Ka Lahui Hawaii, Volume I, Number 26, 24 June 1875 — Page 2

KA NUPEPA KA LAHUI HAWAII
HONOLULU, IUNE 24, 1875.

Ka Moolelo Hou a Kakou.

          Eia maluna o ko makou pakaukau ke waiho nei he lehulehu wale o na buke, a ke hoohialaai nei ko makou mau manao me ka hoohihi i na moolelo kaao mai na au kahiko mai o Helene, Geremania, a hoea mai i ko keia mau la. Eia me makou ka moolelo o ke auhee ana o na koa Peresiana, malalo o ke alakai ana a kela alihikaua kaulana o Xerxes, i na olali o ka poe Spartans o Helene. Eia pu no hoi ko Geremania, na Kau Eha, ka mea i kapaia o Unedine puuwai waipaha; ke Komo Kupua Eehia; ka Huakai Aukai a ka poe Agonatusa o Helene; na Kaua Hookahuli Au he Umikumamalima o ka Honua nei, mai ka hoouka kaua weliweli o Maretona, i ka B. C. 490 a hoea i ke kaua auau koko o Watalu, M. H. 1815, ke auhee ana hoi o na ilio-hae o Farani, malalo o ke alakai ana a ko lakou pilikua o Napoliona Bonepata, ka mea hoi nana i hoonaueue ka ili-honua a kau ka wiwo i na lahuikanaka o Europa ma ia mau la i hala, a noho lanakila ae la na gorila Beritania mamuli o ke alakai wiwo ole a ke pukonakona o ia aupuni oia hoi ka Duke o Welinetona. Mai loko mai o keia a me ka lehulehu o na moolelo walohia o ua au i kunewa hope aku, ke wae pakiko nei makou no ka waiho ana'ku imua o na hoa haihai olelo ma ka pepa mua o keia maluna'e, i ka oi mai loko mai o lakou.

Mai Uhauha.

          Ua kamailio pinepine makou me ka paipai ana'ku i na opio o kakou nei e imi i hana a e haalele i ka noho'na palaualelo. Ma ka makou kamailio ana ma ia mea ua haawi ia'ku na hoike oiaio e hookoa ana i ke kulana o ke kanaka mikiala ma ka hana mai ko ke kanaka palaualelo ae. Ua ike ia, aole i like ko laua keehina ma ko ke kanaka noho'na, a ano, ke makemake nei makou e hoike aku i ke kumu hookahi, kahi hoi e loaa'i ka pomaikai i ka poe paahana i komoia e ka manao kanaka-makua, a me ke kumu hookahi hoi e nele ai ke ole ia manao maikai.
          Mai uhauha. E piha wale no na lima o kekahi i ka hana me ke kaumaha o ka hokua i ka nui o na pomaikai a nele nae i ka manao ikaika nana e pale aku i keia kupuino he "uhauha," ke hai paa aku nei makou he luhi makehewa ia nona. Mai manao oe e kela hoa'loha opio, aia na ka pahee o kou aahu, ke kapakahi o ka papale i hele a nalowale i ka lei, ke kikihi kakaha o ke kino i hoomalule ia e ka wai hoomaloo ola, ka pohina o ka uahi kika a ane nalo na maka—e ka makamaka, ka hoahanau aloha o ka puhaka hookahi, mai kuhihewa oe o na pomaikai ia o ka luhi ana ma ka hana, mai manao oe o ka hanohano ia, mai manao o kou keehi'na ia i ke kulana lanakila o ka maalahi—auhea oe, e haawi mai i kou pepeiao a e moni aku i keia, "o na kauo ana ia a ka uhauha ia oe, o ka hamama ana mai ia o ka ipuka a i kou wa e komo aku ai me ka piha lealea, o kona wa no ia e hookuu mai ai i na umii a paa'ku la oe, he pio nana. Punia'ku la oe ma ia ala, a o ka hopena, oia no ka hoea ana mai o kana elele, ka makua hoi o ka ilihune he nele."
          Ke hauoli nei makou no ka loaa ana o kau hana e kela kanaka ui opio, he piha mau ko makou puuwai me na koni o ka manaolana i ka ike ana'ku i kou hooikaika ma kau hana; aka, ua kapae aua nei oe i na manao kamalii? Ua makia anei oe i ka ipuka o kou pahu noonoo me ke kui hopoole o ka manaopaa? Ke ku kilakila nei anei oe ma kela kapa o ke kiowai awahia o ka uhauha? Ina pela, o oe ka makua e ola'i ka ohana, nou na leo pule hauoli a kou mau makua aoo, a o oe kekahi o na koo e ola hou ai o Hawaii. Nou na pomaikai o ka hooikaika ana ma ka hana, a mamuli o kou hookanaka-makua e pomaikai pu ai ka lehulehu holookoa. Nou ka inoa maikai, a mamuli o kou inoa maikai e mahaloia'i oe a me kou ohana. Maluna ou e kau mai ai na manaolana o ka lehulehu e lilo kou noho'na a me kau mau hana i alakai no ka lahui. "Mai uhauha, a nou keia kulana."

