi o kona mau makahiki, ua hoomaka oia e ao i ka oihana kela, ia wa no hoi oia i ao ai i ka heluhelu. I kona hiki ana aku i ke kulana o ke kanaka makua, ua mare oia i ka wahine, a na kana wahine oia i ao i ke kakau lima, a me ka helu kakau. Pela i pii liilii ai keia kanaka mamuli o kona hooikaika maoli ana mai kahi haahaa loa a hiki i kahi hanohano.
Ma ia mea, he kumu hoohalike kupono keia no ko kakou poe opio; mai manao nae kela a me keia, ina e hooikaika e like me Andrew Johnson, e lilo ana ia i Peresidena, a i Kuhina paha, aole pela, aka, o ka mea hooikaika a hoomau, a pii ae me ka maikai, aole no ia e nele. E ike ia no kona kulana he maikai, a o kana oihana nae, na ka mea haawi hana ia e hoomaopopo.
Ua hala o Edward H. Boyd.
Ua ili mai ka haawina luuluu a kaumaha o ka pahola ana'ku i ka lono walohia imua o na makamaka, ua hala, ua make o Edward H. Boyd, (Ailuene,) ua haalele mai i na inea o keia ao, a kuu aku la kona luhi i ka hora elua o keia wanaao. Ua hanauia o Mr. Boyd ma Kapalama, a ua hanai ia, a ao ia iwaena o kakou maloko o keia kulanakauhale. Ua lehulehu wale na makahiki o kona ike ia ana mawaena o ko Honolulu nei poe lawelawe ma na oihana, a he Lunamakaainana oia no keia apana no kekahi mau kau ahaolelo, he hoa ahahui malu, a he lala no ka oihana kinaiahi. I ka wa i lawe ai o W. L. Moehonua i ka oihana Kuhina Kalaiaina, ua pani ia kona wahi ma ka oihana Puuku no ka Moi e Mr. Boyd, a malaila kona noho ana a hiki wale i kona make ana. Ua haalele mai oia he wahine, he mau keiki a me ka ohana lehulehu. Me lakou a pau ko makou aloha.
Auhea ka maluhia?
E KA LAHUI HAWAII; Aloha oe:—
Ma kou lokomaikai, e ae mai ia'u e kamailio pokole no kekahi mea a'u i ike ai, a i hanaia hoi mamua pono o kekahi poe. Ma ka po o ka Poakahi iho nei, oia paha ka hora 9, oiai au a me ka'u wahine mare, ko'u kaikuahine, ko'u makuahine a me kekahi mau hoa'loha e hoi mai ana ma ke Alanui Moi, a hiki i ke kihi o Alanui Moi me Alanui Nuuanu, komo mai la kekahi manuwa iloko o ka makou huakai, a hoopuka mai la i na huaolelo ino loa i mua o ka'u wahine, he mau huaolelo kupono ole, a pelapela loa hoi. Ua noi oluolu aku au i ka manuwa e hoihoi hou aku oia i kana mau huaolelo i hoopuka mai ai, aka, ua hoopuka hou mai la kela i na huaolelo pelapela. Ua huli koke ae la au i ka makai e noho mai ana ma ke kihi makai, a kahea aku la, "E ka maka, e hopu i keia hoohaunaele!" "Aole makai maanei, ua hele!" wahi a ua makai maalea nei. Huli hou ae la au a hoi hou aku la i ka manuwa e hele ia mai io makou aku, aka, ua hoomaka hou mai la kela i ka hoopuka ana mai i na huaolelo ino loa. Mahope iho, hoea mai la o Mr. Filber, he makai haole oia, a ua kipaku mai la ia makou e hele me ke ano kalakala o ka leo, a hookuu lanakila ia kela luina hoohaunaele.
