Ka Lahui Hawaii, Volume I, Number 18, 29 April 1875 — Page 1
KA LAHUI HAWAII.
"Ua mau ke Ea o ka Aina i ka Pono."
HOL Y BIBLE
BUKE I.} HONOLULU, POAHA, APERILA 29, 1875. {HELU 18.
KA NUPEPA KA LAHUI HAWAII.
He pepa i hoopukaia i kela me keia he bedoma no na Ohana a me na Ekalesia o Hawaii; he mea kokua i ka noho pono ana o na ohana, ka maluhia o kanaka, a me na pomaikai kino a uhane o ka Lahui Hawaii. "Aole paonioni; aole haanui; aole hikiwawe ka huhu; aole noonoo ino."
HOOKAHI DALA ka uku no ka pepa no ka makahiki hookahi. Hapa makahiki, Hapalua.
E hoouna mai i na le ta no KA LAHUI HAWAII ia H. H. Paleka, Honolulu, Oahu.
[NO KA LAHUI HAWAII.]
LEO.
A Man's a Man for All That.
Carmina Sacra, p. 29.
1. A ole hilahila e,
Aole e kaumaha,
Ke henehene mai,
He ui Hawaii au la,
Hawaii, Hawaii,
He kuaaina au la;
He nani mae la ko lakou,
He ui Hawaii au la.
2. Ua hanohano na Moi,
A me na Kiaaina,
Mahalo ia na luna e;
He ui Hawaii au la,
Hawaii, Hawaii,
A oiaio au la,
A noonoo e a pololei,
Ka mea oi keia.
3. He wa maikai, kokoke mai,
Ke kuikahi like,
A hui aku, hui mai
'Melika me Hawaii.
Hawaii, Hawaii,
He ui Hawaii au la,
A lilo no na mea a pau
I poe hoaaloha.
HAWAII.
HE MOOLELO KAAO
NO KE
KEIKI ALII IULESIA
NO KA LAHUI KAULANA O NA AU I HALA MA HELENE—ME KANA MAU KAAPUNI ANA I NA AINA MA KA HIKINA.
MOKUNA VIII—HELU 20.
I KUMU e hooia loa mai ai ke kanaka hanai holoholona i kana moolelo, ua hoomaka aku la o Iulesia e hai paee i kona moolelo, me ka hai aku he kanaka Keretana oia, a ua hele pu me Idomeneusa i ke kaua ma Karioe, a ua hai pu aku no hoi ua hui pu ia me Iulesia. No ka pololei loa o ka ia nei hoike ana i na ano a me na hana i maa i ua kahu hanai holoholona nei, ua hooia loa mai la kela. "Ua kipa ae au ma ka aina o Tesepotia." wahi ana, "a ua hai mai ke keiki a ke 'Lii ia'u, ua kipa aku o Iulesia malaila, a mamua iki iho no o ko'u hiki ana aku kona haalele ana iho, a holo aku la no ka aina o Dodona, me ka huli hoi koke ae no nae, a malaila e loaa ai iaia he moku nona e hoi mai ai i Itaka nei. A i hoike no ka oiaio ka'u e hai aku nei no ka huli hoi koke mai o kou Haku Iulesia, e haawi aku no au i ka mana ia oe, ke kali kakou a hala ka manawa, e hoolei aku i ko'u kino iloko o ke kai, a e lilo ko'u hopena i mea wiwo ia e ka poe e hele hoopunipuni mai nei." "Oia hana," wahi a Eumeusa, "aohe wahi pomaikai e loaa mai ana ia'u no ia mea."
