Ka Lahui Hawaii, Volume I, Number 16, 15 April 1875 — Page 4
Na Ekalesia o Kawaiahao a me Kaumakapili.
Halawai kakahiaka, la Sabati .... hora 10½
Halawai po ..... hora 7½
Halawai Apana auina la ..... hora 3½
Kula Sabati ..... hora 9½
No ka Mea Hiamoe.
1. E ka hiamoe e, e ala'e,
Mai wikiwiki oe, e lapee iho,
O ohi i ka ole
I ka hua ailo,
Hui.—He wa imi nei,
Ma ke kula nei,
Inu no a mau
I ka wai ono o ka ike.
2. E ka lihilihi e, e pale aku,
I ke kaunu ana, me ka hiamoe e,
O ohi i ka makani,
I ka puahiohio.
Hui—He wa imi nei, &c.
3. E na kumu e, makaala'e,
I na haumana, e hiamoe e,
O ohi oukou,
I ka hilahila mau.
Hui.—He wa imi nei, &c.
4. E na hoa kula e, e nana'e
I ka Solomona, i hai mai ai,
He Lei Momi Nan i
Ka naauao, e lei a mau.
Hui.—He wai imi nei, & c.
R. S.
NA KULA SA BATI.
NA HAAWINA.
Mei 9.— Ruta a me Naomi.—Ruta I:16—22.
16 Olelo mai la o Ruta iaia. Mai nonoi mai oe ia'u, e haalele ia oe, a e hoi aku, mai ka hahai ana ia oe, no ka mea, ma kou wahi e hele ai malaila au e hele ai, ma kou wahi e moe ai, malaila au e moe ai: o kou poe kanaka, no'u ia poe kanaka, o kou Akua, no'u ia Akua.
17 Ma kou wahi e make ai, malaila au e make ai, malaila hoi au e kanuia'i: o ka make oia wale no ka mea e kaawale ai; ina aole, me ia hoi e hana mai ai o Iehova ia'u.
18 A ike mai ia, ua ikaika loa ko Ruta manao e hele pu me ia, alaila, oki iho la kana olelo ana iaia.
19 Hele pu no laua, a hiki aku la i Betelehema. A komo aku laua iloko o Betelehema, pioloke iho la ke kulanakauhale a pau no laua; i ae la lakou, O Naomi anei keia?
20 I aku la oia ia lakou, Mai hea mai oukou ia'u o Naomi, e hea mai oukou ia'u o Mara, no ka mea, ua hookaumaha loa mai ka Mea mana ia'u.
21 Ua hele lako aku au iwaho, hoihoi nele mai o Iehova ia'u. No ke aha la oukou e kapa mai ai ia'u o Naomi? No ka mea, ua hoohaahaa mai o Iehova ia'u, a ua hookaumaha mai o ka Mea mana ia'u.
22 Pela i hoi mai ai o Naomi, a me kana hunonawahine pu me ia, o Ruta, no Moaba, a hele mai no ka aina o Moaba mai, a hiki mai laua i Betelehema i ka manawa o ka hoiliili mua ana i ka hua bale.
——: o :——
Eia ka mea i ike ia iloko o keia mokuna, o ko Naomi mau pilikia. I. Pilikia i ka wi, p. 1, 2. II. Make kana kane, p. 3—5. III. Pilikia i na hunona p. 6—18. IV. Hoi hou i kona wahi me ka ilihune, p. 19—22. Haawina no keia la, p. 16—22. Ua hele o Elimeleka me kana ohana (ka wahine me na keiki elua) mai Kanaana aku a i Moaba ma kela aoao o Ioredane; o ka wi ma Kanaana ke kumu o keia hele ana. A i ka noho ana ma Moaba, ua mare ua mau keikikane nei elua me na kaikamahine o ia lahui. Make aku la o Elimeleka ma ia aina, a me na keiki ana elua. Mahope lohe o Naomi ua ola kona aina ponoi, ua pau ka wi. Ulu kona manao e hoi i kona wahi. Hahai na hunona iaia; hoihoi mai oia ia laua, aole nae hiki, a hoopaapaa lakou. A na Ruta i hoopau i ka hoopaapaa ana ma kana olelo hoohiki, p. 16, 17. Hooki o Naomi i kana olelo, p. 18. I ka hiki ana aku o Naomi i kona kulanakauhale ponoi, pioloke na makamaka, kanalua kahi poe nona, p. 20—22. "Mai hea oukou ia'u o Naomi," o ke ano o ia olelo he oluolu. "E hea oukou ia'u o Mara, eia ke ano, he awaawa. Hoololi ke Akua i na poino i pomaikai. Pela ma ka moolelo o Ruta me Naomi. 1 E koho ia o Iehova i Akua no kakou, e pono ai. 2 Aia a koho kakou i ke Akua, alaila, e koho kakou i kona lahui no kakou. 3 Aia a koho kakou i kona lahui i lahui no kakou, alaila, mai noho a hoi hope. E noho pu me lakou; e hapai pu me lakou i na hana o ke Akua, a i na he wa pilikia, e koho pu i ka pilikia me lakou, e like me Ruta a me Mose hoi mamua loa aku. E hoohiki kakou mamuli o Kristo e like me ko Ruta hoohiki ana mamuli o Naomi.
