Ka Lahui Hawaii, Volume I, Number 18, 29 ʻApelila 1875 — Page 4
Na Ekalesia o Kawaiahao a me Kaumakapili.
Halawai kakahiaka, la Sabati .... hora 10½
Halawai po ..... hora 7½
Halawai Apana auina la ..... hora 3½
Kula Sabati ..... hora 9½
NA KULA SABATI.
NA HAAWINA.
Mei 23.—O SAMUELA, KE KEIKI.—I Samuela III: 1—10.
1 O Samuela, ke keiki, lawelawe aku la ia na Iehova imua o Eli. Kakaikahi ka olelo a Iehova ia manawa: aole he hoikeia'na i laha.
2 A ia mau la, ia Eli i moe ilalo ma kona wahi, ua powehiwehi kona maka, aole ia i ike;
3 Mamua o ke pio ana o ke kukui o ke Akua ma ka halelewa o Iehova, kahi i waiho ai ka pahu o ke Akua, a ua moe iho o Samuela;
4 Hea mai la o Iehova ia Samuela, i aku la ia, Eia no wau.
5 A holo aku ia io Eli la, i aku la, Eia no wau, no ka mea, ua kahea mai oe ia'u. I mai la ia, Aole au i kahea aku; e moe hou oe. A hele aku la ia, a moe iho la.
6 Kahea hou mai la o Iehova, E Samuela. A ala mai o Samuela, a hele io Eli la, i aku la, Eia no wau; no ka mea, ua kahea mai oe ia'u. I mai la ia, Aole au i kahea aku, e kuu keiki; e moe hou oe.
7 A o Samuela, aole ia i ike ia Iehova ia wa, aole hoi i hoikeia ka olelo a Iehova iaia.
8 Kahea hou mai la o Iehova ia Samuela, o ke kolu keia. Ala mai la ia, a hele aku la io Eli la, i aku la, Eia no wau, no ka mea, ua kahea mai oe ia'u. A ike iho la o Eli, ua kahea mai o Iehova i ke keiki.
0 No ia mea, olelo aku la o Eli ia Samuela, O hoi oe e moe; a i kahea hou mai oia ia oe, e i aku oe, E Iehova, e olelo mai, no ka mea, ua lohe kau kauwa. A hoi aku la o Samuela, a moe iho la ma kona wahi.
10 Hele mai la o Iehova, a hoike iaia iho, a kahea mai la e like me na manawa mamua, E Samuela, e Samuela. I aku la o Samuela, E olelo mai, no ka mea, ua lohe kau kauwa.
——:o:——
Maloko o keia mokuna e ike ai kakou ia Samuela ma ke ano he kaula opio. Eia na mahele o ka mokuna. I. Ko ke Akua hoike mua ana Iaia iho imua o Samuela, p. 1—10. II. Ke kauoha i hoouna ia ma o Samuela ia Eli, p. 11—14. III. Hooko pono o Samuela i ka hana i haawiia iaia me ko Eli hoapono ana ia mea, p. 14—18. IV. Hookohu ia o Samuela i Kaula, p. 19—21.
Ua hoi e paha o Eli e moe i ke ahiahi, a ua lawelawe o Samuela nona a pau hoi i kona wahi; pela no na mea e ae i lawelawe i na hana o ka luakini, a ua hiamoe o Eli, p. 2. Ua moe iho o Samuela ma kona wahi, e kokoke ana i kahi o ka pahu berita, aole i pio na kukui o na aoao o ka ihoiho, p. 3. Heaha la ko Samuela hana ia wa?
Kahea mai la ke Akua ia Samuela, a kuhihewa o Samuela o Eli kai kahea iaia, hele aku la oia ia Eli, a hoole mai kela aole oia i kahea; ekolu hana ana pela, a ike o Eli ua kahea ke Akua i ke keiki, p. 4—8. Ao mai la o Eli i kana mea e hana'i ke kahea hou ke Akua, a hana aku la o Samuela pela, p. 9, 10.
1. Ua kahea ke Akua i na keiki i keia wa. Pehea e ike ia ai Kona leo? Mahea Kona leo? Aia a lohe ia ka leo o ke Akua, heaha ka pane kupono? 2. Makaala loa o Samuela e lohe i ka leo o Eli, a nana i kuhikuhi iaia i ke Akua. He keiki mikioi a hoolohe o Samuela.
E holo ana ka manuwa Adimarala i Hilo i keia mau la iho, a ke minamina e nei makou i ka nalo aku o na leo pila hoonanea o na aluna ahiahi Poalua—ma ka pa Hotele Hawaii.
He Nane, Ekolu.
He 11 o'u mau hua.
Elua o'u mahele inoa.
No ka puhaka hookahi au.
E hai mai ia'u e ko'u mau mua.
Ko'u mua me ke ono, he mau hua kumu.