Ke Au o ka Manawa.

          He au ka manawa, aole ia e kali ana no kekahi. E kikoo mau ana kona mau wawae imua me ka luli ole ae ihope. E haalele ana oia i na mea a pau i kau ole maluna o kona kulana, a aole hoi e lohe kona pepeiao i na leo uwalo aku mahope ona. He makamaka oia a he enemi no hoi no ke kanaka. Ke lalau oe ano, ke hana me ka awiwi, ke hoomanawanui me ka hookaulua ole, e lilo ana oia he hoa'loha oiaio nou, a e kau mai ana kela i na pomaikai he lehulehu maluna o kou hokua. E ike mau ana oe i ke ala o ka noho ana o keia ola me ka malamalama, e holo lanakila ana me ke kuia ole mai me na pohaku hoopoino, a he lanakila mau kau huakai. Aka, ke hookaulua iho oe, ke hoomolowa a hoopalaleha, e lilo ana ia he enemi nou, e ana ana kela i na pomaikai he lehulehu, e pouli mau ana kau huakai, a e nele loa ana oe i ke kulana ole. Nolaila, e na opio, no oukou keia loe, eia oia imua o Hawaii ano, e lalau iaia, e apo mai, e paa pono me ka manaolana, mai ae e haalele ia mahope nei, mai ae i na manao lalau e hoonele ia oukou me keia mau pomaikai, aka, e kau aku maluna o kona mau papahele a hookahi ka lele pu ana maluna o na eheu palahalaha a ke au o ka manawa, a e lilo no auanei oukou he mau hoa'loha ponoi nona, a no oukou na pomaikai he lehulehu. Ano, e au, e wiki, a mai hookaulua.

Mai Hookae.

          O ka hookae, he hua no ia na ka hookano. Ke hookae ke kanaka i kona hoalauna, o kona hoohaahaa ana no ia iaia iho ma ka manao o ka poe maikai. Mai manao kekahi ua hana ia oia e ka Makua Mana a oi ae mamua o kona hoakanaka, no ka mea, he manao kuhihewa ia. Mai ike aku oe i kou hoalauna e hana ana i ka hewa, a hoowahawaha aku me ka hookae, aka, e lalau aku i kona lima, e haawi aku i ka umii o ke aloha pumehana, e waiho aku i na huaolelo o ka welina nona, a e hooikaika e hapai ae iaia a kau ma kapa o ke kio lepo, hookomo aku i na koni ana o ka manaolana, a mai haalele iaia e hele makapo ma na ala kikeekee o keia ola ana. Mai manao oe e kela wahine no ka maemae ana o kou kapa, ua oi ae oe mamua o keia wahine, aole. Mai manao oe no kou ike ana ua hele aku la kela wahine i ka hewa, alaila, ua pau ae la kou kuleana ilaila, aole. He hoa wahine ia nou. E kii aku iaia, e haawi aku i ka hoike o ke aloha, mai kipaku aku, e apo mai, e haawi aku kou mau maka a me kou leo i ke aloha nona a mai ae iaia e hele hou ma ke ala o ka hewa. Pela hoi oe e kela kanaka. E hoolei i ka hookano a e haalele i ka hookae, alaila, e hooko ana hoi kakou i kekahi o na kanawai mua loa a ka mea nana kakou i hana.