Na ninau me na pane.
Ua ninau mai kekahi kumu kula Sabati o Honolulu.
1. Ma ko Iosua imi ana a loaa ka hewa o Akana, he kumu alakai kupono anei oia no na kahu ekalesia Hawaii e hana aku ai iloko o ko lakou mau kihapai?
2. Aole anei o na hihia i waiho wale ia iloko o na ekalesia, me ka hooponopono ole ia, kekahi kumu o ka make ana o na hana pono?
No ka ninau mua ke pane nei makou: Ae, he kumu alakai pono o Iosua. Ua makaala oia, a ua kiai pono i ka ohana hipa a ka Haku. O ka rula alakai a na kahu no ka hooponopono ana i na ekalesia, oia no ka Olelo a ke Akua. E nana ma Mat. 18:15—17; II Tesalonike 3:14, 15.
Ma ka ninau elua ke pane kanalua ole nei makou, he oiaio loa ia. O ka hookipa ia'na o na hana ino iwaena o ka poe maikai, he mea ia e ino ai ka ekalesia holookoa, a o ka make no ia o na hana pono.
—Ua ninau mai o Pueikeanu: 1. Heaha ka ekalesia? 2. Ua mana like anei na lala ekalesia ma kekahi waiwai o ka ekalesia? 3. Pehea hoi ina e kue kekahi hapa a haalele i ka noho like, he mana no anei ko lakou ke koi i ko lakou hapa o ka waiwai i loaa ia lakou? (Ka ekalesia paha?) 4. He mana no anei ko lakou e kue i ke kahunapule i poniia no ua ekalesia la? Ko Kona Hema, Hawaii, keia mau ninau. Ua noonoo akahele ia na ninau, a ke hoopuka aku nei makou i na haina me ke kanalua ole, ua maopopo ka oiaio o na haina a makou e pane nei. Eia iho:
"Heaha la ka ekalesia?" Oia no ka poe manaoio i huipu, e malama i ka hoomana ia Iehova ke Akua oiaio hookahi, a e malama hoi i na oihana a Iesu Kristo i kauoha mai ai maloko o ke Kauoha Hou. Ua hoohui keia poe a lilo i ekalesia ma ka aelike i na kumu manaoio a me ka aelike hoi i ka berita ekalesia.
"Ua mana like anei na lala ekalesia ma kekahi mau waiwai o ka ekalesia?" I ka wa e noho launa pu ana na lala o ka ekalesia, me ka malama pu i ka hoomana a lakou i ae ai, a me ka malama pu i na oihana o ua ekalesia la, me ka hihia ole, a me ka haalele ole i na kumu manaoio, a me ka haalele ole i ka berita a lakou i ae ai, ua maka like lakou ma na waiwai o ka ekalesia.
"A pehea hoi ina i kue kekahi hapa, a haalele i ka noho like, he mana no anei ko lakou ke koi i ko lakou hapa o ka waiwai i loaa ia lakou?" Aole loa o lakou mana e koi i kekahi waiwai o ka ekalesia. No ka mea, ua haalele lakou i na kumu manaoio a me ka berita, a me na oihana o ka ekalesia. Ua koe ka waiwai a pau o ka ekalesia no ka poe i hookupaa.
"He mana anei ko lakou e kue i ke kahunapule i poni ia no ua ekale sia la?" Aole o lakou mana e hana i kekahi mea e pili ana i ke kahu o ua ekalesia la, ma kona ano kahu.
—Auhea oe e G. W. Mokuahai, ua loaa mai kau mau ninau ewalu. He mau ninau hoopaapaa waiwai ole, aohe makou e hai aku i na haina no keia mau kumu: 1. Ina e pane makou, e hu ana mawaho o na palena o keia pepa; aohe ia he waiwai no ka poe heluhelu. 2. Aole oe i ninau no ke ake e ike, o ka hooio a hoopaapaa kou makemake; aole o makou hopo no ia mea, aka, aohe he waiwai. 3. Ua pili na ninau no na hana pili hoomana kahiko loa. Ua pau ka hie o ia mau mea, ua polopolona. Ina he maikai ia oe ke naku iloko o ka pouli o na keneturia mua, me oe no ia, eia ko makou wahi waa iloko o ke keneturia umikumamaiwa e holo mua nei, aloha oe. Ina he wahi kaula kau, kiola ia mai.