Ko'u 10 1 9 pili i ke kino o ke kanaka.
Ko'u 6 4 he inoa no kanaka i ka wa kahiko.
Ko'u 8 7 2 he moku Hawaii.
Ko'u 2 8 9 he mea ino a hoopailua ke ai ia.
Ko'u 9 8 7 5 pili i ka luakini.
Ko'u 8 5 he laau hua awaawa.
Ko'u 4 11 ano pohihihi.
Ko'u 6 4 8 9 pili i ka lili.
Ko'u 5 3 4 he alakai.
Ko'u 6 9 8 2 11 5 he mokupuni.
Ko'u 3 7 4 he wai paa.
Ko'u 1 9 6 4 10 he aupuni.
Eia au me oukou pakahi a pau.
E hoomau aku i ole ai e nalo.
Kuu inoa holooka aole e pau.
Owai la wau?— OAHU.
He Nane, Eha.
O Kamehameha Ekahi ka na'i aina,
Oia ka Makua i ike i ka eha;
Nana i huli a waiho mai,
Ia kakou kana mau mamo.
Mai iaia ka hookumu ana,
O ko'u noho launa ana.
Noho pu au me oukou,
A hiki ia Kamehameha III.
Lawe ia'ku kou hanu,
E na lima pakaha wale,
Hoihoi hou ia mai nae
A waiho hou iloko ou.
E hele ka luahine a moe i ke ala
Aole mea nana e hoopilikia;
Kau mai Kamehameha I V
Koe no au me oukou.
Ku mai Kamehameha V,
Aole oukou i kiola ia'u
Ua lawelawe oukou i ko'u kulana
A oia ka mea i mau ai.
Noho mai o Lunalilo I,
Ua haaheo oukou no'u;
Kau ae ka Moi Kalakaua I
Ua mau au me ka mau loa.
NA HAINA O NA NANE.
NO KA NANE MUA.
"He umikumamakahi o'u mau hua."
O ka mahele mua—He kukui malamalama.—O ka lua: "He hoopono. O ko'u inoa holookoa.
Ka olelo a ke Akua."
Haina:—Lamaku—Oiaio.
NANE ELUA.
"He umi o'u mau hua.—O ko'u inoa: He Hooilina no Hawaii."
Haina—Leleiohoku.
Maloko o keia mau haina—e loaa no na mea e ae.
R. S. COMPANY.
He mau Kumu i Emi ai ka Lahui.
E KA LAHUI HAWAII; Aloha oe:—
E oluolu mai ia'u e waiho aku i keia Kumumanao malalo o kou ahonui piha. Ua loihi na la i hala o ko'u noonoo ana malalo o kekahi kumuhana paakiki i pahola ia mai maluna o ka lahui, mai o a o, a na kela ohana keia ohana e auamo me kona hokua ponoi oia hoi ka hooulu lahui. O keia ninau paakiki, ua maalo aku oia iloko o na pahukani o ka poe naauao piha o ke aupuni, mai na alii a na makaainana. Me ka makemake paha o ka mea haku ninau, e loaa na wehewehe hana kupono nana e hoike mai i ka oiaio o ka mea i iini nui ia, a hoopau ia ka pae ana mai o ka leo o ka enemi lahui, e pee malu nei iloko o na puuwai o kekahi poe kupa o ka aina, e kapa mai nei "o na Makua Misionari ka poe nana i pepehi i ka lahui."
