Ka Lahui Hawaii, Volume I, Number 17, 22 ʻApelila 1875 — Page 4
Na Ekalesia o Kawaiahao a me Kaumakapili.
Halawai kakahiaka, la Sabati .... hora 10½
Halawai po ..... hora 7½
Halawai Apana auina la ..... hora 3½
Kula Sabati ..... hora 9½
NA KULA SABATI.
NA HAAWINA.
Mei 16.—HE MAKUAHINE HAIPULE—I Samuela I: 21—28.
21 A o ua kanaka la, o Elekana, a me ko kona hale a pau, hele aku la e kaumaha aku ia Iehova i ka mohai makahiki, a me kona hoohiki ana.
22 Aka, aole hiki aku o Hana, no ka mea, olelo aku la ia i kana kane, Aia a ukuhiia'ku ai ke keiki, alaila lawe aku au iaia, e ikea ia ma ke alo o Iehova, a e noho mau loa ia ilaila.
23 I mai la o Elekana kana kane iaia, E hana oe i ka pono i kou manao: e noho, a hiki mai ka manawa e ukuhi aku ai oe iaia: e hooko mai o Iehova i kana olelo. Noho iho la ka wahine e hanai i ke keiki, a hiki i ka wa e ukuhi aku ai iaia.
24 A i ka wa i ukuhi aku ai ia i ke keiki, lawe aku la oia iaia me na bipikane ekolu, hookahi epa palaoa, hookahi hue waina hoi, a lawe aku la iaia i ka hale o Iehova ma Silo: a opiopio no hoi ke keiki.
25 Pepehi iho lakou i ka bipikane, a lawe aku la i ke keiki ia Eli.
26 Olelo aku la ia, E kuu haku, ma kou ola ana, e kuu haku, owau no ka wahine i ku pu me oe maanei e pule ana ia Iehova.
27 O keia keiki ka'u i pule aku ai; a ua haawi mai o Iehova ia'u i ka'u noi a'u i noi aku ai iaia.
28 No ia mea, ke haawi aku nei au iaia no Iehova. I na la a pau o kena ola ana e haawiia oia no Iehova. A hoomana aku la lakou ia Iehova malaila.
——:o:——
O ka mea nui iloko o keia mokuna, o Hana ka makuahine o Samuela. He makua haipule. Ua ike ia ma keia mokuna: I. Kona kaumaha, p. 1—8. II. Kana pule me ka hoohiki ana i ke Akua, p. 9—18. III. Ka hanau ana o Samuela, p. 19—23. IV. Haawi ia oia i ke Akua, p. 24—28. Pauku 21—28 ka haawina no keia la.
Hele o Elekana i ka luakini e hoomana ia Iehova, a e mohai i ka mohai makahiki, p. 21. Aole i hele o Hana, p. 22; mamua hele pu no o Hana, aka, no ka loaa ana o ke keiki ua noho oia e hanai keiki. Eia paha kekahi, ua manao oia e noho pu me ke keiki a kupono ua keiki nei ke hele pu me ia, alaila lawe oia a waiho loa iaia ma ka hale o ke Akua. Hanai iho la ia i ke keiki a hiki i ka wa e ukuhi ai, lawe aku la iaia, me na bipikane ekolu, p. 23 a me 24. I ka wa hea ko Samuela ukuhi ia'na? He mea maa i kela lahui ka hanai ana i na keikikane i ka waiu a pau na makahiki ekolu, alaila ukuhi. Ua manao kahi poe ua pili keia ukuhi ana i kona waiho ana'ku i na manao kamalii, i ka pau ana paha o na makahiki he umi. Aka, i ka nana ana i keia moolelo, ua lawe kona makuahine iaia i ka luakini i ka wa i pau ai ka makahiki ekolu o kona ola ana, "me na bipikane ekolu," he mau mohai no na makahiki ekolu paha o ke keiki; A i ole ia no na mohai ekolu paha; mohai kuni; mohai hala a mohai hoomalu. "Epa palaoa;" o ka epa, he ana ia no ka palaoa, kulina a me na mea like. "Silo," oia kahi o ka luakini hoano; malaila ka pahu berita i malama ia mai na la hope o Iosua a hiki i ka wa o Samuela. Lawe mai la o Hana i ke keiki ia Eli, olelo aku la, "o keia keiki ka'u mea i noi ai," a haawi lilo aku la i kana keiki na Iehova, p. 25—28.