Cimona a me ka Hua Pi-Gula.
[HE KAAO KUPUA.]
MOKUNA I.
KA WAHINE MAKILO.
ILOKO o kekahi la wela nopu o ka makalii, he wa hoi i hoohauoli ia ai ka honua e na pua, a me ka olino o ka la, e noho ana kekahi luahine ilihune ma kapa alanui.
I ka nana aku iaia, he mea e ka ilihune, no ka mea, ua weluwelu kona kapa komo a pau, a o kona koloka ulaula kahiko, ua kuakea a mae no hoi.
E ai ana oia i kekahi mau hua pi, noloko ae o kahi eke uuku ana e paa ana i ka lima, he wahi mea ai lapuwale, aole ana barena, aohe ia, a aole no hoi he wahi mea ai e ae e ai iho ai.
Aole oia i liuliu malaila, maalo ae la kekahi keiki, e ho-a ana i kekahi mau bipi waiu i ke kula mauu, a oiai hoi he kikila waiu kana e paa ana i ka lima, olelo aku la keia iaia, "E haawi mai anei oe i kau wahi kulu waiu na'u?"
"Aole," wahi a ua keiki nei, "no keaha la wau e haawi aku ai i ka waiu i ka mea e like ke ano me oe? ina he makemake kou i ka waiu, e pono oe e kuai mai, no ka mea, ke hai aku nei au ia oe, aole au e haawi wale aku i ka waiu."
Olelo aku la ka luahine, "Aole a'u dala e kuai mai ai i ka waiu, aka, e haawi aku no au ia oe i kekahi o kuu mau hua pi no ke kiaha waiu hookahi."
Akaaka ae la ua keiki pi nei me ka leo nui, me ka olelo ana, "He hua pi ka ke kumukuai o ke kiaha waiu! manao paha oe he hupo au. O kena eke pi okoa aole ia o ke kumukuai o ke kiaha waiu hookahi e like me ka kuu mau bipi i haawi mai ai. Aole, aole; ina he makemake kou i ka waiu e pono oe e uku mai. A! he hua pi ka ke kumu e make ai ke kiaha waiu! ha! ha! ha!" Pela i aka henehene mai ai ua keiki nei, a ho-a aku la i na bipi waiu ana, a nalo koke aku la.
"He puuwai lokoino ko kela keiki," wahi a ka luahine makilo iaia iho, "a i kona wa e nele ai, aole auanei he mea nana oia e kokua mai.."
Aole i upu iho, hiki mai la kekahi keiki opio me ke eke palaoa ma kona hokua. Nonoi aku la ua luahine nei, "E haawi mai anei oe i kau wahi palaoa, i hana iho ai au i wahi barena na'u?"
"Aole e hiki ia'u ke haawi aku ia oe," i pane mai ai ke keiki opio, "no ka mea, aole na'u; no kuu haku ia, a e hoihoi ana au i ka hale, mai ka hale wili palaoa mai kahi i wili ia ai. Ina na'u ponoi, e haawi aku no au i kekahi nau me kuu naau a pau. Aka, e noho ooe ia nei no ka hapalua hora a hoi hou mai au. E lawe mai no au i kekahi popo barena nau, no ka mea, ua ike au i kekahi wahine lokomaikai ma ka mahinaai, e haawi mai no oia ina wau e nonoi aku iaia, nolaila, mai hele e oe a hiki i kuu hoi hou ana mai."
"Lokomaikai maoli oe," i olelo aku ka luahine, "Ke hoomaikai aku nei au nou."
Hele aku la ua keiki nei me ke eke palaoa ana i auamo mai ai mai ka hale wili mai, a iloko o kekahi manawa pokole, hoi mai la oia me kekahi popo palaoa hou maikai i ka lima, "Eia e ka makuahine maikai, e lawe oe i keia popo barena nau."
"E hoomaikai ia oe e kuu keiki, he hana ku i ka lokomaikai kau i hana ai, a malia paha, e loaa no ia'u kekahi mea e uku aku ai ia oe ma kekahi o keia mau la."
"O! mai manao oe no ia mea," i pane aku ai ke keiki, "no ka mea, aohe o'u lilo no keia mea, o ka halihali wale ana mai nei no ia oe; ke hai aku nei au ia oe me ka oiaio, ua oluolu loa au e lawe aku oe ia me ka uku ole. Aloha oe; a me ka pomaikai pu kekahi nou."
