Ka Lahui Hawaii, Volume I, Number 33, 12 August 1875 — Page 1
KA LAHUI HAWAII.
"Ua mau ke Ea o ka Aina i ka Pono."
HOL Y BIBLE
BUKE I.} HONOLULU, POAHA, AUGATE 12, 1875. {HELU 33.
KA NUPEPA KA LAHUI HAWAII.
He pepa i hoopukaia i kela me keia he bedoma no na Ohana a me na Ekalesia o Hawaii; he mea kokua i ka noho pono ana o na ohana, ka maluhia o kanaka, a me na pomaikai kino a uhane o ka Lahui Hawaii. "Aole paonioni; aole haanui; aole hikiwawe ka huhu; aole noonoo ino."
HOOKAHI DALA ka uku no ka pepa no ka makahiki hookahi. Hapa makahiki, Hapalua.
E hoouna mai i na le ta no KA LAHUI HAWAII ia H. H. Paleka, Honolulu, Oahu.
[NO KA LAHUI HAWAII.]
THE GLAD HOSANA.
Golden Chain, p. 35.
1 E hooho, e hosana,
E hauoli, e hoomana,
Hui mai a hoomaikai;—
Hui ma ko Ie su hana,
Hui, oli, a ho sana,
A hookani nui ae;
C ho.—Malu e;
Ke hai mai na kini lani
I ka nu hauoli, malu e!
Hooho hou, a e hosana,
E hauoli, e hoomana,
Oli e! oli e! o oli e!
2 Kau ka lama ma na mauna,
Ma na puu a wao laau la,
Lama o ka hoku ao—
Oli e ka poe ike,
Na kanaka, na kamaiki,
I ka lama kamahao.
Cho.—Malu e; &c.
3 Oli nui, a hoolana,
E na aina, na moana,
Me na wahi hoi a pau—
Pau ke kaua, kuikahi,
Leo olo nahenahe,
Kupinai mai o a o.
C ho.—Malu e; &c.
4 Oli nui na makua,
Na keiki na ohua,
Na kauwa, na haku pu;—
Kei na pono, e hoolaha
I ke ola, i ka maha,
E hoonani ia Ie su.
C ho.—Malu e; &c.
HAWAII.
HE MOOLELO KAAO
NO KE
KEIKI ALII NIEDA!
KA PUUWAI LIONA O KE AUPUNI O KONA
MAKUAKANE
A ME KE PIO ANA O KE
KUPUA GOGONA LAUOHO NAHESA!
He Nanea no na Au i Hala.—Helu 6.
UA HOLO ko'u manao a ke hoopaa nei maluna o kau mau huaolelo, i kou ano, oia hoi na hiohiona o ke kanaka i loaa na haawina o ka noonoo maikai." wahi a ke kanaka ili ulaula.
"Aole au i hele mai ma ke ano paio, aka, ma ke ano he makamaka maikai, me ka makaukau no nae e paio aku ke paio ia mai, a ano, ke noi hou aku nei au ia oe a hai mai i ke ala e hiki aku ai i kahi o ke kupua Gogona Madusa, i hiki ai ia'u ke hoao e lawe pio i kona poo lauoho nahesa," wahi a Nieda.
"E haawi aku no au ia oe e like me ka hiki ia'u. Ano e hoolohe mai, a ina oe e malama pono i ka'u mau kuhikuhi ana, alaila e hoea ana oe ilaila, aka, ina oe e malama ole, alaila, ano ke noi aku nei au i kou manao lokomaikai e noho mai; no ka mea, o kou manawa e malama ole ai a hoopalaleha paha i ka'u mau kuhikuhi ana, o kou wa no ia e loohia ai iloko o ka poino, a e noho pio auanei oe malalo o na mana weliweli a keia mau luahine. I kou haalele ana mai ia'u, e hele pololei aku no oe imua, mai wiwo a mai hopohopo. E uhi i kou helehelena me na hiohiona o ke kanaka koa, a o kou mau kapuai o ke kupaa. E halawai mai ana me ka ike a kou mau onohi maka na mea hooweliweli o na ano he lehulehu, a e kuia ana hoi ka lohe a kou mau pepeiao me na leo wawalo ano e, e hoowalewale mai ana ia oe, mai noho nae oe a puni; e like me kou hoomaka ana ma kau huakai, pela no oe e hoomau aku ai. E uhi mai ana ka pouli, mai hookuu nae oe ia pouli i mea nana e hookuemi hope mai i kou manaolana. O kou hele pololei no ia a hoea oe iloko o kekahi rumi nui, e nana aku oe maluna ae o ke kii e kau pono mai ana mamua pono ou, e ike aku ana oe he wahi kaula kuaina, e lalau aku a e huki mai, a ia manawa e haule iho ai ua kii nei a e ike aku no oe he wahine opio ui. E haawi aku i na hoomaikai