E ae ia no anei keia hana? He hiki no anei i kela a me keia mea ke hele ma ke alanui e hoohaunaele a hoopuka me na huaolelo pelapela i ka poe maluhia e hele ana ma ke alanui me ko lakou ohana? Aole anei e maluhia ka'u wahine mare ke hele ma ke alanui, oiai oia me a'u? Ke uku mau nei au i kela a me keia makahiki he mau dala maloko o ka waihona o ke aupuni, a mai laila aku ka uku o na makai, a pehea, e nele ana anei au i ka maluhia malalo o ka mana o na makai? He oiaio anei he hiki wale no i na luina moku ke hana ino a hoohilahila i ka wahine mare a kekahi o na oiwi ponoi o ka aina mamua pono o na maka o ka makai, me ko lakou nana mai a hookuu lanakila aku i ka mea hoohaunaele? Ina pela, alaila, heaha la ka waiwai o ka makai? Heaha la ka maluhia o ka lehulehu malalo o lakou? Ua pono anei keia poe makai ke hana pela. Ke manao nei au, imua o ke kanawai o ka aina a imua hoi o ka manao maikai o ka lehulehu, aole o lakou kuleana ma ia kulana i hookahi la hou aku. Ke manao nei au, a e apono ia mai ana no hoi ka'u, ina e hiki ole i kekahi makai ke malama i kana oihana, e pau koke ia i pono ai; a i hookiekie hoi ia me ke kapae ana i na rula o kana oihana a hookuu lanakila i ka lawehala e like ae la me keia, he pono ia e hookolokolo ia imua o ke kanawai no kona uhaki i na rula o kana oihana, a hoohaiki me ka hoopilikia wale i ka pono kaulike me ka maluhia o ka lehulehu. O keia mau mea a pau he hiki ia'u ke hooiaio, a ua ike hoi au i na makai a'u e kamailio nei, me ka paanaau o ko lakou mau inoa ia'u. I kumu e ike mai ai ka lehulehu i ka hookuu akea ia o ka poe hewa, a nele hoi ke alanui aupuni i ke kiai maluhia ole, ke noi hou aku nei au e ka Lamaku o ka pono kaulike e hoolaha aku i keia, me ka hopo ole o KAHIKINA KELEKONA.
Kou, Augate 31, 1875.
He hoopunipuni nui keia.
E KA LAHUI HAWAII E; Aloha oe:—
E oluolu oe e hookomo iho ma kahi kaawale o kou kino i kela mau huaolelo e kau ae la maluna, oiai ua ike ia ma ke Kuokoa o ka la 14 o Augate, kekahi hoolaha e pili ana no ka luakini o Kamoiliili, e olelo ana he 14 makuakane a me 14 makuahine, a me na keiki he 34, me na ilio he 14, me kekahi mau keiki liilii elua, eomo ana i ka wiu kekahi, ua ku a hina iho kekahi.
Ke hai aku nei au me ka oiaio loa, he hoopunipuni nui keia, no ka mea, ua hai mai ke Kumukula Sabati ma kana buke hoomanao, he 11 keikikane me 18 kaikamahine, a ina e hui ia he 29 wale no keiki, a owau no hoi kekahi i helu aku a oiaio no, a o na makua i hoike ia maluna aole i pololei, ua emi iho malalo he 16, a o na ilio aole he 14, aka, hookahi no ilio oloko a'u i ike iho ai, no ka mea, aole ona malama i ka rula ka hale o ka Haku, oiai, papa mai ke kahuna haiolelo, aole he hoolohe, noke no i ke aoa a nui ka leo, e holo ana i o a ia nei e hanu hele ai a pili aku ana me ia mea aku ia mea aku.
A no ia mea, ke hai aku nei au me kuu hookamani ole, oiai, he imi hakuepa wale no keia a ka enemi e hoinoino nei, i mea e hapala wale ai i keia Betera o ka Haku; aole no hoi owau wale ka i ike i keia mea, o na kamaaina a pau i ike i kela hoolaha, mai hooiaio iho ko oukou manao no keia mea i olelo ia ma ka nupepa, oiai he enemi nui keia e ake ana e hapala i mea e haukae ai ka inoa maikai o keia hale laa; a ina e aala ana kela no keia olelo, alaila e haawi aku au i uhi no na maka ona i ike ole ai i ke kau ana o ka mea ao lio. Me ke aloha.