Oiai laua nei e kamailio ana, komo mai la na paahana a ke kanaka hanai holoholona, a mahope o ke aloha ana me ka malihini, ua noho pu iho la lakou e paina pu. I ka pau ana o ka paina, ua koi mai la lakou iaia nei e hai aku i na mea e pili ana no ko lakou alii opio. "E hai aku ana au i kekahi mea a'u e noonoo ae nei no ua 'Lii nei o oukou," wahi a Iulesia. "I kekahi po pouli anu huihui, e helelei ana na omaka kehau mao a maanei, ua alakai aku la makou i na koa Helene malalo mai o na kiekiena o Karioe. Ia manawa, he kaulana a hanohano ko'u kulana, a ua oluolu ia Iulesia ka lawe ana ia'u i kokua nona ma ke alakai ana i na koa. He iwakalua wale no ko makou heluna, a i ua pe nei ua hooluana iho la makou malalo o ka malu o na lau nahele, aka, me he la, ua oi pakela aku ka aaki o ke anu. Ua pakahi ia na mea a pau me ka huluhulu, a koe iho la wau hookahi, ua poina au i ko'u huluhulu. Ua hooikaika au e hoomanawanui, aka, ua hiki ole, a hoike aku la au ia Iulesia i kou kulana, me ke noi aku iaia e kokua mai, pane mai la nae kela me ka leo kalakala i ka i ana mai, 'Kuli! E noonoo pono oe i kou kulana, o lohe mai auanei na koa Helene i kou ano wiwo wale.' Aole oia i pane hou mai ia'u ma ia hope, aka, ua hoike mai la kela i ke ano aloha ole ia'u. Aka, e like me kona ano wiwo ole, pela no kona ano maalea, oiai oia e moe mai ana, ua ike aku la no au e noonoo ana ia i wahi e kokua mai ai ia'u, a ala ae la ia a pane mai la, 'E na hoaaloha, ua noonoo nui iho nei au, a ua hooholo iho nei e hoouna kakou imua o ke alii Agamemona i kokua, no ka mea, he kakaikahi loa kakou, a he wahi meheu uuku iki ma ka aoao o ka heluna lehulehu o ka enemi. No keia mau huaolelo ana, ua lokahi mai la ka manao o na koa, a ua hoouna ia'ku la kekahi koa , a i kona hala ana, lalau aku la o Iulesia i kona mau huluhulu, a haawi mai la ia'u me ka pane ana mai, 'Eia mai he huluhulu, a e hoao oe ano e hoopumehana ia oe iho.'"
No keia mau huaolelo plli ia Iulesia, ua piha loa na kamaaina i ka hauoli, a hoomakaukau mai la lakou i wahi no ia nei e hiamoe ai, a pane mai la, "E hooluolu oe e ka aoo i kou mau ami maluhiluhi, ke haawi aku nei makou i ka mea hiki, oiai ma kau mau moolelo e pili ana i ko makou Moi i aloha nui ia, ua aie nui makou ia oe." A moe aku la o Iulesia maloko o ke keena o kana kauwa ma ke ano he kanaka elemakule ilihune loa.
I ka hoea ana mai o ka malamalama o kekahi la ae, ua hoike aku la o Iulesia i kona manao hele imua o na kanaka noho kuahiwi, me ka hai pu aku i kona makemake ole e anunu i ko lakou lokomaikai, a nolaila, he mea pono iaia ke hele aku iwaena o ke kulanakauhale e imi i wahi pono nona. "E ka hoa'loha malihini," wahi a Eumeusa, "aole paha oe i ike i kau mea e kamailio nei. He aha la ka kekahi kanaka nawaliwali o kou kulana e hiki ai ke hana? Aole i kupono oe i ko lakou makemake, oiai o ka mea opiopio a ikaika ka lakou makemake. O ko lakou ano hookiekie, he mea ia e hoinoino mai ana i kou ano aoo. E noho oe maanei, malia paha o hiki mai ka moiwahine, a i ole ia o ke keiki alii Telemacusa, ke lohe aku i kou hoea ana mai."