ana iaia, a ina e haawi mai ia oe i kekahi o na hua piku ana e paa ana, e lalau aku oe, mai ai nae; e paa oe ma ko lima, a i kona manawa e nanea ana me kau mau kamailio, e hoolei aku me ka ikaika iloko o ka puka ana i hemo mai ai. E hoomaopopo ana oe e nalowale koke ana ua wahine nei, mai haohao oe no ia mea, no ka mea, aia iloko o ia hua kona mana, ina oe e ai o kou poino ana no ia, aka, ina oe e hana e like me ka'u i hai aku la, o kona nele ana no ia i ka mana. Oia ke kiai oia puka. I ka nalo ana o ua kiai nei, e huki mai oe i ke pani o ka olowaa e kau ana ma ka akau o ka puka aia iloko o laila he o-le, i ka manawa e loaa ai ua o-le nei ia oe, e puhi koke oe me ka ikaika, a iloko o ia manawa e ike aku ana oe he alapii, ma ia alapii e pii aku ai oe a komo iloko o ka ipuka, a iho aku ma kela aoao. Hele hou aku no oe a i ka lua o ka ipuka, e puhi hou no oe i ka o-le, e like me mamua, e ike ana oe he alapii a e pii aku no oe a iho hou ma kela aoao, pela oo e hana ai a hiki i ka puka eono, ilaila oe e hui ai me ka pilikua. O keia o-le, oia no ka hoailona a ke kiai o ka puka ekahi, a i ka manawa e kani ai, ua komo aku la ka manao iloko o na kiai o ia mau ipuka o ke kiai oe o ka ipuka ekahi, a o ke kumu ia e hookuu ia mai ai ke alapii. I kou hiki ana i ke ono o ka puka, e ike ana oe he moe e ku ana ma kekahi aoao, e hele aku oe a e moe maluna o ua moe nei me ka wehe ole i kou aahu a me kekahi pono e ae o kou kino; e moe oe me ka pili o na maka, me ke ala no nae o ka naau. Aole e liuliu e lohe ana oe i ka nakulu, o ka honi ana mai ia o ua pilikua nei ia oe. E imi mai ana ia a loaa oe, e hapai ana ia oe a lawe aku iloko o kona keena ai, oiai nae ia e kaikai ana ia oe, e nana pono iho oe i kana pahi ma ka aoao akau, a i kou makaukau pono ana, e lalau iho me ka hikiwawe a hou iho ma kona umauma, a mai huki hou mai oe i ka pahi. I kona manawa e hina ai, e huki mai oe i ka huihui ki e lewalewa ana ma kona puhaka, a o ke ki me ka onohi eleele oia ke ki o ka ipuka e hiki aku ai i ke keena o ua mau luahine nei."
"O ke ano nui iho la anei ia o na pilikia au e hai mai nei ia'u?" wahi a Nieda.
"Aole," wahi a Badio sa, "iloko o na manawa a pau e lohe mau ana oe i na leo, a e ike mau ana hoi i na mea ano e, aka, aohe a lakou mau poino ke puni ole aku oe, o na pilikia iho la no ia e hui maoli mai ana ia oe, a o ka'u no hoi ia e hai aku nei e like me ka hiki ia'u. Eia aku nae kahi o ke ano ikaika o na paio e hui mai ana me oe, a aia wale no me ka manao kupaa a wiwo ole e lanakila ai, a ua paa no hoi ko'u manao, ma o ka'u mau hoomaopopo ana i kou ano a me kau mau kamailio, he kanaka oe i nele ole me ia mau haawina. E hoolohe hou mai nae. Mahope iho o ka lilo ana ia oe o ka huihui ki, alaila e hiki ai ia oe ke puhi hou i ka o-le, a e like me mamua e pii aku no oe i ke alapii a iho ma kela aoao. I kou hiki ana ma ia aoao, o kou hehi ana ia i ka honua o ke ala olowi, a e hui mai ana oe me na hoowalewale maalea, a malaila, e waiho aku no au i kou noonoo a me kou akamai e pale aku ia mau hoowalewale, no ka mea, aia wale no me ke akamai o ke kamailio ana, ma ka puni ole a me ka wiwo ole e hiki ai ke pale aku i ka lakou mau hana mai. Ua lawa kou noonoo ana no ia mea i oi pakela aku mamua o ka'u, a nolaila, he makehewa ia'u ke a'oa'o aku i ka'u mau kamailio ana."