E Hauoli me ka Maluhia.

          Waiho wale ka hoi ke kapitala nei hemolele i ka malie i keia mau po iho nei. Lawe mai la kahi kehau huihui o ke ano ahiahi i na omaka waianuhea, hookuu mai la hoi ke kukui lamalama o ka lewaluna i kona nani a pau, a kani hoolai ae la na leo pila i awili ia me ko kekahi mau makamaka, a oiai makou e hoolono ana me ka piha i na hihio punia no ka nani o ka manawa, kokolo mai la ka huihui ma ka umauma e ninau mai ana, "Heaha aku la ua lealea a me ka hauoli a ke kanaka e ake nui nei mamua o keia?" A i ka pae pono ana mai o na leo mele i ko makou mau pepeiao, komo mai la ka minamina no na opio o kakou e hele kunewa wale nei ma na alanui i kela a me keia po, e uhauha wale ana i ka manawa maikai no ka hoonanea ana ma ka home i hoohauoli ia hoi e ka ohana. He oiaio, "Aohe no wahi e like me ka home," oiai ua ike makou ia makou iho, a ua hoomaopopo no hoi ma na hiohiona o na makamaka i apo i ka manawa kupono no ka hauoli ana, a malama hoi i kahi no na hana e ae o keia noho ana. Ke kamailio nei makou me ka piha o ka manao no na opio Hawaii, e haalele i ke kunewa ana ma na alanui, ka hele ana e inu i ka rama a ona, a moe ma kapa o ke ala, a e huli ae ma ke ala maemae, a e hauoli piha me ka maluhia.

Ka Moku Pauahi.

          Ma ke kakahiaka Poakahi i hala iho nei oia paha ka hora 2 A. M., ua hoopuiwa ia ae ka hiamoe o ko ke kulanakauhale nei poe e na leo kui-lua o na bele pauahi. E like me ke ano mau o ko kakou mau keiki kinaiahi, ua hala ole ka manawa ia lakou no ka hooko ana i ka leo kahea no ka lakou mau kokua ana. Ua loaa mai la ka lono aia ke ahi iluna o kekahi moku kalepa e ku ana mawaho o ke awa, a ua holo aku la na kaawai a ma kai o Ainahou, malaila kahi i hooluana ai. Oiai lakou e kali ana, e kolo ia mai ana ua moku nei e Pele, i kokua ia e na waapa o na manuwa Amerika e ku nei i ke awa. I ka pili ana mai ma ka uwapo, ua kau koke aku la na iliwai, o ka hora 5 ia, a mai ia manawa mai i ike ia aku ai na hoa kinaiahi e hooikaika nui ana no ka hoopio ana i ke ahi a hiki i ka hora 2 o ka auina la, a o ko lakou hoi ana no hoi ia me ka manao ua pio ke ahi, aka, aohe paha i komo na wahi aahu maloo, aia hoi ua kahea hou mai la no na bele, a paa hou aku la lakou ilaila, oiai, ua hoomaka hou ae la ke ahi e hana i kana hana, aka, aole nae i liuliu ua pio koke iho la no.
          O keia moku, oia no ka moku kalepa Emerald, he moku nui keia, a he iwakalua ka nui o kona mau makahiki. Ua kukulu ia oia me kekahi ano laau paa loa, a mamua iho o kona pau ana i ke ahi, ua olelo ia ua like no ka paa me ka la mua loa i hooholo ia ai. He moku holo no hoi keia, a he nani kona kii ke nana aku. Ua holo mai oia mai Kapalakiko mai a ku ia nei, me ka manao e holo loa aku i na Ailana lepo-manu ma ia kakahiaka Poakahi, aka, ua loohia e ia keia poino. O ke kumu o ke ahi aole i maopopo, aka, aole no paha e liuliu ka manawa, a e lohe ana no kakou. Eia oia ke ku nei ma Ainahou, ua weluwelu kona aoao i ke kipu ia e ka manuwa no ka hoopiha ana i ke kai, a ua nalo hoi ka ulumahiehie o kona mau ia, e waiho kapakahi ana ma kona mau aoao. Aole makou i lohe mai i ka nui o ke poho a me ka manao ia paha e hana hou, aka, ua hai ia mai ia makou ua paa na poho maluna o kekahi Hui Uku-poho o Amerika.