Oiai o Eume sa e kamailio ana, ua lohe ia'ku la ke kamumu mai o na kapuai wawae o kekahi mea, me na ilio kiai holoholona e holoholo pioo ana me he la ua piha i ka hauoli nui. Na ia mea i hoomaopopo aku ia Eumesa no kekahi mea, a haupu ae la ia no ke keiki alii, oiai ua lohe aku la ia no keia malihini me na lono no kona makuakane, a ua hele mai la e ike iaia. "O na kapuai kela o Telemacusa," wahi a Eumeusa, "ke keiki ponoi a ka Moi Iulesia." Aole i pau pono keia mau huaolelo, ua komo mai la ke keiki alii ma ka ipuka, a ku koke ae la ke kanaka ilihune iluna me ka wehe ana mai i kona papale no ka hoomaikai ana aku iaia, aka, pane koke mai la kela "E noho oe ma kou noho e ka aoo, aole au i hele mai no ka hoomaikai ia mai, a aole no hoi o'u manao e hookiekie ae maluna o kekahi kanaka i lehulehu na makahiki e like me kou. Ua o mai na hina o kou poo, a ua nawaliwali oe, a owau nei la, he opio wale no, aole i ike i na loina o keia ola ana, ke wehe aku nei au i ko'u papale imua ou, me ke aloha pumehana, a wehe ae la ia i kona papale, lalau aku la i ka lima o ka elemakule a kau mai la i kona umauma. "O keia anei ke kanaka e hiki ai ke hai mai no ko'u makuakane i aloha nui ia?" wahi a ke keiki alii.
"Ua hai mai nei ia he kanaka Keretana oia," wahi a Eumeusa, "a he koa oia; aka o ka oiaio a me ka ole, nana no ia e hooia mai. O kona kulana i na la i hala ua maopopo ole, a o kona kulana i keia manawa, ua hiki wale no ke hoomaopopo iho. E like me kona ano kulana, pela wau e haawi aku nei iaia ma kou lima."
"E like me kona ano," wahi a ke keiki alii, "pela wau e lawe mai ai iaia, aka, i hea la ia e hooluana ae ai, oiai ua hoowahawaha loa na'lii o ka aina i na kanaka o keia ano i keia manawa, a he pomaikai nui kona ina ia e pakele mai ka hana ino ia e ia poe, oiai o ka mea nui ia lakou ka hana ino ana i na makaainana."
Me na waimaka o Iulesia i ku ae ai iluna a pane mai la, "Oiai ua oluolu ia kela a me keia e pane aku imua ou e ke keiki alii opio, ua hiki ole ia'u ke huna iho i ka hai ana aku no ka uhi paa ia ana o ko'u puuwai e ka aahu waimaka no kau mau olelo aloha a makee kanaka, a me ka hoomaopopo ana ae no ka hana ino a keia poe alii, oiai o oe ka mea kuleana ma ka noho'na poo a moi. Heaha la ke kumu o keia? He hookuu aku anei nou ia lakou e hana e like me ko lakou makemake? A he mea paha na kou aupuni i hana ai i kulike ole me ka makemake o keia poe? A he ano hookae paha nou ia lakou? He koo ikaika ka lehulehu no ke kanaka e kaukai ana maluna o lakou ke hiki aku i ka wa pilikia."
"O ka ohana o kuu makua Iule sia he kakaikahi loa lakou," wahi a ke keiki alii, "aohe o'u mau hoahanau ponoi e hiki ai ke kokua mai ia'u ma kekahi mea, a he lehulehu na kanaka o keia poe, a he ikaika lakou. Ua loohia ia ka ohana o Asetiusa e na manao ino o na kupua o ka lewa, a ua haawi ia mai he mau hooilina pakahi. O Laetasaka Asesiusa keiki hookahi, a na Leatasa o Iulesia; a na Iulesia hoi owau hookahi, ka mea hoi ana i haalele opio iho ai, aka, o ka hopena o keia mau mea a pau aia no ia ma ka lima o na kupua." Oiai laua nei e kamailio pu ana, ua hele aku la o Eumeusa e nana i na holoholona ma ke kula, a haalele iho la ia laua nei e noho ana maloko o ka bale.