1. Na ke Akua na keiki, Nana i haawi mai i na makua. E hanai ia na keiki Nona e pono ai. 2. Ua maa na makua pono i ka haawi ana aku i na keiki no ke Akua, me ke ao aku ia lakou e hoolohe Iaia. 3. He mea pono ke ao ia na keiki opiopio e hoomana i ke Akua. 4. Aole make hewa na pule ana o na makuahine haipule.
Cimona a me ka Hua Pi-Gula.
[HE KAAO KUPUA.]
MOKUNA II.
KA HUA WAIWAI.
I KA WA i haalele aku ai o Cimona i ka luahine ma kapa o ke alanui, ua hoopoina koke iho la oia no ua hua pi nei ana i haawi mai ai iaia, no ka mea, aole oia i manao iki ua oi ae kona maikai mamua o kekahi mau hua pi e ae, aole no hoi i ma nao ua oi aku ka waiwai o kona hua; nolalaila, ua waiho wale ua hua pi nei iloko o kona pakeke no kekahi manawa loihi, a hiki wale i kekahi la oiai oia e hana ana ma kona kihapai i ka wa kakahiaka, a e hoomaka ae ana hoi ka la e puka; no ka mea, he wahi hale uuku no kona, a me kahi kihapai nona ponoi iho; aia hoi, pa-pa pono mai la ke kukuna o ka la maluna o kahi ana e hoomakaukau ana e kanu i kekahi mau papapa, no ia mea i hoomanao ae ai oia no kana hua pi.
"He pono au e kanu i ka hua pi maanei," wahi ana; "ua olelo mai ka luahine e kanu a hohonu iloko o ka lepo, ma kahi e papa pono ia ana e ka la, manao au o keia kahi maikai loa. Ua hai aku au iaia, e hana no au, a o ko'u pono wale no e hooko i ka'u olelo, aole no nae o'u manaoio loa i kana olelo."
Nolaila kohi iho la oia i ka lua a hohonu, a kukulu ae la i wahi laau malaila, i mea e ike ai oia ke ulu ae.
Iloko o kekahi mau la pokole, hoomaka ae la e ulu, aka, aole no oia i malama pono, no ka mea, manao no oia he hua pi wale no, aole he waiwai o ka makaala loa ana iaia, oiai, aole ia e hoohua mai ana a lawa pono no ka aina hookahi o ka la. Ulu ae la ua kumu pi nei a kiekie, ike aku la keia ua kiwi i ka makani, kukulu ae la oia i na laau a puni e like me kana i olelo ai e hana pela, i mea e hoomau ia ai kona ku ana mai ka hakihaki ia e ke kolohe o ka makani.
Aohe nui o na hua maluna o ua kumu pi nei, he iwakalua no hua loloa, aka, he ohaha nae, a halenalena hoi ka waihooluu.
"Ma ka waihooluu o ka ili o keia mau hua pi, aole o'u manao he ono lakou ke ai," wahi a Cimona iaia iho i kekahi kakahiaka, a iaia e olelo ana pela, uhaki mai la oia i kekahi hua loloa, a hoopoheke ae la, ia wa, he mea e kona haohao i ka ike ana ua piha ua hua loloa la me na popo gula liilii, i like ka nui me ka hua pi oo!