"Ua makaukau au no ia mea," wahi a Nieda, "oiai, ke kauo nei kau mau kamailio ana i ko'u mau iini a pau e hele ano, me ka hooko pololei ana i kau mau kuhikuhi, i huli hoi aku ai au e hui hou me ko'u koolua o ke alo ana mai i na luhi o keia huakai, a halawai hou hoi me kuu makuahine aloha, ka mea a'u i haalele aku nei mahope me ka puuwai kaumaha, e kanikau ana no'u kana keiki kamakahi i aloha nui ai. E ka makamaka lokomaikai, he oiaio, aole i pau kau mau kuhikuhi ana, aka, mamuli o na olelo hoolana manao, ke aneane nei ko'u noonoo ana e hooia i na olelo a ko'u alakai, a e kau aku hoi i ka hoopai kupono maluna o na Moi opuino."
"Mai pihoihoi oe e ka malihini," wahi a Badiosa, "no ka mea, he oiaio o oe ko'u haku, ae, ko makou a pau, mai ka poe i haulehia iloko o na poino me ke ano kauwa a me ka poe i make mua, ke puni ole oe e like me ko makou ano, ke hiki mai ia manawa, e noho alii io auanei oe, a he lahui nui a ikaika kou."
"Aole o ka noho alii ana ka'u mea e ake nui loa nei, aka, o ka loaa ana o ke kumu o ka'u huakai, a me ko'u huli hoi ana, i hiki ai ia'u ke hooikaika e uku aku i keia mau Moi no ka laua mau hana lokoino."
"Ia oe e hoea aku ai i na ala olowi nei, e hoomau aku no i ka hele ana imua, a hiki i kou ku ana imua o kekahi kanaka opio, ilaila e loaa ana kou hoa paio, e malama loa nae oe ia oe iho, mai hoopa kou lima i kekahi wahi o kona aahu, o lilo koke auanei oe i kii pohaku. Ina e pio ia oe ua kanaka nei, e hele aku oe a wehe ae i ka laka o ka puka hao nui, e komo aku iloko me ka nihi o ka hele ana. Maluna o ka moe nui e ku mai ana e ike ana oe i na poo ekolu me ke kino hookahi; o na luahine ia, e hookokoke aku oe, a o ke poo e huli ana ke alo iluna, e hoomaopopo iho oe aia iaia ka onohi, e poonao iho me ka hooponopono ole, a i ka wa e paa ai i kou lima o ka palekana ana ia, a mai haawi hou aku oe aia a loaa ia oe kou makemake, oia hoi ke ala e hiki ai i ke aupuni o ke kupua Madusa, alaila oe haawi aku. Mamua nae o kou haalele ana'ku ia keena, e puhi hou ae oe i ka o-le a hemo mai. O ka pau ana ia o ka'u wahi i ike, a o ka lanakila ana no hoi ia o kau huakai maluna o na mana o keia mau luahine, a e lilo oe i haku no makou a pau. O kau huakai imua o ke kupua Madusa aole au i ike i na ano, aka, hookahi a'u noi ia oe, i hele oe a i loaa ka lanakila ia oe, mai hoopoina oe i ka huli hoi mai maanei, a e hui hou kaua. No ka mea, mahope iho o ka haulehia ana o na mana o keia mau luahine malalo o kou kupaa a wiwo ole, o ka lilo ana no ia o na mea a pau malalo o kou malu. Aia malalo iho o keia honua a kaua e ku nei, iloko o ka pouli, a iwaena hoi o na inea ehaeha, he mau tausani lehulehu wale o na hoakanaka o kaua e noho ana, a o kou hoopakele ana ia lakou mai loko mai o na inea o ia lua pepehi kanaka, o kou lilo ana no ia i hoola no lakou, a i kia hoomanao hoi no ko lakou ola hou ana ma kou inoa. O keia poe a pau, ua lilo lakou he mau pio mamuli o ko lakou puni ana i na hoowalewale a'u i hai aku nei ia oe, owau pu kekahi i puni wale, ua pomaikai nae au ma ko'u hoonoho ia ana i kiai ma keia wahi, a ke mihi nei au, no ka mea, ua hoao iho nei au e hoopilikia ia oe, a kau aku i ka haawina i like me ko kela poe maluna ou. Nolaila, ke noi nei au ia oe, aole no kou pomaikai wale, aka no ka pomaikai pu o makou a pau, e kupaa oe, mai puni, o haulehia, e hookoa ka hele a e ikaika ka manao, a ke hoohiki nei au me ko'u ola a pau, e lilo na puuwai he mau tausani o makou a pau i hookahi, a aole ikaika malalo iho o ka la nana e hookahuli a hoonaueue na iini aloha nou e ka opio ihiihi e ku lanakila mai nei imua o'u, ke kanaka hoi i hookauwa ia e keia mau luahine, e hana ino aku i kona mau hoakanaka." (Aole i pau.)