"Alia iki," wahi a ka luahine, "aohe kumu o kou awiwi loa ana i ka hele aku, no ka mea, he mau wahi huaolelo pokole ka'u i koe nou. Owai kou inoa?"
"Ua kapa ia mai au o Cimona."
"A! he inoa maikai ia, a he inoa kaulana auanei ma kekahi la e hiki mai ana, ina e like ana kou naauao me kou maikai. Ano, e hoolohe mai i ka'u mea e hai aku ai. E lawe i keia hua pi a'u e haawi aku nei ia oe, a kanu iho iloko o ka lepo i hookahi kapuai ka hohonu, ma kahi e pa-pa pono ia ana e ka la i kona wa e puka mai ai; alaila e makaala oe i kona wa e ulu ae ai, a e paku ae i na laau liilii a puni i ole ai ia e poino, no ka mea he hua maikai kona. E hoomanao anei oe i ka'u olelo?
"Ae!" wahi a ke keiki me ka aka oluolu aku iaia. "Ke hoomaikai aku nei au ia oe, a aole hoi e hoopoina i kau olelo." Lalau aku la oia i ka hua pi, a hookomo iho la iloko o kona pakeke, aloha hou aku la i ka luahine, a hele aku la ma kona ala nui. (Aole i pau.)
LEWE RS & DICKSON
(O LUI MA.)
MEA KUAI PAPA A LAKO KUKULU HALE o na ano a pau.
AIA MA KE
Alanui Papu a me Alanui Moi
E LOAA AI NA
Pani Puka,
Puka Aniani,
Olepelepe,
Laka,
Ami Liilii,
Ami Loloa, & c.
PENA o na ano a pau,
Aila Pena,
Vaniki, &c.
NA BALAKI me PUNA
NA PEPA HALE me na LIPINE HALE.
O na mea a pau maluna ae, e kaui makepono loa
14] ia aku no ke DALA KUIKE. [1y
WIL DER & CO.,
(WAILA MA.)
AIA MA KE KIHI O
ALANUI PAPU ME MOIWAHINE!
Ua hoolako mau ia me ke kuai ana aku i na
Papa me na Lako Kukulu Hale
O NA ANO A PAU.
NA PANI PUKA!
PUKAANIANI,
OLEPELEPE,
LAKA,
AMI-LIILII,
AMI-LOLOA.
PENA o na ano a pau,
AILA PENA,
VANIKI, &c.
Na Balaki Pena me Puna,
Na Pepa Hale me na Lipine Pepa.
Aniani, Paakai, &c.
O na mea a pau maluna ae e kuai makepono loa ia aku no ke DALA KUIKE. 7-1y
Laau Ola, Laau Ola.
AIA MA KAHI O
DILLINGHAM & CO.
KA LAAU KAULANA A
BISHOP SOULE!
HE LAAU HAMO MAIKAI KEIA!
a ua kaulana iwaena o ka poe nana i hoao; he mea e ola'i
Ka Hui, Lumakeke, Kikala-hanee, Mau-i, O
a me na mai o ia mau ano.
UA HOAO IA KEIA LAAU A UA MAHALO nui ia. "He umikumamalua makahiki o ka oopa ana o kekahi mea, a i keia laau ua ola koke." Wahi hoi a kekahi, "He laau waiwai loa keia no ka hikiwawe o kona hoola ana." Wahi hoi a kekahi, "Ua pau ko'u hoomaloka, ua hoao au i na laau e ae a pau, aole i ola ku LUMAKEKE, he nui na makahiki o kuu kaa ana i ka eha, a i nei laau ua ola au, ola loa." Eia hou ka kekahi, "He nui na makahiki o ka waiho ana o kuu wahine ma kahi moe me ka mai, ua lapaau ia aole ola, a i ko maua lohe ana i keia laau kaulana, ua hoao ia, a ua ola koke ia iloko o na pule eono." E hoao ka poe mai i keia laau kaulana. Aia ma ka Halekuai o DILLINGHAM & Co., oia hoi ka hale o Kaimana.
Laau Kaulana
A KAUKA SUCH!
He laau e ola'i ke KUNU, ka eha o ka PUU, me ka HANO me na eha a pau e pili ana i ke AKEMAMA. Aia ma kahi o Dillingham & Co., ma ka Halekuai o Kaimana.
7-1 y
G. WEST!
HALE HANA KAA HOLO LEALEA ME na kaa hali ukana. E hana hou ia no hoi na kaa nahaha no ka uku oluolu. E kapiliia na kapuai lio, no ka uku kupono. Ma ka hale hana mua o Mr. Benfield, ma ke Alanui Alii. 7-1y