Anaanai ae la oia i kona mau maka i hoomaopopo ai oia i ka oiaio, e ala io ana paha oia; aka aole he moeuhane kana i ike ai,—aia, he umi mau popo gula paakiki iloko o ka wahi lenalena hookahi o ka pi.
Me ka puuwai i piha i ka hauoli i hoomaka aku ai oia e ohi mai i na mea a pau i koe, a ike iho la ia ua like wale no na hua o kela a me keia me ko ka mea mua; nolaila, mailoko mai o kana mau hua pi loloa he iwakalua i loaa ai iaia he elua haneri popo gula.
"He oiaio ka olelo a ka luahine i hai mai ai," wahi ana, "ua hoohua io mai ke kumu pi i ka hua maikai; aka, aole e pono ia'u ke hookano no keia waiwai, a e molowa hoi, o hoomaunauna koke auanei au a ilihune hou e like me kuu wa mua. He mea kupanaha maoli ina e hoopuka hou mai ana kekahi o keia mau hua pi gula, i kumu pi hou o keia ano, ina wau e kanu hou iloko o ka lepo ma keia makahiki ae. Aka hoi, e pono au e hoao wale no, a ma ia manawa, e hana no au me ka noonoo no na mea i loaa ia'u ano."
I kona noonoo akahele ana me keia, hookaawale ae la oia i kekahi o na popo uuku lilelile i anoano kanu, alaila, hoohee iho la oia i na hua e ae a pau a lilo he puupuu gula nui hookahi.
Me keia gula i hiki ai iaia ke kuai i ka hale wili palaoa, me ka hale noho maikai, a me ka mahinaai, a pela i lilo ai oia he kanaka wili palaoa, e loaa koke ai iaia ke alanui e hiki aku ai i ka waiwai, ina aole e hoohua mai ana ke kumu pi i na anoano gula nana. (Aole i pau.)
He Nane, Akahi.
Elua o'u mahele inoa, he 11 o'u mau hua.
Ko'u 3 4 5 9 pili i ke kanaka.
Ko'u 6 1 2 he inoa no kekahi ia.
Ko'u 6 4 he mea mai ka lani mai.
Ko'u 2 3 4 pili i ka waa.
Ko'u 3 4 2 he mea hana na ke kanaka.
Ko'u 4 5 6 he inoa no kekahi ia.
Ko'u 7 11 he mea hana na ke kanaka.
Ko'u 8 7 10 11 kani na ka manu liilii.
Ko'u 8 9 7 he inoa hou no ka ia.
Ko'u 11 9 pili i ka hale.
Ko'u 8 10 pili i ka mea kahiko.
Ko'u 6 1 9 he inoa no ka ia.
Ko'u 1 11 8 7 kakaolelo akamai.
Ko'u 1 7 he mea kolo.
Ko'u 5 11 8 he mea hana na ke kanaka.
Ko'u 2 5 9 he olelo na ke kanaka.
Ko'u 3 4 5 2 pili i ke kanaka.
Ko'u 3 6 ua hoikeia ma Mataio 6:19.
Ko'u 1 2 he lama no ke ao.
Ko'u 1 8 11 he holoholona.
Ko'u 1 10 5 7 he lau opiopio.
Ko'u 1 4 9 mea i hookapuia.
Ko'u 5 4 2 he mea lealea.
Ko'u 1 6 4 10 mailoko mai o ke kanaka.
Ko'u 3 11 2 e hai mai ana ua ao.
Ko'u 3 4 8 9 he mea ulu.
Ko'u 3 7 5 6 he halelana.
Ko'u mahele inoa mua, he kukui malamalama.
O ka mahele elua, he hoopono.
Ko'u inoa holookoa, ka olelo a ke Akua.
Owai la wau, e hai mai.
He nane, Elua.
He umi o'u mau hua.
Ko'u mua 2 3 4 he wahi e make ai.
Ko'u 3 4 5 he mea kahiko no ke kanaka.