W. B. MALIHINIIKEMAKA.
Au gate 23, 1875.
He moolelo no Paulo.
HELU 4.
Me he la, ma Anetioka no i hai mua ia ai ka Euanelio i ko na aina e, (Oihana 11:19). "A he nui ka poe i manaoio a i huli mai i ka Haku." Alaila, hoouna ia aku la o Barenaba i Anetioka, a no ka hoihoi nui i kona pomaikai nui, manao iho la ia i kokua nona, a "hele aku la ia i Tareso, e imi ia Paulo," (Oihana 11:25). Ua manao o Paulo, he kahea keia na ke Akua, aole oia i kuihe ma ka h ele pu ana me kona makamaka i ke kapitala o Suria. Malaila i noho ai laua no ka makahiki okoa, e hana ikaika ana i ka hana a ka Haku, e hai ana imua o na kanaka he nui, a e hoohuli ana hoi i na uhane he nui. Mai ia manawa mai i kapa ia ai na poe hahai ia Karisto, "ka aoao o na poe Nazarene," a "ka aoao hoi i olelo hoino ia ma na wahi a pau." (Oihana 24:5, a me 28:22). Aka, i ka makahiki 44, ma Anetioka no i kapa mua ia ai na poe manaoio ia Kristo, mai na Iudaio, a i na kanaka e, he poe Karistiano, a ma keia inoa i kapa mua ia ai lakou a hiki i keia wa. He mea maopopo, na na kanaka e no i kapa mai keia inoa ia lakou; no ka mea, o na poe Iudaio, aole loa lakou e olelo i ka huaolelo hoano e like me Karisto, Mesia, e hoike ana i ka poe a lakou i kapa ai he heretiko.
I ka manawa i kiina mai ai o Paulo, e hele mai Tareso aku i Anetioka, ua kauoha mai la no hoi ke Akua ia Petero e lawe aku i ka nuhou hauoli i o Korenelio la, ka luna koa haneri o Roma ma Kaisareia. Nolaila, i ka manawa hookahi i hoike mai ai ke Akua i na lunaolelo nui elua, no ka nahae ana o ka paku waena e kaawale ai na Iudaio a me na kanaka e, a e hoohui ia no na poe Iudaio a me na kanaka e i hookahi, iloko o Karisto Iesu. (Epe. 2: 13, 14). Oiai o Paulo a me Barenaba e hana ana i ka hana a ka Haku ma Anetioka me ka pomaikai nui, wanana e mai o Agepo no kekahi wi nui, he kaula oia mai Ierusalema mai. Alaila hoholo iho la na haumana ma Anetioka, e hoouna aku kela a me keia i kokua na na hoahanau ma Iudea, e like me ka hiki iaia iho. Pela i hoike ia mai ai na kumu o ka hoomana oiaio iloko o ke aloha a me na hana maikai.
Aneane i keia wa i pepehi ai o Herode ia Iakobo, ke kaikuaana o Ioane, a hoopaa aku ia Petero iloko o ka hale paahao me ka manao e lawe pu no hoi i kona ola. (Oih. 12: 2, 4). Hele pu no o Mareko, me Paulo a me Barenaba, i ko laua hoi hou ana i Anetioka, he pili hoahanau oia no Barenaba, a o ka mea paha ia nana i kakau ka lua o na Euanelio. He manao kanalua ole ko Paulo nona ia wa, a me ka wa mahope mai, (he mea oia) "e pono ai nona ma ka oihana kahuna. (II Tim. 4:11). Aole i hoike ia mai ka loihi o ko Paulo a me Barenaba noho ana ma Anetioka, mahope iho o ko laua hoi ana mai Ierusalema mai. Mahope mai nae, oiai ka Ekalesia e hana ana i na oihana hoomana, hoike mai la ka Uhane Hemolele i kekahi o na poe kaula e noho ana e hoolilo aku lakou ia Barenaba a me Paulo no ka hoouna ana, e hai aku i ka Euanelio i ko na aina mamao. Mamuli oia kauoha a ke Akua, hookeai iho la lakou, a pule hoi, a kau iho la i ko lakou mau lima maluna o laua. Pela i hoolaa ia ai laua; a o laua hoi na misionari mua i hoouna ia e ka Ekalesia Karistiano i ko na aina e.