Ke Kaawe! Aloha wale.

E KA LAHUI HAWAII; Aloha oe:—
          He mea nui na'u ke kau leta ana aku i na nupepa no ka hai ana aku i na mea hou o ke kuaaina nei; aka, i ke kau ana mai o ka manawa e hai aku ai no kekahi lono o keia ano a'u e hai aku nei, he oiaio, ua piha loko i ke aloha a me ke kaumaha.
          Ma ka la 16 iho nei i kunewa hope aku la, ua hoohikilele ia na puuwai o ko Maui Hikina nei poe, no ka pahola ana ae o ka lono ua loaa aku kekahi kanaka o Kaohaiula kona inoa mahope aku o Wailuku ua make, ma ka li ana iaia iho me ka hainaka. Ua nalowale oia no ka pule okoa, a i ka wa i pii aku ai kekahi kanaka o Kaaiai kona inoa i ka la i hai ia ae la, ua hikilele kona hauli i ka ike ana aku ua lawe keia hoakanaka i ke ola laahia a ke Akua i makana mai ai. Mamuli o keia lono pihoihoi ua kauo ia aku au e na manao aloha e hele aku e ike, a i ko'u ike ana, he mea e ko'u kaumaha. Ua li oia iaia iho maluna e kekahi wahi kumulaau nenee haahaa, a o kona kino ilalo no o ka honua a o kona a-i wale no ka i kau ae iluna. O ke kumu o keia hana aole i maopopo. Mamua aku nei ua noho oia ma ka hale pupule no kekahi mai pupule, a malia paha oia no ke kumu i hana ai i keia hana. Ano, ua hai aku la au i keia lono me ka minamina nui i ke ola o keia Hawaii, me ka lana o ka manao aole e loaa hou kekahi haawina o keia ano maluna o ko kakou wahi lahui mailuilu iki. Owau no Kou Makamaka Oiaio,
J. L. KAAIKOELE.
Ka-ua Ukiu, Iune 18, 1875.

          Mawaene o na keiki kinaiahi i ka Poakahi iho nei makai o Ainahou, ua ike ia'ku ke kinai pu ana mai o na lala 'lii oia oihana, ka Moi a me kona pokii.

Kauka Mai Lepera.