I ha hala ana aku o Eumeu sa, a noho iho la laua nei, aia hoi, ua hoike mai la ke kupua Mineva iaia iho imua o Iulesia me ka ike ole mai nae o kana keiki, a haawi mai la i na hoailona ia Iulesia, a hoomaopopo iho la keia ua hiki mai ka manawa e hoike aku ai iaia imua o kana keiki. I ka manawa pokole, ua hoi hou mai la kona ano mua, a ike aku la o Telemacusa ma kahi o ka elemakule ilihune ana i kamailio pu aku ai, he kanaka ui ano moi, iloko o ke kanaka makua o kona mau makahiki me na hiohiona koa wiwo ole maluna o kona helehelena, a ma kahi o na welu lepo, he mau silika i awili ia me ke gula, a he kaei hoku daimana ma kona umauma, me ka pahikaua kila i hoonaniia me ke kuau momi e ku kilakila mai ana imua ona me ka eehia nui.
"Na kekahi kupua i hoohanohano mai nei i keia hale me na mea kupanaha," wahi a ke keiki alii, a huli ae la ia me ka manao e hoomaikai aku, aka, pane koke mai kona makuakane me ka i ana mai, "E haka pono hou mai kou mau maka ia'u, aole au he mea ano kupanaha. Heaha la kou mea i kapa mai ai ia'u he ano kupua? Aole au he mea e ae, o kou makuakane no; owau no ia. Owau no ia o Iulesia, a mamuli o ko'u kaawale ana ma na aina mamao ke kumu o kou hana ino ia ana e na'lii opu ino o ka aina nei."
A puliki aku la ia i kana keiki me ke aloha, a hookuu aku la i na waimaka ana i aua ai no ka manawa loihi e hiolo ana, me ka uwe helu ana ae i na wahi ana i hele ai me na pilikia i hooikaika ia no ke ake nui e ike hou i ke one oiwi, ke aloha o kana wahine, a me na hiohiona o kana keiki hookahi.
(Aole i pau.)
LUNA HOOPONOPONO O KA LAHUI HAWAII;—Aloha oe:
Ma ka hoomaka ana o keia makahiki, ua olelo ae ka Luna Hooponopono o ke Kuokoa, e haawi ana oia i makana maikai na ka poe a pau e hookaa mua ana i na Dala Elua no ka makahiki; a iwaena no nae o ka pilikia a me ka ilihune, ua hoomanawanui au a haawi aku i keia mau dala me ka manaolana e loaa io mai ana kekahi kii maikai—kakali iho la au a hala keia mau mahina ekolu a keu—hiki mai la kekahi kii kohu ole imua o'u. Nui kuu mahalo ia Kamehameha I., aka ma kuu nana ana i ua kii nei, he kii ku i ka hoohenehene maoli no keia, e nana i na kii o Emma Kaleleonalani, K. IV a me K. V, ua like anei me keia kii inoino pono ole o ka hana ia'na.
Ea, ke hoole loa nei au aole i like pu me ke kii o ka Makua Alii e kau ana ma Aliiolani Hale, aole i ano like iki, he ole loa no. A he oiaio maoli ka olelo a na kanaka a'u i lohe, i ka hiki ana mai o ua kii hoohenehene la a kau ia ma ka puka aniani o Wini, i iho la lakou, "he alii keia no Nu Zilani mai, makehewa ke kali ana i keia makana, me ke kuhi aku la hoi he kii kupono keia e kau ai ma ko kakou mau hale i mea hoonani hale, eia ka hoi he mea hoohenehene wale no." Ke kapa nei au i ke Kuokoa, he mea aloha ole, hoohenehene alii, e malama ole ana i ke kanawai elima o na kanawai o ke Akua, ma kona hoinoino ana i ka Makua Hanohano i ka mea nana i nai i keia mau mokupuni a lilo i hookahi malalo o kona malu. Ina paha e hiki ana keia kii kohu ole i Hawaii, aole e ole ka onioni o na iwi kupapau o keia alihikaua i mahalo nuiia, i kona lohe ana he kii keia no kona helehelena maikai, i mahaloia e na mea a pau. POHAKU.