O kekahi o keia mau mapuna leo o ka enemi, ua puka mai no ia ma ka waha o kekahi poe i hiipoi nui ia ma ka poli o na makua o ka pono, oiai ko lakou mau la iluna ke alo, e kolo hele ana i ke kahua o ka naaupo, a hiki i na la i makaukau ai ka manu e laukoa, a haalele mai i ka punana o ka pono. Eia ka ke haku mai nei i na manao lili kuloko; e hooneenee aku ana iloko o na puali koa o ka wa naaupo, a huna ia ke kahiko kaua o ka oihana Karistiano. Aole no au i poina i na kalai manao ana a kekahi poe iwaena o ka lehulehu, me ka hoopuka ana i keia mau huaolelo enemi i ka pono, me he pouli la i maalo ae imua o ke olinolino o ka malamalama o ka la, me ka manao paha e nalo ana ke alina a ke diabolo i kuni paa ai ma kona lae, e waiho moakaka mai nei i ka maka o ka lehulehu mai o a o, oiai paha ua enemi la nona keia leo aloha ole, e aahu ana i ke koloka kupouli o ka inu wai ona a me ka noho manuahi, e hoike ana i kona pulima akau ma ka aoao o ka hoemi lahui, me ka awihi ole iho iloko o ke aniani kilohi o kona noonoo kanaka, a ike lea iho, aia oia iloko o ke anapuni o ka hooulu manuahi, a me ka inu okolehao. Alaila, hoopau i kona pii ana ae ma ka lapa manu ole, ana e uhiuhi lau mamane nei, i nalo ke akaku e hoike lea mai nei i ka hua o kana mea e lulu nei iloko o kona kihapai, ka home aloha e ulu ai ka lahui, eia nae, ua kipulu ia me ka lepo panoa a make ai ka lahui, oia ka ona a me ka noho manuahi; ke pa e mai nei ka leo o ka pilikia ma kekahi mau apana; ua mohai aku la kekahi poe i ko lakou mau ola makamae iloko o ka make ulia wale, mamuli o na hookikina ana a ka waiona. Auwe! Aloha ino!! A hea la auanei e ike maopopo ia aku ai ka moku o ka hooulu lahui, e linohau mai ana me kona mau pea i piha pono i ka makani, e kia pono ana i kona ihu iloko o ke awa malino o ke ola lahui; Oia hoi ke kikoo ana mai o ke Akua me kona aloha lua ole, a huki ae i keia lahui mailoko mai o na kio-lepo o ka make, ke hiki i ka wa e pelu ai na kuli o ka lahui, a kahea pono aku ia Ia'la e halo mai la me kona mau maka hiaa ole, e like la me ko Petero aneane ana e poholo iho iloko o ka opu o ka moana, mamuli o kona paulele kapekepeke, e ole e lalau mai na pulima aloha o ka Haku, ina ua haalele i ka la i ka mea mehana.
Aka, elua mahele nui o ko'u manao, a maluna o laila au e kukulu paa ai i ke kahua o ka'u kamailio ana ma na mea pili i keia Kumumanao.
1. O ka inu wai ona, ke ulu nei iwaena o ka lahui me ka lanakila, a ke hoopalahalaha aku nei i kona mau palena mai ka loa a ka laula o ke aupuni. He nui na home a me na ohana i noho aloha ia e keia kupu ino; ua pepee ka mana o ke kanawai ma o kona mau luna hooko 'la, a mamuli no o keia kupu ino; he nui ka poe e kai huluhulu ia nei i ke kae o ka lua mihi ole. Pehea la auanei e pau ai ka laha ana o keia anoano a ke diabolo, e kanu nei iwaena o ka lahui, me ke ale aku i kekahi hapa o ka lahui iloko o ka make weliweli, a hoolilo i kekahi poe iloko o ka uhauha a me ka palaualelo. Oiai, ua huikau na makau a ka lawaia i Wailua. Ina paha ua waiho ia ke kanawai ma ka lima o ka poe hoopono, a hana pololei, aole auanei e nele ka pepehi ia o keia hewa ino e make ai ka lahui.
Eia kekahi, ma kekahi mau apana, ua wehe akea ia ka puka o kekahi mau hale kuai awa, me he lua mimilo la e ale ana i kekahi poe iloko o ka hoomahui wai ona, a malaila i hoolawa mau ia ai ka makemake o ka poe pakela inu wai ona. Oiai, i na makahiki i hala, aole i hoea mai ka ona me kona kino holookoa. Aka, i keia mau la ua hoea mai oia me ka hoike ia iwaena o ka lehulehu, e kiola ana i ke ola o ka lahui iloko o ka palakahuki.
2. O na home o ka poo manuahi, ua lilo ia i puuhonua no kekahi poe, ua hoohaiki ia ka mana o ka poe e kinai ana i keia hewa malalo o na kuhikuhi a ke kanawai, ke ole e loaa ka mana hopu mai ka mea mai nona ka aina, a hale paha, i kokua pu ia hoi e kekahi manamana o ke kanawai. A ke noho nei kekahi poe me ka lanakila, me he pa kaua la e maluhia ai ka lakou mau hana.
Ke hoea aku i ke capitala kaulana o Honolulu, e ike ia aku no kekahi poe e noho pu mai ana, he kane, a he wahine, no na makahiki loihi, ua kani-moopuna iloko o ka manuahi, ua hoopiha ia kona mau poai e ka poe oia ano, (manuahi.) A ke aui ae hoi ma o a maanei o kona mau pipa alanui, e ike ia aku no ka hamama mai o na puka o kekahi mau hale i hoopiha ia kona mau keena e nawai hoomalule kino, me na hua palapala i kau ia mawaho, me he la e hea mai ana i ka poe makemake e kipa aku ana ma kona ipuka penei: "E ka malihini, e kipa mai oe i o'u nei, a na'u no e pakaha i na dala maikai mailoko mai o kou pakeke, a hoolilo au (rama) ia oe i malihini ilihune ma keia wahi, a ina i lawa ole ko'u makemake, e alakai loa aku no au ia oe iloko o ka hale paahao." A ke olelo mai nei hoi kekahi poe, aole no e pau ana ka laha ana o ka ona ma Hawaii nei. Oiai, ua ae ia kekahi poe e kuai awa, a e puhi rama ma na mahi ko, malia he puuwai io ia o ka hooulu wai ona. A o kekahi mau pa hale hoi ma na taona kaulana o keia aupuni, ua hoolilo ia i kahua mokomoko no ka poe noho manuahi, a he lehulehu wale o ka poe opiopio e kuu lala nei ma keia mau hana ino, e mohai nei i na kino ui no ka lua kupapau.