Ko'u 6 7 8 pili i ke kanaka.
Ko'u 2 3 4 5 8 inoa no kekahi ahupuaa.
Ko'u 3 4 7 8 he mea iloko o ke kai.
Ko'u 6 8 he inoa no kekahi manu.
Ko'u 1 5 6 he holoholona.
Ko'u 9 5 1 8 mea nana ouli.
Ko'u 3 5 10 koolua no miko.
Ko'u 7 10 he mea paani na kamalii.
Ko'u 9 6 10 he inoa no kekahi laau.
Ko'u 7 6 9 10 aia i ka lani.
Ko'u 9 10 1 5 aole lohe.
Ko'u 7 5 3 8 he inoa no kekahi aina.
Ko'u 1 6 9 10 pili i ka eha ana o ke kino me ka manao.
Ko'u 2 3 4 10 pili i ka miki.
Ko'u 7 6 5 he ai no ka wa wi.
Ko'u 10 7 5 he mea ulu.
Ko'u 5 8 he manu.
Ko'u 9 6 7 8 mea ike ole ia.
Ko'u 7 2 pili i ka luakupapau.
Ko'u 7 10 3 10 kapa no na manu.
Ko'u 7 2 5 he paani kaula.
Kuu inoa he hooilina no Hawaii.
Kuailo mai ia'u. OAHU.
WIL DER & CO.,
(WAILA MA.)
AIA MA KE KIHI O
ALANUI PAPU ME MOIWAHINE!
Ua hoolako mau ia me ke kuai ana aku i na
Papa me na Lako Kukulu Hale
O NA ANO A PAU.
NA PANI PUKA!
PUKAANIANI,
OLEPELEPE,
LAKA,
AMI-LIILII,
AMI-LOLOA.
PENA o na ano a pau,
AILA PENA,
VANIKI, &c.
Na Balaki Pena me Puna,
Na Pepa Hale me na Lipine Pepa.
Aniani, Paakai, &c.
O na mea a pau maluna ae e kuai makepono loa ia aku no ke DALA KUIKE. 7-1y
Laau Ola, Laau Ola.
AIA MA KAHI O
DILLINGHAM & CO.
KA LAAU KAULANA A
BISHOP SOULE!
HE LAAU HAMO MAIKAI KEIA!
a ua kaulana iwaena o ka poe nana i hoao; he mea e ola'i
Ka Hui, Lumakeke, Kikala-hanee, Mau-i, O a me na mai o ia mau ano.
UA HOAO IA KEIA LAAU A UA MAHALO nui ia. "He umikumamalua makahiki o ka oopa ana o kekahi mea, a i keia laau ua ola koke." Wahi hoi a kekahi, "He laau waiwai loa keia no ka hikiwawe o kona hoola ana." wahi hoi a kekahi, "Ua pau ko'u hoomaloka, ua hoao au i na laau e ae a pau, aole i ola kuu LUMAKEKE, he nui na makahiki o kuu kaa ana i ka eha, a i nei laau ua ola au, ola loa." Eia hou ka kekahi, "He nui na makahiki o ka waiho ana o kuu wahine ma kahi moe me ka mai, ua lapaau ia aole ola, a i ko maua lohe ana i keia laau kaulana, ua hoao ia, a ua ola koke ia iloko o na pule eono." E hoao ka poe mai i keia laau kaulana. Aia ma ka Halekuai o DILLINGHAM & Co., oia hoi ka hale o Kaimana.
Laau Kaulana
A KAUKA SUCH!
He laau e ola'i ke KUNU, ka eha o ka PUU, me ka HANO me na eha a pau e pili ana i ke AKEMAMA. Aia ma kahi o Dillingham & Co., ma ka Halekuai o Kaimana.