          Ua heluhelu au me ka mahalo i na olelo wehewehe a ka Mea Hanohano ke Kuhina Kalaiaina—e pili ana i ka hoole kumu ia o Mohabeer, aole e loaa ka "Palapala ae" kahuna lapaau. Pono iho la no keia.
          Eia nae hoi ka'u ninau ia oe, he "Palapala Ae" no anei ko Kauka C. T. Akana? No ka mea, i ka'u ikemaka, oia ka pahikuhiku a ka oleloa, a he mea pono ole no hoi ka loaa ana o ka "Palapala Ae" lapaau i ka poe ike ole; a i ka poe hiki ole ke hoike i ko lakou makaukau imua o na Aha ninaninau a ka Papa Ola e hoonoho ai e nana i ka makaukau o ka poe e noi ana e lilo i poe kauka.
          E pono e oluolu ka Paresidena o ka Papa Ola e hoonoho i Aha ninaninau no ka makaukau o Kauka Akana i ka oihana lapaau. Ke manao paa nei nei au, e ike lea ia'na, aole loa i loaa iaia kahi ike iki no ka oihana lapaau. Nui kona kaena no ka hiki iaia ke hoola i ka "Mai Lepera," ua hoao ia oia ma ia hana, a ua maopopo kona hoka a me ka hiki ole iaia ke hoola ia mai, a ua lilo kana mau olelo kaena i opala.
          Elima mai lepe ra a ka Papa Ola i haawi ai ia Akana e lapaau iloko o eono malama. Ua hoao kona akamai a ua hoka, no ka mea, aole hookahi mai i hoolaia. Ua pomaikai nae o Kauka Akana, no ka mea, ua loaa iaia hookahi dala no ka la, a he uku nui loa ia no ka poe o kona ano.
          Ua aneane paha he umikumamalima poe a Kauka Akana i lapaau ai no ka mai lepera ma Honolulu, aole nae i ola. Ua hoounaia mai ia poe a pau i Kalawao, Molokai, wahi a keia poe. I ko Kauka Akana wa i hoomaka'i e lapaau ia lakou, penei kana olelo: "Hiki no ia'u e hoola keia "mai lepera," alua mahina pau no; haawi mai kanaha dala, alaila, kuai aku i ka laau a hoopau no keia mai." Paulehia ka manao o ka poe i maiia a me ko lakou mau makamaka, o ka haawi aku la no ia i ke dala, a hala na mahina elua, aia o Kalawao ka ilina. He lehulehu ka poe e noho nei ma keia Panalaau Lepera i hanaia pela. He omo-koko maoli ka hana o keia ano, a ua kupono no e hoopauia kona noho kauka ana malalo o keia mau kumu. A ina ka Loio Kuhina e makemake e ninau pono no keia mau hana a Kauka Akana, he nui na hoike nana e hoike mai ka oiaio o keia mau mea i oleloia.
          I kona wa i noho iho nei ma Kalawao, ua hele oia a olelo aku i kekahi poe mai kuonoono, ua hiki iaia ke hoola ia lakou, ina e loaa mua mai he kanaha, a kanalima dala, i mea kuai laau—aia ka maalea la. E ninau no ka oiaio o keia mau mea ia Hon. H. Kuihelani, a me Hon. N. Kepoikai o Wailuku, Maui.
          E ae anei ko ka Moi Papa Ola i ka poe o keia ano e hele iwaena o ka lahuikanaka me na alelo alapahi, e alakai hewa ai i ka poe uuku o kahi ike, me ka lilo o ka lakou mau dala? Ke manao paa nei au, aole pela ka manao o ka Papa Ola, nolaila, e ninaninau pono ia ke ano ike o keia pake; a ina ua maopopo aole ona ike, alaila, e lawe koke ia ka "Palapala Ae" lapaau i haawi hewa ia iaia. E hanaia ka pono ina e haule na lani. Me ke aloha no.
KAUAMOANIALA.
Molokai, Iune 7, 1875.

          Nani ulumahiehie lua keia huakai aku nei a ka papahele moana i keia ahiahi Poakahi iho nei, ke hele la a "Pilikia kaula i ka hooke a na manu." Ua huli hoi aku ko Hawaii o Keawe mau makamaka; ko Maui o Kama me ko lakou Kiaaina hanohano, alo pu aku la i ka ehu kai ko ka moku waokele a Molokai-nui a Hina, i pakuiia mai hoi e ko kahi kuahiwi Lanai. Nee malie aku la ua olali nei a haalele mai la i ka uwapo, a i kona kaalo ana ae, a ike pono ia'ku la na kowelo ana a na hainaka, a ku aku la makou mauka nei me ka pii maeele ae o kahi manao hoohihi, "e hoolaau ae ana e naue, i hookahi ka au pu ana ia kai loa."