Eia hoi keia, i ka wa o kekahi poe ma na kuaaina, aole i haalele ka wahine i kana kane ponoi, eia nae i ka hiki ana aku i Honolulu, ua haalele mai la i ka pili, lilo aku la i Puna i ke au a ka wawae. E na puuwai aloha lahui, na kupa hoi o ke one hanau, e ala a e kinai aku i keia mau hewa e make ai ka lahui.—A na ke Akua e kokua ia oe e Hawaii. Me ka Mahalo,
H. K. KAHOPUKAHI.
Kohala Akau, Hawaii.
NA BUKE
I HOOLAHAIA E KA PAPA HAWAII
—ME KE—
KUMUKUAI O KELA ME KEIA.
BAIB ALA HEMOLELE NUI ILI GULA NANI me na kuhikuhi ma na aoao ..... $12.00
Baibala Hemolele Nui ili eleele kaekae wai gula ..... 5.00
Baibala Hemolele uuku iki iho kae wai gula ..... 8.00
Baibala Hemolele uuku iki iho kae wai gula ..... 4.00
Baibala Hemolele ili eleele ..... 2.00
Kauoha Hou ili gula nani me na kuhikuhi ..... 3.00
Kauoha Hou ili eleele kaekae wai gula ..... 1.00
Kauoha Hou ili eleele ..... .75
Kauoha Hou Hapa Haole ..... .75
Moolelo Ekale sia ..... .50
Haiao ili lahilahi ..... .10
Hele Malihini ana ..... .25
No ko ke Akua ano ..... .25
Hoike Palapala Hemolele ..... .25
Moolelo o Hene ri Opukahaia ..... .15
Hoike Akua ..... .25
Wehewehehala ..... .25
Ninau Hoike ili manoanoa ..... .50
Ninau Hoike ili lahilahi ..... .20
Kumumua Kula Sabati ..... .20
B uke Lawe Lima ..... .10
He Buke no ka Pope ..... .15
Ui Kula Sabati Helu 3 ..... .25
Ui Kula Sabati Helu 4 ..... .15
Ui Kula Sabati Helu 5 ..... .25
B uke Euanelio o Ioane Hapahaole ..... .10
B uke Wehewehe Huaolelo Baibala, elua ano ..... 2.00
B uke Wehewehe Ano Mataio ..... 1.00
NA KAUOHA HOU PAKEKE.
Ili gula nani ..... 1.50
Ili eleele kaekae nani ..... .50
Ili eleele ..... .35
KAUOHA HOU PAKEKE ME NA HALELU.
Ili gula nani ..... 1.70
Ili eleele kaekae wai gula ..... .65
Ili eleele ..... .50
NA HALELU PAKEKE.
Ili Gula nani ..... .50
Ili eleele kaekae wai gula ..... .30
Ili eleele ..... .20
Ka Hae Hoonani (Buke Mele) ..... .25
NA BUKE MELE.
Himeni Hawaii ili nani ..... 1.75
Himeni Hawaii ..... 1.00
Kumu Leo Mele ili manoanoa ..... .50
Kumu Leo Mele ..... .10
Li ra Kamalii ..... .25
Li ra Hawaii 1848 ..... .25
Li ra Hawaii 1855 ..... .25
Hae Hoonani ..... .25
Leo Hoomana ..... .20
EIA NA BUKE HAAWI WALE.
PALAPALA LIILII—
Helu 4—Makemake anei oe i ke ola?
Helu 6—E hele i o Kristo la.
Helu 7—Ka hoi ana mai o ke Keiki Uhauha.
Helu 11—No ka hoohiki wahahee i ke Akua.
Helu 16—Ka Eehia ana o ka Ahaaina a ka Haku a me ka Bapetizo ana.
Helu 17—Mai hana ino i na holoholona.
Helu 18—No ka mahi ana, kuai ana a me ka inu ana i ka Awa.
Ka Davida Malo Kumumanao.
Ka Moolelo o Batimea Puaaiki.
Aia ke keena kuai buke o ka Papa Hawaii ma ka huina o Alanui Betela me Alanui Kalepa, e kokoke ana i ka Hale Leta. J. F. POKUE.
Kakaule ta o ka Papa Hooko o ka Ahahui Euanelio o ko Hawaii Pae Aina.