7-1 y
G. WEST!
HALE HANA KAA HOLO LEALEA ME na kaa hali ukana. E hana hou ia no hoi na kaa nahaha no ka uku oluolu. E kapiliia na kapuai lio, no ka uku kupono. Ma ka hale hana mua o Mr. Benfield, ma ke Alanui Alii. 7-1y
NA BUKE
I HOOLAHAIA E KA PAPA HAWAII
—ME KE—
KUMUKUAI O KELA ME KEIA.
BAIB ALA HEMOLELE NUI ILI GULA NANI me na kuhikuhi ma na aoao ..... $12.00
Baibala Hemolele Nui ili eleele kaekae wai gula ..... 5.00
Baibala Hemolele uuku iki iho kae wai gula ..... 8.00
Baibala Hemolele uuku iki iho kae wai gula ..... 4.00
Baibala Hemolele ili eleele ..... 2.00
Kauoha Hou ili gula nani me na kuhikuhi ..... 3.00
Kauoha Hou ili eleele kaekae wai gula ..... 1.00
Kauoha Hou ili eleele ..... .75
Kauoha Hou Hapa Haole ..... .75
Moolelo Ekale sia ..... .50
Haiao ili lahilahi ..... .10
Hele Malihini ana ..... .25
No ko ke Akua ano ..... .25
Hoike Palapala Hemolele ..... .25
Moolelo o Hene ri Opukahaia ..... .15
Hoike Akua ..... .25
Wehewehehala ..... .25
Ninau Hoike ili manoanoa ..... .50
Ninau Hoike ili lahilahi ..... .20
Kumumua Kula Sabati ..... .20
B uke Lawe Lima ..... .10
He Buke no ka Pope ..... .15
Ui Kula Sabati Helu 3 ..... .25
Ui Kula Sabati Helu 4 ..... .15
Ui Kula Sabati Helu 5 ..... .25
B uke Euanelio o Ioane Hapahaole ..... .10
B uke Wehewehe Huaolelo Baibala, elua ano ..... 2.00
B uke Wehewehe Ano Mataio ..... 1.00
NA KAUOHA HOU PAKEKE.
Ili gula nani ..... 1.50
Ili eleele kaekae nani ..... .50
Ili eleele ..... .35
KAUOHA HOU PAKEKE ME NA HALELU.
Ili gula nani ..... 1.70
Ili eleele kaekae wai gula ..... .65
Ili eleele ..... .50
NA HALELU PAKEKE.
Ili Gula nani ..... .50
Ili eleele kaekae wai gula ..... .30
Ili eleele ..... .20
Ka Hae Hoonani (Buke Mele) ..... .25
NA BUKE MELE.
Himeni Hawaii ili nani ..... 1.75
Himeni Hawaii ..... 1.00
Kumu Leo Mele ili manoanoa ..... .50
Kumu Leo Mele ..... .10
Li ra Kamalii ..... .25
Li ra Hawaii 1848 ..... .25
Li ra Hawaii 1855 ..... .25
Hae Hoonani ..... .25
Leo Hoomana ..... .20
EIA NA BUKE HAAWI WALE.
PALAPALA LIILII—
Helu 4—Makemake anei oe i ke ola?
Helu 6—E hele i o Kristo la.
Helu 7—Ka hoi ana mai o ke Keiki Uhauha.
Helu 11—No ka hoohiki wahahee i ke Akua.
Helu 16—Ka Eehia ana o ka Ahaaina a ka Haku a me ka Bapetizo ana.
Helu 17—Mai hana ino i na holoholona.
Helu 18—No ka mahi ana, kuai ana a me ka inu ana i ka Awa.
Ka Davida Malo Kumumanao.
Ka Moolelo o Batimea Puaaiki.
Aia ke keena kuai buke o ka Papa Hawaii ma ka huina o Alanui Betela me Alanui Kalepa, e kokoke ana i ka Hale Leta. J. F. POKUE.
Kakaule ta o ka Papa Hooko o ka Ahahui Euanelio o ko Hawaii Pae Aina.