Hele mua no laua i Seleukia, ke awa kumoku o Anetioka, he wahi aneane umikumamaono mile ka loihi,—malaila e holo aku ai na moku no Kupero. Aole no i loihi ko laua holo ana ma ka moku, no ka mea, he ike wale ia aku no na mauna o Kupero mai Anetioka aku. Ma Salami i pae aku ai laua, ke kulanakauhale ma ka aoao hikina o ka mokupuni. He nui wale na poe Iudaio mawaena o na kanaka o ia wahi; no ka mea, ma na kulanakauhale Helene a pau i hele ia ai e Paulo, maanei wale no kahi i heluhelu ai kakou he mau hale halawai kekahi. (Oihana 13:5). I ka pae ana no i uka, ua hai koke aku la laua i ka olelo a ke Akua maloko o na hale halawai; no ka mea, ua makaukau ko laua mau naau e hoike aku i na nuhou hauoli. Aole no hoi laua i noho liuliu iho ma Salami, no ko laua ake nui e ola na uhane, ua kono ia laua e hele mai ke kau wahi a i kekahi, a hiki i ka puni ana o ka mokupuni. A mahope hiki aku la laua i Papo, ma ka aoao komohana o ka mokupuni, he wahi, hookahi haneri mile mai Salami aku. Maanei i halawai ai laua me Bariesu, he kilo, a he kaula wahahee, ka mea hoi i kapa ia o Eluma. Nana no paha i kapa iaia iho i keia inoa,—o ke ano "Ka Naauao." He mana nui ko keia kanaka maluna o Seregio Paulo, ke alii kiaaina, ma kona hoike wahahee ana he hiki e ike i ko ka wa e hiki mai ana, a e hoike hoi i na mea e hiki mai ana. A me he mea la, ua hoolilo oia iaia iho ma ke ano he kakaolelo no ke alii kiaaina. A i ko Seregio Paulo lohe ana i ka olelo a ke Akua ma o Paulo la a me Barenaba, hoouna aku la oia ia laua e hele mai, i lohe ai oia a noonoo hoi nona iho; no ka mea, "he kanaka akamai oia," a aole no hoi i hilinai nui loa i na kilokilo ana a ke kaula wahahee. E like me ka mea i manao ia, ua kue mai la o Eluma ia Paulo a me Barenaba, me ka hooikaika ana e hoohuli i ke alii kiaaina he mau mea hoopunipuni laua. Aka, ua loaa aku la oia ia Paulo. Me ka piha i ka Uhane Hemolele, haka pono aku la kona mau maka maluna o ke kilo, me ka i aku, "Auwe oe ka mea i piha i ka wahahee a me ka hewa a pau, he keiki na ke diabolo, he enemi no ka pono a pau, aole anei e hooki oe i kou keakea ana i na aoao pono o ka Haku?" Nolaila, olelo aku la oia iaia e makapo oia, a haule koke mai la maluna ona ka pouli a me ka moowini. No keia hana mana i hooholo ai o Saregio Paulo i kona manao, a manaoio iho la ia. A no ua mana la hoi i makapo ai ke kilo, i ike ai ke alii kiaaina. Nolaila, e like me ka hoopai kaumaha ia ana o Simona Mago kekahi kilo e ae e Petero, a me ka olelo ia ana ai oia maloko o ke au awaawa, (Oihana 8:23), pela no hoi i hoahewa ia ai o Eluma e Paulo, a hoopai ia ai ka makapo.
(Aole i pau.)